ဝက်တုပ်ကွေးရောဂါကူးစက်ပျံ့နှံ့လာမည်ကို စိုးရိမ်ပူပန်သောကြောင့် မီဇိုရမ်ပြည်နယ်အစိုးရသည် မြန်မာနိုင်ငံဘက်မှ ဝက်နှင့်ဝက်သားများတင်ပို့မှုကို တားမြစ်ပိတ်ပင်ခဲ့

တရုတ်နိုင်ငံနှင့် ဗီယက်နမ်နိုင်ငံတို့တွင် အကြီးအကျယ်ဖြစ်ပွားနေသော ဝက်တုပ်ကွေးရောဂါသည် မြန်မာနိုင်ငံမှတစ်ဆင့် အိန္ဒိယနိုင်ငံ၊ မီဇိုရမ်ပြည်နယ်အတွင်းသို့ ဝင်ရောက်လာမည်ကို စိုးရိမ်ပူပန်သောကြောင့် မြန်မာနိုင်ငံဘက်မှ ဝက်နှင့်ဝက်သားများတင်သွင်းလာမှုကို မီဇိုရမ်ပြည်နယ်အစိုးရက စတင်တားမြစ် ပိတ်ပင်ခဲ့သည်ဟု မီဇိုရမ်ပြည်နယ်တိရိစ္ဆာန်ဆေးကုသရေးဌာန ညွှန်ကြားရေးမှူး မာခန်ဂါက ၂၀၁၉ ခုနှစ်၊ ဇူလိုင်လ (၉) ရက်(အင်္ဂါနေ့) တွင် ပြောကြားခဲ့ကြောင်း သိရှိရပါသည်။
မီဇိုရမ်ပြည်နယ်သည် ဝက်သားနှင့် ဝက်သားထွက်စားသောက်ကုန်များကို အများဆုံးစားသောက်နေသည့် ပြည်နယ်ဖြစ်ကြောင်း၊ လက်ရှိအချိန်အထိ မီဇိုရမ်ပြည်နယ်အတွင်း၌ ဝက်တုပ်ကေွးဖြစ်ပွားမှု မရှိသေးသော်လည်း ပြည်နယ်အာဏာပိုင်များအနေဖြင့် ကာကွယ်မှုများကို ပိုမိုပြုလုပ်သွားရန်စီစဉ်ခြင်းဖြစ်ကြောင်း၊ မြန်မာနိုင်ငံနှင့်ဆက်စပ်နေသော မီဇိုရမ်ပြည်နယ်အတွင်းရှိ ခရိုင်အသီးသီးတွင် နေထိုင် ကြသော ပြည်သူများသည် မြန်မာနိုင်ငံဘက်မှ ဝက်နှင့်ဝက်သားထွက်စားသောက်ကုန်ပစ္စည်းများကိုသာ အဓိကထားဝယ်ယူတင်သွင်းလေ့ရှိသောကြောင့် မီဇိုရမ်ပြည်နယ်အစိုးရက ယခုကဲ့သို့ တားမြစ်မိန့် ထုတ်ပြန်ရခြင်းဖြစ်ကြောင်း သိရှိရပါသည်။
မီဇိုရမ်ပြည်နယ်တိရိစ္ဆာန်ဆေးကုသရေးဌာန ညွှန်ကြားရေးမှူး မာခန်ဂါ၏ပြောကြားချက်အရ မီဇိုရမ်ပြည်နယ်အတွင်းရှိ ခရိုင်အသီးသီးမှ တိရိစ္ဆာန်ဆေးကုသရေးဌာနတာဝန်ရှိသူများနှင့် ဒေသဆိုင်ရာ အာဏာပိုင်များသည် မြန်မာနိုင်ငံနှင့်ထိစပ်နေသည့် (၄၀၄) ကီလိုမီတာရှည်လျားသော မီဇိုရမ်ပြည်နယ် နယ်စပ်တစ်လျှောက်၌ အထူးဂရုပြုစောင့်ကြည့်မှုများပြုလုပ်လျက်ရှိပြီး ဝက်နှင့်ဝက်သားများ သယ်ဆောင်တင်သွင်းလာသည်ကို တွေ့ရှိပါက အမြန်ဆုံးတားဆီးပိတ်ပင်သွားမည်ဟု ပြောကြားခဲ့ကြောင်း သိရှိရပါသည်။
မီဇိုရမ်ပြည်နယ်အစိုးရသည် မူလက မြန်မာနိုင်ငံဘက်မှဝင်ရောက်လာသော ဝက်များကိုသာ တားမြစ်ပိတ်ပင်ရန်စီစဉ်ခဲ့သော်လည်း ဂျပန်နိုင်ငံတွင် ဝက်အူချောင်းအတွင်း ဝက်တုပ်ကွေးရောဂါပိုး တွေ့ရှိသည့်သတင်းထွက်ပေါ်ပြီးနောက်ပိုင်းမှစ၍ ဝက်များကိုသာမက ဝက်သားနှင့်ဆက်စပ်သည့် စားသောက်ကုန်ပစ္စည်းများအားလုံးကို မြန်မာနိုင်ငံဘက်မှတင်သွင်းခြင်းမပြုရန် ဆုံးဖြတ်ခဲ့ခြင်း ဖြစ်ကြောင်း www.indiatoday.com အင်တာနက် website တွင် ဖော်ပြပါရှိပါသည်။

