ရုရှားနိုင်ငံသည် အမေရိကန်ဒေါ်လာအပေါ် မှီခိုမှုများကို လျှော့ချနိုင်ရန်အတွက် အရန်ရွှေအများအပြားကို တိုးမြှင့် စုဆောင်းလျက်ရှိ

ရုရှားနိုင်ငံသည် အမေရိကန်ဒေါ်လာအပေါ် မှီခိုမှုများကို လျှော့ချနိုင်ရန်အတွက် အရန်ရွှေအများအပြားကို တိုးမြှင့် စုဆောင်းလျက်ရှိ

          ရုရှားနိုင်ငံသည် အမေရိကန်ဒေါ်လာအပေါ် မှီခိုမှုများကို လျှော့ချနိုင်ရန်အတွက် အရန်ရွှေအများအပြားကို တိုးမြှင့်စုဆောင်းလျက်ရှိကြောင်း သိရှိရပါသည်။

          ရုရှားဗဟိုဘဏ်က ယခုရက်ပိုင်းအတွင်း ထုတ်ပြန်ခဲ့သည့် စာရင်းအချက်အလက်များအရ ရုရှားနိုင်ငံသည် ၂၀၁၉ ခုနှစ်၊ ဇူလိုင်လအတွင်း၌ ရွှေတန်ချိန် (၉) တန်ခန့်ဝယ်ယူခဲ့ပြီး အရန်ရွှေပိုင်ဆိုင်မှု ပမာဏကိုတန်ချိန် (၂၂၁၇.၆၈) တန်သို့ ရောက်အောင်တိုးမြှင့်ခဲ့သည့်အတွက် ရွှေပိုင်ဆိုင်မှုတန်ဖိုးမှာ ကာလတန်ဖိုးအားဖြင့် အမေရိကန်ဒေါ်လာ (၁၀၁.၉၂၃) ဘီလီယံခန့်ရှိသည်ဟု သိရှိရပါသည်။

          ၂၀၁၉ ခုနှစ်၊ ဇန်နဝါရီလဆန်းမှ ဇူလိုင်လကုန်အထိ ကာလအတွင်း ရုရှားဗဟိုဘဏ်မှ ဝယ်ယူခဲ့သည့်  ရွှေတန်ချိန်ပမာဏမှာ (၁၀၅.၇၅) တန်ခန့်ရှိကြောင်း၊ ရုရှားဗဟိုဘဏ်သည် ၂၀၁၈ ခုနှစ်၊ တစ်နှစ်တာကာလအတွင်း၌လည်း ရွှေတန်ချိန် (၂၇၅) တန်ကို ဝယ်ယူခဲ့ရာ သမိုင်းတစ်လျှောက် တစ်နှစ်အတွင်း အများဆုံးဝယ်ယူမှု ပမာဏပင်ဖြစ်ကြောင်း၊ လက်ရှိအချိန်တွင် ရုရှားဗဟိုဘဏ်၏ အရန်ရွှေနှင့် နိုင်ငံခြား အရန်ငွေကြေးပိုင်ဆိုင်မှု စုစုပေါင်းတန်ဖိုးမှာ အမေရိကန်ဒေါ်လာ (၅၂၈.၄) ဘီလီယံခန့်ရှိပြီး အဆိုပါ ပမာဏအနက် ၁၉.၆ %မှာ အရန်ရွှေများ၏ ကာလတန်ဖိုးပမာဏဖြစ်ကြောင်း www.rt.com အင်တာနက် website တွင် ဖော်ပြပါရှိပါသည်။

မှတ်ချက်။   ။ ကမ္ဘာပေါ်၌ အရန်ရွှေပိုင်ဆိုင်မှုအများဆုံး (၁၀) နိုင်ငံမှ အမေရိကန်ပြည်ထောင်စု (၈၁၃၃.၅ တန်)၊ ဂျာမနီ(၃၃၆၆.၈ တန်) ၊ အီတလီ(၂၄၅၁.၈ တန်)၊ ပြင်သစ်(၂၄၃၆.၁ တန်)၊ ရုရှား(၂၂၁၇.၆၈ တန်)၊ တရုတ်(၁၉၂၆.၅ တန်)၊ ဆွစ်ဇာလန်(၁၀၄၀.၀ တန်)၊ ဂျပန်(၇၆၅.၂ တန်)၊ အိန္ဒိယ( ၆၁၈.၂ တန်)၊ နယ်သာလန်(၆၁၂.၅ တန်)တို့ဖြစ်ပါသည်။

ကုန်သွယ်ရေးစစ်ပွဲကြောင့် ကမ္ဘာ့စီးပွားရေး ကျဆင်းမည့်အပေါ် စိုးရိမ်ပူပန်မှုများကြောင့် ကမ္ဘာ့ရေနံ ဈေးနှုန်းများမှာ ရက်သတ္တပတ် (၂) ပတ်အတွင်း အနိမ့်ဆုံးသို့ကျဆင်းခဲ့

ကုန်သွယ်ရေးစစ်ပွဲကြောင့် ကမ္ဘာ့စီးပွားရေး ကျဆင်းမည့်အပေါ် စိုးရိမ်ပူပန်မှုများကြောင့် ကမ္ဘာ့ရေနံဈေးနှုန်းများမှာ ရက်သတ္တပတ် (၂) ပတ်အတွင်းအနိမ့်ဆုံးသို့ ကျဆင်းခဲ့

       တရုတ်အစိုးရသည်နိုင်ငံအတွင်းသို့ တင်သွင်းနေသည့် အမေရိကန်ကုန်ပစ္စည်းများအပေါ်၌ ကုန်စည်အမျိုးအစားပေါ်မူတည်၍ ထပ်ဆောင်းအခွန် ၅% သို့မဟုတ် ၁၀% ခန့်ကောက်ခံရန် စီစဉ်နေကြောင်း၊ ထပ်ဆောင်းအခွန်ကောက်ခံမည့် ကုန်စည်အမျိုးအစားမှာ (၅၀၇၈) မျိုးခန့်ရှိပြီး ကုန်စည်များ၏ စုစုပေါင်းတန်ဖိုးမှာ အမေရိကန်ဒေါ်လာ (၇၅) ဘီလီယံခန့်ရှိကြောင်း၊ ကုန်စည်အမျိုးအစားပေါ်မူတည်၍ အချို့သော ကုန်စည်များကို ၂၀၁၉ ခုနှစ်၊ စက်တင်ဘာလ (၁) ရက်နေ့တွင်လည်းကောင်း၊ ကျန်ကုန်စည်များကို ဒီဇင်ဘာလ (၁၅) ရက်တွင်လည်းကောင်း စတင်ကောက်ခံသွားမည်ဖြစ်ပြီး အထူးကိစ္စရပ်တစ်ခုအနေဖြင့် အမေရိကန်ပြည်ထောင်စုမှ ထုတ်လုပ်သည့် မော်တော်ယာဉ်များနှင့် ယာဉ်အပိုပစ္စည်းများကို ဒီဇင်ဘာလ (၁၅) ရက်မှစတင်၍ သွင်းကုန်ခွန် ၅% မှ ၂၅% အတွင်းနှုန်းထားတစ်မျိုးမျိုး သတ်မှတ်ကာ ပြန်လည်ကောက်ခံရန် စီစဉ်လျက်ရှိသည်ဟု သိရှိရပါသည်။

