အီရန်ဗိုလ်ချုပ်ကို လုပ်ကြံသတ်ဖြတ်ခဲ့ခြင်းမှာ အမေရိကန်ပြည်ထောင်စုအနေဖြင့် မိမိကိုယ်ကိုခုခံ ကာကွယ်ခြင်းသာဖြစ်သည်ဟု ကုလသမဂ္ဂလုံခြုံရေးကောင်စီ၌ အမေရိကန်ပြည်ထောင်စုက ကြေညာခဲ့
အမေရိကန်ပြည်ထောင်စုသည် အီရန်အရေးကိစ္စနှင့်ပတ်သက်၍ ကုလသမဂ္ဂလုံခြုံရေးကောင်စီသို့ ၂၀၂၀ ပြည့်နှစ်၊ ဇန်နဝါရီလ(၈)ရက်(ဗုဒ္ဓဟူးနေ့)တွင် ပေးပို့သည့်အကြောင်းကြားစာ၌ အီရန်ဗိုလ်ချုပ် ဆိုလာမိုင်နီကိုလုပ်ကြံသတ်ဖြတ်ခဲ့ခြင်းမှာ အမေရိကန်ပြည်ထောင်စုအနေဖြင့် မိမိကိုယ်ကိုခုခံ ကာကွယ်ရန်အတွက်ဖြစ်သည်ဟု ရေးသားဖော်ပြထားကြောင်း၊ လုံခြုံရေးကောင်စီတွင် ကုလသမဂ္ဂဆိုင်ရာအမေရိကန်သံအမတ်ကြီး ကယ်လီခရဖ်ကပြောကြားရာ၌ အမေရိကန်ပြည်ထောင်စုသည် မိမိကိုယ်ကိုကာကွယ်ရန်အတွက် အီရန်ဗိုလ်ချုပ်အားလုပ်ကြံသတ်ဖြတ်ခဲ့ခြင်းဖြစ်ပြီး အမေရိကန်ပြည်ထောင်စု၏အကျိုးစီးပွားနှင့် အမေရိကန်နိုင်ငံသားများ၏ အသက်အိုးအိမ်၊ စည်းစိမ်တို့ကို ကာကွယ်နိုင်ရန်အတွက်လိုအပ်ပါက အရှေ့အလယ်ပိုင်းဒေသတွင် အရေးယူဆောင်ရွက်မှုများ ထပ်မံပြုလုပ်ရန် ဆုံးဖြတ်ထားကြောင်း၊ အီရန်အစိုးရနှင့် ကြိုတင်ကန့်သတ်မှုများမပါဘဲ စေ့စပ်ဆွေးနွေးရန် အသင့်ရှိနေသကဲ့သို့ အခြားတစ်ဖက်မှလည်း အီရန်အစိုးရကြောင့်ဖြစ်ပေါ်လာနိုင်သည့် နိုင်ငံတကာငြိမ်းချမ်းရေးနှင့်လုံခြုံရေးဆိုင်ရာခြိမ်းခြောက်မှုများကို ကာကွယ်သွားရန်ရည်မှန်းထားပါသည်ဟု ပြောကြားခဲ့ကြောင်း သိရှိရပါသည်။
အမေရိကန်ပြည်ထောင်စုသည် ကုလသမဂ္ဂလုံခြုံရေးကောင်စီသို့ ပေးပို့သောစာ၌ အီရန် ဗိုလ်ချုပ်ကိုလုပ်ကြံသတ်ဖြတ်ရခြင်းမှာ ကုလသမဂ္ဂပဋိဉာဉ်စာတမ်းပါ ပြဌာန်းချက်အမှတ်(၅၁)(UN Charter Artical – 51)နှင့်အညီ လုပ်ဆောင်ခြင်းဖြစ်သည်ဟု ကိုးကားဖော်ပြထားကြောင်း၊ အဆိုပါ ပြဌာန်းချက်အမှတ်(၅၁)၌ ကုလသမဂ္ဂအဖွဲ့ဝင်မည်သည့်နိုင်ငံမဆို မိမိကိုယ်ကိုခုခံပိုင်ခွင့်အရ မည်သည့် လက်တုန့်ပြန်မှုမျိုးကိုမဆိုလုပ်ဆောင်နိုင်ပြီး လက်တုန့်ပြန်မှုနှင့်ပတ်သက်၍ အဖွဲ့ဝင်နိုင်ငံ (၁၅)နိုင်ငံပါဝင်သော ကုလသမဂ္ဂလုံခြုံရေးကောင်စီထံသို့အစီရင်ခံစာအမြန်ဆုံးတင်သွင်းနိုင်ရန်လိုအပ်သည်ဟု ဖော်ပြထားကြောင်း၊ အမေရိကန်ပြည်ထောင်စုသည် ၂၀၁၄ ခုနှစ်အတွင်း ဆီးရီးယား၌ အိုင်အက်စ် အကြမ်းဖက်သမားများအပေါ်စစ်ရေးအရတိုက်ခိုက်ခဲ့သည့်အချိန်ကလည်း ယခုကဲ့သို့ပင်ပြဌာန်းချက်အမှတ်(၅၁)ကို ကိုးကား၍လုံခြုံရေးကောင်စီထံ အကြောင်းကြားခဲ့ဖူးကြောင်း သိရှိရပါသည်။
