တရုတ်နှစ်သစ်ကူးကာလအပြီး တရုတ်ဈေးကွက်များပြန်လည် ဖွင့်လှစ်ချိန်တွင် ကိုရိုနာဗိုင်းရပ်စ် ဂယက်ကြောင့် တရုတ်ယွမ်ငွေနှင့်စတော့ရှယ်ယာတန်ဖိုးများကျဆင်းလျက်ရှိမှု

တရုတ်နိုင်ငံ၌ တရုတ်နှစ်သစ်ကူး အားလပ်ရက်ကာလ ပြီးဆုံးပြီးနောက် ၂၀၂၀ ပြည့်နှစ်၊ ဖေဖော်ဝါရီလ(၃)ရက်တွင် စတော့ရှယ်ယာဈေးကွက်၊ ကုန်စည်ဈေးကွက်နှင့် ငွေကြေးဈေးကွက် များပြန်လည် ဖွင့်လှစ်ခဲ့ကြောင်း၊ သို့သော် လူပေါင်း (၃၀၀)ကျော် အသက်ဆုံးရှုံးခဲ့သည့် ကိုရိုနာဗိုင်းရပ်စ်ဂယက်ကြောင့် တရုတ်စတော့ရှယ်ယာများနှင့် တရုတ်ယွမ်ငွေတန်ဖိုးများ ကျဆင်းလျက် ရှိကြောင်း သိရှိရပါသည်။

၂၀၂၀ ပြည့်နှစ်၊ ဖေဖော်ဝါရီလ(၃)ရက်၊ နံနက်ပိုင်း တရုတ်ဈေးကွက်ဖွင့်ချိန်တွင် တရုတ်စတော့ရှယ်ယာများ တန်ဖိုးမှာ ၈ % မှ ၉%အထိ ကျဆင်းခဲ့ကြောင်း၊ တရုတ်ဗဟိုဘဏ်သည် ငွေကြေးဈေးကွက်အတွင်းသို့ တရုတ်နိုင်ငံသုံးယွမ်ငွေ ၁.၂ ထရီလီယံ (အမေရိကန်ဒေါ်လာ ၁၇၃ ဘီလီယံခန့်)ကို ဖြည့်တင်းပေး၍ စီးပွားရေးဆက်လက်ကျဆင်းမှု မရှိစေရန် စီစဉ်နေကြောင်း၊ တရုတ်ယွမ်ငွေတန်ဖိုးမှာလည်း ၀.၁%  ကျဆင်းပြီးအမေရိကန်တစ်ဒေါ်လာလျှင် တရုတ်ယွမ်ငွေ (၇.၀၁၁၇) လဲလှယ်မှုနှုန်းသို့ ရောက်ရှိခဲ့ကြောင်း၊ အဆိုပါ လဲလှယ်မှုနှုန်းသည် တစ်လတာ ကာလ အတွင်း ယွမ်ငွေတန်ဖိုးအနိမ့်ဆုံးဖြစ်ကြောင်းသိရှိရပါသည်။

တရုတ်နိုင်ငံ၊ ဝူဟန်မြို့တွင် ကိုရိုနာဗိုင်းရပ်စ် ကူးစက်ခံရသူများအတွက် ကုတင်(၁၀၀၀)ဆန့် သီးသန့်ဆေးရုံကို ဖေဖော်ဝါရီလ(၂)ရက်နေ့တွင် စတင်ဖွင့်လှစ်ခဲ့ပြီး ဆေးဝါးကုသမှုများ စတင်ပြု လုပ်လျက် ရှိကြောင်း၊ အဆိုပါ ဆေးရုံကို အလုပ်သမားအင်အား ထောင်ပေါင်းများစွာ အသုံးပြု၍ (၁၀)ရက်အတွင်းအပြီး သတ်ဆောက်လုပ်ခဲ့ခြင်းဖြစ်ပြီး ယခုအခါ တရုတ်ပြည်သူလွတ်မြောက် ရေးတပ်မတော်မှ ဆေးဝန်ထမ်း (၉၅၀)ဦးအပါအဝင် ဆေးဝန်ထမ်းအင်အားစုစုပေါင်း (၁,၄၀၀)ဦးဖြင့် ကျန်းမာရေးစောင့်ရှောက်မှုများ လုပ်ဆောင်နေကြောင်း သိရှိရပါသည်။

၂၀၂၀ ပြည့်နှစ်၊ ဖေဖော်ဝါရီလ(၃)ရက်တွင် ကြေညာသည့် စာရင်းအချက်အလက်များအရ ယခုအခါ တရုတ်နိုင်ငံတွင် ကိုရိုနာဗိုင်းရပ်စ်ကြောင့် သေဆုံးသူ (၃၆၁)ဦး ရှိပြီး ရောဂါကူးစက်ခံရသူ (၁၇,၂၀၇)ဦးခန့်ရှိသည်ဟု သိရှိရကြောင်း၊ တရုတ်နိုင်ငံပြင်ပတွင် ရောဂါကူးစက်ခံရသူ (၁၈၆)ဦးရှိပြီး ဖိလစ်ပိုင်နိုင်ငံတွင် သေဆုံးသူ(၁)ဦးရှိခဲ့ကြောင်း၊ ထို့ကြောင့်လက်ရှိအချိန်တွင်ကိုရိုနာဗိုင်းရပ်စ် သည် ကမ္ဘာတစ်ဝန်းရှိ နိုင်ငံ/ဒေသကြီး(၂၇)ခုသို့ ပျံနှံ့လျက်ရှိပြီး ရောဂါကူးစက်ခံရသူပေါင်းမှာ (၁၇,၃၉၃) ရှိကြောင်းသိရှိရပါသည်။

ယခုအခါစက်မှုထိပ်သီး (၇)နိုင်ငံဖြစ်သော ကနေဒါ ၊ပြင်သစ်၊ ဂျာမနီ ၊ အီတလီ ၊အင်္ဂလန်၊ ဂျပန် နှင့် အမေရိကန်ပြည်ထောင်စုတို့တွင် ကိုရိုနာဗိုင်းရပ်စ်ပျံ့နှံ့နေပြီး ဖြစ်သောကြောင့် စက်မှုထိပ်သီး (၇)နိုင်ငံ ပူးပေါင်း၍ ရောဂါတိုက်ဖျက်ရေးအစီအစဉ်များ ပြုလုပ်ရန် ပြင်ဆင်နေကြောင်း သိရှိရပါသည်။

ထိုင်းနိုင်ငံတွင် ကိုရိုနာဗိုင်းရပ်စ် ကူးစက်ခံရသူ(၁၉)ဦးခန့်ရှိပြီး ၊ အသက်အရွယ်ကြီးမြင့်သည့် တရုတ်အမျိုးသားဝေဒနာရှင်အားတုပ်ကွေးကုသဆေးနှင့် HIV ဆေးများကို ရောစပ်ထားသော ဆေးများဖြင့် ကုသပေးရာ၌ အခြေအနေတိုးတက်မှုများ ရှိရုံသာမက (၄၈)နာရီခန့်အကြာတွင် ရောဂါပျောက်ကင်းသွားကြောင်းတွေ့ရှိရသည်ဟုထိုင်းဆရာဝန်ကြီးများကြေညာခဲ့ကြောင်းသိရှိရပါသည်။

အမေရိကန်ပြည်ထောင်စု၊ နယူးဇီလန်နှင့် အစ္စရေးနိုင်ငံတို့သည် တရုတ်နိုင်ငံမှ တစ်ဆင့် ဝင်ရောက်လာသည့် နိုင်ငံခြားသားများအား ဖေဖော်ဝါရီလ(၂)ရက်နေ့မှစ၍ ပြည်ဝင်ခွင့် တားမြစ် ပိတ်ပင်ခဲ့ကြောင်း၊ တရုတ်နိုင်ငံနှင့် နယ်နိမိတ်ချင်းဆက်စပ်နေသော မွန်ဂိုလီယားနိုင်ငံနှင့် နီပေါနိုင်ငံတို့သည်လည်း နယ်စပ်ဂိတ်များကို ပိတ်၍လူအဝင်အထွက် မပြုလုပ်ရန် တားမြစ်ခဲ့ကြောင်းဖြင့် www.cnbc.com အင်တာနက် website တွင်ဖော်ပြထားပါသည်။

ကိုရိုနာဗိုင်းရပ်စ်ပြဿနာကြောင့် ကမ္ဘာ့ရေနံဈေးနှုန်းများ ကျဆင်းနေသည့်အတွက် အိုပက်အဖွဲ့နှင့် ရုရှားနိုင်ငံတို့ အရေးပေါ်တွေ့ဆုံကာ ရေနံထုတ်လုပ်မှု ထပ်မံလျှော့ချရေးကို ဆွေးနွေးဖွယ်ရှိမှု

ကိုရိုနာဗိုင်းရပ်စ် ပျံ့နှံ့မှုပြဿနာကြောင့် တရုတ်နိုင်ငံ၏ စီးပွားရေးသာမက ကမ္ဘာ့စီးပွားရေး အခြေအနေအပေါ် စိုးရိမ်ပူပန်မှုများဖြစ်ပေါ်လာကြပြီး ကမ္ဘာ့ရေနံဈေးနှုန်းများမှာ ၂၀၂၀ ပြည့်နှစ်၊ ဇန်နဝါရီလအတွင်း ၂၁.၄% ခန့်ကျဆင်းခဲ့ကြောင်း၊ ထို့ကြောင့် အိုပက်အဖွဲ့နှင့် ရုရှားနိုင်ငံတို့သည် လာမည့်ရက်သတ္တပတ်အတွင်း အရေးပေါ်အစည်းအဝေးပြုလုပ်ကာ နေ့စဉ်ရေနံထုတ်လုပ်မှုကို ပိုမို လျှော့ချသွားရန် ဆွေးနွေးဖွယ်ရှိကြောင်း သိရှိရပါသည်။