          တရုတ်နိုင်ငံ၏ သွင်းကုန်ခွန်ရုတ်တရက်ကောက်ခံမှုအပေါ် လက်တုံ့ပြန်သည့်အနေဖြင့် အမေရိကန်ပြည်ထောင်စုကလည်း အမေရိကန်ပြည်ထောင်စုသို့ တင်သွင်းနေသည့် တရုတ်ကုန်စည် များအနက် ကုန်စည်အမျိုးအစားပေါ်မူတည်၍ အမေရိကန်ဒေါ်လာ (၃၀၀) ဘီလီယံခန့် တန်ဖိုးရှိ တရုတ်ကုန်စည်များအပေါ်၌ စက်တင်ဘာလ (၁) ရက်မှစတင်၍ သွင်းကုန်ခွန်နှုန်းထားကို လက်ရှိသတ်မှတ်ထားသည့် ၁၀% မှ ၁၅% သို့ လည်းကောင်း၊ အမေရိကန်ဒေါ်လာ (၂၅၀) ဘီလီယံခန့်တန်ဖိုးရှိ အခြားတရုတ်ကုန်စည်များအပေါ်၌ အောက်တိုဘာလ (၁) ရက်မှစတင်၍ သွင်းကုန်ခွန်နှုန်းကို လက်ရှိကောက်ခံနေသည့် ၂၅% မှ ၃၀% သို့ တိုးမြှင့်ကောက်ခံရန် ကြေညာခဲ့ကြောင်း၊ အမေရိကန်သမ္မတသည် တရုတ်ကုန်စည်များအပေါ် အခွန်တိုးမြှင့်ကောက်ခံသည့်ကိစ္စနှင့်ပတ်သက်၍ နောင်တရလိမ့်မည် မဟုတ်ကြောင်းနှင့် အမေရိကန်-တရုတ်ကုန်သွယ်ရေးစစ်ပွဲကိုအမေရိကန်ပြည်ထောင်စုအတွက် လိုအပ်ပါက နိုင်ငံတော်အရေးပေါ်အခြေအနေတစ်ရပ်အဖြစ်ကြေညာသွားမည်ဟု ပြောကြားခဲ့ကြောင်း၊ ထို့ပြင် အမေရိကန်ကုမ္ပဏီများအနေဖြင့် တရုတ်နိုင်ငံအတွင်း လုပ်ဆောင်နေသည့် ကုန်ထုတ်လုပ်ငန်းများကို ပိတ်သိမ်း၍ အခြားနိုင်ငံများသို့ အမြန်ဆုံးပြောင်းရွှေ့လုပ်ကိုင်ရန် အမေရိကန်သမ္မတက တောင်းဆိုခဲ့ကြောင်း သိရှိရပါသည်။

          အမေရိကန်ပြည်ထောင်စုနှင့် တရုတ်နိုင်ငံတို့၏  ကုန်သွယ်ရေးစစ်ပွဲကြောင့် ကမ္ဘာ့စီးပွားရေး ဆက်တိုက်ကျဆင်းကာ ရေနံဝယ်လိုအား လျော့နည်းလာသည့်အပေါ် စိုးရိမ်ပူပန်မှုများကြောင့် ကမ္ဘာ့ဈေးကွက်အတွင်း ရေနံဈေးနှုန်းများရက်သတ္တပတ် (၂) ပတ်အတွင်း အနိမ့်ဆုံးသို့ ရောက်ရှိသွားခဲ့ကြောင်း သိရှိရပါသည်။

          ၂၀၁၉ ခုနှစ်၊ ဩဂုတ်လ (၂၆) ရက် (တနင်္လာနေ့) နံနက်ပိုင်းတွင် နယူးယောက်ဈေးကွက်၌ WTI  ရေနံစိမ်းတစ်စည်၏ ကြိုတင်ရောင်းဝယ်မှုဈေးနှုန်းမှာ ၁.၃% ကျဆင်းပြီး တစ်စည်လျှင်အမေရိကန် ဒေါ်လာ (၅၃.၄၉) သို့ ရောက်ရှိခဲ့ကြောင်း၊ လန်ဒန်ဈေးကွက်၌ ဘရန့်ရေနံစိမ်း ကြိုတင်ရောင်းဝယ်မှု ဈေးနှုန်းမှာ ၁.၁% ကျဆင်းပြီးတစ်စည်လျှင် အမေရိကန်ဒေါ်လာ (၅၈.၇၁) သို့ ရောက်ရှိခဲ့ကြောင်း၊ အဆိုပါဈေးနှုန်းများသည် ဩဂုတ်လ (၉) ရက်နေ့နောက်ပိုင်း ရက်သတ္တပတ် (၂) ပတ်အတွင်း အနိမ့်ဆုံး ဈေးနှုန်းများဖြစ်ကြောင်း ဖော်ပြပါရှိပါသည်။

အမေရိကန်-တရုတ်ကုန်သွယ်ရေးစစ်ပွဲပိုမိုပြင်းထန်လာခြင်းနှင့် အမေရိကန်ဗဟိုဘဏ်ဥက္ကဋ္ဌ၏ ငွေကြေးမူဝါဒမိန့်ခွန်းတို့ကြောင့် ကမ္ဘာ့ရွှေဈေးနှုန်းမှာ ၂% နီးပါးခန့် မြင့်တက်သွားခဲ့

အမေရိကန်-တရုတ်ကုန်သွယ်ရေးစစ်ပွဲပိုမိုပြင်းထန်လာခြင်းနှင့် အမေရိကန်ဗဟိုဘဏ်ဥက္ကဋ္ဌ၏ ငွေကြေးမူဝါဒမိန့်ခွန်းတို့ကြောင့် ကမ္ဘာ့ရွှေဈေးနှုန်းမှာ ၂% နီးပါးခန့် မြင့်တက်သွားခဲ့

တရုတ်အစိုးရသည် အမေရိကန်ဒေါ်လာ (၇၅) ဘီလီယံခန့်တန်ဖိုးရှိ အမေရိကန်ကုန်ပစ္စည်း အမျိုးအမည် (၅၀၇၈) မျိုးအပေါ်၌ အခွန် ၅% သို့မဟုတ် ၁၀% ခန့်ကောက်ခံတော့မည်ဟု ၂၀၁၉ ခုနှစ်၊ ဩဂုတ်လ (၂၃) ရက် (သောကြာနေ့) တွင်ကြေညာခဲ့ရာ အဆိုပါပစ္စည်းများတွင် အမေရိကန်ပြည်ထောင်စု၏ ပို့ကုန်ကဏ္ဍအတွက် အရေးပါသော ပဲပိစပ်အပါအဝင် လယ်ယာထွက်ကုန်ပစ္စည်းများ၊ မော်တော်ယာဉ် နှင့် ယာဉ်အပိုပစ္စည်းများ၊  ရေနံစိမ်းနှင့် အသေးစားလေယာဉ်များအထိပါဝင်ကြောင်း၊ တရုတ် အစိုးရ၏ သွင်းကုန်ခွန်ကြေညာချက် ထွက်ပေါ်ပြီးနောက်တွင် အမေရိကန်သမ္မတဒေါ်နယ်လ်ထရန့်ကလည်း အမေရိကန်ဒေါ်လာ (၅၅၀) ဘီလီယံခန့်တန်ဖိုးရှိ တရုတ်ကုန်ပစ္စည်းများအပေါ်၌ လက်ရှိကောက်ခံနေသည့် သွင်းကုန်ခွန်ရာခိုင်နှုန်းအပြင်  ၅% ထပ်ဆောင်းတိုးမြှင့်ကောက်ခံရန် ကြေညာခဲ့ကြောင်း၊ ထို့ပြင် တရုတ်နိုင်ငံ၌ ကုန်ထုတ်လုပ်ငန်းများဆောင်ရွက်နေသည့် အမေရိကန်ကုမ္ပဏီများအနေဖြင့် အခြားနိုင်ငံများသို့ လုပ်ငန်းများပြောင်းရွှေ့လုပ်ကိုင်ရန် အမေရိကန်သမ္မတက ညွှန်ကြားခဲ့ကြောင်း၊ တရုတ်နိုင်ငံနှင့် အမေရိကန်ပြည်ထောင်စုတို့၏ သွင်းကုန်ခွန်ဆိုင်ရာ အပြန်အလှန်ကြေညာချက်များ ထွက်ပေါ်ပြီးနောက်တွင် ကမ္ဘာ့ရွှေဈေးနှုန်းမှာ အဆမတန် မြင့်တက်သွားခဲ့ကြောင်း သိရှိရပါသည်။

