ကမ္ဘာတစ်ဝန်းရှိ စတော့ရှယ်ယာဈေးကွက်နှင့် ငွေကြေးဈေးကွက်များ ကမောက်ကမဖြစ်နေခြင်းကို အကြောင်းပြု၍ Bitcoin ဈေးနှုန်းမှာ (၁၈) လတာကာလအတွင်း အမြင့်ဆုံးဖြစ်သည့် တစ်ယူနစ်လျှင် အမေရိကန်ဒေါ်လာ (၁၃,၀၀၀) အထက်သို့ရောက်ရှိလာခဲ့

တရုတ် – အမေရိကန်ကုန်သွယ်ရေးတင်းမာမှုဂယက်နှင့် အီရန်-အမေရိကန် စစ်ရေးတင်းမာမှု အခြေအနေတို့ကိုအကြောင်းပြု၍ ကမ္ဘာတစ်ဝန်းရှိ စတော့ရှယ်ယာဈေးကွက်များနှင့် ငွေကြေး ဈေးကွက်များ၌ တန်ဖိုး အတက်အကျ၊ အပြောင်းအလဲများ မြန်ဆန်စွာဖြစ်ပေါ်နေပြီး ဈေးနှုန်းများ ကမောက်ကမဖြစ်ပေါ်လျက်ရှိရာ ယင်းအခြေအနေကိုအကြောင်းပြု၍ ဒီဂျစ်တယ်ငွေကြေးဖြစ်သော Bitcoin ကို ဝယ်ယူစုဆောင်းသူများပြားလာသည့်အတွက် Bitcoin ဈေးနှုန်းမှာ (၁၈) လတာကာလ အတွင်း အမြင့်ဆုံးသို့ရောက်ရှိခဲ့ကြောင်း သိရှိရပါသည်။
ထို့ပြင် Facebook မှ ထုတ်ဝေမည့် Libra ဒီဂျစ်တယ်ငွေကြေးအား Visa ၊ Master Card နှင့် Uber အပါအဝင် စီးပွားရေးကုမ္ပဏီကြီးအချို့တို့က ထောက်ခံခဲ့သည်ကိုအကြောင်းပြု၍  ဒီဂျစ်တယ် ငွေကြေးဈေးကွက်အပေါ် ယုံကြည်စိတ်ချစွာ ရင်းနှီးမြှုပ်နှံသူများပြားလာခြင်းနှင့် အမေရိကန် – တရုတ် ကုန်သွယ်ရေးစစ်ပွဲအပေါ် တုံ့ပြန်သည့်အနေဖြင့် အချို့သော တရုတ်ရင်းနှီးမြှုပ်နှံသူများက Bitcoin ဈေးကွက်တွင် ရင်းနှီးမြှုပ်နှံ့မှုအများအပြားပြုလုပ်လာကြခြင်း အစရှိသည်တို့သည်လည်း Bitcoin ဈေးနှုန်းကို မြင့်တက်စေသည့်အခြားအချက်များဖြစ်ကြောင်း သိရှိရပါသည်။
Bitcoin ဈေးနှုန်းသည် ယခုဇွန်လအတွင်း၌ ၂၀% ကျော်မြင့်တက်ခဲ့ပြီး လက်ရှိအချိန်တွင် တစ်ယူနစ်လျှင် အမေရိကန်ဒေါ်လာ (၁၃,၆၆၆) သို့ ရောက်ရှိလျက်ရှိကြောင်း၊ အဆိုပါဈေးနှုန်းသည် ၂၀၁၈ ခုနှစ်၊ ဇန်နဝါရီလနောက်ပိုင်း (၁၈) လတာကာလအတွင်း အမြင့်ဆုံးဈေးနှုန်းဖြစ်ကြောင်း www. channelnewsasia.com အင်တာနက် website တွင် ဖော်ပြပါရှိပါသည်။

၎

င

၎

၎

အမေရိကန်-အီရန်အကြားစစ်ရေးတင်းမာမှုကြောင့် ပါရှန်ပင်လယ်ကွေ့သို့ ဝင်ထွက်သွားလာနေသော ရေနံတင်သင်္ဘောများ၏ အာမခံကြေးမှာ အဆမတန်မြင့်တက်လာခဲ့

အရှေ့အလယ်ပိုင်းဒေသအတွင်း ရေနံဖြတ်သန်းသယ်ယူရာတွင် အဓိကကျသောပါရှန် ပင်လယ်ကွေ့တွင် အမေရိကန်ပြည်ထောင်စုနှင့် အီရန်နိုင်ငံတို့အကြား စစ်ရေးတင်းမာမှုများ ဖြစ်ပေါ်နေပြီး ရေနံတင်သင်္ဘောအချို့ တိုက်ခိုက်ခံရသည့်ဖြစ်စဉ် ပေါ်ပေါက်လာပြီးနောက်တွင် ပါရှန် ပင်လယ်ကွေ့သို့ဖြတ်သန်းနေသည့် ရေနံတင်သင်္ဘောများ၏ အာမခံကြေးမှာ အဆမတန်မြင့်တက် လာခဲ့ကြောင်း သိရှိရပါသည်။
ကမ္ဘာပေါ်ရှိ အာမခံကုမ္ပဏီကြီးများထံမှရရှိသည့် သတင်းများအရ ရေနံတင်သင်္ဘောများအနေဖြင့် သင်္ဘောအတွက် အာမခံနှင့်သယ်ဆောင်လာသော ရေနံကုန်စည်များအတွက် အာမခံဟူ၍ အာမခံ (၂) မျိုးထားရှိသည့်အနက် ယခုအခါရေနံတင်သင်္ဘောများအတွက် အာမခံကြေးကိုတိုးမြှင့်ပြီးဖြစ်ကြောင်း၊ ရေနံတင်သင်္ဘောတစ်စီးအတွက် အာမခံကြေးသတ်မှတ်ချက်သည် ပျမ်းမျှအားဖြင့် အမေရိကန်ဒေါ်လာ (၇၅) သန်းတန်ကြေးရှိ ရေနံတင်သင်္ဘောတစ်စီး၏အာမခံကြေးမှာ(၇)ဆခန့်မြင့်တက်လာခဲ့ပြီး ယခင် အမေရိကန်ဒေါ်လာ (၃၀,၀၀၀) ခန့်မှ ယခုအခါ အမေရိကန်ဒေါ်လာ(၂၀၀,၀၀၀)အထက်သို့ ရောက်ရှိလာခဲ့ကြောင်း၊ အလားတူ အဆိုပါရေနံတင်သင်္ဘော၌ သယ်ဆောင်လာသောရေနံများအတွက် အာမခံကြေး သတ်မှတ်ချက်ကိုလည်းတိုးမြှင့်ရန် အာမခံကုမ္ပဏီများက ရည်မှန်းထားကြောင်း၊ တိုးမြှင့်မည့်နှုန်းထားအရ ရေနံတင်သင်္ဘာတစ်စီး၌ တင်ဆောင်လာသော အမေရိကန်ဒေါ်လာ(၁၃၀)သန်းခန့်တန်ကြေးရှိ ရေနံစိမ်းများအတွက် ကုန်စည်အာမခံကြေးကို (၂)ဆကျော်တိုးမြှင့်ပြီး ယခုသတ်မှတ်ထားသည့် အမေရိကန် ဒေါ်လာ(၁၅၀,၀၀၀)မှ အမေရိကန်ဒေါ်လာ (၃၂၅,၀၀၀) သို့ တိုးမြှင့်ကောက်ခံဖွယ်ရှိကြောင်း၊ ထို့ကြောင့် မကြာမီကာလအတွင်း ပါရှန်ပင်လယ်ကွေ့ကိုဖြတ်သန်းမည့် ရေနံတင်သင်္ဘောတစ်စီး၏ စုစုပေါင်း အာမခံကြေးမှာ အနည်းဆုံးအမေရိကန်ဒေါ်လာ (၅၀၀,၀၀၀)အထက်၌ ဖြစ်ပေါ်လာဖွယ်ရှိသောကြောင့် သင်္ဘောပေါ်တွင်ပါရှိသော ရေနံတစ်စည်ချင်းစီ၏အာမခံကြေးမှာ အမေရိကန်ဒေါ်လာ (၂၅) ဆင့်ခန့် ကျသင့်သွားလိမ့်မည်ဟု သိရှိရပါသည်။
ပါရှန်ပင်လယ်ကွေ့သည် ကမ္ဘာတစ်ဝန်းရေနံသုံးစွဲမှုပမာဏ၏ ၃၅%ခန့်ကို ဖြတ်သန်းသယ်ဆောင် နေသည့်ရေနံသယ်ယူရာလမ်းကြောင်းဖြစ်ပြီး နေ့စဉ်ရေနံစည်ပေါင်း (၁၈.၂) သန်းခန့်မှာ ပါရှန်ပင်လယ်ကွေ့ကို ဖြတ်သန်း၍ ကမ္ဘာ့နိုင်ငံအသီးသီးသို့ရောက်ရှိနေကြောင်း www.newpaper24.com အင်တာနက် website တွင်ဖော်ပြပါရှိပါသည်။

