ဟွာဝေးကုမ္ပဏီအပါအဝင် တရုတ်ကုမ္ပဏီ(၃)ခုသည် ကမ္ဘာပေါ်တွင် စမတ်ဖုန်း ဒုတိယအများဆုံး ရောင်းချရသည့် ထိပ်တန်းကုမ္ပဏီများတွင် ပါဝင်လျက်ရှိမှု

တရုတ်နိုင်ငံအခြေစိုက် ဟွာဝေးကုမ္ပဏီသည် ၂၀၁၉ ခုနှစ်၊ ပထမ(၃)လတာကာလအတွင်း၌ ကမ္ဘာပေါ်တွင် စမတ်ဖုန်း ဒုတိယအများဆုံးရောင်းချရသည့် ထိပ်တန်းကုမ္ပဏီအဖြစ်ရပ်တည်နေသည်ဟု အမေရိကန်ပြည်ထောင်စုအခြေစိုက် ကမ္ဘာ့အကြီးဆုံးစီးပွားရအကြံပေး နှင့် သုတေသနလုပ်ငန်း ဖြစ်သည့် Gartner ကုမ္ပဏီက ၂၁၀၉ ခုနှစ်၊မေလ(၂၈)ရက်(အင်္ဂါနေ့)တွင် ကြေညာခဲ့ကြောင်း၊ ၂၀၁၉ ခုနှစ်၊ ပထမ (၃)လတာကာလအတွင်း ကမ္ဘာပေါ်၌စမတ်ဖုန်းရောင်းချရမှုအများဆုံးကုမ္ပဏီများမှာ Samsung ၊ Huawei ၊ Apple ၊ OPPO နှင့် Vivo တို့ဖြစ်ကြောင်း၊ ထို့ကြောင့် စမတ်ဖုန်းရောင်းချရမှုအများဆုံး ထိပ်တန်းကုမ္ပဏီ(၅)ခုတွင် တရုတ်ကုမ္ပဏီ(၃)ခုပါဝင်လျက်ရှိကြောင်း၊ ကမ္ဘာတစ်ဝန်းစမတ်ဖုန်းဈေးကွက်ကိုပိုင်ဆိုင်ထားသည့် ကုမ္ပဏီ အသီးသီး၏ ဈေးကွက်ဝေစုရာခိုင်နှုန်းမှာ Samsung  ၁၉.၂% ၊ Huawei  ၁၅.၇% ၊  Apple  ၁၁.၉% ၊  OPPO ၇.၉% ၊ Vivo ၇.၃% နှင့် အခြား ကုမ္ပဏီများမှာ ၃၇.၉% တို့ဖြစ်ကြောင်းသိရှိရပါသည်။

Gartner ကုမ္ပဏီ၏စာရင်းအချက်အလက်များအရ ဟွာဝေးသည် ၂၀၁၉ ခုနှစ်၊ ပထမ(၃)လတာကာလအတွင်း၌ ကမ္ဘာတစ်ဝန်းစမတ်ဖုန်း အလုံးရေ(၅၈.၄)သန်းခန့်ရောင်းချခဲ့ရပြီး ဟွာဝေးရောင်းချရမှု အများဆုံး ဈေးကွက်နှစ်ခုမှာ ဥရောပတိုက်နှင့်တရုတ်ပြည်မကြီးပင်ဖြစ် ကြောင်း၊ အထူးသဖြင့် ဥရောပတိုက်၌ ဟွာဝေးဖုန်းသုံးစွဲသူဦးရေပမာဏသည် ၂၀၁၉ ခုနှစ်၊ ပထမ(၃)လတာကာလအတွင်း၌ ၆၉% ခန့် တိုးတက်များပြားလာခဲ့သည်ဟုသိရှိရပါသည်။

လက်ရှိအချိန်၌ အမေရိကန်ပြည်ထောင်စု၏ အရေးယူပိတ်ဆို့မှုများသည် ဟွာဝေးကုမ္ပဏီကို အထိနာစေ နိုင်ကြောင်း၊ ဟွာဝေးသုံးစွဲသူအရေအတွက်၏ထက်ဝက်ခန့်မှာတရုတ်ပြည်မကြီးအပြင်ဘက်ရှိကမ္ဘာ့နိုင်ငံအသီးသီးမှသုံးစွဲသူများဖြစ်ရာ Google နှင့်ပတ်သက်သည့် ဝန်ဆောင်မှုလုပ်ငန်းများမှာ ဟွာဝေးစမတ်ဖုန်းများ၌အပြီးတိုင်အသုံးပြု၍မရနိုင်တော့ပါက ဟွာဝေးဖုန်းဝယ်ယူအသုံးပြုမှုများ သိသိသာသာလျော့နည်း သွားနိုင်သည်ဟု Gartner ကုမ္ပဏီ၏အစီရင်ခံစာ၌ဖော်ပြထားကြောင်း  www.channelnewsasia.com အင်တာနက် website တွင် ဖော်ပြပါရှိပါသည်။

အမေရိကန်အစိုးရသည် ကုန်သွယ်ရေးအသာစီးရရန်အတွက် နိုင်ငံသုံးငွေကြေးတန်ဖိုးကို ထိန်းချုပ် နေသောနိုင်ငံများတွင် တရုတ်နိုင်ငံအပြင် စင်ကာပူ၊ မလေးရှား၊ ဗီယက်နမ်နိုင်ငံတို့ကိုပါထည့်သွင်း ခဲ့ပြီး ကုန်သွယ်ရေးဆိုင်ရာ အရေးယူဖွယ်ရှိမှု

