အိုပက်အဖွဲ့ကရေနံထုတ်လုပ်မှုကို ဆက်လက်လျှော့ချထားရန် စီစဉ်နေခြင်းနှင့် အမေရိကန်ပြည်ထောင်စုရေနံအရန်သိုလှောင်မှု လျော့နည်းနေခြင်းတို့ကြောင့် ကမ္ဘာ့ရေနံစိမ်းဈေးနှုန်းမှာ တစ်စည်လျှင် အမေရိကန် ဒေါ်လာ (၆၀) အထက်သို့ရောက်ရှိခဲ့

အိုပက်အဖွဲ့ကရေနံထုတ်လုပ်မှုကို ဆက်လက်လျှော့ချထားရန်စီစဉ်နေခြင်းနှင့် အမေရိကန်ပြည် ထောင်စု ရေနံအရန်သိုလှောင်မှု လျော့နည်းနေခြင်းတို့ကြောင့် ကမ္ဘာ့ရေနံစိမ်းဈေးနှုန်းမှာခရစ်စမတ်ပွဲတော် အကြိုကာလဈေးကွက်မပိတ်မီအချိန်၌ တစ်စည်လျှင် အမေရိကန်ဒေါ်လာ (၆၀) အထက် သို့ ရောက်ရှိခဲ့ကြောင်းသိရှိရပါသည်။

ရုရှားနိုင်ငံစွမ်းအင်ဝန်ကြီး အလက်ဇန္ဒားနိုဘတ်သည် ၂၀၁၉ ခုနစ်၊ ဒီဇင်ဘာလ (၂၃) ရက် နေ့တွင် သတင်းထောက်များနှင့်တွေ့ဆုံရာ၌ အိုပက်အဖွဲ့၊ ရုရှားနိုင်ငံနှင့် အိုပက်အဖွဲ့ဝင် မဟုတ် သောရေနံထုတ်လုပ်သည့် အခြားနိုင်ငံများသည် ဈေးကွက်၏အခြေအနေအရ ရေနံထုတ်လုပ်မှုကို ဆက်လက်လျှော့ချထားရန် စီစဉ်နေသည်ဟု ပြောကြားခဲ့ကြောင်း၊ အိုပက်အဖွဲ့နှင့်ရုရှားအပါအဝင် ရေနံထုတ်လုပ်သည့် အခြားနိုင်ငံများသည် နေ့စဉ်ထုတ်လုပ်နေသည့် ရေနံပမာဏအနက်မှစည် ပေါင်း (၂.၁) သန်းခန့်ကို ၂၀၁၇ ခုနှစ်မှစတင်၍ လျှော့ချထုတ်လုပ်လျက်ရှိပြီး ယင်းအစီအစဉ်ကို ၂၀၂၀ ခုနှစ်၊ မတ်လကုန်အထိ ဆက်လက်လုပ်ဆောင်သွားရန် စီစဉ်နေကြောင်း၊ အဆိုပါလျှော့ချမှုပမာဏမှာ ကမ္ဘာတစ်ဝန်းတစ်နေ့တာ ရေနံဝယ်လိုအားပမာဏ၏ ၂% ခန့်ရှိကြောင်း၊ ထို့ ကြောင့် ဈေးကွက်အတွင်းရေနံလိုအပ်ချက် ဖြစ်ပေါ်လာမည့်အပေါ်စိုးရိမ်ပူပန်မှုများကြောင့် ရေနံဈေးနှုန်းများ မြင့်တက်လာခြင်းဖြစ်ကြောင်း သိရှိရပါသည်။

ထို့ပြင် ရိုက်တာသတင်းဌာနမှ ရေနံဈေးကွက်အတွင်းရရှိသည့် သတင်းအချက်အလက်များ၌ အမေရိကန်ပြည်ထောင်စု၏ ရေနံအရန်သိုလှောင်မှုပမာဏမှာရတ်သတ္တပတ်(၂) ပတ်ဆက်တိုက်ကျဆင်းခဲ့ပြီး လက်ရှိအချိန်၌ သတ်မှတ်ထားသည့် ပမာဏအောက်စည်ပေါင်း (၁.၇) သန်းခန့် လျော့နည်းနေကြောင်း ဖော်ပြထားခြင်းသည်လည်း ရေနံဈေးနှုန်းများကို မြင့်တက်စေသည့် အခြားအချက်တစ်ခုဖြစ်ကြောင်း သိရှိရပါသည်။