ရုရှားနိုင်ငံ စွမ်းအင်ဝန်ကြီး အလက်ဇန္ဒါးနိုဗက်ခ်က ယခုရက်ပိုင်းအတွင်းပြောကြားရာ၌         အိုပက်အဖွဲ့သည် ၂၀၂၀ ပြည့်နှစ်၊ မတ်လ(၅)ရက်နေ့တွင် ပုံမှန်အစည်းအဝေးကျင်းပရန် မူလက စီစဉ်ထားပြီးဖြစ်သော်လည်း ကိုရိုနာဗိုင်းရပ်စ်ပျံ့နှံ့မှုကြောင့် ကမ္ဘာတစ်ဝန်း ရေနံဝယ်လိုအား အပေါ် ထိခိုက်လာနိုင်သည့် အခြေအနေများကို ရင်ဆိုင်ဖြေရှင်းနိုင်ရန်အတွက် တွေ့ဆုံ ဆွေးနွေးမည့် ကိစ္စကို ယခု ဖေဖော်ဝါရီလအတွင်း ရှေ့တိုး၍ ရွှေ့ဆိုင်းပြုလုပ်ဖွယ်ရှိကြောင်း၊ ရုရှားနိုင်ငံအနေဖြင့် တွေ့ဆုံ ဆွေးနွေးရန် အဆင်သင့်ရှိနေပြီး ဆော်ဒီအာရေဗျနိုင်ငံနှင့် ဆွေးနွေးညှိနှိုင်းလျက်ရှိကြောင်း၊ သို့သော် ရေနံထုတ်လုပ်သည့် နိုင်ငံများအနေဖြင့် ကိုရိုနာဗိုင်းရပ်စ်ပြဿနာမှာ ကမ္ဘာ့ရေနံဈေးကွက်အပေါ် မည်၍မည်မျှ ဆိုးကျိုး သက်ရောက် မည်ကို ချိန်ဆတွက်ချက်နိုင်ရေးအတွက် ရက်ပေါင်းများစွာ စောင့်ကြည့်ရန် လိုအပ်နေသေး သည်ဟု ပြောကြားခဲ့ကြောင်း သိရှိရပါသည်။

လက်ရှိအချိန်၌ ကိုရိုနာဗိုင်းရပ်စ်ပြဿနာကြောင့် တရုတ်နိုင်ငံ၏ ရေနံဝယ်လိုအားမှာ တစ်နေ့လျှင် ပုံမှန်ဝယ်ယူမှုပမာဏအောက် စည်ပေါင်း (၂၅၀,၀၀၀)ခန့် လျော့နည်းသွား ခဲ့ကြောင်း၊ ၂၀၂၀ ပြည့်နှစ်၊ ဖေဖော်ဝါရီလ(၁)ရက်(စနေနေ့)တွင် နယူးယောက်ဈေးကွက်၌ WTI ရေနံစိမ်း တစ်စည်၏ ကြိုတင်ရောင်းဝယ်မှုဈေးနှုန်းမှာ တစ်စည်လျှင် အမေရိကန်ဒေါ်လာ (၅၁.၅၆)ဖြင့် လည်းကောင်း၊ လန်ဒန်ဈေးကွက်၌ ဘရန့်ရေနံဈေးနှုန်းမှာ တစ်စည်လျှင် အမေရိကန်ဒေါ်လာ (၅၈.၁၆) ဖြင့်လည်းကောင်း အသီးသီးဈေး ပိတ်သွားခဲ့ကြောင်း၊ ယခု ရက်သတ္တပတ်အတွင်း WTI နှင့် ဘရန့်ရေနံဈေးနှုန်းများမှာ ၄.၈၅% နှင့် ၄.၁၇% စီ အသီးသီး ကျဆင်းခဲ့ကြောင်း www.cnbc.com အင်တာနက် website တွင် ဖော်ပြထားပါသည်။

နိုဗယ်ကိုရိုနာဗိုင်းရပ်စ်ကြောင့် တရုတ်နိုင်ငံတွင် သေဆုံးသူ(၁၃၂)ဦးအထိမြင့်တက်လာပြီး ရောဂါ ကူးစက်ခံရသူပေါင်း(၆,၀၀၀)ဦးခန့်ရှိနေချိန်တွင် ဒိန်းမတ်သတင်းစာ ကာတွန်းကြောင့် တရုတ် အစိုးရမှာ အမျက်ဒေါသထွက်လျက်ရှိမှု

တရုတ်နိုင်ငံအမျိုးသားကျန်းမာရေးကော်မရှင်က ၂၀၂၀ ပြည့်နှစ်၊ ဇန်နဝါရီလ(၂၉)ရက်တွင် ထုတ်ပြန်သည့် ကြေညာချက်၌ တရုတ်နိုင်ငံတွင် နိုဗယ်ကိုရိုနာဗိုင်းရပ်စ်ကြောင့် သေဆုံးသူ (၁၃၂)ဦး အထိမြင့်တက်လာခဲ့ပြီး ရောဂါကူးစက်ခံရသူပေါင်း (၅,၉၇၄)ဦးခန့်အထိ ရှိကာ လူပေါင်း (၉,၀၀၀) ကျော်ကို ရောဂါကူးစက်ခြင်းခံရသည့် သံသယဖြင့် စောင့်ကြည့်စစ်ဆေးမှုများ ပြုလုပ် နေသည်ဟု ဖော်ပြထားကြောင်း၊ တရုတ်အာဏာပိုင်များသည် ယခုအခါ ဝူဟန်မြို့နှင့်တကွ အနီးပတ်ဝန်းကျင်ရှိ မြို့များမှ မြို့သူမြို့သားများကို ခရီးသွားလာခွင့်ပိတ်ပင်ထားသည့်အတွက် လူပေါင်းသန်း(၅၀)ခန့်မှာ ပိတ်မိနေကြောင်း သိရှိရပါသည်။

အမေရိကန်ပြည်ထောင်စုသည် ဝူဟန်မြို့တွင် ပိတ်မိနေသည့် အမေရိကန်နိုင်ငံသား(၂၄၀)ဦးကို လည်းကောင်း၊ ဂျပန်နိုင်ငံသည်လည်း ဝူဟန်မြို့ရှိ ဂျပန်နိုင်ငံသား(၂၀၀)ဦးကို လည်းကောင်း လေယာဉ်များဖြင့် အသီးသီးသွားရောက် ခေါ်ထုတ်ခဲ့ကြောင်း၊ ဘေဂျင်းမြို့ရှိ အမေရိကန်သံရုံး သည် သံရုံးဝန်ထမ်းများအား အချိန်မရွေးရွှေ့ပြောင်းနိုင်ရန်အတွက် လေယာဉ်တစ်စီးကို အသင့်ပြင်ထားပြီး ဥရောပသမဂ္ဂသည်လည်း ဥရောပတိုက်သားများအား မိခင်နိုင်ငံများသို့ အချိန်မရွေးပို့ဆောင်နိုင်ရန် အတွက် လေယာဉ်(၂)စီးကိုအသင့်ပြင်ထားကြောင်း၊ အမေရိကန် အစိုးရသည် အမေရိကန်ပြည်ထောင်စု နှင့်တရုတ်နိုင်ငံတို့ အကြားပြေးဆွဲနေသော လေကြောင်း ခရီးစဉ်အားလုံးကို ရပ်ဆိုင်းရန် စဉ်းစား နေကြောင်း၊ အမေရိကန်ပြည်ထောင်စုနည်းတူ ဟောင်ကောင်ကျွန်းသည်လည်း တရုတ်ပြည်မကြီးသို့ ပြေးဆွဲနေသည့် ရထားလိုင်းများ၊ ကားလိုင်းများ နှင့် သင်္ဘောခရီးစဉ်များကိုရပ်ဆိုင်းခဲ့ကြောင်း  သိရှိရပါသည်။

တရုတ်နိုင်ငံ၌ နိုဗယ်ကိုရိုနာဗိုင်းရပ်စ်ကြောင့် လူအများစိုးရိမ်ပူပန်နေချိန်တွင်ဒိန်းမတ်နိုင်ငံထုတ် ဂျာလန်ပိုစတန်သတင်းစာ (Jyllands-Posten) ၌ ဖော်ပြခဲ့သည့် ကာတွန်းတစ်ခုကြောင့် တရုတ် အာဏာပိုင်များ အမျက်ဒေါသထွက်လျက်ရှိကြောင်း၊ ၂၀၂၀ ပြည့်နှစ်၊ ဇန်နဝါရီလ (၂၇)ရက် နေ့ထုတ် ဂျာလန်ပိုစတန်သတင်းစာတွင် ဖော်ပြခဲ့သည့်ကာတွန်းဆရာ နီးလ်ဘိုဘိုဂျက်ဆန်၏ ကာတွန်း၌ တရုတ်နိုင်ငံတော် အလံပုံကိုဖော်ပြထားပြီးအလံတွင်ပါရှိသော ကြယ်ပွင့်များ၏ နေရာ တွင် နိုဗယ်ကိုရိုနာဗိုင်းရပ်စ်ပုံများကို အစားထိုးဖော်ပြထားကြောင်း၊ ဒိန်းမတ်နိုင်ငံရှိ တရုတ်သံရုံး သည် အဆိုပါ ကာတွန်းနှင့်ပတ်သက်၍ ပြင်းထန်စွာကန့်ကွက်ခဲ့ပြီး ကာတွန်းဖော်ပြချက်သည် တရုတ်နိုင်ငံကို စော်ကားခြင်းဖြစ်သကဲ့သို့ တရုတ်ပြည်သူများအား စိတ်ခံစားချက် နာကျင်အောင်လုပ်ဆောင်ခြင်းဖြစ်သည်ဟု ကြေညာခဲ့ကြောင်း၊ တရုတ်သံရုံး၏ ကြေညာချက်၌ အဆိုပါကာတွန်း ဖော်ပြချက်သည် လွတ်လပ်စွာပြောဆိုခွင့်အတွက် ချမှတ်ထားသော ကျင့်ဝတ်၊ သိက္ခာဘောင်ကိုကျော်လွန်သွားပြီ ဖြစ်သောကြောင့် သတင်းစာတိုက်နှင့် ကာတွန်းဆရာတို့ အနေဖြင့် တရုတ်ပြည်သူများကို လူသိရှင်ကြားဝန်ချတောင်းပန်ရန်တောင်းဆိုထားကြောင်း၊ ဂျာလန်ပိုစတန် သတင်းစာသည် ဒိန်းမတ်နိုင်ငံရေးသမားများက ကျောထောက် နောက်ခံ ပြုထားသော သတင်းစာ ဖြစ်ကြောင်း၊ သတင်းစာ၏ အယ်ဒီတာချုပ်က ကာတွန်းဆရာ၏ တင်ပြချက်မှာပကတိဖြစ်ပေါ် နေသော အမှန်တရားကို စိတ်ကူးစိတ်သန်းကွန့်မြူး၍ အများပြည်သူ သိရှိအောင် တင်ပြခဲ့ခြင်းဖြစ်ရာ ယဉ်ကျေးမှု၊ ဓလေ့ထုံးထမ်းအရ တင်ပြပုံအနေအထား ကွဲလွဲခြင်းသာဖြစ်ပြီး မှားယွင်းသည့် တင်ပြချက်အဖြစ် မသတ်မှတ် နိုင်သောကြောင့် မိမိတို့သတင်းစာတိုက်အနေဖြင့် တရုတ်နိုင်ငံအား တောင်းပန်ရန် အကြောင်း မရှိဟုဖော်ပြထားကြောင်း  သိရှိရပါသည်။