၎

င

၎

၎

အိန္ဒိယနိုင်ငံအတွင်းသို့ ရူပီး (၆) ကုဋေတန်ဖိုးရှိရွှေများ တရားမဝင်တင်သွင်းလာသည့် မြန်မာနိုင်ငံသား (၆) ဦးကို အိန္ဒိယ အာဏာပိုင်များက နယူးဒေလီမြို့ရှိ အင်ဒီရာဂန္ဒီအပြည်ပြည်ဆိုင်ရာလေဆိပ်တွင် ဖမ်းဆီးခဲ့

အိန္ဒိယနိုင်ငံအတွင်းသို့ အိန္ဒိယနိုင်ငံသုံးရူပီး (၆) ကုဋေတန်ဖိုးရှိရွှေများ တရားမဝင်တင်သွင်းလာသည့် မြန်မာနိုင်ငံသား (၆) ဦးကို အိန္ဒိယအာဏာပိုင်များက နယူးဒေလီမြို့ရှိ အင်ဒီရာဂန္ဒီ အပြည်ပြည်ဆိုင်ရာ လေဆိပ်တွင် ယခုရက်ပိုင်းအတွင်းဖမ်းဆီးရမိခဲ့သည်ဟု အိန္ဒိယနိုင်ငံထုတ် hindustantimes သတင်းစာက ၂၀၁၉ ခုနှစ်၊ ဇွန်လ (၂၃) ရက်နေ့တွင် ရေးသားဖော်ပြခဲ့ကြောင်း သိရှိရပါသည်။
သတင်းစာ၏ရေးသားဖော်ပြချက်အရ ဖမ်းဆီးခံရသည့် မြန်မာနိုင်ငံသား (၆) ဦးမှာ သင်းသင်းနွယ်၊ အိဝေဝေဦး၊ မြင့်စန္ဒာအောင်၊ ဝင်းလဝင်း၊ ရဲထွဋ်နှင့် ဇော်ဝင်းမောင်တို့ဖြစ်ပြီး ၎င်းတို့သည် ထိုင်းနိုင်ငံ၊ ဘန်ကောက်မြို့မှ အိန္ဒိယနိုင်ငံ၊ နယူးဒေလီမြို့သို့ Air India လေကြောင်းခရီးစဉ်ဖြင့် လိုက်ပါလာခဲ့ကာ လူတစ်ဦးချင်းစီ၌ ထိုင်းနိုင်ငံ၊ ဘန်ကောက်မြို့ရှိ ရွှေကုမ္ပဏီဖြစ်သော Bangkok Assay Office မှ ထုတ်လုပ်ထားသည့် Bangkok Gold Assay အမှတ်တံဆိပ်ပါ ရွှေတုံးများကို ခန္ဓာကိုယ်တွင်သိုဝှက်၍ ယူဆောင်လာသည်ကို အိန္ဒိယနိုင်ငံ၊ အခွန်ထောက်လှမ်းရေးဌာန (DRI) တာဝန်ရှိသူများက ရှာဖွေတွေ့ရှိ ခဲ့ကြောင်း၊ ဖမ်းဆီးရမိသည့် ရွှေအလေးချိန်ပမာဏမှာ (၁၈) ကီလိုခန့်ရှိပြီး ကာလတန်ဖိုးအားဖြင့် အိန္ဒိယ နိုင်ငံသုံးရူပီးငွေ (၆) ကုဋေခန့် (အမေရိကန်ဒေါ်လာ ၈.၆ သိန်းကျော်) တန်ဖိုးရှိကြောင်း၊ ဖမ်းဆီးခံရသူများ၏ ထွက်ဆိုချက်အရ အိန္ဒိယအာဏာပိုင်များသည် နယူးဒေလီမြို့၊ ဒါရာဂန္ဒီအရပ်တွင်နေထိုင်ပြီး ရွှေမှောင်ခို လုပ်ငန်းလုပ်ကိုင်နေသည့် အိန္ဒိယနိုင်ငံသား မိုဟာမက်အာဘစ်ကိုပါ ဆက်လက်ဖမ်းဆီးနိုင်ခဲ့ကြောင်း၊ မိုဟာမက်အာဘစ်သည် လွန်ခဲ့သော (၁၅) နှစ်၊ (၁၆) နှစ်ခန့်မှစတင်၍ အိန္ဒိယနိုင်ငံ ပြင်ပမှရွှေများကို အိန္ဒိယနိုင်ငံအတွင်းသို့ တရားမဝင်တင်သွင်းသည့် လုပ်ငန်းများ လုပ်ကိုင်နေသူဖြစ်ကြောင်းကို အာဏာပိုင်များထံ ဝန်ခံထွက်ဆိုခဲ့သည်ဟု သိရှိရပါသည်။
အိန္ဒိယအာဏာပိုင်များသည် ယခုအခါ ရွှေမှောင်ခိုသယ်ဆောင်လာသည့် မြန်မာနိုင်ငံသား (၆) ဦးနှင့် ရွှေမှောင်ခိုလုပ်ငန်းလုပ်ကိုင်သူ အိန္ဒိယနိုင်ငံသားတို့အား တရားရုံး၏အမိန့်ဖြင့် ရက်သတ္တပတ် (၂) ပတ်ခန့် ချုပ်နှောင်ထားကြောင်း  www.hindustantimes.com အင်တာနက် website တွင် ဖော်ပြပါရှိပါသည်။