အီရန်နှင့် အနောက်နိုင်ငံများအကြား တင်းမာမှုပိုမိုမြင့်တက်လာခြင်းနှင့် အမေရိကန် _ တရုတ်ကုန်သွယ်ရေးဆွေးနွေးပွဲပြန်လည်စတင်တော့မည် ဖြစ်ခြင်းတို့ကြောင့် ကမ္ဘာ့ရေနံဈေးနှုန်းများ အားကောင်းလျက်ရှိ

အီရန်နိုင်ငံသည် အနောက်နိုင်ငံများနှင့်ရယူထားသည့် နျူကလီးယားသဘောတူစာချုပ်ကိုချိုးဖောက်ကာ ယူရေနီယံသန့်စင်မှုများကို ပိုမိုပြုလုပ်သွားမည်ဟု ၂၀၁၉ ခုနှစ်၊ ဇူလိုင်လ (၆) ရက် (စနေနေ့) တွင်ကြေညာခဲ့ပြီးနောက် အမေရိကန်နိုင်ငံခြားရေးဝန်ကြီး မိုက်ပွန်ပီယိုကအီရန်နိုင်ငံအပေါ် အရေးယူပိတ်ဆို့မှုများ ပိုမိုပြုလုပ်မည်ဟု ခြိမ်းခြောက်ပြောကြားခဲ့ကြောင်း၊ ပြင်သစ်သမ္မတအီမန်နျူရယ်မက်ခရွန်သည် အီရန်ခေါင်းဆောင်များနှင့် နျူကလီးယားအရေးဆွေးနွေးပွဲကိုယခုဇူလိုင်လလည်ပိုင်း၌ကျင်းပရန် ညှိနှိုင်းဆွေနွေးလျက်ရှိကြောင်း၊ အီရန်နှင့် အမေရိကန်ပြည်ထောင်စုတို့အကြား တင်းမာမှုများဖြစ်ပေါ်နေချိန်တွင် ဆီးရီးယားနိုင်ငံသို့ ရေနံတင်ပို့ရန်သွားရောက်နေသည့် အီရန်ရေနံတင်သင်္ဘောတစ်စီးအား ဂျီဘရောတာရေလက်ကြားတွင် ဗြိတိန်စစ်သင်္ဘောတစ်စီးက ယခုရက်ပိုင်းအတွင်းဖမ်းဆီးခဲ့သောကြောင့် အီရန်နှင့်ဗြိတိန်နိုင်ငံအကြားတင်းမာမှုများဖြစ်ပေါ်လာခဲ့ကြောင်း၊ အီရန်နိုင်ငံသည် ဥရောပသမဂ္ဂမှ ပြဌာန်းထားသော အရေးယူပိတ်ဆို့မှုများကို ချိုးဖောက်၍ ဆီးရီးယားသို့ရေနံများတင်ပို့ခြင်းကြောင့် ဖမ်းဆီးရခြင်းဖြစ်သည်ဟု ဗြိတိန်နိုင်ငံကပြောဆိုခဲ့သော်လည်း အီရန်နိုင်ငံကမူ ဖမ်းဆီးထားသော အီရန်ရေနံသင်္ဘောကို ပြန်လွှတ်ပေးခြင်းမရှိပါက ပါရှန်ပင်လယ်ကွေ့အတွင်းဖြတ်သန်းနေသည့် ဗြိတိန်ရေနံတင်သင်္ဘောတစ်စီးစီးကို လက်တုံ့ပြန်ဖမ်းဆီးရလိမ့်မည်ဟု ကြေညာခဲ့သောကြောင့်အရှေ့အလယ်ပိုင်းဒေသ၏ ပထဝီနိုင်ငံရေးအခြေအနေအပေါ် စိုရိမ်ပူပန်မှုများဖြစ်ပေါ်နေသည့်အတွက် ကမ္ဘာ့ရေနံဈေးနှုန်းများမှာဆက်လက်အားကောင်းလျက်ရှိကြောင်းသိရှိရပါသည်။
ထို့ပြင် အမေရိကန်ပြည်ထောင်စုနှင့် တရုတ်နိုင်ငံတို့အကြားကုန်သွယ်ရေးဆွေးနွေးပွဲမှာ လာမည့်ရက်သတ္တပတ်အတွင်း ပြန်လည်စတင်တော့မည်ဟု အမေရိကန်သမ္မတ၏စီးပွားရေးအကြံပေးပုဂ္ဂိုလ် လာရီကူဒလိုးက ၂၀၁၉ ခုနှစ်၊ ဇူလိုင်လ (၇) ရက် (တနင်္ဂနေ့) တွင် အတိအလင်းပြောကြားခဲ့သည့်အတွက် ကုန်သွယ်ရေးစစ်ပွဲဖြစ်ပွားမည့်အပေါ် စိုးရိမ်ပူပန်မှုများလျော့နည်းသွားခြင်းသည်လည်းရေနံဈေးနှုန်းများကိုမြင့်တက်စေသည့် အခြားအချက်တစ်ခုဖြစ်ကြောင်းသိရှိရပါသည်။  
၂၀၁၉ ခုနှစ်၊ ဇူလိုင်လ (၈) ရက် (တနင်္လာနေ့) နံနက်ပိုင်းတွင် နယူးယောက်စေျးကွက်၌ WTI ရေနံစိမ်းကြိုတင်ရောင်းဝယ်မှုဈေးနှုန်းမှာ၀.၂%မြင့်တက်ခဲ့ပြီးတစ်စည်လျှင် အမေရိကန်ဒေါ်လာ (၅၇.၆၁) သို့ ရောက်ရှိခဲ့ကြောင်း၊ လန်ဒန်ဈေးကွက်၌ ဘရန့်ရေနံစိမ်းကြိုတင်ရောင်းဝယ်မှုဈေးနှုန်းမှာတစ်စည်လျှင် အမေရိကန်ဒေါ်လာ (၆၄.၂၃) ဝန်းကျင်၌ ဖြစ်ပေါ်လျက်ရှိကြောင်း www.btvi.in အင်တာနက် website တွင်ဖော်ပြပါရှိပါသည်။

