ဗြိတိန်နိုင်ငံနိုင်ငံ၏စီးပွားရေးတိုးမှုနှုန်းနှေးကွေးလျက်ရှိသည်ဟူသောစာရင်းအင်းအမှုဆောင်ရုံးမှထုတ်ပြန်သည့် အစီရင်ခံစာထွက်ပေါ်ပြီးနောက် ဗြိတိန်စတာလင်ပေါင်တန်ဖိုးကျဆင်းခဲ့မှု

ဗြိတိန်နိုင်ငံနိုင်ငံ၏စီးပွားရေးတိုးမှုနှုန်းနှေးကွေးလျက်ရှိသည်ဟူသောစာရင်းအင်းအမှုဆောင်ရုံးမှထုတ်ပြန်သည့် အစီရင်ခံစာထွက်ပေါ်ပြီးနောက် ဗြိတိန်စတာလင်ပေါင်တန်ဖိုးကျဆင်းခဲ့မှု

ဗြိတိန်နိုင်ငံ၏ စီးပွားရေးတိုးတက်မှုနှုန်းသည် ၂၀၁၂ခုနှစ်နောက်ပိုင်းစီးပွားရေး တိုးတက် မှုနှုန်းအနည်းဆုံးဖြစ်သည်ဟူသော ၂၀၁၉ ခုနှစ်၊ ဖေဖော်ဝါရီလ(၁၁)ရက်(တနင်္လာနေ့)တွင် ထုတ်ပြန်ခဲ့ သည့် ဗြိတိန်နိုင်ငံ စာရင်းအင်းအမှုဆောင်ရုံး(Office for National Statistics-ONS)၏ အစီရင် ခံစာထွက်ပေါ်ပြီးနောက်တွင် ဗြိတိန်စတာလင်ပေါင်တန်ဖိုးမှာ ကျဆင်းခဲ့ကြောင်း၊ ONS မှ ထုတ် ပြန်သည့် အစီရင်ခံစာ၌ ၂၀၁၈ ခုနှစ်၊ စတုတ္ထသုံးလပတ်တာကာလအတွင်း ဗြိတိန်နိုင်ငံ ၏ GDP တိုးတက်မှုနှုန်းသည် ၂၀၁၈ ခုနှစ်၊ တတိယသုံးလပတ်တာကာလတွင် ဖြစ်ပေါ်ခဲ့သည့် ၀.၆% ကို ပြည့်မီခြင်းမရှိဘဲ ၀.၂% ခန့်သာရှိခဲ့ကြောင်း၊ အလားတူ ၂၀၁၈ ခုနှစ်၊ ဒီဇင်ဘာလတွင်လည်း ဗြိတိန်နိုင်ငံ၏စီးပွားရေးနှောင့်နှေးမှုပမာဏမှာ မျှော်မှန်းထားသည့်ပမာဏထက်ကျော်လွန်၍ ၀.၄% ခန့်နှောင့်နှေးမှုဖြစ်ပေါ်ခဲ့ကြောင်း၊ သို့ဖြစ်ရာ ၂၀၁၈ ခုနှစ်တစ်နှစ်လုံးအတိုင်းအတာဖြင့် ဗြိတိန် နိုင်ငံ၏စီးပွားရေးတိုးတက်မှုပမာဏသည် ၂၀၁၇ခုနှစ်တွင် ဖြစ်ပေါ်ခဲ့သည့်၁.၈% ပမာဏအောက် ကျဆင်းကာ ၁.၄%ခန့်သာရှိခဲ့သည့်အတွက် ၂၀၁၂ ခုနှစ်နောက်ပိုင်း ဗြိတိန်နိုင်ငံ၏ စီးပွားရေး တိုးတက်မှုနှုန်း အနည်းဆုံးအနေအထားပင်ဖြစ်သည်ဟု ဖော်ပြထားကြောင်း၊ အဆိုပါအစီရင်ခံစာ ထွက်ပေါ်ပြီးနောက် ဗြိတိန်နိုင်ငံ၏စီးပွားရေးအပေါ် ရင်းနှီးမြှုပ်နှံသူများ၏ ယုံကြည်မှုလျော့နည်း သွားခြင်းနှင့်အတူ ဗြိတိန်စတာလင်ပေါင်တန်ဖိုးမှာလည်း ကျဆင်းသွားခဲ့ခြင်းဖြစ်ကြောင်း၊   ၂၀၁၉ ခုနှစ်၊ ဖေဖော်ဝါရီလ(၁၂)ရက်(အင်္ဂါနေ့)နံနက်ပိုင်းတွင် ကမ္ဘာ့ငွေကြေးဈေးကွက်အတွင်း ဗြိတိန်စတာလင်ပေါင်တန်ဖိုးမှာ ၀.၆၁%ကျဆင်းခဲ့ပြီး စတာလင်တစ်ပေါင်လျှင် အမေရိကန်ဒေါ်လာ (၁.၂၈၆၇)ဒေါ်လာလဲလှယ်မှုနှုန်းသို့ရောက်ရှိခဲ့ကြောင်း၊ အဆိုပါလဲလှယ်မှုနှုန်းအရ စတာလင်ပေါင် တန်ဖိုးသည် ရက်သတ္တပတ်(၃)ပတ်အတွင်း အနိမ့်ဆုံးအနေအထားပင်ဖြစ်ကာ ယခုဖေဖော်ဝါရီလ အတွင်း စတာလင်ပေါင်တန်ဖိုးမှာ ၁.၉% ခန့်ကျဆင်းလျက်ရှိသည်ဟု reuters သတင်းဌာနတွင်ဖော်ပြထားကြောင်း သိရှိရ ပါသည်။

အမေရိကန်ပြည်ထောင်စု၏ ရေနံထုတ်လုပ်မှုမြင့်တက်လာဖွယ်ရှိခြင်းနှင့် အမေရိကန်ဒေါ်လာတန်ဖိုးမြင့်တက် လျက်ရှိခြင်းတို့ကြောင့် ကမ္ဘာ့ရေနံဈေးနှုန်းမှာကျဆင်းခဲ့မှု

အမေရိကန်ပြည်ထောင်စု၏ ရေနံထုတ်လုပ်မှုမြင့်တက်လာဖွယ်ရှိခြင်းနှင့် အမေရိကန်ဒေါ်လာတန်ဖိုးမြင့်တက် လျက်ရှိခြင်းတို့ကြောင့်  ကမ္ဘာ့ရေနံဈေးနှုန်းမှာကျဆင်းခဲ့မှု

၂၀၁၉ ခုနှစ်၊ ဇန်နဝါရီလကုန်ရက်သတ္တပတ်အတွင်း အမေရိကန်ပြည်ထောင်စု၏နေ့စဉ်ရေနံထုတ်လုပ်မှုပမာဏမှာ စည်ပေါင်း (၁၁.၉) သန်းခန့်သို့ စံချိန်တင်ရောက်ရှိနေပြီး အမေရိကန်ပြည်ထောင်စု၏ ရေနံထုတ်လုပ်မှုပမာဏမှာကမ္ဘာပေါ်တွင် အများဆုံးထုတ်လုပ်သည့် နံပါတ် (၁) နေရာအဖြစ်ရပ်တည်လျက်ရှိကြောင်း၊ ထို့ပြင် ၂၀၁၉ ခုနှစ်၊ ဖေဖော်ဝါရီလ(၃) ရက်မှ (၈) ရက်အထိကာဖြစ်သောရက်သတ္တပတ်တစ်ပတ်တာကာလအတွင်း နိုင်ငံတစ်ဝန်းရေနံတူးစင်အရေအတွက်မှာ တူးစင်(၇) စင်သို့ ထပ်မံတိုးတက်လာခဲ့ပြီးစုစုပေါင်းရေနံတူးစင်အရေအတွက်မှာ (၈၅၄) စင်အထိရှိလာပြီဖြစ်သည်ဟု အမေရိကန်နိုင်ငံတစ်ဝန်းရေနံတူးဖော်ရေးဝန်ဆောင်မှုများပြုလုပ်ပေးလျက်ရှိသည့် Baker Hughes ကုမ္ပဏီ က ယခုရက်ပိုင်းအတွင်းထုတ်ပြန်ခဲ့သည့်အစီရင်ခံစာ၌ ဖော်ပြထားရာ နိုင်ငံအတွင်းရေနံတူးစင်အရေအတွက် မြင့်တက်လာခြင်းသည် ရေနံထုတ်လုပ်မှုမြင့်တက်လာမည့်အခြေအနေပင်ဖြစ်သည်ဟု ရင်းနှီးမြှုပ်နှံသူများကယူဆထားကြပြီး ဈေးကွက်အတွင်း ရေနံပိုလျှံမှုများဖြစ်ပေါ်လာမည့်အရေးအပေါ် စိုးရိမ်ပူပန်မှုများထွက်ပေါ်လာခြင်းနှင့်အတူ ကမ္ဘာ့ဈေးကွက်အတွင်းရေနံဈေးနှုန်းများ ကျဆင်းသွားခဲ့ခြင်းဖြစ်ကြောင်း သိရှိရပါသည်။

ထို့ပြင် ၂၀၁၉ ခုနှစ်၊ ဖေဖော်ဝါရီလ(၁)ရက်နေ့တွင် အမေရိကန်ပြည်ထောင်စု၊ အလုပ်သမားဝန်ကြီးဌာနမှ အလုပ်အကိုင်ရရှိမှုမြင့်တက်ခဲ့ကြောင်း အစီရင်ခံစာထုတ်ပြန်ခဲ့ပြီးနောက် အမေရိကန်ဒေါ်လာတန်ဖိုးစတင် မြင့်တက်ခဲ့ပြီးလွန်ခဲ့သည့် ရက်တ္တပတ်အတွင်း၌လည်းဆက်လက်အားကောင်းသည့်အနေအထား၌ ဖြစ်ပေါ်နေခဲ့ကာ အလုပ်လက်မဲ့ထောက်ပံ့ကြေး တောင်းခံမှုလျော့ကျခဲ့ခြင်းနှင့် အမေရိကန်ပြည်ထောင်စု၏ စီးပွားရေးအခြေအနေကောင်းမွန်လျက်ရှိသည်ဟုအမေရိကန်ဗဟိုဘဏ်ဥက္ကဋ္ဌကပြောကြားခဲ့ခြင်းတို့ကြောင့် အမေရိကန်ဒေါ်လာတန်ဖိုးဆက်လက်မြင့်တက်ခဲ့ကြောင်း၊ ထိုသို့အမေရိကန်ဒေါ်လာတန်ဖိုး ဆက်လက်မြင့်တက်ခဲ့သောကြောင့် အမေရိကန် ဒေါ်လာဖြင့်ပေးချေရသည့် ရေနံဈေးနှုန်းများပါ လိုက်ပါကြီးမြင့်ခဲ့ခြင်းကြောင့် ရင်းနှီးမြှုပ်နှံသူများ၏ ဝယ်လိုအားလျော့နည်းသွားခြင်းသည်လည်းရေနံဈေးနှုန်းများကို ကျဆင်းစေသည့်အခြားသောအချက်တစ်ခု ဖြစ်ကြောင်းသိရှိရပါသည်။