အမေရိကန်ပြည်ထောင်စု၊ ဘဏ္ဍာရေးဝန်ကြီးဌာနက  ၂၀၁၉ ခုနှစ်၊ မေလ(၂၈)ရက် (အင်္ဂါနေ့)တွင် ကွန်ဂရက် လွှတ်တော်သို့ပေးပို့ခဲ့သည့် ကုန်သွယ်ရေးအကျိုးအမြတ်အတွက် နိုင်ငံသုံးငွေကြေးတန်ဖိုးအား စိတ်တိုင်းကျထိန်းချုပ်နေသော ကမ္ဘာ့နိုင်ငံများအစီရင်ခံစာတွင် အရှေ့တောင်အာရှနိုင်ငံ(၃)ခုဖြစ်သည့် စင်ကာပူ၊ မလေးရှားနှင့် ဗီယက်နမ်နိုင်ငံတို့ပါဝင်လာသည်ကိုတွေ့ရှိရကြောင်း၊ ဘဏ္ဍာရေးဝန်ကြီး ဌာနသည် အဆိုပါ အစီရင်ခံစာအား တစ်နှစ်လျှင်(၂)ကြိမ်ပြုစုထုတ်ဝေပြီး အဓိကအားဖြင့် အမေရိကန်ပြည်ထောင်စု နှင့်ကုန်သွယ်ရာ၌ ကုန်သွယ်ရေးပိုငွေပြနေသည့် နိုင်ငံများ၏စီးပွားရေးနှင့်ငွေကြေးဈေးကွက် အခြေအနေကို အသေးစိတ်လေ့လာအကဲခတ်ကာ ပြုစု    ထားခြင်းဖြစ်ကြောင်း သိရှိရပါသည်။

ကွန်ဂရက်လွှတ်တော်သို့ တင်သွင်းခဲ့သည့် ဘဏ္ဍာရေးဝန်ကြီးဌာန၏အစီရင်ခံစာတွင် နိုင်ငံတကာကုန်သွယ်မှုကိစ္စများ၌ အကျိုးအမြတ်ဖြစ်ထွန်းစေရန်အတွက် သက်ဆိုင်ရာ နိုင်ငံသုံးငွေကြေးတန်ဖိုးများကို ဖြစ်သင့်ဖြစ်ထိုက်သည့်အနေအထား၌မထားရှိဘဲ လိုသလိုထိန်းချုပ်အတင်အချပြုလုပ်နေသောနိုင်ငံ(၉)နိုင်ငံ စာရင်းကိုဖော်ပြထားရာ အဆိုပါ(၉) နိုင်ငံမှာ တရုတ်၊ ဂျာမနီ၊ အိုင်ယာလန်၊ အီတလီ၊ ဂျပန်၊ တောင်ကိုရီးယား၊ မလေးရှား၊ စင်ကာပူနှင့် ဗီယက်နမ်နိုင်ငံတို့ဖြစ်ပြီး အဆိုပါ(၉)နိုင်ငံအား ဂရုပြု စောင့်ကြည့်မှုများပြုလုပ်သွားရမည်ဟု ဖော်ပြထားကြောင်း  သိရှိရပါသည်။

အမေရိကန်ပြည်ထောင်စုသည် ငေွကြေးတန်ဖိုးကိုလိုသလိုထိန်းချုပ်ကစားနေသော နိုင်ငံများအားကုန်သွယ်ရေးအရ အရေးယူပိတ်ဆို့မှုများပြုလုပ်ဖွယ်ရှိကြောင်း၊ အမေရိကန်အစိုးရ၏ကြေညာချက်၌ အဆိုပါနိုင်ငံများသည် အမေရိကန်ပြည်ထောင်စုနှင့်ကုန်သွယ်ရာ၌ ကုန်သွယ်ရေးအသာစီးရရှိစေရန်အတွက် ငွေကြေးတန်ဖိုးကိုတမင်နှိမ့်ချထားသည်ဟုစွပ်စွဲထားကြောင်း၊ မလေးရှားနိုင်ငံနှင့် စင်ကာပူ နိုင်ငံတို့ကမူ အမေရိကန်ပြည်ထောင်စု၏ စွပ်စွဲချက်ကိုပယ်ချခဲ့ပြီး ၎င်းတို့အနေ ဖြင့်ကုန်သွယ်ရေး ကိစ္စ၌ လွတ်လပ်၍မျှတသောကုန်သွယ်မှုဖြစ်ပေါ်စေရေးကိုသာလုပ်ဆောင်လျက်ရှိပြီး တရားမျှတမှု မရှိသည့် ငွေကြေးမူဝါဒများကို ကျင့်သုံးခြင်းမရှိဟုတုံ့ပြန်       ပြောကြားခဲ့ကြောင်း သိရှိရပါသည်။

၂၀၁၈ ခုနှစ်တွင် စင်ကာပူနိုင်ငံသည် အမေရိကန်ပြည်ထောင်စုနှင့်ကုန်သွယ်ရာ၌ အမေရိကန်ဒေါ်လာ (၁၇)ဘီလီယံပိုငွေပြခဲ့ပြီး မလေးရှားနိုင်ငံမှာမူအမေရိကန်ပြည်ထောင်စုနှင့်ကုန်သွယ်ရာ၌ အမေရိကန် ဒေါ်လာ(၂၇)ဘီလီယံပိုငွေပြခဲ့ကြောင်း၊ ဗီယက်နမ်နိုင်ငံသည်လည်း    အမေရိကန်ပြည်ထောင်စုနှင့် ကုန်သွယ်ရာတွင်အမေရိကန်ဒေါ်လာ(၃၅)ဘီလီယံခန့်အထိပိုငွေပြခဲ့ကြောင်း www.cnbc.comအင်တာနက်  website တွင် ဖော်ပြပါရှိပါသည်။

