“နွံနစ်လည်း ပတ္တမြားခဲမို့ ရဲမြဲရဲစေ”

စီးပွားရေးဆိုင်ရာပြစ်မှုများကို စုံစမ်းဖော်ထုတ်အရေးယူရေး၊ ဝန်ထမ်းမသမာမှုများကို ဖော်ထုတ်အရေးယူရေး၊ နိုင်ငံတော်လုံခြုံရေးအတွက် သတင်းများစုဆောင်းတင်ပြရေး၊ ပြည်သူ့အကျိုးပြု လုပ်ငန်းများဆောင်ရွက်ရေး ရည်မှန်းချက်များဖြင့်ရပ်တည်နေသည့် အထူးစုံစမ်းစစ်ဆေးရေး ဦးစီးဌာနသည် အပြောင်းအလဲများအကြား မယိုင်မနဲ့သော ကတိသစ္စာထားရှိပြီး နိုင်ငံတော်၏ အကျိုး၊ အများပြည်သူတို့၏အကျိုးအတွက် ဆောင်ရွက်ခဲ့သည်မှာ ၂၀၂၀ ပြည့်နှစ်၊ စက်တင်ဘာလ၊ (၁)ရက်တွင် (၆၉)နှစ်တိုင်ခဲ့ပြီဖြစ်သည်။ အဆက်ဆက်တာဝန်ထမ်းဆောင်ခဲ့ကြသည့် ဌာနဝင် အရာရှိများ၏သစ္စာရှိမှု၊ စွန့်လွှတ်အနစ်နာခံမှုနှင့် စွမ်းစွမ်းတမံ ကြိုးစားတတ်မှုတို့ကြောင့် ဦးစီးဌာနကြီး၏ ဂုဏ်သတင်းမှာ မွှေးပျံ့နေဆဲဖြစ်သည်။

မိခင်ဝန်ကြီးဌာနဖြစ်သည့် ပြည်ထဲရေးဝန်ကြီးဌာန၊ ပြည်ထောင်စုဝန်ကြီးနှင့် ဒုတိယ ဝန်ကြီးတို့၏ လမ်းညွှန်မှု၊ ဦးစီးဌာန၏ ညွှန်ကြားရေးမှူးချုပ်၊ ဒုတိယညွှန်ကြားရေးမှူးချုပ်များ၏ အနီးကပ်ကြီးကြပ်မှုဖြင့် စိစစ်ခြင်း၊ စုံစမ်းစစ်ဆေးခြင်း၊ ဥပဒေအကြံပေးခြင်း၊ တရားစွဲတင်ပို့ခြင်းနှင့် တရားရုံးအမှုလိုက်ပါဆောင်ရွက်ခြင်း၊ သတင်းစုဆောင်းတင်ပြခြင်း၊ နိုင်ငံတော်တည်ငြိမ်ရေး၊ အေးချမ်းသာယာရေးနှင့် တရားဥပဒေစိုးမိုးရေးအတွက် လုံခြုံရေးပူးပေါင်းဆောင်ရွက်ခြင်းစသည့် အဓိကလုပ်ငန်းတာဝန်များကို ကိုယ်စွမ်းရှိသမျှ၊ ဉာဏ်စွမ်းရှိသမျှ အဂတိကင်းစွာဆောင်ရွက်လျက် ရှိပါသည်။ ဦးစီးဌာနသည် အစိုးရအဆက်ဆက်က ပေးအပ်လာသည့်တာဝန်များကို မျက်နှာကြီးငယ် အရွယ်မထောက် ကျေပွန်စွာထမ်းဆောင်ခဲ့သည့် သာဓကများရှိထားခဲ့ပြီးဖြစ်ပေသည်။

