အရှေ့အလယ်ပိုင်းဒေသအတွင်း ရေနံတင်သင်္ဘောများ၏ လမ်းကြောင်းလုံခြုံရေးအတွက် နည်းလမ်းမျိုးစုံ အသုံးပြုမည်ဟု အမေရိကန်နိုင်ငံခြားရေးဝန်ကြီးက ပြောကြားခဲ့ပြီးနောက် ကမ္ဘာ့ရေနံဈေးနှုန်းများ ဆက်လက်မြင့်တက်ခဲ့

အမေရိကန်နိုင်ငံခြားရေးဝန်ကြီး မိုက်ပွန်ပီယိုသည် ၂၀၁၉ ခုနှစ်၊ ဇွန်လ (၁၆) ရက် (တနင်္ဂနွေနေ့) တွင် သတင်းထောက်များနှင့်တွေ့ဆုံရာ၌ အရှေ့အလယ်ပိုင်းဒေသအတွင်း ရေနံတင်သင်္ဘောများ တိုက်ခိုက်ခံနေရသည့်ကိစ္စနှင့်ပတ်သက်၍ အီရန်နိုင်ငံအပေါ် စွပ်စွဲပြောကြားခဲ့ပြီး ရေနံတင်သင်္ဘောများ ဘေးအန္တရာယ်ကင်းရှင်းစွ ာသွားလာနိုင်ရေးအတွက် အမေရိကန်ပြည်ထောင်စုက ကာကွယ်ပေးသွားမည်ဟု ပြောကြားခဲ့ကြောင်း၊ မိုက်ပွန်ပီယိုက ပြောကြားရာ၌ ရေနံတင်သင်္ဘောများ တိုက်ခိုက်ခံရသည့်ကိစ္စသည် တကမ္ဘာလုံးနှင့်သက်ဆိုင်သည့် နိုင်ငံတကာပြဿနာရပ်တစ်ခုဖြစ်ကြောင်း၊ ထို့ကြောင့် အမေရိကန်ပြည်ထောင်စုသည် ယင်းပြဿနာကို ဖြေရှင်းနိုင်ရန်အတွက် သံတမန်ရေးနည်းလမ်းကို သာမကလိုအပ်ပါက အခြားနည်းလမ်းမျိုးစုံကိုပါ အသုံးပြုသွားမည်ဟု ပြောကြားခဲ့ကြောင်း သိရှိရပါသည်။
အီရန်နှင့် အမေရိကန်ပြည်ထောင်စုတို့အကြား တင်းမာမှုများဖြစ်ပေါ်နေသော ဟော်မို့ဇ်ရေ လက်ကြားသည် ကမ္ဘာတစ်ဝန်းသုံးစွဲနေသည့် ရေနံပမာဏ၏သုံးပုံတစ်ပုံခန့်ကို ရေနံတင်သင်္ဘောများက ဖြတ်သန်း သယ်ဆောင်နေသည့် လမ်းကြောင်းဖြစ်ကြောင်း၊ ထို့ကြောင့် မိုက်ပွန်ပီယို၏ ပြောကြားချက် ထွက်ပေါ်ပြီးနောက်တွင် ရေနံသယ်ဆောင်ရာလမ်းကြောင်း၌ စစ်မက်ဖြစ်ပွားလာမည့် အရေးအပေါ် စိုးရိမ်ပူပန်မှုများကြောင့် ရေနံဈေးနှုန်းများ ဆက်လက်မြင့်တက်လာခဲ့ကြောင်း သိရှိရပါသည်။
၂၀၁၉ ခုနှစ်၊ ဇွန်လ (၁၇) ရက် (တနင်္လာနေ့) နံနက်ပိုင်းတွင် နယူးယောက်ဈေးကွက်၌ ဇူလိုင်လ အတွက် WTI ရေနံစိမ်းကြိုတင်ရောင်းဝယ်မှုဈေးနှုန်းမှာ ၀.၄% မြင့်တက်ခဲ့ပြီး တစ်စည်လျှင် အမေရိ ကန်ဒေါ်လာ (၅၂.၆၉) သို့ရောက်ရှိခဲ့ကြောင်း၊ လန်ဒန်ဈေးကွက်၌ ဘရန့်ရေနံစိမ်း ကြိုတင်ရောင်း ဝယ် မှုဈေးနှုန်းမှာလည်း ၀.၄% မြင့်တက်ခဲ့ပြီး တစ်စည်လျှင် အမေရိကန်ဒေါ်လာ (၆၂.၂၈) သို့ရောက်ရှိခဲ့ ကြောင်း www.reuters.com အင်တာနက် website တွင် ဖော်ပြပါရှိပါသည်။