၂၀၁၈-၂၀၁၉ ပညာသင်နှစ်၊ တက္ကသိုလ်ဝင်စာမေးပွဲတွင် ဂုဏ်ထူးဖြင့်အောင်မြင်သူများအား ဆုချီးမြှင့်ခြင်း အခမ်းအနားကျင်းပ

          ၂၀၁၉ ခုနှစ်၊ ဇူလိုင်လ (၈)ရက်နေ့ (၁၀၃၀)ချိန်တွင် ၂၀၁၈-၂၀၁၉ ပညာသင်နှစ် တက္ကသိုလ်ဝင် စာမေးပွဲ၌ ဝင်ရောက်ဖြေဆိုခဲ့သည့် အထူးစုံစမ်းစစ်ဆေးရေးဦးစီးဌာန၊ ဝန်ထမ်း သားသမီးများအနက်မှ ဂုဏ်ထူးဖြင့် ထူးချွန်စွာအောင်မြင်ခဲ့သည့် ဂုဏ်ထူးရ ကျောင်းသား/ကျောင်းသူများအား ဂုဏ်ပြုဆု ချီးမြှင့် ခြင်းအခမ်းအနားကို နေပြည်တော်၊ ရုံးအမှတ် (၄၉)ရှိ အထူးစုံစမ်းစစ်ဆေးရေးဦးစီးဌာနချုပ် အစည်းအဝေး ခန်းမ၌ ပြုလုပ်ခဲ့ပါသည်။

          အခမ်းအနားတွင် ညွှန်ကြားရေးမှူးချုပ်မှ အဖွင့်အမှာစကားပြောကြားခဲ့ပြီး ၂၀၁၈-၂၀၁၉ ပညာ သင်နှစ်အတွင်း တက္ကသိုလ်ဝင်စာမေးပွဲ၌ ဂုဏ်ထူးဖြင့် ထူးချွန်စွာအောင်မြင်ခဲ့သူများကို ဌာနအနေဖြင့် ဂုဏ်ထူးရ (၁)ဘာသာလျှင် ကျပ် (၅၀၀၀၀)နှုန်းဖြင့် ဆုးချီးမြှင့်ခဲ့ရာ (၅)ဘာသာဂုဏ်ထူးရှင် (၁)ဦး၊ (၃)ဘာသာ ဂုဏ်ထူးရှင် (၃)ဦး၊ စုစုပေါင်း (၄)ဦးတို့အား ညွှန်ကြားရေးမှူးချုပ် ဦးမောင်မောင်ကျော်မှ ဂုဏ်ပြု ချီးမြှင့်ငွေများ ပေးအပ်ခဲ့ပြီး ဂုဏ်ထူးရကျောင်းသား/ကျောင်းသူများကိုယ်စား (၅)ဘာသာဂုဏ်ထူးရှင် မန္တလေးတိုင်းဒေသကြီးရုံးမှ စုံစမ်းရေးမှူး ဦးခင်သန်း၏သမီး မသင်းထက်ထက်အောင်မှ ကျေးဇူးတင် စကား ပြန်လည်ပြောကြား၍ (၁၁၀၀)ချိန်တွင် အခမ်းအနားပြီးဆုံးခဲ့ပါသည်။