၂၀၁၉ ခုနှစ်၊ ဖေဖော်ဝါရီလ(၁၁)ရက်(တနင်္လာနေ့)နံနက်ပိုင်းတွင် နယူးယောက်ဈေးကွက်၌ မတ်လအတွက် WTI ရေနံစိမ်းကြိုတင်ရောင်းဝယ်မှုဈေးနှုန်းမှာ ၁.၂% ကျဆင်းပြီးတစ်စည်လျှင် အမေရိကန်ဒေါ်လာ (၅၂.၀၉)ဒေါ်လာ၌လည်းကောင်း၊ လန်ဒန်ဈေးကွက်၌ ဘရန့်ရေနံစိမ်းကြိုတင်ရောင်းဝယ်မှုဈေးနှုန်းမှာ ၀.၈% ကျ ဆင်းပြီးတစ်စည်လျှင် အမေရိကန်ဒေါ်လာ(၆၁.၆၁)ဒေါ်လာ၌လည်းကောင်းအသီးသီးဖြစ်ပေါ်ခဲ့ကြောင်း၊ လွန်ခဲ့ သည့် ရက်သတ္တပတ်အတွင်း WTI   နှင့် ဘရန့်ရေနံဈေးနှုန်းများမှာ ၄.၆%  နှင့် ၁.၁% စီအသီးသီးကျဆင်းခဲ့သည်ဟုreuters သတင်းဌာနတွင် ဖော်ပြပါရှိပါသည်။

ထိုင်းဘုရင်မဟာဗာဂျီယာလောင်ကွန်၏ တော်ဝင်အမိန့်ထုတ်ပြန်ခဲ့ပြီးနောက် ဘုရင့်အစ်မဖြစ်သူမင်းသမီးအူဗောလ်ရာထာနာမဟီဒေါလ်၏ ရွေးကောက်ပွဲဝင်ရောက်ယှဉ်ပြိုင်မည့် အစီအစဉ်မှာပျက်ပြယ်ခဲ့မှု

ထိုင်းဘုရင်မဟာဗာဂျီယာလောင်ကွန်၏ တော်ဝင်အမိန့်ထုတ်ပြန်ခဲ့ပြီးနောက် ဘုရင့်အစ်မဖြစ်သူမင်းသမီး အူဗောလ်ရာထာနာမဟီဒေါလ်၏ ရွေးကောက်ပွဲဝင်ရောက်ယှဉ်ပြိုင်မည့်အစီအစဉ်မှာ ပျက်ပြယ်ခဲ့မှု

ထိုင်းနိုင်ငံ၌ လာမည့် ၂၀၁၉ ခုနှစ်၊ မတ်လ (၂၄) ရက်နေ့တွင်ကျင်းပမည့် အထွေထွေရွေးကောက်ပွဲအတွင်း ထိုင်းဘုရင်မဟာဗာဂျီယာလောင်ကွန်၏အစ်မဖြစ်သူ မင်းသမီးအူဗောလ်ရာထာနာမဟီဒေါလ်အနေဖြင့်ဝန်ကြီးချုပ်နေရာအားဝင်ရောက်ယှဉ်ပြိုင်အရွေးခံမည်ဟု ထိုင်းရက်ခ်ဆာချက်ပါတီ (Thai RaksaChart –TRC) က ၂၀၁၉ ခုနှစ်၊ ဖေဖော်ဝါရီလ(၈) ရက် (သောကြာနေ့) တွင် ထုတ်ပြန်ကြေညာခဲ့ကြောင်း၊ သို့သော် အဆိုပါ ကြေညာချက်ထွက်ပေါ်ခဲ့သည့်နေ့တွင်ပင် ထိုင်းဘုရင် မဟာဗာဂျီယာလောင်ကွန်သည် ဖွဲ့စည်းပုံအခြေခံဥပဒေနှင့်မညီညွတ်ဘဲမသင့်လျှော်သည့်အတွက် ဖေဖော်ဝါရီလ(၈)ရက်(သောကြာနေ့) ညပိုင်းတွင် တော်ဝင်အမိန့်ထုတ်ပြန်တားမြစ်ခဲ့ရာမင်းသမီးအူဗောလ်ရာထာနာမဟီဒေါလ်၏ရွေးကောက်ပွဲဝင်ရောက်ရေးအစီအစဉ်မှာပျက်ပြယ်ခဲ့ကြောင်း၊ အသက် (၆၇) နှစ်အရွယ်ရှိမင်းသမီး အူဗောလ်ရာထာနာမဟီဒေါလ်သည် ထိုင်းရက်ခ်ဆာချက်ပါတီ(Thai Raksa Chart –TRC) မှတစ်ဆင့် အထွေထွေ ရွေးကောက်ပွဲအတွင်းဝန်ကြီးချုပ်နေရာအတွက် ဝင်ရောက်ယှဉ်ပြိုင်အရွေးချယ်ခံရန် စီစဉ်ခဲ့ခြင်းဖြစ်ကြောင်း၊ အဆိုပါ ထိုင်းရက်ခ်ဆာချက်ပါတီသည် ပြည်ပနိုင်ငံများတွင် တိမ်းရှောင်နေသည့် ဝန်ကြီးချုပ်ဟောင်းသက်ဆင်နှင့် ယင်လတ်ခ်ရှင်နာဝပ်တို့၏ သြဇာခံပါတီတစ်ခုဖြစ်ကြောင်း၊ ထိုင်းရက်ခ်ဆာချက်ပါတီအဖွဲ့ဝင်များသည် ယခင်သက်ဆင်၏နိုင်ငံရေးပါတီတစ်ခုဖြစ်သော ပွေထိုင်းပါတီ(Pheu Thai) မှ အဓိကကျသောနိုင်ငံရေးသမားဟောင်းများနှင့်ဖွဲ့စည်းထားခြင်းဖြစ်ကြောင်း၊  ယခုကဲ့သို့ မင်းသမီးအူဗောလ်ရာထာနာမဟီဒေါလ်၏ ရွေးကောက်ပွဲဝင်ရောက်ရန်ကြေညာချက်သည် လက်ရှိထိုင်းဝန်ကြီးချုပ် ပရာရွတ်ချန်အိုချာ၏ ရွေးကောက်ပွဲအတွင်း ဝင်ရောက်ယှဉ်ပြိုင်အရွေးခံမည့်ကိစ္စအပေါ် တုံ့ပြန်သည့်အနေဖြင့် ထုတ်ပြန်ကြေညာခဲ့ခြင်းဖြစ်ကြောင်း၊ ထိုင်းဝန်ကြီးချုပ် ပရာရွတ်ချန်အိုချာသည် တပ်မတော်ကိုယ်စားပြုဖယ်လန်းပရာချာရတ်ပါတီ (PalangPracharat) မှတစ်ဆင့် ဝန်ကြီးချုပ်နေရာအတွက် ဝင်ရောက်ယှဉ်ပြိုင်အရွေးခံသွားမည်ဟု အဆိုပါ ၂၀၁၉ ခုနှစ်၊ ဖေဖော်ဝါရီလ(၈) ရက်(သောကြာနေ့) တွင်ပင် ထုတ်ပြန်ကြေညာခဲ့ခြင်းဖြစ်သည်ဟုသိရှိရပါသည်။

ယခုကဲ့သို့ မင်းသမီးအူဗောလ်ရာထာနာမဟီဒေါလ်အနေဖြင့် ထိုင်းနိုင်ငံရေးအခင်းအကျင်းသို့ ဝင်ရောက်ရန်ကြေညာခဲ့ခြင်းသည် ထိုင်းနိုင်ငံရေးလောက၌ပထမဆုံးအကြိမ်ဖြစ်ပြီး ထိုင်းဘုရင့်တော်ဝင်မိသားစုဝင် တစ်ယောက်အနေဖြင့် ပုံမှန်လုပ်ထုံးလုပ်နည်းမှဆန့်ကျင်ကာ လုံးဝမသင့်တော်သည့် လုပ်ရပ်တစ်ခုအဖြစ် ထိုင်းဘုရင် မဟာဗာဂျီယာလောင်ကွန်က သတ်မှတ်ကာယခုကဲ့သို့ အဆောတလျင် တော်ဝင်ကြေညာချက်ထုတ်ပြန်ကြေညာခဲ့ခြင်းဖြစ်ကြောင်း၊ ထိုင်းဘုရင်မဟာဗာဂျီယာလောင်ကွန်သည် ထိုင်းဘုရင်အပါအဝင် တော်ဝင်မိသားစုဝင်များအနေဖြင့် ထိုင်းနိုင်ငံရေးလောကအခင်းအကျင်းတွင် ပါဝင်လုပ်ဆောင်ခြင်းမရှိစေရန် အဆိုပါကြေညာချက်ကိုရုပ်မြင်သံကြားမှတစ်ဆင့်တိုက်ရိုက်ပြောကြားခဲ့ခြင်းဖြစ်ပြီးတော်ဝင်အမိန့်ပြန်တမ်းကိုလည်းပုံနှိပ်ထုတ်ဝေကြေညာခဲ့ခြင်းဖြစ်သည်ဟုသိရှိရကြောင်း၊ အဆိုပါထိုင်းဘုရင်၏ တော်ဝင်အမိန့်ထုတ်ပြန် ကြေညာချက်နှင့်ပတ်သက်၍ မင်းသမီးအူဗောလ်ရာထာနာမဟီဒေါလ်အပါအဝင် ထိုင်းရက်ခ်ဆာချက်ပါတီတို့လည်းသဘောတူလက်ခံခဲ့ကြကာထိုင်းဘုရင့်အမိန့်အတိုင်းလိုက်နာဆောင်ရွက်သွားမည်ဟုထိုင်းရက်ခ်ဆာချက်ပါတီက ၂၀၁၉ ခုနှစ်၊ ဖေဖော်ဝါရီလ(၉) ရက်(စနေနေ့) တွင် ထုတ်ပြန်ခဲ့ကြောင်း၊ ထိုင်းနိုင်ငံတွင် ထိုင်းဘုရင့်တော်ဝင်မိသားစုဝင်များအပေါ် ဝေဖန်ပြောကြားပါကထောင်ဒဏ်ချမှတ်နိုင်သည့်ဥပဒေပြဌာန်းချက်ရှိသည့်အတွက် မင်းသမီးအူဗောလ်ရာထာနာမဟီဒေါလ်အနေဖြင့် ထိုင်းနိုင်ငံရေးလောကအတွင်းသို့ ဝင်ရောက်လာပါက ဝေဖန်ပုတ်ခတ်မှုများနှင့်မကင်းသောနိုင်ငံရေးလောကအတွင်းယှဉ်ပြိုင်မှုများမှာမျှတမည်မဟုတ်ဟု နိုင်ငံရေးလေ့လာသူများကသုံးသပ်လျက်ရှိကြကြောင်း၊          မင်းသမီးအူဗောလ်ရာထာနာမဟီဒေါလ်သည် ၁၉၅၁ ခုနှစ်တွင်မွေးဖွားခဲ့ပြီးထိုင်းနိုင်ငံချက်ကရီမင်းဆက်၏တော်ဝင်မိသားစုတစ်ဦးဖြစ်ကာ ထိုင်းဘုရင်ဘူမိဘောအဒူလ်ရာဒက်နှင့် ဘုရင်မသီရိကစ်တို့၏အကြီးဆုံးသမီးတစ်ဦးဖြစ်ကြောင်း၊ သူမသည် အမေရိကန်ပြည်ထောင်စုမက်ဆာချူးဆက်နည်းပညာတက္ကသိုလ်တွင် ပညာသင်ကြားခဲ့ခြင်းဖြစ်ပြီး ၁၉၇၂ ခုနှစ်တွင် အမေရိကန်နိုင်ငံသားတစ်ဦးနှင့် လက်ထပ်ခဲ့ကာတော်ဝင်မိသားစု၏အဆောင်အယောင်များကို စွန့်လွှတ်ခဲ့သူဖြစ်ကြောင်း၊ ထို့နောက် အမျိုးသားဖြစ်သူနှင့် ကွာရှင်းခဲ့ပြီးနောက် ၂၀၀၁ ခုနှစ်တွင် ထိုင်းနိုင်ငံသို့ပြန်လာကာတော်ဝင်မိသားစု၏ အဆောင်အယောင်အချို့ကို ရယူခံစားခဲ့ကြောင်းဖော်ပြပါရှိပါသည်။