ထိုင်းနိုင်ငံတောင်ပိုင်း၌ ဘင်္ဂါလီဒုက္ခသည်သင်္ဘောတစ်စီးတွေ့ရှိခဲ့ပြီးနောက်တွင် မလေးရှားအာဏာပိုင်များသည် ဒုက္ခသည်များဝင်ရောက်လာခြင်းမရှိစေရန်အတွက် ထိုင်း _ မလေးရှားနယ်စပ်တစ်လျှောက်၌ လုံခြုံရေးတင်းကြပ်စွာချထား

ထိုင်းနိုင်ငံတောင်ပိုင်း ဆက်တန်ပြည်နယ် ပင်လယ်ကမ်းခြေတွင် သောင်တင်နေသည့် သင်္ဘောတစ်စီးပေါ်၌ မလေးရှားနိုင်ငံသို့သွားရောက်မည့် ဘင်္ဂါလီဒုက္ခသည် (၆၅) ဦးအား ထိုင်းရဲတပ်ဖွဲ့က ယခုရက်သတ္တပတ်အတွင်း ဖမ်းဆီးရမိခဲ့ပြိးနောက်တွင် မလေးရှားအာဏာပိုင်များသည် လှေစီးဘင်္ဂါလီ ဒုက္ခသည်များ မလေးရှားနိုင်ငံအတွင်းသို့ ဝင်ရောက်လာမည့်အရေးကို ကာကွယ်နိုင်ရန်အတွက် ထိုင်းနှင့်မလေးရှားနယ်စပ်တစ်လျှောက်၌ လုံခြုံရေးအင်အား တိုးမြှင့်ချထားလျက်ရှိကြောင်း သိရှိရပါသည်။
ကုလသမဂ္ဂဒုက္ခသည်များဆိုင်ရာ မဟာမင်းကြီးရုံး (UNHCR) ၏ စာရင်းအချက်အလက်များအရ မလေးရှားနိုင်ငံတွင် တရားဝင်ခိုလှုံခွင့်ရရှိထားသည့် ဘင်္ဂါလီဒုက္ခသည်အရေအတွက်မှာ (၂၄၇၂၀) ဦး ခန့်ရှိပြီး မလေးရှားနိုင်ငံသည် ဘင်္ဂါလီဒုက္ခသည်များ၏ဦးစားပေးသွားရောက်ရာ နေရာတစ်ခုအဖြစ် ရပ်တည်နေသည်ဟု သိရှိရကြောင်း၊ မလေးရှားကမ်းခြေစောင့်ရဲတပ်ဖွဲ့၊ အကောက်ခွန်ဌာနတာဝန် ရှိသူများနှင့် နယ်ခြားစောင့်တပ်ဖွဲ့ဝင်များသည် ၂၀၁၉ ခုနှစ်၊ ဇွန်လ (၁၃) ရက် (ကြာသပတေးနေ့) မှ စတင်၍ ထိုင်း-မလေးရှားနယ်စပ်တစ်လျှောက်၌ အထူးဂရုပြုစောင့်ကြည့်မှုများပြုလုပ်လျက်ရှိကြောင်း သိရှိရပါသည်။
ထိုင်းဝန်ကြီးချုပ် ပရာယုချန်အိုချာသည် ထိုင်းနိုင်ငံတောင်ပိုင်းတွင် တွေ့ရှိခဲ့သော ဘင်္ဂါလီဒုက္ခသည် သင်္ဘောကိစ္စနှင့်ပတ်သက်၍ အသေးစိတ်စုံစမ်းစစ်ဆေးရန် ထိုင်းရဲတပ်ဖွဲ့အား ညွှန်ကြားထားပြီး ဒုက္ခသည်များ၌ ကူးစက်ရောဂါများပါလာခြင်း ရှိ/ မရှိ စစ်ဆေးရန်နှင့် လူသားချင်းစာနာ ထောက်ထားမှုဆိုင်ရာ အကူအညီများပေးအပ်ထားရန် ကျန်းမာရေးဝန်ကြီးဌာန တာဝန်ရှိသူများအား ညွှန်ကြားထားကြောင်း၊ ထိုင်းရဲတပ်ဖွဲ့ရဲချုပ် ရဲဗိုလ်ချုပ်ကြီး ဆူချပ်သီရာဆာဝပ်သည် ဒုက္ခသည်များ လာရောက်ခဲ့သော လမ်းကြောင်းတစ်လျှောက်အား ရဟတ်ယာဉ်ဖြင့် လိုက်လံကြည့်ရှုခဲ့ပြီး အခြားသော ဒုက္ခသည်လှေများ ရှိ/ မရှိကိုပါ ရဲတပ်ဖွဲ့က လိုက်လံရှာဖွေလျက်ရှိကြောင်း၊ ရဲတပ်ဖွဲ့သည် သောင်တင်နေသည့်ဒုက္ခသည်သင်္ဘောမှ ထိုင်းနိုင်ငံသားမာလိန်မှူးနှင့် မြန်မာနိုင်ငံသား (၅) ဦးတို့ကို လူကုန်ကူးမှု ဖြင့်တရားစွဲဆိုရန်စီစဉ်နေကြောင်း www.nationmultimedia.com အင်တာနက် website တွင် ဖော်ပြပါရှိပါသည်။