နာဂအမျိုးသားဆိုရှယ်လစ်ကောင်စီ(NSCN-K)သည် အိန္ဒိယ–မြန်မာနယ်စပ်အနီး၌ အာသံရိုင်ဖယ် တပ်ဖွဲ့ဝင်များတိုက်ခိုက်ခံရခြင်းမှာ ၎င်းတို့၏လက်ချက်ဖြစ်သည်ဟု ကြေညာခဲ့မှု

အိန္ဒိယနိုင်ငံ၊ နာဂလန်းပြည်နယ်ခွဲထွက်ရေးလက်နက်ကိုင်အဖွဲ့ဖြစ်သည့်နာဂအမျိုးသားဆိုရှယ်လစ်ကောင်စီ(NSCN-K)သည်၂၀၁၉ ခုနှစ်၊ မေလ(၂၅)ရက်နေ့တွင် အိန္ဒိယ-မြန်မာနယ်စပ် နယ်ခြား မှတ်တိုင်အမှတ်(၁၄၇)နှင့်(၁၄၈)အကြား၌အာသံရိုင်ဖယ်တပ်ဖွဲ့ဝင်များ ချုံခိုတိုက်ခိုက်ခံရသည့် ဖြစ်စဉ်နှင့်ပတ်သက်၍၎င်းတို့၏လက်ချက်ဖြစ်ကြောင်း၊ ၂၀၁၉ ခုနှစ်၊ မေလ(၂၇)ရက်တွင် ကြေညာချက် ထုတ်ပြန်ခဲ့ကြောင်း သိရှိရပါသည်။

NSCN-K ၏ ကြေညာချက်၌ မိမိတို့နှင့်အိန္ဒိယအစိုးရတို့အကြား ၂၀၀၁ ခုနှစ်၌ အပစ်အခတ် ရပ်စဲရေးသဘောတူညီချက်ရယူခဲ့သော် လည်း အိန္ဒိယအစိုးရက အဆိုပါသဘောတူညီချက်ကို ၂၀၁၅ ခုနှစ်၊ မတ်လတွင်ချိုးဖောက်ခဲ့သောကြောင့် နာဂလန်းပြည်နယ်အတွင်း၌ တိုက်ခိုက်မှုများ ပြန်လည်ဖြစ်ပေါ်ခဲ့ကြောင်း၊ ထို့ပြင်အိန္ဒိယအစိုးရသည် မြန်မာနိုင်ငံအတွင်းရှိ နာဂတိုင်းရင်းသား လက်နက်ကိုင် အဖွဲ့များ ၏ အခြေစိုက်စခန်းများကို တိုက်ခိုက်ရန်အတွက် မြန်မာ့တပ်မတော်အား တောင်းဆိုမှုများပြုလုပ်ခဲ့ကြောင်း၊ မြန်မာ့တပ်မတော်နှင့် နာဂတိုင်းရင်းသားလက်နက်ကိုင် အဖွဲ့တို့ အကြား ၂၀၁၂ ခုနှစ်မှစ၍  အပစ်အခတ်ရပ်စဲရေး သဘောတူညီချက်ရယူခဲ့သော်လည်း ယခုအခါ    မြန်မာ့တပ်မတော်သည် အိန္ဒိယအစိုးရ၏တောင်းဆိုမှုများကြောင့် နာဂတိုင်းရင်းသား လက်နက်ကိုင်အဖွဲ့များအပေါ်၌ စစ်ဆင်ရေးများပြုလုပ်လျက်ရှိကြောင်း၊ ထို့ကြောင့် NSCN-K သည် အိန္ဒိယအစိုးရ၏ ရိုးသားမှုမရှိသည့်လုပ်ရပ်အပေါ် လက်တုံ့ပြန်သည့်အနေဖြင့် အာသံရိုင်ဖယ်တပ်ဖွဲ့ဝင် များအားတိုက်ခိုက်ခဲ့ခြင်းဖြစ်သည်ဟုဖော်ပြထားကြောင်း၊၂၀၁၉ခုနှစ်၊မေလ(၂၅)ရက် (စနေနေ့)၌ အိန္ဒိယ-မြန်မာနယ်စပ်ရှိနယ်ခြားမှတ်တိုင်အမှတ်(၁၄၇)နှင့် (၁၄၈)အကြား ဖြစ်ပွားခဲ့သော NSCN-K အဖွဲ့၏ တိုက်ခိုက်မှုဖြစ်စဉ်တွင်အာသံရိုင်ဖယ်တပ်ဖွဲ့မှ အရာရှိငယ်တစ်ဦးအပါဝင်(၂)ဦး သေဆုံးခဲ့ပြီး (၃)ဦးဒဏ်ရာပြင်းထန်စွာရရှိခဲ့ကြောင်းကို www.e-pao.net အင်တာနက် websiteဖော်ပြပါရှိပါသည်။

တရုတ်နိုင်ငံမှစတင်ခဲ့သည့် ဝက်တုပ်ကွေးရောဂါသည် အိမ်နီးချင်းနိုင်ငံများသို့ ကူးစက်ပျံ့နှံ့နေသော ကြောင့် ထိုင်းနှင့်ဗီယက်နမ်နိုင်ငံများတွင် အကျပ်အတည်းများကြုံတွေ့နေရမှု

