ကမ္ဘာ့ရေနံကုန်သွယ်မှုကိစ္စများ၌ အမေရိကန်ဒေါ်လာအစားအခြားနိုင်ငံသုံးငွေကြေးများကိုအသုံးပြုသွားမည်ဟုဆော်ဒီအာရေဗျနိုင်ငံကခြိမ်းခြောက်ပြောကြားခဲ့မှု

အမေရိကန်အစိုးရအနေဖြင့် အိုပက်အဖွဲ့အပေါ်အရေးယူပိတ်ဆို့မှုများပြုလုပ်မည့် ဥပဒေမျိုးပြဌာန်းလာမည်ဆိုပါက ဆော်ဒီအာရေဗျနိုင်ငံအနေဖြင့် ကမ္ဘာ့ရေနံကုန်သွယ်မှုကိစ္စများ၌ လက်ရှိသုံးစွဲနေသည့် အမေရိကန်ဒေါ်လာအစား အခြားနိုင်ငံသုံးငွေကြေးများကိုပြောင်းလဲသုံးစွဲသွားမည်ဟု ဆော်ဒီအာရေဗျ နိုင်ငံက ယခုရက်ပိုင်းအတွင်းခြိမ်းခြောက်ခဲ့ကြောင်း သိရှိရပါသည်။

လက်ရှိအချိန်တွင် ကမ္ဘာ့ဈေးကွက်အတွင်း WTI နှင့် ဘရန့်ရေနံဈေးနှုန်းများမှာ တစ်စည်လျှင်အမေရိကန်ဒေါ်လာ (၆၀) နှင့် (၇၀) ဒေါ်လာအထက်သို့ အသီးသီးမြင့်တက်ကာ (၅) လတာကာလအတွင်းအမြင့်ဆုံးသို့ရောက်ရှိနေကြောင်း၊ အမေရိကန်အစိုးရသည် ရေနံဈေးနှုန်းများမြင့်တက်နေခြင်းနှင့်ပတ်သက်၍ အိုပက်အဖွဲ့အပေါ် ပြစ်တင်ဝေဖန်ခဲ့ပြီးအိုပက်အဖွဲ့ဝင်နိုင်ငံများသည် ရေနံဈေးနှုန်းများအဆမတန်မြင့်တက်လာစေရန်အတွက်  ရေနံထုတ်လုပ်မှုကို ရည်ရွယ်ချက်ရှိရှိဖြင့် လျှော့ချနေသောကြောင့် အဆိုပါနိုင်ငံများအပေါ်၌ အမေရိကန်ပြည်ထောင်စုက စီးပွားရေးအရအရေးယူပိတ်ဆို့နိုင်မည့် ဥပဒေကိုပြဌာန်းရန်စီစဉ်လျက်ရှိကြောင်း၊ ထို့ကြောင့် အမေရိကန်အစိုးရကယင်းသို့သောဥပဒေမျိုးပြဌာန်းကာရေနံထုတ်လုပ်သောနိုင်ငံများအပေါ် စီးပွားရေးအရအရေးယူပိတ်ဆို့မှုများ ချမှတ်လာမည်ဆိုပါက လက်တုံ့ပြန်သည့်အနေဖြင့် ဆော်ဒီအာရေဗျနိုင်ငံကလည်းရေနံကုန်သွယ်ရေးကိစ္စများ၌ အမေရိကန်ဒေါ်လာအစား အခြားနိုင်ငံသုံးငွေကြေးများကိုပြောင်းလဲအသုံးပြုသွားရန် ဆွေးနွေးပြင်ဆင်မှုများပြုလုပ်လျက်ရှိသည်ဟု သိရှိရပါသည်။