ဂျာလန်ပိုစတန်သတင်းစာနှင့် နီးလ်ဘိုဘိုဂျက်ဆန်တို့သည် ၂၀၀၅ ခုနှစ်ကလည်း တမန်တော် မိုဟာမက်အား သရော်သည့်ကာတွန်းများ ထည့်သွင်းဖော်ပြခဲ့သောကြောင့် အဆိုပါ ကာတွန်းများ ကို ကျေနပ်မှုမရှိသည့် အစ္စလာမ်ဘာသာဝင်များက မွတ်စလင်နိုင်ငံများတွင် ဆူပူဆန္ဒပြမှုများ ပြုလုပ်ခဲ့ကြကြောင်းဖြင့် www.channelnewsasia.com အင်တာနက် website တွင်ဖော်ပြ ထားပါသည်။

ကိုရိုနာဗိုင်းရပ်စ်ဂယက်ကြောင့် ကမ္ဘာ့ရေနံဝယ်လိုအား ဒုတိယအများဆုံးတရုတ်နိုင်ငံ၏ ရေနံဝယ်ယူမှုကျဆင်းနေသည့်အတွက်ရေနံစျေးနှုန်းများလအတန်ကြာ ဆက်လက်အားပျော့ဖွယ်ရှိမှု

တရုတ်နိုင်ငံကျန်းမာရေးဝန်ကြီးဌာနမှ ၂၀၂၀ ပြည့်နှစ်၊ဇန်နဝါရီလ(၂၈)ရက်တွင် ထုတ်ပြန်သည့် ကြေညာချက်၌ သေဆုံးသူ(၁၀၆)ဦးအထိရှိပြီး ရောဂါဖြစ်ပွားသူအရေအတွက်မှာ(၄,၅၁၅)ဦးခန့်ရှိရာ တစ်ရက်တာကာလအတွင်း (၂)ဆခန့်များပြားလာခဲ့သည်ဟု ဖော်ပြထားကြောင်း၊ ကမ္ဘာ့ကျန်းမာရေးအဖွဲ့(WHO)၏ ညွှန်ကြားရေးမှူးချုပ် ဒေါက်တာတက်ဒရိုစ်အက်ဒ်ဟန်နွမ်သည် တရုတ်နိုင်ငံသို့ ရောက်ရှိနေပြီး တရုတ်အစိုးရတာဝန်ရှိသူများနှင့် ဆွေးနွေးလျက်ရှိကြောင်း၊ ကိုရိုနာဗိုင်းရပ်စ် အန္တရာယ်နှင့်ပတ်သက်၍ WHO အနေဖြင့် ကမ္ဘာတစ်ဝန်း ကူးစက်ရောဂါသတိပေးချက်ထုတ်ပြန်ကြရန် နိုင်ငံအများစုကတောင်းဆိုလျက်ရှိသော်လည်း WHO ကထုတ်ပြန် ကြေညာခြင်း မရှိသေးကြောင်း၊ တရုတ်အစိုးရသည်ရောဂါ အများဆုံးဖြစ်ပွားနေသည့် ဝူဟန်မြို့ တည်ရှိရာ ဟူပေ ပြည်နယ်သို့ ဆေးဝန်ထမ်း(၁,၆၀၀)ခန့်ထပ်မံစေလွှတ်ခဲ့ပြီးဟူပေပြည်နယ်အတွင်း ကိုရိုနာဗိုင်းရပ်စ် ကုသရေးလုပ်ငန်းများအတွက် ယွမ်ငွေ ၁ဘီလီယံ (အမေရိကန်ဒေါ်လာ ၁၄၅သန်း) အသုံးစရိတ် ထုတ်ပေးခဲ့ကြောင်း၊ ဟူပေပြည်နယ်အတွင်း ကိုရိုနာဗိုင်းရပ်စ်အန္တရာယ် ဖြစ်ပွားနေသည့်အပေါ် စိုးရိမ်ပူပန်မှုများကြောင့် Honda နှင့် Nissan အပါအဝင် ကမ္ဘာ့ထိပ်တန်းမော်တော်ယာဉ်ကုမ္ပဏီကြီး များသည် ဟူပေပြည်နယ်အတွင်းရှိ ၎င်းတို့၏ မော်တော်ယာဉ် စက်ရုံများကို ပိတ်သိမ်းရန် စီစဉ် နေကြောင်း သိရှိရ ပါသည်။

အမေရိကန်သမ္မတဒေါ်နယ်ထရန့်သည် ကိုရိုနာဗိုင်းရပ်စ်အန္တရာယ်ရင်ဆိုင်နေရသော တရုတ် နိုင်ငံအား ကူညီရန်အသင့်ရှိနေသည်ဟု ကြေညာခဲ့ကြောင်း၊ အမေရိကန်နိုင်ငံခြားရေးဝန်ကြီးဌာန သည် တရုတ်နိုင်ငံသို့သွားရောက်မည့် အမေရိကန်နိုင်ငံသားများအတွက် ခရီးသွားလာမှုဆိုင်ရာ လုံခြုံရေးအကြံပေးချက်ကို အဆင့်(၂) မှ အဆင့်(၃)သို့ တိုးမြှင့်ခဲ့ပြီး အကြိမ်ကြိမ်စဉ်းစားပြီးမှသာ သွားရောက်ရန် သတိပေးခဲ့ကြောင်း၊ ၂၀၂၀ ပြည့်နှစ်၊ ဇန်နဝါရီလ (၂၇)ရက်တွင် ဂျာမနီ၊ နီပေါ၊ ကမ္ဘောဒီးယားနှင့် သီရိလင်္ကာနိုင်ငံတို့၌လည်း ကိုရိုနာဗိုင်းရပ်စ်ဖြစ်ပွားနေသူများကို စတင်တွေ့ရှိ ခဲ့သဖြင့် ယခုအခါ ကမ္ဘာပေါ်၌ ကိုရိုနာဗိုင်းရပ်စ်မှာ နိုင်ငံပေါင်း (၁၇) နိုင်ငံသို့ ပျံနှံ့နေပြီဖြစ် ကြောင်း  သိရှိရပါသည်။

အိန္ဒိယနိုင်ငံ၌လည်း ယခုအချိန်သည် ဗုဒ္ဓဂါယာသို့ ကမ္ဘာတစ်ဝန်းမှ ဘုရားဖူးများ လာရောက် သည့်အချိန်ဖြစ်သောကြောင့် ဘီယာပြည်နယ်အစိုးရသည် ဂါယာလေဆိပ်တွင် အပူချိန်တိုင်း စောင့်ကြည့်ကင်မရာများတပ်ဆင်၍ ဘုရားဖူးများအား စစ်ဆေးရန်စီစဉ်နေကြောင်း၊ ဂါယာလေဆိပ် သည် တရုတ်နိုင်ငံရှိမြို့ကြီးများနှင့် တိုက်ရိုက်လေကြောင်းခရီးချိတ်ဆက်ထားခြင်းမရှိသော်လည်း မြန်မာ၊ ဘူတန်နှင့် ဗီယက်နမ်နိုင်ငံတို့မှ တိုက်ရိုက်လေကြောင်း ခရီးစဉ်များ ဆိုက်ရောက်သည့်နေရာ ဖြစ်သောကြောင့် ယခုကဲ့သို့စီစဉ်နေခြင်းဖြစ်ကြောင်း  သိရှိရပါသည်။

ကိုရိုနာဗိုင်းရပ်စ်ပြဿနာကို ကြုံတွေ့နေရသော တရုတ်နိုင်ငံသည် နောက်ဆက်တွဲ ဂယက် အဖြစ် စီးပွားရေးကျဆင်းမှုများနှင့်အတူ ရေနံဝယ်လိုအားပါ ကျဆင်းလျက်ရှိကြောင်း၊ တရုတ် နိုင်ငံသည် ကမ္ဘာပေါ်၌ ဒုတိယမြောက်စီးပွားရေးအင်အားကြီးနိုင်ငံဖြစ်သည့်အပြင် ရေနံသုံးစွဲမှုမှာလည်း ဒုတိယမြောက် အများဆုံးနိုင်ငံဖြစ်ကြောင်း၊ တရုတ်နိုင်ငံသည် ၂၀၁၉ ခုနှစ်အတွင်း နေ့စဉ် ရေနံ စည်ပေါင်း (၁၀.၁၂) သန်းခန့် ပြင်ပမှပုံမှန်ဝယ်ယူတင်သွင်းခဲ့သော်လည်း ယခုအခါ ကိုရိုနာဗိုင်းရပ်စ် ပြဿနာကြောင့် ရေနံဝယ်လိုအားမှာ စတင်ကျဆင်းလျက်ရှိကြောင်း၊ တရုတ်နိုင်ငံ၏ ရေနံဝယ်လိုအား လျော့နည်းလာသည်ကို အကြောင်းပြု၍ ကမ္ဘာ့ရေနံဈေးနှုန်းများဆက်တိုက်ကျဆင်းလျက်ရှိကြောင်း  သိရှိရပါသည်။

၂၀၂၀ ပြည့်နှစ်၊ ဇန်နဝါရီလ (၂၈) ရက်တွင် နယူးယောက်ဈေးကွက်၌ WTI ရေနံစိမ်းဈေးနှုန်းမှာ ၁.၉% ကျဆင်းပြီး တစ်စည်လျှင် အမေရိကန်ဒေါ်လာ (၅၃.၁၄) သို့လည်းကောင်း၊ ဘရန့်ရေနံစိမ်းဈေးနှုန်းမှာ ၂.၅% အထိကျဆင်းပြီး တစ်စည်လျှင် အမေရိကန်ဒေါ်လာ (၅၉.၁၆)သို့ လည်းကောင်းအသီးသီးရောက်ရှိခဲ့ကြောင်း၊ အဆိုပါစျေးနှုန်းများသည် (၃)လတာကာလအတွင်း အနိမ့်ဆုံးဈေးနှုန်းများဖြစ်ကြောင်း၊ တရုတ်နိုင်ငံ၏ စီးပွားရေးအခြေအနေကြောင့် ရေနံဈေးနှုန်း များမှာ လာမည့်လအတန် အကြာအထိ ဆက်လက်အားပျော့နေလိမ့်မည်ဟု ရေနံဈေးကွက် လေ့လာ သူများက ခန့်မှန်းထားကြကြောင်း၊ ဆော်ဒီအာရေဗျနိုင်ငံ အပါအဝင် ရေနံထုတ်လုပ်သည့် နိုင်ငံများသည် ရေနံဝယ်လိုအားလျော့ကျလာခြင်း နှင့်ရေနံဈေးနှုန်းများကျဆင်းနေခြင်းတို့အပေါ် စိုးရိမ်ပူပန်လျက် ရှိပြီး လိုအပ်ပါက ကမ္ဘာပေါ်ရှိ ရေနံ ထုတ်လုပ်သောနိုင်ငံများအားလုံး စုရုံးကာ ဆွေးနွေးတိုင်ပင် သွားရန် စဉ်းစားလျက်ရှိကြောင်းဖြင့် www.cnbc.com အင်တာနက် website တွင် ဖော်ပြထားပါသည်။

