စင်ကာပူဗဟိုဘဏ်သည် စင်ကာပူကျွန်းနှစ်(၂၀၀)ပြည့်အထိမ်းအမှတ်အဖြစ် စင်ကာပူဒေါ်လာ(၂၀)တန် ငွေစက္ကူအသစ်ကိုအမှတ်တရထုတ်ဝေမှု

စင်ကာပူကျွန်းအား အင်္ဂလိပ်ပိုင် အရှေ့အိန္ဒိယကုမ္ပဏီမှ ဆာစတန်ဖို့ဒ်ရပ်ဖ်ဖဲလ်စ်က ၁၈၁၉ ခုနှစ်တွင် ကုန်သွယ်ရေးအချက်အချာနေရာတစ်ခုအဖြစ် စတင်အသုံးပြုခဲ့ရာ ယခုနှစ်သည် ကမ္ဘာ့ကုန်သွယ်ရေး၌ စင်ကာပူကျွန်း၏ အဓိကအခန်းကဏ္ဍ ပါဝင်လာသည့် နှစ်ပေါင်း(၂၀၀)ပြည့်မြောက်သောနှစ်ပင်ဖြစ်ကြောင်း၊ စင်ကာပူဗဟိုဘဏ်သည် အဆိုပါနှစ်(၂၀၀)ပြည့် အထိမ်းအမှတ်အဖြစ် စင်ကာပူ ဒေါ်လာ(၂၀)တန် ငွေစက္ကူအသစ်ကို အမှတ်တရထုတ်ဝေရန် စီစဉ်ထားသည်ဟု စင်ကာပူသမ္မတ ဟာလီမာယာကော့က ၂၀၁၉ ခုနှစ်၊ ဇွန်လ(၅)ရက် (ဗုဒ္ဓဟူးနေ့)တွင်ကြေညာခဲ့ကြောင်းသိရှိရပါသည်။

စင်ကာပူဗဟိုဘဏ်ကနှစ်(၂၀၀)ပြည့်အမှတ်တရထုတ်ဝေမည့် စင်ကာပူဒေါ်လာ(၂၀)တန် ငွေစက္ကူ၏ ရှေ့ဘက်ခြမ်းတွင် စင်ကာပူနိုင်ငံ၏ ပထမဦးဆုံးသမ္မတမစ္စတာယူဆွတ်အီရှတ်၏ ရုပ်ပုံနှင့်အတူ ယခင်ကတရားရုံးချုပ်နှင့် မြို့တော်ခန်းမအဖြစ်အသုံးပြုခဲ့ပြီးယခုအခါ စင်ကာပူအမျိုးသားပြတိုက် အဖြစ်သို့ရောက်ရှိနေသည့် အဆောက်အဦ၏ပုံကိုထည့်သွင်းရိုက်နှိပ်ထားကြောင်း၊ အဆိုပါ ငွေစက္ကူ၏ နောက်ကျောဘက်ခြမ်းတွင် စင်ကာပူနိုင်ငံကိုစတင်တည်ထောင်စဉ်အချိန်ကပညာရေး၊ ယဉ်ကျေးမှု၊ လူမှုရေး၊ အားကစားနှင့် ကာကွယ်ရေးအပါအဝင် ကဏ္ဍမျိုးစုံတို့၌ စွမ်းစွမ်းတမံဆောင်ရွက် ခဲ့ကြသည့်ပုဂ္ဂိုလ်ကြီး(၈)ဦး၏ရုပ်ပုံများကိုထည့်သွင်းထားကြောင်းသိရှိရပါသည်။

