ရုရှားနှင့် ဆော်ဒီအာရေဗျတို့သည် နေ့စဉ်ရေနံထုတ်လုပ်မှုလျှော့ချရေး အစီအစဉ်အား အနည်းဆုံး(၆)လ သို့မဟုတ် (၉)လခန့်အထိဆက်လက်လုပ်ဆောင်ရန် သဘောတူညီမှု ရယူခဲ့မှု

ရုရှားသမ္မတဗလာဒီမာပူတင်နှင့် ဆော်ဒီအာရေဗျအိမ်ရှေ့စံမင်းသား မိုဟာမက်ဘင်ဆယ်လ်မန်တို့သည် ဂျပန်နိုင်ငံ၌ကျင်းပသည့် စက်မှုထိပ်သီးနိုင်ငံ (၂၀)အစည်းအဝေးသို့ တက်ရောက်ခဲ့ကြပြီးနောက် သီးခြားတွေ့ဆုံဆွေးနွေးညှိနှိုင်းမှုများ ပြုလုပ်ကြရာ၌ ၂၀၁၉ ခုနှစ် လက်ကျန်ကာလများတွင်လည်း နေ့စဉ်ရေနံ ထုတ်လုပ်မှုလျှော့ချရေးအစီအစဉ်အား ဆက်လက်လုပ်ဆောင်ရန် အပြန်အလှန် သဘောတူညီမှုရှိခဲ့ကြသည်ဟုသိရှိရပါသည်။

ရုရှားသမ္မတဗလာဒီမာပူတင်သည် ဆော်ဒီအိမ်ရှေ့စံမင်းသား မိုဟာမက်ဘင်ဆယ်လ်မန်နှင့် တွေ့ဆုံပြီးနောက် ပြုလုပ်သည့်သတင်းစာရှင်းလင်းပွဲတွင် ပြောကြားရာ၌ လက်ရှိအချိန်တွင် အမေရိကန်ပြည်ထောင်စု၏ ရေနံထုတ်လုပ်မှု မြင့်တက်လျက်ရှိခြင်းနှင့် စီးပွားရေးအင်အားကြီးနိုင်ငံများ၏ ကုန်သွယ်ရေးတင်းမာမှု ဂယက်တို့ကြောင့် ကမ္ဘာ့စီးပွားရေးနှေးကွေးမှုများဖြစ်ပေါ်ကာ ကမ္ဘာ့ရေနံဈေးနှုန်းများ ကျဆင်းသွားမည့်အရေးကို ကာကွယ်နိုင်ရန်အတွက် ရေနံလျှော့ချထုတ်လုပ်ရေးအစီအစဉ်ကို ဆက်လက်လုပ်ဆောင်သွားမည်ဖြစ်ကြောင်း၊ ထိုသို့လုပ်ဆောင်ရာတွင် မူလကသဘောတူညီမှုရယူခဲ့သည့် ပမာဏအတိုင်းဆက်လက်ထုတ်လုပ်သွားရန် ရုရှားနှင့် ဆော်ဒီအာရေဗျနှစ်နိုင်ငံအကြားသဘောတူညီမှုရရှိခဲ့ပြီဖြစ်ကြောင်း၊

ရုရှားသမ္မတဗလာဒီမာပူတင်သည် ဆော်ဒီအိမ်ရှေ့စံမင်းသား မိုဟာမက်ဘင်ဆယ်လ်မန်နှင့်တွေ့ဆုံပြီးနောက် ပြုလုပ်သည့်သတင်းစာရှင်းလင်းပွဲတွင် ပြောကြားရာ၌ လက်ရှိအချိန်တွင် အမေရိကန်ပြည်ထောင်စု၏ ရေနံထုတ်လုပ်မှုမြင့်တက်လျက်ရှိခြင်းနှင့်စီးပွားရေးအင်အားကြီးနိုင်ငံများ၏ ကုန်သွယ်ရေးတင်းမာမှုဂယက်တို့ကြောင့် ကမ္ဘာ့စီးပွားရေးနှေးကွေးမှုများဖြစ်ပေါ်ကာ ကမ္ဘာ့ရေနံဈေးနှုန်းများကျဆင်းသွားမည့်အရေးကိုကာကွယ်နိုင်ရန်အတွက် ရေနံလျှော့ချ ထုတ်လုပ်ရေးအစီအစဉ်ကိုဆက်လက်လုပ်ဆောင်သွားမည်ဖြစ်ကြောင်း၊ ထိုသို့လုပ်ဆောင်ရာတွင် မူလကသဘောတူညီမှုရယူခဲ့သည့် ပမာဏအတိုင်း ဆက်လက် ထုတ်လုပ်သွားရန် ရုရှားနှင့် ဆော်ဒီအာရေဗျနှစ်နိုင်ငံအကြား သဘောတူညီမှု ရရှိခဲ့ပြီဖြစ်ကြောင်း၊ လျှော့ချထုတ်လုပ်မည့်သက်တမ်းအား (၉)လအထိထားဖွယ်ရှိသော်လည်း အတိအကျဆုံးဖြတ်ရခြင်းမရှိသေးဟုပြောကြားခဲ့ကြောင်းသိရှိရပါသည်။