ထိုင်းနိုင်ငံအပါအဝင် အာရှဒေသရှိခရီးသွားလုပ်ငန်းကဏ္ဍများအပေါ် ဝူဟန်ဗိုင်းရပ်စ်ပြဿနာ ကြောင့် ဆိုးကျိုးသက်ရောက်စေကာထိုင်းဘတ်ငွေ(၁၀၀)ဘီလီယံခန့် ဝင်ငွေဆုံးရှုံးမှုများ ဖြစ်ပေါ် နိုင်မှု

၂၀၁၉ ခုနှစ်၊ဒီဇင်ဘာလမှ ၂၀၂၀ ပြည့်နှစ်၊ ဇန်နဝါရီလ(၂၇)ရက်အထိကာလအတွင်း ဝူဟန်ဗိုင်းရပ်စ်ကူးစက်ခံရမှုကြောင့် တရုတ်နိုင်ငံ၌ သေဆုံးသူအရေအတွက်မှာ (၈၁)ဦးအထိ မြင့်တက်လာခဲ့ပြီး သေဆုံးသူ (၈၁)ဦးအနက် (၇၆)ဦးမှာ ဝူဟန်မြို့တည်ရှိရာ ဟူပေပြည်နယ်မှ ဖြစ်ပြီး ကျန်(၅)ဦးမှာ မူဟိုင်နန်ကျွန်းအပါအဝင် အခြားသောဒေသများမှ ဖြစ်ကြောင်း၊ ရောဂါ ကူးစက်ခံထားရသူအရေအတွက်မှာလည်း (၂၇၀၀)ဦးကျော်သို့ ရောက်ရှိနေပြီး အဆိုပါပမာဏ၏ ထက်ဝက်ခန့်မှာလည်း ဟူပေပြည်နယ်မှပင်ဖြစ်ကြောင်း၊ လက်ရှိအချိန်တွင် ဝူဟန်ဗိုင်းရပ်စ်သည် တရုတ်နိုင်ငံ၌သာမကထိုင်းနိုင်ငံအပါအဝင် အခြားကမ္ဘာ့နိုင်ငံပေါင်း(၁၄)နိုင်ငံသို့ပင် ကူးစက်ပျံ့နှံ့ နေပြီဟု သိရှိရပါသည်။

ဝူဟန်ဗိုင်းရပ်စ်ပြဿနာသည် ထိုင်းနိုင်ငံအပါအဝင် အာရှဒေသရှိခရီးသွားလုပ်ငန်းများ အတွက် ထိုင်းဘတ်ငွေ ၁၀၀ ဘီလီယံ (အမေရိကန်ဒေါ်လာ ၃.၂၆၀ ဘီလီယံ)ခန့် ရှိသော ဝင်ငွေပမာဏကို ဆုံးရှုံးရနိုင်သည်ဟု ထိုင်းနိုင်ငံရှိရန်ဂျစ်တက္ကသိုလ်မှ စီးပွားရေးသုတေသနဌာန ညွှန်ကြားရေးမှူး အာနူဆွန်းန်တာမာဂျားက ၂၀၂၀ ပြည့်နှစ်၊ ဇန်နဝါရီလ(၂၆)ရက်တွင် ပြောကြား ခဲ့ကြောင်း သိရှိ ရပါသည်။

အာနူဆွန်းန်တာမာဂျားကပြောကြားရာ၌ ဝူဟန်ဗိုင်းရပ်စ် ကူးစက်ပျံ့နှံ့မှုပြဿနာကို ၂၀၂၀ ပြည့်နှစ်၊ မတ်လဆန်းပိုင်းတွင် ထိန်းချုပ်နိုင်မည်ဆိုပါက ထိုင်းနိုင်ငံ၏ ခရီးသွား လုပ်ငန်း အပါအဝင် ဆက်စပ် စီးပွားရေးလုပ်ငန်းများနှင့် အာရှဒေသရှိအခြားသောနိုင်ငံများ၏ ခရီးသွား လုပ်ငန်း ကဏ္ဍများအတွက် ဝင်ငွေပမာဏထိုင်းဘတ်ငွေအနည်းဆုံး (၈၀)ဘီလီယံမှ အများဆုံး (၁၀၀) ဘီလီယံခန့်အထိ ဆုံးရှုံးရဖွယ်ရှိကြောင်း၊ သို့သော်လာမည့် မတ်လဆန်းပိုင်းအထိ ဝူဟန်ဗိုင်းရပ်စ် ပျံ့နှံ့မှုကိုထိန်းချုပ်နိုင်ခြင်းမရှိပါကထိုင်းနိုင်ငံနှင့်အခြားသောအာရှနိုင်ငံများ၏ ခရီးသွားလုပ်ငန်းများအတွက် ဝင်ငွေဆုံးရှုံးရမှုပမာဏမှာအဆိုပါပမာဏထက် ပိုမိုများပြား နိုင်ကြောင်း၊ ဝူဟန်ဗိုင်းရပ်စ် ပျံ့နှံ့မှု ပြဿနာ၏ ဆိုးကျိုးသက်ရောက်မှုသည် လွန်ခဲ့သော (၁၇)နှစ် ခန့်က ဖြစ်ပွားခဲ့သည့် ကူးစက်မြန် ပြင်းထန်ဆိုးရွားသောအသက်ရှုလမ်းကြောင်း ရောဂါ(SARS) ထက် ပိုမိုပြင်းထန်နိုင်ခြေရှိကြောင်း၊ ယခု ၂၀၂၀ ပြည့်နှစ်အတွင်း အာရှဒေသရှိ ခရီးသွားလုပ်ငန်း ကဏ္ဍ တိုးတက်မှုပမာဏမှာ ၇% ခန့် အထိရှိနိုင်သည်ဟု ကမ္ဘာ့ခရီးသွားလုပ်ငန်းဆိုင်ရာ ကုလသမဂ္ဂအဖွဲ့အစည်းကခန့်မှန်းထားသော်လည်း ဝူဟန်ဗိုင်းရပ်စပ်ပျံ့နှံ့မှုပြဿနာ၏ ဂယက်ကြောင့် အာရှခရီးသွားလုပ်ငန်းကဏ္ဍတိုးတက်မှုပမာဏမှာ ၅% အောက်သို့ပင် ကျဆင်း နိုင်သည် ဟုပြောကြားခဲ့ကြောင်းသိရှိရပါသည်။

ထိုင်းအစိုးရသည် ယခု ၂၀၂၀ ပြည့်နှစ်အတွင်းထိုင်းနိုင်ငံသို့ ကမ္ဘာလှည့်ခရီးသည် ဝင်ရောက်မှု ပမာဏမှာ (၄၁.၈)သန်းခန့်ရှိရန်နှင့် ခရီးသွားလုပ်ငန်းကဏ္ဍမှ ဝင်ငွေရရှိမှုပမာဏမှာ ထိုင်းဘတ်ငွေ (၂.၂)ထရီလီယံခန့်အထိရရှိရန် မျှော်မှန်းထားကြောင်း၊ သို့သော် ဝူဟန်ဗိုင်းရပ်စ် ပျံ့နှံ့မှုနှင့်ပတ်သက်၍ တရုတ်အာဏာပိုင်များသည် ခရီးသွားလာရေးဆိုင်ရာ တားမြစ်ပိတ်ပင်မှု များ ပြုလုပ်နေပြီဖြစ်ရာ ထိုင်းနိုင်ငံသို့ တရုတ်နိုင်ငံသားခရီးသွားများ ဝင်ရောက်မှုပမာဏမှာ ခရီးသည် ဦးရေ(၁)သန်းမှ(၂)သန်းခန့်အထိလျော့ကျသွားနိုင်ကြောင်းသိရှိရပါသည်။

ယခုအခါ တရုတ်အစိုးရသည် ရောဂါပျံ့နှံ့မှုပိုမိုမဖြစ်ပေါ်စေရန် ရည်ရွယ်၍ တရုတ်နှစ်သစ်ကူး ကာလအားလပ်ရက်ကို (၃)ရက်တိုး၍ ၂၀၂၀ ပြည့်နှစ်၊ ဖေဖော်ဝါရီလ(၂)ရက်နေ့အထိ တိုးမြှင့် သတ်မှတ်ခဲ့ပြီး ဟူပေပြည်နယ်တစ်ခုလုံးအား ခရီးသွားလာမှုများဖြတ်တောက်ရပ်ဆိုင်းခဲ့ကြောင်း၊ ဟူပေပြည်နယ်အပြင် ရှန်ဒေါင်းပြည်နယ်အပါအဝင် ဘေကျင်း၊ ရှန်ဟိုင်း၊ ရှီအန်းနှင့် တီယန်ကျင်း မြို့ကြီးများတွင် ခရီးရှည်ပြေးဆွဲသော ခရီးသည်တင်ဘတ်စ်ကားများ ဝင်/ထွက်သွားလာမှုကို ပိတ်ပင်ထားကြောင်း၊ နိုင်ငံအတွင်းရှိဂွမ်ဒေါင်း၊  ကျန်းရှီပြည်နယ်နှင့်အခြားမြို့ကြီး(၃)မြို့တို့တွင် ဒေသခံများအနေဖြင့် အများပြည်သူဆိုင်ရာနေရာများတွင် နှာခေါင်းစည်းများ (masks) တပ်ဆင် ထားကြရန် အမိန့်ထုတ်ပြန်ထားသည်ဟုသိရှိရပါသည်။