အမေရိကန်ပြည်ထောင်စု၏ အရေးယူပိတ်ဆို့မှုများကြောင့် ဗင်နီဇွဲလားနိုင်ငံ၌ ငွေကြေးဖောင်းပွမှုနှုန်း အလွန်အမင်းမြင့်မားခဲ့ပြီးနောက်တွင် ဗင်နီဇွဲလားဗဟိုဘဏ်သည် တန်ဖိုးမြင့်မားသောငွေစက္ကူအသစ် (၃) မျိုးကို ထုတ်ဝေခဲ့

အမေရိကန်ပြည်ထောင်စု၏ အရေးယူပိတ်ဆို့မှုများကြောင့် ဗင်နီဇွဲလားနိုင်ငံ၌ ငွေကြေးဖောင်းပွမှုနှုန်း အလွန်အကျွံမြင့်တက်လျက်ရှိခြင်းနှင့်အတူ နိုင်ငံသုံးငွေကြေးတန်ဖိုးကျဆင်းနေပြီး ငွေပေးချေမှု အခက်အခဲများဖြစ်ပေါ်လျက်ရှိသည့်အတွက် ဗင်နီဇွဲလားဗဟိုဘဏ်သည် တန်ဖိုးပမာဏမြင့်မားသော နိုင်ငံသုံးဘိုလီဗာငွေစက္ကူအသစ် (၃) မျိုးကို ၂၀၁၉ ခုနှစ်၊ ဇွန်လ (၁၃) ရက် (ကြာသပတေးနေ့) တွင် စတင်ထုတ်ဝေခဲ့သည်ဟု ဗင်နီဇွဲလားဗဟိုဘဏ်၏ တရားဝင် website ၌ ရေးသားဖော်ပြထားကြောင်း သိရှိရပါသည်။
လက်ရှိအချိန်တွင် ဗင်နီဇွဲလားနိုင်ငံ၌ သုံးစွဲနေသော နိုင်ငံသုံးဘိုလီဗာငွေစက္ကူများအနက် တန်ဖိုးအမြင့်ဆုံးမှာ (၅၀၀) တန် ငွေစက္ကူသာရှိကြောင်း၊ ဗင်နီဇွဲလားအစိုးရမှ နောက်ဆုံးထုတ်ပြန်ခဲ့သည့် အစီရင်ခံစာအရ ဗင်နီဇွဲလားနိုင်ငံ၏ လစဉ်ငွေကြေးဖောင်းပွမှုနှုန်းမှာ ၃၄% အထက်တွင် ဖြစ်ပေါ်လျက် ရှိသည်ဟု သိရှိရကြောင်း၊ ဗင်နီဇွဲလားနိုင်ငံ၌ ငွေကြေးဖောင်းပွမှုနှုန်း အလွန်အကျွံမြင့်မားနေခြင်းကြောင့် ငွေစက္ကူကိုင်ဆောင်အသုံးပြုသူများအတွက် သာမန်ငွေပေးချေမှုကိစ္စများ၌ပင်လျှင် ငေွစက္ကူအများပြားကို ကိုင်ဆောင်အသုံးပြုပေးချေနေရပြီး နိုင်ငံတစ်ဝန်းရှိ ပင်စင်စားများနှင့် စားသုံးသူပြည်သူများမှာ ဘဏ်များနှင့် ATM ငွေထုတ်စက်များတွင် အကြိမ်ကြိမ်အခါခါ ငွေထုတ်ယူရမှုများ၊ တန်းစီ စောင့်ဆိုင်းရသည့်အခက်အခဲများကို ကြုံတွေ့နေရကြောင်း သိရှိရပါသည်။