၂၀၁၉ ခုနှစ်၊ ဒီဇင်ဘာလ (၂၄) ရက် (အင်္ဂါနေ့) နံနက်ပိုင်းတွင် ကမ္ဘာ့ရေနံဈေးကွက်၌ ရေနံစိမ်းဈေးနှုန်းများမှာ ၀.၁ % မြင့်တက်ခဲ့ပြီး WTI ရေနံစိမ်းတစ်စည်၏ ကြိုတင်ရောင်းဝယ်မှုဈေးနှုန်းမှာတစ်စည်လျှင် အမေရိကန်ဒေါ်လာ(၆၀.၅၁) သို့လည်းကောင်း၊ ဘရန့်ရေနံစိမ်းတစ်စည်၏ ဈေးနှုန်းမှာတစ်စည်လျှင်အမေရိကန်ဒေါ်လာ(၆၆.၄၄) သို့ရောက်ရှိခဲ့ကြောင်းအထက်www.bloomberg.com အင်တာနက် website တွင်ဖော်ပြပါရှိပါသည်။

ရုရှားသမ္မတ ဗလာဒီမီယာပူတင်သည် အမေရိကန်အောက်လွှတ်တော်၏ ပြစ်တင်ရှုတ်ချမှုကို ကြုံတွေ့နေရသော အမေရိကန်သမ္မတ ဒေါ်နယ်ထရန့်ဘက်မှရပ်တည်၍ အတိုက်အခံဒီမိုကရက်တစ်ပါတီအပေါ် ပြစ်တင်ဝေဖန်ခဲ့

ရုရှားသမ္မတဗလာဒီမီယာပူတင်သည် ယခုရက်ပိုင်းအတွင်းပြုလုပ်ခဲ့သည့် ရုရှားသမ္မတ၏ နှစ်ပတ်လည် သတင်းစာရှင်းလင်းပွဲ၌ အမေရိကန်အောက်လွှတ်တော်၏ ပြစ်တင်ရှုတ်ချကြောင်းအဆိုကို ရင်ဆိုင်နေရသည့် အမေရိကန်သမ္မတဒေါ်နယ်ထရန့်ဘက်မှ ကာကွယ်ပြောကြားခဲ့ပြီးစွပ်စွဲပြစ်တင်မှုများမှာ အခြေအမြစ်မရှိသောကြောင့် နောက်ဆုံးတွင် အဆိုတင်သွင်းသူများမှာအရှုံးနှင့်သာ ကြုံတွေ့ရလိမ့်မည်ဟု ပြောကြားခဲ့ကြောင်း သိရှိရပါသည်။