ရည်ညွှန်း www.channelnewsasia.com

အမေရိကန်ပြည်ထောင်စု၌ အစိုးရယန္တရားတစ်စိတ်တစ်ပိုင်းရပ်ဆိုင်းမှုမှာထပ်မံဖြစ်ပေါ်လာဖွယ်မရှိ သော်လည်းအမေရိကန် – တရုတ် ကုန်သွယ်ရေးတင်းမာမှုများ ပြန်လည်ဖြစ်ပေါ်လာမည့်အပေါ် စိုးရိမ်ပူပန်မှုများဖြစ်ပေါ်လျက်ရှိမှု

အမေရိကန်ပြည်ထောင်စု၌ အစိုးရယန္တရားတစ်စိတ်တစ်ပိုင်းရပ်ဆိုင်းမှုမှာ ထပ်မံဖြစ်ပေါ်လာဖွယ်မရှိ သော်လည်း အမေရိကန် – တရုတ် ကုန်သွယ်ရေးတင်းမာမှုများ ပြန်လည်ဖြစ်ပေါ်လာမည့်အပေါ် စိုးရိမ်ပူပန်မှုများဖြစ်ပေါ်လျက်ရှိမှု

၂၀၁၈ ခုနှစ်၊ ဒီဇင်ဘာလ (၂၂) ရက်နေ့မှစတင်ကာ ၂၀၁၉ ခုနှစ်၊ ဇန်နဝါရီလ(၂၅) ရက်ညနေပိုင်းတွင် အဆုံးသတ်သွားသည့်အမေရိကန်ပြည်ထောင်စု၏ စံချိန်တင်အစိုးရယန္တရားတစ်စိတ်တစ်ပိုင်းရပ်တန့်မှု(partial government shutdown)မှာယခု၂၀၁၉ ခုနှစ်အတွင်းထပ်မံဖြစ်ပေါ်လာဖွယ်မရှိသော်လည်းအမေရိကန်-တရုတ်ကုန်သွယ်ရေးဆွေးနွေးမှုများမှာမူ သေချာရေရာခြင်းမရှိသေးကြောင်း သိရှိရပါသည်။၂၀၁၉ ခုနှစ်၊ ဇန်နဝါရီလ(၂၅) ရက်နေ့တွင် သမ္မတဒေါ်နယ်ထရန့်သည် government shutdown ကြောင့်ရပ်ဆိုင်းထားရသည့် အစိုးရဌာန(၉) ခုအား ဖေဖော်ဝါရီလ(၁၅) ရက်နေ့အထိ ပြန်လည်ဖွင့်လှစ်လုပ်ကိုင်နိုင်မည့် ယာယီအသုံးစရိတ်မူကြမ်းကို ခွင့်ပြုလက် မှတ်ရေးထိုးပေးခဲ့သည့်အတွက် (၃၅) ရက်ကြာဖြစ်ပေါ်ခဲ့သော government shutdown မှာယာယီအဆုံးသတ်သွားခဲ့ပြီးနောက် သမ္မတဒေါ်နယ်ထရန့်၏ရီပတ်ဗလစ်ကန်ပါတီနှင့် အတိုက်အခံဒီမိုကရက်ပါတီလွှတ်တော်အမတ်များပါဝင်သော နှစ်ပါတီကော်မတီသည် အမေရိကန်-မက္ကဆီကိုနယ်စပ်အရေးနှင့်ပတ်သက်၍ government shutdown ထပ်မံမပေါ်ပေါက်စေရန်အတွက် အဆိုပြုချက်များအပြန်အလှန်တင်သွင်းကာစေ့စပ်ညှိနှိုင်းမှုများပြုလုပ်ခဲ့ကြကြောင်း၊ ယင်းအဆိုပြုချက်များတွင် သမ္မတဒေါ်နယ်ထရန့်တောင်းဆိုသောအမေရိကန်ဒေါ်လာ (၅.၇) ဘီလီယံအောက်လျော့နည်းသည့် အမေရိကန်ဒေါ်လာ (၂) ဘီလီယံပမာဏအားခွင့်ပြုပေးရေးအဆိုပြုချက်မှာထိပ်တန်းဦးစားပေးအဆိုပြုချက်အဖြစ်ပါဝင်လျက်ရှိကြောင်း၊ ယခုအခါဖေဖော်ဝါရီလ (၁၅) ရက်သတ်မှတ်ချက်မှာနီးကပ်လာပြီဖြစ်ရာနှစ်ပါတီကော်မတီဝင်များသည် shutdown ထပ်မံမဖြစ်ပေါ်စေရေးအတွက် ယင်းအဆိုပြုချက်ကိုအစိုးရအသုံးစရိတ်မူကြမ်းအဖြစ် ပြင်ဆင်ရေးဆွဲနိုင်ရန် ညှိနှိုင်းဆောင်ရွက်လျက်ရှိပြီး ၂၀၁၉ ခုနှစ်၊ ဖေဖော်ဝါရီလ (၁၁) ရက်(တနင်္လာ) နေ့တွင် ယင်းအဆိုပြုချက်မူကြမ်းကိုနှစ်ပါတီကော်မတီဝင်များက သဘောတူလက်မှတ်ရေးထိုးသွားဖွယ်ရှိကြောင်း၊ နှစ်ပါတီကော်မတီဝင်များကသဘောတူလက်မှတ်ရေးထိုးပြီးပါက ယင်းအဆိုပြုချက်မူကြမ်းအား အမေရိကန်အထက်လွှတ်တော်၌ မဲခွဲဆုံးဖြတ်ရဦးမည်ဖြစ်သည့်အပြင် ယင်းအဆိုပြုချက်မူကြမ်းအား သမ္မတဒေါ်နယ်ထရန့်က သဘောတူလက်ခံခြင်းပြု/မပြုဆိုသည်မှာမူ သေချာလှခြင်းမရှိကြောင်း၊ သို့သော် ၂၀၁၉ ခုနှစ်၊ ဖေဖော်ဝါရီလ(၇)ရက်နေ့တွင် သမ္မတအိမ်ဖြူတော်၌ သမ္မတဒေါ်နယ်ထရန့်နှင့် လွှတ်တော်အမတ်များအကြားတွေ့ဆုံဆွေးနွေးမှုများပြုလုပ်ခဲ့ကြရာဝယ် အလားအလာကောင်းများရရှိခဲ့ပြီးဒေါ်နယ်ထရန့်သည် ယင်းအဆိုပြုချက်မူကြမ်းနှင့်ပတ်သက်၍အကောင်းမြင်သဘောထားများရှိနေသည်ဟုသမ္မတဒေါ်နယ်ထရန့်အားတွေ့ဆုံခဲ့သည့် လွှတ်တော်အမတ်များနှင့် အိမ်ဖြူတော်တာဝန်ရှိသူများကပြောကြားခဲ့ကြသည်ဟုသိရှိရကြောင်း၊အကယ်၍ အဆိုပါအဆိုပြုချက်မူကြမ်းအား သမ္မတဒေါ်နယ်ထရန့်က သဘောတူလက်ခံသွားမည်ဆိုပါကယခု ၂၀၁၉ ခုနှစ်အတွင်း၌ government shutdown မှာထပ်မံဖြစ်ပေါ်လာတော့မည်မဟုတ်ကြောင်းသိရှိရပါသည်။