စင်ကာပူနိုင်ငံ၌ လက်ရှိသုံးစွဲနေသောစင်ကာပူဒေါ်လာ(၂၀)တန်ငွေစက္ကူရှိပြီးဖြစ်သောကြောင့် စင်ကာပူဗဟိုဘဏ်သည် နှစ်(၂၀၀)ပြည့်အမှတ်တရထုတ်ဝေမည့် စင်ကာပူဒေါ်လာ(၂၀)တန် ငွေစက္ကူအသစ် အရေအတွက်ကိုအကန့်အသတ်ဖြင့် ရွက်ရေ(၂)သန်းခန့်သာထုတ်ဝေသွားရန် ရည်မှန်းထားပြီး လိုအပ်ပါကရွက်ရေ(၅၀၀၀)ခန့် ထပ်မံထုတ်ဝေသွားရန် စီစဉ်ထားကြောင်း၊ အဆိုပါငွေစက္ကူအသစ် များကို ၂၀၁၉ ခုနှစ်၊ ဇွန်လ(၁၀)ရက်နေ့မှစတင်၍ စင်ကာပူနိုင်ငံရှိ DBS ၊ OCBC ၊ UOB ၊ Standard Chartered Bank အပါအဝင် ဘဏ်ကြီး(၉)ခုတို့၌ လဲလှယ်ထုတ်ယူအသုံးပြုနိုင်မည်ဖြစ်ပြီး အမှတ်တရအထိမ်းအမှတ်အနေဖြင့်ထုတ်ဝေသည့် ငွေစက္ကူဖြစ်သောကြောင့် တစ်ကြိမ်လဲလှယ်လျှင် ရွက်ရေ(၂၀)အထိသာ အကန့်အသတ်ဖြင့်လဲလှယ် ပေးသွားမည်ဟု www.channelnewsasia.com အင်တာနက် website တွင် ဖော်ပြပါရှိပါသည်။

အမေရိကန်သမ္မတဒေါ်နယ်ထရန့်သည် ကုန်သွယ်ရေးစစ်ပွဲ၏ ခြေလှမ်းအသစ်အဖြစ် အမေရိကန်ထိပ်တန်းတက္ကသိုလ်နှင့်ကျောင်းများတွင် ပညာသင်ကြားနေသည့်တရုတ်နိုင်ငံသားများအပေါ် တင်းကြပ်မှုများ စတင်ပြုလုပ်ခဲ့မှု

          အမေရိကန်သမ္မတဒေါ်နယ်ထရန့်သည် ကုန်သွယ်ရေးစစ်ပွဲ၏ခြေလှမ်းအသစ်အဖြစ် အမေရိကန်ထိပ်တန်းတက္ကသိုလ်နှင့်ကျောင်းများတွင် ပညာသင်ကြားနေသည့် တရုတ်နိုင်ငံသားများအပေါ် ဗီဇာကန့်သတ်မှုများပြုလုပ်ခြင်း၊ တရုတ်နိုင်ငံနှင့် ဆက်စပ်ဆောင်ရွက်နေသည့် သုတေသနပညာရှင်များအား စောင့်ကြည့်ခြင်းတို့ကို စတင်ပြုလုပ်လျက်ရှိကြောင်း၊ အမေရိကန်ပြည်ထောင်စုတွင် ပညာသင်ကြားနေသော တရုတ်ကျောင်းသားများနှင့် တရုတ်ပညာရှင်များကလည်း လွန်ခဲ့သည့်ရက်သတ္တပတ်များမှစတင်၍ အမေရိကန်တက္ကသိုလ်များ၌ ပညာသင်ကြားခြင်း၊ သုတေသနပြုခြင်းကိစ္စများတွင် အမေရိကန်များ၏ ဆက်ဆံရေးမပြေလည်မှုများကို ကြုံတွေ့နေရသည်ဟုပြောကြားခဲ့ကြောင်းသိရှိရပါသည်။