ထို့ကြောင့် ဗင်နီဇွဲလားပြည်သူများသည် ကုန်စည်နှင့်ဝန်ဆောင်မှုများအတွက် ငွေပေးချေမှုများပြုလုပ်ရာ၌ ငွေသားဖြင့်ပေးချေခြင်းမပြုတော့ဘဲ ငွေပေးချေကတ် (Debit Card) နှင့်ကြွေးဝယ်ကတ် (Credit Card) တို့ကို အသုံးပြု၍ဖြစ်စေ၊ အွန်လိုင်းငွေပေးချေမှုစနစ်ကို အသုံးပြု၍ဖြစ်စေငွေပေးချေမှုများ ပြုလုပ်လျက်ရှိကြကြောင်း၊ သို့ဖြစ်ရာ ဗင်နီဇွဲလားနိုင်ငံသုံး ဘိုလီဗာငွေကြေးမှာ များစွာအသုံးမဝင် တော့သည့် အနေအထားသို့ဆိုက်ရောက်သွားခဲ့ပြီး နိုင်ငံသုံးငွေကြေးအစား အမေရိကန်ဒေါ်လာနှင့် အခြားသောတန်ဖိုးခိုင်မာသည့်ငွေကြေးများကို ပြောင်းလဲအသုံးပြုလျက်ရှိကြကြောင်း၊ ထို့ကြောင့် ငွေပေးချေမှုများအတွက် ပိုမိုထိရောက်မှုရှိစေရန်၊ စီးပွားရေးလုပ်ငန်းငွေပေးချေမှုများအဆင်ပြေချောမွေ့ စေရန်နှင့် ငွေစက္ကူအများအပြား ကိုင်ဆောင်အသုံးပြုရမှု သက်သာစေရန်တို့အတွက် နိုင်ငံသုံးဘိုလီဗာ ငွေစက္ကူများ၏ တန်ဖိုးသိပ်သည်းမှုကိုတိုးမြှင့်ကာ ငွေစက္ကူအသစ် (၁) သောင်းတန်၊ (၂) သောင်းတန်နှင့် (၅၀၀၀) တန် ငွေစက္ကူများကို ၂၀၁၉ ခုနှစ်၊ ဇွန်လ (၁၃) ရက်နေ့တွင် စတင်ထုတ်ဝေခဲ့သည်ဟု ဗင်နီဇွဲလား ဗဟိုဘဏ်၏ တရားဝင် website တွင် ရေးသားဖော်ပြထားကြောင်း၊ သို့သော် ဗင်နီဇွဲလားဗဟိုဘဏ်၏ website တွင် အဆိုပါတန်ဖိုးမြင့်မားသော ငွေစက္ကူအသစ်များထုတ်ဝေကြောင်းမှအပ အခြားသော အသေးစိတ်အချက်အလက်များကိုမူ ရေးသားဖော်ပြထားခြင်းမရှိကြောင်း သိရှိရပါသည်။
ဗင်နီဇွဲလားနိုင်ငံသည် ရေနံအများအပြား ထွက်ရှိသောနိုင်ငံဖြစ်သော်လည်း အမေရိကန်ပြည်ထောင်စု၏ အရေးယူပိတ်ဆို့မှုများကို ကြုံတွေ့နေရသည့်အတွက် စီးပွားရေးအကျပ်အတည်းများကို ရင်ဆိုင်နေရပြီး ယခုကဲ့သို့ငွေကြေးဖောင်းပွမှုနှုန်း အလွန်အမင်းမြင့်တက်လာကာ ငွေကြေးတန်ဖိုး အဆမတန်ကျဆင်းသွားသည့် ပြဿနာကို ရင်ဆိုင်နေရခြင်းဖြစ်ကြောင်း  www.bloomberg.com  အင်တာနက် website တွင် ဖော်ပြပါရှိပါသည်။