လက်ရှိအစိုးရသက်တမ်း (၄) နှစ်ကျော် (၅) နှစ်အတွင်း ၂၀၁၆ ခုနှစ်၊ ဧပြီလမှ ၂၀၂၀ ပြည့်နှစ်၊ ဇူလိုင်လကုန်အထိ ဌာနဆိုင်ရာများတွင် ခန့်ထားမည့်အကြီးအကဲ (၃၈၈)ဦး၊ ပြည်ပသို့ ထွက်ခွာမည့် ဌာနဆိုင်ရာအရာရှိ (၆,၃၄၅)ဦး၊ ဌာနဆိုင်ရာများတွင်ခန့်ထားမည့်အရာထမ်း (၁,၉၁၁)ဦး၊ နိုင်ငံရေးပါတီများနှင့် လွှတ်တော်ကိုယ်စားလှယ် (၃,၂၅၆)ဦး၊ မြန်မာနိုင်ငံကူးလက်မှတ် လျှောက်ထားသူ (၃,၇၈၆,၇၂၅)ဦး၊ ပြည်ပြန်ဝင်ခွင့်နှင့် ပြည်ပသို့ထွက်ခွာလိုသူများအတွက် ဗီဇာလျှောက်ထားသူ(၁၈၇)ဦး၊ ကုမ္ပဏီအဖွဲ့အစည်းများသက်တမ်းတိုးခြင်း၊ အမည်ပြောင်းခြင်း တို့အတွက် ကုမ္ပဏီ (၂,၀၅၁)ခုမှ တာဝန်ရှိသူ (၅,၈၇၅)ဦး၊ နိုင်ငံတော်အစိုးရမှ ဘွဲ့ထူး၊ ဂုဏ်ထူး ချီးမြှင့်မည့် လူပုဂ္ဂိုလ် (၅,၇၆၄)ဦးကို သက်ဆိုင်ရာဥပဒေ၊ လုပ်ထုံးလုပ်နည်း၊ စည်းမျဉ်းများနှင့် ညီညွတ်မှုရှိ/မရှိ စိစစ်ခဲ့ပေသည်။

အဆိုပါကာလအတွင်း စီးပွားရေးဆိုင်ရာပြစ်မှု (၂၀၅)မှု၊ ဝန်ထမ်းမသမာမှု(၂၀၆)မှု၊ ငွေကြေး ခဝါချမှုတိုက်ဖျက်ရေးဗဟိုအဖွဲ့မှ တာဝန်ပေးအပ်မှု(၃၃၁)မှုကိုစုံစမ်းစစ်ဆေးခဲ့ပြီး မြန်မာငွေကျပ် (၆.၆၇)ဘီလီယံကျော်၊ အမေရိကန်ဒေါ်လာ(၆၄၀,၆၂၀)၊ ယူရိုငွေ(၃၃,၀၀၀)၊ ဂျပန်ယမ်း(၅,၂၆၁,၀၀၀)၊ မလေးရှားရင်းဂစ်(၂၈,၅၀၅)၊ တရုတ်ယွမ်(၃၃,၁၉၃)၊ ထိုင်းဘတ် ငွေသိန်း(၃၀)အပါအဝင် နိုင်ငံခြား ငွေအချို့ကို ပြည်သူ့ဘဏ္ဍာအဖြစ် သိမ်းဆည်းနိုင်ခဲ့ပြီး မြန်မာငွေကျပ်(၅၃၈.၈၈)ဘီလီယံ၊ အမေရိကန် ဒေါ်လာ (၁၈.၅၇)သန်းတို့အပေါ် အခွန်စည်းကြပ်နိုင်ရန် စီမံကိန်း၊ ဘဏ္ဍာရေးနှင့် စက်မှုဝန်ကြီး ဌာနသို့ အကြောင်းကြားနိုင်ခဲ့ပါသည်။ ငွေကြေးခဝါချမှုများကို စိစစ်ရေး၊ စုံစမ်းစစ်ဆေးရေးနှင့် စုံစမ်းမှုဖွင့်လှစ်ဆောင်ရွက်ခြင်းကိစ္စများနှင့်ပတ်သက်၍ တစ်ပြေးညီဖြစ်စေရန်နှင့် တိကျမှန်ကန် စေရန် ဌာနတွင်းဆွေးနွေးပွဲကို ၂၀၁၉ ခုနှစ်၊ အောက်တိုဘာလအတွင်းပြုလုပ်နိုင်ခဲ့ပါသည်။

