အမေရိကန်ဗဟိုဘဏ်အစည်းအဝေးတွင်ဘဏ်တိုးနှုန်းကိုအများမျှော်လင့်ထားသည့်အတိုင်းလျှော့ချ ခဲ့သော်လည်း ၂၀၁၉ ခုနှစ်လက်ကျန်ကာလများ၌ ထပ်မံလျှော့ချဖွယ် မရှိတော့သည့်အတွက် အမေရိကန်ဒေါ်လာတန်ဖိုးမြင့်တက်ကာ ကမ္ဘာ့ရွှေဈေးနှုန်း ကျဆင်းသွားခဲ့ခြင်း
၂၀၁၉ ခုနှစ်၊ စက်တင်ဘာလ(၁၈)ရက်(ဗုဒ္ဓဟူးနေ့)တွင် ပြီးဆုံးခဲ့သည့် အမေရိကန်ဗဟိုဘဏ် အစည်းအဝေးတွင် ဘဏ်တိုးနှုန်းကိုလက်ရှိသတ်မှတ်ထားသည့် ၂.၂၅% မှ ၂.၀% သို့ လျှော့ချ ခဲ့ကြောင်း၊ သို့သော် အမေရိကန်ဗဟိုဘဏ် ဥက္ကဋ္ဌ ဂျရွန်မီပေါင်ဝယ်လ်သည် အစည်းအဝေးအပြီး ပြုလုပ်သည့် သတင်းစာရှင်းလင်းပွဲ၌ ၂၀၁၉ ခုနှစ် လက်ကျန်ကာလများအတွင်း၌ ဘဏ်တိုးနှုန်း ထပ်မံလျှော့ချရေးမှာ မသေချာတော့ဟု ပြောကြားခဲ့ပြီး ဗဟိုဘဏ်ကော်မတီဝင် အများစုကလည်း လိုအပ်ပါက ဘဏ်တိုးနှုန်း ထပ်မံလျှော့ချခြင်းကို ၂၀၂၀ ခုနှစ်အတွင်းမှသာ လုပ်ဆောင်ရန် သဘောတူခဲ့ကြသည်ဟုသိရှိရကြောင်း၊ ထို့ကြောင့် အမေရိကန်ဗဟိုဘဏ်အစည်းအဝေးအပြီးတွင် အမေရိကန်ဒေါ်လာတန်ဖိုးမြင့်တက်ကာ ကမ္ဘာ့ရွှေဈေးနှုန်းမှာ ကျဆင်းသွားခဲ့ပါသည်။
၂၀၁၉ ခုနှစ်၊ စက်တင်ဘာလ(၁၉)ရက်(ကြာသပတေးနေ့)နံနက်ပိုင်းတွင် ကမ္ဘာ့ဈေးကွက် အတွင်း အမေရိကန်ဒေါ်လာတန်ဖိုးမှာ ၀.၁% မြင့်တက်ခဲ့ပြီးအညွှန်းကိန်းအမှတ်(၉၈.၄၅)သို့ရောက်ရှိ ခဲ့ကြောင်း၊ အမေရိကန်ဒေါ်လာတန်ဖိုးမြင့်တက်လာသည့်အတွက် ကမ္ဘာ့ရွှေဈေးနှုန်းမှာ ၁% ကျဆင်းပြီး တစ်အောင်စလျှင် အမေရိကန်ဒေါ်လာ(၁၄၉၄.၀၅)သို့ ရောက်ရှိခဲ့ပါသည်။ အမေရိကန်သမ္မတ ဒေါ်နယ်ထရန့်သည် ဗဟိုဘဏ်အစည်းအဝေး၏ ဆုံးဖြတ်ချက်အပေါ် တွစ်တာစာမျက်နှာများပေါ်မှတစ်ဆင့် ပြင်းထန်စွာဝေဖန်ခဲ့ပြီး အမေရိကန်ဗဟိုဘဏ်ဥက္ကဋ္ဌ နှင့် ကော်မတီဝင်များမှာအမြှော်အမြင်မရှိသူများဖြစ်သည်ဟု ပြစ်တင်ရှုံ့ချခဲ့ကြောင်း www.reuters.com အင်တာနက် website တွင် ဖော်ပြပါရှိပါသည်။