ဥရောပတိုက်၌ Libra ဒီဂျစ်တယ်ငွေကြေးကို တားမြစ်ပိတ်ပင်ရန်အတွက် ပြင်သစ်နိုင်ငံဦးဆောင်သည့် ဥရောပနိုင်ငံ (၅) နိုင်ငံတို့က စတင်လှုပ်ရှားလျက်ရှိ
ဥရောပတိုက်တွင် Facebook မှထုတ်ဝေသည့် Libra ဒီဂျစ်တယ်ငွေကြေးကို တားမြစ်ပိတ်ပင်ရန်အတွက် ပြင်သစ်နိုင်ငံဦးဆောင်၍ ဂျာမနီ ၊ အီတလီ ၊ စပိန်နှင့် နယ်သာလန်နိုင်ငံတို့ပါဝင်သောဥရောပထိပ်သီးစီးပွားရေးအင်အားကြီးမဟာမိတ် (၅) နိုင်ငံတို့က လှုပ်ရှားမှုများ စတင်ပြုလုပ်လျက်ရှိကြောင်း၊ Libra ဒီဂျစ်တယ်ငွေကြေးဆန့်ကျင်ရေး မဟာမိတ်အဖွဲ့သည် ဥရောပတိုက်၏ ငွေကြေးဈေးကွက် အတွင်း၌ Libraငွေကြေးကို လုံးဝသုံးစွဲခွင့်မပြုရန် ဆွေးနွေးညှိနှိုင်းလျက်ရှိပြီး ပြင်သစ်နိုင်ငံဘဏ္ဍာရေးဝန်ကြီးဌာန၏ ပြောရေးဆိုခွင့်ရှိသူက Libra ငွေကြေးကို သုံးစွဲခွင့်ပြုလျှင် နိုင်ငံများ၏ အချုပ်အခြာအာဏာနှင့်ငွေကြေးမူဝါဒထိန်းချုပ်နိုင်မှုတို့ကို ဆုံးရှုံးသွားလိမ့်မည်ဟု ယခုရက်ပိုင်းအတွင်း ပြောကြားခဲ့ကြောင်း သိရှိရပါသည်။
လက်ရှိအချိန်၌ ဥရောပနိုင်ငံများတွင် Libraငွေကြေးကိစ္စနှင့်ပတ်သက်၍ အပြန်အလှန် ဆွေးနွေးမှုများ ကျယ်ပြန့်စွာဖြစ်ပေါ်နေပြီးလွန်ခဲ့သည့် ရက်သတ္တပတ်များအတွင်း ဥရောပသမဂ္ဂ၏ စီးပွားရေး၌ အဓိကကျသော ပြင်သစ်နှင့်ဂျာမနီနှစ်နိုင်ငံ ပူးတွဲထုတ်ပြန်သည့် ကြေညာချက်၌လည်း Libra ငွေကြေးကို သုံးစွဲခွင့်ပေးပါက ငွေကြေးခဝါချသူများနှင့် အကြမ်းဖက်သမားများအား ငွေကြေးထောက်ပံ့နေသူများကို ခြေရာခံနိုင်တော့မည် မဟုတ်သည့်အတွက် Facebook ၏ Libraငွေကြေးကို ဥရောပတိုက်တွင် လုံးဝသုံးစွဲခွင့်မပေးရန် ဖော်ပြထားကြောင်း၊ Facebookကို ကမ္ဘာ့တစ်ဝန်းရှိလူပေါင်း (၂.၅) ဘီလီယံခန့်က သုံးစွဲလျက်ရှိကြောင်း သိရှိရပါသည်။
ဥရောပနိုင်ငံများရှိ ဗဟိုဘဏ်များသည် ဗဟိုဘဏ်များက ကျောထောက်နောက်ခံပြုထားသည့် ဒီဂျစ်တယ်ငွေကြေးများကို ထုတ်ဝေရန် စီစဉ်နေပြီး Libra ကဲ့သို့သော ပြင်ပအဖွဲ့အစည်းများမှ ထုတ်ဝေသည့် ဒီဂျစ်တယ်ငွေကြေးများကို မူတားမြစ်ပိတ်ပင်ရန် စဉ်းစားလျက်ရှိကြောင်း၊ ဥရောပနိုင်ငံများနည်းတူ အမေရိကန်ပြည်ထောင်စုတွင်လည်း Libra ငွေကြေးကို ထုတ်ဝေခွင့်မပေးရန်အတွက် တောင်းဆိုမှုများ ဖြစ်ပေါ်နေပြီး အမေရိကန်ကွန်ဂရက် လွှတ်တော်၌ Facebook CEO မက်ဇူကာဗက်အားခေါ်ယူ၍ အသေးစိတ်စိစစ်မေးမြန်းရန် စီစဉ်နေကြောင်း www.all-stocks.net အင်တာနက် website တွင် ဖော်ပြပါရှိပါသည်။