အမေရိကန်ပြည်ထောင်စုနည်းတူ အီရန်နိုင်ငံကလည်း ကုလသမဂ္ဂလုံခြုံရေးကောင်စီသို့ ဇန်နဝါရီလ(၈)ရက်နေ့၌ပင်အကြောင်းကြားစာရေးသားပေးပို့ခဲ့ရာ၌ အီရန်နိုင်ငံအနေဖြင့်အမေရိကန်စစ်စခန်းများကို ဒုံးကျည်များဖြင့်တိုက်ခိုက်ခဲ့ခြင်းမှာ ကုလသမဂ္ဂပဋိဉာဉ်စာတမ်းပါ ပြဌာန်းချက်(၅၁)နှင့်အညီ အချိုးအစားညီမျှစွာလက်တုန့်ပြန်ခဲ့ခြင်းဖြစ်ပြီး အရပ်သားများထိခိုက်နစ်နာခြင်းမရှိစေအောင်လုပ်ဆောင်ခဲ့ခြင်းဖြစ်ကြောင်းနှင့် စစ်ပွဲအရှိန်မြင့်တက်လာမည်ကို မလိုလားပါကြောင်း အစရှိသည့်အချက်များကို ထည့်သွင်းဖော်ပြထားကြောင်း သိရှိရပါသည်။
အီရန်နိုင်ငံသည် အီရတ်နိုင်ငံရှိ အမေရိကန်စစ်အခြေစိုက်စခန်း(၂)ခုကို ဒုံးကျည်များဖြင့် တိုက်ခိုက်ခြင်းမပြုမီ အီရတ်အစိုးရထံသို့ ကြိုတင်အကြောင်းကြားခဲ့သည်ဟု အီရတ်နိုင်ငံဝန်ကြီးချုပ်ရုံးက၂၀၂၀ ပြည့်နှစ်၊ ဇန်နဝါရီလ(၈)ရက်(ဗုဒ္ဓဟူးနေ့)တွင် ကြေညာခဲ့ကြောင်း၊ အီရတ်နိုင်ငံဝန်ကြီးချုပ်ရုံး၏ကြေညာချက်၌ အီရန်နိုင်ငံသည် ဒုံးကျည်များမပစ်လွှတ်မီ အချိန်ပိုင်းအလိုတွင် အီရတ်ဝန်ကြီးချုပ်ရုံးသို့အကြောင်းကြားခဲ့ကြောင်း၊ ထိုသို့အကြောင်းကြားရာ၌ အီရန်ဗိုလ်ချုပ်လုပ်ကြံသတ်ဖြတ်ခံခဲ့ရသည့်အတွက် အီရတ်ရှိအမေရိကန်အခြေစိုက်စခန်းများကို လက်တုန့်ပြန်တိုက်ခိုက်တော့မည်ဟူသောအချက်သာပါဝင်ပြီး တိုက်ခိုက်မည့်ပစ်မှတ်နေရာအတိအကျကို ပြောဆိုခဲ့ခြင်းမရှိကြောင်း၊ အီရတ်ဝန်ကြီးချုပ်ရုံးသည် အီရန်နိုင်ငံ၏အကြောင်းကြားချက်ကို ရရှိသည်နှင့်တစ်ပြိုင်နက် အီရတ်တပ်မတော်ခေါင်းဆောင်များအားသတိပေးခဲ့ပြီး အမေရိကန်တပ်ဖွဲ့များထံသို့ပါ အမြန်ဆုံးအကြောင်းကြားခဲ့သည့်အတွက် လူသူထိခိုက်ဒဏ်ရာရခြင်းမရှိခဲ့ကြောင်း၊ အီရတ်အစိုးရအနေဖြင့် အီရတ်နိုင်ငံ၏ အချုပ်အခြာအာဏာနှင့်ပိုင်နက်ကိုကျူးကျော်သည့် မည်သည့်တိုက်ခိုက်မှုမျိုးကိုမဆို ပြစ်တင်ရှုံ့ချပါသည်ဟု ဖော်ပြထားကြောင်း သိရှိရပါသည်။