ထို့ပြင် ဩဂုတ်လ (၂၃) ရက်(သောကြာနေ့) ၌ပင် အမေရိကန်ပြည်ထောင်စု ဂျက်ဆန်ဟိုးမြို့၌ ကျင်းပခဲ့သည့် ကမ္ဘာ့စီးပွားရေးဆွေးနွေးပွဲတွင် အမေရိကန်ဗဟိုဘဏ်ဥက္ကဋ္ဌဂျရွန်မီပေါင်ဝယ်လ်ကဗဟိုဘဏ်အနေဖြင့် လက်ရှိကမ္ဘာ့စီးပွားရေးနှင့် ပထဝီနိုင်ငံရေးအခြေအနေအပေါ်အခြေခံ၍ ငွေကြေးဆိုင်ရာမူဝါဒများအား လိုအပ်သလို လျှော့ချပေးသွားမည့်အကြောင်းအရိပ်အမြွက်ပြောကြားခဲ့ခြင်းသည်လည်း အမေရိကန်ဒေါ်လာတန်ဖိုးကို ကျဆင်းကာ ကမ္ဘာ့ရွှေဈေးနှုန်းကို မြင့်တက်စေခဲ့ကြောင်း သိရှိရပါသည်။

၂၀၁၉ ခုနှစ်၊ ဩဂုတ်လ(၂၄)ရက်(စနေနေ့)နံနက်ပိုင်းတွင် ကမ္ဘာ့ရွှေဈေးနှုန်းမှာ ၁.၉၃% မြင့် တက်ခဲ့ပြီးတစ်အောင်စလျှင် အမေရိကန်ဒေါ်လာ(၁၅၃၇.၆၀)သို့ ရောက်ရှိခဲ့ကြောင်း၊ အမေရိကန် ဒေါ်လာတန်ဖိုးမှာမူ ၀.၄၈% ကျဆင်းခဲ့ပြီးအညွှန်းကိန်းအမှတ်(၉၇.၇၀)သို့ ရောက်ရှိခဲ့ကြောင်း၊ အလားတူကုန်သွယ်ရေးစစ်ပွဲအပေါ် စိုးရိမ်ပူပန်မှုများကြောင့် အမေရိကန်စတော့ ရှယ်ယာများတန် ဖိုးမှာ ၂% အထိကျဆင်းခဲ့ကြောင်းဖော်ပြပါရှိပါသည်။

အီရန်နှင့် ဗင်နီဇွဲလားနိုင်ငံများအပေါ် အမေရိကန်ပြည်ထောင်စုက အရေးယူပိတ်ဆို့မှုများ ပြုလုပ်ခဲ့သည့်အတွက် ရုရှားနိုင်ငံသည် ရေနံတင်ပို့မှုမှ အမေရိကန်ဒေါ်လာ (၁) ဘီလီယံခန့် အကျိုးအမြတ် ပိုမိုရရှိခဲ့

အီရန်နှင့် ဗင်နီဇွဲလားနိုင်ငံများအပေါ် အမေရိကန်ပြည်ထောင်စုက အရေးယူပိတ်ဆို့မှုများ ပြုလုပ်ခဲ့သည့်အတွက် ရုရှားနိုင်ငံသည် ရေနံတင်ပို့မှုမှ အမေရိကန်ဒေါ်လာ (၁) ဘီလီယံခန့် အကျိုးအမြတ် ပိုမိုရရှိခဲ့

အမေရိကန်သမ္မတ ဒေါ်နယ်လ်ထရန့်သည် အီရန်နိုင်ငံနှင့်ဗင်နီဇွဲလားနိုင်ငံတို့၏ ရေနံတင်ပို့မှုများအပေါ်၌ အရေးယူပိတ်ဆို့မှုများ ပြုလုပ်ခဲ့ရာ ယင်းအရေးယူမှုများ၏ ဂယက်ကြောင့် အီရန်နှင့် ဗင်နီဇွဲလားရေနံများကို ပုံမှန်ဝယ်ယူနေသူများသည် ရုရှားရေနံကို ပြောင်းလဲဝယ်ယူလာကြသည့် အတွက် ရုရှားနိုင်ငံအနေဖြင့် ရေနံတင်ပို့မှုမှ ပုံမှန်ရရှိနေသည့် အကျိုးအမြတ်ထက် အမေရိကန်ဒေါ်လာ(၁) ဘီလီယံနီးပါးခန့် ပိုမိုအမြတ်အစွန်းရရှိခဲ့သည်ဟု သိရှိရပါသည်။

Bloomberg သတင်းဌာနက ယခုရက်ပိုင်းအတွင်း ထုတ်ပြန်သည့် စာရင်းအချက်အလက်များအရ ၂၀၁၈ ခုနှစ်၊ နိုဝင်ဘာလမှ စတင်ခဲ့သည့် အမေရိကန်သမ္မတ ဒေါ်နယ်လ်ထရန့်၏ အီရန်နှင့် ဗင်နီဇွဲလားရေနံများအပေါ် အရေးယူပိတ်ဆို့မှုများကြောင့် ၂၀၁၈ ခုနှစ် ၊ နိုဝင်ဘာလ မှ ၂၀၁၉ ခုနှစ် ဇူလိုင် လအထိ (၉) လတာကာလအတွင်း ရုရှားရေနံကုမ္ပဏီများ၏ အကျိုးအမြတ်ရရှိမှုမှာယခင်ရရှိသည့် ပမာဏထက် အနည်းဆုံးအမေရိကန်ဒေါ်လာ (၉၀၅) သန်းခန့် ပိုမိုရရှိခဲ့ကြောင်း၊ ထို့ပြင် အိုပက်အဖွွဲ့၏ ရေနံထုတ်လုပ်မှုလျော့ကျခြင်းကြောင့် ကမ္ဘာ့စေျးကွက်အတွင်း‌‌ ရေနံစေျးနှုန်းများမြင့်တက် လာခြင်းသည်လည်း ရုရှားရေနံကုမ္ပဏီများအတွက် အမြတ်အစွန်းပိုမိုဖြစ်ထွန်းစေခဲ့ကြောင်း သိရှိရပါသည်။

