အမေရိကန်- တရုတ် နှစ်နိုင်ငံသမ္မတ(၂) ဦးအကြား ကုန်သွယ်ရေးသဘောတူညီမှု ရရှိဖွယ်ရှိသည်ဟူသော သတင်းများထွက်ပေါ်လာပြီးနောက် ကမ္ဘာ့ရေနံဈေးနှုန်းမှာ အနည်းငယ်မြင့်တက်ခဲ့မှု

အမေရိကန်-တရုတ်ကုန်သွယ်ရေးဆွေးနွေးမှုများမှ တိုးတက်မှုရလဒ်ကောင်းများရရှိလျက်ရှိခြင်းကြောင့် တရုတ်နိုင်ငံအပေါ် သွင်းကုန်ခွန်တိုးမြှင့်ကောက်ခံမည့်အစီအစဉ်အား သမ္မတ ဒေါ်နယ်ထရန့်က နောက်ဆုတ်ရွှေ့ဆိုင်းခဲ့ပြီး အမေရိကန်နိုင်ငံ၏ စိုက်ပျိုးရေးထုတ်ကုန်ပစ္စည်းများအပေါ် သွင်းကုန်ခွန်တိုးမြှင့်ချမှတ်ထားမှုများအားပြန်လည်ရုတ်သိမ်းပေးရန် သမ္မတဒေါ်နယ်ထရန့်က တရုတ်အစိုးရထံတောင်းဆိုထားသည်ဟူသောသတင်းများထွက်ပေါ်နေခြင်းနှင့်အတူ အမေရိကန်နှင့်  တရုတ်သမ္မတတို့သည် ယခုနှစ်မတ်လကုန်ပိုင်းတွင် ထိပ်သီးဆွေးနွေးပွဲပြုလုပ်ကာနှစ်နိုင်ငံ  ကုန်သွယ်ရေးဆိုင်ရာတရားဝင်သဘောတူညီမှုရယူနိုင်ဖွယ်ရှိသည်ဟု နယူးယောက်အခြေစိုက် Wall Street Journal ၏ထုတ်ပြန်ရေးသားမှုများကြောင့် ကမ္ဘာပေါ်တွင် စီးပွားရေးအင်အားကြီးနိုင်ငံ နှစ်နိုင်ငံတို့၏ ကုန်သွယ်ရေးပြေလည်မှုရရှိခြင်းဂယက်ကြောင့် ကမ္ဘာတစ်ဝန်းစီးပွားရေးတိုးတက်မှုများ ဖြစ်ပေါ်လာဖွယ်ရှိခြင်းနှင့်အတူ ကုန်ထုတ်လုပ်မှုကဏ္ဍအားကောင်းကာ ကမ္ဘာတစ်ဝန်း ရေနံဝယ်လိုအားပါမြင့်တက်လာဖွယ်ရှိသည်ဟူသော ခန့်မှန်းချက်များကြောင့် ကမ္ဘာ့ရေနံဈေးနှုန်းများမှာ မြင့်တက်လာခဲ့ခြင်းဖြစ်ကြောင်း သိရှိရပါသည်။

ထို့ပြင် လွန်ခဲ့သည့် ဖေဖော်ဝါရီလအတွင်း အိုပက်အဖွဲ့၏ရေနံထုတ်လုပ်မှုပမာဏမှာ ၂၀၁၅ ခုနှစ်နောက်ပိုင်း အနည်းဆုံးပမာဏဖြစ်သည့် တစ်နေ့လျှင်စည်ပေါင်း(၃၀.၆၈) သန်းခန့်သို့ လျော့ကျ သွားခဲ့ခြင်းနှင့် လွန်ခဲ့သည့်ရက်သတ္တပတ်အတွင်း အမေရိကန်နိုင်ငံတစ်ဝန်း ရေနံတူးစင် အရေအတွက် မှာ တူးစင်(၁၀) စင်ပိတ်သိမ်းခဲ့ပြီး စုစုပေါင်းရေနံတူးစင်အရေအတွက် (၈၄၅) စင်သာကျန်ရှိတော့သည်ဟု Baker Hughes ကုမ္ပဏီက အစီရင်ခံစာထုတ်ပြန်ခဲ့ခြင်းတို့သည်လည်း ရေနံဈေးနှုန်းများကို မြင့်တက်စေသည့် အခြားသောအချက်များဖြစ်ကြောင်း သိရှိရပါသည်။