တရုတ်နိုင်ငံမှ ၂၀၁၈ ခုနှစ်၊ ဩဂုတ်လတွင်စတင်ခဲ့သည့် ဝက်တုပ်ကွေးရောဂါ သည် ယခုအခါ အိမ်နီးချင်းနိုင်ငံများသို့ ကူးစက်ပျံ့နှံ့နေသောကြောင့် ထိုင်းနှင့်ဗီယက်နမ် နိုင်ငံများတွင် အကျပ်အတည်း များ ကြုံတွေ့နေရကြောင်း၊ လက်ရှိအချိန်၌ ဝက်တုပ်ကွေးရောဂါကူးစက်နေသည့် နိုင်ငံများတွင် တရုတ်၊ မွန်ဂိုလီးယား၊ ကမ္ဘောဒီးယား နှင့် ဗီယက်နမ် နိုင်ငံတို့ပါဝင်ကြောင်း သိရှိရပါသည်။

ထိုင်းနိုင်ငံ စိုက်ပျိုးရေးဝန်ကြီးဌာန သည် ဝက်တုပ်ကွေးရောဂါကို အထူးသတိထားကြရန် ထိုင်းနိုင်ငံတစ်ဝန်းတွင် သတိပေးချက်ထုတ်ပြန် ခဲ့ပြီး ကြိုတင်ကာကွယ်မှုများပြုလုပ်လျက်ရှိကြောင်း၊ ထိုင်းနိုင်ငံသည် လေဆိပ်၊ နယ်စပ်စစ်ဆေးရေး ဂိတ်များမှတဆင့် ဈေးများ၊ သားသတ်ရုံများသို့ တရားမဝင် တင်သွင်းလာသော ဝက်နှင့်ဝက်သားများ ကို တင်းကျပ်စွာစစ်ဆေးနေပြီး  နိုင်ငံအတွင်းရှိ ဝက်ခြံများ၌ ရုတ်တရက် သေဆုံးသောဝက်များရှိပါက သက်ဆိုင်ရာသို့ အမြန်ဆုံးတင်ပြရန် ညွှန်ကြားထားကြောင်း သိရှိရပါသည်။

ဟောင်ကောင်တက္ကသိုလ်၏  ကူးစက်ရောဂါပညာဌာန ပါမောက္ခဖြစ်သူ ဒစ်ပိုင်ဖာ က ပြောကြားရာ၌   ဝက်တုပ်ကွေးရောဂါ နှင့်ပက်သက် ၍  မည့်သည်နိုင်ငံမျှစိတ်ချရသော အခြေအနေတွင်မရှိကြောင်း၊ ဝက်တုပ်ကွေးရောဂါသည် ထိုင်းနိုင်ငံသာမက အခြားမည်သည့် နေရာဒေသသို့မဆို အလွယ်တကူကူးစက် နိုင်သည်ဟုပြောကြားခဲ့ကြောင်း သိရှိရပါသည်။

ထိုင်းနိုင်ငံသည် တစ်နှစ်လျှင်ဝက်ကောင်ရေ(၂)သန်းခန့်မွေးမြူပြီး ပြည်ပသို့တင်ပို့လျက်ရှိရာ ၄၀%  မှာ  ကမ္ဘောဒီးယား၊ လာအိုနှင့်မြန်မာနိုင်ငံတို့သို့ တင်ပို့နေခြင်းဖြစ်ကြောင်း၊ ထိုင်းနိုင်ငံအတွင်းသို့ ဝက်နှင့်ဝက်သားတို့တင်သွင်းခွင့်မရှိကြောင်း၊ ထိုင်းနိုင်ငံမွေးမြူးရေးဝန်ကြီးဌာန အနေဖြင့် လေဆိပ်နှင့် နယ်စပ်ဒေသမှတင်သွင်းလာသော ဝက်သားနှင့်ဆက်စပ်စားသောက်ကုန်ပစ္စည်း များကို ၂၀၁၈ ခုနှစ်၊  ဩဂုတ်လမှစတင်၍ စစ်ဆေးလျက်ရှိကြောင်း၊  ထိုင်းနိုင်ငံတွင် ယခုအချိန်ထိ ဝက်တုပ်ကွေးရောဂါ ကူးစက်ခံရခြင်းမရှိသေးကြောင်း သိရှိရပါသည်။

ထိုင်းအစိုးရသည် ဝက်တုပ်ကွေးရောဂါဖြစ်ပွားပါကထိုင်းနိုင်ငံ၏စီးပွားရေး၌အမေရိကန်ဒေါ်လာ (၁)ဘီလီယံမှ(၂)ဘီလီယံခန့်အထိဆုံးရှုံးမှုဖြစ်ပေါ်နိုင်သည်ဟု တွက်ချက်ထားပြီး ဝက်တုပ်ကွေး ရောဂါကိုကာကွယ်ရန်အတွက် အမေရိကန်ဒေါ်လာ(၄.၇)သန်းခန့် အသုံးစရိတ်ပြဌာန်းထားကြောင်း သိရှိရပါသည်။