ရုရှားနိုင်ငံသည် ၂၀၁၉ ခုနှစ် ဇန်နဝါရီလ မှ ဇွန်လကုန်အထိ ကာလအတွင်း ပြည်ပသို့ ရေနံတင်ပို့မှုမှ အမေရိကန်ဒေါ်လာ (၅၈.၅) ဘီလီယံဝင်ငွေရရှိခဲ့ကြောင်း၊ ရုရှားနိုင်ငံသည် ၂၀၁၈ ခုနှစ် (၁) နှစ်တာကာလအတွင်း၌ ပြည်ပသို့‌ရေနံတင်ပို့မှုမှ အမေရိကန်ဒေါ်လာ (၁၂၉) ဘီလီယံရရှိခဲ့ကြောင်း၊ ရုရှားရေနံများသည် အီရန်နှင့် ဗင်နီဇွဲလားနိုင်ငံတို့မှ ထုတ်လုပ်သောရေနံများနှင့် အရည်အသွေးအနီးစပ်ဆုံး တူညီပြီးဈေးနှုန်းမှာ အရှေ့အလယ်ပိုင်းဒေသမှ ထုတ်လုပ်သောရေနံများထက် တစ်စည်လျှင် အမေရိကန် တစ်ဒေါ်လာခန့် သက်သာကာဥရောပတိုက်အနောက်မြောက်ပိုင်းမှ ထုတ်လုပ်သောရေနံများထက် တစ်စည်လျှင် အမေရိကန်ဒေါ်လာ (၁.၆၃) ဒေါ်လာခန့်လျော့နည်းသည်ဟု သိရှိရကြောင်း ဖော်ပြပါရှိပါသည်။

မဏိပူရပြည်နယ် အာဏာပိုင်များသည် အိန္ဒိယ- မြန်မာနယ်စပ်တစ်လျှောက် မူးယစ်ဆေးဝါးရောင်းဝယ်ဖောက်ကားမှုများကို ထိန်းချုပ်နိုင်ရန်အတွက် မိုရေးမြို့၌ ထောက်လှမ်းရေးကွန်ရက်တစ်ခုထားရှိရန် စီစဉ်နေ

မဏိပူရပြည်နယ်အာဏာပိုင်များသည် အိန္ဒိယ- မြန်မာနယ်စပ်တစ်လျှောက် မူးယစ်ဆေးဝါး ရောင်းဝယ်ဖောက်ကားမှုများကိုထိန်းချုပ်နိုင်ရန်အတွက် မိုရေးမြို့၌ ထောက်လှမ်းရေးကွန်ရက်တစ်ခု ထားရှိရန် စီစဉ်နေ

မြန်မာနိုင်ငံနှင့်ဆက်စပ်နေသော အိန္ဒိယနိုင်ငံမဏိပူရပြည်နယ်တွင် နယ်စပ်ဖြတ်ကျော်၍ မူးယစ်ဆေးဝါးရောင်းဝယ်ဖောက်ကားမှု ဖြစ်စဉ်များ အများအပြားပေါ်ပေါက်လျက်ရှိကြောင်း၊ ၂၀၁၉ ခုနှစ် နှစ်ဆန်း မှ ဇူလိုင်လကုန်အထိ ကာလအတွင်း မဏိပူရပြည်နယ်ရဲတပ်ဖွဲ့မှ ဖမ်းဆီးရမိခဲ့သည့် အဖက်တမင်းဆေးပြားအရေအတွက်မှာ (၁,၂၃၇,၉၉၃) ပြားခန့်ရှိပြီး ဘိန်းဖြူအရေအတွက်မှာ (၉) ကီလိုဂရမ်ခန့် ရှိကြောင်း၊ ထို့ကြောင့် ဖမ်းဆီးရမိသည့် ဆေးပြားအရေအတွက်မှာ ၂၀၁၇ ခုနှစ် နှင့် ၂၀၁၈ ခုနှစ်တို့ တွင် တစ်နှစ်တာကာလအတွင်း ဖမ်းဆီးရမိခဲ့သည့် စိတ်ကြွဆေးပြားအရေအတွက်ထက် များစွာ သာလွန်လျက်ရှိကြောင်း၊  လွန်ခဲ့သည့် ရက်သတ္တပတ်ကုန်ပိုင်းတွင် မိုရေးမြို့အနီး၌ ကာလတန်ဖိုးရူပီးငွေ (၁၆၆) ကုဋေတန်ဖိုးရှိဘိန်းဖြူ (၁၈၅) ကီလိုဂရမ်ကို မဏိပူရရဲတပ်ဖွဲ့က ဖမ်းဆီးရမိခဲ့ပြီးနောက် တွင် ပြည်နယ်အာဏာပိုင်များသည် မိုရေးနယ်စပ်မြို့၌ ထောက်လှမ်းရေးကွန်ရက်တစ်ခု ထားရှိပြီးနယ်စပ်ဖြတ်ကျော် မူးယစ်ဆေးဝါးကုန်သွယ်မှုများကိုနှိမ်နင်းရန် စီစဉ်နေကြောင်းသိရှိရပါသည်။

မဏိပူရပြည်နယ်ဝန်ကြီးချုပ် အန်ဘီရန်ဆင်းကပြောကြားရာ၌ ပြည်နယ်ရဲတပ်ဖွဲ့အကြီးအကဲအားမိုရေးမြို့တွင် ထောက်လှမ်းရေးကွန်ရက်တစ်ခု ထားရှိပြီး မူးယစ်ဆေးဝါးကုန်သွယ်မှုများကိုနှိမ်နင်းသွားရန် ညွှန်ကြားထားကြောင်း၊ အထူးသဖြင့် အင်ဖာ – မိုရေးအဝေးပြေးလမ်းမကြီးသည် မူးယစ်ဆေးဝါးသယ်ဆောင်သူများ အဓိကအသုံးပြုနေသည့် လမ်းကြောင်းတစ်ခုဖြစ်နေကြောင်း၊ မူးယစ်ဆေးဝါးပြဿနာသည် မဏိပူရပြည်နယ်၏ အနာဂတ်ကိုထိခိုက်စေနိုင်သောကြောင့်ပြင်းပြင်းထန်ထန် နှိမ်နင်းရန်လိုအပ်ကြောင်း၊ မူးယစ်ဆေးဝါး နှိမ်နင်းမှုများနှင့် ပတ်သက်၍ စွမ်းစွမ်းတမံဆောင်ရွက်ခဲ့ကြသည့် ရဲတပ်ဖွဲ့ဝင်များအား အထူးဂုဏ်ပြုဆုများချီးမြှင့်ရန် စီစဉ်ထားသည်ဟု ပြောကြားခဲ့ကြောင်း သိရှိရပါသည်။

မဏိပူရပြည်နယ်ရဲတပ်ဖွဲ့မှ ရရှိသည့်သတင်းများအရ နယ်စပ်တစ်လျှောက်တွင် မူးယစ်ဆေးဝါးသယ်ဆောင်ရောင်းဝယ်မှုများသာမက ဘိန်းစိုက်ပျိုးမှုများပါ ဖြစ်ပေါ်လျက်ရှိကြောင်း၊ အထူးသဖြင့် မြန်မာနိုင်ငံနှင့် နယ်နိမိတ်ချင်းဆက်စပ်နေသည့် မဏိပူရပိုင်နက် တောင်ကုန်းထူထပ်သော ချန်တယ်လ်ခရိုင်နှင့် အူကာရူးခရိုင်များတွင် ဘိန်းခင်းများရှိကြောင်း၊ အဆိုပါ ဘိန်းခင်းများမှ ထွက်ရှိသည့် ဘိန်းများကို မြန်မာနိုင်ငံဘက်မှ ကုန်သည်များကလာရောက်ဝယ်ယူပြီး ဘိန်းဖြူအဖြစ် ပြောင်းလဲချက်လုပ်ပြီးနောက် မဏိပူရပြည်နယ်အတွင်းသို့ ပြန်လည်တင်သွင်းကာ ရောင်းချလေ့ရှိကြောင်း၊ အဆိုပါခရိုင်များရှိဒေသခံများသည် စပါးစိုက်ပျိုးမှုများကိုမပြုလုပ်တော့ဘဲ ငွေကြေးအမြတ်အစွန်းပိုမိုရရှိသည့် ဘိန်းပင်များကိုသာ စိုက်ပျိုးနေကြသည်ဟုသိရှိရကြောင်း ဖော်ပြပါရှိပါသည်။