၎

င

၎

၎

၎

င

၎

၎

၎

င

၎

၎

အမေရိကန် ဗဟိုဘဏ်အစည်းအဝေးဂယက်နှင့် အမေရိကန် – အီရန် စစ်ရေးတင်းမာမှုဂယက်တို့ကြောင့် အမေရိကန်ဒေါ်လာတန်ဖိုးမှာ (၃) လအတွင်း အနိမ့်ဆုံးသို့ရောက်ရှိခဲ့

ယခုရက်ပိုင်းအတွင်း ကျင်းပပြီးစီးခဲ့သည့် အမေရိကန်ဗဟိုဘဏ်အစည်းအဝေး၌ ၂၀၁၉ ခုနှစ် လက်ကျန်ကာလများအတွင်း ဘဏ်တိုးနှုန်းကို အများအပြားလျှော့ချရန် စီစဉ်နေခြင်းနှင့် ပါရှန် ပင်လယ်ကွေ့အတွင်း၌ အမေရိကန်မောင်းသူမဲ့သူလျှိုလေယာဉ်အား အီရန်တပ်မတော်က ပစ်ချခဲ့ပြီးနောက် အမေရိကန် – အီရန်စစ်ရေးတင်းမာမှုမှာ အမြင့်ဆုံးအနေအထားသို့ ရောက်ရှိလာခြင်း အစရှိသည့်အချက်များကြောင့် ရင်းနှီးမြှုပ်နှံသူများသည် အမေရိကန်ဒေါ်လာအစား ရွှေနှင့်အခြားငွေကြေးများကို ပြောင်းလဲ စုဆောင်းမှုများပြုလုပ်နေသည့်အတွက် အမေရိကန်ဒေါ်လာတန်ဖိုးမှာ (၃) လအတွင်း အနိမ့်ဆုံးသို့ရောက်ရှိခဲ့ကြောင်း သိရှိရပါသည်။
ထို့ပြင် ယခုရက်သတ္တပတ်အတွင်း ဂျပန်နိုင်ငံ၌ ကျင်းပပြုလုပ်မည့် စက်မှုထိပ်သီးနိုင်ငံ (၂၀) အစည်းအဝေး၌ အမေရိကန်သမ္မတနှင့် တရုတ်သမ္မတတို့ ကုန်သွယ်ရေးကိစ္စများဆွေးနွေးမည့် အခြေအနေအပေါ် ရင်းနှီးမြှုပ်နှံသူများက စောင့်မျှော်နေခြင်းသည်လည်း ကမ္ဘာ့ဈေးကွက်အတွင်း၌ အမေရိကန်ဒေါ်လာဝယ်ယူမှုကို အားပျော့စေကာ အမေရိကန်ဒေါ်လာတန်ဖိုးကို ကျဆင်းစေသည့် အခြားအချက်တစ်ခုဖြစ်ကြောင်း သိရှိရပါသည်။
အမေရိကန်ဒေါ်လာတန်ဖိုးသည် အမေရိကန်ဗဟိုဘဏ်အစည်းအဝေးပြီးဆုံးသည့် ဇွန်လ (၁၉) ရက်နေ့မှစ၍ လက်ရှိအချိန်အထိ ကာလအတွင်း ၁% အထိ ကျဆင်းခဲ့ပြီး ၂၀၁၉ ခုနှစ်၊ ဇွန်လ (၂၂) ရက် (စနေနေ့) တွင် တစ်ယူရိုလျှင်အမေရိကန်ဒေါ်လာ (၁.၁၃၆၈) လဲလှယ်မှုနှုန်း၊ အမေရိကန်တစ်ဒေါ်လာလျှင် ဂျပန်ယန်းငွေ (၁၀၇.၃၀) ယန်းလဲလှယ်မှုနှုန်း၊ အမေရိကန်တစ်ဒေါ်လာလျှင် တရုတ်ယွမ်ငွေ (၆.၈၆၈၅) ယွမ်လဲလှယ်မှုနှုန်းများသို့ အသီးသီးရောက်ရှိခဲ့ကြောင်း၊ အဆိုပါ လဲလှယ်မှုနှုန်းများအရ အမေရိကန် ဒေါ်လာတန်ဖိုးသည် ၂၀၁၉ ခုနှစ်၊ မတ်လ (၂၂) ရက်နေ့နောက်ပိုင်း အနိမ့်ဆုံးအနေအထားသို့ ရောက်ရှိနေခြင်းဖြစ်သည်ဟု www.reuters.com အင်တာနက် website တွင် ဖော်ပြပါရှိပါသည်။

၎

င

၎

၎

Facebook ၏ ဒီဂျစ်တယ်ငွေကြေးအစီအစဉ်ကြေညာချက်ထွက်ပေါ်ပြီးနောက် တွင် ကမ္ဘာတစ်ဝန်းငွေကြေး ဆိုင်ရာ အရေးယူဆောင်ရွက်ရေးအဖွဲ့ (FATF) နှင့်ဗဟိုဘဏ်များက သတိပေးချက်များထုတ်ပြန်ခဲ့