          တရုတ်နိုင်ငံနှင့် အမေရိကန်ပြည်‌ထောင်စုတို့အကြား ပညာရေးကဏ္ဍတွင် ဆက်စပ်မှုများစွာရှိကြောင်း၊ တရုတ်နိုင်ငံသားများသည် အခြားကမ္ဘာ့နိုင်ငံများထက် အမေရိကန်ပြည်ထောင်စုရှိ ကျောင်းများတွင်သာ ပညာသင်ကြားလိုကြကြောင်း၊ အမေရိကန်ပြည်ထောင်စုတွင် ပညာသင်ကြားနေသည့် တရုတ်နိုင်ငံသား အရေအတွက်မှာ ၂၀၁၈ခုနှစ်၌ (၃၆၀,၀၀၀)ခန့်ရှိပြီး အများစုမှာ ထိပ်တန်း အမေရိကန်တက္ကသိုလ်ကြီးများတွင် တက်ရောက်နေကြခြင်းဖြစ်ကြောင်း၊ အမေရိကန်အာဏာပိုင်များသည် တရုတ်ကျောင်းသားများအတွက် နှစ်စဉ်ဗီဇာသက်တမ်းတိုးမြှင့်ပေးရာ၌ ယခင်ကဗီဇာလျှောက်ထားပြီး ရက်သတ္တပတ်(၃)ပတ်အတွင်း ခွင့်ပြုမိန့်ထုတ်ပေးခဲ့သော်လည်းယခုအခါ လအတန်ကြာသည်အထိ ခွင့်ပြုမိန့်ထုတ်မပေးသေးသည့်အတွက် တရုတ်ကျောင်းသားများမှာ အခက်အခဲများနှင့် ရင်ဆိုင်နေရကြောင်း၊ တရုတ်နိုင်ငံ၊ ပညာရေးဝန်ကြီးဌာနက ၂၀၁၉ ခုနှစ်၊ ဇွန်လ(၃)ရက် (တနင်္လာနေ့)တွင် ထုတ်ပြန်သည့်ကြေညာချက်၌ အမေရိကန်ပြည်ထောင်စုတွင် ပညာသင်ကြားနေသည့် တရုတ်ကျောင်းသားများအနေဖြင့် ဗီဇာပယ်ချခံရခြင်းများရှိလာနိုင်သည်ဟု သတိပေးထားကြောင်းသိရှိရပါသည်။

          အမေရိကန်သမ္မတဒေါ်နယ်ထရန့်သည် အမျိုးသားလုံခြုံရေးနည်းဗျူဟာအရ အမေရိကန်ပြည်ထောင်စုနှင့် ပြိုင်ဘက်နိုင်ငံများထံသို့ နောက်ဆုံးပေါ် သိပ္ပံပညာ၊ နည်းပညာနှင့် အင်ဂျင်နီယာ ပညာရပ်များမရောက်ရှိစေရေးအတွက် အဆိုပါပညာရပ်များကိုနိုင်ငံခြားမှ လာရောက်သင်ကြား နေသူများအား ပြည်ဝင်ခွင့်ဗီဇာပေး/မပေး အပေါ်သုံးသပ်မှုများ ပြုလုပ်သွားမည်ဖြစ်ပြီးအထူးသဖြင့် တရုတ်ကျောင်းသားများအား ဗီဇာထုတ်ပေးခြင်းကို ကန့်သတ်သွားရန် လွန်ခဲ့သည့် နှစ်ကတည်းက ပြင်ဆင်ထားခဲ့ကြောင်း www.livetradingnews.com အင်တာနက် website တွင် ဖော်ပြပါရှိပါသည်။

မက္ကဆီကို၊ တရုတ်၊ အိန္ဒိယအပါအဝင် ကမ္ဘာ့နိုင်ငံများနှင့် ပတ်သက်သည့် အမေရိကန်သမ္မတ၏ တင်းမာသော ကုန်သွယ်ရေးမူဝါဒများကြောင့် ကမ္ဘာ့ရေနံဈေးနှုန်းများမှာ (၄) လတာကာလအတွင်း အနိမ့်ဆုံးသို့ရောက်ရှိခဲ့