အမေရိကန်ဗဟိုဘဏ် အစည်းအဝေးမှတ်တမ်း ထွက်ပေါ်ပြီးနောက်တွင် အမေရိကန်ဒေါ်လာတန်ဖိုး ပြန်လည် မြင့်တက်လာခဲ့

အမေရိကန်ဗဟိုဘဏ် အစည်းအဝေးမှတ်တမ်း ထွက်ပေါ်ပြီး နောက်တွင် အမေရိကန်ဒေါ်လာတန်ဖိုး ပြန်လည် မြင့်တက်လာခဲ့

အမေရိကန်ဗဟိုဘဏ်သည် ၂၀၁၉ ခုနှစ်၊ ဇူလိုင်လ (၃၀) ရက်နေ့ နှင့် (၃၁) ရက်နေ့တို့တွင် ကျင်းပခဲ့သည့် အစည်းအဝေးမှတ်တမ်းကို ဩဂုတ်လ (၂၁) ရက် (ဗုဒ္ဓဟူးနေ့) တွင် အများပြည်သူသိရှိစေရန် ထုတ်ပြန်ကြေညာခဲ့ရာအဆိုပါ အစည်းအဝေးမှတ်တမ်းတွင် ဗဟိုဘဏ်ကော်မတီဝင်များအနေဖြင့် အမေရိကန်သမ္မတဒေါ်နယ်ထရန့်၏ ဘဏ်တိုးနှုန်းအများအပြား လျှော့ချရေးအစီအစဉ်ကို သဘောတူညီမှုမရှိကြောင်း ဆွေးနွေးချက်များပါရှိကြောင်း၊ ထို့ကြောင့် အမေရိကန်ဗဟိုဘဏ်အနေဖြင့် ကော်မတီဝင်အားလုံး၏ သဘောဆန္ဒအရ ဘဏ်တိုးနှုန်းကို လတ်တလောထပ်မံလျှော့ချရန် အစီအစဉ်မရှိနိုင်သေးဟု ရင်းနှီးမြှုပ်နှံသူများက ခန့်မှန်းခဲ့သည့်အတွက် ယင်းအစည်းအဝေးမှတ်တမ်း ထွက်ပေါ်ပြီးနောက်တွင် အမေရိကန်ဒေါ်လာတန်ဖိုးမှာ မြင့်တက်လာခဲ့ကြောင်းသိရှိရပါသည်။

၂၀၁၉ ခုနှစ်၊ ဩဂုတ်လ (၂၂) ရက် (ကြာသပတေးနေ့) နံနက်ပိုင်းတွင် ကမ္ဘာ့ငွေကြေးဈေးကွက်အတွင်း အမေရိကန်ဒေါ်လာတန်ဖိုးမှာ ၀.၃၆% မြင့်တက်ကာအညွှန်းကိန်းအမှတ် (၉၈.၃၀) သို့ ရောက်ရှိခဲ့ပြီး အမေရိကန်တစ်ဒေါ်လာလျှင် ဂျပန်ုနိုင်ငံသုံးယန်းငွေ (၁၀၇.၇၉) ယန်းလဲလှယ်မှုနှုန်း၊ တရုတ်နိုင်ငံသုံးယွမ်ငွေ (၇.၀၈) ယွမ်လဲလှယ်မှုနှုန်း၊ တစ်ယူရိုလျှင် အမေရိကန်ဒေါ်လာ (၁.၁၁) ဒေါ် လာလဲလှယ်မှုနှုန်းများသို့ အသီးသီးရောက်ရှိခဲ့ကြောင်း သိရှိရပါသည်။

အမေရိကန်ဗဟိုဘဏ် ဥက္ကဋ္ဌဂျရွန်မီပေါင်ဝယ်လ်သည် ယခုရက်ပိုင်းအတွင်း အမေရိကန်ပြည်ထောင်စုဂျက်ဆန်ဟိုးမြို့၌ ကျင်းပမည့် စီးပွားရေးဆွေးနွေးပွဲတွင် နိုင်ငံတကာမှ လာရောက်သည့် စီးပွားရေးပညာရှင်များ၊ ငွေကြေးမူဝါဒ ရေးဆွဲသူများအား အမေရိကန်ဗဟိုဘဏ်၏ အနာဂတ်ငွေကြေးမူဝါဒများနှင့် ပတ်သက်၍ ရှင်းလင်းပြောကြားမည်ဖြစ်ရာ ၎င်း၏ပြောကြားချက်အ‌ပေါ် အကြောင်းပြု၍ အမေရိကန်ဒေါ်လာတန်ဖိုး အပြောင်းအလဲဖြစ်ပေါ်နိုင်ကြောင်းဖော်ပြပါရှိပါသည်။

ဟောင်ကောင်ဆန္ဒပြပွဲ ဂယက်ကြောင့် ဂျပန်ယန်းငွေတန်ဖိုးမှာ (၇) လအတွင်းအမြင့်ဆုံးသို့ ရောက်ရှိလာခဲ့

ဟောင်ကောင် ဆန္ဒပြပွဲ ဂယက်ကြောင့် ဂျပန်ယန်းငွေတန်ဖိုးမှာ (၇) လအတွင်း အမြင့်ဆုံးသို့ ရောက်ရှိလာခဲ့

          ဟောင်ကောင်၌ ဆန္ဒပြပွဲများ၏ အခြေအနေမှာ ပိုမိုဆိုးရွားလာပြီး စီးပွားရေးလုပ်ငန်းများသာမက နိုင်ငံတကာခရီးသည်တင် လေကြောင်းလိုင်းများ ပျံသန်းမှု၌ပါ အခက်အခဲများ ကြုံတွေ့နေရကြောင်း၊ တရုတ်အာဏာပိုင်များသည် ဟောင်ကောင်ဆန္ဒပြပွဲများကို မကြာမီကာလအတွင်း ဖြိုခွင်းတော့မည့်အနေအထားရှိပြီး ဟောင်ကောင်နယ်စပ်တွင် တရုတ်သံချပ်ကာကားများ နေရာယူထားသည့် ရုပ်သံမှတ်တမ်းများကို တရုတ်နိုင်ငံပိုင် မီဒီယာများမှတစ်ဆင့် ထုတ်လွှင့်ပြသလျက်ရှိကြောင်း၊  အမေရိကန်ပြည်ထောင်စုနှင့် ဗြိတိန်အပါအဝင် အနောက်နိုင်ငံများသည် တရုတ် အစိုးရအနေဖြင့် ဟောင်ကောင်ဆန္ဒပြပွဲများအပေါ် အင်အားသုံးနှိမ်နင်းခြင်းမပြုရန် သတိပေးလျက်ရှိကြောင်း၊ အာရှစီးပွားရေး၌ အချက်အချာကျသော ဟောင်ကောင်၌ နိုင်ငံရေးအခြေအနေဆိုးရွားလာခြင်းကို အကြောင်းပြု၍ ရင်းနှှီးမြှပ်နှံသူများသည် ယခုအခါကုန်သွယ်ရေးစစ်ပွဲပြဿနာများ၊ နိုင်ငံရေးပြဿနာများနှင့် ကင်းရှင်းနေသည့် ဂျပန်ငွေကြေးစေျးကွက်အတွင်းသို့ ရင်းနှီးမြှပ်နှံမှုများ ပြောင်းလဲပြုလုပ်လျက်ရှိသောကြောင့် ဂျပန်ယန်းငွေတန်ဖိုးမှာ (၇) လတာကာလအတွင်း အမြင့်ဆုံးသို့ ရောက်ရှိခဲ့ကြောင်း သိရှိရပါသည်။