Facebook၏ ဒီဂျစ်တယ်ငွေကြေး အစီအစဉ်ကြေညာချက်ထွက်ပေါ်ပြီးနောက်တွင် ကမ္ဘာ တစ်ဝန်းငွေကြေးဆိုင်ရာ အရေးယူဆောင်ရွက်ရေးအဖွဲ့ (FATF) နှင့် ဗဟိုဘဏ်များက သတိပေးချက်များ ထုတ်ပြန်ခဲ့ကြောင်း သိရှိရပါသည်။
ကမ္ဘာတစ်ဝန်း ငွေကြေးခဝါချမှုများကို အရေးယူနေသည့်အဖွဲ့အစည်းဖြစ်သော FATF က ၂၀၁၉ ခုနှစ်၊ ဇွန်လ(၂၁)ရက် (သောကြာနေ့) တွင် ထုတ်ပြန်သည့် ကြေညာချက်၌ Bitcoin အပါအဝင် ဒီဂျစ်တယ်ငွေကြေးများသည် ငွေကြေးခဝါချမှုတိုက်ဖျက်ရေးလုပ်ငန်းစဉ်များကို အဟန့်အတားဖြစ်စေကြောင်း၊ ဒီဂျစ်တယ်ငွေကြေးလုပ်ငန်း လုပ်ကိုင်သူများသည် ဒီဂျစ်တယ်ငွေကြေးများကို အသုံးပြု၍ ငွေကြေးခဝါချမှုလုပ်ငန်းများကို ဆောင်ရွက်လျက်ရှိသောကြောင့် ကမ္ဘာတစ်ဝန်းရှိ ဒီဂျစ်တယ်ငွေကြေး Exchange များကို သက်ဆိုင်ရာအစိုးရများက တင်းတင်းကြပ်ကြပ် စောင့်ကြည့်ရန်လိုအပ်ကြောင်း၊ နိုင်ငံအသီးသီးရှိအာဏာပိုင်များသည် ဒီဂျစ်တယ်ငွေကြေးနှင့်သက်ဆိုင်သည့်လုပ်ငန်းများကို မှတ်ပုံတင်စာရင်းသွင်းခိုင်းစေပြီး ဒီဂျစ်တယ်ငွေကြေးရောင်းဝယ်လွှဲပြောင်းမှုများနှင့် ပတ်သက်သည့် အချက်အလက်များ၊ သံသယဖြစ်ဖွယ် ဒီဂျစ်တယ်ငွေကြေးအလွှဲအပြောင်းများနှင့်ပတ်သက်၍ စစ်ဆေး ကြပ်မတ်မှုများပြုလုပ်ရလိမ့်မည်ဟု ဖော်ပြထားကြောင်း သိရှိရပါသည်။
FATF ဥက္ကဋ္ဌ မာရှယ်လ်ဘီလင်စလေးယားက ပြောကြားရာ၌ ငွေကြေးခဝါချမှု လုပ်ငန်းများတွင် ဒီဂျစ်တယ်ငွေကြေးများကို အသုံးပြုနေသည့်ဖြစ်စဉ်မှာ ကမ္ဘာအနှံ့သို့ပျံ့နှံ့နေပြီဖြစ်သောကြောင့် ကမ္ဘာ့နိုင်ငံများအနေဖြင့် အရေးယူဆောင်ရွက်မှုများ အလျင်အမြန်ပြုလုပ်ရန် လိုအပ်နေပြီဟု ပြောကြားခဲ့ကြောင်း သိရှိရပါသည်။
Facebook ၏ Libra အမည်ရှိ ဒီဂျစ်တယ်ငွေကြေးအစီအစဉ် သတင်းထွက်ပေါ်ပြီးနောက်တွင် ကမ္ဘာ့နိုင်ငံအသီးသီးရှိ ဗဟိုဘဏ်များနှင့် ငွေကြေးမူဝါဒရေးဆွဲသူများမှာ ကမ္ဘာ့ငွေကြေးစနစ်ထိခိုက် လာမည့်အရေးအပေါ် စိုးရိမ်ပူပန်လျက်ရှိကြောင်း၊ လူသုံးများသည့် လူမှုကွန်ရက် Facebook ကဖန်တီးမည့် Libra ဒီဂျစ်တယ်ငွေကြေးကို ငွေကြေးခဝါချမှုလုပ်ငန်းများ၌အသုံးပြုခြင်း၊ Libra အပါအဝင် ဒီဂျစ်တယ် ငွေကြေးများကြောင့် လက်ရှိကမ္ဘာ့ငွေကြေးလည်ပတ်မှုစနစ်ပျက်စီးသွားခြင်းတို့ ဖြစ်ပေါ်လာနိုင်သည်ကို ဗြိတိန်၊ ပြင်သစ် နှင့် ဂျာမနီဗဟိုဘဏ်များက သတိပေးပြောကြားခဲ့ကြောင်း သိရှိရပါသည်။
FATF ၏ သတင်းအချက်အလက်များအရ ကမ္ဘာပေါ်တွင် လည်ပတ်သုံးစွဲနေသော ဒီဂျစ်တယ် ငွေကြေးများ၏ တန်ဖိုးစုစုပေါင်းပမာဏမှာ အမေရိကန်ဒေါ်လာ (၃၀၀) ဘီလီယံရှိသည်ဟုသိရှိရကြောင်း၊ စက်မှုထိပ်သီး (၇) နိုင်ငံ၏ ၂၀၁၉ ခုနှစ် အလှည့်ကျ ဥက္ကဋ္ဌဖြစ်သော ပြင်သစ်နိုင်ငံသည် Facebook ၏ Libra ငွေကြေးအပါအဝင် ဒီဂျစ်တယ်ငွေကြေးမျိုးစုံတို့အား ကမ္ဘာတစ်ဝန်းရှိ နိုင်ငံတကာအသီးသီးမှ ဗဟိုဘဏ်များက မည်ကဲ့သို့ စည်းမျဉ်းစည်းကမ်းများချမှတ်၍ ကိုင်တွယ်ရမည်ကို စက်မှုထိပ်သီး (၇) နိုင်ငံမှ ဗဟိုဘဏ်ကော်မတီဝင်များပါဝင်သည့် အဖွဲ့တစ်ဖွဲ့ ဖွဲ့စည်း၍ သုံးသပ်လေ့လာမှုများ ပြုလုပ်ရန် စီစဉ်နေကြောင်း www.channelnewsasia.com အင်တာနက် website တွင် ဖော်ပြပါရှိပါသည်။

၎

င

၎

၎

အာရှနိုင်ငံများ၌ ဝက်တုပ်ကွေးရောဂါ ပျံ့နှံ့နေသောကြောင့် ဝက်ကောင်ရေသန်းနှင့်ချီ၍ သုတ်သင်သတ်ဖြတ်ခံခဲ့ရ