အမေရိကန်သမ္မတဒေါ်နယ်ထရန့်နှင့် တရုတ်သမ္မတရှီကျင်းပင်တို့အကြား သွင်းကုန်ခွန်အပြန်အလှန်တိုးမြှင့်ကောက်ခံခြင်းထိုးစစ်အားရက်ပေါင်း(၉၀) ကြာယာယီပြေငြိမ်းရန် သဘောတူညီမှုရယူခဲ့ပြီးနောက် ကုန်သွယ်ရေးဆိုင်ရာအမေရိကန်နှင့် တရုတ်တာဝန်ရှိသူများသည် ၂၀၁၉ ခုနှစ်၊ ဇန်နဝါရီလ (၇) ရက်နေ့မှ (၉) ရက်နေ့အထိတစ်ကြိမ်၊ ဇန်နဝါရီလ(၃၀) ရက်နေ့မှ(၃၁) ရက်နေ့အထိတစ်ကြိမ်တွေ့ဆုံဆွေးနွေးခဲ့ကြကြောင်း၊ သို့သော် နှစ်ဦးနှစ်ဖက်ကျေနပ်လောက်သည်အထိ ရလဒ်ကောင်းများမရရှိသေးသည့်အတွက် အမေရိကန်နှင့် တရုတ်တာဝန်ရှိသူများသည် ၂၀၁၉ ခုနှစ်၊ ဖေဖော်ဝါရီ (၁၁) ရက်နေ့တွင် အငယ်တန်းအဆင့်ဆွေးနွေးမှုများကိုပြန်လည်စတင်ပြုလုပ်မည်ဖြစ်ပြီးဖေဖော်ဝါရီလ(၁၄) ရက်နေ့နှင့် (၁၅) ရက်နေ့တို့တွင် အကြီးတန်းအဆင့်တွေ့ဆုံဆွေးနွေးမှုများထပ်မံပြုလုပ်သွားမည်ဖြစ်ကြောင်း၊ ရက်ပိုင်း(၉၀) ကြာယာယီပြေငြိမ်းထားမှုမှာ လာမည့်မတ်လ(၁) ရက်နေ့တွင် ပြည့်မြောက်မည်ဖြစ်ရာအမေရိကန်သမ္မတဒေါ်နယ်ထရန့်သည် ယင်းသတ်မှတ်ချက်မတိုင်မီတွင် တရုတ်သမ္မတရှီကျင့်ပင်နှင့်တွေ့ဆုံရန် အစီအစဉ်မရှိကြောင်း၊ နှစ်နိုင်ငံကုန်သွယ်ရေးတင်းမာမှုအတွက် နောက်ဆုံးအဖြေသည် သမ္မတရှီကျင်းပင်နှင့်တွေ့ဆုံမှုအပေါ်တွင် မူတည်သည်ဟု လွန်ခဲ့သည့်ရက်ပိုင်းအတွင်းသမ္မတဒေါ်နယ်ထရန့်၏ပြောကြားခဲ့မှုကြောင့် အမေရိကန် – တရုတ် ကုန်သွယ်ရေးတင်းမာမှုများ ပြန်လည်ဖြစ်ပေါ်လာမည့်အပေါ် စိုးရိမ်ပူပန်မှုများဖြစ်ပေါ်လျက်ရှိကြောင်း ဖော်ပြပါရှိပါသည်။

ရည်ညွှန်း www.latimes.com နှင့် www.straitstimes.com

အလုပ်လက်မဲ့ထောက်ပံ့ကြေးတောင်းခံမှုလျော့ကျခဲ့ခြင်းနှင့်အမေရိကန်ပြည်ထောင်စု၏စီးပွားရေးခိုင်မာလျက်ရှိသည်ဟုအမေရိကန်ဗဟိုဘဏ်ဥက္ကဋ္ဌကပြောကြားခဲ့ခြင်းတို့ကြောင့်အမေရိကန်ဒေါ်လာတန်ဖိုးဆက်လက်မြင့်တက်ခဲ့မှု

အလုပ်လက်မဲ့ထောက်ပံ့ကြေးတောင်းခံမှုလျော့ကျခဲ့ခြင်းနှင့်အမေရိကန်ပြည်ထောင်စု၏စီးပွားရေးခိုင်မာလျက်ရှိသည်ဟုအမေရိကန်ဗဟိုဘဏ်ဥက္ကဋ္ဌကပြောကြားခဲ့ခြင်းတို့ကြောင့်အမေရိကန်ဒေါ်လာတန်ဖိုးဆက်လက်မြင့်တက်ခဲ့မှု

အမေရိကန်ပြည်ထောင်စု၊ အလုပ်သမားဝန်ကြီးဌာနမှထုတ်ပြန်သည့် အလုပ်လက်မဲ့ထောက်ပံ့ကြေးတောင်းခံမှုလျော့ကျခဲ့ခြင်းနှင့် အမေရိကန်ပြည်ထောင်စု၏စီးပွားရေးခိုင်မာလျက်ရှိခြင်းတို့ကြောင့် အမေရိကန်ဒေါ်လာတန်ဖိုးဆက်လက်မြင့်တက်ခဲ့ကြောင်း၊ ၂၀၁၉ခုနှစ်၊ဖေဖော်ဝါရီလ(၇) ရက်( ကြာသပတေးနေ့) တွင်အမေရိကန်ပြည်ထောင်စု၊ အလုပ်သမားဝန်ကြီးဌာနကထုတ်ပြန်သည့်အစီရင်ခံစာ၌ ၂၀၁၉ခုနှစ်၊ ဇန်နဝါရီလ (၂၈) ရက်နေ့မှဖေဖော်ဝါရီလ (၁) ရက်နေ့အထိဖြစ်သောရက်သတ္တပတ်အတွင်းနိုင်ငံတစ်ဝန်းအလုပ်လက်မဲ့ထောက်ပံ့ကြေးတောင်းခံသူဦးရေမှာ(၂၃၄,၀၀၀) ဦးခန့်ရှိခဲ့ရာလွန်လေပြီးသောရက်သတ္တပတ်အတွင်းအလုပ်လက်မဲ့ထောက်ပံ့ကြေးတောင်းခံသူဦးရေ(၂၅၃,၀၀၀) ဦးနှင့်နှိုင်းယှဉ်ပါက (၁၉,၀၀၀) ဦးလျော့ကျသွားခဲ့သည်ဟုဖော်ပြထားကြောင်း၊အလုပ်လက်မဲ့ထောက်ပံ့ကြေးတောင်းခံသူဦးရေလျော့ကျသွားခြင်းသည် နိုင်ငံတစ်ဝန်းစီးပွားရေးတိုးတက်ကောင်းမွန်မှုများဖြစ်ပေါ်နေ၍ အလုပ် အကိုင်ရရှိသူများပြားလာခြင်းကြောင့်ဖြစ်သည်ဟူသော ခန့်မှန်းချက်များနှင့်အတူရင်းနှီးမြှုပ်နှံသူများသည် အမေရိကန်ဒေါ်လာ ဝယ်ယူစုဆောင်းမှုများ ပိုမိုပြုလုပ်လာကြသောကြောင့် အမေရိကန်ဒေါ်လာတန်ဖိုးမှာ ဆက်လက်မြင့်တက်လာခဲ့ကြောင်း၊ ထို့ပြင် လက်ရှိအချိန်၌နိုင်ငံတစ်ဝန်းအလုပ်လက်မဲ့နှုန်းကျဆင်းလျက်ရှိသကဲ့သို့ ငွေကြေးဖောင်းပွမှုနှုန်းမှာလည်းအမေရိကန်ဗဟိုဘဏ်ကသတ်မှတ်ထားသည့်နှုန်းထားဝန်းကျင်၌သာဖြစ်ပေါ်လျက်ရှိရာစံချိန်တင် government shutdown ကိုကြုံတွေ့ခံစားခဲ့ရသည့်အပြင် ဥရောပသမဂ္ဂမှဗြိတိန်ခွဲထွက်ရေးမသေချာမရေရာမှုဂယက်ရိုက်ခတ်ခြင်းကို ရင်ဆိုင်နေရသောအမေရိကန်ပြည်ထောင်စု၏ လက်ရှိစီးပွားရေးအခြေအနေသည် ဆုတ်ယုတ်နှောင့်နှေးခြင်းမျိုးမရှိဘဲ တိုးတက်ကောင်းမွန်လျက်ရှိသည်ဟုအမေရိကန်ဗဟိုဘဏ်ဥက္ကဋ္ဌ ဂျရွန်မီပေါင်ဝယ်လ်ကပြောကြားခဲ့ခြင်းသည်လည်းကောင်း၊ ယခု ၂၀၁၉ ခုနှစ်အတွင်းယူရိုငွေကြေးသုံးစွဲသောနိုင်ငံများ(euro zone)၏ စီးပွားရေးတိုးတက်မှုနှုန်းမှာမူလခန့်မှန်းထားသည့် ၁.၉% ကိုပြည့်မီနိုင်ခြင်းမရှိဘဲ ၁.၃% ခန့်သာရှိနိုင်သည်ဟု ဥရောပသမဂ္ဂကောင်စီကခန့်မှန်း ချက်ပြင်ဆင်ထုတ်ပြန်ခဲ့ခြင်းကြောင့် ယူရိုငွေကြေးတန်ဖိုးကျဆင်းခဲ့ခြင်းသည်လည်းကောင်းအမေရိကန်ဒေါ်လာတန်ဖိုးကိုမြင့်တက်စေသည့် အခြားသောအကြောင်းအရာများဖြစ်ကြောင်း၊၂၀၁၉ ခုနှစ်၊ ဇန်နဝါရီလ(၉) ရက်(စနေနေ့) တွင် ကမ္ဘာ့ငွေကြေးဈေးကွက်အတွင်းအမေရိကန်ဒေါ်လာတန်ဖိုးမှာ ၀.၁၄% မြင့်တက်ခဲ့ပြီးစတာလင်တစ်ပေါင်လျှင် အ​မေရိကန်ဒေါ်လာ (၁.၂၉၅၉) ဒေါ်လာလဲလှယ်မှုနှုန်း၊ တစ်ယူရိုလျှင် အမေရိကန်ဒေါ်လာ (၁.၁၃၂၂) ဒေါ်လာလဲလှယ်မှုနှုန်း၊အမေရိကန်တစ်ဒေါ်လာလျှင်ဂျပန်ယန်းငွေ (၁၀၉.၇၇) ယန်းလဲလှယ်မှုနှုန်းနှင့် တရုတ်ယွမ်ငွေ(၆.) ယွမ်လဲလှယ်မှုနှုန်းများဖြင့် အသီးသီးဈေးပိတ်သွားခဲ့သည်ဟု xinhuanet သတင်းဌာနတွင်  ဖော်ပြပါရှိပါသည်။

ဂျာမနီ၊ ပြင်သစ်နှင့် ဗြိတိန်နိုင်ငံတို့သည် အီရန်နိုင်ငံနှင့်တရားဝင်ကုန်သွယ်မှုပြုနိုင်မည့် စနစ်တစ်ခုကို ဖန်တီးအကောင်အထည်ဖော်သွားမည်ဖြစ်ကြောင်းအင်တာနက် website တွင် ဖော်ပြထားမှု

ဂျာမနီ၊ ပြင်သစ်နှင့် ဗြိတိန်နိုင်ငံတို့သည် အီရန်နိုင်ငံနှင့်တရားဝင်ကုန်သွယ်မှုပြုနိုင်မည့် စနစ်တစ်ခုကို ဖန်တီးအကောင်အထည်ဖော်သွားမည်ဖြစ်ကြောင်းအင်တာနက် website တွင် ဖော်ပြထားမှု