          ၂၀၁၈-၂၀၁၉ ပညာသင်နှစ် တက္ကသိုလ်ဝင်စာမေးပွဲတွင် အထူးစုံစမ်းစစ်ဆေးရေးဦးစီးဌာန ဝန်ထမ်း သားသမီး (၅၅)ဦး ဝင်ရောက်ဖြေဆိုခဲ့ရာ (၅)ဘာသာဂုဏ်ထူး (၁)ဦး၊ (၃)ဘာသာဂုဏ်ထူး (၃)ဦး၊ (၂)ဘာသာ ဂုဏ်ထူး (၂)ဦး၊ (၁)ဘာသာဂုဏ်ထူး (၉)ဦး စုစုပေါင်း (၁၅)ဦး အပါအဝင် (၃၄)ဦး အောင်မြင်ခဲ့ပြီး အောင်ချက် ရာခိုင်နှုန်းမှာ ၆၁.၈၂% ဖြစ်ပါသည်။

အာရပ်စော်ဘွားများပြည်ထောင်စုရှိဒူဘိုင်းလေဆိပ်ရှိ Duty Free ဆိုင်များတွင်အိန္ဒိယရူးပီးငွေဖြင့်ငွေပေးချေးမှုများပြုလုပ်နိုင်ပြီးဖြစ်ကြောင်းအာရပ်စော်ဘွားများပြည်ထောင်စုရှိဒူဘိုင်းလေဆိပ်ရှိ Duty Free ဆိုင်များတွင်အိန္ဒိယရူးပီးငွေဖြင့်ငွေပေးချေးမှုများပြုလုပ်နိုင်ပြီးဖြစ်ကြောင်း

အာရပ်စော်ဘွားများပြည်ထောင်စုရှိ ဒူဘိုင်းအပြည်ပြည်ဆိုင်ရာလေဆိပ်မှ Terminal အမှတ် (၁၊ ၂၊ ၃) တို့ ၌ ဖွင့်လှစ်ထားသော Duty Free ဆိုင်များတွင် ၂၀၁၉ ခုနှစ် ၊ ဇူလိုင်လ (၁) ရက်မှစတင်၍ အိန္ဒိယရူးပီးငွေဖြင့် ငွေပေးချေမှုများပြုလုပ်နိုင်သည်ဟု သိရှိရကြောင်း၊ ဒူဘိုင်းလေဆိပ်သည်နှစ်စဉ်အိန္ဒိယနိုင်ငံသား ကမ္ဘာလှည့်ခရီးသွားများ အများဆုံးဝင်/ ထွက်သွားလာနေသည့် လေဆိပ်ဖြစ်ကြောင်း သိရှိရပါသည်။ ၂၀၁၈ ခုနှစ်၌ ဒူဘိုင်းလေဆိပ်ကို ဝင်ထွက်သွားလာသည့် ခရီးသည်အရေအတွက် (၉၀) သန်းရှိသည့်အနက် (၁၂.၂) သန်းမှာ အိန္ဒိယနိုင်ငံသားများဖြစ်ပြီး မွန်ဘိုင်း၊ဒေလီနှင့်ကိုချင်းကဲ့သို့သော အိန္ဒိယမြို့တော်ကြီးများမှ လာရောက်ကြသူများဖြစ်ကြောင်း၊ ယခင်က  အိန္ဒိယခရီးသွားများသည် ဒူဘိုင်းလေဆိပ်သို့ရောက်ရှိပါက ၎င်းတို့တွင်ပါလာသည့် ရူးပီးငွေကိုဒေါ်လာ (သို့မဟုတ်) ယူရို (သို့မဟုတ်) UAE (အာရပ်စော်ဘွားများပြည်ထောင်စု) နိုင်ငံသုံး ဒိုင်ရန်ငွေကြေးများတစ်ခုခုဖြင့် လဲလှယ်ပြီးမှသာ Duty Free ဆိုင်များတွင် စေျးဝယ်နိုင်သော်လည်း ယခုအခါ ရူးပီးငွေဖြင့် တိုက်ရိုက်ငွေပေးချေနိုင်ကြောင်း၊ ထို့ကြောင့် အိန္ဒိယရူးပီးငွေသည် ဒူဘိုင်းလေဆိပ်ဆိုင်၌ အသုံးပြုနိုင်သည့် (၁၆) ခုမြောက် နိုင်ငံတကာငွေကြေးအဖြစ်သို့ ရောက်ရှိလာကြောင်း သိရှိရပါသည်။ ဒူဘိုင်းအပြည်ပြည်ဆိုင်ရာလေဆိပ်ရှိ Duty Free ဆိုင်များကို ၁၉၈၃ ခုနှစ် ၊ဒီဇင်ဘာလတွင် စတင်ဖွင့်လှစ်ခဲ့ပြီး လက်ရှိအချိန်၌ ဝန်ထမ်း (၆၁၀၀) ဦးခန့်ရှိကြောင်း၊ စတင်ဖွင့်လှစ်သည့်အချိန်က ဝန်ထမ်း (၁၀၀) ဦးခန့်သာရှိခဲ့ပြီး ယင်းဝန်ထမ်း (၁၀၀) ဦးအနက် (၂၅) ဦးမှာ လက်ရှိအချိန်ထိ Duty Free ဆိုင်များတွင် အလုပ်လုပ်ကိုင်နေဆဲ ဖြစ်ကြောင်း၊ Duty Freeဆိုင်များ၏ ရောင်းချရမှုတန်ဖိုးမှာ ၂၀၁၈ ခုနှစ်အတွင်း၌ အမေရိကန်ဒေါ်လာ (၂) ဘီလီယံကျော်ရှိခဲ့ကြောင်း www.gulfnews.com. အင်တာနက် website တွင် ဖော်ပြပါရှိပါသည်။