အာဖရိကဝက်တုပ်ကွေးရောဂါသည် အာရှနိုင်ငံများ၌ ပျံ့နှံ့နေသောကြောင့် သက်ဆိုင်ရာအစိုးရများအနေဖြင့် ဦးစားပေးကိစ္စရပ်အဖြစ်သတ်မှတ်ကာ ဖြေရှင်းဆောင်ရွက်ကြရန် ကုလသမဂ္ဂက တိုက်တွန်းပြောကြားခဲ့ကြောင်း သိရှိရပါသည်။
ကုလသမဂ္ဂစားနပ်ရိက္ခာနှင့် လယ်ယာစိုက်ပျိုးရေးအဖွဲ့ (FAO) က ၂၀၁၉ ခုနှစ်၊ ဇွန်လ (၂၀) ရက် (ကြာသပတေးနေ့) တွင်ထုတ်ပြန်သည့်ကြေညာချက်၌ ယခုအခါ ဝက်တုပ်ကွေးရောဂါသည် တရုတ်၊ ဗီယက်နမ်နိုင်ငံများ၌သာမက လာအိုနိုင်ငံ၌ပါ ဖြစ်ပွားလျက်ရှိကြောင်း၊ ၂၀၁၈ ခုနှစ်၊ ဩဂုတ်လတွင် တရုတ်နိုင်ငံမှစတင်ဖြစ်ပွားခဲ့သည့် အဆိုပါဝက်တုပ်ကွေးရောဂါကြောင့် ဒေသအတွင်း၌ စုစုပေါင်း ဝက်ကောင်ရေ (၃.၇) သန်းခန့်ကို သတ်ဖြတ်သုတ်သင်ခဲ့ရကြောင်း၊ ဗီယက်နမ်နိုင်ငံသည် အများဆုံး ထိခိုက်ခဲ့သည့်နိုင်ငံဖြစ်ပြီး ဝက်ကောင်ရေအနည်းဆုံး (၂.၆) သန်းခန့် သုတ်သင်ခံခဲ့ရကာ တရုတ်နိုင်ငံမှာမူ ဝက်ကောင်ရေ (၁.၁) သန်းခန့် သုတ်သင်ခံခဲ့ရကြောင်း၊ ယခုအခါ ဟောင်ကောင်၊ ထိုင်ဝမ်၊ မြောက်ကိုရီးယား၊ ကမ္ဘောဒီးယားနှင့် မွန်ဂိုလီးယားတို့၌လည်း ဝက်တုပ်ကွေးရောဂါ အနည်းအကျဉ်းဖြစ်ပွားနေသည်ကို တွေ့ရှိရသည်ဟု ဖော်ပြထားကြောင်း သိရှိရပါသည်။
တရုတ်နိုင်ငံနှင့် ဗီယက်နမ်နိုင်ငံတို့သည် ဝက်နှင့်ပတ်သက်သောစားသောက်ကုန်များကို နိုင်ငံတစ်ကာ ဈေးကွက်အတွင်းသို့ အဓိကပံ့ပိုးပေးနေသည့်နိုင်ငံများဖြစ်ရာ ဝက်တုပ်ကွေးရောဂါ၏ ဂယက်ကြောင့် ကမ္ဘာတစ်ဝန်း၌ ဝက်သားသာမက ဝက်နှင့်ဆက်စပ်သောစားသောက်ကုန်ပစ္စည်းများမှာ ဈေးကွက် အတွင်း၌လျော့နည်းသွားခဲ့ပြီး ဈေးနှုန်းများမှာလည်း ၄၀% ခန့်မြင့်တက်လာခဲ့ကြောင်း၊ ဗီယက်နမ် နိုင်ငံ၏ဝက်မွေးမြူရေးကဏ္ဍမှာ အမေရိကန်ဒေါ်လာ (၁၈) ဘီလီယံခန့်တန်ဖိုးရှိပြီး ဝက်ကောင်ရေ (၃၀) သန်းခန့်ရှိကြောင်း သိရှိရပါသည်။
တောင်ကိုရီးယားနိုင်ငံတွင် ဝက်မွေးမြူရေးခြံပေါင်း (၆၃၀၀) ခန့်ရှိပြီး ဝက်ကောင်ရေ (၁၁) သန်းကျော် မွေးမြူထားရာ ဝက်တုပ်ကွေးရောဂါကူးစက်ပျံ့နှံ့မည်ဆိုပါက ဆုံးရှုံးမှုများစွာကြုံတွေ့နိုင်ကြောင်း၊ ကမ္ဘောဒီးယားနိုင်ငံတွင် ဗီယက်နမ်နိုင်ငံနှင့် နယ်နိမိတ်ချင်းဆက်စပ်နေသောဒေသများ၌ ဝက်တုပ်ကွေး ရောဂါတွေ့ရှိရသည့်အတွက် ဝက်ကောင်ရေ (၂၄၀၀) ကျော်ကို ယခုလပိုင်းအတွင်း သုတ်သင်ခဲ့ရကြောင်း၊ အလားတူ ဟောင်ကောင်တွင် ဝက်ကောင်ရေ (၁၀၇၀၀) ခန့်ကို ဝက်တုပ်ကွေးရောဂါကြောင့် သုတ်သင်ခဲ့ရပြီး မြောက်ကိုရီးယားနိုင်ငံတွင်လည်း ဝက်တုပ်ကွေးရောဂါ အန္တရာယ်ကိုစိုးရိမ်သည့်အတွက် တရုတ် နိုင်ငံဘက်မှဝင်ရောက်လာသော ဝက်သားနှင့်ဆက်စပ်နေသည့်စားသောက်ကုန်များကို တားမြစ်ပိတ်ပင်ခဲ့ပြီး နိုင်ငံအတွင်းဝင်ရောက်လာသည့် တရုတ်နိုင်ငံသားများကိုလည်း ကျန်းမာရေးစစ်ဆေးမှုများ ပြုလုပ်လျက်ရှိကြောင်း၊ အလားတူ ထိုင်းနိုင်ငံသည်လည်း နယ်စပ်ဒေသနှင့် ရေဆိပ်၊ လေဆိပ်များ၌ စစ်ဆေးရေးဂိတ်များထားရှိကာ ဝက်သား၊ ဝက်အူချောင်း၊ ဝက်ပေါင်ခြောက်အပါအဝင် ဝက်သားနှင့် ဆက်စပ်နေသောစားသောက်ကုန်များဝင်ရောက်လာခြင်းကို တားမြစ်ပိတ်ပင်လျက်ရှိကြောင်း www. bangkokpost.com အင်တာနက် website တွင် ဖော်ပြပါရှိပါသည်။

၎

င

၎

၎

၎

င

၎

၎

အမေရိကန် မောင်းသူမဲ့လေယာဉ်ပစ်ချခံရသည့်ကိစ္စနှင့် ပတ်သက်၍ အီရန်နိုင်ငံအပေါ် အမေရိကန် သမ္မတက ခြိမ်းခြောက်ခဲ့ပြီးနောက် ကမ္ဘာ့ရေနံဈေးနှုန်းမှာ ၆% အထိမြင့်တက်သွားခဲ့