၂၀၁၉ ခုနှစ်၊ မတ်လ(၅)ရက်(အင်္ဂါနေ့)နံနက်ပိုင်းတွင် နယူးယောက်ဈေးကွက်၌ ဧပြီလ အတွက် WTI ရေနံစိမ်းကြိုတင်ရောင်းဝယ်မှုဈေးနှုန်းမှာ ၁.၄% မြင့်တက်ခဲ့ပြီးတစ်စည်လျှင် အမေရိကန် ဒေါ်လာ (၅၆.၅၉) ဒေါ်လာသို့လည်းကောင်း၊ လန်ဒန်​ဈေးကွက်၌ ဘရန့်ရေနံစိမ်းတစ်စည်၏ဈေးနှုန်းမှာ ၀.၉% မြင့်တက်ခဲ့ပြီး တစ်စည်လျှင် အမေရိကန်ဒေါ်လာ (၆၅.၆၇) ဒေါ်လာသို့လည်းကောင်း အသီးသီး မြင့်တက်ခဲ့သည်ဟု www.reuters.com တွင် ဖော်ပြပါရှိပါသည်။

အမေရိကန်အစိုးရ၏ အရေးယူပိတ်ဆို့မှုများကြောင့် ဗင်နီဇွဲလားနိုင်ငံ၏ပြည်ပသို့ရေနံတင်ပို့မှုပမာဏမှာ ၄၀%ခန့်ကျဆင်းခဲ့မှု

ဗင်နီဇွဲလားနိုင်ငံ၌ အစိုးရအပြောင်းအလဲဖြစ်ပေါ်ရန်လိုလားလျက်ရှိသော အမေရိကန်အစိုးရသည် ၂၀၁၉ ခုနှစ်၊ ဇန်နဝါရီလကုန်ပိုင်းတွင် ဗင်နီဇွဲလားနိုင်ငံပိုင်ရေနံလုပ်ငန်း Petroleos de Venezuela SA (PDVSA) အားအရေးယူပိတ်ဆို့မှုများ ချမှတ်ခဲ့ခြင်းကြောင့် ၂၀၁၉ ခုနှစ်၊ ဖေဖော်ဝါရီလအတွင်း ဗင်နီဇွဲလားနိုင်ငံ၏ ပြည်ပသို့ရေနံတင်ပို့မှုပမာဏမှာ ၄၀% ခန့်ကျဆင်းခဲ့သည်ဟု သိရှိရပါသည်။