ဟောင်ကောင်နိုင်ငံတွင်ဖြစ်ပေါ်နေသော ဆန္ဒပြမှုများကြောင့် ဟောင်ကောင်စတော့ရှယ်ယာ တန်ဖိုးများ သာမကအာရှစတော့ရှယ်ယာတန်ဖိုးများပါ လိုက်ပါကျဆင်းခဲ့မှု

ရာဇဝတ်မှုကျူးလွန်သူများနှင့်  သံသယရှိသူဟောင်ကောင်ဒေသခံများအား တရုတ်နိုင်ငံသို့ လွှဲပြောင်းပေးရမည့် တရားခံလွှဲပြောင်းရေးဥပဒေမူကြမ်းနှင့်ပတ်သက်၍ ဟောင်ကောင်၌ ပြဌာန်းမည့်အပေါ်ကျေနပ်မှုမရှိသော ဟောင်ကောင်ဒေသခံသိန်းပေါင်းများစွာသည် ဟောင်ကောင်ရှိ အဓိကနေရာများစွာကို ပိတ်ဆို့ဆန္ဒပြခဲ့ပြီးနောက် ၂၀၁၉ခုနှစ်၊ ဇွန်လ(၁၂)ရက်(ဗုဒ္ဓဟူးနေ့)၌ ပါလီမန် အဆောက်အဦအတွင်းသို့ ထိုးဖောက်ဝင်ရောက်ရန်ကြိုးစားခဲ့သည့်အတွက် ဆန္ဒပြသူများနှင့်ဟောင်ကောင်ရဲတပ်ဖွဲ့တို့အကြားအပြန်အလှန်အကြမ်းဖက်တိုက်ခိုက်မှုများဖြစ်ပွားခဲ့ကြောင်းသိရှိရပါသည်။

ဟောင်ကောင်သည် ၁၉၉၇ ခုနှစ်တွင် အင်္ဂလိပ်ကိုလိုနီအဖြစ်မှ တရုတ်နိုင်ငံ၏အုပ်ချုပ်မှုအောက်သို့ ပြန်လည်ရောက်ရှိ်ခဲ့သောလည်း တရုတ်အစိုးရကဟောင်ကောင်ကျွန်းအား ၁၉၉၇ ခုနှစ် မှစ၍ နှစ်ပေါင်း(၅၀)အထိကိုယ်ပိုင်အုပ်ချုပ်ခွင့်ရဒေသအဖြစ်နှင့်သာမကကိုယ်ပိုင်လွတ်လပ်သော တရားစီရင်ရေးစနစ်ကိုပါ ဆက်လက်ကျင့်သုံးခွင့်ပေးထားမည်ဟု သဘောတူညီခဲ့ကြောင်း၊ သို့သော် ယခုအခါ တရုတ်အစိုးရသည် တရားခံလွဲပြောင်းရေးဥပဒေကိုဟောင်ကောင်၌ ပြဌာန်းရန်စီစဉ်နေသည့်အတွက် ဟောင်ကောင်၏တရားရေးစနစ်အပေါ် တရုတ်အစိုးရက စတင်ဝင်ရောက်စွက်ဖက်မှုများ ပြုလုပ်လာသည်ဟူ၍ ဟောင်ကောင်ဒေသခံများက ယူဆသောကြောင့် ဆန္ဒပြပွဲများပေါ်ပေါက်လာခြင်းဖြစ်ကြောင်း၊ ဆန္ဒပြပွဲတွင်ပါဝင်သည့်လူဦးရေမှာ (၁)သန်းခန့်ရှိသောကြောင့် ဟောင်ကောင်တွင် နေထိုင်သည့်လူဦးရေစုစုပေါင်းပမာဏ၏ ၇ ပုံ ၁ ပုံခန်ရှိကြောင်း၊ နိုင်ငံတကာရင်းနှီးမြှုပ်နှံသူများသည် ယခင်ကဟောင်ကောင်၏ အုပ်ချုပ်ရေးစနစ်နှင့်တရားစီရင်ရေးစနစ်တို့ လွတ်လပ်မှုရှိသည့်အပေါ် ယုံကြည်စိတ်ချသည့်အတွက် ဟောင်ကောင်၌ ရင်းနှီးမြှုပ်နှံမှုအများအပြားလာရောက်ပြုလုပ်ခဲ့သော်လည်း ယခုအခါ တရုတ်အစိုးရ၏ချုပ်ကိုင်မှုများရှိလာမည့်အပေါ် စိုးရိမ်ပူပန်မှုများကြောင့် ဟောင်ကောင်အစား စင်ကာပူအပါအဝင် အခြားနိုင်ငံများသို့ ရင်းနှီးမြှုပ်နှံမှုများပြောင်းရွှေ့ရန် စတင်စဉ်းစားနေပြီဖြစ်ကြောင်းသိရှိရပါသည်။