အိုပက်အဖွဲ့နှင့် အဖွဲ့ဝင်မဟုတ်သောနိုင်ငံများသည် ၂၀၁၉ ခုနှစ်၊ ဇန်နဝါရီလ (၁)ရက်နေ့မှ ဇွန်လ(၃၀)ရက်နေ့အထိ (၆)လသက်တမ်းဖြင့် တစ်နေ့လျှင် ရေနံစည်ပေါင်း(၁.၂)သန်း လျှော့ချထုတ် လုပ်ရန် သဘောတူညီမှုရယူခဲ့ရာ အဆိုပါ(၆)လသက်တမ်းမှာ ဇွန်လ(၃၀)ရက်နေ့တွင် ပြည့်မြောက်ကုန်ဆုံးပြီဖြစ်ကြောင်း၊ ထို့ကြောင့် အိုပက်အဖွဲ့ဝင်နိုင်ငံများနှင့် အဖွဲ့ဝင်မဟုတ်သောနိုင်ငံများသည် ၂၀၁၉ ခုနှစ်၊ ဇူလိုင်လ(၁)ရက်နေ့နှင့် (၂)ရက်နေ့တို့တွင် ဩစတြီးယားနိုင်ငံ၊ ဗီယင်နာမြို့၌ ရေနံလျှော့ချ ထုတ်လုပ်ရေးနှင့်ပတ်သက်၍ တွေ့ဆုံဆွေးနွေးကြမည်ဖြစ်ကြောင်း၊ ယင်းအစည်းအဝေးသို့          တက်ရောက်ရန်အတွက် ဗီယင်နာမြို့သို့ရောက်ရှိနေသော ဆော်ဒီအာရေဗျစွမ်းအင်ဝန်ကြီး ခါလစ်အယ်လ်ဖာလစ်က ၂၀၁၉ ခုနှစ်၊ ဇွန်လ (၃၀)ရက်(တနင်္ဂနွေနေ့)တွင် သတင်းထောက်များအား ပြောကြားရာ၌ နေ့စဉ် ရေနံလျှော့ချထုတ်လုပ်မည့်ပမာဏကို မူလကသဘောတူညီမှုရယူထားသည့် ပမာဏထက်ပို၍ လျှော့ချထုတ်လုပ်ရန် လိုအပ်မည်မဟုတ်ဘဲ တစ်နေ့လျှင် စည်ပေါင်း(၁.၂)သန်းသာ ဆက်လက်လျှော့ချ ထုတ်လုပ်သွားမည်ဖြစ်ကြောင်း၊ လျှော့ချထုတ်လုပ်မည့် သက်တမ်းမှာမူ (၉)လအထိ တိုးမြှင့် သတ်မှတ်သွားဖွယ်ရှိကြောင်း၊ လက်ရှိအချိန်တွင် ကမ္ဘာ့ရေနံဝယ်လိုအားမှာအားပျော့သည့် အနေအထားတွင်ရှိနေသော်လည်းလာမည့်(၆)လမှ (၉)လတာကာလအတွင်း ကမ္ဘာ့ဈေးကွက်အတွင်း ရေနံရောင်းလိုအားနှင့် ဝယ်လိုအားအခြေအနေမှာ မျှတသည့် အနေအထားသို့ ရောက်ရှိလာနိုင်သည်ဟု ပြောကြားခဲ့ကြောင်း www.reuters.com အင်တာနက် website တွင် ဖော်ပြပါရှိပါသည်။

ကမ္ဘာ့စီးပွားရေး၌ အမေရိကန်ဒေါ်လာကို စံပြုသုံးစွဲနေခြင်းသည် ဆုံးရှုံးမှုများကို မကြာခဏ ကြုံတွေ့နေရသည့်အခြေအနေသို့ ရောက်ရှိနေသောကြောင့် ကမ္ဘာ့နိုင်ငံများအနေဖြင့် အခြား ငွေကြေးများကိုပါ ပြောင်းလဲသုံးစွဲကြရန် ရုရှားထောက်လှမ်းရေးအကြီးအကဲက ပြောကြားခဲ့မှု