ရုရှားသမ္မတကပြောကြားရာ၌ ၂၀၁၆ခုနှစ် ရွေးကောက်ပွဲ၌ဒေါ်နယ်ထရန့်ကို ရှုံးနိမ့်ခဲ့သော ဒီမိုကရက်တစ်ပါတီသည် အခြားသောနည်းလမ်းများအသုံးပြု၍ ၎င်းတို့၏ နိုင်ငံရေးရည်မှန်းချက် ပန်းတိုင်ကို ရောက်ရှိအောင် ကြိုးပမ်းဆောင်ရွက်လျက်ရှိရာ ယခုစွပ်စွဲပြစ်တင်မှုမှာလည်းနိုင်ငံရေးနည်းလမ်းတစ်ခုပင်ဖြစ်ကြောင်း၊ သို့သော် ရီပတ်ဗလစ်ကန်ပါတီမှ ထိန်းချုပ်ထားသောအထက်လွှတ်တော်ရှိနေသည့်အတွက် အတိုက်အခံဒီမိုကရက်တစ်ပါတီအနေဖြင့် သမ္မတဒေါ်နယ်ထရန့်အား ဖယ်ရှားနိုင်လိမ့်မည် မဟုတ်ကြောင်း၊ အောက်လွှတ်တော်၏ ပြစ်တင်ရှုတ်ချကြောင်းအဆိုသည် ဒေါ်နယ်ထရန့်အပေါ်၌ မည်သည့်အကျိုးသက်ရောက်မှုကိုမျှ ဖြစ်ပေါ်စေမည် မဟုတ်သော်လည်း အမေရိကန်ပြည်တွင်းနိုင်ငံရေး၌မူ အပြန်အလှန်တိုက်ခိုက်မှုများ ဆက်လက်ဖြစ်ပေါ် နေလိမ့်မည်ဖြစ်ကြောင်း၊ ဒီမိုကရက်တစ်ပါတီသည် သမ္မတဒေါ်နယ်ထရန့်အား ပထမဦးစွာရုရှားနိုင်ငံနှင့် ပူးပေါင်းသည်ဟူသော စွဲချက်ဖြင့် တိုက်ခိုက်ခဲ့ပြီး အဆိုပါစွပ်စွဲချက်မအောင်မြင်သောအခါ ဒုတိယမြောက်ကြိုးပမ်းမှုအဖြစ် ပြစ်တင်ရှုတ်ချကြောင်း အဆိုတင်သွင်း၍ ဒေါ်နယ်ထရန့်အား ဖြုတ်ချရန်စီစဉ်ခြင်းဖြစ်သည်ဟု ပြောကြားခဲ့ကြောင်း သိရှိရပါသည်။

သမ္မတပူတင်သည် အဆိုပါ နှစ်ပတ်လည်သတင်းစာရှင်းလင်းပွဲ၌ပင် ၎င်းအနေဖြင့် ၂၀၃၀ ပြည့်နှစ်အထိသမ္မတတာဝန်များ ဆက်လက်ထမ်းဆောင်လိုကြောင်းကို သတင်းထောက်များအားအရိပ်အမြွက်ပြောကြားခဲ့ကြောင်း၊ သမ္မတပူတင်သည် သမ္မတသက်တမ်းပထမအကြိမ်အဖြစ် ၂၀၁၂ ခုနှစ်မှ ၂၀၁၈ ခုနှစ်အထိတာဝန်ထမ်းဆောင်ခဲ့ပြီး သမ္မတသက်တမ်းဒုတိယအကြိမ်အဖြစ် ၂၀၁၈ ခုနှစ်မှ ၂၀၂၄ ခုနှစ်အထိ ဆက်လက်ထမ်းဆောင်လျက်ရှိကြောင်း၊သို့သော် ရုရှားနိုင်ငံ၏ ဖွဲ့စည်းပုံအခြေခံဥပဒေ၌ မည်သူမဆိုသမ္မတသက်တမ်း တတိယအကြိမ်ထမ်းဆောင်ခွင့်မရှိဟူ၍ အတိအလင်းပြဌာန်းထားသည့်အတွက် သမ္မတပူတင်သည် ၂၀၂၄ ခုနှစ် အလွန်ကာလများတွင် သမ္မတရာထူး ဆက်လက်ရယူထားနိုင်ရန်အတွက် ဖွဲ့စည်းပုံအခြေခံဥပဒေပါပြဌာန်းချက်ကို အမြန်ဆုံးပြင်ဆင်ဖွယ်ရှိသည်ဟု နိုင်ငံရေးလေ့လာသူများက ခန့်မှန်းထားကြကြောင်း www.bdnews24.comအင်တာနက် website တွင် ဖော်ပြပါရှိပါသည်။

အနောက်နိုင်ငံများ၏ အရေးယူပိတ်ဆို့မှုများကို ကျော်လွှားနိုင်ရန်အတွက် မွတ်စလင်နိုင်ငံအချင်းချင်း ကုန်သွယ်ရာ၌ ရွှေ၊ ကုန်စည်ချင်းဖလှယ်သည့်စနစ်နှင့် ဒီဂျစ်တယ်ငွေကြေးများကို ပြောင်းလဲသုံးစွဲရန် မူစလင်နိုင်ငံများထိပ်သီး အစည်းအဝေးပွဲ၌ ဆွေးနွေးခဲ့