ဗီယက်နမ်နိုင်ငံတွင်ဝက်တုပ်ကွေးရောဂါ ကူးစက်ပျံ့နှံ့မှုကြောင့် ဝက်ကောင်ရေ(၁.၇)သန်း ခန့်ကို သုတ်သင်ခဲ့ရကြောင်း၊ လက်ရှိအချိန်၌ ဗီယက်နမ်နိုင်ငံရှိ ပြည်နယ်နှင့်မြို့ကြီး စုစုပေါင်း(၄၂)ခု တို့၌ ဝက်တုပ်ကွေးရောဂါကူးစက်ပျံ့နှံ့လျက်ရှိကြောင်း၊ မိုးရာသီသို့ကျရောက်ပါက မဲခေါင်မြစ်ဝှမ်း ဒေသတွင် ဝက်တုပ်ကွေးရောဂါပျံ့နှံ့မှုမှာ ပိုမိုများပြားလာနိုင်သည်ဟု ဗီယက်နမ်အာဏာပိုင်များက ခန့်မှန်းထားကြောင်း၊ ဗီယက်နမ်အစိုးရသည်တောင်သူများနှင့်ဝက်မွေးမြူရေးသမားများအား ရောဂါကြောင့်ဝက်များသေဆုံးပါကပြင်ပသို့ရောင်းချခြင်းမပြုဘဲ အစိုးရထံအပ်နှံကြရန် နှင့် အစိုးရအနေဖြင့် လာရောက်အပ်နှံ သည့်ဝက်များအား အလေးချိန်အလိုက် ပြင်ပဈေးကွက် ပေါက်ဈေးအတိုင်းလျော်ကြေးပေးသွားမည်ဟုကြေညာထားကြောင်း www.bangkokpost.com  အင်တာနက် website တွင်ဖော်ပြပါရှိပါသည်။

အမေရိကန်–တရုတ်ကုန်သွယ်ရေးတင်းမာမှုဂယက်ကြောင့် တရုတ်နွယ်ဖွားများ၏ Bitcoin ဝယ်ယူစု ဆောင်းမှုများပြားလာသဖြင့် Bitcoin တန်ဖိုးမှာ ယခုမေလအတွင်း ၆၆%  မြင့်တက်ပြီး တစ်နှစ်အတွင်း အမြင့်ဆုံးသို့ရောက်ရှိခဲ့မှု

အမေရိကန်-တရုတ်ကုန်သွယ်ရေးတင်းမာမှုဂယက်ကြောင့် ယွမ်ငွေတန်ဖိုးမှာဆက်တိုက် ကျဆင်း လျက်ရှိပြီး အမေရိကန်တစ်ဒေါ်လာလျှင် (၆.၈၉)ယွမ်လဲလှယ်မှုနှုန်းအထိ ရောက်ရှိခဲ့ရာ တရုတ် ပြည်တွင်းနှင့် ပြည်ပတို့၌ တရုတ်နွယ်ဖွားများသည်ယွမ်ငွေအစား ဒီဂျစ်တယ်ငွေကြေး ဈေးကွက် အတွင်းသို့ ပြောင်းလဲရင်းနှီးမြှုပ်နှံသူများ များပြားလာခဲ့ကြောင်း၊ တရုတ်ပြည်သူ အများစုသည် ကုန်သွယ်ရေးစစ်ပွဲဖြစ်ပွားလာပါက ကမ္ဘာ့စီးပွားရေးတစ်ခုလုံးထိခိုက်လာနိုင်သည့်အတွက် တရုတ် ယွမ်ငွေတန်ဖိုးသာမက အမေရိကန်ဒေါ်လာနှင့်အခြားနိုင်ငံတကာသုံးငွေကြေးများတန်ဖိုးပါ ကျဆင်း လိမ့်မည်ဟု ယူဆထားကြသောကြောင့် လွန်ခဲ့သည့် ရက်သတ္တပတ်များမှ စတင်၍ Bitcoin အပါအဝင် ဒီဂျစ်တယ်ငွေကြေးများကို အများအပြားဝယ်ယူလျက်ရှိကြကြောင်း သိရှိရပါသည်။

၂၀၁၉ ခုနှစ်၊ မေလ(၂၇)ရက်(တနင်္လာနေ့)တွင် ဒီဂျစ်တယ်ငွေကြေးဈေးကွက်အတွင်း၌ Bitcoinတန်ဖိုးမှာ ၈% မြင့်တက်ပြီးတစ်ယူနစ်လျှင် အမေရိကန်ဒေါ်လာ(၈၆၇၈.၅၈)သို့ ရောက်ရှိ ခဲ့ကြောင်း၊ အဆိုပါဈေးနှုန်းသည် ၂၀၁၈ ခုနှစ်၊ မေလနောက်ပိုင်း တစ်နှစ်တာကာလအတွင်း အမြင့်ဆုံးဈေးနှုန်းဖြစ်ကြောင်း၊ အမေရိကန်-တရုတ်ကုန်သွယ်ရေးတင်းမာမှုဂယက်ကြောင့် Bitcoin တန်ဖိုးမှာ ယခုမေလ    တစ်လတာကာလအတွင်း၌ပင် ၆၆%မြင့်တက်ခဲ့ကြောင်း www.dapplife.com  အင်တာနက် website တွင်ဖော်ပြပါရှိပါသည်။

ထိုင်းလွှတ်တော်အစည်းအဝေးတွင် ဝန်ကြီးချုပ်ဟောင်းချွန်လိပိုင်အား အောက်လွှတ်တော်ဥက္ကဋ္ဌ အဖြစ် ရွေးချယ်ခဲ့သောကြောင့် တပ်မတော်အစိုးရလိုလားသောပါတီအနေဖြင့် ညွန့်ပေါင်း အစိုးရ ဖွဲ့နိုင်မည့်အနေအထားရှိမှု