လက်ရှိအချိန်၌ ကမ္ဘာ့စီးပွားရေးလောကတွင် အမေရိကန်ဒေါ်လာကို စံပြုသုံးစွဲနေသည့် စနစ်မှာသုံးစွဲသူများအတွက် ဆုံးရှုံးမှုများကို မကြာခဏကြုံတွေ့ရသည့် အနေအထားသို့ ရောက်ရှိနေပြီဖြစ်ကြောင်း၊ ထို့ကြောင့် ကမ္ဘာ့နိုင်ငံများအနေဖြင့် အမေရိကန်ဒေါ်လာအစား အခြားပြောင်းလဲသုံးစွဲနိုင်မည့်ငွေကြေး သို့မဟုတ် ရင်းနှီးမြှုပ်နှံမှုဆိုင်ရာပစ္စည်းတစ်ခုခုကို ရှာဖွေကြရန် ရုရှားနိုင်ငံ၊ ပြည်ပထောက်လှမ်းရေးဌာနညွှန်ကြားရေးမှူး ဆာဂျီနာရှ်ခင်က ယခုရက်ပိုင်းအတွင်း ပြောကြားခဲ့ကြောင်း သိရှိရပါသည်။

ဆာဂျီနာရှ်ခင်သည်  ရုရှားနိုင်ငံ၊ ယူဖာမြို့တွင်ကျင်းပသည့် နိုင်ငံတကာလုံခြုံရေး အဖွဲ့အစည်းများမှ ကိုယ်စားလှယ်များ၏ အစည်းအဝေးပွဲတွင် ပြောကြားရာ၌ အမေရိကန်ဒေါ်လာသည် ကမ္ဘာ့စီးပွားရေးတစ်ခုလုံးကို ထိန်းချုပ်ထားသောကြောင့် အမေရိကန်အစိုးရသည် ငွေကြေးနှင့်ပတ်သက်သည့် အရေးယူပိတ်ဆို့မှုများအား နိုင်ငံရေးလက်နက်တစ်ခုအသွင်အဖြစ် အသုံးချလျက်ရှိကြောင်း၊ နိုင်ငံတကာ စီးပွားဆက်သွယ်ရေး၌ အမေရိကန်ဒေါ်လာ၏ လက်ဝါးကြီးအုပ်ထားမှုမှာ တဖြည်းဖြည်းနှင့် အာဏာရှင်ပုံသဏ္ဍာန်ဖြစ်လာပြီး သုံးစွဲသူများအတွက် ကောင်းကျိုးထက် ဆိုးကျိုးကိုသာ ဖြစ်ပေါ်လျက်ရှိသည်ဟု ပြောကြားခဲ့ကြောင်းသိရှိရပါသည်။

လက်ရှိအချိန်တွင် ရုရှား၊ တရုတ်နှင့် အိန္ဒိယအပါအဝင် ကမ္ဘာ့နိုင်ငံအချို့သည် နိုင်ငံခြားအရန် ငွေကြေးများအနက်မှ အမေရိကန်ဒေါ်လာကို လျှော့ချ၍ ရွှေအပါအဝင် အခြားသောငွေကြေးများကို ပြောင်းလဲစုဆောင်းလျက်ရှိကြောင်း၊ ရုရှားနိုင်ငံသည် အမေရိကန်ဒေါ်လာသုံးစွဲမှုကင်းမဲ့သော စီးပွားရေးကဏ္ဍကို တည်ထောင်နိုင်ရန်အတွက် ကြိုးပမ်းလျက်ရှိပြီး ကနဦးခြေလှမ်းများအနေဖြင့် ပို့ကုန်ကဏ္ဍတွင် အမေရိကန်ဒေါ်လာကို သာမက အခြားနိုင်ငံသုံးငေွကြေးများကိုပါ လက်ခံခြင်း၊ တရုတ်၊ အိန္ဒိယ၊ အီရန် အပါအဝင် ကမ္ဘာ့နိုင်ငံအချို့တို့နှင့် ငွေကြေးဖလှယ်သုံးစွဲမှုဆိုင်ရာသဘောတူညီချက်များကို လက်မှတ် ရေးထိုးခဲ့ခြင်း၊ ရုရှားနိုင်ငံအတွက် အဓိကဝင်ငွေဖန်တီးပေးနေသည့် ဥရောပသမဂ္ဂသို့ သဘာဝဓာတ်ငွေ့ တင်ပို့ရောင်းချသည့်လုပ်ငန်းတွင် အမေရိကန်ဒေါ်လာအစား ယူရိုငွေကို အစားထိုးသုံးစွဲရန် စီစဉ်နေခြင်း တို့ကိုလုပ်ဆောင်လျက်ရှိကြောင်း www.rt.com အင်တာနက် website တွင် ဖော်ပြပါရှိပါသည်။