နိုင်ငံခြားရင်းနှီးမြှုပ်နှံမှုများ ပိုမိုဝင်ရောက်လာစေရန်အတွက် တရုတ်အစိုးရက ဥပဒေများပြင်ဆင်ရန် စီစဉ်နေခြင်းကြောင့် ယွမ်ငွေတန်ဖိုးမြင့်တက်လာခဲ့
အမေရိကန်ပြည်ထောင်စုနှင့်တရုတ်နိုင်ငံသို့အကြား ကုန်သွွယ်ရေးထိပ်တိုက်ရင်ဆိုင်မှုများ ကြုံတွေ့ခဲ့ပြီးနောက်တွင် တရုတ်နိုင်ငံအတွင်းမှ နိုင်ငံခြားသားလုပ်ငန်းရှင်အများအပြားနှင့် စက်ရုံများသည် အမေရိကန်ပြည်ထောင်စု၏ အခွန်စည်းကြပ်မှုကို ရှောင်လွှဲနိုင်ရန်အတွက် တရုတ် နိုင်ငံတွင် ရင်းနှီးမြှုပ်နှံထားသော ၎င်းတို့စက်ရုံများနှင့်လုပ်ငန်းများကို အခြားနိုင်ငံများသို့ပြောင်းရွှေ့ သွားခဲ့ကြောင်း၊ ထို့ကြောင့် တရုတ်အစိုးရသည် တရုတ်နိုင်ငံအတွင်းသို့ နိုင်ငံခြားရင်းနှီးမြှုပ်နှံမှု ဝင်ရောက်သည့် ပမာဏလျော့နည်းသွားခြင်းကို ဖြေရှင်းနိုင်ရန်အတွက် ရင်းနှီးမြှပ်နှံမှုဆိုင်ရာနည်း ဥပဒေများကို ပြန်လည်ပြင်ဆင်ရန် စီစဉ်နေကြောင်း သိရှိရပါသည်။
ယခုရက်ပိုင်းအတွင်း တရုတ်နိုင်ငံ၌ ကျင်းပခဲ့သည့် ကမ္ဘာ့စီးပွားရေးဖိုရမ်တွင် တရုတ်ဝန်ကြီးချုပ် လီခချန်၏ ပြောကြားချက်အရ ငွေကြေးကဏ္ဍ၊ ဆက်သွယ်ရေးကဏ္ဍနှင့် ပို့ဆောင်ရေးကဏ္ဍများနှင့် ဆက်နွယ်နေသော နိုင်ငံခြားရင်းနှီးမြှပ်နှံမှု စည်းမျဉ်းသတ်မှတ်ချက်များကို ပြင်ဆင်သွားမည်ဟု သိရှိရ ကြောင်း၊ လက်ရှိပြဌာန်းထားသော ဥပဒေများအရ လေကြောင်းလိုင်းများ၊ တယ်လီဖုန်းဆက်သွယ်ရေး လုပ်ငန်းများ၊ အင်တာနက်အထောက်အကူပြုရေးလုပ်ငန်းများ၌ တရုတ်နိုင်ငံသားပိုင် အစုရှယ်ယာ အနည်းဆုံး (၅၀)%ခန့် မဖြစ်မနေပါဝင်ရမည်ဖြစ်ရာ ယင်းပြဌာန်းချက်ကြောင့် နိုင်ငံခြားရင်းနှီးမြှပ်နှံမှု ဝင်ရောက်ခြင်းကို အတားအဆီးများဖြစ်စေနိုင်သည့်အတွက် နိုင်ငံသားပိုင်သတ်မှတ်ချက်ကို လျှော့ချ ပေးသွားမည်ဟု သိရှိရကြောင်း၊ ထို့ပြင် အသက်အာမခံလုပ်ငန်းနှင့် ငွေကြေးဆိုင်ရာစာချုပ်စာတမ်းများ ရင်းနှီးမြှပ်နှံသည့်လုပ်ငန်းတို့တွင် နိုင်ငံခြားသားများ၏ပိုင်ဆိုင်မှုအား ကန့်သတ်ထားသည့် ပြဌာန်းချက် များကို လာမည့် ၂၀၂၀ ခုနှစ်မှစ၍ ဖယ်ရှားပေးသွားမည်ဟု သိရှိရပါသည်။