လက်ရှိအချိန်တွင် အမေရိကန်အစိုးရ၏ အရေးယူပိတ်ဆို့မှုများကို ကြုံတွေ့နေရသောရုရှားနိုင်ငံသည် ရေနံရောင်းချရာတွင် ယူရိုငွေနှင့် တရုတ်ယွမ်ငွေတို့ကိုအသုံးပြုလျက်ရှိသကဲ့သို့  အီရန်နှင့် ဗင်နီဇွဲလားနိုင်ငံတို့သည်လည်း ရေနံကုန်သွယ်ရာ၌ အခြားနိုင်ငံသုံးငွေကြေးများကိုပြောင်းလဲအသုံးပြုလျက်ရှိကြောင်း၊ သို့သော် ယင်းနိုင်ငံများ၏အမေရိကန်ဒေါ်လာအစား အခြားနိုင်ငံသုံးငွေကြေးများအားပြောင်းလဲအသုံးပြုမှုမှာ ကမ္ဘာ့ကုန်သွယ်ရေးနှင့်ဘဏ္ဍာရေးစနစ်အတွင်း အမေရိကန်ဒေါ်လာကြီးစိုးထားမှုကိုတွန်းလှန်နိုင်သည့်အနေအထားမရှိကြောင်း၊ သို့ရာတွင် ကမ္ဘာပေါ်၌ ပြည်ပသို့ ရေနံအများဆုံးတင်ပို့လျက်ရှိသောထိပ်တန်းနိုင်ငံတစ်ခုဖြစ်သည့် ဆော်ဒီအာရေဗျနိုင်ငံကပါ ရေနံကုန်သွယ်မှုတွင် အမေရိကန်ဒေါ်လာအစား အခြားနိုင်ငံသုံးငွေကြေးများကိုပြောင်းလဲအသုံးပြုသွားမည်ဆိုပါကရေနံကုန်သွယ်မှုငွေပေးချေရေးစနစ်အတွင်း အမေရိကန်ဒေါ်လာကြီးစိုးထားမှုကို အတိုင်းအတာတစ်ခုအထိ တွန်းလှန်နိုင်ဖွယ်ရှိသည်ဟုအချို့သောပညာရှင်များက သုံးသပ်ထားကြကြောင်း သိရှိရပါသည်။

          လက်ရှိအချိန်တွင် အမေရိကန်ပြည်ထောင်စု၌ ဆော်ဒီအာရေဗျနိုင်ငံ၏ ရင်းနှီးမြှုပ်နှံမှုပမာဏမှာအမေရိကန်ဒေါ်လာ (၁) ထရီလီယံနီးပါးရှိပြီးဆော်ဒီအာရေဗျပိုင်ဆိုင်ထားသော အမေရိကန်ငွေတိုက်စာချုပ်များ၏ စုစုပေါင်းတန်ဖိုးပမာဏမှာအမေရိကန်ဒေါ်လာ (၁၆၀) ဘီလီယံခန့်ရှိကြောင်းwww.reuters.comအင်တာနက် website တွင် ဖော်ပြပါရှိပါသည်။

ဘင်္ဂလားဒေ့ရှ်နိုင်ငံသည် မြန်မာရေပိုင်နက်နှင့်ထိစပ်နေသော ကမ်းလွန်ပင်လယ်ပြင်အတွင်း၌ သဘာဝ ဓာတ်ငွေ့စမ်းသပ်ရှာဖွေလျက်ရှိမှု

ဘင်္ဂလားဒေ့ရှ်နိုင်ငံသည် မြန်မာရေပိုင်နက်နှင့် ထိစပ်နေသော ကမ်းလွန်ပင်လယ်ပြင်အတွင်း၌ သဘာဝဓာတ်ငွေ့စမ်းသပ်ရှာဖွေပြုလုပ်လျက်ရှိပြီး သဘာဝဓာတ်ငွေ့စမ်းသပ်ရှာဖွေနေသည့် နေရာနှစ်ခုမှာ ဘင်္ဂလားပင်လယ်အော်အတွင်းရှိ လုပ်ကွက်အမှတ် SS -11 အတွင်း၌ရှိကြောင်း၊ ယင်းနေရာနှစ်ခုတွင် သြစတြေးလျကုမ္ပဏီ Santos နှင့် စင်ကာပူကုမ္ပဏီ Khris Energy တို့ ပူးပေါင်း၍ စမ်းသပ်ရှာဖွေရေး လုပ်ငန်းများဆောင်ရွက်နေခြင်းဖြစ်ကာ တူးဖော်ထုတ်လုပ်ရေးလုပ်ငန်းများကို ယခုနှစ်အတွင်း၌ စတင်ပြုလုပ်လိမ့်မည်ဟု ခန့်မှန်းရကြောင်း သိရှိရပါသည်။