PDVSA မှ ယခုရက်ပိုင်းအတွင်းထုတ်ပြန်သည့် အစီရင်ခံစာအရ ဗင်နီဇွဲလားနိုင်ငံသည် လွန်ခဲ့သည့် (၃) လတာကာလအတွင်း တစ်နေ့လျှင် ရေနံစည်ပေါင်း အနည်းဆုံး(၁.၄၇) သန်းမှ အများဆုံး(၁.၆၆) သန်းအထိ နေ့စဉ် ပြည်ပသို့တင်ပို့လျက်ရှိရာ အမေရိကန်အစိုးရက ၂၀၁၉ ခုနှစ်၊ ဇန်နဝါရီလ(၂၈) ရက်မှစ၍ အရေးယူပိတ်ဆို့မှုများ ချမှတ်ခဲ့ခြင်းကြောင့် ၂၀၁၉ ခုနှစ်၊ ဖေဖော်ဝါရီလတွင်မူ တစ်နေ့လျှင်ရေနံစည်ပေါင်း(၉.၂) သိန်းခန့်သာ ပြည်ပသို့တင်ပို့နိုင်တော့ရာနိုင်ငံ၏ပြည်ပသို့ ရေနံတင်ပို့မှုပမာဏမှာ ၄၀% ခန့်ကျဆင်းသွားခဲ့ခြင်းဖြစ်ပြီး အာရှနိုင်ငံများဖြစ်သည့် အိန္ဒိယ၊ တရုတ်နှင့်စင်ကာပူနိုင်ငံများသို့တင်ပို့ခဲ့ခြင်းဖြစ်ကြောင်း၊ ဗင်နီဇွဲလားနိုင်ငံသည်ပြည်တွင်း၌ ရေနံစိမ်း တူးဖော်ထုတ်လုပ်ကာ ပြည်ပသို့တင်ပို့နေသည့်နိုင်ငံဖြစ်သော်လည်း ပြည်တွင်း၌အသုံးပြုရန်အတွက် ပြည်ပမှသန့်စင်ပြီးလောင်စာများကို ပြန်လည်တင်သွင်းနေရသည်ဖြစ်ရာ အမေရိကန်အစိုးရက ဗင်နီဇွဲလားနိုင်ငံပိုင်ရေနံလုပ်ငန်း PDVSA နှင့် ဘဏ္ဍာရေးကဏ္ဍအပေါ် အရေးယူပိတ်ဆို့မှုများ ချမှတ်ခဲ့ခြင်းကြောင့် အခက်အခဲများကြုံတွေ့လာခဲ့ရာ PDVSA သည် ရေနံစိမ်းနှင့် သန့်စင်ပြီး လောင်စာဆီများအား ဖလှယ်မှုပြုကာ ရေနံကုန်သွယ်လျက်ရှိပြီး ပြည်ပသို့ရေနံများ ဆက်လက်တင်ပို့နိုင်ရန် ကြိုးပမ်းလျက်ရှိသည်ဟု သိရှိရပါသည်။

PDVSA သည် လွန်ခဲ့သည့် ဖေဖော်ဝါရီလအတွင်း တစ်နေ့လျှင် လောင်စာဆီစည်ပေါင်း (၁.၆၅) သိန်းခန့်တင်သွင်းခဲ့ပြီး အမေရိကန်ပြည်ထောင်စုနှင့် ဥရောပနိုင်ငံများထံမှ တင်သွင်းခဲ့ခြင်း ဖြစ်ကြောင်း၊အမေရိကန်အစိုးရ၏အရေးယူပိတ်ဆို့မှုများသည်နိုင်ငံပိုင်ရေနံလုပ်ငန်း၏ဘဏ္ဍာရေးနှင့် လုပ်ငန်းလည်ပတ်မှုများကိုထိခိုက်စေခဲ့သည်ဟု ဗင်နီဇွဲလားနိုင်ငံရေနံဝန်ကြီး မန်နျူရယ်ကီဗီဒိုက ယခုရက်ပိုင်းအတွင်းပြောကြားခဲ့ကြောင်း၊ ဗင်နီဇွဲလားနိုင်ငံသည် ယခုမတ်လအတွင်း ပြည်ပသို့ တစ်နေ့လျှင်ရေနံစည်ပေါင်း(၁) သန်းခန့် နေ့စဉ်တင်ပို့နိုင်ရန်ရည်မှန်းထားသည်ဟု www.reuters.com တွင်ဖော်ပြပါရှိပါသည်။

အမေရိကန်ပြည်ထောင်စုအတွက် အကျိုးပြုမည့် ဒေါ်လာတန်ဖိုးအားကောင်းမှုကို လိုလားသည်ဟု အမေရိကန်သမ္မတဒေါ်နယ်ထရန့်ကပြောကြားခဲ့မှု