အီရန်၊ မလေးရှား၊ တူရကီနှင့် ကာတာနိုင်ငံတို့သည် အနောက်နိုင်ငံများ၏ အရေးယူပိတ်ဆို့မှုများကိုကျော်လွှားနိုင်ရန်အတွက် မွတ်စလင်နိုင်ငံအချင်းချင်း ကုန်သွယ်မှုကိစ္စများ၌ အမေရိကန်ဒေါ် လာအစား ရွှေဖြင့်ပေးချေမှုများ၊ ကုန်စည်ချင်းအပြန်အလှန်ဖလှယ်မှု စနစ်များအပါအဝင် အခြားနည်းလမ်းများကို အသုံးပြုရန် စဉ်းစားနေသည်ဟု မလေးရှားနိုင်ငံ ကွာလာလာမ်ပူမြို့၌ ကျင်းပခဲ့ သည့် မွတ်စလင်နိုင်ငံများ ထိပ်သီးအစည်းအဝေးပွဲအပြီး ၂၀၁၉ ခုနှစ်၊ ဒီဇင်ဘာလ(၂၁) ရက်(စနေနေ့) တွင် မလေးရှားဝန်ကြီးချုပ် မဟာသီယာမိုဟာမက်က ပြောကြားခဲ့ကြောင်း သိရှိရပါသည်။

မလေးရှားဝန်ကြီးချုပ်က ပြောကြားရာ၌ လက်ရှိအချိန်တွင် အမေရိကန်ပြည်ထောင်စုသည် အီရန်နိုင်ငံအပေါ် စီးပွားရေးပိတ်ဆို့မှုများ ပြုလုပ်ထားပြီး အမေရိကန်၏ မဟာမိတ် ဆော်ဒီအာရေဗျ၊ အာရပ်စော်ဘွားများပြည်ထောင်စု၊ ဘာရိန်းနှင့်အီဂျစ်နိုင်ငံများသည်လည်းကာတာနိုင်ငံအပေါ်၌ စီးပွားရေးပိတ်ဆို့မှုများ ပြုလုပ်ထားကြောင်း၊ အင်အားကြီးနိုင်ငံများသည် နိုင်ငံငယ်များအပေါ်၌ တဖက်သတ်အရေးယူပိတ်ဆို့မှုများ ပြုလုပ်လေ့ရှိရာ မလေးရှားနိုင်ငံအပါအဝင် အခြားသော မွတ်စလင်နိုင်ငံများအနေဖြင့် အရေးယူပိတ်ဆို့မှုများ အချိန်မရွေးကြုံတွေ့နိုင်ကြောင်းကိုကြိုတင်စဉ်းစားထားရမည်ဖြစ်ကြောင်း၊ ထို့ကြောင့် မွတ်စလင်နိုင်ငံအချင်းချင်း ကုန်သွယ်ရေးကိစ္စများ၌ အပြန်အလှန်ပေးချေမှုများပြုလုပ်ရာတွင် အမေရိကန်ဒေါ်လာအစား ရွှေ ၊ ကုန်စည်ချင်းဖလှယ်သည့်စနစ်နှင့် အခြားသောသင့်တော်သည့် နည်းလမ်းများအား အမြန်ဆုံး အသုံးပြုရေးကို အစည်းအဝေးတက်ရောက်လာသည့် နိုင်ငံများက ဆွေးနွေးခဲ့ကြသည်ဟု ပြောကြားခဲ့ကြောင်း သိရှိရပါသည်။

အဆိုပါ မွတ်စလင်နိုင်ငံများ ထိပ်သီးအစည်းအဝေးပွဲတွင် မလေးရှားဝန်ကြီးချုပ်၊ အီရန် သမ္မတနှင့် တူရကီသမ္မတတို့သည် မွတ်စလင်နိုင်ငံများအားလုံး သုံးစွဲနိုင်မည့် ဒီဂျစ်တယ်ဘုံငွေကြေးတစ်ရပ် အမြန်ဆုံးတီထွင် အသုံးပြုနိုင်ရေးကိုလည်း ဆွေးနွေးခဲ့ကြပြီး ဒီဂျစ်တယ်ဘုံငွေကြေးအကောင်အထည်ဖော်နိုင်ရေးအတွက် မွတ်စလင်နိုင်ငံအသီးသီးမှ ဗဟိုဘဏ်များအကြား ပူးပေါင်းဆောင်ရွက်မှုများ အမြန်ဆုံးပြုလုပ်ရန် သဘောတူခဲ့သည်ဟု သိရှိရပါသည်။