အမေရိကန်ပြည်ထောင်စုအနေဖြင့် တရုတ်နိုင်ငံနှင့်ဥရောပသမဂ္ဂတို့ကဲ့သို့ ငွေကြေးတန်ဖိုးနိမ့်ချ၍ စီးပွားရေးအသာစီးရယူရန် အမေရိကန်သမ္မတဒေါ်နယ်ထရန့်ကပြောကြားခဲ့သည့်အတွက် အမေရိကန်ဒေါ်လာတန်ဖိုး ဆက်လက်အားပျော့လျက်ရှိ

တရုတ်နိုင်ငံနှင့်ဥရောပသမဂ္ဂတို့သည် အမေရိကန်ပြည်ထောင်စုနှင့် ကုန်သွယ်ရေး၌ အသာစီး ရရှိစေရန်အတွက် ယွမ်ငွေနှင့် ယူရိုငွေကြေးတန်ဖိုးများအား ဖြစ်သင့်ဖြစ်ထိုက်သည့်အနေအထား အောက်‌လျှော့ချထားခြင်း၊ ငွေကြေးစေျးကွက်အတွင်းသို့ယွမ်ငွေနှင့် ယူရိုအများအပြားဖြည့်တင်းပေးခြင်း အစရှိသည့် နည်းလမ်းများကို အသုံးပြုလျက်ရှိရာ အမေရိကန်ပြည်ထောင်စုသည်လည်း တရုတ်နှင့် ဥရောပသမဂ္ဂတို့ကို စီးပွားရေးအရယှဉ်ပြိုင်နိုင်ရန်အတွက် အမေရိကန်ဒေါ်လာတန်ဖိုးအား တမင်လျော့ ချထားသည့် နည်းလမ်းကို ကျင့်သုံးသင့်သည်ဟု အမေရိကန် သမ္မတဒေါ်နယ်ထရန့်က ၂၀၁၉ ခုနှစ် ၊ ဇူလိုင်လ(၃) ရက်နေ့တွင် ၎င်း၏တွစ်တာ စာမျက်နှာပေါ်၌ ရေးသားဖော်ပြခဲ့ကြောင်း သိရှိရပါသည်။
သမ္မတဒေါ်နယ်ထရန့်၏ တွစ်တာစာမျက်နှာပေါ်တွင် ရေးသားချက်ပေါ်ပေါက်ပြီးနောက်တွင် ကမ္ဘာ့ငွေကြေးစေျးကွက်အတွင်း၌ အမေရိကန်ဒေါ်လာတန်ဖိုးမှာ ကျဆင်းသွားခဲ့ကြောင်း၊ ဇူလိုင်လ (၄) ရက် (ကြာသပတေးနေ့)သည် အမေရိကန်ပြည်ထောင်စု၏ လွတ်လပ်ရေးနေ့ဖြစ်သည့်အတွက် အမေရိကန်နိုင်ငံတစ်ဝန်းရှိ ငွေကြေးစေျးကွက်များ ပိတ်ထားသောကြောင့် ငွေကြေးအရောင်းအဝယ် များ ရပ်ဆိုင်းခဲ့ကြောင်း၊ ဇူလိုင်လ(၅)ရက် (သောကြာနေ့)နံနက်ပိုင်းတွင် ကမ္ဘာ့ငွေကြေးစေျးကွက်၌ အမေရိကန်ဒေါ်လာတန်ဖိုးမှာ ဆက်လက်အားပျော့လျက်ရှိပြီး အမေရိကန်တစ်ဒေါ်လာလျှင် ဂျပန်ငွေ (၁၀၇.၈၅၀)ယန်း၊ အမေရိကန်တစ်ဒေါ်လာလျှင် တရုတ်ငွေ (၆.၈၇)ယွမ်၊ တစ်ယူရိုလျှင် အမေရိကန် ဒေါ်လာ (၁.၁၂၈၀)ဒေါ်လာလဲလှယ်မှုနှုန်းများ၌ ဆက်လက်ဖြစ်ပေါ်လျက်ရှိကြောင်း www.cnbc.com အင်တာနက် website တွင် ဖော်ပြပါရှိပါသည်။