အမေရိကန်သမ္မတ ဒေါ်နယ်ထရန့်သည် အမေရိကန်ဗဟိုဘဏ် ဝေဖန်ပြောကြားမှုများ ပြုလုပ်ခဲ့ပြီး အမေရိကန်ပြည်ထောင်စုအတွက် အကျိုးပြုမည့် ဒေါ်လာတန်ဖိုးအားကောင်းမှုကို လိုလားသည်ဟု ပြောကြားခဲ့ကြောင်း၊ ၂၀၁၉ ခုနှစ်၊ မတ်လ(၂)ရက်(စနေနေ့)တွင် အမေရိကန် ပြည်ထောင်စု၊ မေရီလန်းပြည်နယ်၌ပြုလုပ်သည့် နိုင်ငံရေးလှုပ်ရှားမှုဆိုင်ရာ ပုံမှန်ညီလာခံ (Conservative Political Action Conference) တွင် သမ္မတဒေါ်နယ်ထရန့်က ပြောကြားရာ၌ လက်ရှိအချိန်တွင် အမေရိကန်ပြည်ထောင်စု၏ စီးပွားရေး အခြေအနေမှာ အရှိန်အဟုန်မပြတ် တိုးတက်လျက်ရှိရာ တွင် အမေရိကန်ဗဟိုဘဏ်ကကြားဝင်ဆောင်ရွက်မှုများပြုလုပ်ပေးလျက်ရှိပြီး အမေရိကန်ဒေါ်လာ တန်ဖိုးမှာလွန်စွာအားကောင်းလျက်ရှိကြောင်း၊ အမေရိကန်ပြည်ထောင်စု၏စီးပွားရေး အခြေအနေ မှာအတိတ်ကာလများနှင့်မတူ ဖွံ့ဖြိုးတိုးတက်လျက်ရှိစဉ်တွင် အခြားသောနိုင်ငံများသည် ကျားကုတ် ကျားခဲရုန်းကန်နေကြရသည်ဖြစ်ရာ ယင်းသို့သောအခြေအနေသည် အမေရိကန်နိုင်ငံအတွက် အောင်မြင်ရန် ပိုမိုခက်ခဲစေကြောင်း၊ မိမိအနေဖြင့် တန်ဖိုးအားကောင်းသည့် အမေရိကန်ဒေါ်လာကို လိုလားပါသော်လည်း မိမိလိုချင်သည့် အမေရိကန်ဒေါ်လာမှာ တိုင်းပြည်အတွက်စီးပွားဖြစ်ထွန်း စေမည့်တန်ဖိုးအားကောင်းသော ဒေါ်လာသာဖြစ်ကြောင်း၊ တန်ဖိုးအားကောင်းလွန်းသည့်အတွက် အခြားသောနိုင်ငံများနှင့် စီးပွားရေးယှဉ်တွဲလုပ်ဆောင်ရန် အတားအဆီးဖြစ်စေနိုင်သော၊ အမေရိကန် ပြည်ထောင်စု၌ ရင်းနှီးမြှုပ်နှံမှုများ လာရောက်လုပ်ကိုင်ခြင်းကို အဟန့်အတားဖြစ်စေနိုင်သော ဒေါ်လာတန်ဖိုးအားကောင်းမှုကို လိုလား ခြင်းမရှိဟုပြောကြားခဲ့ကြောင်း သိရှိရပါသည်။

သမ္မတဒေါ်နယ်ထရန့်သည် အမေရိကန်ဗဟိုဘဏ်အား ဝေဖန်ပြောကြားမှုများ ပြုလုပ်ရာတွင် အမေရိကန်ဗဟိုဘဏ်တွင် လူကြီးလူကောင်းတစ်ဦးရှိနေကြောင်း၊ အဆိုပါပုဂ္ဂိုလ်ကြီးသည် ကိန်းဂဏန်း အရေအတွက်တင်းကြပ်ခြင်းကို သဘောကျလျက်ရှိပြီး အမေရိကန်ဒေါ်လာတန်ဖိုး လွန်စွာအားကောင်း ခြင်းကိုနှစ်ခြိုက်လျက်ရှိသည်ဟုဝေဖန်ပြောကြားခဲ့ကြောင်း၊ သမ္မတဒေါ်နယ်ထရန့်က ထိုသို့ပြောကြားခြင်းသည်အမည်တပ်၍ပြောကြားခြင်းမဟုတ်သော်လည်း အမေရိကန်ဗဟိုဘဏ်ဥက္ကဋ္ဌ ဂျရွန်မီပေါင်ဝယ် အားရည်ရွယ်ခြင်းဖြစ်သည်ဟု လေ့လာသူများက သုံးသပ်ထားကြောင်း www.bloomberg.com ဖော်ပြပါရှိပါသည်။