ထိုင်းနိုင်ငံ၌ ၂၀၁၉ ခုနှစ်၊ မေလ(၂၅)ရက်တွင် ကျင်းပခဲ့သည့် အောက်လွှတ်တော်အစည်းအဝေးတွင် ဒီမိုကရက်ပါတီမှလွှတ်တော်အမတ်ဝန်ကြီးချုပ်ဟောင်း ချွန်လိပိုင်မှာ အောက်လွှတ်တော်ဥက္ကဋ္ဌအဖြစ် ရွေးချယ်ခံခဲ့ရကြောင်း၊  အောက်လွှတ်တော်အစည်းအဝေးကိုနံနက်(၁၀:၃၀)အချိန်မှစတင်ခဲ့သော်လည်း တပ်မတော်အစိုးရလိုလားသော PPRP ပါတီနှင့် သက်ဆင်လိုလားသော ပွေထိုင်းပါတီတို့အကြား အားပြိုင်မှုများကြောင့် အောက်လွှတ်တော်ဥက္ကဋ္ဌနေရာအတွက်ကိုယ်စားလှယ်လောင်းအမည်စာရင်းတင်သွင်းသည့် အစီအစဉ်မှာဝေဖန်မှုများ၊ အပြန်အလှန်ကန့်ကွက်မှုများဖြင့် နှောင့်နှေးခဲ့ကြောင်း၊ PPRP ပါတီသည်မူလက ၎င်းတို့ပါတီမှ အမတ်(၁)ဦးကိုအောက်လွှတ်တော်ဥက္ကဋ္ဌနေရာအတွက် အမည်စာရင်းတင်သွင်းရန် စီစဉ်ခဲ့သော်လည်း လွှတ်တော်အတွင်းဆွေးနွေးတိုင်ပင်မှုများပြုလုပ်  ခဲ့ပြီးနောက် ကြားနေနိုင်ငံရေးပါတီကြီးများ၏ထောက်ခံမှုကိုရရှိစေရန်အတွက် ဒီမိုကရက်ပါတီမှလွှတ်တော်အမတ် ဝန်ကြီးချုပ်ဟောင်း ချွန်လိပိုင်၏ အမည်စာရင်းကိုနေ့လည် ၁၃:၀၀ အချိန်ခန့်တွင်မှ အဆိုပြုတင်သွင်းခဲ့ကြောင်း၊  အောက်လွှတ်တော် ဥက္ကဋ္ဌနေရာအတွက်   ပွေထိုင်းပါတီမှ လွှတ်တော်အမတ်အမွန်ဝီဝပ် နှင့် ဒီမိုကရက်ပါတီမှ လွှတ်တော်အမတ် ချွန်လိပိုင်တို့ကိုယှဉ်ပြိုင်ရွေးချယ်စေခဲ့ရာ ချွန်လိပိုင်က  ထောက်ခံမဲ(၂၅၈)မဲရရှိပြီး အမွန်ဝီဝပ်က(၂၃၅)မဲသာရရှိခဲ့သည့်အတွက် ချွန်လိပိုင်မှာ အောက်လွှတ်တော်ဥက္ကဋ္ဌအဖြစ် ရွေးချယ်ခံခဲ့      ရကြောင်း၊ အောက်လွှတ်တော်ဥက္ကဋ္ဌသည် ထိုင်းနိုင်ငံ၌ အထက်လွှတ်တော်နှင့် အောက်လွှတ်တော်နှစ်ရပ်ကို ပေါင်းစည်းထားသောပါလီမန်၏ဥက္ကဋ္ဌတာဝန်ကိုပါ ထမ်းဆောင်ရမည် ဖြစ်ကြောင်းသိရှိရပါသည်။

အသက်(၈၀)အရွယ်ရှိ ချွန်လိပိုင်သည် ထိုင်းနိုင်ငံ၏ ဝန်ကြီးချုပ်အဖြစ် ၁၉၉၂ ခုနှစ် မှ ၁၉၉၅ ခုနှစ် အထိတစ်ကြိမ်၊ ၁၉၉၇ ခုနှစ်မှ ၂၀၀၁ ခုနှစ်အထိတစ်ကြိမ်၊ စုစုပေါင်းနှစ်ကြိမ် တာဝန်ထမ်းဆောင်ခဲ့သူဖြစ်ပြီး ၎င်း၏နိုင်ငံရေးသမားဘဝတွင် တရားရေး၊ ကူးသန်း ရောင်းဝယ်ရေး၊ လယ်ယာစိုက်ပျိုးရေး၊ ပညာရေးနှင့် ကျန်းမာရေးအပါအဝင် ဝန်ကြီးဌာနပေါင်းများစွာတို့၌ ဝန်ကြီးအဖြစ် တာဝန်        ထမ်းဆောင်ခဲ့ဖူးသူဖြစ်ကြောင်း၊ လက်ရှိအချိန်တွင် ဒီမိုကရက်ပါတီ၏ အကြံပေးပုဂ္ဂိုလ်အဖြစ်လည်း ဆောင်ရွက်လျက် ရှိရာတပ်မတော်အစိုးရလိုလားသော PPRP ပါတီသည် ချွန်လိပိုင် အား အောက်လွှတ်တော်ဥက္ကဋ္ဌနေရာအတွက် အာဏာခွဲဝေပေးခြင်းဖြင့် အစဉ်အလာကြီးမားသောဒီမိုကရက်ပါတီ အပါအဝင်ကြားနေ နိုင်ငံရေးပါတီများ၏ ထောက်ခံမှုကိုရယူကာ ညွန့်ပေါင်းအစိုးရဖွဲ့စည်းနိုင်မည့် လမ်းကြောင်းပေါ်သို့ ရောက်ရှိသွားခဲ့ကြောင်းသိရှိရပါသည်။