အမေရိကန်အစိုးရအနေဖြင့် အီရန်နိုင်ငံအပေါ်ချမှတ်ထားသည့် အရေးယူပိတ်ဆို့မှုဆိုင်ရာကိစ္စရပ်များနှင့် ထိခိုက်ငြိစွန်းမှုမရှိစေဘဲ အီရန်နိုင်ငံနှင့် တရားဝင်ကုန်သွယ်မှုပြုလုပ်နိုင်မည့်စနစ်တစ်ခုကို အကောင်အထည်ဖော်ဖန်တီးသွားမည်ဟု ဂျာမနီ၊ ပြင်သစ်နှင့် ဗြိတိန်နိုင်ငံတို့က ပူးတွဲကြေညာချက်ထုတ်ပြန်ခဲ့ကြောင်း၊ လွန်ခဲ့သည့်ရက်ပိုင်းအတွင်း ထုတ်ပြန်သည့် အဆိုပါပူးတွဲ ကြေညာချက်အရ အမေရိကန်အစိုးရသည် အီရန်၏ဘဏ္ဍာရေးဆိုင်ရာကဏ္ဍများအပေါ်၌လည်း အရေးယူပိတ်ဆို့မှုများချမှတ်ထားရာ အီရန်နိုင်ငံနှင့် ကုန်သွယ်ဖက်နိုင်ငံများအတွက် ကုန်သွယ်ရေးနှင့် ပတ်သက်၍ ပေးချေမှုဆိုင်ရာကိစ္စများတွင် အခက်အခဲများနှင့် ကြုံတွေ့ရလျက်ရှိသည့်အတွက် ဂျာမနီ၊ ပြင်သစ်နှင့် ဗြိတိန်နိုင်ငံတို့သည် အမေရိကန်အစိုးရ၏ အရေးယူပိတ်ဆို့မှုများနှင့် ငြိစွန်းခြင်းမရှိစေဘဲ အီရန်နိုင်ငံနှင့် တရားဝင် ကုန်သွယ်ရေးပေးချေမှုများ ဆောင်ရွက်နိုင်ရန်အတွက် INSTEX ဟုအမည်ပေးထားသော ကုန်သွယ်ရေးစနစ်တစ်ခုကို ပူးတွဲအကောင်အထည်ဖော် ဖန်တီးသွား မည်ဖြစ်ကြောင်း၊ ဂျာမနီ၊ ပြင်သစ်နှင့် ဗြိတိန်နိုင်ငံတို့သည် ယင်း INSTEX စနစ်အားအောင်မြင်စွာ အကောင်အထည်ဖော်နိုင်မည့်နည်းလမ်းများကို စူးစမ်းရှာဖွေသွားမည်ဖြစ်ပြီး အီရန်ကုမ္ပဏီများ နှင့် ဂျာမနီ၊ ပြင်သစ်၊ ဗြိတိန် ကုမ္ပဏီများအကြား ကုန်သွယ်ရေး အဆင်ပြေချောမွေ့စေရန်ရည်ရွယ်၍ အဆိုပါ INSTEX စနစ်အား ဖော်ဆောင်မည်ဖြစ်သည့်အပြင် ဥရောပသမဂ္ဂနိုင်ငံများနှင့် အီရန် နိုင်ငံအနေဖြင့်လည်း ‘၂၀၁၅ အီရန်နျူကလီးယားလျှော့ချရေးသဘောတူစာချုပ်’အား မပျက် မကွက်လိုက်နာနိုင်စေရန်အတွက်လည်း ရည်ရွယ်လုပ်ဆောင်လိုခြင်းဖြစ်ကြောင်း၊ အနာဂါတ်ကာလတွင် အဆိုပါ INSTEX စနစ်အတွင်း ပါဝင်လိုသည့်မည်သည့်နိုင်ငံကိုမဆို ကြိုဆိုလက်ခံသွားမည်ဖြစ်ကြောင်း၊ အမေရိကန်အစိုးရက အီရန်နိုင်ငံအား အရေးယူပိတ်ဆို့မှုများချမှတ်ထား စဉ်တွင် အီရန်နိုင်ငံနှင့် စီးပွားဆက်ဆံမှုပြုလုပ်ခြင်းကြောင့် အမေရိကန်အစိုးရက အရေးယူပိတ်ဆို့ ခြင်းများ လုပ်ဆောင်လာမည်ကို စိုးရိမ်ပူပန်လျက်ရှိသည့်အတွက် များစွာသောစိုက်ပျိုးရေးနှင့် ဆေးဝါးကုမ္ပဏီများသည် အီရန်နှင့်ကုန်သွယ်ခြင်းကို ရပ်ဆိုင်းခဲ့ကြကြောင်း၊ သို့ရာတွင် လယ်ယာထွက်ကုန်များ၊ စားသောက်ကုန်များ၊ ဆေးဝါးများနှင့် ဆေးဘက်ဆိုင်ရာပစ္စည်းကိရိယာများမှာ အီရန်နိုင်ငံအပေါ်ချမှတ်သည့်အရေးယူပိတ်ဆို့မှုတွင် ပါဝင်ခြင်းမရှိကြောင်း၊ ထို့ကြောင့် ဂျာမနီ၊ ပြင်သစ်၊ ဗြိတိန်နိုင်ငံတို့သည် အဆိုပါ INSTEX စနစ်ဖြင့် အီရန်နိုင်ငံနှင့် ကုန်သွယ်ရာ၌ အီရန် နိုင်ငံသားများအတွက် အရေးပါသော အဆိုပါကုန်စည်များကို အဓိကထားကုန်သွယ်မှုပြုသွားမည် ဖြစ်ကြောင်း၊  ဂျာမနီ၊ပြင်သစ်၊ ဗြိတိန်နိုင်ငံတို့သည် အဆိုပါ INSTEX စနစ်အတွင်း ပါဝင်လိုသည့် စိတ်ပါဝင်စားသော ဥရောပနိုင်ငံများနှင့်တွဲဖက်၍ယင်း INSTEX စနစ်ရေရှည်ဖွံ့ဖြိုးတိုးတက်လာစေရန် ရှေ့တိုးလုပ်ဆောင်သွားရန် ဂျာမနီ၊ ပြင်သစ်နှင့် ဗြိတိန်နိုင်ငံတို့က ဆုံးဖြတ်ချက်ချထားသည်ဟုသိရှိရကြောင်း ဖော်ပြပါရှိပါသည်။

ရည်ညွှန်း       www.rt.com

မွတ်စလင်ဒုက္ခသည်အရေး ရေရှည်စီမံကိန်းဖြင့် ကိုင်တွယ်ဖြေရှင်းနိုင်ရေးအတွက် ဘင်္ဂလားဒေ့ရှ်နိုင်ငံအနေဖြင့် မွတ်စလင်အရေးနှင့်ပတ်သက်၍ လုပ်ဆောင်လျက်ရှိသည့်အစီအမံများအား ပြောင်းလဲလုပ်ဆောင်ရန်လိုအပ်သည်ဟု ကနေဒါဝန်ကြီးချုပ်၏ မြန်မာနိုင်ငံဆိုင်ရာ အထူးသံတမန်ဘော့ရေးက ပြောကြားခဲ့မှု

မွတ်စလင်ဒုက္ခသည်အရေး ရေရှည်စီမံကိန်းဖြင့်  ကိုင်တွယ်ဖြေရှင်းနိုင်ရေးအတွက် ဘင်္ဂလားဒေ့ရှ်နိုင်ငံ အနေဖြင့် မွတ်စလင်အရေးနှင့်ပတ်သက်၍ လုပ်ဆောင်လျက်ရှိသည့်အစီအမံများအား ပြောင်းလဲလုပ်ဆောင်ရန်လိုအပ်သည်ဟု ကနေဒါဝန်ကြီးချုပ်၏ မြန်မာနိုင်ငံဆိုင်ရာ အထူးသံတမန်ဘော့ရေးက ပြောကြားခဲ့မှု

ဘင်္ဂလားဒေ့ရှ်နိုင်ငံရှိ မွတ်စလင်ဒုက္ခသည်များသည် မြန်မာနိုင်ငံ၊ ရခိုင်ပြည်နယ်အတွင်း နယ်မြေဒေသအခြေအနေတည်ငြိမ်မှု မရှိခြင်းနှင့် လုံခြုံမှုမရှိခြင်းတို့ကိုအကြောင်းပြကာ နေရပ်ပြန်ရန်ငြင်းဆန်လျက်ရှိပြီး ဒုက္ခသည်များနေရပ်ပြန်ရေးအစီအစဉ် နှင့်ပတ်သက်၍ နှောင့်နှေးကြန့်ကြာမှု များဖြစ်ပေါ်လျက်ရှိသောကြောင့် မွတ်စလင်ဒုက္ခသည်အရေး ရေရှည်စီမံကိန်းဖြင့် ကိုင်တွယ်ဖြေရှင်းနိုင်ရေးအတွက် ဘင်္ဂလားဒေ့ရှ်နိုင်ငံအနေဖြင့် မွတ်စလင်အရေးနှင့်ပတ်သက်၍ လုပ်ဆောင်လျက်ရှိသည့် အစီအမံများအား ပြောင်းလဲလုပ်ဆောင်ရန်လိုအပ်သည်ဟု ကနေဒါဝန်ကြီးချုပ် ဂျပ်စတင်ထရူးဒိုး၏ မြန်မာနိုင်ငံဆိုင်ရာ အထူးသံတမန်ဘော့ရေး က ၂၀၁၉ ခုနှစ်၊ ဖေဖေါ်ဝါရီလ (၅)ရက်(အင်္ဂါနေ့) တွင် ပြောကြားခဲ့ကြောင်း သိရှိရပါသည်။