ဘင်္ဂလားဒေ့ရှ်နိုင်ငံက ဓာတ်ငွေ့စမ်းသပ်ရှာဖွေရေးလုပ်ဆောင်နေသည့်လုပ်ကွက် အမှတ်SS-11 သည် မြန်မာရေပိုင်နက်အတွင်းရှိ  ကမ်းလွန်လုပ်ကွက်အမှတ် A–6 နှင့် AD-7  တို့နှင့်နီးကပ်စွာတည်ရှိကြောင်း၊ ၂၀၁၈ ခုနှစ်အတွင်း၌ မြန်မာလုပ်ကွက်အမှတ်  A–6  နှင့် AD-7 လုပ်ကွက်အတွင်းတို့၌  သြစတြေးလျကုမ္ပဏီ Woodside က သဘာဝဓာတ်ငွေ့များစမ်းသပ်တွေ့ရှိပြီးနောက်တွင် ဘင်္ဂလားဒေ့ရှ်နိုင်ငံကလည်း မြန်မာလုပ်ကွက်များနှင့်ဆက်စပ်နေသည့် ၎င်းတို့လုပ်ကွက် SS -11 အတွင်း၌ သဘာဝဓာတ်ငွေ့များရှိလိမ့်မည်ဟု ယူဆကာ စမ်းသပ်ရှာဖွေမှုများ ပြုလုပ်လာခြင်းဖြစ်ကြောင်း သိရှိရပါသည်။

ဘင်္ဂလားဒေ့ရှ်နိုင်ငံသည် လက်ရှိအချိန်၌ ကုန်းတွင်းပိုင်းရှိ သဘာဝဓာတ်ငွေ့လုပ်ကွက်များမှထွက်ရှိသော ဓာတ်ငွေ့များကိုသာ မှီခိုအားထားနေရပြီး ကုန်းတွင်းပိုင်းသဘာဝဓာတ်ငွေ့ထွက်ရှိမှု ပမာဏမှာ တစ်နေ့လျှင်ကုဗပေပေါင်း (၂၇၀၀) သန်းခန့်ရှိကြောင်း၊ ဘင်္ဂလားဒေ့ရှ်နိုင်ငံအတွင်း သဘာဝဓာတ်ငွေ့သုံးစွဲမှုမှာ တစ်နေ့လျှင် ကုဗပေပေါင်း (၃၃၀၀) သန်းခန့်ရှိသည့်အတွက် ဘင်္ဂလားဒေ့ရှ်အစိုးရ သည် ဓာတ်ငွေ့လိုအပ်ချက်ကို ဖြည့်တင်းနိုင်ရန်ရည်ရွယ်၍ ကမ်းလွန်သဘာဝဓာတ်ငွေ့လုပ်ကွက်များမှ ဓာတ်ငွေ့များထုတ်လုပ်နိုင်ရန် ကြိုးပမ်းလျက်ရှိကြောင်း www.theindependentbd.com အင်တာနက် website တွင် ဖော်ပြပါရှိပါသည်။

အိန္ဒိယဗဟိုဘဏ်က ဘဏ်တိုးနှုန်းလျှော့ချခဲ့ပြီးနောက် အိန္ဒိယရူပီးငွေတန်ဖိုးမှာ (၃) လတာကာလအတွင်း အနိမ့်ဆုံးသို့ ကျဆင်းခဲ့မှု