ယခုရက်သတ္တပတ်အတွင်း အိန္ဒိယဆန်နှင့် ထိုင်းဆန်ဈေးနှုန်းများကျဆင်းခဲ့သော်လည်းဗီယက်နမ်ဆန် ဈေးနှုန်းမှာမူ အနည်းငယ်မြင့်တက်ခဲ့မှု

အိန္ဒိယနိုင်ငံတွင် လတ်တလောကာလများအတွင်း ပြည်ပဝယ်လိုအားနည်းပါးလျက်ရှိချိန်တွင် အိန္ဒိယရူပီးငွေတန်ဖိုးကျဆင်းခဲ့ခြင်းနှင့် အိန္ဒိယ-ပါကစ္စတန် ပထဝီနိုင်ငံရေးတင်းမာမှုများ ဖြစ်ပေါ်လာခြင်းတို့ကြောင့် ယခုရက်သတ္တပတ်အတွင်း အိန္ဒိယ (၅) မှတ်ပေါင်းဆန်တစ်တန်၏ဈေးနှုန်းမှာ အမေရိကန်ဒေါ်လာ (၂) ဒေါ်လာကျဆင်းပြီးတစ်တန်လျှင်အနိမ့်ဆုံးဈေး အမေရိကန်ဒေါ်လာ (၃၇၈) ဒေါ်လာနှင့် (၃၈၃) ဒေါ်လာအကြား၌ဖြစ်ပေါ်ခဲ့ကြောင်း၊ အိန္ဒိယရူပီးငွေတန်ဖိုးမှာ ၂၀၁၉ ခုနှစ် အတွင်း၂% ခန့်ကျဆင်းလျက်ရှိသည်ဟု သိရှိရပါသည်။

ဗီယက်နမ်နိုင်ငံတွင်မူ ဗီယက်နမ်အစိုးရသည်ဆန်အရန်သိုလှောင်မှုများပြုလုပ်ရန်အတွက် ပြည်တွင်းလယ်သမားများထံမှ ဆန်တန်ချိန်(၂)သိန်း ဝယ်ယူမည်ဟုကြေညာထားသည့်အတွက် ယခုရက်သတ္တပတ်အတွင်း ဗီယက်နမ် (၅) မှတ်ဆန်တစ်တန်၏ဈေးနှုန်းမှာ အမေရိကန်ဒေါ်လာ(၅) ဒေါ်လာမြင့်တက်ခဲ့ပြီး တစ်တန်လျှင်အမေရိကန်ဒေါ်လာ (၃၄၅) ဒေါ်လာသို့ရောက်ရှိခဲ့သည်ဟု သိရှိရ ပါသည်။

လတ်တလောရက်သတ္တပတ်များအတွင်း ပြည်ပဝယ်လိုအားနည်းပါးလျက်ရှိခြင်းကြောင့် ဆန်သစ်များ ဈေးကွက်အတွင်းဝင်ရောက်လာခြင်းနှင့် ထိုင်းဘတ်ငွေတန်ဖိုးအားကောင်းနေခြင်းတို့ကြောင့် ယခုရက်သတ္တပတ်အတွင်းထိုင်း (၅) မှတ်ဆန်ဈေးနှုန်းမှာ အနည်းငယ်ကျဆင်းခဲ့ပြီး တစ်တန်လျှင်အနိမ့်ဆုံးဈေးအမေရိကန်ဒေါ်လာ (၃၈၃) နှင့် အမြင့်ဆုံးဈေးအမေရိကန်ဒေါ်လာ (၃၉၈) ၌ ဖြစ်ပေါ်လျက်ရှိသည်ဟုသိရှိရကြောင်း www.reuters.com တွင်ဖော်ပြပါရှိပါသည်။

၂၀၁၉ ခုနှစ်၊ ဖေဖော်ဝါရီလအတွင်း မလေးရှားနိုင်ငံ၏ ပြည်ပသို့ စားအုန်းဆီတင်ပို့မှုကျဆင်းခဲ့သည်ဟူသော အစီရင်ခံစာထွက်ပေါ်ပြီးနောက် မလေးရှားစားအုန်းဆီဈေးနှုန်းမှာ (၂) လတာကာလအတွင်း အနိမ့်ဆုံးသို့ကျဆင်းခဲ့မှု