ဒါကာမြို့တွင်ကျင်းပပြုလုပ်ခဲ့သည့် မွတ်စလင်အရေးဖြေရှင်းရေးဆိုင်ရာဆွေးနွေးပွဲတွင် ကနေဒါနိုင်ငံ၏ မြန်မာနိုင်ငံဆိုင်ရာ အထူးသံတမန်ဘော့ရေးကပြောကြားရာ၌ မွတ်စလင်အရေး ရှေရှည်တွင် ကိုင်တွယ်ဖြေရှင်းနိုင်စေရေးအတွက် မိမိတို့အနေဖြင့် အစီအစဉ်အသစ်တစ်ခုအား ပြောင်းလဲလုပ်ဆောင်ရန်လိုအပ်နေပြီဖြစ်ရာ အဆိုပါ မွတ်စလင်ဒုက္ခသည်များအတွက် ပညာသင်ကြားရေးနှင့် ဝင်ငွေရပေါက်ရလမ်းရှိသည့်အခွင့်အလမ်းများကို ဖန်တီးပေးသွားရမည်ဖြစ်သည့်အပြင် မွတ်စလင်များအပေါ်အကြမ်းဖက်ခဲ့သည်ဟူသော စွပ်စွဲချက်နှင့်ပတ်သက်၍ တာဝန်ရှိသူများအပေါ် အရေးယူနိုင်ရေးနှင့်တရားမျှတရေးဆိုင်ရာ ကိစ္စရပ်များကို အချိန်ယူလုပ်ဆောင်သွားရမည်ဖြစ်ကြောင်း၊ အထူးသဖြင့် မွတ်စလင်ဒုက္ခသည်များအား ပညာသင်ကြားရေးနှင့် အလုပ်အကိုင်အခွင့်အလမ်းများပေးအပ်နိုင်ခြင်းမရှိပါက ရေရှည်တွင်မွတ်စလင်ဒုက္ခသည်များသည် ရာဇဝတ်မှုများနှင့် အစွန်းရောက်ဝါဒများဘက်သို့ ဦးတည်ပြောင်းလဲရောက်ရှိသွားနိုင်ကြောင်း၊ မွတ်စလင် ဒုက္ခသည်(၁) သန်းကျော်နေထိုင်လျက်ရှိသည့် ဘင်္ဂလားဒေ့ရှ်နိုင်ငံသည်၎င်းတို့အတွက် လူသားချင်းစာနာထောက်ထားမှုဆိုင်ရာ အထောက်အပံ့များ ပေးအပ်နေရလျက်ရှိရာ ဘင်္ဂလားဒေ့ရှ်နိုင်ငံအနေဖြင့် ကြီးမားသည့် ဝန်ထုတ်ဝန်ပိုးများနှင့်အတူ နိုင်ငံရေးဆိုင်ရာစိန်ခေါ်မှုများနှင့်ပါ ရင်ဆိုင်နေရသည့်အတွက် ကမ္ဘာ့နိုင်ငံများအနေဖြင့် အသိအမှတ်ပြုကြစေလိုကြောင်း၊ ဒုက္ခသည်စခန်းများတွင် နေထိုင်ရာအမိုးအကာများ၊ ကျန်းမာရေးစောင့်ရှောက်ပေးမှုများနှင့် မိလ္လာစနစ်အပါအဝင် သန့်ရှင်းရေးဆိုင်ရာဝန်ဆောင်မှုများမှာ ယခုအခါအထူးကောင်းမွန်လာသည့်နည်းတူ အခြားတစ်ဖက်တွင်လည်း ဒုက္ခသည်များ နေရပ်ပြန်ရေးနှင့်အကြမ်းဖက်ခံခဲ့ရမှုများနှင့်ပတ်သက်၍ တာဝန်ရှိသူများအပေါ် တာဝန်ယူမှု၊ တာဝန်ခံမှု ရှိစေရန် အားထုတ်ကြိုးပမ်းလျက်ရှိသည့် ဘင်္ဂလားဒေ့ရှ်နိုင်ငံနှင့် နိုင်ငံတကာအသိုက်ဝန်းတို့ အနေဖြင့်လည်း အချိန်ယူကာလုပ်ဆောင်သွားကြစေလိုကြောင်း၊ ထို့ကြောင့် မွတ်စလင်ဒုက္ခသည်များအပေါ် ပညာသင်ကြားရေးနှင့် အလုပ်အကိုင်အခွင့်အလမ်းများရရှိရန် အစီအမံများပြောင်းလဲလုပ်ဆောင်ဖန်တီးပေးခြင်းသည်သာလျှင် မွတ်စလင်ဒုက္ခသည်များကိုသာမက ဒေသခံ ဘင်္ဂလားဒေ့ရှ် နိုင်ငံသားများအတွက်ကိုပါ ရေရှည်တွင်တိုက်ရိုက် အကျိုးကျေးဇူးများရရှိခံစားကြရလိမ့်မည်ဖြစ်ကြောင်း၊ ထို့အတူ မွတ်စလင်များအကြမ်းဖက်ခံခဲ့ရမှုများအတွက် တာဝန်ခံနိုင်ရေးအတွက်ကိုသာ ရည်မှန်း၍ မြန်မာနိုင်ငံအားအရေးယူပိတ်ဆို့ရန် တွန်းအားပေးလုပ်ဆောင်ခြင်းသည် ကောင်းမွန်သည့်နည်းလမ်းတစ်ရပ်မဟုတ်ဘဲ တရုတ်နိုင်ငံထံသို့ပိုမိုတွန်းပို့ပေးနေသကဲ့သို့သာ ဖြစ်စေလိမ့်မည်ဟု ပြောကြားခဲ့ကြောင်း သိရှိရပါသည်။

ထို့နောက် ဘင်္ဂလားဒေ့ရှ်နှင့် မြန်မာနှစ်နိုင်ငံ အပြန်အလှန်ယုံကြည်မှု တည်ဆောက်နိုင်စေရေးအတွက် အရပ်ဘက်လူမှုအဖွဲ့အစည်းများ၊ ပညာရှင်များနှင့် အငြိမ်းစားစစ်ဘက်အရာရှိများ ပါဝင်သော မြန်မာအဖွဲ့ဝင်များနှင့် ပိုမိုအလေးပေးထိတွေ့ဆက်ဆံမှုများပြုလုပ်ရန်ဟူသော အငြိမ်းစား ဘင်္ဂလားဒေ့ရှ် တပ်မတော်အရာရှိကြီးတစ်ဦး၏ အကြုံပြုချက်နှင့်ပတ်သက်၍ ဘင်္ဂလားဒေ့ရှ် နိုင်ငံခြားရေးဝန်ကြီးဌာနအတွင်းဝန် ရှာဟီရာအလာမ်ကသဘောတူညီခဲ့ပြီး ဘင်္ဂလားဒေ့ရှ်အစိုးရအနေဖြင့် မြန်မာနိုင်ငံနှင့် ထိတွေ့ဆက်ဆံမှုများ ပိုမိုတိုးမြှင့်ပြုလုပ်သွားမည်ဖြစ်ကာ မွတ်စလင်အရေးဖြေရှင်းနိုင်ရေးအတွက် အာဆီယံအဖွဲ့နှင့်အတူ ပူးပေါင်းဆောင်ရွက်မှုများကို တိုးမြှင့်လုပ်ဆောင်သွားမည် ဖြစ်ကြောင်း၊ နိုင်ငံတကာအသိုက်အဝန်းများအနေဖြင့်လည်း မွတ်စလင်များ နေရပ်ပြန်နိုင်ရေးအတွက်  မြန်မာနိုင်ငံ အပေါ်ဆက်လက်ဖိအားပေးကြစေလိုပြီး မိမိတို့ဘင်္ဂလားဒေ့ရှ်အစိုးရအနေဖြင့် မွတ်စလင်ကလေးငယ်ဦးရေ (၄) သိန်းတို့၏ လိုအပ်လျက်ရှိသောပညာသင်ကြားရေးဆိုင်ရာ ကိစ္စရပ်များကို ဆောင်ရွက်သွားမည်ဖြစ်ကာ ထိုသို့လုပ်ဆောင်နိုင်ရေးအတွက် မိမိတို့အနေဖြင့် အခြေအနေအခွင့်အလမ်းကောင်းများ ရရှိရန်လိုအပ်သည်ဟု ပြန်လည်ပြောကြားခဲ့ကြောင်း သိရှိရပါသည်။

အဆိုပါ မြန်မာနိုင်ငံဆိုင်ရာ အထူးသံတမန် ဘော့ရေး ၏အကြံပြုချက်သည် ကုလသမဂ္ဂ၏ ပူးတွဲဆောင် ရွက်မှုအစီအစဉ်တစ်ရပ်ဖြစ်ပြီး မွတ်စလင်ဒုက္ခသည်များနှင့်ပတ်သက်၍ ၂၀၁၉ ခုနှစ် အတွက် မျှော်မှန်းကူညီထောက်ပံ့ငွေအမေရိကန်ဒေါ်လာသန်း (၉၂၀) ရရှိရေးအစီစဉ်ဖြစ်သည့် အလှူငွေကောက်ခံမှုအသစ်မပြုလုပ်မီ ယခုကဲ့သို့ အကြံပြုပြောကြားခဲ့ခြင်းဖြစ်ကြောင်း၊ အဆိုပါမွတ်စလင် အရေးဆွေးနွေးပွဲသို့ ဘင်္ဂလားဒေ့ရှ်နိုင်ငံခြားရေးဝန်ကြီးဌာန အတွင်းဝန် ရှာဟီရာအလာမ်နှင့် ဘင်္ဂလားဒေ့ရှ်နိုင်ငံဆိုင်ရာ ကနေဒါသံအမတ်ကြီး ဘီနိုက်ပရီဖွန်တေး တို့တက်ရောက်ခဲ့ကြသည်ဟု သိရှိရကြောင်း ဖော်ပြပါရှိပါသည်။

ရည်ညွှန်း www.thedailystar.net

ဗြိတိန်နိုင်ငံ၏ ဝန်ဆောင်မှုလုပ်ငန်းကဏ္ဍ တိုးတက်မှုအနေအထားမှာ ၂၀၁၆ ခုနှစ်နောက်ပိုင်း အနိမ့်ဆုံးအနေအထားသို့ ရောက်ရှိခဲ့သည့်အတွက် ဗြိတိန်စတာလင်ပေါင်တန်ဖိုးကျဆင်းခဲ့မှု

ဗြိတိန်နိုင်ငံ၏ ဝန်ဆောင်မှုလုပ်ငန်းကဏ္ဍ တိုးတက်မှုအနေအထားမှာ ၂၀၁၆ ခုနှစ်နောက်ပိုင်း အနိမ့်ဆုံးအနေအထားသို့ ရောက်ရှိခဲ့သည့်အတွက်  ဗြိတိန်စတာလင်ပေါင်တန်ဖိုးကျဆင်းခဲ့မှု

၂၀၁၉ ခုနှစ်၊ ဇန်နဝါရီလအတွင်း ဗြိတိန်နိုင်ငံ၏ ဝန်ဆောင်မှုဆိုင်ရာလုပ်ငန်းကဏ္ဍများ တိုးတက်မှု အနေအထားမှာ (၂) နှစ်ကျော်ကာလအတွင်း အနိမ့်ဆုံးသို့ရောက်ရှိခဲ့သည်ဟု လန်ဒန်အခြေစိုက် သတင်းအချက်အလက်ထုတ်ပြန်ရေးဝန်ဆောင်မှုလုပ်ငန်း (IHS Markit) မှ အစီရင်ခံစာထုတ်ပြန်ခဲ့ရာ အဆိုပါအစီရင်ခံစာထွက်ပေါ်ခဲ့ခြင်းကို အကြောင်းပြု၍ ဗြိတိန်စတာလင်ပေါင် တန်ဖိုးမှာကျဆင်းခဲ့သည်ဟုသိရှိရပါသည်။