          ထို့အပြင် တောင်အမေရိကတိုက်၏ အဓိကနိုင်ငံကြီးတစ်ခုဖြစ်သော အာဂျင်တီးနားနိုင်ငံတွင် ယခုရက်ပိုင်းအတွင်း ပြုလုပ်ခဲ့သည့် ရွေးကောက်ပွဲ ပထမအကျော့ယှဉ်ပြိုင်မှု၌ လက်ရှိ စီးပွားရေး ပြုပြင်ပြောင်းလဲမှုများကို လုပ်ဆောင်နေသူ သမ္မတမော်ရီစီယိုမက်ခရီမှာ ရှုံးနိမ့်ခဲ့သောကြောင့် လာမည့်အောက်တိုဘာလ၌ ကျင်းပမည့် ရွေးကောက်ပွဲဒုတိယအကျော့ယှဉ်ပြိုင်မှုတွင် လက်ရှိသမ္မတထပ်မံရှုံးနိမ့်ပါက ပြုလုပ်ဆဲစီးပွားရေးပြောင်းလဲမှုများ အားလုံးရပ်ဆိုင်းကာ အာဂျင်တီးနားနိုင်ငံ၏ စီးပွားရေး ထပ်မံကျဆင်းလာမည့် အနေအထားရှိကြောင်း၊ အာဂျင်တီးနား နိုင်ငံသုံးငွေပီဆိုတန်ဖိုးသည် နိုင်ငံရေးမတည်ငြိမ်မှုကို အကြောင်းပြု၍ ရွေးကောက်ပွဲပထမအကျော့ရလဒ်ထုတ်ပြန်အပြီး ဩဂုတ်လ (၁၂) ရက်နေ့၌ ၁၅% အထိ ကျဆင်းခဲ့ကြောင်း၊ ထို့ကြောင့် လက်တင်အမေရိကရှိ ရင်းနှီးမြှပ်နှံသူများသည် လတ်တလောတန်ဖိုးကျဆင်းနေသည့် အာဂျင်တီးနားနိုင်ငံသုံးငွေပီဆိုနှင့် အားပျော့နေသည့်  အမေရိကန်ဒေါ်လာတို့အစား ကမ္ဘာ့ငွေကြေးစေျးကွက်အတွင်း၌ အဓိကသုံးစွဲနေသော ငွေကြေးတစ်မျိုးဖြစ်သည့် ဂျပန်ယန်းငွေကို ပြောင်းလဲစုဆောင်းမှုများပြုလုပ်လာခြင်းသည်လည်း ယန်းငွေတန်ဖိုးကို မြင့်တက်စေသည့် အခြားအချက်တစ်ခုဖြစ်ကြောင်း သိရှိရပါသည်။

          ၂၀၁၉ခုနှစ်၊ ဩဂုတ် (၁၃) ရက် (အင်္ဂါနေ့) နံနက်ပိုင်းတွင် ကမ္ဘာ့ငွေကြေးစေျးကွက်အတွင်း၌ ဂျပန်ယန်းငွေတန်ဖိုးမှာ ၀.၃% မြင့်တက်ပြီးအမေရိကန်တစ်ဒေါ်လာလျှင် (၁၀၅.၀၅) ယန်းလဲလှယ်မှုနှုန်းသို့ ရောက်ရှိခဲ့ရာ ၂၀၁၉ခုနှစ်၊ ဇန်နဝါရီလ (၃) ရက်နေ့နောက်ပိုင်း (၇) လတာကာလအတွင်း အမြင့်ဆုံးဖြစ်ကြောင်း www.cnbc.com အင်တာနက်website တွင်ဖော်ပြပါရှိပါသည်။

ဆားဘီးယားနိုင်ငံသားအဖြစ် ခံယူသွားသည့် ထိုင်းဝန်ကြီးချုပ်ဟောင်း ယင်လတ်ခ်အား ပြန်လည်လွှဲပြောင်းပေးရေးအတွက် ဆားဘီးယားအစိုးရနှင့် ဆက်သွယ်ရန် ထိုင်းအစိုးရက စီစဉ်နေ

ဆားဘီးယားနိုင်ငံသားအဖြစ် ခံယူသွားသည့် ထိုင်းဝန်ကြီးချုပ်ဟောင်း ယင်လတ်ခ်အား ပြန်လည်လွှဲပြောင်းပေးရေးအတွက် ဆားဘီးယားအစိုးရနှင့်ဆက်သွယ်ရန် ထိုင်းအစိုးရက စီစဉ်နေ

          ထိုင်းနိုင်ငံ၌ တာဝန်ဝတ္တရားပေါ့လျော့မှုဖြင့် မျက်ကွယ်ပြစ်ဒဏ်အဖြစ် ထောင်ဒဏ် (၅) နှစ်စီရင်ခြင်းခံထားရသော ထိုင်းဝန်ကြီးချုပ်ဟောင်း ယင်လတ်ခ်အား ဆားဘီးယားအစိုးရက ၂၀၁၉ခုနှစ်၊ ဇွန်လအတွင်း၌ ဆားဘီးယားနိုင်ငံသားအဖြစ် လက်ခံအသိအမှတ်ပြုခဲ့ပြီး ဆားဘီးယားနိုင်ငံကူးလက်မှတ်ကိုပါ ကိုင်ဆောင်ခွင့်ပြုခဲ့ကြောင်း၊ ယင်လတ်ခ်သည် ဆားဘီးယားနိုင်ငံကူးလက်မှတ်ဖြင့် ဥရောပသမဂ္ဂ နိုင်ငံအများစုအပါအဝင် ကမ္ဘာ့နိုင်ငံပေါင်း (၁၀၀) ကျော်ခန့်အား ပြည်ဝင်ခွင့်ဗီဇာမလိုဘဲ လွတ်လပ်စွာ သွားရောက်နိုင်ပြီဖြစ်ကြောင်း သိရှိရပါသည်။

