အမေရိကန်-တရုတ် ကုန်သွယ်ရေးတင်းမာမှုများ ပြေလျော့သွားမည့် အခြေအနေများ ပိုမိုဖြစ်ပေါ်လာခြင်းကို အကြောင်းပြု၍ ကမ္ဘာ့ရွှေဈေးနှုန်းအနည်းငယ်ကျဆင်းခဲ့မှု
| အမေရိကန်နှင့်တရုတ်အစိုးရတို့သည် သွင်းကုန်ခွန် တိုးမြှင့်ကောက်ခံခြင်းနှင့် ပတ်သက်၍ အပြန်အလှန်ဖြေလျှော့မှုများ ပြုလုပ်ခဲ့ခြင်းကို အကြောင်းပြု၍ ကမ္ဘာ့ရွှေဈေးနှုန်းမှာ အနည်းငယ် ကျဆင်းခဲ့ကြောင်း သိရှိရပါသည်။ ၂၀၁၉ခုနှစ်၊ စက်တင်ဘာလ(၁၁)ရက် (ဗုဒ္ဓဟူးနေ့)တွင် တရုတ်အစိုးရသည် အမေရိကန် ပြည်ထောင်စုမှ တရုတ်နိုင်ငံသို့ တင်သွင်းသော စက်မှုလုပ်ငန်းသုံး ချောဆီများ၊ ကင်ဆာဆေးဝါးများ နှင့်မွေးမြူရေး စားသောက်ကုန်စည် များအပါအဝင် ကုန်ပစ္စည်း (၁၆)မျိုးအား ယခုစက်တင်ဘာလ (၁၇)ရက်နေ့မှစ၍ တစ်နှစ်ကြာမြင့်သည်အထိ ထပ်ဆောင်းသွင်းကုန်ခွန် တိုးမြှင့်ကောက်ခံမည့် စာရင်းမှ ပယ်ဖျက်ပေးခဲ့ကြောင်း၊ အလားတူ အမေရိကန် သမ္မတ ဒေါ်နယ်ထရန့်ကလည်း လာမည့် အောက်တိုဘာလ (၁)ရက်နေ့မှစ၍ တရုတ်သွင်းကုန် ပစ္စည်းများအပေါ် သွင်းကုန်ခွန် တိုးမြှင့်ကောက်ခံမည့် အစီအစဉ်အား အောက်တိုဘာလ (၁၅)ရက်နေ့သို့ နောက်ဆုတ် ရွှေ့ဆိုင်းပေးခဲ့ကြောင်း၊ ထို့ကြောင့် ကမ္ဘာ့စီးပွားရေး အင်အားကြီးနိုင်ငံများ ဖြစ်သော အမေရိကန်နှင့် တရုတ်နိုင်ငံတို့၏ ကုန်သွယ်ရေးတင်းမာမှုများ ပြေလျော့သွားမည့် အခြေအနေများ ပိုမိုဖြစ်ပေါ်လာခြင်းကို အကြောင်းပြု၍ ကမ္ဘာ့ရွှေဈေးနှုန်းမှာ အနည်းငယ် ကျဆင်းခဲ့ကြောင်း၊ ရင်းနှီးမြှုပ်နှံသူများသည် စက်တင်ဘာလ (၁၂)ရက် (ကြာသပတေးနေ့)တွင် ကျင်းပသည့် ဥရောပသမဂ္ဂ ဗဟိုဘဏ် အစည်းအဝေးရလဒ်ကို စောင့်ဆိုင်းလျက်ရှိကြောင်း သိရှိရပါသည်။ ၂၀၁၉ခုနှစ်၊ စက်တင်ဘာလ (၁၂)ရက် (ကြာသပတေးနေ့) နံနက်ပိုင်း ဈေးကွက်ဖွင့်ချိန်တွင် ကမ္ဘာ့ဈေးကွက်အတွင်း ရွှေလက်ငင်း ရောင်းဝယ်မှုဈေးနှုန်းမှာ ၀.၄% ကျဆင်းပြီး တစ်အောင်စလျှင် အမေရိကန် ဒေါ်လာ(၁၄၉၁.၈၆)သို့ ရောက်ရှိခဲ့ကြောင်း၊ ကမ္ဘာ့ရွှေဈေးနှုန်းသည် ယခုနှစ် ကုန်ပိုင်းတွင် တစ်အောင်စလျှင် အမေရိကန် ဒေါ်လာ(၁၅၀၀) ဝန်းကျင်၌သာ ဆက်လက်ဖြစ်ပေါ်နေဖွယ်ရှိသည်ဟု နယူးယောက်အခြေစိုက် Oanda နိုင်ငံခြားငွေ လဲလှယ်ရေးလုပ်ငန်းနှင့် လန်ဒန်အခြေစိုက် စီးပွားရေး သုတေသနနှင့် အတိုင်ပင်ခံလုပ်ငန်း Capital Economics လုပ်ငန်းတို့က ခန့်မှန်းသုံးသပ် ထားကြကြောင်း www.reuters.com အင်တာနက် website တွင် ဖော်ပြပါရှိပါသည်။ |