စိစစ်ရေး၊ စုံစမ်းစစ်ဆေးရေး၊ စုံစမ်းမှုဖွင့်လှစ်ခြင်းဆိုင်ရာ ဆွေးနွေးပွဲတွင်ညွှန်ကြားရေးမှူးချုပ်အမှာစကားပြောကြားနေစဉ်

ဦးစီးဌာနချုပ်ရုံးရှိ ဥပဒေဌာနသည် ဌာနတွင်းဥပဒေအကြံပေးခြင်း၊ တရားရုံးအမှု လိုက်ပါ ဆောင်ရွက်ခြင်းအပြင် အခြားဝန်ကြီးဌာနနှင့် အဖွဲ့အစည်းများက ပြည်ထဲရေးဝန်ကြီးဌာနမှတစ်ဆင့် ညှိနှိုင်းတောင်းခံလာသည့် ဥပဒေရေးရာကိစ္စရပ်များကိုလည်း ကူညီအကြံပြုပေးလျက်ရှိပေသည်။ နိုင်ငံတော်အစိုးရသက်တမ်း (၄)နှစ်ကျော်ကာလတွင် အခြားဌာနများမှ ပေးပို့လာသောအမှု (၂၃၁)မှု၊ ပြည်ထောင်စုလွှတ်တော်၊ ဝန်ကြီးဌာနများက ပြဋ္ဌာန်းပြင်ဆင် တင်သွင်းသောဥပဒေ၊ နည်းဥပဒေ(မူကြမ်း)(၁၂၇)ခုနှင့်ပတ်သက်၍ သုံးသပ်အကြံပြုခြင်းကိုလည်း ဆောင်ရွက်ပေးခဲ့ပြီး ဖြစ်ပေသည်။

ဦးစီးဌာနအကြီးအကဲအနေဖြင့် ဌာနဝင်ဝန်ထမ်းများနှင့် ဝန်ထမ်းမိသားစုဝင်များလုပ်ငန်း ဆောင်ရွက်မှုအဆင်ပြေစေရန်နှင့် နေထိုင်မှုအဆင်ပြေချောမွေ့စေရန် ရုံးနှင့်ဝန်ထမ်းအိမ်ရာများကို ပြည်ထောင်စုဘတ်ဂျက်၊ တိုင်းဒေသကြီး/ ပြည်နယ်အစိုးရဘတ်ဂျက်နှင့် ကိုယ်ထူကိုယ်ထစနစ် အရ ဆောက်လုပ်ပေးခဲ့ရာ ၂၀၁၆-၂၀၁၇ ဘဏ္ဍာနှစ်မှ ၂၀၁၉-၂၀၂၀ ဘဏ္ဍာနှစ်အထိ (၄)နှစ်တာ ကာလအတွင်းပြည်ထောင်စုဘတ်ဂျက်ဖြင့် ခရိုင်ရုံးအဆောက်အဦ(၁)လုံး၊ဝန်ထမ်းအိမ်ရာ(၁)လုံး၊ တိုင်းဒေသကြီး / ပြည်နယ် အစိုးရဘတ်ဂျက်ဖြင့် ပြည်နယ်ရုံး အဆောက်အဦ(၂)လုံး၊ ခရိုင်ရုံး အဆောက်အဦ(၆)လုံး၊ ရှေ့တန်းရုံးအဆောက်အဦ(၃)လုံး၊ လှုပ်ရှားရုံးအဆောက်အဦ(၁၀)လုံး၊ ဝန်ထမ်းအိမ်ရာ(၂၂)လုံး၊ ကိုယ်ထူကိုယ်ထစနစ်ဖြင့် ဦးစီးဌာနချုပ်ရုံးတွင် ရုံးအဆောက်အဦ(၂)လုံး ဆောက်လုပ်ပေးခဲ့ပြီးဖြစ်သည်။