          ထိုင်းအာဏာပိုင်များသည် ဝန်ကြီးချုပ်ယင်လတ်ခ်အား ဖမ်းဆီးနိုင်ရေးအတွက် ဆားဘီးယား အစိုးရတာဝန်ရှိသူများနှင့် ဆက်သွယ်ရန်စီစဉ်နေကြောင်း၊ ထိုင်းနိုင်ငံရှေ့နေချုပ်ရုံး၏ နိုင်ငံတကာရေးရာဌာနညွှန်ကြားရေးမှူးချုပ် ချက်ခွန်အာကာရင်းက ၂၀၁၉ ခုနှစ်၊ဩဂုတ်လ (၉) ရက်(သောကြာနေ့) တွင် ပြောကြားရာ၌ ထိုင်းနှင့် ဆားဘီးယားနိုင်ငံတို့အကြားတွင် တရားခံလွှဲပြောင်းရေးဆိုင်ရာ သဘောတူညီချက် စာချုပ်ချုပ်ဆိုထားခြင်းမရှိကြောင်း၊ သို့သော် ထိုင်းအစိုးရအနေဖြင့် နောင်ကာလများတွင် ဆားဘီးယားအစိုးရက ဝရမ်းထုတ်ထားသော တရားခံများ ထိုင်းနိုင်ငံသို့ ရောက်ရှိလာပါက ဖမ်းဆီးလွှဲပြောင်းပေးမည်ဟူသော ကြိုတင်ကတိပေးမှုဖြင့် ယင်လတ်ခ်အား အလွှဲအပြောင်းပြုလုပ်ပေးရန်အတွက် ညှိနှိုင်းရမည်ဖြစ်ကြောင်း၊ထိုင်းရှေ့နေချုပ်ရုံးသည် ယင်လတ်ခ်အားဖမ်းဆီးနိုင်ရေးအတွက် အချို့နိုင်ငံများနှင့်ညှိနှိုင်းခဲ့သော်လည်း အဆိုပါ နိုင်ငံများက ငြင်းဆန်ခဲ့ကြကြောင်း၊ လက်ရှိအချိန်၌ ယင်လတ်ခ်ရောက်ရှိနေသည့်နေရာကို တိကျစွာသိရှိနိုင်ပါက သူမအား ဖမ်းဆီးနိုင်ရေးအစီအစဉ်များကို လုပ်ဆောင်နိုင်လိမ့်မည်ဟု ပြောကြားခဲ့ကြောင်း သိရှိရပါသည်။ ထိုင်းနိုင်ငံတွင် ယင်လတ်ခ် ထွက်ပြေးတိမ်ရှောင်းသွားသည့်ကိစ္စနှင့်ပတ်သက်၍  တပ်မတော် ခေါင်းဆောင်များအပေါ် ပြည်သူအများစုက သံသယဝင်လျက်ရှိကြောင်း၊ ယင်လတ်ခ်သည် ၂၀၁၇ခုနှစ်အတွင်း တရားရုံးက စီရင်ချက်မချမီရက်ပိုင်းအလိုထိ အနာဂတ်အတွက် ပြင်ဆင်ထားပြီးဖြစ်ကြောင်းနှင့် ပြစ်ဒဏ်ချမှတ်ခြင်းကို ခံယူမည်ဟု ကြေညာထားခဲ့သူဖြစ်ကြောင်း၊ သို့သော်ယင်လတ်ခ်အနေဖြင့် ထိုင်းနိုင်ငံအတွင်းဆက်လက်နေထိုင်၍ ထောင်ဒဏ်ကျခံမည်ဆိုပါက ထိုင်းပြည်သူအများစုကြားတွင် နိုင်ငံရေးသူရဲကောင်းအဖြစ် ရောက်ရှိသွားမည်ဖြစ်ပြီး ယင်လတ်ခ်အား ထောင်ဒဏ်ချမှတ်ခြင်းကိုအကြောင်းပြု၍ ထိုင်းနိုင်ငံ၌ ဆူပူအုံကြွမှုများ ဖြစ်ပေါ်လာမည့် အနေအထားရှိသောကြောင့် တပ်မတော်ခေါင်းဆောင်များအနေဖြင့် ယင်လတ်ခ်အား ထိုင်းနိုင်ငံအတွင်း၌မရှိစေရန်အတွက်ယင်လတ်ခ်ထွက်ပြေးတိမ်းရှောင်မည့်ကိစ္စကို မတားဆီးခဲ့ခြင်းဖြစ်သည်ဟု ပြည်သူများက ယူဆထားကြကြောင်း www.bangkokpost.com အင်တာနက် website တွင် ဖော်ပြပါရှိပါသည်။

ကက်ရှ်မီးယားဒေသအား အိန္ဒိယအစိုးရက ကိုယ်ပိုင်အုပ်ချုပ်ခွင့်ရဒေသအဖြစ်မှ ပြန်လည် ရုတ်သိမ်းသည့်အပေါ် အစ္စလာမ္မစ်နိုင်ငံများ ပူးပေါင်းဆောင်ရွက်ရေးအဖွဲ့(OIC) က စိုးရိမ်ပူပန်လျက်ရှိ

ကက်ရှ်မီးယားဒေသအားအိန္ဒိယအစိုးရက ကိုယ်ပိုင်အုပ်ချုပ်ခွင့်ရဒေသအဖြစ်မှ ပြန်လည် ရုတ်သိမ်းသည့်အပေါ် အစ္စလာမ္မစ်နိုင်ငံများ ပူးပေါင်းဆောင်ရွက်ရေးအဖွဲ့ (OIC) က စိုးရိမ်ပူပန်လျက်ရှိ

          အိန္ဒိယအစိုးရသည် မွတ်ဆလင်အများစုနေထိုင်သည့် ကက်ရှ်မီးယား‌ဒေသအား နှစ်ပေါင်း (၇၀) ခန့် ကိုယ်ပိုင်အုပ်ချုပ်ခွင့်ရဒေသအဖြစ် သတ်မှတ်ပေးထားခြင်းကို ပြန်လည်ရုတ်သိမ်းခဲ့ပြီးဗဟိုအစိုးရ၏ ထိန်းချုပ်မှုအောက်ရှိ ပြည်ထောင်စုနယ်မြေအဖြစ် သတ်မှတ်ခဲ့ရာ ယင်းကိစ္စနှင့်ပတ်သက်၍ အလွန်အမင်းစိုးရိမ်ပူပန်မိသည်ဟု အစ္စလာမ္မစ်နိုင်ငံများ ပူးပေါင်းဆောင်ရွက်ရေးအဖွဲ့ (OIC) က ထုတ်ပြန်ကြေညာခဲ့ကြောင်း သိရှိရပါသည်။

          OIC သည် ကက်ရှ်မီးယားကိစ္စနှင့်ပတ်သက်၍ ဆော်ဒီအာရေဗျနိုင်ငံ၊ ဂျီဒက်မြို့ရှိ OIC အဖွဲ့ချုပ်၌ အရေးပေါ်အစည်းအဝေးကို ယခုရက်ပိုင်းအတွင်း ကျင်းပခဲ့ပြီး ကက်ရှ်မီးယားပြည်သူများ၏ ဥပဒေကြောင်းအရ ရသင့်ရထိုက်သော ကိုယ်ပိုင်အုပ်ချုပ်ရေးဒေသ တည်ထောင်ရေးအတွက် ကြိုးပမ်းနေမှုများကို OIC အဖွဲ့ကအပြည့်အဝထောက်ခံသွားမည်ဟု ကြေညာခဲ့ကြောင်းသိရှိရပါသည်။

          OIC သည် ဂျမူးနှင့် ကက်ရှ်မီးယားအရေး ထိတွေ့ဆောင်ရွက်မှုဆိုင်ရာအဖွဲ့ကို ၁၉၉၄ ခုနှစ် တွင် ဖွဲ့စည်းခဲ့ပြီး အဆိုပါ အဖွဲ့တွင် ပါကစ္စတန်၊ ဆော်ဒီအာရေဗျ၊ တူရကီ၊ အဇာဘိုင်ဂျန် နှင့် နိုင်ဂျာနိုင်ငံများပါဝင်ကြောင်း၊ ယင်းအဖွဲ့သည် ပဋိပက္ခမကြာခဏဖြစ်ပွားနေသော ဂျမူးနှင့် ကက်ရှ်မီးယားဒေသအရေးကိစ္စအတွက် အဓိကရည်ရွယ်ဖွဲ့စည်းထားသည့် အဖွဲ့ဖြစ်ကြောင်း၊ ယင်းအဖွဲ့တွင် ပါဝင်သည့် ပါကစ္စတန်နိုင်ငံက အိန္ဒိယနိုင်ငံ၏ လုပ်ရပ်မှာတရားမဝင်ကြောင်းနှင့် ယင်းပြဿနာကို နိုင်ငံတကာမှ ဝင်ရောက်ဖြေရှင်းပေးနိုင်ရန်အတွက် ကြိုးပမ်းဆောင်ရွက်သွားမည်ဟုယခုရက်ပိုင်းအတွင်း ကြေညာခဲ့ကြောင်း သိရှိရပါသည်။