အမေရိကန်အစိုးရသည် ဝူဟန်မြို့ရှိ အမေရိကန်နိုင်ငံသားများနှင့် အမေရိကန်သံတမန် ဝန်ထမ်းများအတွက် ဝူဟန်မြို့မှဆန်ဖရန်စ္စကိုမြို့သို့ လေယာဉ်ဖြင့် ခေါ်ဆောင်ရန် စီစဉ်လျက် ရှိကြောင်း၊ အလားတူ ပြင်သစ်အစိုးရနှင့် ပြင်သစ်မော်တော်ယာဉ်ထုတ်လုပ်ရေးလုပ်ငန်း PSA တို့သည် ဝူဟန်မြို့နှင့်အခြားသော ပြည်နယ်များမှ ပြင်သစ်ဝန်ထမ်းများနှင့် ပြင်သစ်နိုင်ငံသား များကို နေရာပြောင်းရွှေ့ ပေးရန်စီစဉ်လျက်ရှိကြောင်း၊ ဂျပန်အစိုးရသည်လည်းတရုတ်အစိုးရနှင့် ပူးပေါင်း၍ ဂျပန်နိုင်ငသားများအား ပြောင်းရွှေ့နေရာချထားရန် စီစဉ်သွားမည်ဖြစ်ကြောင်း၊ ဝူဟန်မြို့ရှိ ဆော်ဒီအာရေဗျနိုင်ငံသားများသည်လည်း ပြောင်းရွှေ့ရေးနှင့်ပတ်သက်၍ တရုတ်နိုင်ငံရှိ ဆော်ဒီအာရေဗျသံရုံးနှင့်ဆက်သွယ်လုပ်ဆောင်ကြရန် ဆော်ဒီအစိုးရက သတင်း ထုတ်ပြန်ထားကြောင်း၊ အလားတူဂျော်ဒန်အစိုးရသည် ဝူဟန်မြို့မှ ၎င်းနိုင်ငံသားများကို ခေါ်ထုတ်ရွှေ့ပြောင်းရန် တရုတ် အစိုးရထံမှ ခွင့်ပြုချက်တောင်းခံရရှိထားသည်ဟု သိရှိရကြောင်း www.nationthailand.com အင်တာနက် website တွင်ဖော်ပြထားပါသည်။

ခရစ်တိုငွေကြေး၏ကံကြမ္မာ

ဆောင်းတွင်းဝင်ကာစတစ်ရက်မှာ ကျွန်တော်ခြံထဲမှာနေပူစာလှုံပြီး Cryptocurrencies အကြောင်းဆောင်းပါး(၃)စောင်ကိုဖတ်ရင်းအတွေးနယ်ချဲ့မိပါတယ်။

မီတာခတက်မှာစိုးလို့ဇနီးသည်ကလည်းနေခင်းကြောင်တောင်မီးထွန်းပြီး စာဖတ်တာ မကြိုက်ချင်၊ ကိုယ်ကလည်း ဒီဆောင်းပါးသုံးစောင်ကိုဖတ်ရင်း နားမလည်တာရော၊ မျက်လုံး မကောင်းတာရော၊ မီးမလင်းတာရောနဲ့ ရှေ့ကိုသိပ်မရောက်ချင်ဘူး။ ဆောင်းပါးတွေ ကလည်းရှည်ပါ့။ ဘာတဲ့ “တိုးတက်လာတဲ့ခေတ်စနစ်ကြားမှာ သတိပြုရမယ့် ဒီဂျစ်တယ် ငွေကြေးတဲ့၊ နောက်တစ်စောင်က ခရစ်တိုငွေကြေးဘာလဲဘယ်လဲ”တဲ့၊ အခုနောက်ဆုံး ပြန်ဖတ် နေတာက“ခရစ်တိုအဖွဲ့၏ဒိုင်ယာရီ(သို့)Cryptocurrenciesနှစ်စဉ်မှတ်တမ်း”တဲ့။

ဒီဆောင်းပါးတွေဖတ်ရင်းနဲ့အတွေးနယ်ချဲ့မိပါရဲ့။ လူတွေက Bitcoin,Dascoin, Scion ဆိုပြီးဝယ်စုနေကြတာ။ မြတ်ချင်တာတစ်ခုပဲရှိတယ်၊ထဲထဲဝင်ဝင်ဘာမှမသိကြဘူး။

ဘယ်လိုပဲဖြစ်ဖြစ်၊ ကမ္ဘာကြီးဟာရွာကြီးတစ်ရွာလိုဖြစ်နေပြီဆိုတာရယ်၊ တိုးတက် လာတဲ့ နည်းပညာတွေရယ်ကြောင့် ကမ္ဘာနဲ့အဝှမ်းသတင်းတွေကို ချက်ချင်းသိနိုင်တဲ့ခေတ် ရောက်နေပြီ။ လူတိုင်းခေတ်နဲ့အညီ အမှီလိုက်နိုင်ဖို့ လိုသလိုနောက်ကျကျန် နေတာမျိုးလည်း မဖြစ်သင့်သေးဘူးပေါ့လေ။ ဒါကြောင့်ကျွန်တော်လည်းဟိုတစ်စဒီတစ်စနဲ့လိုက်ရှာ ဖတ်ကြည့် မိတယ်။

ကုန်သွယ်ရေးစစ်ပွဲနှင့်ငွေကြေးစျေးကွက်ဖတ်စာ

ယခုလတ်တလောအခြေအနေအရကမ္ဘာ့အင်အားကြီးနိုင်ငံဖြစ်တဲ့ အမေရိကန်နိုင်ငံနဲ့ တရုတ်နိုင်ငံတို့ ကြားကုန်သွယ်ရေးစစ်ပွဲကြောင့် အမေရိကန်နိုင်ငံက ဒေါ်လာဈေးကွက် ခိုင်မြဲလာဖို့ အခြေအနေနဲ့ တရုတ်နိုင်ငံကလည်း ဒေါ်လာအပေါ်မှီခိုတာလျော့ချပြီး ယွမ်ငွေ ဈေးကွက်ခိုင်မာလာစေဖို့ရည်ရွယ်လုပ်ဆောင်နေတာမြင်တွေ့နေရပါတယ်။ တရုတ်ယွမ်ငွေ ဟာယခင်က နိုင်ငံတကာငွေကြေးဈေးကွက်အတွင်း နံပါတ်(၄)နေရာရှိခဲ့ရာကနေ  ၂၀၁၉ ခုနှစ်၊ ဇူလိုင်လကစလို့ နံပါတ်(၆)နေရာကိုကျဆင်းသွားခဲ့ပြီးရူပီးငွေနဲ့ ယွမ်ငွေတို့ဟာ တန်ဖိုးအကျဆုံးအာရှငွေကြေးများအဖြစ်ရောက်ရှိခဲ့ပါတယ်။

အဲဒီလိုအင်အားကြီးနိုင်ငံကြီးတွေရဲ့ ငွေကြေးဈေးကွက်နေရာ လုလုပ်ဆောင်နေချိန်မှာ Cryptocurrencyလို့ခေါ်တဲ့ငွေကြေးစနစ်တစ်ခု ပေါ်ပေါက်နေရာဝင်ယူ လွှမ်းမိုးလာတာကို စောင့်ကြည့်ဖို့တော့လိုအပ်လာပါတယ်။ ၂၀၁၉ ခုနှစ် နှစ်လယ်ပိုင်းမှာ ကမ္ဘာ့လူဦးရေ အများဆုံး သိရှိသုံးစွဲနေကြတဲ့Facebook ကနေ Libra အမည်နဲ့ ခရစ်တိုငွေကြေး တစ်မျိုး ကို ၂၀၂၀ ပြည့်နှစ်၊ နှစ်ဆန်းပိုင်းမှာ စတင်အသုံးပြုနိုင်တော့မယ်လို့ သတင်းများ ထွက်ပေါ် လာပြီးနောက်ပိုင်းနိုင်ငံတကာမှာရှိတဲ့စီးပွားရေးလုပ်ငန်းလုပ်ကိုင်သူတွေက စိတ်ဝင်စားမှု ရှိလာ ခဲ့ပါတယ်။ အဓိက စိတ်ဝင်စားတဲ့အကြောင်းရင်းကတော့ ခရစ်တိုငွေကြေးကို သုံးစွဲရာ တွင် လွတ်လပ်စွာရွေ့ပြောင်းနိုင်ခြင်း၊ ပြောင်းလဲလုပ်ဆောင်နိုင်ခြင်း၊ ဗဟိုထိန်းချုပ်မှုမရှိခြင်း အစရှိတဲ့ လွတ်လပ်မှုဘောင်အကွပ်မဲ့မှုအပေါ် ကြိုက်နှစ်သက်လာခြင်းက အဓိကသဘောတရား ပဲ ဖြစ်ပါတယ်လို့ ငွေကြေးသမိုင်းဆိုင်ရာဖတ်စာစာအုပ်ပေါ်ထွက်လာခဲ့ပါတယ်။

ပြူတစ်ပြူတစ်ဖြစ်လာတဲ့Facebook၏ Libra ခရစ်တိုငွေကြေး

ထူးခြားမှုတစ်ခုကFacebook တည်ထောင်တဲ့ မာခ်ဇူကာဘတ်အနေနဲ့ ခရစ်တို ငွေကြေးနဲ့ ပတ်သက်လို့လွန်ခဲ့တဲ့ နှစ်အနည်းငယ်က Libraအမည်နဲ့လုံခြုံမှု၊ တည်ငြိမ်မှုနဲ့ ညီညွတ်တဲ့ စည်းကမ်းချက်တွေပါဝင်တဲ့ ခရစ်တိုငွေကြေးတစ်မျိုးကို စိတ်ကူးရခဲ့တာပါပဲ။ ထပ်မံစိတ်ဝင်စားမှု တစ်ခုကတော့ အဲဒီခရစ်တိုငွေကြေးကို၎င်းနဲ့ စီးပွားရေး လုပ်ဖေါ်ကိုင်ဖက်တွေ ဖြစ်တဲ့ Master  ၊ Visa  ၊ Uber အစရှိတဲ့ကမ္ဘာ့ကုမ္ပဏီလုပ်ငန်းကြီး (၂၈)ခုက ပူးပေါင်း ပါဝင်မှာဖြစ်ပြီး၂၀၂၀ပြည့်နှစ်၊ ပထမ(၆)လတာကာလအတွင်းစတင်ထုတ်ဝေသွားမယ်လို့ ထုတ်ဖော်ကြေညာခဲ့ပါတယ်။ Libra ခရစ်တိုငွေကြေးကိုလူသိများတဲ့Bitcoin နဲ့ချိတ်ဆက် မှာ မဟုတ်ဘူးလို့လည်း ထည့်သွင်းပြောကြားခဲ့တာကြောင့် ပိုလို့တောင် စိတ်ဝင်စားဖို့ လည်းကောင်းနေပြီ။