၂၀၁၉ ခုနှစ်၊ ဒီဇင်ဘာလ (၁၈) ရက်နေ့မှ (၂၁) ရက်နေ့အထိ ကွာလာလာမ်ပူမြို့၌ (၄)ရက်ကြာ ကျင်းပခဲ့သည့် မွတ်စလင်နိုင်ငံများထိပ်သီးအစည်းအဝေးပွဲသို့ မွတ်စလင်နိုင်ငံ(၂၀)ခန့်မှ ကိုယ်စားလှယ်(၄၅၀)ဦးခန့် တက်ရောက်ခဲ့ကြောင်း၊ မလေးရှားနိုင်ငံသည် အစ္စလာမ်မစ်နိုင်ငံများ ပူးပေါင်းဆောင်ရွက်ရေးအဖွဲ့ (OIC) တွင်ပါဝင်သောအဖွဲ့ဝင် နိုင်ငံ (၅၇) နိုင်ငံတို့ကိုဖိတ်ကြားခဲ့သော်လည်း ဆော်ဒီအာရေဗျနှင့် ပါကစ္စတန်နိုင်ငံအပါအဝင် မွတ်စလင်နိုင်ငံ (၃၀) ကျော်တို့က တက်ရောက်ခဲ့ခြင်းမရှိကြောင်း၊ အဆိုပါအစည်းအဝေးတွင် ရခိုင်ပြည်နယ်နှင့်ဆက်စပ်နေသော ဒုက္ခသည်ပြဿနာ၊ တရုတ်နိုင်ငံရှိ အူဟာမွတ်စလင်ပြဿနာ၊ ပါလက်စတိုင်းပြဿနာနှင့် ကတ်ရှ်မီးယားပြဿနာများအပါအဝင် မွတ်စလင်များအပေါ် ထိခိုက်နေသည့် ပြဿနာများအပေါ် အဓိကထားဆွေးနွေးခဲ့ကြကြောင်း၊ အဆိုပါ ထိပ်သီးအစည်းအဝေးပွဲတွင် မလေးရှားဝန်ကြီးချုပ် မဟာသီယာမိုဟာမက်က မွတ်စလင်နိုင်ငံမဟုတ်သော နိုင်ငံများတွင်နေထိုင်နေရသည့် မွတ်စလင်များအတွက် မိမိတို့ကစိုးရိမ်ပူပန်မိသည်ဟု ပြောကြားခဲ့ကြောင်းwww.channelnewsasia.comအင်တာနက် website တွင် ဖော်ပြပါရှိပါသည် ။

ဂျာမနီနိုင်ငံအနေဖြင့် ဟွာဝေးကုမ္ပဏီအပေါ် ပိတ်ပင်မှုများ ပြုလုပ်လာမည်ဆိုပါက တရုတ်နိုင်ငံအနေဖြင့်  ဂျာမနီကားကုမ္ပဏီများအပေါ် လက်တုံ့ပြန်သွားမည်ဟု တရုတ်အစိုးရက သတိပေးပြောကြားခဲ့

ဂျာမနီနိုင်ငံအနေဖြင့် အမေရိကန်အစိုးရ၏ ဖိအားပေးမှုများကြောင့် တရုတ်နည်းပညာကုမ္ပဏီကြီးဖြစ်သော ဟွာဝေးကုမ္ပဏီ၏ 5G network နှင့် ပတ်သက်၍  ပိတ်ပင်မှုများ ပြုလုပ်လာမည်ဆိုပါက တရုတ်နိုင်ငံအနေဖြင့် ဂျာမနီကားကုမ္ပဏီများအပေါ် လက်တုန့်ပြန်မှုများ ပြုလုပ်သွားမည်ဟု ဂျာမနီနိုင်ငံဆိုင်ရာ တရုတ်သံအမတ်ကြီးက ယခုရက်ပိုင်းအတွင်း ပြောကြားခဲ့ကြောင်းသိရှိရပါသည်။