IHS Markit မှ ၂၀၁၉ ခုနှစ်၊ ဖေဖော်ဝါရီလ(၄) ရက်(တနင်္လာနေ့) တွင် ထုတ်ပြန်သည့် အစီရင်ခံစာ၌ ၂၀၁၉ ခုနှစ်၊ ဇန်နဝါရီလတွင် ဗြိတိန်နိုင်ငံရှိ ဆောက်လုပ်ရေးလုပ်ငန်းကဏ္ဍ တိုးတက်မှုအခြေအနေမှာ ၂၀၁၈ ခုနှစ်၊ ဒီဇင်ဘာလတွင်ဖြစ်ပေါ်ခဲ့သည့် တိုးတက်မှုအညွှန်းကိန်းပမာဏနှင့် နှိုင်းယှဉ်ပါက (၅၂.၈) အောက်လျော့နည်းကာ (၅၀.၆) သာရှိခဲ့သည်ဟု ဖော်ပြထားကြောင်း၊ အလားတူ ဖေဖော်ဝါရီလ(၅) ရက် (အင်္ဂါနေ့) တွင် ထပ်မံထုတ်ပြန်သည့်အစီရင်ခံစာ၌လည်း လွန်ခဲ့သည့်ဇန်နဝါရီလ အတွင်း ဗြိတိန်နိုင်ငံ၏ဝန်ဆောင်မှုဆိုင်ရာလုပ်ငန်းကဏ္ဍများ၏ တိုးတက်မှုအညွှန်းကိန်းပမာဏမှာ ၂၀၁၈ ခုနှစ်၊ ဒီဇင်ဘာလတွင်ဖြစ်ပေါ်ခဲ့သည့် ပမာဏနှင့်နှိုင်းယှဉ်ပါက မျှော်မှန်းထားသည့်ပမာဏ အောက်သို့ကျဆင်းကာတိုးတက်မှုအညွှန်းကိန်းပမာဏ (၅၀.၁) သာ ရှိခဲ့သည်ဟု ဖော်ပြထားရာ အဆိုပါပမာဏသည် ၂၀၁၆ ခုနှစ်၊ ဇူလိုင်လနောက်ပိုင်း (၂) နှစ်ခွဲတာကာလအတွင်း ပထမဆုံးအကြိမ်အဖြစ် အနိမ့်ဆုံးအနေအထားပင်ဖြစ်ကြောင်း၊ အဆိုပါ IHS Markit ၏ အစီရင်ခံစာထွက်ပေါ်ပြီးနောက်တွင် ဗြိတိန်နိုင်ငံ၏ စီးပွားရေးအခြေအနေအပေါ် ရင်းနှီးမြှုပ်နှံသူများ၏ စိုးရိမ်ပူပန်မှုများ ထွက်ပေါ်လာခဲ့ပြီးနောက် စတာလင်ပေါင်တန်ဖိုးမှာ ကျဆင်းသွားခဲ့ခြင်းဖြစ်ကြောင်း သိရှိရပါသည်။

ထို့ပြင် ဗြိတိန်နိုင်ငံသည်လာမည့် ၂၀၁၉ ခုနှစ်၊ မတ်လ (၂၉) ရက်နေ့တွင် ဥရောပသမဂ္ဂမှအပြီးတိုင်နုတ်ထွက်ရန် သတ်မှတ်ထားပြီးဖြစ်ရာ မည်ကဲ့သို့သောအခြေအနေမျိုးဖြစ်ပေါ်စေကာမူ သတ်မှတ်ရက်အတိုင်း နုတ်ထွက်သွားမည်ဟု ဗြိတိန်ဝန်ကြီးချုပ်ထရီဇာမေက ထပ်လောင်း အတည်ပြုပြောကြားခဲ့ခြင်းသည်လည်း စတာလင်ပေါင်တန်ဖိုးကိုကျဆင်းစေသည့် အခြားသောအချက်တစ်ခုဖြစ်ကြောင်း၊  ၂၀၁၉ ခုနှစ်၊ ဖေဖော်ဝါရီလ (၆) ရက်(ဗုဒ္ဓဟူးနေ့) နံနက်ပိုင်းတွင်း ကမ္ဘာ့ငွေကြေးဈေးကွက်အတွင်း စတာလင်ပေါင်တန်ဖိုးမှာ ၀.၈% ကျဆင်းပြီးစတာလင်တစ်ပေါင်လျှင် အမေရိကန်ဒေါ်လာ (၁.၃၀၅၁) ဒေါ်လာလဲလှယ်မှုနှုန်းသို့ ရောက်ရှိခဲ့ကြောင်း၊အဆိုပါ လဲလှယ်မှုနှုန်းသည် ၂၀၁၉ ခုနှစ်၊ ဇန်နဝါရီလ (၂၃) ရက်နောက်ပိုင်း ရက်သတ္တပတ်(၂)ပတ်အတွင်း စတာလင်ပေါင်တန်ဖိုး အနိမ့်ဆုံးအနေအထားပင်ဖြစ်သည်ဟုသိရှိရကြောင်းဖြင့် reuters သတင်းဌာနက ထုတ်လွှင့်ခဲ့ပါသည်။

ဘင်္ဂလားဒေ့ရှ်နိုင်ငံရှိ မွတ်စလင်ဒုက္ခသည်များ အမြန်ဆုံးနေရပ်ပြန်နိုင်ရေးအတွက် အင်ဒိုနီးရှားနိုင်ငံ အနေဖြင့် အာဆီယံအဖွဲ့နှင့်အတူ ပိုမိုအလေးပေးလုပ်ဆောင်သွားမည်ဟု အင်ဒိုနီးရှားနိုင်ငံခြားရေး ဝန်ကြီးကပြောကြားခဲ့မှု

ဘင်္ဂလား​ဒေ့ရှ်နိုင်ငံရှိ မွတ်စလင်ဒုက္ခသည်များ အမြန်ဆုံးနေရပ်ပြန်နိုင်ရေးအတွက် အင်ဒိုနီးရှားနိုင်ငံအနေဖြင့် အာဆီယံအဖွဲ့နှင့်အတူ ပိုမိုအလေးပေးလုပ်ဆောင်သွားမည်ဟု အင်ဒိုနီးရှားနိုင်ငံခြားရေးဝန်ကြီးကပြောကြားခဲ့မှု

ဘင်္ဂလား​ဒေ့ရှ်နိုင်ငံရှိ မွတ်စလင်ဒုက္ခသည်များ မကြာမီကာလအတွင်း အမြန်ဆုံးနေရပ်ပြန်နိုင်ရေးအတွက် အင်ဒိုနီးရှားနိုင်ငံအနေဖြင့် အာဆီယံအဖွဲ့နှင့်အတူ ပိုမိုအလေးပေးလုပ်ဆောင်သွားမည်ဟု ဘင်္ဂလားဒေ့ရှ်နိုင်ငံသို့ အလည်အပတ်ရောက်ရှိနေသည့် အင်ဒိုနီးရှားနိုင်ငံခြားရေးဝန်ကြီး ရက်နိုအယ်လ်ပီမာဆူဒိုက ၂၀၁၉ ခုနှစ်၊ ဖေဖော်ဝါရီလ (၄) ရက် (တနင်္လာနေ့) တွင် ပြောကြားခဲ့သည်ဟု သိရှိရ ပါသည်။

ဘင်္ဂလားဒေ့ရှ်နိုင်ငံသို့အလည်အပတ်ရောက်ရှိနေသည့် အင်ဒိုနီးရှားနိုင်ငံခြားရေးဝန်ကြီး သည် ဘင်္ဂလားဒေ့ရှ်ဝန်ကြီးချုပ် ရှိတ်ဟာဆီနာနှင့် ဒါကာမြို့ရှိ ဝန်ကြီးချုပ်ရုံးတွင် တွေ့ဆုံခဲ့ပြီး မွတ်စလင်အရေးကိစ္စအပါအဝင် အမျိုးသမီးရေးရာ အခန်းကဏ္ဍများနှင့်ပတ်သက်၍ ဆွေးနွေးခဲ့ကြကြောင်း၊ ထိုသို့တွေ့ဆုံစဉ် အင်ဒိုနီးရှားနိုင်ငံခြားရေးဝန်ကြီးက ပြောကြားရာ၌ မွတ်စလင်များ နေရပ်ပြန်ရေးကိစ္စနှင့် ပတ်သက်၍ မြန်မာနိုင်ငံသို့ အမြန်ဆုံး ပြန်လာနိုင်ရေးအတွက် မြန်မာအစိုးရအနေဖြင့် ရခိုင်ပြည်နယ်အတွင်း ကောင်းမွန်သောပတ်ဝန်းကျင်အခြေအနေများ ဖန်တီးနိုင်စေရန် အထူးအလေးပေး တိုက်တွန်းလုပ်ဆောင်သွားမည်ဖြစ်ကြောင်း၊ ထို့ပြင် နေရပ်ပြန်လာကြမည့် မွတ်စလင် ဒုက္ခသည်များအတွက် မြန်မာနိုင်ငံ၊ ရခိုင်ပြည်နယ်အတွင်း အခြေခံအဆောက်အဦများ ဆောက်လုပ်ထားရှိမှုအခြေအနေများကိုကြည့်ရှုရန် အာဆီယံမှအဖွဲ့ဝင်များပါဝင်သော အာဆီယံအဖွဲ့(၂) ဖွဲ့သည် မကြာမီကာလအတွင်း မြန်မာနိုင်ငံသို့ အလည်အပတ် သွားရောက်လိမ့်မည်ဖြစ်ကြောင်း၊ ထို့ပြင် ဘင်္ဂလားဒေ့ရှ်နိုင်ငံ၏ ဖြစ်ပေါ်လျက်ရှိသော လူမှုစီးပွားဖွံ့ဖြိုးတိုးတက်မှုများနှင့် ရှိတ်ဟာဆီနာ၏ ခေါင်းဆောင်မှုအောက်တွင် အုပ်ချုပ်ရေး၊ တရားစီရင်ရေး၊ ပညာရေးနှင့် အားကစားကဲ့သို့သော အခန်းကဏ္ဍများတွင် အမျိုးသမီးများ၏ လုပ်ပိုင်ခွင့် မြှင့်တင်ခဲ့ခြင်းများနှင့် ပတ်သက်၍ ချီးကျူးပါသည်ဟု ပြောကြားခဲ့ကြောင်း သိရှိရပါသည်။