အီရန်တော်လှန်ရေးအစောင့်တပ်ဖွဲ့သည် ဟော်မို့စ်ရေလက်ကြားအနီး အီရန်ဝေဟင်ပိုင်နက် ကောင်းကင်ပြင်၌ ပျံသန်းနေသည့် အမေရိကန်မောင်းသူမဲ့ သူလျှိူလေယာဉ်တစ်စီးကို ၂၀၁၉ ခုနှစ်၊ ဇွန်လ (၂၀) ရက် (ကြာသပတေးနေ့) တွင် ပစ်ချခဲ့ရာ ယင်းကိစ္စနှင့်ပတ်သက်၍ အမေရိကန်ပြည်ထောင်စုနှင့် အီရန်နိုင်ငံတို့အကြား တင်းမာမှုများပိုမိုဖြစ်ပေါ်လာခဲ့ကြောင်း၊ အမေရိကန်သမ္မတဒေါ်နယ်ထရန့်က အီရန်နိုင်ငံသည် အလွန်ကြီးမားသော အမှားအယွင်းကိုပြုလုပ်ခဲ့သည်ဟု အီရန်နိုင်ငံအား ခြိမ်းခြောက်ပြောကြားခဲ့ခြင်းနှင့် အမေရိကန်အောက်လွှတ်တော်ရှိထင်ရှား‌သော ရီပတ်ဗလစ်ကန်အမတ်အများစုကလည်း အမေရိကန်အနေဖြင့် အီရန်နိုင်ငံအပေါ် မဖြစ်မနေလက်တုံ့ပြန်ရန် တောင်းဆိုနေခြင်းတို့ကြောင့် အမေရိကန်ပြည်ထောင်စုအနေဖြင့် အီရန်နိုင်ငံအပေါ် စစ်ရေးအရတုံ့ပြန်မှုများ ပြုလုပ်နိုင်သည်ဟူသော ခန့်မှန်းချက်များထွက်ပေါ်လျက်ရှိကြောင်း၊ ထို့ကြောင့် ရေနံအများအပြားထွက်ရှိရာ အရှေ့အလယ်ပိုင်းဒေသ၏ ပထဝီနိုင်ငံရေးအခြေအနေအပေါ်  စိုးရိမ်ပူပန်မှုများနှင့်အတူ ရေနံဈေးနှုန်း များမှာ ဆက်လက်မြင့်တက်သွားခဲ့ကြောင်း သိရှိရပါသည်။
ထို့ပြင် ယခုရက်သတ္တပတ်အတွင်း ကျင်းပခဲ့သည့် အမေရိကန်ဗဟိုဘဏ်အစည်းအဝေး၌ ဘဏ်တိုးနှုန်းကို လာမည့်ဇူလိုင်လမှစတင်၍ လျှော့ချရန်စီစဉ်နေခြင်းကြောင့် အ‌မေရိကန်ဒေါ်လာ တန်ဖိုးကျဆင်းသွားခြင်းသည်လည်း ရေနံဈေးနှုန်းများကို မြင့်တက်စေသည့် အခြားအချက်တစ်ခု ဖြစ်ကြောင်း သိရှိရပါသည်။
အမေရိကန်သမ္မတ၏  ခြိမ်းခြောက်ပြောဆိုချက်ထွက်ပေါ်ပြီးနောက်တွင် ကမ္ဘာ့ရေနံဈေးနှုန်းများမှာ ၆%  မြင့်တက်ခဲ့ပြီး ဇွန်လ(၂၁) ရက် (သောကြာနေ့) နံနက်ပိုင်းတွင်လည်း နယူးယောက်ဈေးကွက်၌ ဇူလိုင်လအတွက် WTI ရေနံစိမ်းတစ်စည်၏ ကြိုတင်ရောင်းဝယ်မှုဈေးနှုန်းမှာ တစ်စည်လျှင် အမေရိကန် ဒေါ်လာ (၅၇.၃၉) သို့လည်းကောင်း၊ လန်ဒန်ဈေးကွက်၌ ဘရန့်ရေနံစိမ်း ကြိုတင်ရောင်းဝယ်မှုဈေးနှုန်းမှာ တစ်စည်လျှင် အမေရိကန်ဒေါ်လာ (၆၄.၈၄) သို့လည်းကောင်း အသီးသီးမြင့်တက်ခဲ့ကြောင်း www. reuters.com အင်တာနက် website တွင် ဖော်ပြပါရှိပါသည်။

အမေရိကန် ဗဟိုဘဏ်အစည်းအဝေးဂယက်ကြောင့် ကမ္ဘာ့ရွှေစေျးမှာ (၅) နှစ်တာကာလအတွင်း အမြင့်ဆုံးသို့ရောက်ရှိလာခဲ့

၂၀၁၉ ခုနှစ်၊ ဇွန်လ (၁၈) ရက်နေ့နှင့် ဇွန်လ (၁၉) ရက်နေ့တို့တွင်ပြုလုပ်ခဲ့သည့် အမေရိကန်ဗဟိုဘဏ်အစည်းအဝေး၌ အမေရိကန်ဗဟိုဘဏ်အနေဖြင့် လက်ရှိကျင့်သုံးနေသော တင်းကြပ်သည့်ငွေကြေးမူဝါဒများကို စွန့်လွှတ်၍ ဘဏ်တိုးနှုန်းအများအပြား လျှော့ချမည့်အစီအစဉ်ကို စတင်လုပ်ဆောင်တော့မည်ဖြစ်ကြောင်း ထုတ်ဖော်ပြသခဲ့သည့်အတွက် ယင်းအစည်းအဝေးအပြီးတွင် ကမ္ဘာ့ရွှေစေျးမှာ (၅) နှစ်တာကာလအတွင်းအမြင့်ဆုံးသို့ ရောက်ရှိသွားခဲ့ကြောင်း သိရှိရပါသည်။