ဗြိတိန်နိုင်ငံ၊ လန်ဒန်အခြေစိုက်အရည်အသွေးစမ်းသပ်စစ်ဆေးခြင်းနှင့် အသိအမှတ်ပြုလက်မှတ်ထုတ်ပေးခြင်းဆိုင်ရာ ဝန်ဆောင်မှုလုပ်ငန်း (Intertek Testing Services) က ထုတ်ပြန် သည့်အစီရင်ခံစာ ထွက်ပေါ်ပြီးနောက် မလေးရှားစားအုန်းဆီဈေးနှုန်းမှာကျဆင်းခဲ့သည်ဟု သိရှိရပါသည်။

၂၀၁၉ ခုနှစ်၊ ဖေဖော်ဝါရီလ(၂၈)ရက် (ကြာသပတေးနေ့) တွင် Intertek Testing Services (ITS) က ထုတ်ပြန်သည့်အစီရင်ခံစာ၌ ၂၀၁၉ ခုနှစ်၊ ဖေဖော်ဝါရီလအတွင်း မလေးရှားနိုင်ငံ၏ ပြည်ပသို့ စားအုန်းဆီတင်ပို့မှုမှာ တန်ချိန် (၁.၂၄၃) သန်းခန့်ရှိခဲ့ရာ ဇန်နဝါရီလအတွင်းဖြစ်ပေါ်ခဲ့သည့် ပြည်ပသို့ တင်ပို့မှုပမာဏ တန်ချိန် (၁.၄၆၆) သန်းနှင့်နှိုင်းယှဉ်ပါက ၁၅.၂% ကျဆင်းခဲ့သည်ဟု ဖော်ပြထားရာ မလေးရှားစားအုန်းဆီအား ပြည်ပဝယ်လိုအားနည်းပါးလျက်ရှိသည်ဟူသော ခန့်မှန်းချက်များနှင့်အတူ မလေးရှားစားအုန်းဆီဈေးနှုန်းမှာ ကျဆင်းသွားခဲ့ခြင်းဖြစ်ကြောင်း၊ ထို့ပြင် မလေးရှားနိုင်ငံ၏ စားအုန်းဆီအရန်သိုလှောင်မှုပမာဏမှာ လက်ရှိအချိန်တွင် တန်ချိန် (၃) သန်းခန့်ရှိရာ အဆိုပါပမာဏသည် နှစ်ပေါင်း(၂၀) ကာလအတွင်း အရန်သိုလှောင်မှုပမာဏအများဆုံးအနေအထားသို့ ရောက်ရှိနေခြင်းသည်လည်း စားအုန်းဆီဈေးနှုန်းကိုကျဆင်းစေသည့် အခြားသောအချက်တစ်ခုဖြစ်ကြောင်း သိရှိရပါသည်။

၂၀၁၉ ခုနှစ်၊ မတ်လ(၁) ရက် (သောကြာနေ့) နံနက်ပိုင်းတွင် မလေးရှားစားအုန်းဆီဈေးကွက်၌ မေလအတွက် စားအုန်းဆီကြိုတင်ရောင်းဝယ်မှုဈေးနှုန်းမှာ ၀.၅% ကျဆင်းပြီး တစ်တန်လျှင် မလေးရှားငွေ ၂၁၂၁ ရင်းဂစ် (အမေရိကန်ဒေါ်လာ ၅၂၂.၀၂ ဒေါ်လာ) ၌ဖြစ်ပေါ်ခဲ့ကြောင်း၊ အဆိုပါ ဈေးနှုန်းသည် (၂) လတာကာလအတွင်းအနိမ့်ဆုံးဈေးနှုန်းဖြစ်ပြီး မလေးရှားစားအုန်းဆီဈေးနှုန်းသည် (၅) ရက်ဆက်တိုက်ကျဆင်းခဲ့ခြင်းဖြစ်ကြောင်းဖြင့် www.thestar.com.my တွင် ဖော်ပြပါရှိပါသည်။