အလားတူ တရုတ်အစိုးရသည် နိုင်ငံခြားငွေကြေးစီမံခန့်ခွဲမှုနှင့်ပတ်သက်သည့် ဥပဒေအချို့ ကိုလည်း ပြင်ဆင်ရန်စီစဉ်နေကြောင်း၊ လက်ရှိပြဌာန်းချက်များအရ တရုတ်နိုင်ငံသားတစ်ဦး၏ နိုင်ငံခြားငွေလဲလှယ်သုံးစွဲနိုင်သည့်ပမာဏမှာ တစ်နှစ်လျှင် အမေရိကန်ဒေါ်လာ(၅)သောင်းခန့်သာ ရှိရမည်ဖြစ်ပြီး နိုင်ငံခြားငွေလဲလှယ်ခြင်းကိုလည်း သက်ဆိုင်ရာဘဏ်များ၌သာ ပြုလုပ်ရမည်ဟူ၍ ပြဌာန်းထားရာ ယင်းပြဌာန်းချက်သည် ငွေကြေးအများအပြားကိုင်ဆောင်ထားသော ရင်းနှီးမြှပ်နှံသူများ အတွက် အဟန့်အတားများကိုဖြစ်စေနိုင်သောကြောင့် နိုင်ငံခြားငွေနှင့်ပတ်သက်သည့် ဥပဒေကိုပါ ပြင်ဆင်ရန်စီစဉ်နေခြင်းဖြစ်သည်ဟု သိရှိရပါသည်။
တရုတ်အာဏာပိုင်များသည် နိုင်ငံခြားရင်းနှီးမြှပ်နှံမှုနှင့်ပက်သက်သည့်ဥပဒေ၊ နည်းဥပဒေများကို ပြင်ဆင်ပြီးပါက တရုတ်နိုင်ငံအတွင်းသို့ နိုင်ငံခြားရင်းနှီးမြှပ်နှံမှု အများအပြားဝင်ရောက်လာပြီး နိုင်ငံသား များအတွက် အလုပ်အကိုင်အခွင့်အလမ်းများ ပိုမိုဖန်တီးပေးနိုင်ကာ ကုန်ထုတ်လုပ်မှု တိုးတက်လာ လိမ့်မည်ဟုမျှော်မှန်းထားကြောင်း၊ တရုတ်အစိုးရက နိုင်ငံခြားရင်းနှီးမြှပ်နှံမှုဆိုင်ရာဥပဒေများကို ပြင်ဆင်ရန် ကြိုးပမ်းနေသည့်ဂယက်ကြောင့် ၂၀၁၉ခုနှစ်၊ ဇူလိုင်လ(၅)ရက်(သောကြာနေ့)တွင် တရုတ်ယွမ်ငွေ တန်ဖိုးမှာ အမေရိကန်ဒေါ်လာနှင့်နှိုင်းယှဉ်ရာ၌ ၀.၁၄%မြင့်တက်ပြီး အမေရိကန်တစ်ဒေါ်လာလျှင် (၆.၈၇၁၅) ယွမ်လဲလှယ်မှုနှုန်းသို့လည်းကောင်း၊ ယူရိုငွေနှင့်နှိုင်းယှဉ်ရာ၌ ၀.၁၁ %မြင့်တက်ပြီးတစ်ယူရိုလျှင် (၇.၇၅၄၁)ယွမ်လဲလှယ်မှုနှုန်းသို့လည်းကောင်း အသီးသီးရောက်ရှိခဲ့ကြောင်း www.earnforex.com အင်တာနက် website တွင် ဖော်ပြပါရှိပါသည်။