ဌာနဝင်ဝန်ထမ်းများလုပ်ငန်းဆောင်ရွက်မှုတွင် အရည်အချင်းမြင့်မားလာစေရန်နှင့် ဌာနတွင်း အဆင့်အလိုက်တတ်သိထားရမည့်၊ သိရှိအပ်သည့်လုပ်ငန်းဆိုင်ရာအသိပညာ၊ အတတ်ပညာများ လေ့လာသင်ကြားနိုင်ရန် ရည်ရွယ်၍ စုံစမ်းစစ်ဆေးမှုအတတ်ပညာ သင်ကျောင်းကို တည်ထောင်ပြီး သင်တန်းများဖွင့်လှစ်ပေးလျက်ရှိရာ ၂၀၁၇ ခုနှစ်၊ မတ်လမှ ၂၀၂၀ ပြည့်နှစ်၊ ဩဂုတ်လအထိ သင်တန်းမျိုးစုံ(၁၇)ခု ဖွင့်လှစ်နိုင်ခဲ့ပြီး သင်တန်းသား(၆၉၆)ဦးကို ဥပဒေ၊ လုပ်ထုံးလုပ်နည်းများ၊ လုပ်ငန်းပိုင်းဆိုင်ရာ သိသင့်သိထိုက်လိုက်နာအပ်သည်များကို သင်ကြားပေးလျက်ရှိပါသည်။

စုံစမ်းစစ်ဆေးမှုအတတ်ပညာသင်ကျောင်း၊ အမှုစစ်သင်တန်းအမှတ်စဉ် (၁/၂၀၂၀) သင်တန်းဆင်းပွဲတွင် ဒုတိယညွှန်ကြားရေးမှူးချုပ်က အမှာစကားပြောကြားနေစဉ်နှင့် သင်တန်းသားတစ်ဦးအား ဆုချီးမြှင့်ပေးနေစဉ်

            အထူးစုံစမ်းစစ်ဆေးရေးဦးစီးဌာနသည် စတင်ဖွဲ့စည်းချိန်မှ ယနေ့အထိ အစဉ်အဆက် တာဝန်ထမ်းဆောင်ခဲ့သူများ၏ တာဝန်သိမှု၊ တာဝန်ယူမှု၊ ဌာနကြီးနှင့်နိုင်ငံတော်အပေါ်သစ္စာရှိမှု၊ ပေးအပ်လာသည့်တာဝန်ကို မချွင်းမချန်ကျေကုန်အောင် ထမ်းဆောင်နိုင်မှုတို့ကြောင့် လူရိုသေ ရှင်ရိုသေဌာနကြီးအဖြစ် ရေရှည်ရပ်တည်နေနိုင်ခဲ့ပေသည်။ မျိုးဆက်သစ်ဌာနဝင်များအနေဖြင့် ဌာန၏သမိုင်းမရိုင်းရလေအောင်သစ္စာရှိရှိဖြင့် ဆောင်ရွက်ကြရမည်ဖြစ်သည့်အပြင် နိုင်ငံတကာ အခြေအနေ၊ ပြည်တွင်းရေးအခြေအနေနှင့် တိုးတက်ပြောင်းလဲလာသည့် နည်းပညာများကို သိရှိ နားလည်လေ့လာပြီး အရာရာတွင် ဆင်ခြင်တုံတရားကြီးစွာထား၍ အသိသတိတို့ဖြင့် စွမ်းဆောင် နိုင်ကြစေရေး ဆက်လက်ကြိုးပမ်းနေကြရမည်ဖြစ်သည်။

သန်းထွဋ်ဝင်း