အိန္ဒိယနှင့်ပါကစ္စတန်နှစ်နိုင်ငံအကြား လေကြောင်းတိုက်ခိုက်မှုများဖြစ်ပွားခဲ့ပြီးနောက် နှစ်နိုင်ငံဒေသတွင်းရှိ လေဆိပ်များအားပိတ်ခဲ့ပြီး လေကြောင်းခရီးစဉ်များဖျက်သိမ်းခဲ့သောကြောင့် အရှေ့တောင်အာရှဒေသများသို့ ရောက်ရှိနေသည့်ရာပေါင်းများစွာသော ဗြိတိန်ခရီးသွား ဧည့်သည်များမှာ လေဆိပ်များ၌သောင်တင်လျက်ရှိမှု

အိန္ဒိယနှင့် ပါကစ္စတန်နှစ်နိုင်ငံအကြား လေကြောင်းတိုက်ခိုက်မှုများဖြစ်ပွားခဲ့ပြီးနောက် နှစ်နိုင်ငံဒေသတွင်းရှိလေဆိပ်များအား ပိတ်သိမ်းခဲ့သောကြောင့် ထိုင်းအဲဝေး(Thai Airways) လေကြောင်းလိုင်းသည် ဥရောပခရီးစဉ်အားလုံးကို ဖျက်သိမ်းခဲ့ပြီး အန်းမရိတ်(Emirates) နှင့် ကာတာ(Qatar) လေကြောင်းလိုင်းများအပါအဝင်အခြားသောလေကြာင်းလိုင်းများမှ လေကြောင်းခရီးစဉ်အများအပြားအား ဖျက်သိမ်းခဲ့သောကြောင့် အရှေ့တောင်အာရှဒေသများသို့ ရောက်ရှိနေသော ရာပေါင်းများစွာသောဗြိတိန်ခရီးသွားဧည့်သည်များမှာ လေဆိပ်များ၌ သောင်တင်လျက်ရှိသည်ဟု သိရှိရပါသည်။

နျူကလီးယားလက်နက်ပိုင်ဆိုင်သည့် အိန္ဒိယနှင့်ပါကစ္စတန်နှစ်နိုင်ငံအကြား ပထဝီ နိုင်ငံရေးတင်းမာမှုများ ပိုမိုဆိုးရွားလာပြီး လေကြောင်းခရီးစဉ်များဖျက်သိမ်းခဲ့သောကြောင့် ထိုင်းနိုင်ငံ၊ သုဝဏ္ဏဘူမိလေဆိပ်တွင် ခရီးသည်ရာပေါင်းများစွာ သောင်တင်လျက်ရှိကြကာ အစား အသောက်နှင့် ရေလိုအပ်ချက်များဖြစ်ပေါ်လျက်ရှိပြီး အခက်အခဲများနှင့်ရင်ဆိုင်ရလျက်ရှိကြောင်း၊ ဥရောပသို့သွားရောက်သည့်လေကြောင်းခရီးစဉ်သည် အိန္ဒိယနိုင်ငံအား ဖြတ်သန်းပြီးပါကစ္စတန် နိုင်ငံမှတစ်ဆင့်သွားရောက်ရသည်ဖြစ်ရာ ထိုင်းအဲဝေး(Thai Airways)လေကြောင်းလိုင်းသည် ဥရောပရှိ ဂျာမနီနှင့် ဗြိတိန်သို့ထွက်ခွာသွားသည့်လေယာဉ်များအား ပြန်လည်လှည့်ပျံဆင်းသက်စေခဲ့ပြီး ဥရောပသို့သွားရောက်မည့် လေကြောင်းခရီးစဉ်များအားလုံးကို ဖျက်သိမ်းခဲ့ကြောင်း၊ အလားတူ အန်းမရိတ် (Emirates) နှင့်ကာတာ(Qatar) လေကြောင်းလိုင်းများအပါအဝင် Etihad ၊ Flydubai ၊ Gulf Air ၊ SriLankan Airlines နှင့် Air Canada အစရှိသည့် လေကြာင်းလိုင်းများသည်လည်း ပါကစ္စတန်နိုင်ငံသို့သွားရောက်မည့် လေကြောင်းခရီးစဉ်များအားဆိုင်းငံ့ခဲ့ပြီး တောင်အာရှနိုင်ငံရှိ အချို့ခရီးစဉ်များအား ဖျက်သိမ်းခဲ့သောကြောင့်လေဆိပ်တွင်သောင်တင်လျက်ရှိသောခရီးသည်များအား အခြားသောလေယာဉ်ခရီးစဉ်များဖြင့် သွားရောက်နိုင်ရေးအတွက် Singapore Airlines နှင့် British Airways တို့မှ လုပ်ဆောင်ပေးလျက်ရှိကြောင်း၊ အဆိုပါကိစ္စနှင့်ပတ်သက်၍ ထိုင်းအဲဝေး (Thai Airways) လေကြောင်းလိုင်းဥက္ကဌသည် အရေးပေါ်အစည်းအဝေးပြုလုပ်ကာ ပုံမှန်လေပိုင်နက်မှဖြတ်သန်းသွားနိုင်သည့်ဥရောပလေကြောင်းခရီးစဉ်ပြန်လည်ပြေးဆွဲနိုင်ရေးအတွက် လုပ်ဆောင်လျက်ရှိကြောင်း၊ ပါကစ္စတန်နိုင်ငံသည် အိန္ဒိယတိုက်လေယာဉ် (၂) စီးကိုဖျက်ချခဲ့ပြီး ယခုကဲ့သို့ အိန္ဒိယနိုင်ငံမှလေကြောင်းတိုက်ခိုက်မှုများပြုလုပ်ခြင်းသည် ၁၉၇၁ နောက်ပိုင်း ပထမဆုံးအကြိမ် ပြုလုပ်ခြင်းပင်ဖြစ်သည်ဟု သိရှိရပါသည်။