အမေရိကန်ပြည်ထောင်စုနှင့် တရုတ်နိုင်ငံတို့အကြား ကုန်သွယ်ရေးတင်းမာမှုများ ဖြစ်ပေါ်နေချိန်တွင် အမေရိကန်သမ္မတဒေါ်နယ်ထရန့်သည် ၂၀၁၉ ခုနှစ်၊ မေလ (၃၁) ရက်နေ့၌ အဓိကကုန်သွယ်ဖက် မက္ကဆီကိုနိုင်ငံမှ တင်သွင်းသောကုန်ပစ္စည်းများအား သွင်းကုန်ခွန် ၅% ကောက်ခံမည်ဖြစ်ကြောင်းနှင့် စီးပွားရေးအင်အားကြီးနိုင်ငံတစ်ခုဖြစ်သည့် အိန္ဒိယနိုင်ငံမှ အမေရိကန်ပြည်ထောင်စုသို့ တင်သွင်းနေသည့် ကုန်ပစ္စည်းများအပေါ်၌လည်း လက်ရှိပြဌာန်းထားသည့် အခွန်ကင်းလွတ်ခွင့်ပေးထားသောစနစ်ကို ဖျက်သိမ်းမည်ဟု ကြေညာခဲ့ကြောင်း၊ အမေရိကန်သမ္မတ၏ ကြေညာချက်ထွက်ပေါ်ပြီးနောက်တွင် ကမ္ဘာ့စီးပွားရေးအင်အားကြီးနိုင်ငံများအကြား ကုန်သွယ်ရေးတင်းမာမှုများ ပိုမိုမြင့်တက်လာဖွယ်ရှိသည်ဟူသော ခန့်မှန်းချက်များနှင့်အတူ ရေနံဝယ်လိုအားကျဆင်းသွားသည့်အတွက် ကမ္ဘာ့ရေနံဈေးနှုန်းမှာ (၄) လအတွင်း အနိမ့်ဆုံးသို့ ရောက်ရှိခဲ့ကြောင်း သိရှိရပါသည်။

          ထို့ပြင် အမေရိကန်အစိုးရ၏ စွမ်းအင်သတင်းထုတ်ပြန်ရေးဌာနက ယခုရက်ပိုင်းအတွင်း ထုတ်ပြန်သည့်အစီရင်ခံစာ၌ အမေရိကန်ပြည်ထောင်စု၏ ရေနံထုတ်လုပ်မှုပမာဏမှာ လွန်ခဲ့သည့် ရက်သတ္တပတ်အတွင်းမှစတင်၍ တစ်နေ့လျှင် စည်ပေါင်း (၁၂.၃) သန်းခန့်အထိစံချိန်တင်ရောက်ရှိနေပြီး ရေနံအရန်သိုလှောင်မှုပမာဏမှာလည်း ၈.၄% မြင့်တက်ကာ၂၀၁၉ ခုနှစ်အတွင်းသိုလှောင်မှုအမြင့်ဆုံးဖြစ်သည့် စုစုပေါင်းရေနံစည်အရေအတွက် (၄၇၆.၅) သန်းသို့ ရောက်ရှိနေကြောင်း ဖော်ပြထားခြင်းသည်လည်း ရေနံဈေးနှုန်းများကို ကျဆင်းစေသည့် အခြားအချက်တစ်ခုပင်ဖြစ်ကြောင်း သိရှိရပါသည်။

