အမေရိကန်ထိပ်တန်းကုမ္ပဏီကြီးများက Bitcoin ကိုရင်းနှီးမြှုပ်နှံမှုပြုလုပ်လာကြသည့်အတွက် Bitcoinတစ်ယူ နစ်၏ဈေးနှုန်းမှာ အမေရိကန်ဒေါ်လာ(၂၃,၀၀၀)အထက်သို့ စံချိန်တင် ရောက်ရှိလာခဲ့

အမေရိကန်အခြေစိုက် ထိပ်တန်း ငွေပေးချေမှုလုပ်ငန်းဖြစ်သော PayPal က Bitcoin နှင့်ပတ်သက်သည့်ငွေပေးချေမှုများကို ၂၀၂၀ ပြည့်နှစ်၊ နိုဝင်ဘာလအတွင်းမှစ၍ ခွင့်ပြုခဲ့ပြီးနောက်ပိုင်းတွင် အခြားသောအမေရိကန်ထိပ်တန်းကုမ္ပဏီကြီးများ သည် Bitcoin ကိုစတင်အသုံးပြုလာခဲ့ကြောင်း၊ အမေရိကန်ဘီလီယံနာများဖြစ်သော ပေါလ်တူဒါဂျုံးနှင့် စတန် လေဒရပ်ကင်မီလာတို့သည် ၎င်းတို့၏ရင်းနှီးမြှုပ်နှံမှုလုပ်ငန်းများ၌ Bitcoin ကိုစတင်သုံးစွဲ မည်ဟု ယခုရက် ပိုင်းအတွင်းကြေညာခဲ့ပြီး အမေရိကန်ထိပ်တန်းငွေကြေးဝန်ဆောင်မှု လုပ်ငန်းနှင့် နည်းပညာကုမ္ပဏီကြီးများ ဖြစ်သည့် Square နှင့် MicroStrategy တို့ကလည်း Bitcoin ကိုစတင်အသုံးပြုရန် ဆုံးဖြတ်ခဲ့ကြသည့်သတင်း ကြောင့် ဒီဇင်ဘာလ(၁၆)ရက်နေ့မှ စ၍ Bitcoin ဈေးနှုန်းမှာ တစ်ယူနစ်လျှင် အမေရိကန်ဒေါ်လာ(၂၀,၀၀၀)ကို ကျော်ဖြတ်သွားခဲ့ကြောင်း သိရှိရပါသည်။

၂၀၂၀ ပြည့်နှစ်၊ ဒီဇင်ဘာလ(၁၈)ရက်နေ့တွင် ကမ္ဘာ့ဈေးကွက်အတွင်း၌ Bitcoin ဈေးနှုန်းမှာ ၁၂% ထပ်မံမြင့်တက်ကာ တစ်ယူနှစ်လျှင် အမေရိကန်ဒေါ်လာ (၂၃,၄၂၁)ဖြင့် ဈေးပိတ်ခဲ့ကြောင်း၊ အဆိုပါဈေးနှုန်းသည် ယမန်နှစ်အလားတူကာလအတွင်းဖြစ်ပေါ်ခဲ့သည့် ဈေးနှုန်းနှင့်နှိုင်းယှဉ်ပါက (၃)ဆခန့်မြင့်တက်လာခြင်းဖြစ် ကြောင်း၊ အမေရိကန်ထိပ်တန်း ဘဏ်လုပ်ငန်းကြီးဖြစ်သော JP Morgan ကယခုရက်ပိုင်းအတွင်းထုတ်ပြန် သည့်ကြေညာချက် အရ အမေရိကန်အစိုးရ၏ COVID-19 ကူးစက်ရောဂါအသုံးစရိတ်ဥပဒေကြမ်းထွက်ရှိမည့် သတင်းကြောင့် အမေရိကန်ဒေါ်လာငွေကြေးဖောင်းပွမည်ကို စိုးရိမ်သောရင်းနှီးမြှုပ်နှံသူများ သည် အမေရိကန် ဒေါ်လာအစား ရွှေနှင့် Bitcoin ကိုပြောင်းလဲစုဆောင်းလျက်ရှိရာ Bitcoin ကိုစုဆောင်းသူကပိုမိုများပြားနေ သည်ဟုသိရှိရကြောင်း www.cnbc.com အင်တာနက် website တွင် ဖော်ပြပါရှိသည်။

Apple ကုမ္ပဏီမှနောက်ဆုံးဖြန့်ချီခဲ့သော IOS ဗားရှင်းအသစ်သည် Facebook ၏ကြော်ငြာဝန်ဆောင်မှုများ အပေါ်ထိခိုက်စေသောကြောင့် Facebook က ကန့်ကွက်ခဲ့

Apple ကုမ္ပဏီမှထုတ်လုပ်လျက်ရှိသော iPhone နှင့် iPad များအတွက်နောက်ဆုံးဖြန့်ချီခဲ့သည့် IOS ဗားရှင်း အသစ်များတွင်ပါရှိသည့်လုံခြုံရေးအဆင့်မြင့်တင်မှုများမှာ Facebook ၏ကြော်ငြာဝန်ဆောင်မှုများ အပေါ်ထိခိုက်လာသည့်အတွက် Facebook ကုမ္ပဏီက ယခုရက်ပိုင်းအတွင်းကန့်ကွက်ခဲ့ကြောင်း သိရှိရပါသည်။