စျေးကွက်ကို ဘယ်လိုနေရာယူ လုပ်ဆောင်မယ်ဆိုတာ စောင့်ကြည့်သွားရမှာ ဖြစ်ပါတယ်။ အမေရိကန်-တရုတ်ကုန်သွယ်ရေးစစ်ပွဲကလည်း ကမ္ဘာ့စီးပွားရေးကို ပြောင်းလဲ စေနိုင်တဲ့အတွက်ကြောင့် နိုင်ငံအသီးသီးကနားစွင့်နေသလို အမေရိကန်ဒေါ်လာငွေကြေး စျေးကွက်အပေါ်မှာလည်းသက်ရောက်မှုများစွာရှိလာနိုင်တယ်လို့သုံးသပ်နေကြပါတယ်။ ဆန့်ကျင်ဖက်နိုင်ငံအချို့ကလည်းအမေရိကန်ဒေါ်လာတစ်ခုတည်းအပေါ်အလွန်အမင်း မှီခိုအားကိုးနေရမှုကိုလျော့ချလိုတဲ့သဘောနဲ့ ခရစ်တိုငွေကြေးတွေအပေါ် စိတ်ဝင်စားမှု ရေချိန်မြင့်လာပေမဲ့အမေရိကန်အပါအဝင် အနောက်နိုင်ငံအချို့ကလည်း ကန့်ကွက် နေကြတော့ ခရစ်တိုနဲ့ပတ်သက်ပြီး လွန်ဆွဲပွဲကြည့်နေရသလိုဖြစ်နေပါတယ်။

ငွေကြေးဆိုင်ရာနည်းပညာများဆင့်ကဲပြောင်းလဲလာမှု

Financial Technology ငွေကြေးဆိုင်ရာနည်းပညာတွေခေတ်နဲ့ အညီ တိုးတက် ပြောင်းလဲလာနေတဲ့အတွက်ကြောင့် ကိုင်တွယ်လို့မရတဲ့ငွေကြေးစနစ် (Digital Money) တစ်မျိုးပေါ်ထွက်လာတာဖြစ်ပါတယ်။ Cryptocurrency(ခေါ်)Digital Currency များဟာ သုံးစွဲသူတစ်ဦးနဲ့တစ်ဦးလက်ခံကြတဲ့သမားရိုးကျရင်းနှီးမြှုပ်နှံမှုမဟုတ်တဲ့ Digital Money (ခေါ်) Coin စနစ်ဟာလည်း ပေါ်ပေါက်လာခဲ့ပါတယ်။ Financial သမိုင်းကြောင်းနဲ့ ပတ်သက်လို့ နိုင်ငံတကာမှာငွေကြေးနည်းပညာများ အရှိန်အဟုန်နဲ့ဖွံ့ဖြိုးတိုးတက်လာတဲ့ ၁၉၅၀ပြည့်လွန်နှစ်တွေမှာ ငွေကြေးသယ်ဆောင်ရတဲ့ ဝန်ထုပ်ဝန်ပိုးကိုလျှော့ချဖို့ ခရက်ဒစ်ကတ်တွေပေါ်ပေါက်တီထွင်အသုံးပြုလာခဲ့ပါတယ်။

၁၉၆၀ ပြည့်လွန်နှစ်များမှာ ခရက်ဒစ်ကတ်ကိစ္စများလုပ်ပေးရတဲ့ ဝန်ထမ်းတွေရဲ့ နေရာမှာအစားထိုးဖို့အတွက်ATMစက်တွေသုံးစွဲလာခဲ့တယ်။ ၁၉၇၀ ပြည့်လွန်နှစ်များမှာ အီလက်ထရွန် နစ်စတော့များစတင်ပေါ်ပေါက်လာခဲ့ပြီး ၁၉၈၀ ပြည့်လွန်နှစ်တွေမှာတော့ ပိုမို တိကျမြန်ဆန်မှုရှိတဲ့အချက်အလက်၊မှတ်တမ်းတွေသိမ်းဆည်းထားနိုင်တဲ့စနစ်များပေါ်ပေါက်လာခဲ့တယ်။ ၁၉၉၀ ပြည့်လွန်အရောက်မှာအင်တာနက်နဲ့ အီး-ကောမားစ် စီးပွားရေး လုပ်ငန်းတွေ ထွန်းကားလာပြီး ရင်းနှီးမြှုပ်နှံသူတွေကို လက်လီရောင်းချနိုင်တဲ့ အွန်လိုင်း စတော့ဝက်ဘ်ဆိုက်များဆင့်ကဲဆင့်ကဲပေါ်ပေါက်လာတယ်လို့မှတ်သားမိပါတယ်။

• 

Cryptocurrency၏သမိုင်းကြောင်း

ဒီဂျစ်တယ်ငွေကြေးဖြစ်ပေါ်လာတဲ့ သမိုင်းကြောင်းကို လေ့လာကြည့်မယ် ဆိုရင် Cryptocurrency အနေနဲ့Bitcoinကိုစံထားရမှာဖြစ်ပါတယ်။ Bitcoin အစပေါ်ပေါက်လာပုံ ကလည်း၂၀၀၈ခုနှစ်အတွင်းက ဂျပန်အမည် “ဆာတိုရှီနာကာမိုတို”အဖွဲ့က အဆင့်မြင့် ကွန်ပျူတာတွေနဲ့ Network ကွန်ရက်တစ်ခုကိုBlockchain System နည်းပညာအခြေခံပြီး Digital Currency လုပ်ဆောင်မှုပုံစံသစ်White Paper စာတမ်းတစ်စောင်ကိုကမ္ဘာကို ချပြခဲ့ပါတယ်။ အဲ့ဒီ DigitalCurrency စာတမ်းရေးသား၊ နည်းပညာတီထွင်သူကို “ဆာတိုရှီနာကာမိုတို”လို့ခေါ်ဝေါ်နေကြပေမဲ့ ဘယ်သူဘယ်ဝါသူဖြစ်တယ်လို့ တိတိပပ မသိရှိကြပါဘူး။ အဲ့ဒီအဖွဲ့ကBitcoinအမည်နဲ့ Digital Currency တစ်မျိုးကို ၂၀၀၉ခုနှစ်မှာစတင်တီထွင်ခဲ့ပြီး၂၀၁၀ပြည်နှစ်မှစလို့ စျေးကွက်ဝင် Cryptocurrency တစ်ခု အဖြစ် ပေါ်ထွက်လာတာ အခုထိတိုင်ပါပဲ။ ယနေ့ကမ္ဘာပေါ်မှာ စျေးကွက် Cryptocurrency အမျိုးပေါင်း(၁၅၀၀)ကျော်လည်ပတ်နေတယ်လို့သိရှိရပါတယ်။

Cryptocurrencyများအပေါ်သိပ္ပံပညာရှင်သုတေသီများ၏သုံးသပ်ချက်

Cryptocurrencyတွေထုတ်လုပ်အသုံးပြုလို့တစ်နှစ်ကိုကာဗွန်ဒိုင်အောက်ဆိုဒ်တန်ချိန်ပေါင်း(၂၂)မက်ဂါတန်ခန့်ထုတ်လွှတ်ပေးနေတဲ့အဲဒီပမာဏဟာ LasVegas နဲ့ Hamburg တို့လိုမြို့ကြီးတွေမှာထုတ်လွှတ်ပေးနေတဲ့ပမာဏနဲ့ တူညီနေတယ်လို့Technical University of Munich(TUM)မှသုတေသီများကဆိုကြပါတယ်။ Bitcoin လို Cryptocurrency တွေဟာ တကယ်မရှိတဲ့ virtual currency ဖြစ်ပေမဲ့လည်း သူတို့ အသုံးပြုနေတဲ့ စွမ်းအင် အရင်းအမြစ်တွေကတော့ တကယ့်လက်တွေ့အရာတွေကိုအခြေခံထားခြင်းဖြစ်ပါတယ်။ Bitcoin mining တူးဖော်ခြင်းလို့ တင်စားခေါ်ထားတဲ့ တွက်ချက်လုပ်ဆောင်မှုတွေဟာ လွန်ခဲ့တဲ့နှစ်အနည်းငယ်မှာပဲတစ်ဖြည်းဖြည်းတွင်ကျယ်လာပြီး၂၀၁၇ခုနှစ်ထက်၂၀၁၈ခုနှစ်က(၄)ဆခန့် ပိုမိုများပြားလာတယ်လို့သိရတယ်။ ပညာရှင်တွေရဲ့လေ့လာမှုတွေအရBitcoin mining လုပ်ငန်းဟာ ကာဗွန်ဒိုင်အောက်ဆိုဒ်ဓာတ် အများအပြားထုတ်လုပ်နေတယ်လို့ သိရပါတယ်။

Cryptocurrency ၏ရိုက်ခတ်မှုမှတ်တမ်းများ

–        ၂၀၁၈ခုနှစ်နှစ်ကုန်ပိုင်းမှာ  IMFအဖွဲ့က Digitalငွေကြေးထုတ်လုပ်မှုနဲ့ ပတ်သက်လို့ လေ့လာစမ်းစစ်မှုတွေပြုလုပ်သင့်တယ်လို့ကမ္ဘာ့ဗဟိုဘဏ်တွေကိုတိုက်တွန်းပြောကြားခဲ့ခြင်း၊

–        ၂၅-၁-၂၀၁၉ရက်မှာဂျပန်နိုင်ငံရှိမိုင်နိချိသတင်းစာထုတ်ဝေရေးလုပ်ငန်းနဲ့ ဆေးဝါး ထုတ်လုပ်ရေးလုပ်ငန်း(၇)ခုတို့ထံသို့ ဆိုင်ယာနိုက်ဟုယူဆရတဲ့အဆိပ်တွေ လိမ်းကြံ ထားတဲ့ခြိမ်းခြောက်စာတစ်စောင်ကိုအုံရှင်ရီကျို ဦးဆောင်တဲ့ဘာသာရေးအစွန်း ရောက်အဖွဲ့က အမည်အမျိုးမျိုးနဲ့ ပေးပို့ခဲ့ပြီး အမေရိကန်ဒေါ်လာ (၃၁၃၀၀)တန်ဖိုးရှိ Bitcoinယူနစ်တွေကိုပေးရန်ခြိမ်းခြောက်စာများပေးပို့ခဲ့ခြင်း၊

–        ၂၀၁၉နှစ်စပိုင်းကကမ္ဘာ့ရင်းနှီးမြှုပ်နှံသူတွေဟာအမေရိကန်-တရုတ် ကုန်သွယ်ရေး ဂယက်ကြောင့် စတော့ရှယ်ယာဈေးကွက်နဲ့ငွေကြေးဈေးကွက်တွေမှာ ရင်းနှီးမြှုပ်နှံ သူတွေက Bitcoin ကိုပြောင်းလဲရင်းနှီးမြှုပ်နှံလာကြတဲ့အတွက် Bitcoin တစ်ယူနစ် ကို အမေရိကန်ဒေါ်လာ(၈၀၀၀)ကျော်သို့ရောက်ရှိလာခဲ့ခြင်း၊