          ဗဟိုဘဏ်အစည်းအဝေးအပြီး ထုတ်ပြန်သည့်ကြေညာချက်၌ ကမ္ဘာတစ်ဝန်းဖြစ်ပေါ်နေသည့် ကုန်သွယ်ရေးတင်းမာမှုများနှင့် စီးပွားရေးကျဆင်းလာမည့် အခြေအနေများကြောင့် ဗဟိုဘဏ်အနေဖြင့်ဘဏ်တိုးနှုန်းကို လာမည့်ဇူလိုင်လမှစတင်၍ လျှော့ချသွားမည်ဟုဖော်ပြထားကြောင်း၊ ဗဟိုဘဏ်အစည်းအဝေး၌ ဗဟိုဘဏ်ကော်မတီဝင် (၁၇) ဦးအနက်(၇) ဦးကဘဏ်တိုးနှုန်းကိုလာမည့်ဇူလိုင်လကုန်၌ လက်ရှိနှုန်းထားမှ  ၀.၂၅%  လျှော့ချပြီး  ၂၀၁၉ ခုနှစ် နှစ်ကုန်ပိုင်းမတိုင်မီ ၀.၅% ထပ်မံ လျှော့ချရန်အဆိုပြုခဲ့ကြကြောင်း၊ ထို့ကြောင့် ဗဟိုဘဏ်အနေဖြင့် ၂၀၁၉ ခုနှစ် လက်ကျန်ကာလများအတွင်းဘဏ်တိုးနှုန်းကို စုစုပေါင်း ၀.၇၅% အထိ လျှော့ချဖွယ်ရှိသောကြောင့် ဗဟိုဘဏ်အစည်းအဝေးအပြီးတွင် အမေရိကန်ဒေါ်လာတန်ဖိုးကျဆင်းကာ ကမ္ဘာ့ရွှေစေျးနှုန်းမှာ (၅) နှစ်တာကာလအတွင်း အမြင့်ဆုံးသို့‌‌ ရောက်ရှိခဲ့ခြင်းဖြစ်ကြောင်းသိရှိရပါသည်။

အမေရိကန် ဗဟိုဘဏ်ဥက္ကဋ္ဌဂျရွန်မီပေါင်ဝယ်လ်သည် တင်းကြပ်သောငွေကြေးမူဝါဒများကို ကျင့်သုံးလိုသူတစ်ဦးဖြစ်ကြောင်း၊ အမေရိကန်သမ္မတဒေါ်နယ်ထရန့်မှာမူ အမေရိကန်နှင့် အခြားစီးပွားရေးအင်အားကြီးနိုင်ငံများအကြား ကုန်သွယ်ရေးတင်းမာမှုများ ဖြစ်ပေါ်နေချိန်တွင် အမေရိကန်ဒေါ်လာတန်ဖိုးအားကောင်းနေပါက ကုန်သွယ်ရေးစစ်ပွဲ၌ အမေရိကန်ပြည်ထောင်စုအထိနာနိုင်သည့်အတွက် ဘဏ်တိုးနှုန်းလျှော့ချရေးကို ၂၀၁၈ ခုနှစ်၊ နိုဝင်ဘာလကတည်းက တောင်းဆိုခဲ့သော်လည်း ဗဟိုဘဏ်ဥက္ကဋ္ဌကလုပ်ဆောင်ပေးခြင်းမရှိသောကြောင့် ဗဟိုဘဏ်ဥက္ကဋ္ဌနေရာကို အပြောင်းအလဲပြုလုပ်ရန် ဆန္ဒရှိနေကြောင်း၊ ယခုကျင်းပခဲ့သည့် ဗဟိုဘဏ်အစည်းအဝေးကာလအတွင်း၌လည်း အမေရိကန်သမ္မတသည် ဗဟိုဘဏ်ဥက္ကဋ္ဌအားရာထူးမှထုတ်ပယ်ရန်အတွက် သမ္မတတစ်ဦးအနေဖြင့် လိုအပ်သည့်အခွင့်အာဏာများနှင့် လုပ်ပိုင်ခွင့်များကို လေ့လာသုံးသပ်နေသည်ဟူသော သတင်းများထွက်ပေါ်ခဲ့ပြီးနောက်တွင် ဗဟိုဘဏ်၏ငွေကြေးမူဝါဒများပြောင်းလဲလာခဲ့ကြောင်းသိရှိရပါသည်။

          ကမ္ဘာ့ရွှေစေျးသည် အမေရိကန်ဗဟိုဘဏ် အစည်းအဝေးပြီးဆုံးသည်နှင့်တပြိုင်နက် ဇွန်လ (၂၀) ရက် (ကြာသပတေးနေ့) နံနက်ပိုင်းတွင် နယူးယောက်စေျးကွက်၌ ၃.၆% မြင့်တက်ပြီးတစ်အောင်စလျှင် အမေရိကန်ဒေါ်လာ (၁၃၉၇.၇၀) ဈေးနှုန်းအထိရောက်ရှိခဲ့ကြောင်း၊ စေျးနှုန်းအဆမတန်မြင့်တက်သွားသည့်အတွက် အမြတ်အစွန်းရလိုမှုကြောင့် အပြိုင်အဆိုင်ရောင်းချလာကြသောကြောင့် နေ့လည်ပိုင်းတွင်မူ ကမ္ဘာ့ရွှေစေျးမှာတစ်အောင်စလျှင် အမေရိကန်ဒေါ်လာ (၁၃၈၂) ဝန်းကျင်သို့ ကျဆင်းသွားခဲ့ကြောင်း၊ အဆိုပါစေျးနှုန်းသည်ပင် ၂၀၁၄ ခုနှစ်နောက်ပိုင်း (၅) နှစ်တာကာလအတွင်း အမြင့်ဆုံးစေျးနှုန်းဖြစ်ကြောင်းwww.bloomberg.com အင်တာနက် website တွင် ဖော်ပြပါရှိပါသည်။

မှတ်ချက်။   ။ အမေရိကန်ဗဟိုဘဏ်၏ လက်ရှိဘဏ်တိုးနှုန်းမှာ ၂.၅၀% ဖြစ်ပါသည်။

အမေရိကန်အစိုးရ၏အရေးယူပိတ်ဆို့မှုကြောင့် ဟွာဝေးကုမ္ပဏီအနေဖြင့်ဝင်ငွေ အမေရိကန်ဒေါ်လာ (၁၀၀) ဘီလီယံခန့် ဆုံးရှုံးနစ်နာဖွယ်ရှိ