အမေရိကန်အစိုးရသည် တရုတ်နိုင်ငံဟွာဝေးကုမ္ပဏီ၏ ဆက်သွယ်ရေးနည်းပညာပစ္စည်းများမှာခိုးယူထောက်လှမ်းခြင်းနှင့် ဆိုက်ဘာတိုက်ခိုက်မှုများပြုလုပ်နိုင်သည်ဖြစ်၍ ဂျာမနီနိုင်ငံ၌ ဟွာဝေးကုမ္ပဏီအပေါ် ပိတ်ပင်တားမြစ်မှုများပြုလုပ်ရန် ဂျာမနီအစိုးရအား ဖိအားပေးတောင်းဆိုမှုများပြုလုပ်ထားပြီး ဂျာမနီအစိုးရအနေဖြင့် ဟွာဝေးအပေါ် ပိတ်ပင်မှုများမပြုလုပ်ပါက အရေးကြီးသတင်းအချက်အလက် မျှဝေမှုများလုပ်ဆောင်ခြင်းကို ရုတ်သိမ်းမည်ဟု အမေရိကန်အစိုးရကအသိပေးပြောကြားထားကြောင်း၊ ထို့ပြင် လွန်ခဲ့သည့် နိုဝင်ဘာလအတွင်း ဂျာမနီနိုင်ငံ၏ လက်ရှိဝန်ကြီးချုပ်အန်ဂျလာမာကယ်၏ အာဏာရခရစ္စတီယံဒီမိုကရက်တစ်ယူနီယံပါတီမှ လွှတ်တော်အမတ်အချို့သည် ဂျာမနီနိုင်ငံ၌ 5G network တပ်ဆင်ရာတွင် တရုတ်နိုင်ငံ၏ ဟွာဝေးကုမ္ပဏီအ‌ပေါ် ပိတ်ပင်မှုများပြုလုပ်ရန် အဆိုတင်သွင်းခဲ့ကြသည်ဟု သိရှိရပါသည်။

ဂျာမနီနိုင်ငံဆိုင်ရာ တရုတ်သံအမတ်ကြီးဝူခန်းက ပြောကြားရာ၌ ဂျာမနီအစိုးရအနေဖြင့် ဟွာဝေးကုမ္ပဏီအပေါ် ပိတ်ပင်ရန် ဆုံးဖြတ်မည်ဆိုပါက တန်ပြန်အကျိုးဆက်များဖြစ်ပေါ်လာမည်ဖြစ်ကြောင်း၊ လွန်ခဲ့သည့် ၂၀၁၈ ခုနှစ်အတွင်းတရုတ်နိုင်ငံ၌ မော်တော်ယာဉ်အစီးရေစုစုပေါင်း ၂၈ သန်းခန့် ရောင်းချခဲ့ရာတွင် ဂျာမနီနိုင်ငံထုတ် မော်တော်ယာဉ် အစီးရေ(၇)သန်းခန့်ရောင်းချနိုင်ခဲ့ သည်ကိုသတိပြုစေလိုကြောင်း၊ တရုတ်နိုင်ငံသည် ကိုယ်တိုင်ကား ထုတ်လုပ်နိုင်သည့် အခြေအနေရှိသည်ဖြစ်ရာ ဂျာမနီထုတ်မော်တော်ယာဉ်များမှာ လုံခြုံမှုမရှိဟူ၍ ကြေညာလိုက်မည် ဆိုပါက ဂျာမနီမော်တော်ယာဉ် ကုမ္ပဏီများအတွက် အခက်တွေ့နိုင်သည် ဟုပြောကြားခဲ့ကြောင်း www.indiatimes.com အင်တာနက် website တွင်ဖော်ပြပါရှိပါသည်။

၂၀၁၉ _ ၂၀၂၀ ဘဏ္ဍာရေးနှစ်