–        အိန္ဒိယနိုင်ငံရှိ“၂၀၁၉ခုနှစ်၊ဒီဂျစ်တယ်ငွေကြေးများတားမြစ်ခြင်းနဲ့ လုပ်ထုံးလုပ်နည်း များဆိုင်ရာဥပဒေ” ဥပဒေမူကြမ်းမှာ ဒီဂျစ်တယ်ငွေကြေးနဲ့ ပတ်သက်ဆက်နွယ်တဲ့ ပြစ်မှုတစ်ခုခုကိုကျူးလွန်ပါကထောင်ဒဏ်(၁၀)နှစ်အထိကျခံရမည်ဖြစ်သည်ဟုပါရှိခြင်း၊

–        ၂၀၁၉ခုနှစ်၊နှစ်လယ်ပိုင်းကFacebook မှ Libra ဒီဂျစ်တယ်ငွေကြေး အစီအစဉ် ကြေညာချက်ထွက်ပေါ်လာပြီးနောက်ပိုင်းကမ္ဘာ့တစ်ဝှမ်းငွေကြေးဆိုင်ရာအရေးယူ ဆောင်ရွက်ရေးအဖွဲ့(FATF)နဲ့ ကမ္ဘာ့ဘဏ်တွေကကမ္ဘာတစ်ဝှမ်းရှိဒီဂျစ်တယ်ငွေကြေး Exchangeတွေကိုသက်ဆိုင်ရာအစိုးရကစောင့်ကြည့်စစ်ဆေးကြပ်မတ်ဖို့နဲ့ Libra ငွေကြေးအပေါ်စက်မှုထိပ်သီး(၇)နိုင်ငံမှသုံးသပ် လေ့လာမှုများပြုလုပ်ဖို့စီစဉ်နေခြင်း၊

–        တရုတ်ဗဟိုဘဏ်ရဲ့ လေ့လာမှုအရ Libra ငွေကြေးကိုဖွံ့ဖြိုးဆဲနိုင်ငံက အသုံးပြု ပါကအဆိုပါနိုင်ငံရဲ့ ငွေကြေးတွေအလိုအလျှောက် ပျောက်ကွယ်သွားနိုင်ပြီး ငွေကြေး ခဝါချမှုတွေ၊ အကြမ်းဖက်မှုတွေကို  ငွေကြေးထောက်ပံ့မှုနဲ့ ဆက်နွှယ်လာနိုင်တဲ့ အတွက် အသုံးပြုသူတွေရဲ့ ပုဂ္ဂိုလ်ဆိုင်ရာအချက်အလက်တွေ (KYC)ကိုသိရှိ မှတ်တမ်းတင် ထားဖို့ လိုအပ်ခြင်း၊

–        ၁၁-၇-၂၀၁၉ရက်မှာအမေရိကန်သမ္မတဒေါ်နယ်ထရမ့်ရဲ့  Twitter စာမျက်နှာမှ တစ်ဆင့် Facebookအနေနဲ့  Libra ငွေကြေးထုတ်ဝေလိုပါက ဘဏ်လုပ်ငန်း စည်းမျဉ်းစည်းကမ်းများလုပ်ဆောင်ဖို့ လိုအပ်တယ်လို့ ပြောကြားခဲ့ခြင်း၊

–        အမေရိကန်ကွန်ဂရက်လွှတ်တော်က ဒီဂျစ်တယ် ငွေကြေးများထုတ်ဝေခြင်း တို့ကို ဆောင်ရွက်နေသည့် နည်းပညာဆိုင်ရာကုမ္ပဏီများအားတားမြစ်ပိတ်ပင်မည့်ဥပဒေ တစ်ရပ်ပြဋ္ဌာန်းရန်စီစဉ်နေခြင်း၊

–        ၂၀၁၉ ခုနှစ်၊ဇူလိုင်လလယ်ပိုင်းက ပြုလုပ်ခဲ့တဲ့ အမေရိကန် အောက်လွှတ်တော်ရဲ့   ကြားနာစစ်ဆေးမှု၌ Facebook မှ တာဝန်ရှိသူကLibraဒီဂျစ်တယ်ငွေကြေးနဲ့ ပတ်သက်လို့  တရားဝင်မှတ်ပုံတင် စာရင်းသွင်းရန်နေရာ အဖြစ် အမေရိကန် ပြည်ထောင်စုအစား ဆွစ်ဇာလန်နိုင်ငံကိုရွေးချယ်ထားခြင်းမှာ စည်းမျဉ်း စည်းကမ်း များ၊ ကြီးကြပ်မှုများကို တိမ်းရှောင်ရန်မဟုတ်ဘဲ နိုင်ငံတကာပြဌာန်းချက်များနဲ့ အညီလုပ်ဆောင်နေခြင်းသာဖြစ်တယ်လို့ ပြောကြားခဲ့ခြင်း၊

–        ၂၄-၇-၂၀၁၉ရက်တွင်နိုင်ငံတကာအစိုးရများရဲ့ကန့်ကွက်မှုများရှိနေသော်လည်း Libra ငွေကြေးကိုထုတ်ဝေသွားမယ်လို့ Facebook တည်ထောင်သူ မာ့ခ်ဇူကာဘတ်မှ အတည်ပြုပြောကြားခဲ့ပြီးဆွစ်ဇာလန်ငွေကြေးဈေးကွက်ကြီးကြပ်ရေးအာဏာပိုင်အဖွဲ့ (FINMA)မှLibraငွေကြေးအပေါ် စောင့်ကြည့်ထိန်းချုပ်မှုများပြုလုပ်သွားရန်စီစဉ် နေခြင်း၊

–        ၂၀၁၉ခုနှစ်၊ဩဂုတ်လအတွင်းက တရုတ်ဗဟိုဘဏ်ရဲ့ ငွေကြေးဈေးကွက် သုတေသီ များမှကိုယ်ပိုင်ဒီဂျစ်တယ်ငွေကြေးထုတ်ဝေမည့်ကိစ္စအား(၅)နှစ်ခန့်အချိန်ယူလေ့လာ ပြင်ဆင်လုပ်ဆောင်ခဲ့ပြီး ယွမ်ငွေနည်းတူအသုံးပြုနိုင်တဲ့ တရုတ်နိုင်ငံသုံးငွေကြေး တစ်ခုအဖြစ်ပါသတ်မှတ်သုံးစွဲသွားရန်စီစဉ်ထားခြင်း၊

–        ၂၀၁၉ခုနှစ်၊ စက်တင်ဘာလအတွင်းက ဆွစ်ဇာလန်နိုင်ငံ၊ ငွေရေးကြေးရေးနဲ့ ဘဏ္ဍာရေးအာဏာပိုင်အဖွဲ့(FINMA)ကနိုင်ငံအခြေစိုက်ဖြစ်တဲ့ SEBA Crypto AG နဲ့ Sygnum  AG ဘဏ်လုပ်ငန်းနှစ်ခုကို Bitcoin နဲ့ Ethereumဒီဂျစ်တယ်ငွေကြေး နှစ်မျိုးနဲ့ပတ်သက်၍ ကမ္ဘာပေါ်မှာ Blockchainနည်းပညာကိုအသုံးပြုကာ ဒီဂျစ်တယ် ငွေကြေးများကို ဘဏ်လုပ်ငန်းလုပ်ပိုင်ခွင့်ရရှိခဲ့တဲ့ ပထမဆုံးသော ဘဏ်များ ဖြစ်လာခဲ့ခြင်း၊

–        ၂၀၁၉ ခုနှစ်၊စက်တင်ဘာလအတွင်းကအမေရိကန်အောက်လွှတ်တော်ရဲ့ ဘဏ္ဍာရေး ဝန်ဆောင်မှုလုပ်ငန်းများကော်မတီအဖွဲ့က Libraငွေကြေးနဲ့ ပတ်သက်လို့  ဆွစ်ဇာလန် အာဏာပိုင်တွေနဲ့တွေ့ဆုံပြီး အဓိကထားဆွေးနွေးသွားမှာ ဖြစ်ကြောင်း ပြောကြား ခဲ့ခြင်း၊

–        Bitcoin ဈေးနှုန်းဟာ ၂၀၁၇ ခုနှစ်မှာ  အမေရိကန်ဒေါ်လာ ၂၀၀၀၀ ခန့်ရှိခဲ့ရာမှ ၂၀၁၈ခုနှစ်အတွင်း အလွန်အမင်းတန်ဖိုးကျဆင်းခဲ့သော်လည်း၂၀၁၉ ခုနှစ်အတွင်းမှာ မူအမေရိကန်-တရုတ် ကုန်သွယ်ရေးစစ်ပွဲ ပြဿနာနဲ့ Facebook မှ ထုတ်ဝေမယ့် Libraဒီဂျစ်တယ်ငွေကြေးတို့ရဲ့ ဂယက်များကြောင့် အမေရိကန်ဒေါ်လာ (၉,၀၀၀) ဝန်းကျင်သို့ပြန်လည်ဖြစ်ပေါ်လျက်ရှိကြောင်း၊ ၂၀၁၉ခုနှစ်အတွင်း ဟက်ကာများ က ခိုးယူခဲ့တဲ့ Bitcoin စုစုပေါင်းတန်ဖိုးပမာဏမှာ အမေရိကန်ဒေါ်လာ (၄.၂) ဘီလီယံခန့်ရှိခဲ့ခြင်း၊

–        ၂၀၁၉ခုနှစ်၊အောက်တိုဘာလအတွင်းက ဥရောပတိုက်မှာ Libra ဒီဂျစ်တယ် ငွေကြေးကို တားမြစ်ပိတ်ပင်ဖို့ အတွက်ပြင်သစ်နိုင်ငံက ဦးဆောင်ပြီး ဂျာမနီ၊ အီတလီ၊စပိန်နဲ့ နယ်သာလန်နိုင်ငံတို့ပါဝင်တဲ့ ဥရောပထိပ်သီး စီးပွားရေးအင်အားကြီး မဟာမိတ်(၅)နိုင်ငံတို့က လှုပ်ရှားမှုများစတင်ပြုလုပ်လျက်ရှိခြင်း၊

–        ၂၀၁၉ ခုနှစ်၊နိုဝင်ဘာလမှာ (၁၁)နှစ်တာကာလအတွင်းလည်ပတ်သုံးစွဲနေတဲ့ bitcoin ယူနစ်မှာ(၂၀၀,၀၀၀)ခန့်အတွက် အပြန်အလှန်ငွေကြေးလွှဲပြောင်းခ (Transaction Fees)မှာ အမေရိကန်ဒေါ်လာ(၁)ဘီလီယံခန့်ရှိတဲ့အတွက်ကမ္ဘာပေါ်မှာ ငွေကြေး လွှဲပြောင်းမှုအများဆုံးနဲ့ လူသုံးအများဆုံး ဒီဂျစ်တယ်ငွေကြေးတစ်ရပ်အဖြစ် ရပ်တည် လျက်ရှိခြင်း၊