ထိုင်းဘတ်ငွေတန်ဖိုးအဆမတန်မြင့်တက်နေခြင်းကြောင့် ပို့ကုန်လုပ်ငန်းနှင့်ကမ္ဘာလှည့်ခရီးသွား လုပ်ငန်းများတွင် ဆုံးရှုံးမှုများကြုံတွေ့လျက်ရှိ

၂၀၁၉ ခုနှစ် နှစ်ဆန်းမှ လက်ရှိအချိန်အထိကာလအတွင်း ထိုင်းဘတ်ငွေတန်ဖိုးမှာ ၆% ခန့် မြင့်တက်ခဲ့သည့်အတွက် ပို့ကုန်ကဏ္ဍနှင့် ကမ္ဘာ့လှည့်ခရီးသွားကဏ္ဍတွင် ဆုံးရှုံးမှုများ စတင်ကြုံတွေ့လျက်ရှိကြောင်း၊ ထိုင်းဘတ်ငွေတန်ဖိုးသည် အမေရိကန်ဒေါ်လာနှင့်နှိုင်းယှဉ်ရာ၌ ၂၀၁၈ ခုနှစ်အတွင်း၌ အမေရိကန်တစ်ဒေါ်လာလျှင် ပျမ်းမျှအားဖြင့် (၃၂.၄၈) ဘတ်လဲလှယ်မှုနှုန်းဝန်းကျင်၌ရှိခဲ့ရာမှ ၂၀၁၉ ခုနှစ် အတွင်း၌မူ အမေရိကန်တစ်ဒေါ်လာလှျင် ပျမ်းမျှအားဖြင့် (၃၀.၅၀) ဘတ်နှင့် (၃၀.၆၀) ဘတ်လဲလှယ်မှု နှုန်းအတွင်းသို့ မြင့်တက်လာခဲ့ကြောင်း သိရှိရပါသည်။
ထိုင်းနိုင်ငံပို့ကုန်လုပ်ငန်းရှင်များအသင်း၏ ဒုတိယဥက္ကဋ္ဌ ဘီဆစ်လင်မ်လာချာက ၂၀၁၉ ခုနှစ်၊ ဇူလိုင်လ(၃)ရက် (ဗုဒ္ဓဟူးနေ့) တွင် ပြောကြားရာ၌ ဘတ်ငွေတန်ဖိုးအဆမတန်မြင့်တက်မှုကြောင့် ထိုင်းကုန်ပစ္စည်းများကို ပြည်ပမှ မှာယူမှုလျော့နည်းသွားသည့်အတွက် ၂၀၁၉ ခုနှစ်၊ ပထမ (၅) လတာ ကာလအတွင်း ပို့ကုန်ကဏ္ဍ၌ ဝင်ငွေဆုံးရှုံးမှုမှာ ဘတ်ငွေ (၂၀၀) ဘီလီယံခန့်ရှိခဲ့ပြီး ၂၀၁၉ ခုနှစ် တစ်နှစ်လုံး အတိုင်းအတာအရတွက်ချက်ပါက ဘတ်ငွေ(၅၀၀)ဘီလီယံခန့်ဝင်ငွေဆုံးရှုံးနိုင်သည်ဟုပြောကြားခဲ့ကြောင်း သိရှိရပါသည်။
အလားတူ ထိုင်းနိုင်ငံ၊ အားကစားနှင့်ကမ္ဘာလှည့်ခရီးသွားဝန်ကြီးဌာမှ တာဝန်ရှိသူများကလည်း ဘတ်ငွေတန်ဖိုးအဆမတန်မြင့်တက်သည့်ဂယက်ကြောင့် ၂၀၁၈ ခုနှစ်နှင့်နှိုင်းယှဉ်ပါက ၂၀၁၉ ခုနှစ်အတွင်း ထိုင်းနိုင်ငံသို့ အရှေ့အလယ်ပိုင်းဒေသနိုင်ငံများမှ ကမ္ဘာလှည့်ခရီးသွားဝင်ရောက်မှုမှာ ၄၇%၊ အာဖရိက နိုင်ငံများမှ ကမ္ဘာလှည့်ခရီးသွားဝင်ရောက်မှုမှာ ၂၈%၊ အမေရိကန်ပြည်ထောင်စုမှ ကမ္ဘာလှည့်ခရီးသည် ဝင်ရောက်မှုမှာ ၂၀%၊ ဥရောပနိုင်ငံများမှ ကမ္ဘာလှည့်ခရီးသွားဝင်ရောက်မှုမှာ ၁၂% နှင့် တရုတ်နိုင်ငံမှ ကမ္ဘာလှည့်ခရီးသည်ဝင်ရောက်မှုမှာ ၁၁% အသီးသီးကျဆင်းခဲ့သည့်အတွက် ထိုင်းနိုင်ငံအနေဖြင့် ၂၀၁၉ ခုနှစ်တွင် ကမ္ဘာလှည့်ခရီးသွားကဏ္ဍ၌ ဝင်ငွေရရှိမှုမှာ ယမန်နှစ်နှင့်နှိုင်းယှဉ်ပါက ၁၀% အထိ ကျဆင်း နိုင်သည်ဟုပြောကြားခဲ့ကြောင်း၊ ထိုင်းနိုင်ငံသည် ၂၁၀၈ ခုနှစ်အတွင်း၌ ခရီးသွားကဏ္ဍမှပျမ်းမျှအားဖြင့် အမေရိကန်ဒေါ်လာ(၆၂)ဘီလီယံခန့် ဝင်ငေွရရှိခဲ့ကြောင်း ဖော်ပြပါရှိပါသည်။
(www.chaingraitimes.com အင်တာနက် website တွင် ဖော်ပြထားမှုကို နောက်ဆက်တွဲ “ ဂ ” ဖြင့် တင်ပြအပ်ပါသည်)