အဆိုပါအိန္ဒိယနှင့်ပါကစ္စတန်နှစ်နိုင်ငံလေကြောင်း တိုက်ခိုက်မှုများဖြစ်ပေါ်ကာ လေကြောင်းခရီးစဉ်များ ဆိုင်းငံ့ခဲ့ရသောကြောင့် အိန္ဒိယနိုင်ငံ၏အကြီးဆုံး စရိတ်နည်းလေကြောင်းလိုင်းကြီးဖြစ်သည့် IndiGo လေ ကြောင်းလိုင်းရှယ်ယာတန်ဖိုးမှာ ၄% ခန့်ကျဆင်းခဲ့ကြောင်း၊ အလားတူ ပါကစ္စတန်နယ်စပ်အနီးရှိ အိန္ဒိယနိုင်ငံမြောက်ပိုင်းဒေသများမှ လေဆိပ်များအားပိတ်သိမ်းခဲ့ခြင်း နှင့် ပုဂ္ဂလိကစီးပွားဖြစ်လေကြောင်းလိုင်းများအား ကန့်သတ်ပိတ်ပင်ခဲ့ပြီးနောက် IndiGo အပါ အဝင်အခြားသောလေကြောင်းလိုင်းများမှ လေယာဉ်ခရီးစဉ် (၆၅) ခုအား ဖျက်သိမ်းခဲ့ရကြောင်း၊ ထို့ပြင် အိန္ဒိယ-ပါကစ္စတန်ပဋိပက္ခကြောင့် အာရှနှင့် ဥရောပဈေးကွက်ရှိ စတော့ရှယ်ယာ တန်ဖိုးများကျဆင်းခဲ့ပြီး MSCI ၏အာရှပစိဖိတ်ဒေသစတော့ရှယ်ယာတန်ဖိုးမှာ ၀.၁၅%  သို့လည်းကောင်း၊ ဥရောပဈေးကွက်ရှိ pan-European STOXX600 စတော့ရှယ်ယာတန်ဖိုးမှာ ၀.၅% သို့လည်းကောင်း အသီးသီးကျဆင်းခဲ့သည်ဟုသိရှိရကြောင်း www.dailymail.co.uk တွင်ဖော်ပြပါရှိပါသည်။