အောက်လွှတ်တော်တွင်အမတ်နေရာ (၅၀၀)ရှိသည့်အနက် အမတ်နေရာ(၆)နေရာမှာ ရွေးကောက်ပွဲ ကော်မရှင်ကအတည်မပြု သေးသည့်အတွက် မဲပေးခွင့်မရရှိကြောင်း၊ ထို့ကြောင့် မဲပေးပိုင်ခွင့်ရှိသူ(၄၉၄)ဦး ရှိသည့်အနက် ချွန်လိပိုင်သည် (၂၅၈)မဲကိုရရှိခဲ့သော ကြောင့် ချွန်လိပိုင်အားထောက်ခံမဲပေးသူများတွင် သက်ဆင်လိုလားသော ပွေထိုင်းပါတီဦးဆောင်သည့် မဟာမိတ်ပါတီများအဖွဲ့ကလွဲ၍ တပ်မတော်အစိုးရ လိုလားသော PPRPပါတီနှင့် အခြားနိုင်ငံရေးပါတီကိုယ်စားပြုအမတ်များအားလုံးမှာ ချွန်လိပိုင် ကိုမဲပေးခဲ့ကြကြောင်း www.bangkokpost.com အင်တာနက် website တွင်ဖော်ပြပါရှိပါသည်။

အမေရိကန်ဗဟိုဘဏ် အစည်းအဝေးမှတ်တမ်းနှင့် နိုင်ငံတကာငွေကြေးရန်ပုံငွေအဖွဲ့၏ သတိပေးချက်တို့ ထွက်ပေါ်ပြီးနောက် ကမ္ဘာ့ရွှေဈေးနှုန်းမှာပြန်လည်မြင့်တက်လာခဲ့မှု

အမေရိကန်ဗဟိုဘဏ်၏ ၂၀၁၉ ခုနှစ်၊ ဧပြီလ(၃၀)ရက်နေ့ နှင့် မေလ(၁)ရက်နေ့တို့တွင်ကျင်းပခဲ့သည့် အစည်းအဝေးမှတ်တမ်းကိုယခုရက်ပိုင်းအတွင်း   အများပြည်သူသိရှိစေရန်   ထုတ်ပြန်ကြေညာပေးခဲ့ရာ   အဆိုပါမှတ်တမ်း၌   ဗဟိုဘဏ်ကော်မတီဝင်များသည်         အမေရိကန် – တရုတ် ကုန်သွယ်ရေးတင်းမာမှုဂယက်နှင့် ဗြိတိန်-ဥရောပသမဂ္ဂခွဲရေး/တွဲရေးပြဿနာသေချာမှုမရှိသေးသည့် အခြေအနေများကိုအကြောင်းပြု၍ ကမ္ဘာ့စီးပွားရေးမငြိမ်မသက်ဖြစ်ပေါ်လာနိုင်သည်ဟုခန့်မှန်းထားကြပြီးဘဏ်တိုးနှုန်းတိုးမြှင့်ရေးကိစ္စကိုဆက်လက်ဆိုင်းငံ့ထားရန် ဆွေးနွေးခဲ့ကြသည့် အချက်များပါရှိကြောင်း၊ ထို့ကြောင့် ဗဟိုဘဏ်၏ အစည်းအဝေးမှတ်တမ်းထွက်ပေါ်ပြီးနောက်တွင် အမေရိကန်ဒေါ်လာတန်ဖိုးကျဆင်းပြီးကမ္ဘာ့ရွှေဈေးနှုန်းမှာပြန်လည်မြင့်တက်လာခဲ့ကြောင်းသိရှိရပါသည်။

ထို့ပြင်  နိုင်ငံတကာငွေကြေးရန်ပုံငွေအဖွဲ့  (IMF) က  ၂၀၁၉ ခုနှစ်၊  မေလ(၂၃)ရက်တွင်  ထုတ်ပြန်သည့်သတိပေးချက်၌                     အမေရိကန်-တရုတ်  ကုန်သွယ်ရေးစစ်ပွဲအရှိန်အဟုန်မြင့်လာမည်ဆိုပါက  ကမ္ဘာ့စီးပွားရေးတိုးတက်မှုကိုထိခိုက်စေနိုင်ပြီး အမေရိကန်သမ္မတ၏ သွင်းကုန်ခွန်တိုးမြှင့် ကောက်ခံသည့်အစီအစဉ်သည် အမေရိကန်ကုမ္ပဏီကြီးများကိုပါ အကြီးအကျယ်ထိခိုက်စေလိမ့်မည်ဟုဖော်ပြထားခြင်းသည်လည်းအမေရိကန်ဒေါ်လာတန်ဖိုးကိုကျဆင်းစေကာ ရွှေဝယ်ယူစုဆောင်းမှုကိုပိုမိုများပြားလာစေခဲ့ကြောင်းသိရှိရပါသည်။

          အမေရိကန်ဗဟိုဘဏ် အစည်းအဝေးမှတ်တမ်းနှင့် IMF ၏သတိပေးချက်များထွက်ပေါ်ပြီးနောက်ရက်ပိုင်းအတွင်းအမေရိကန်ဒေါ်လာတန်ဖိုးမှာ  ၀.၂၇%  ကျဆင်းပြီး ကမ္ဘာ့ရွှေဈေးနှုန်းမှာ ၀.၅% မြင့်တက်ကာမေလ(၂၅)ရက်၌ တစ်အောင်စလျှင်အမေရိကန်ဒေါ်လာ  (၁၂၈၃.၆၀)ဖြင့် ဈေးပိတ်သွားခဲ့ကြောင်း www.cnbc.com အင်တာနက် website တွင် ဖော်ပြပါရှိပါသည်။