Facebook ကုမ္ပဏီ၏ကြေညာချက်၌ Facebook တွင်ကြော်ငြာနေသည့် လုပ်ငန်းများအနက် အများစုမှာအသေးစားစီးပွားရေးလုပ်ငန်းများဖြစ်ပြီး Facebook သည်လည်း အဆိုပါလုပ်ငန်းများထံမှ ကြေငြာခဝင်ငွေအများအပြာရရှိနေခြင်းဖြစ်ကြောင်း၊ သို့သော် Apple ကုမ္ပဏီအနေဖြင့် iPhoneနှင့် iPad များအတွက်နောက်ဆုံးဖြန့်ချိခဲ့သည့် IOS ဗားရှင်းအသစ်ဖြစ်သော IOS-14 တွင် ပုဂ္ဂိုလ်ရေး လုံခြုံမှုအဆင့်မြှင့်တင်ခြင်းများ ပိုမိုတင်းကျပ်စွာ ထည့်သွင်းရေးဆွဲထားရာ အဆိုပါအဆင့်မြင့်တင်မှု များကြောင့် Facebook  ၌ကြောငြာမည့် အသေးစားစီးပွားရေးလုပ်ငန်းများ၏ ကြော်ငြာများကို အများပြည်သူတို့မှ မြင်တွေ့ကြည့်ရှုနိုင်တော့မည်မဟုတ်ကြောင်း၊ ထို့ကြောင့် Facebook တွင် ကြော်ငြာနေသည့် အသေးစားစီးပွားရေးလုပ်ငန်းများမှာ ဆုံးရှုံးမှုများဖြစ်ပေါ်လာနိုင်ကြောင်း၊ Apple အနေဖြင့် ယခုကဲ့သို့လုံခြုံရေးအဆင့်မြှင့်တင်ပြောင်းလဲမှုများပြုလုပ်ခဲ့ခြင်းသည် အင်တာနက် အသုံးပြုသူများ၏ ပုဂ္ဂိုလ်ရေးဆိုင်ရာကြော်ငြာနိုင်မှုအပေါ်၌ ထိန်းချုပ်ခြင်းပင်ဖြစ်ကြောင်း၊ Facebook သည် ၎င်း၏ App Store တွင်ပါဝင်သော အက်ပလီကေးရှင်းများအပါအဝင် ဒစ်ဂျစ်တယ် ဝန်ဆောင်မှုများကို လူအများပိုမိုအသုံးပြုလာစေရန်အတွက် ရည်ရွယ်လုပ်ဆောင်နေခြင်းဖြစ်သည်ဟု ဖော်ပြထားကြောင်းသိရှိရပါသည်။

Apple ကုမ္ပဏီသည် လွန်ခဲ့သည့်ရက်သတ္တပတ်အတွင်းဘယ်လ်ဂျီယံနိုင်ငံ၊ ဘရပ်ဆဲလ်မြို့၌ ပြုလုပ်သည့် ပုဂ္ဂိုလ်ရေးသတင်းအချက်အလက်လုံခြုံရေးဆိုင်ရာ ကွန်ဖရင့်အစည်းအဝေး၌ Apple  အနေဖြင့်နောက်ပိုင်းဖြန့်ချိမည့် IOS ဗားရှင်းများတွင် လုံခြုံရေးအဆင့်မြှင့်တင်မှုများကိုတိုးမြှင့် ပြုလုပ်ကာ အသွင်အပြင်အသစ်များဖြင့် မွမ်းမံရေးဆွဲသွားမည်ဖြစ်ကြောင်း၊ ထိုသို့ပြုလုပ်ရခြင်းမှာ နည်းပညာကုမ္ပဏီအချို့သည် ၎င်းတို့၏အက်ပလီကေးရှင်များမှတစ်ဆင့်သုံးစွဲသူများ၏ ကိုယ်ရေး အချက်အလက်များကို နည်းအမျိုးမျိုးဖြင့် ခြေရာခံရယူလျက်ရှိသောကြောင့်ဖြစ်ကြောင်း၊ Apple ကုမ္ပဏီအနေဖြင့် ယင်းအခြေအနေဖြစ်ပေါ်ခြင်းမျိုးမှကာကွယ်တားဆီးသွားမည်ဖြစ်ပြီး နောက်ပိုင်း ဖြန့်ချိမည့်  IOS ဗားရှင်းအသစ်များ၌ ပိုမိုတင်းကျပ်သည့်လုံခြုံရေးအဆင့်မြှင့်တင်မှုများဖြင့် ပြုပြင်ပြောင်းလဲမှုများပြုလုပ်သွားမည်ဟု ပြောကြားခဲ့ကြောင်း www.bangkokpost.com အင်တာနက် website တွင်ဖော်ပြပါရှိပါသည်။