ဟောင်ကောင်ဖြစ်ပွားနေသောဆန္ဒပြပွဲများနှင့် နိုင်ငံခြားရင်းနှီးမြှုပ်နှံမှုများ လျော့နည်းသွားနိုင်သည့် အခြေအနေများကြောင့် ဟောင်ကောင် စတော့ရှယ်ယာစေျးနှုန်းများမှာ ဆက်တိုက်ကျဆင်းလျက်ရှိကြောင်း၊ ဟောင်ကောင်စတော့အိတ်ချိန်းတွင် စတော့ရှယ်ယာစေျးနှုန်းများသည် ၂၀၁၉ ခုနှှစ်  ဇွန်လ(၁၂)ရက်(ဗုဒ္ဓဟူးနေ့)၌ ၁.၇ % ကျဆင်းခဲ့ပြီး ၂၀၁၉ ခုနှစ်၊ ဇွန်လ(၁၃)ရက်(ကြာသပတေးနေ့)တွင် ၁.၅% ကျဆင်းခဲ့ကြောင်း၊ အထူးသဖြင့် ဟောင်ကောင်၏ အိမ်၊ ခြံ၊ မြေရင်းနှီးမြှုပ်နှံမှုနှင့် ပတ်သက်သောကုမ္ပဏီများ၏ ရှယ်ယာစေျးနှုန်းများမှာ ၄.၂% မှ ၅.၄% အထိကျဆင်းခဲ့ကြောင်း၊ ဟောင်ကောင်ရှယ်ယာများ ကျဆင်းခြင်းနှင့်အတူ ဇွန်လ(၁၃)ရက်(ကြာသပတေးနေ့)၌ ဂျပန်စတော့ရှယ်ယာ စေျးနှုန်းများမှာ ၀.၈%၊ ကိုးရီးယားစတော့ရှယ်ယာတန်ဖိုးများမှာ ၀.၂၇%၊ ထိုင်ဝမ်စတော့ရှယ်ယာတန်ဖိုးမှာ ၀.၅၁%၊ ဩစတြေးလျစတော့ရှယ်ယာတန်ဖိုးများမှာ ၀.၀၂% အသီးသီးလိုက်ပါ ကျဆင်းခဲ့ကြောင်း www.cnn.com အင်တာနက် website တွင် ဖော်ပြပါရှိပါသည်။

မြောက်ကိုရီးယားခေါင်းဆောင် ကင်ဂျုံအန်၏အစ်ကိုဖြစ်သူ ကင်ဂျုံနမ် (ကွယ်လွန်) မှာအမေရိကန် CIA ၏သတင်းပေးဖြစ်သည်ဟု အမေရိကန်သတင်းမီဒီယာများက ထုတ်ဖော်ရေးသားခဲ့

မြောက်ကိုရီးယားခေါင်းဆောင် ကင်ဂျုံအန်၏ အစ်ကိုဖြစ်ပြီး ၂၀၁၇ ခုနှစ်အတွင်းမလေးရှားနိုင်ငံ၊ ကွာလာလမ်ပူလေဆိပ်၌ လုပ်ကြံခံခဲ့ရသည့် မြောက်ကိုရီးယားနိုင်ငံသားကင်ဂျုံနမ်မှာ အမေရိကန်ပြည်ထောင်စုဗဟိုထောက်လှမ်းရေးအေဂျင်စီ (Central Intelligence Agency – CIA) ၏သတင်းပေးဖြစ်သည်ဟု ဩဇာကြီးမားသည့် သတင်းမီဒီယာတစ်ခုဖြစ်သော အမေရိကန်ပြည်ထောင်စု Wall Street Journal သတင်းဌာနက၂၀၁၉ ခုနှစ်၊ ဇွန်လ (၁၀) ရက် (တနင်္လာနေ့) တွင် ရေးသားဖော်ပြခဲ့ကြောင်း၊ ကင်ဂျုံနမ်သည် CIA၏ သတင်းပေးဖြစ်ကြောင်းနှင့် CIAအတွက် ကင်ဂျုံနမ်က ဆောင်ရွက်ပေးခဲ့သည့် အသေးစိတ်သတင်းအချက်အလက်များကို ၎င်းနှင့် ချိတ်ဆက်အလုပ်လုပ်ကိုင်ဖူးသည့် ပုဂ္ဂိုလ်တစ်ဦးက Wall Street Journal သတင်းဌာနသို့ ထုတ်ဖော်ပြောကြားခဲ့ခြင်းဖြစ်ကြောင်း သိရှိရပါသည်။

Wall Street Journal သတင်းဌာန၏ ရေးသားဖော်ပြချက်အရ  CIA နှင့် ကင်ဂျုံနမ်တို့အကြားတွင်ဆက်နွယ်မှုများစွာရှိခဲ့ကြောင်း၊ ထို့ပြင် ကင်ဂျုံနမ်သည်CIAနှင့် သာမကတရုတ်ထောက်လှမ်းရေးအပါအဝင် အခြားနိုင်ငံများမှ ထောက်လှမ်းရေးအဖွဲ့များနှင့်လည်းဆက်နွယ်မှုများရှိခဲ့ကြောင်း၊ မြောက်ကိုရီးယားနိုင်ငံ၏ ပြင်ပ၌နေထိုင်ခဲ့သူကင်ဂျုံနမ်သည် ၂၀၁၇ ခုနှစ်၊ ဖေဖော်ဝါရီလတွင် CIA မှ စေလွှတ်လိုက်သည့် အဆက်အသွယ်များနှင့် မလေးရှားနိုင်ငံ၌တွေ့ဆုံအပြီး မလေးရှားနိုင်ငံမှ ပြန်လည်ထွက်ခွာစဉ် ကွာလာလမ်ပူအပြည်ပြည်ဆိုင်ရာလေဆိပ်၌ အဆိပ်ဓာတ်ငွေ့ဖြင့် လုပ်ကြံသတ်ဖြတ်ခံခဲ့ရခြင်းဖြစ်သည်ဟု သိရှိရပါသည်။

အလားတူအမေရိကန်ပြည်ထောင်စုအခြေစိုက် Washington Postသတင်းဌာန၏ တရုတ်နိုင်ငံ၊ ဘေကျင်းမြို့အခြေစိုက်ရုံးခွဲအကြီးအကဲအန်နာဖစ်ဖ်ဖီးလ် ရေးသားထုတ်ဝေသည့် The Great Successor စာအုပ်တွင်လည်းကင်ဂျုံနမ်သည် CIA ၏ သတင်းပေးဖြစ်ပြီးကင်ဂျုံနမ်သည် စင်ကာပူနှင့်မလေးရှားနိုင်ငံတို့တွင် CIAအဆက်အသွယ်များနှင့် မကြာခဏတွေ့ဆုံကာ မြောက်ကိုရီးယားနိုင်ငံအတွင်းရေးနှင့်ပတ်သက်သည့်သတင်းများကို ပေးအပ်လေ့ရှိကြောင်းကို CIA အသိုက်အဝန်းထံမှ သိရှိရသည်ဟု ရေးသားထားကြောင်းwww.theguardian.com အင်တာနက် website တွင်ဖော်ပြပါရှိပါသည်။