စားအုန်းဆီအားဇီဝလောင်စာဆီအဖြစ်အသုံးပြုရာတွင် လိုက်နာရမည့် ပြဌာန်းချက်များအားဥရောပသမဂ္ဂကထုတ်ပြန်ခဲ့ပြီးနောက်တွင် စားအုန်းဆီစေျးနှုန်းမှာကျဆင်းသွားခဲ့မှု

ဥရောပသမဂ္ဂသည် ယခုရက်ပိုင်းအတွင်း၌ ဇီဝလောင်စာဆီအသုံးပြုမှုများနှင့်ပက်သက်သည့် စည်းမျဉ်းအသစ်များကိုထုတ်ပြန်ကြေညာခဲ့ရာ အဆိုပါစည်းမျဉ်းများတွင်ဥရောပသမဂ္ဂ၏ ပြန်လည်ပြည့်ဖြိုးမြဲစွမ်းအင်ဆိုင်ရာရည်မှန်းချက်များကိုထိခိုက်စေနိုင်သည့် စားအုန်းဆီအား ဇီဝလောင်စာဆီအဖြစ်အသုံးပြုခြင်းကိုကန့်သတ်ခဲ့ပြီးသစ်တောပြုန်းတီးမှုအပါအဝင် သဘာဝပတ်ဝန်းကျင်ကိုထိခိုက်မှုမရှိစေသည့်နည်းလမ်းများဖြင့် ထုတ်လုပ်ထားကြောင်းအထောက်အထားခိုင်လုံစွာပြသနိုင်သည့် စားအုန်းဆီများကိုသာ ဥရောပနိုင်ငံများ၌ အသုံးပြုခွင့်ပေးရန် ပြဌာန်းချက်များပါဝင်ကြောင်း၊ အဆိုပါစည်းမျည်းအသစ်များသည် ၂၀၁၉ခုနှစ်၊ ဇွန်လ(၁၀)ရက်နေ့မှစတင်၍ ဥရောပနိုင်ငံများ၌ စတင်အသက်ဝင်တော့မည်ဖြစ်သောကြောင့် ဥရောပနိုင်ငံများ၏စားအုန်းဆီဝယ်လိုအားမှာသိသိသာသာလျော့နည်းသွားနိုင်သည့်အတွက် မလေးရှားစေျးကွက်တွင် စားအုန်းဆီစေျးနှုန်းများကျဆင်းလျက်ရှိကြောင်းသိရှိရပါသည်။

ထို့ပြင် အမေရိကန်-တရုတ်ကုန်သွယ်ရေးတင်းမားမှုပြဿနာကြောင့် အမေရိကန်ပြည်ထောင်စုမှထွက်ရှိသောပဲပိစပ်များအားတရုတ်နိုင်ငံကဝယ်ယူမှုရပ်ဆိုင်းဖွယ်ရှိသည့်အတွက် ကမ္ဘာ့စေျးကွက်အတွင်းပဲပိစပ်ဆီစေျးနှုန်းများကျဆင်းနေခြင်းသည်လည်းစားအုန်းဆီစေျးနှုန်းကိုလိုက်ပါကျဆင်းစေသည့်အချက်တစ်ခုဖြစ်ကြောင်းသိရှိရပါသည်။

၂၀၁၉ ခုနှစ်၊ မေလ(၂၄)ရက်(သောကြာ)နေ့တွင်  မလေးရှားစေျးကွက်၌  စားအုန်းဆီစေျးနှုန်းမှ ာ၁.၉ %  ကျဆင်းပြီးတစ်တန်လျှင်     ၂၀၁၇ ရင်းဂစ်(အမေရိကန်ဒေါ်လာ ၄၈၁ ဝန်းကျင်)သို့ရောက်ရှိခဲ့ကြောင်း၊စားအုန်းဆီစေျးနှုန်းသည် တစ်တန်လျှင် ၁၉၄၀ ရင်းဂစ်ငွေ      (အမေရိကန်ဒေါ်လာ ၄၆၂ ဝန်းကျင်)သို့ ကျဆင်းသွားနိုင်ကြောင်းwww.thestar.com.myအင်တာနက် website တွင်ဖော်ပြပါရှိပါသည်။

၂၀၁၉ ခုနှစ်၊ မေလ(၂၄)ရက်(သောကြာ)နေ့တွင် မလေးရှားစေျးကွက်၌ စားအုန်းဆီစေျးနှုန်းမှာ၁.၉ % ကျဆင်းပြီးတစ်တန်လျှင် ၂၀၁၇ ရင်းဂစ်(အမေရိကန်ဒေါ်လာ ၄၈၁ ဝန်းကျင်)သို့ရောက်ရှိခဲ့ကြောင်း၊စားအုန်းဆီစေျးနှုန်းသည် တစ်တန်လျှင် ၁၉၄၀ ရင်းဂစ်ငွေ       (အမေရိကန်ဒေါ်လာ ၄၆၂ ဝန်းကျင်)သို့ ကျဆင်းသွားနိုင်ကြောင်းwww.thestar.com.myအင်တာနက် website တွင်ဖော်ပြပါရှိပါသည်။