၂၀၁၉ ခုနှစ်၊ ဧပြီလ (၄) ရက် (ကြာသပတေးနေ့) တွင် ကျင်းပသည့် အိန္ဒိယဗဟိုဘဏ်အစည်းအဝေး၌ ဘဏ်တိုးနှုန်းကို လက်ရှိသတ်မှတ်ထားသည့် ၆.၂၅ % မှ ၆ % သို့ လျှော့ချသတ်မှတ်ခဲ့ရာ ဘဏ်တိုးနှုန်းလျှော့ချသည့်ဂယက်ကြောင့် အိန္ဒိယရူပီးငွေတန်ဖိုးမှာ (၃) လအတွင်း အနိမ့်ဆုံးသို့ကျဆင်းသွားခဲ့ကြောင်း၊ ယခုဘဏ်တိုးနှုန်းလျှော့ချမှုသည် ၂၀၁၉ ခုနှစ်အတွင်း၌ ဒုတိယအကြိမ်မြောက် လျှော့ချခဲ့ခြင်းဖြစ်ကြောင်း သိရှိရပါသည်။

အိန္ဒိယဗဟိုဘဏ်က ၂၀၁၉ ခုနှစ်၊ ဧပြီလ (၄) ရက် (ကြာသပတေးနေ့) တွင် ဘဏ်တိုးနှုန်းလျှော့ချခဲ့ပြီးနောက် ဧပြီလ (၅) ရက်(သောကြာ)နေ့ မွမ်ဘိုင်းငွေကြေးဈေးကွက်ဖွင့်ချိန်တွင် ရူပီးငွေတန်ဖိုးမှာ ၁% အထိကျဆင်းခဲ့ပြီး အမေရိကန်တစ်ဒေါ်လာလျှင် (၆၉.၁၃၃၈) ရူပီးလဲလှယ်မှုနှုန်းသို့ ရောက်ရှိခဲ့ကြောင်း၊ အဆိုပါရူပီးငွေတန်ဖိုးကျဆင်းမှုသည် (၃) လတာကာလအတွင်း၌ အဆိုးဝါးဆုံးကျဆင်းမှုဖြစ်ကြောင်း သိရှိရပါသည်။

အိန္ဒိယဗဟိုဘဏ်သည် ၂၀၁၉ခုနှစ်အတွင်း ပထမဆုံးအကြိမ်အဖြစ်ဘဏ်တိုးနှုန်းလျှော့ချခြင်းကို ဖေဖော်ဝါရီလအတွင်း၌ ပြုလုပ်ခဲ့ပြီး ဘဏ်တိုးနှုန်းအား ၆.၅၀% မှ ၆.၂၅% သို့ လျှော့ချခဲ့ဖူးပြီး ယခုဧပြီလတွင် ဒုတိယအကြိမ်အဖြစ် ၆.၂၅% မှ ၆% သို့လျှော့ချခဲ့ခြင်းဖြစ်ကြောင်း သိရှိရပါသည်။

ဗဟိုဘဏ်အနေဖြင့် ဘဏ်တိုးနှုန်းကိုလျှော့ချပေးရခြင်းမှာ အိန္ဒိယနိုင်ငံ၏ စီးပွားရေးနှေးကွေးလာမှုကြောင့်ဖြစ်ကြောင်း၊ အိန္ဒိယနိုင်ငံ၏ စီးပွားရေးတိုးတက်မှုနှုန်းသည် ၂၀၁၈-၂၀၁၉ ဘဏ္ဍာရေးနှစ်အတွင်း၌ ၇.၄% အထိရှိခဲ့သော်လည်း ယခုဧပြီလ (၁) ရက်နေ့တွင်စတင်ခဲ့သည့် ၂၀၁၉-၂၀၂၀ ဘဏ္ဍာရေးနှစ်၌မူ ကမ္ဘာ့စီးပွားရေးအခြေအနေ မတည်ငြိမ်မှုများကြောင့် စီးပွားရေးတိုးတက်မှုနှုန်းမှာ ၇.၂% သို့ကျဆင်းဖွယ်ရှိသည့်အတွက်  အိန္ဒိယဗဟိုဘဏ်အနေဖြင့် စီးပွားရေးကဏ္ဍကို အ​ထောက်အကူပြုနိုင်ရန်ရည်ရွယ်ကာ ဘဏ်တိုးနှုန်းကို ယခုကဲ့သို့ လျှော့ချပေးခြင်းဖြစ်ကြောင်း www.theprint.in အင်တာနက် website တွင်ဖော်ပြပါရှိပါသည်။