          ကမ္ဘာ့ရေနံဈေးနှုန်းများမှာ အမေရိကန်သမ္မတ၏ ကုန်သွယ်ရေးဆိုင်ရာကြေညာချက်များ ထွက်ပေါ်ပြီးနောက် ၂၀၁၉ ခုနှစ်၊ မေလ (၃၁) ရက်နေ့မှ လက်ရှိအချိန်အထိကာလအတွင်း ၈.၁% အထိကျဆင်းခဲ့ကြောင်း၊ ဇွန်လ (၃) ရက် (တနင်္လာနေ့) နံနက်ပိုင်းတွင် နယူးယောက်ဈေးကွက်၌ WTI ရေနံစိမ်းကြိုတင်ရောင်းဝယ်မှုဈေးနှုန်းမှာ တစ်စည်လျှင် အမေရိကန်ဒေါ်လာ (၅၂.၉၁) သို့ရောက်ရှိခဲ့ကြောင်း၊ လန်ဒန်ဈေးကွက်၌ ဘရန့်ရေနံစိမ်းကြိုတင်ရောင်းဝယ်မှုဈေးနှုန်းမှာလည်း တစ်စည်လျှင် အမေရိကန်ဒေါ်လာ (၆၁.၃၇) သို့ရောက်ရှိခဲ့ကြောင်း၊ အဆိုပါဈေးနှုန်းများမှာ ၂၀၁၉ ခုနှစ်၊ဇန်နဝါရီလ (၂၉) ရက်နောက်ပိုင်း (၄) လတာကာလအတွင်းအနိမ့်ဆုံးဈေးနှုန်းများဖြစ်ကြောင်း www.bloomberg.com အင်တာနက် website တွင်ဖော်ပြပါရှိပါသည်။

အမေရိကန်ပြည်ထောင်စုသည် အဓိက ကုန်သွယ်ဖက် မက္ကဆီကိုနိုင်ငံ၏ ကုန်ပစ္စည်းများအပေါ် သွင်းကုန်ခွန်  ၅% ကောက်ခံခဲ့သည့် ဂယက်ကြောင့် ကမ္ဘာ့ရွှေဈေးနှုန်းမှာတစ်အောင်စလျှင် အမေရိကန်ဒေါ်လာ (၁၃၀၀) အထက်သို့ မြင့်တက်သွားခဲ့

အမေရိကန်ပြည်ထောင်စုအတွင်းသို့ ရွှေ့ပြောင်းဝင်ရောက်လာသူ များပြားလာသည့် ပြဿနာအပေါ် အရေးယူသည့်အနေဖြင့်  အမေရိကန်သမ္မတဒေါ်နယ်ထရန့်သည် မက္ကဆီကိုနိုင်ငံမှ တင်သွင်းလာသည့် သွင်းကုန်များအပေါ် ၂၀၁၉ ခုနှစ်၊ ‌ဇွန်လ (၁၀) ရက်နေ့မှစတင်၍ သွင်းကုန်ခွန် ၅% ကောက်ခံမည်ဟု မေလ (၃၀) ရက်နေ့တွင် ကြေညာခဲ့ကြောင်း၊ မက္ကဆီကိုနိုင်ငံသည် အမေရိကန်ပြည်ထောင်စု၏ အဓိကကုန်သွယ်ဖက်နိုင်ငံဖြစ်ပြီး စက်ပစ္စည်းများ၊ ရေနံနှင့် လယ်ယာထွက်ကုန်ပစ္စည်းများကို အမေရိကန်ပြည်ထောင်စုသို့ တင်သွင်းလျက်ရှိကြောင်း၊ အထူးသဖြင့် အမေရိကန်မော်တော်ယာဉ် ကုမ္ပဏီကြီးများအပါအဝင် စက်မှုလုပ်ငန်းအများစုသည် မက္ကဆီကိုနိုင်ငံအတွင်း၌ စက်ရုံများ တည်ဆောက်ထုတ်လုပ်ပြီး မော်တော်ယာဉ်နှင့်ယာဉ်အပိုပစ္စည်းများကို အမေရိကန်ပြည်ထောင်စုသို့ ပြန်လည်တင်သွင်းလျက်ရှိကြောင်း၊ ၂၀၁၈ ခုနှစ်အတွင်းအမေရိကန်ပြည်ထောင်စုသို့ ဝင်ရောက်ခဲ့သည့် မက္ကဆီကိုသွင်းကုန်များ၏ တန်ဖိုးပမာဏမှာ အမေရိကန်ဒေါ်လာ (၃၇၁.၉) ဘီလီယံခန့်ရှိပြီး မက္ကဆီကိုနိုင်ငံသည် အမေရိကန်ပြည်ထောင်စုနှင့်ကုန်သွယ်ရာ၌ ကုန်သွယ်ရေးပိုငွေ အမေရိကန်ဒေါ်လာ (၇၂.၇) ဘီလီယံအထိရရှိခဲ့ကြောင်း၊ ယခုအခါ အမေရိကန်သမ္မတသည် အမေရိကန်ပြည်ထောင်စုအတွက် အရေးပါသည့် အဓိကကုန်သွယ်ဖက်နိုင်ငံဖြစ်သော မက္ကဆီကိုနိုင်ငံအပေါ်၌ပါ ကုန်သွယ်ရေးဆိုင်ရာအရေးယူမှုများပြုလုပ်ခဲ့သောကြောင့် ကမ္ဘာပေါ်ရှိအခြားမည်သည့်နိုင်ငံမဆို အမေရိကန်ပြည်ထောင်စု၏ ကုန်သွယ်ရေးဆိုင်ရာ အရေးယူမှုများကို အချိန်မရွေးကြုံတွေ့လာနိုင်သည်ဟူသော စိုးရိမ်ပူပန်မှုများ ဖြစ်ပေါ်နေသည့်အတွက် ကမ္ဘာ့ရွှေဈေးနှုန်းမှာ ဆက်တိုက်မြင့်တက်လာခဲ့ကြောင်း သိရှိရပါသည်။

