တရုတ်နိုင်ငံသည် အာဖရိကနိုင်ငံများသို့ လက်ကျန်သိုလှောင်ဆန်များအား ဈေးနှုန်းလျှော့ချ၍ ရောင်းချ နေသောကြောင့် ထိုင်းနိုင်ငံ၏ဆန်တင်ပို့မှုကို ထိခိုက်လျက်ရှိ
ထိုင်းနိုင်ငံသည် အာဖရိကဆန်ဈေးကွက်ကို ချုပ်ကိုင်ထားခဲ့ပြီး အာဖရိကနိုင်ငံအများစုသည် ထိုင်းဆန်ကိုသာ အစဉ်အဆက်အဓိကထားဝယ်ယူခဲ့ကြကြောင်း၊ သို့သော်ယခုအခါ တရုတ်နိုင်ငံသည် သက်တမ်းရင့် သိုလှောင်ဆန်များအား အာဖရိကနိုင်ငံများသို့ ဈေးနှုန်းလျှော့ချ၍ရောင်းချလာသည် ဖြစ်သောကြောင့် ထိုင်းနိုင်ငံ၏ဆန်ပို့ကုန်ကဏ္ဍတွင် အခက်အခဲများ စတင်ကြုံတွေ့လျက်ရှိကြောင်း သိရှိရပါသည်။
ထိုင်းနိုင်ငံ ဆန်ပို့ကုန်လုပ်ငန်းရှင်များအသင်း၏ဥက္ကဋ္ဌ ချိုကီရက်အိုဖာဝေါင်ဆေးက ယခုရက်ပိုင်းအတွင်း ပြောကြားရာ၌ တရုတ်နိုင်ငံသည် နှစ်စဉ်ဆန်တန်ချိန် (၁၂၀) သန်းခန့် ပုံမှန်ထုတ်လုပ်လျက်ရှိပြီး ၂၀၁၈ ခုနှစ်အတွင်း၌ ပြည်ပသို့ဆန်တန်ချိန် (၁.၅) သန်း နှင့် (၂) သန်းအကြား တင်ပို့ခဲ့ရာမှ ၂၀၁၉ ခုနှစ် တွင်မူ ပြည်ပသို့ ဆန်တန်ချိန် (၃) သန်းခန့် တင်ပို့ဖွယ်ရှိကြောင်း၊ အထူးသဖြင့် အာဖရိကနိုင်ငံများသည် ဆန်သစ်ထက်ဆန်ဟောင်းကို ပိုမိုစားသုံးလေ့ရှိသောကြောင့် တရုတ်နိုင်ငံအနေဖြင့် သိုလှောင်ထားသည့် ဆန်ဟောင်းများအား အာဖရိကဈေးကွက်သို့ အဓိကထားတင်ပို့လျက်ရှိကြောင်း၊ တရုတ်နိုင်ငံမှ ထွက်ရှိသော (၅) မှတ်ဆန်ဖြူတစ်တန်၏ ဈေးနှုန်းမှာ အမေရိကန်ဒေါ်လာ (၃၀၀) ဝန်းကျင်သာ ရှိသော ကြောင့်အဆိုပါဈေးနှုန်းသည် ထိုင်း (၅) မှတ်ဆန်ဖြူတစ်တန်လှျင် အမေရိကန်ဒေါ်လာ (၃၉၀) ၊ ဗီယက်နမ် (၅) မှတ်ဆန်ဖြူတစ်တန်လျှင် အမေရိကန်ဒေါ်လာ (၃၆၀) နှင့် အိန္ဒိယ ( ၅) မှတ်ပေါင်းဆန်တစ်တန်လျှင် အမေရိကန်ဒေါ်လာ (၃၇၀) အစရှိသောဈေးနှုန်းများနှင့်နှိုင်းယှဉ်ပါက များစွာချိုသာလျက်ရှိသည့်အတွက် အာဖရိကဈေးကွက်၌ တရုတ်ဆန်များမှာ အသာစီးရလျက်ရှိကြောင်း၊ တရုတ်နိုင်ငံသည် ဆန်အမျိုးအစားမျိုးစုံကို အထွက်နှုန်းအများအပြားထွက်ရှိစေရန်အတွက် ကြိုးပမ်းလုပ်ဆောင်လျက်ရှိပြီး ဈေးနှုန်းချိုသာသည့် တရုတ်ဆန်များအား အာဖရိကနိုင်ငံများသို့သာမက အာရှဆန်ဝယ်လက်များဖြစ်သော ဟောင်ကောင်၊ အင်ဒိုနီးရှား၊ မလေးရှားနှင့် ဖိလစ်ပိုင်နိုင်ငံများသို့ပါဈေးကွက်ချဲ့ထွင် ရောင်းချဖွယ်ရှိသောကြောင့် ထိုင်းနိုင်ငံအနေဖြင့် အခက်အခဲများပိုမိုကြုံတွေ့ရဖွယ်ရှိသည်ဟု ပြောကြားခဲ့ကြောင်း သိရှိရပါသည်။
ထိုင်းနိုင်ငံသည် ၂၀၁၇ ခုနှစ်အတွင်း၌ ပြည်ပသို့ဆန်တန်ချိန် (၁၁.၆၇) သန်းခန့် တင်ပို့နိုင်ခဲ့သော်လည်း ၂၀၁၈ ခုနှစ်၌မူ ပြည်ပသို့ ဆန်တန်ချိန် (၁၁.၀၉) သန်းခန့်သာ တင်ပို့နိုင်ခဲ့ကြောင်း၊ သို့သော် ၂၀၁၈ ခုနှစ်အတွင်း ကမ္ဘာ့ဆန်ဈေးအားကောင်းမှုကြောင့် ထိုင်းနိုင်ငံ၏ ပြည်ပသို့ဆန်တင်ပို့မှုမှရရှိသော ဝင်ငွေပမာဏချင်းနှိုင်းယှဉ်ပါက ၂၀၁၈ ခုနှစ်၌ ရရှိသောဝင်ငွေမှာ ၂၀၁၇ ခုနှစ် ဝင်ငွေထက် ၈.၃% ပိုမိုခဲ့ပြီး အမေရိကန်ဒေါ်လာ (၅.၆၁) ဘီလီယံခန့်ရရှိခဲ့ကြောင်း၊ထိုင်းနိုင်ငံသည်၂၀၁၉ ခုနှစ်၌မူ တရုတ်နိုင်ငံနှင့် ဆန်ဈေးကွက်၌ ပြိုင်ဆိုင်နေရသောကြောင့် ပြည်ပသို့ဆန်တန်ချိန် (၉.၅) သန်းခန့်သာ တင်ပို့ နိုင်ဖွယ်ရှိသည်ဟု ထိုင်းနိုင်ငံ စီးပွား/ကူးသန်းဝန်ကြီးဌာနကခန့်မှန်းထားကြောင်း www. bangkokpost. com အင်တာနက် website တွင် ဖော်ပြပါရှိပါသည်။