အမေရိကန်ပြည်ထောင်စု၏ အရေးယူပိတ်ဆို့မှုကို ကြုံတွေ့နေရသည့်ဂယက်ကြောင့် ဟွာဝေး ကုမ္ပဏီ၏ ထိခိုက်ဆုံးရှုံးမှုမှာ မျှော်မှန်းထားသည်ထက်ပိုမိုနိုင်ပြီး ၂၀၁၉ ခုနှစ်လက်ကျန်ကာလများနှင့် ၂၀၂၀ ခုနှစ် အတွင်း၌ ဝင်ငွေအမေရိကန်ဒေါ်လာ (၁၀၀) ဘီလီယံခန့်ဆုံးရှုံးနစ်နာဖွယ်ရှိသည်ဟု ဟွာဝေး ကုမ္ပဏီ၏ အမှုဆောင်အရာရှိချုပ် ရန်ကျန်းဖေက ၂၀၁၉ ခုနှစ်၊ ဇွန်လ (၁၇) ရက် (တနင်္လာနေ့) တွင် ပြောကြားခဲ့ကြောင်း၊ ဟွာဝေးကုမ္ပဏီ၏ ယခုကြေညာချက်သည် အမေရိကန်ပြည်ထောင်စုနှင့် ဟွာဝေးကုမ္ပဏီတို့ ထိပ်တိုက်ရင်ဆိုင်ပြီးနောက်ပိုင်း ကုမ္ပဏီအနေဖြင့် ၎င်းတို့ဖက်မှဆုံးရှုံးနိုင်သည့်ပမာဏကို ပထမဆုံး အကြိမ်ထုတ်ပြန်ကြေညာခြင်းဖြစ်ကြောင်း သိရှိရပါသည်။
တရုတ်နိုင်ငံ၊ ရှန်ကျန်းမြို့ရှိ ဟွာဝေးရုံးချုပ်တွင် ဟွာဝေးအမှုဆောင်အရာရှိချုပ် ရန်ကျန်းဖေက ပြောကြားရာ၌ အမေရိကန်ပြည်ထောင်စု၏ အရေးယူပိတ်ဆို့မှုကြောင့် ဟွာဝေးကုမ္ပဏီမပြိုကွဲနိုင်ကြောင်း၊ ကုမ္ပဏီအနေဖြင့် ပို၍သန်မာလာအောင်ကြိုးပမ်းဆောင်ရွက်လျက်ရှိကြောင်း၊ ဟွာဝေး၏ဝင်ငွေ ပမာဏသည် ၂၀၁၈ ခုနှစ်အတွင်း၌ အမေရိကန်ဒေါ်လာ (၁၀၄.၁၆) ဘီလီယံခန့်ရှိခဲ့သည့်အတွက် ၂၀၁၇ ခုနှစ် ဝင်ငွေထက် ၁၉.၅% ပိုမိုလာခဲ့ကြောင်း၊ သို့သော် ယခုနှစ်တွင်မူ လက်ရှိရင်ဆိုင်နေရသည့်ပြဿနာများကြောင့် နိုင်ငံတကာဈေးကွက်အတွင်း ဟွာဝေးစမတ်ဖုန်းများရောင်းချရမှုမှာ ၄၀%အထိ ကျဆင်း နိုင်ဖွယ်ရှိသည့်အတွက် ဝင်ငွေဆုံးရှုံးမှုများဖြစ်ပေါ်လာနိုင်ကြောင်း၊ ထို့ကြောင့် ကုမ္ပဏီအနေဖြင့် စမတ်ဖုန်း ထုတ်လုပ်မှုကုန်ကျစရိတ်ကို လာမည့် (၂) နှစ်တာကာလအတွင်း အမေရိကန်ဒေါ်လာ (၃၀) ဘီလီယံခန့်အထိ လျှော့ချသွားရန်စီစဉ်ထားကြောင်း၊ အဆိုပါ (၂) နှစ်တာကာလအတွင်း၌ ဟွာဝေးကုမ္ပဏီ၏ တိုးတက်မှုနှုန်းမှာနှေးကွေးနေမည်ဖြစ်ကြောင်း၊ ကုမ္ပဏီအနေဖြင့် အမေရိကန်ကုမ္ပဏီများထံမှ လိုအပ်သောပစ္စည်း အစိတ်အပိုင်းများကို ဝယ်ယူနိုင်မည်မဟုတ်သကဲ့သို့ အမေရိကန်တက္ကသိုလ်များနှင့်လည်း သုတေသနလုပ်ငန်းများကို နီးကပ်စွာလုပ်ကိုင်နိုင်တော့မည် မဟုတ်ကြောင်း၊ သို့သော် ဟွာဝေးကုမ္ပဏီသည် ၂၀၂၁ ခုနှစ်တွင်မူ အောင်မြင်မှုပြန်လည်ရရှိကာ ဆက်သွယ်ရေးဝန်ဆောင်မှုများကို ပိုမိုပြုလုပ်ပေးနိုင်လိမ့်မည် ဖြစ်ကြောင်း၊ ကုမ္ပဏီအနေဖြင့် ဝင်ငွေမည်မျှပင်ဆုံးရှုံးထိခိုက်စေကာမူ အောင်မြင်မှုရရှိစေရန်အတွက် သုတေသနအသုံးစရိတ်များအား ဖြတ်တောက်သွားမည်မဟုတ်ဟု ပြောကြားခဲ့ကြောင်း သိရှိရပါသည်။

ဟွာဝေးသည် အသစ်ဖန်တီးထုတ်လုပ်ထားသော Honor 20 စမတ်ဖုန်းများကို ယခုရက်သတ္တပတ်အတွင်း၌ ဗြိတိန်နှင့် ပြင်သစ်အပါအဝင် ဥရောပဈေးကွက်အတွင်း၌ စတင်ရောင်းချမည်ဖြစ်ရာ ကုမ္ပဏီ တာဝန်ရှိသူများသည် အဆိုပါဖုန်းများ ရောင်းချရမှုအနေအထားကို အထူးဂရုပြုစောင့်ကြည့်သွားမည်ဖြစ်ပြီး ရောင်းအားများပြားခြင်းမရှိပါက ဖုန်းထုတ်လုပ်မှုကိုလျှော့ချသွားရန် စီစဉ်ထားကြောင်း၊ ဟွာဝေး၏ဈေးကွက်လေ့လာရေးနှင့် အရောင်းမန်နေဂျာများ၏ ခန့်မှန်းချက်အရ ယခုနှစ်၌ နိုင်ငံတကာ ဈေးကွက်အတွင်း ဟွာဝေးစမတ်ဖုန်းများရောင်းချရမှုအနေအထားမှာ ယခင်နှစ်များတွင် ရောင်းချခဲ့ရသည့်ပမာဏအောက် အလုံးရေ (၄၀) သန်းမှ (၆၀) သန်းအထိ ကျဆင်းသွားနိုင်ကြောင်း၊ ဟွာဝေးသည် ယခုအခါ တရုတ်ပြည်တွင်း ဈေးကွက်၌ ရောင်းအားမြှင့်တင်နိုင်ရန်စီစဉ်နေကြောင်း၊ ၂၀၁၈ ခုနှစ်၌ ကမ္ဘာတစ်ဝန်းတွင် ဟွာဝေးစမတ်ဖုန်းအရေအတွက် (၂၀၆) သန်းရောင်းချခဲ့ရာ ထက်ဝက်ခန့်ကို တရုတ်ပြည်မကြီးအတွင်းမှ ဝယ်ယူသုံးစွဲကြခြင်းဖြစ်သည်ဟု သိရှိရကြောင်း www.channelnewsasia. com အင်တာနက် website တွင် ဖော်ပြပါရှိပါသည်။