–        ၂၀၁၉ ခုနှစ်၊ နိုဝင်ဘာ(၁၂)ရက်မှာ Libra ဒီဂျစ်တယ်ငွေကြေးနဲ့ Calibra digital wallet တို့မှာ တင်းကျပ်သော ငွေကြေးဆိုင်ရာ စည်းမျဉ်းသတ်မှတ်ချက်များ ကြောင့် Facebook Pay အား အစားထိုးကြိုတင်လုပ်ဆောင်သွားမယ်လို့ Facebook ကုမ္ပဏီမှ ထုတ်ပြန်ကြေညာခဲ့ခြင်း၊

–        ၂၀၁၉ခုနှစ်၊နိုဝင်ဘာလမှာ တရုတ်အစိုးရက ထူးချွန်တဲ့ တပ်မတော်သားများအပေါ် ပေးအပ်မဲ့ဆုကြေးကိုတရုတ်နိုင်ငံမှတရားဝင်ထုတ်ဝေမဲ့ ဒီဂျစ်တယ်ငွေကြေးနဲ့ ပေးအပ် သွားမယ်လို့ တရုတ်ပြည်သူ့လွတ်မြောက်ရေး တပ်မတော် (PLA)ပိုင် သတင်းဌာနက ဖော်ပြခဲ့ပြီး၊ တရုတ်နိုင်ငံရဲ့ ကိုယ်ပိုင်ဒီဂျစ်တယ်ငွေကြေးကို ၂၀၂၀ နှစ်ဦး ပိုင်းမှာ စတင် ထုတ်လုပ်သုံးစွဲနိုင်ဖို့ စီစဉ်လျက်ရှိခြင်း၊

–        ၂၀၁၉ခုနှစ်၊အောက်တိုဘာလမှာ ဗင်နီဇွဲလားနိုင်ငံရှိ ပင်စင်စားဝန်ထမ်းများအတွက် ခရစ်စမတ်အပိုဆုကြေးကို ပက်ထရိုဒီဂျစ်တယ်ငွေကြေးနဲ့ အစားထိုးပေးအပ်သွားဖို့ စီစဉ်လျက်ရှိတယ်လို့ ဖော်ပြခဲ့ခြင်း၊(ပက်ထရိုတစ်ယူနစ်မှာ ရေနံစိမ်းတစ်စည် တန်ဘိုး နဲ့ ညီမျှပါတယ်)

–        မြန်မာနိုင်ငံအနေနဲ့ Cryptocurrencyနဲ့ ပတ်သက်လို့ သက်ဆိုင်ရာတာဝန်ရှိ အဖွဲ့အစည်းများက UNODC Cryptocurrencies and Darknet Investigation Workshop ပြုလုပ်ခဲ့ပြီးCryptocurrency နဲ့ ပါတ်သက်လို့ သိမ်းဆည်းခြင်းနဲ့ အခြားနိုင်ငံများရဲ့ အခြေအနေ၊အိမ်နီးချင်းထိုင်းနိုင်ငံမှာ ဆောင်ရွက်မှုအခြေအနေ တို့ကို ရှင်းလင်းဆွေးနွေးမှုပြုလုပ်ခဲ့ခြင်း၊

အကြံပေးတိုက်တွန်းချက်

ကမ္ဘာ့နိုင်ငံအများစုမှာဖြစ်ပေါ်နေတဲ့ သတင်းအချက်အလက်တွေအရ Cryptocurrencies နဲ့ပတ်သက်ပြီးလက်ခံခြင်း၊ပြောင်းလဲလိုခြင်း၊ကန့်ကွက်လိုခြင်း၊စောင့်ကြည့်ဝေဖန်နေခြင်း၊အရေးယူနိုင်ရန်ပြင်ဆင်နေခြင်းအစရှိတဲ့ သတင်းတွေကြားသိနေရတဲ့အတွက် အကောင်းဖက်ရော၊ အဆိုးဖက်ပါ ဦးတည်နေတယ်လို့ပြောရင် မမှားနိုင်ပါဘူး၊ ဒါပေမဲ့ Facebook က Libra ကိုမကြာမီထုတ်လုပ်မဲ့သတင်းထွက်ပေါ်ပြီးနောက်ပိုင်းကမ္ဘာ့အင်းအားကြီးနိုင်ငံအချို့ကအဆိုးဘက်ကနေဝေဖန်ပြောဆိုလုပ်ဆောင်လာမှုတွေပြုလုပ်နေကြပါတယ်။

ဒါ့ကြောင့် Bitcoinနဲ့ Libra တို့ရဲ့ အဓိကဆုံမှတ်ကို လေ့လာကြည့်ရင် bitcoin ကို Currency ငွေကြေးတစ်ခုအဖြစ်သတ်မှတ်မထားဘဲ Digital access ကြားခံထုတ်ကုန် တစ်ခုအနေဖြင့်သာသတ်မှတ်ထားခြင်းလို့ယူဆရမှာဖြစ်တယ်။ Facebookရဲ့ Libra ကတော့ ငွေကြေးတစ်ခုလိုလုပ်ဆောင်နေတယ်လို့ အမေရိကန်အစိုးရအနေနဲ့ ရှုမြင်သုံးသပ် လာခဲ့ ပါရင် Cryptocurrenciesရဲ့ ကံကြမ္မာဟာဆိုးရွားလာနိုင်ပါတယ်၊ ကြိုတင်ပြင်ဆင်မှုအနေနဲ့ ထိုင်းနိုင်ငံမှာလည်း ဒီဂျစ်တယ်ငွေကြေးနဲ့ ပတ်သက်လို့ ဥပဒေအား ၂၀၁၈ ခုနှစ်၊ မေလ (၁၃)ရက်မှာ ပြဌာန်းခဲ့ပြီး ထိုင်းနိုင်ငံငွေချေးသက်သေခံလက်မှတ်များလဲလှယ် ရောင်းဝယ်ရေး ကြီးကြပ်မှုကော်မရှင် (SEC)အား ကြီးကြပ်ခွင့် ပေးအပ်ထားတယ်လို့  ကြားသိရထားတဲ့ အတွက်မြန်မာနိုင်ငံအနေနဲ့လည်းဥပဒေထုတ်ပြန်ဖို့အနှေးနဲ့အမြန်ဆောင်ရွက်သင့်ပါတယ်။

အဓိကကျတဲ့ International Digital Money Exchange အခြေခံ အဆောက်အဦတွေဟာ အနာဂတ်ရဲ့ရင်းနှီးမြှပ်နှံမှုတစ်ခုလို့ ပြောဆိုကြပေမဲ့ ပြည်တွင်းမှာရှိတဲ့ အခြေချ စီးပွားရေးလုပ်ငန်း တစ်ခုမဟုတ်ဘဲခြေခြေမြစ်မြစ်မသိရတဲ့ပြည်ပရှိ ငွေကြေးဆိုင်ရာ လုပ်ငန်း တစ်ခုဟာလေထဲမှာတိုက်ဆောက်နေရသလိုပါပဲ။

စုကြေးကြောင့်ဆုံးရှုံးနစ်နာမှုတွေတရားတဘောင်ရောက်နေကြတာနေ့စဉ်နဲ့အမျှကြားသိနေရပါတယ်။ ဒါကငွေသားထည့်ငွေသားယူပြီး စုမဲလုပ်ကြတာဖြစ်လို့ မြင်သာထင်သာ ရှိတယ် လို့ဆိုရမှာပါ။  Cryptocurrencies ကို ရင်းနှီးလုပ်ကိုင်လိုတဲ့ သူတွေအနေနဲ့ ဗဟုသုတကလဲသိပ်မရှိ၊ ဥပဒေကလည်းအကာအကွယ်မဲ့နေရင်ဆုံးရှုံးနစ်နာမှုတွေပိုများမှာပါ။ ဒါကြောင့် Cryptocurrencies နဲ့ ပတ်သက်တဲ့ နည်းပညာပိုင်းကိုလည်း လေ့လာကြပါ၊ ဥပဒေပေါ်ထွက်လာဖို့လည်းဆုတောင်းကြပါလို့အကြံပေးရင်း …………

(၂၆-၁-၂၀၂၀ မြန်မာ့အလင်းသတင်းစာပါ သန်းတိုးနိုင်၏Cryptocurrency ၏ကံကြမ္မာ  ဆောင်းပါးကောင်းနုတ်ချက်)

တောင်ငူမြို့၊ စုံစမ်းစစ်ဆေးမှု အတတ်ပညာ သင်ကျောင်း၌ ဦးစီးအရာရှိ (စုံစမ်းရေး) မွမ်းမံသင်တန်း အမှတ်စဉ် (၁/၂၀၁၉) သင်တန်းဆင်းပွဲ ကျင်းပပြုလုပ်

ပဲခူးတိုင်းဒေသကြီး၊ တောင်ငူခရိုင်၊ တောင်ငူမြို့ရှိ အထူးစုံစမ်း စစ်ဆေးရေး ဦးစီးဌာန၊ စုံစမ်းစစ်ဆေးမှု အတတ်ပညာသင်ကျောင်း၌ ၁၀-၁-၂၀၂၀ ရက်နေ့ (၀၈၃၀)အချိန်တွင် ဦးစီးအရာရှိ (စုံစမ်းရေး) မွမ်းမံ သင်တန်း အမှတ်စဉ်(၁/၂၀၁၉) သင်တန်းဆင်းပွဲ အခမ်းအနား ကျင်းပပြုလုပ်ခဲ့ကြောင်း၊ အခမ်းအနားတွင် အထူးစုံစမ်း စစ်ဆေးရေးဦးစီးဌာန၊ ဒုတိယညွှန်ကြားရေးမှူးချုပ် ဦးသိန်းနိုင်ထွန်းမှ အမှာစကား ပြောကြားခဲ့ပြီး သင်တန်းထူးချွန်ဆုရ သင်တန်းသားများအား ဆုချီးမြှင့်ပေးခဲ့ပါသည်။

ဦးစီးအရာရှိ (စုံစမ်းရေး) မွမ်းမံသင်တန်းသို့ အထူးစုံစမ်း စစ်ဆေးရေးဦးစီးဌာနမှ သင်တန်းသား (၂၀)ဦး၊ သင်တန်းသူ(၂)ဦးနှင့် အဂတိလိုက်စားမှု တိုက်ဖျက်ရေးကော်မရှင်မှ သင်တန်းသား(၃)ဦး၊ စုစုပေါင်း (၂၅)ဦးတို့ သင်တန်းကာလ ရက်သတ္တပတ် (၈)ပတ် တက်ရောက်ခဲ့ကြပါသည်။