အမေရိကန်သမ္မတဒေါ်နယ်ထရန့်သည် ၂၀၂၀ ပြည့်နှစ်၊ ဇန်နဝါရီလ(၈)ရက်(ဗုဒ္ဓဟူးနေ့) ညပိုင်းတွင်ပြုလုပ်သည့် သတင်းစာရှင်းလင်းပွဲ၌ အီရန်၏ ဒုံးကျည်ဖြင့်တိုက်ခိုက်မှုဖြစ်စဉ်အတွင်း အမေရိကန်နိုင်ငံသား တစ်ဦးတစ်ယောက်မျှဒဏ်ရာရခြင်းမရှိကြောင်းနှင့် အီရန်နိုင်ငံသည် အမေရိကန်နှင့်စစ်မက်ဖြစ်ပွားလိုခြင်းမရှိဘဲအလျှော့ပေးလိုသည့်အရိပ်အယောင်များကိုပြသနေပြီဖြစ်သောကြောင့်ကမ္ဘာ့နိုင်ငံများအနေဖြင့် စစ်ပွဲဖြစ်ပွားမည့်အရေးကို စိုးရိမ်ပူပန်ခြင်းမပြုရန်ပြောကြားခဲ့ပြီး တိုက်ခိုက်မှုများအတွက် အီရန်နိုင်ငံအပေါ် စီးပွားရေးပိတ်ဆို့မှုအသစ်များကိုသာ ထပ်မံပြုလုပ်မည်ဖြစ်ပြီး နျူကလီးယားမပိုင်ဆိုင်စေရန်အတွက် ဆောင်ရွက်သွားမည်ဟုကတိပြုခဲ့ကြောင်း၊ သမ္မတဒေါ်နယ်ထရန့်၏ ပြောကြားချက်ထွက်ပေါ်ပြီးနောက်တွင် အရှေ့အလယ်ပိုင်းဒေသအရေးအပေါ်စိုးရိမ်ပူပန် မှုများလျော့ကျလာခြင်းနှင့်အတူ ဇန်နဝါရီလ(၉)ရက်နံနက်ပိုင်း၌ ကမ္ဘာ့တစ်ဝန်းစတော့ရှယ်ယာဈေးနှုန်းများမှာ ၀.၅% မှ ၀.၇% ထိမြင့်တက်လာပြီး WTI ရေနံစိမ်းတစ်စည်၏ ဈေးနှုန်းမှာ ၄.၉% ခန့်ကျဆင်းကာ တစ်စည်လျှင် အမေရိကန်ဒေါ်လာ (၅၉.၆၁)သို့လည်းကောင်း၊ ကမ္ဘာ့ရွှေဈေးနှုန်းမှာ ၀.၉% ကျဆင်းပြီး တစ်အောင်စလျှင် အမေရိကန်ဒေါ်လာ(၁၅၆၀.၂၀)သို့လည်းကောင်းအသီးသီးရောက်ရှိခဲ့ကြောင်း သိရှိရပါသည်။
အီရတ်ရှိအမေရိကန်စစ်စခန်းများအား အီရန်နိုင်ငံက ဒုံးကျည်များဖြင့် တိုက်ခိုက်ခဲ့ပြီး (၂၄) နာရီခန့်ကြာမြင့်ပြီးနောက် ၂၀၂၀ ပြည့်နှစ် ၊ ဇန်နဝါရီလ(၉)ရက်(ကြာသပတေး)နေ့ နံနက်ပိုင်းတွင် အီရတ်နိုင်ငံမြို့တော် ဘဂ္ဂဒက်မြို့ရှိ အမေရိကန်သံရုံးနှင့် နိုင်ငံခြားသား သံရုံးများတည်ရှိရာ ရပ်ကွက် အတွင်းသို့ ဒုံးကျည်(၂)လုံးကျရောက်ပေါက်ကွဲခဲ့ကြောင်း၊ တိုက်ခိုက်မှုကြောင့် လူသူထိခိုက်ဒဏ်ရာ ရမှုမရှိကြောင်း၊တိုက်ခိုက်မှုမှာ အီရန်လိုလားသော အီရတ်ပြည်သူ့စစ်အဖွဲ့ မာရှယ်အယ်ရှာဘီအဖွဲ့၏ လက်ချက်ဖြစ်လိမ့်မည်ဟုယူဆထားကြောင်း၊ အဆိုပါအဖွဲ့၏ဒုတိယခေါင်းဆောင် အယ်လ်မာဟာ ဒစ်ခ်သည် အမေရိကန်၏ဒရုန်းဖြင့် လုပ်ကြံသတ်ဖြတ်မှုဖြစ်စဉ်အတွင်း၌ အီရန်ဗိုလ်ချုပ်ဆိုလိုင်မန်နီနှင့်အတူ သေဆုံးခဲ့သည့်အတွက် အမေရိကန်အပေါ်လက်တုန့်ပြန်မည်ဟု အဆိုပါအဖွဲ့ကခြိမ်းခြောက်ခဲ့ကြောင်းဖြင့်www.channelnewsasia.com အင်တာနက် website တွင်ဖော်ပြပါရှိပါသည်။