အဆိုပါတွေ့ဆုံဆွေးနွေးမှုအတွင်း ဝန်ကြီးချုပ်ရှိတ်ဟာဆီနာက ပြန်လည်ပြောကြားရာ၌ မြန်မာနိုင်ငံ၊ ရခိုင်ပြည်နယ်အတွင်း နေရပ်ပြန်လာကြမည့် မွတ်စလင်ဒုက္ခသည်များ နေထိုင်နိုင်စေရေးအတွက် နေအိမ်အဆောက်အဦအချို့ကို တရုတ်၊ အိန္ဒိယနှင့် ဂျပန်နိုင်ငံများက စီစဉ်ဆောက်လုပ်ထားခဲ့ပြီး ဖြစ်သော်လည်း မြန်မာနိုင်ငံတွင် နေထိုင်လျက်ရှိသည့် အချို့သောမွတ်စလင်များသည် လက်ရှိအချိန်ထိ ဘင်္ဂလားဒေ့ရှ်နိုင်ငံအတွင်းသို့ဝင် ရောက်ရန်ကြိုးပမ်းလျက်ရှိသည်ဟု ပြန်လည်ပြောကြားခဲ့ကြောင်း၊ ထို့နောက် ဘင်္ဂလားဒေ့ရှ်ဝန်ကြီးချုပ်နှင့် အင်ဒိုနီးရှားနိုင်ငံခြားရေးဝန်ကြီးတို့သည် နှစ်နိုင်ငံဆက်ဆံရေးဆိုင်ရာကိစ္စများနှင့် စီးပွားရေးဆိုင်ရာ ကိစ္စရပ်များကိုဆွေးနွှေးခဲ့ကြပြီး အဆိုပါအစည်းအဝေးသို့ ဘင်္ဂလားဒေ့ရှ်နိုင်ငံခြားရေးဝန်ကြီး အေကေအဗ္ဗဒူလ်မိုမန်၊ ဝန်ကြီးချုပ်ရုံး အတွင်းရေးမှူးဆက်ဂျာဒူဟာဆန်နှင့် ဘင်္ဂလားဒေ့ရှ်နိုင်ငံဆိုင်ရာ အင်ဒိုနီးရှားသံအမတ်ကြီး ရီနာပရီတာရှိမာဆီဆိုမာနိုတို့လည်း တက်ရောက်ခဲ့ကြသည်ဟု သိရှိရပါသည်။

အလားတူ ကုလသမဂ္ဂဒုက္ခသည်များဆိုင်ရာ မဟာမင်းကြီးရုံး(UNHCR)၏ အထူးသံတမန် ဖြစ်ပြီး ကမ္ဘာကျော် ရုပ်ရှင်သရုပ်ဆောင်ဖြစ်သူ အိန်ဂျလီနာဂျိုလီသည် ၂၀၁၉ ခုနှစ်၊ ဖေဖော်ဝါရီလ (၅)ရက် (အင်္ဂါနေ့) နံနက်ပိုင်းတွင် ဘင်္ဂလားဒေ့ရှ်နိုင်ငံရှိ မွတ်စလင်ဒုက္ခသည် စခန်းများသို့ ရောက်ရှိလာခဲ့ကြောင်း၊ ရှေးဦးစွာ သူမသည် ကော့ဘဇားဒေသရှိ ဒုက္ခသည်အများစုနေထိုင်ရာ ကူတူပါလောင် ဒုက္ခသည်စခန်းများသို့ ဦးစွာသွားရောက်ခဲ့ကြောင်း ထို့နောက် ကူတူပါလောင်ဒုက္ခသည်စခန်းများရှိရာ ဒုက္ခသည်စခန်း(၄) ခုရှိ ကျန်းမာရေးစောင့်ရှောက်မှု စင်တာများအား လေ့လာကြည့်ရှုခဲ့ပြီးနောက် ဒုက္ခသည်အမျိုးသမီးများနှင့်တွေ့ဆုံခဲ့ကြောင်း၊ အိန်ဂျလီနာဂျိုလီသည် ကုလသမဂ္ဂ၏ ၂၀၁၉ ခုနှစ်အတွက် ငွေကြေးအကူအညီ ရရှိရေးအစီအစဉ်သစ် တစ်ရပ်ဖြစ်သည့် အမေရိကန်ဒေါ်လာ(၁) ဘီလီယံခန့် အကူအညီရရှိနိုင်ရေးအတွက် မျှော်မှန်းကာ ဘင်္ဂလားဒေ့ရှ်နိုင်ငံသို့ လာရောက်ခဲ့ခြင်းဖြစ်ပြီး ကုလသမဂ္ဂအနေဖြင့် အိန်ဂျလီနာဂျိုလီ၏ အဆိုပါခရီးစဉ်ကြောင့် ငွေကြေးအကူအညီ အမေရိကန်ဒေါ်လာသန်း (၉၂၀) ခန့်ရရှိရန် မျှော်မှန်းထားသည်ဟု သိရှိရပါသည်။

ရည်ညွှန်း www.newagebd.net

၂၀၁၈ ခုနှစ်အတွင်း ကမ္ဘာတစ်ဝန်း ဗဟိုဘဏ်များ၏ ရွှေဝယ်ယူမှုပမာဏမှာ ၁၉၆၇ ခုနှစ်နောက်ပိုင်း အများဆုံးအနေအထားသို့ရောက်ရှိခဲ့မှု

၂၀၁၈ ခုနှစ်အတွင်း ကမ္ဘာတစ်ဝန်းဗဟိုဘဏ်များ၏ ရွှေဝယ်ယူမှုပမာဏမှာ ၁၉၆၇ ခုနှစ်နောက်ပိုင်း အများဆုံးအနေအထားသို့ရောက်ရှိခဲ့မှု

လွန်ခဲ့သည့်ရက်ပိုင်းအတွင်း ကမ္ဘာ့ရွှေကောင်စီမှထုတ်ပြန်သည့် အစီရင်ခံစာအရ ကမ္ဘာ တစ်ဝန်းဗဟိုဘဏ်များ၏ ရွှေဝယ်ယူမှု ပမာဏမှာ ၁၉၆၇ ခုနှစ်နောက်ပိုင်း အများဆုံးအနေအထားသို့ ရောက်ရှိခဲ့ခြင်းနှင့်အတူ ကမ္ဘာတစ်ဝန်းစုစုပေါင်း ရွှေဝယ်လိုအားပမာဏမှာလည်း ၄% ခန့် မြင့်တက် ခဲ့သည်ဟု သိရှိရပါသည်။

ကမ္ဘာ့ရွှေကောင်စီမှ ထုတ်ပြန်သည့်အစီရင်ခံစာအရ ၂၀၁၈ခုနှစ်အတွင်း ကမ္ဘာတစ်ဝန်း ဗဟိုဘဏ်များ၏ရွှေဝယ်ယူမှုစုစုပေါင်းပမာဏမှာ ၂၀၁၇ ခုနှစ်နှင့် နှိုင်းယှဉ်ပါက ၇၄% မြင့်တက်ခဲ့ပြီး တန်ချိန် (၆၅၁.၅)တန်ခန့် ရှိခဲ့ကာ အဆိုပါရွှေများကို အဓိကအားဖြင့် ရုရှား၊ တရုတ်၊ တူရကီ၊ ပိုလန်၊ ကာဇက်စတန်နှင့်မွန်ဂိုလီးယားနိုင်ငံဗဟိုဘဏ်များက ဝယ်ယူခဲ့ကြခြင်းဖြစ်ကြောင်း၊ ရုရှားဗဟိုဘဏ်သည် အမေရိကန်ဒေါ်လာ အသုံးပြုမှုလျှော့ချရေး ဆောင်ရွက်ချက်အနေဖြင့် အမေရိကန်ဒေါ်လာ အခြေခံသော ငွေတိုက်စာချုပ်များကို ထုတ်ရောင်းကာ ရွှေဝယ်ယူစုဆောင်းမှုကို တိုးမြှင့်လုပ်ဆောင် ခဲ့ခြင်းဖြစ်ပြီး ယခုအခါ ကမ္ဘာပေါ်၌ ရွှေဝယ်ယူစုဆောင်းမှု ပဉ္စမမြောက် အများဆုံးနိုင်ငံအဖြစ် ရပ်တည် လျက်ရှိကြောင်း၊ ၂၀၁၈ခုနှစ်အတွင်း အမေရိကန်-တရုတ် ကုန်သွယ်ရေးတင်းမာမှုများ ဖြစ်ပေါ်ခဲ့ခြင်း၊ အရှေ့အလယ်ပိုင်းဒေသ မတည်ငြိမ်ခြင်း၊ အမေရိကန်အစိုးရက ရုရှား၊ အီရန်နှင့် ဗင်နီဇွဲလား နိုင်ငံများအား အရေးယူပိတ်ဆို့မှုများ ချမှတ်ထားခြင်း၊  ဥရောပသမဂ္ဂမှ ဗြိတိန်နိုင်ငံ နုတ်ထွက်ရေးနှင့်ပတ်သက်၍ မသေချာမရေရာမှုများ ဖြစ်ပေါ်နေခြင်း အစရှိသည့်အခြေအနေများနှင့်ဆက်နွယ်ကာ ကမ္ဘာ့စီးပွားရေးနှေးကွေးမှုများ ဖြစ်ပေါ်လာမည့်အပေါ်  စိုးရိမ်ပူပန်မှုများကြောင့် ကမ္ဘာတစ်ဝန်းဗဟိုဘဏ်များသည် ရွှေဝယ်ယူစုဆောင်းမှုများ လုပ်ဆောင်ခဲ့ကြခြင်းဖြစ်သည်ဟု သိရှိရပါသည်။

အလားတူ ၂၀၁၈ ခုနှစ်အတွင်း ကမ္ဘာတစ်ဝန်း စုစုပေါင်းရွှေဝယ်လိုအားပမာဏမှာ တန်ချိန် (၄၃၄၅.၁) တန်ခန့်ရှိခဲ့ရာ ၂၀၁၇ ခုနှစ်အတွင်းဖြစ်ပေါ်ခဲ့သည့် ကမ္ဘာတစ်ဝန်း ရွှေဝယ်လိုအား ပမာဏ (၄၁၅၉.၉) တန်နှင့် နှိုင်းယှဉ်ပါက ၄% ဝန်းကျင်ခန့် မြင့်တက်ခဲ့ခြင်းဖြစ်သည်ဟု ကမ္ဘာ့ရွှေကောင်စီ၏ အစီရင်ခံစာအရ သိရှိရကြောင်း ruters သတင်းဌာနက ထုတ်လွှင့်ခဲ့ပါသည်။

မှတ်ချက်။   ၂၀၁၈ခုနှစ်၊ ဒီဇင်ဘာလတွင် ကမ္ဘာပေါ်၌ ရွှေပိုင်ဆိုင်မှု အများဆုံးနိုင်ငံ(၁၀)နိုင်ငံမှာ အမေရိကန်(၈၄၀၇.၃၉တန်)၊ ဂျာမနီ(၃၄၈၃.၂၁တန်)၊ အီတလီ(၂၅၃၄.၄၁တန်)၊ ပြင်သစ် (၂၅၁၈.၀၈တန်)၊ ရုရှား(၂၁၈၄.၁၉တန်)၊ တရုတ်(၁၉၀၄.၆၁တန်)၊ ဆွစ်ဇာလန်(၁၀၇၅.၀၂တန်)၊ ဂျပန်(၇၉၀.၉၉တန်)၊ နယ်သာလန်(၆၃၃.၀၈)နှင့် အိန္ဒိယ(၆၁၈.၇၄တန်)တို့ဖြစ်ကြောင်း သိရှိရပါသည်။