ဘဏ်တိုးနှုန်းတိုးမြှင့်ခြင်းအား ရပ်ဆိုင်းခဲ့ခြင်းကြောင့် အမေရိကန်ပြည်ထောင်စု၏ စီးပွားရေးဆိုင်ရာ ရလဒ်ကောင်းများဖြစ်ပေါ်စေခဲ့သည်ဟူသော အမေရိကန်ဗဟိုဘဏ်အစည်းအဝေးမှတ်တမ်းထွက်ပေါ် ခဲ့ပြီးနောက် အမေရိကန်ဒေါ်လာတန်ဖိုးမှာမြင့်တက်ခဲ့မှု

ဘဏ်တိုးနှုန်းတိုးမြှင့်ခြင်းအား ရပ်ဆိုင်းထားခဲ့ခြင်းကြောင့် အမေရိကန်ပြည်ထောင်စု၏ စီးပွားရေးနှင့်ပတ်သက်၍ ရလဒ်ကောင်းများဖြစ်ပေါ်စေခဲ့သည်ဟူသော ၂၀၁၉ ခုနှစ်၊ ဇန်နဝါရီလ အတွင်းကျင်းပခဲ့သည့် အမေရိကန်ဗဟိုဘဏ်အစည်းအဝေးမှတ်တမ်းထွက်ပေါ်ခဲ့ပြီးနောက် အမေရိကန်ဒေါ်လာတန်ဖိုးမှာ ပြန်လည်မြင့်တက်လာခဲ့ကြောင်း သိရှိရပါသည်။

အမေရိကန်ဗဟိုဘဏ်သည် ၂၀၁၉ ခုနှစ်၊ ဇန်နဝါရီလ (၂၉) ရက်နှင့် (၃၀) ရက်တို့တွင် ပြုလုပ်ခဲ့သည့် အစည်းအဝေးမှတ်တမ်းကို ဖေဖော်ဝါရီလ (၂၀) ရက်တွင် အများပြည်သူသိရှိစေရန် ထုတ်ပြန်ခဲ့ရာ အဆိုပါအစည်းအဝေးမှတ်တမ်း၌ လွန်ခဲ့သည့်ဇန်နဝါရီလအတွင်း ဘဏ်တိုးနှုန်းတိုးမြှင့်ခြင်းအား ရပ်ဆိုင်းထားခဲ့သည့်အတွက် အမေရိကန်ပြည်ထောင်စု၏ စီးပွားရေးအပေါ် ဆိုးကျိုးအနည်းငယ်သာ ဖြစ်ပေါ်စေခဲ့ပြီး ကောင်းကျိုးအများအပြားဖြစ်ပေါ်စေခဲ့ကြောင်း၊ ထိုသို့ဘဏ်တိုးနှုန်းအား ရပ်ဆိုင်းထားခဲ့ခြင်းကြောင့် ဗဟိုဘဏ်ကော်မတီအဖွဲ့ဝင်များအတွက် ၂၀၁၈ ခုနှစ်အတွင်း ဘဏ်တိုးနှုန်းတိုးမြှင့်ခဲ့မှုများကြောင့် တန်ပြန်ဖြစ်ပေါ်လာသည့် အကျိုးရလဒ်များကို အကဲဖြတ်တွက်ဆရန် အချိန်ပိုမိုရရှိစေခဲ့ကြောင်း၊ ထို့ပြင်အမေရိကန်ပြည်ထောင်စု၌ အလုပ်အကိုင်ရရှိမှုများ မြင့်တက်နေသည့်နည်းတူ နိုင်ငံ၏စီးပွားရေးအခြေအနေမှာလည်း ကောင်းမွန်သည့် အခြေအနေတွင်ရှိကြောင်း၊ ထို့ကြောင့် အမေရိကန်ဗဟိုဘဏ်အနေဖြင့် ဘဏ်တိုးနှုန်းတိုးမြှင့်ခြင်းကို အသေအချာတွက်ချက်ဂရုပြုလုပ်ဆောင်သွားမည်ဖြစ်ပြီး ယခုနှစ်အတွင်းဘဏ်တိုးနှုန်းတိုးမြှင့်ခြင်းအား အနည်းဆုံးတစ်ကြိမ်ခန့် တိုးမြှင့်ကောင်းတိုးမြှင့်သွားရန် အမေရိကန်ဗဟိုဘဏ်ကော်မတီဝင်အများစုက သဘောတူလက်ခံခဲ့သည်ဟု ဖော်ပြထားကြောင်း၊ အဆိုပါဗဟိုဘဏ်၏ အစည်းအဝေးမှတ်တမ်းထွက်ပေါ်ခဲ့ပြီးနောက်တွင် ဗဟိုဘဏ်၏ ဘဏ်တိုးနှုန်း တိုးမြှင့်နိုင်မည့် အလားအလာကြောင့် အမေရိကန်ဒေါ်လာတန်ဖိုးမြင့်တက်မှုများ ဖြစ်ပေါ်လာဖွယ်ရှိသည်ဟူသော ခန့်မှန်းချက်များနှင့်အတူ ရင်းနှီးမြှုပ်နှံသူများသည် အမေရိကန်ဒေါ်လာဝယ်ယူမှုများ ပြုလုပ်လာကြသောကြောင့် အမေရိကန်ဒေါ်လာတန်ဖိုးမှာ ဗဟိုဘဏ်အစည်းအဝေးမှတ်တမ်းထွက်ပေါ်ခဲ့သည့်နေ့တွင်ပင်  ၀.၂၅%  ခန့်မြင့်တက်ခဲ့ကြောင်း သိရှိရပါသည်။

၂၀၁၉ ခုနှစ်၊ ဖေဖော်ဝါရီလ (၂၁) ရက် (ကြာသပတေးနေ့) နံနက်ပိုင်းတွင် နယူးယောက်​ဈေးကွက်၌ အမေရိကန်ဒေါ်လာတန်ဖိုးမှာ ၀.၁% မြင့်တက်ခဲ့ပြီး စတာလင်တစ်ပေါင်လျှင် အမေရိကန်ဒေါ်လာ (၁.၁၃၀၃၁)​ ဒေါ်လာလဲလှယ်မှုနှုန်းသို့လည်းကောင်း၊ တစ်ယူရိုလျှင် အမေရိကန်ဒေါ်လာ (၁.၁၃၃၇) ဒေါ်လာလဲလှယ်မှုနှုန်းသို့လည်းကောင်း၊ အမေရိကန်တစ်ဒေါ်လာလျှင် ဂျပန်ယန်းငွေ (၁၁၀.၇၅) ယန်း လဲလှယ်မှုနှုန်းသို့လည်းကောင်း၊ အမေရိကန်တစ်ဒေါ်လာလျှင် တရုတ်ယွမ်ငွေ (၆.၇၂၂၀) ယွမ် လဲလှယ်မှုနှုန်းသို့လည်းကောင်း အသီးသီးဖြစ်ပေါ်ခဲ့ကြောင်းဖြင့် reuters သတင်းဌာနမှထုတ်လွှင့်ခဲ့ပါသည်။