ထို့ပြင် အမေရိကန်သမ္မတအနေဖြင့် အမေရိကန်ပြည်ထောင်စုနှင့် ကုန်သွယ်ရာ၌ ကုန်သွယ်ရေးပိုငွေပြနေသည့် ဂျာမနီနိုင်ငံနှင့်အခြားသောဥရောပနိုင်ငံများကိုပါ သွင်းကုန်ခွန်ပြဌာန်းရန် စီစဉ်နေခြင်းနှင့် တရုတ်အစိုးရကလည်း အမေရိကန်ကုန်ပစ္စည်းများအပေါ် ယခုဇွန်လ (၁) ရက်နေ့မှစတင်၍ သွင်းကုန်ခွန်များ စတင်တိုးမြှင့်ကောက်ခံရန် ဆုံးဖြတ်ခဲ့ခြင်း အစရှိသည့်အချက်များကြောင့် ကမ္ဘာ့ စီးပွားရေးထိခိုက်မည့်အပေါ် စိုးရိမ်ပူပန်နေကြခြင်းသည်လည်း ရွှေဝယ်လိုအားကိုတိုးကာ ရွှေဈေးနှုန်းကို ပိုမိုအားကောင်းစေခဲ့ကြောင်း သိရှိရပါသည်။

၂၀၁၉ ခုနှစ်၊ ဇွန်လ (၁) ရက်(စနေနေ့) တွင် ကမ္ဘာ့ရွှေဈေးနှုန်းမှာ ၁.၄% မြင့်တက်ကာတစ်အောင်စလျှင် အမေရိကန်ဒေါ်လာ (၁၃၁၁.၁၀) သို့ ရောက်ရှိခဲ့ကြောင်း၊ အဆိုပါ ဈေးနှုန်းသည် ၂၀၁၉ ခုနှစ်၊ ဧပြီလ (၁) ရက်နေ့နောက်ပိုင်း အမြင့်ဆုံးဈေးနှုန်းဖြစ်ကြောင်း၊ ကမ္ဘာ့ရွှေဈေးနှုန်းသည် ၂၀၁၉ ခုနှစ်၊ မေလအတွင်း၌  ၂%  မြင့်တက်ခဲ့ကြောင်း www.bloomberg.com  အင်တာနက် website တွင် ဖော်ပြပါရှိပါသည်။