          ဂျမူးနှင့် ကက်ရှ်မီးယားဒေသသည် ၁၉၄၇ ခုနှစ်၊ အိန္ဒိယနှင့် ပါကစ္စတန်နိုင်ငံတို့ တပြိုင်နက် လွတ်လပ်ရေးရရှိခဲ့သည့် အချိန်မှစ၍ ရန်ဘက်နှစ်နိုင်ငံအကြား ကြားခံနယ်မြေတစ်ခုအဖြစ် ရပ်တည်ခဲ့ကြောင်း၊ အိန္ဒိယနှင့် ပါကစ္စတန်သည် စစ်ပွဲသုံးကြိမ် (၁၉၄၈ ခုနှစ်၊ ၁၉၆၅ ခုနှစ်၊ ၁၉၇၁ ခုနှစ်) ဖြစ်ပွားခဲ့ရာ နှစ်ကြိမ်မှာ ကက်ရှ်မီးယားဒေသနှင့်ပတ်သက်၍  ဖြစ်ပွားခဲ့ခြင်းဖြစ်ကြောင်း၊ ၁၉၈၉ ခုနှစ်တွင် ကက်ရှ်မီးယားဒေသတွင်းနေထိုင်သည့် လူအများစု မွတ်ဆလင်များက အိန္ဒိယအစိုးရကို ဆန့်ကျင်တော်လှန်သည့် လှုပ်ရှားမှုများ ဖြစ်ပေါ်ခဲ့သည့်အတွက် ကက်ရှ်မီးယားတွင် နေထိုင်သော လူနည်းစုဟိန္ဒူဘာသာဝင် (၄) သိန်းခန့်မှာ ကက်ရှ်မီးယားကိုစွန့်ခွာ၍ အိန္ဒိယနိုင်ငံတစ်ဝန်းရှိ ဒုက္ခသည်စခန်းများ၌ နေထိုင်ခဲ့ရကြောင်း၊ လက်ရှိအချိန်တွင် အိန္ဒိယဝန်ကြီးချုပ် မိုဒီသည် နေရပ်ပြန် ဟိန္ဒူဘာသာဝင်များကို လုံခြုံရေးကို အပြည့်အဝကာကွယ်ပေးပြီး နေအိမ်ဝယ်ယူခွင့်၊ အလုပ်အကိုင်နှင့် ပညာသင်ကြားရေးတို့အတွက် တားဆီးဖြစ်နေသည့်အရာများအားလုံးကို ဖယ်ရှားပေးမည်ဟု ကတိပြုခဲ့သောကြောင့် ကက်ရှ်မီးယားဒေသမှ စွန့်ခွာခဲ့သည့် ဟိန္ဒူဘာသာဝင်များမှာ နေရပ်သို့ပြန်ရန် စီစဉ်လျက်ရှိကြောင်း www.dhakatribune.com အင်တာနက် website တွင် ဖော်ပြပါရှိပါသည်။

ကုန်သွယ်ရေးပြဿနာကြောင့် တရုတ်နိုင်ငံ၏ နိုင်ငံခြားအရန်ငွေကြေးပမာဏမှာ ကျဆင်းသွားခဲ့

ကုန်သွယ်ရေးပြဿနာကြောင့် တရုတ်နိုင်ငံ၏ နိုင်ငံခြားအရန်ငွေကြေးပမာဏမှာ ကျဆင်းသွားခဲ့

          အမေရိကန်ပြည်ထောင်စုနှင့် ဖြစ်ပွားနေသည့် ကုန်သွယ်ရေးပြဿနာကြောင့် တရုတ်နိုင်ငံ၏ နိုင်ငံခြားအရန်ငွေကြေးပမာဏမှာ ကျဆင်းသွားခဲ့ကြောင်း၊ တရုတ်ဗဟိုဘဏ်က ယခုရက်ပိုင်းအတွင်း ထုတ်ပြန်သည့် စာရင်းအချက်အလက်များအရ ဇူလိုင်လအတွင်း တရုတ်ဗဟိုဘဏ်၏ နိုင်ငံခြားအရန်ငွေကြေးစုဆောင်းမှုပမာဏမှာ အမေရိကန်ဒေါ်လာ (၁၅.၅၄) ဘီလီယံခန့် လျော့နည်းသွားပြီး စုစုပေါင်းနိုင်ငံခြားအရန်ငွေကြေးပမာဏ အမေရိကန်ဒေါ်လာ (၃.၁၀၄) ထရီလီယံသာ ကျန်ရှိတော့သည်ဟု ဖော်ပြထားကြောင်း သိရှိရပါသည်။

          သို့သော် တရုတ်ဗဟိုဘဏ်၏ စုဆောင်းထားသော အရန်ရွှေပမာဏမှာမူ မြင့်တက်လာခဲ့ကြောင်း၊ ဗဟိုဘဏ်သည် ဇူလိုင်လအတွင်း၌ ရွှေတန်ချိန် (၉.၀၇) တန်ခန့် ဝယ်ယူစုဆောင်းခဲ့သည့်အတွက် ဗဟိုဘဏ်၏ အရန်ရွှေစုစုပေါင်းပမာဏမှာ တန်ချိန် (၁၇၆၅.၀၄) တန်ခန့်သို့ရောက်ရှိခဲ့ကြောင်း၊ တန်ဖိုးပမာဏာအရ အမေရိကန်ဒေါ်လာ (၈၈.၈၇၆) ဘီလီယံသို့မြင့်တက်လာခဲ့ကြောင်း သိရှိရပါသည်။

          တရုတ်ဗဟိုဘဏ်များအနေဖြင့် ၂၀၁၅ခုနှစ်မှ လက်ရှိအချိန်ထိကာလအတွင်း စီးပွားကျဆင်းခဲ့မှုနှင့်  ကုန်သွယ်ရေးပြဿနာများကို ဖြေရှင်းရန်အတွက် (၄) နှစ်တာကာလအတွင်း  နိုင်ငံခြားအရန်ငွေကြေး အမေရိကန်ဒေါ်လာ (၁) ထရီလီယံခန့်ကို အသားတင်ထုတ်နုတ်သုံးစွဲကာ ယွမ်ငွေတန်ဖိုးကို လိုအပ်သလို အတင်အချပြုလုပ်ခဲ့ပြီး ယခုအခါယွမ်ငွေတန်ဖိုးကို အမေရိကန်တစ်ဒေါ်လာလျှင်(၇) ယွမ်အထက် လဲလှယ်မှုနှုန်းသာရှိစေရန် တန်ဖိုးလျှော့ချထားသည်ဟု ငွေကြေးစေျးကွက်လေ့လာသူများ၏ သုံးသပ်ချက်အရ သိရှိရကြောင်း www.reuters.com အင်တာနက် website တွင် ဖော်ပြပါရှိပါသည်။