အမေရိကန်သမ္မတသည် ဘဏ်တိုးနှုန်းကို အများအပြားလျှော့ချလိုသူများအား ဗဟိုဘဏ်ကော်မတီ အတွင်း၌ ခန့်အပ်ရန်စီစဉ်နေခြင်းကြောင့် ကမ္ဘာ့ရွှေဈေးနှုန်းမှာ တစ်အောင်စလျှင် အမေရိကန်ဒေါ်လာ (၁၄၃၀) အထက်သို့ မြင့်တက်ခဲ့

အမေရိကန်သမ္မတဒေါ်နယ်ထရန့်သည် လက်ရှိအမေရိကန်ဗဟိုဘဏ်၏ ငွေကြေးမူဝါဒကို နှစ်သက်မှုမရှိသောကြောင့် ဗဟိုဘဏ်ကော်မတီဝင်များအား ပြင်ဆင်ဖွဲ့စည်းရန်စီစဉ်နေပြီး ဘဏ်တိုးနှုန်းကို အများအပြားလျှော့ချလိုသော စိန့်လူးဝစ္စဘဏ်ဒုတိယဥက္ကဋ္ဌ ခရစ္စတိုဖာဝေလာနှင့် သမ္မတဒေါ်နယ်ထရန့်၏ ရွေးကောက်ပွဲအကြိုမဲဆွယ်ကာလများ၌ စီးပွားရေးအကြံပေးပုဂ္ဂိုလ်အဖြစ် တာဝန်ထမ်းဆောင်ခဲ့သူ ဂျူဒီရှဲလ်တန်တို့အား ဗဟိုဘဏ်ကော်မတီဝင်များအဖြစ်ခန့်အပ်မည်ဟု ၂၀၁၉ ခုနှစ်၊ ဇူလိုင်လ (၂) ရက် (အင်္ဂါနေ့) တွင် အမည်စာရင်း ထုတ်ပြန်ခဲ့ကြောင်း၊ သမ္မတဒေါ်နယ်ထရန့်သည် လက်ရှိ ဗဟိုဘဏ်ဥက္ကဋ္ဌ ဂျရွန်မီပေါင်ဝယ်လ်အားဖယ်ရှား၍ ဂျူဒီရှဲလ်တန်ကို ဥက္ကဋ္ဌနေရာအထိ အစားထိုး ခန့်အပ်ရန်ရည်မှန်းထားကြောင်း သတင်းများထွက်ပေါ်နေပြီး ဂျူဒီရှဲလ်တန်ကလည်း ၎င်းအနေဖြင့် တာဝန်ပေးအပ်ခြင်းခံရပါက ဘဏ်တိုးနှုန်းအား တစ်နှစ်မှနှစ်နှစ်အတွင်း ၀% အထိ လျှော့ချမည်ဟု ကြေညာထားသူဖြစ်ကြောင်း၊ ထို့ကြောင့် ဗဟိုဘဏ်ကော်မတီဝင်များအား အစားထိုးခန့်အပ်ရန် သမ္မတ၏ ပြောကြားချက်ထွက်ပေါ်ပြီးနောက်တွင် ကမ္ဘာ့ရွှေဈေးနှုန်းမှာ ရက်သတ္တပတ် (၁) ပတ်အတွင်း အမြင့်ဆုံးအနေအထားသို့ ပြန်လည်ရောက်ရှိခဲ့ကြောင်း သိရှိရပါသည်။
ထို့ပြင် အမေရိကန်နှင့်တရုတ် နှစ်နိုင်ငံကုန်သွယ်ရေးတင်းမာမှုများ ခေတ္တပြေလျော့သွားချိန်တွင် အမေရိကန်သမ္မတသည် ဥရောပနိုင်ငံများမှ အမေရိကန်ပြည်ထောင်စုသို့ တင်သွင်းနေသည့် သံလွင်ဆီ၊ ဒိန်ခဲ၊ စကော့ဝီစကီ၊ အိုင်းရစ်ချ်ဝီစကီ၊ ကော်ဖီ၊ ဝက်ပေါင်ခြောက်၊ ပင်လယ်စာ အစရှိသည့်စားသောက်ကုန် များအပါအဝင် အမေရိကန်ဒေါ်လာ (၄) ဘီလီယံခန့်တန်ဖိုးရှိ ကုန်ပစ္စည်းအမျိုးအမည်ပေါင်း (၈၉) မျိုး အပေါ်၌ သွင်းကုန်ခွန်တိုးမြှင့်ကောက်ခံရန်ကြေညာခဲ့ပြီး ဥရောပသမဂ္ဂကလည်း အမေရိကန်ကုန်ပစ္စည်းများ အပေါ်၌ လက်တုံ့ပြန်အခွန်ကောက်ခံသွားမည်ဟု ကြေညာခဲ့သည့်အတွက် ကမ္ဘာ့စီးပွားရေးအင်အားကြီး နိုင်ငံများအကြား ကုန်သွယ်ရေးတင်းမာမှုများ မြင့်တက်လာဖွယ်ရှိခြင်းသည်လည်း ကမ္ဘာ့ရွှေဈေးနှုန်းကို မြင့်တက်စေသည့် အခြားအချက်တစ်ခုဖြစ်ကြောင်း သိရှိရပါသည်။
၂၀၁၉ ခုနှစ်၊ ဇူလိုင်လ (၃) ရက်(ဗုဒ္ဓဟူးနေ့) နံနက်ပိုင်းတွင် ကမ္ဘာ့ရွှေဈေးနှုန်းမှာ ၁.၄% မြင့်တက် ခဲ့ပြီး တစ်အောင်စလျှင် အမေရိကန်ဒေါ်လာ (၁၄၃၇.၈၈) အထိရောက်ရှိခဲ့ကြောင်း၊ အဆိုပါဈေးနှုန်းသည် ၂၀၁၉ ခုနှစ်၊ ဇွန်လ (၂၅) ရက်နောက်ပိုင်း ရက်သတ္တပတ် (၁) ပတ်အတွင်း အမြင့်ဆုံးအနေအထားဖြစ်ကြောင်း www.bloomberg.com အင်တာနက် website တွင် ဖော်ပြပါရှိပါသည်။

ဟွာဝေးကုမ္ပဏီအပေါ် အရေးယူပိတ်ဆို့မှုများဖြေလျှော့ပေးခဲ့သည့် အမေရိကန်သမ္မတ၏ဆုံးဖြတ်ချက်အား အမေရိကန်လွှတ်တော်အမတ်များက ပြစ်တင်ဝေဖန်လျက်ရှိ

အမေရိကန်သမ္မတ ဒေါ်နယ်ထရန့်သည် စက်မှုထိပ်သီးနိုင်ငံ (၂၀) အစည်းအဝေးပွဲကာလအတွင်း တရုတ်သမ္မတရှီကျင့်ပင်နှင့် တွေ့ဆုံသည့်အချိန်၌ ဟွာဝေးကုမ္ပဏီအပေါ် အမေရိကန်ပြည်ထောင်စုက ချမှတ်ထားသည့် အရေးယူပိတ်ဆို့မှုများအား ဖြေလျှော့ပေးမည်ဟု ပြောကြားခဲ့ရာ အမေရိကန်သမ္မတ၏ ဆုံးဖြတ်ချက်အား အတိုက်အခံ ဒီမိုကရက်ပါတီလွှတ်တော်အမတ်များသာမက သမ္မတ၏ရီပက်ဗလစ် ကန်ပါတီလွှတ်တော်အမတ်များကပါ ပြစ်တင်ဝေဖန်လျက်ရှိကြောင်း သိရှိရပါသည်။
ဟွာဝေးကုမ္ပဏီအား အဓိကပစ်မှတ်ထားအရေးယူမှုများပြုလုပ်ရန် ဥပဒေပြဌာန်းချက်ကို စတင် အကြံပေးခဲ့သည့် ရီပက်ဗလစ်ကန်အထက်လွှတ်တော်အမတ် မာကိုရူဘီယိုက ၂၀၁၉ ခုနှစ်၊ ဇူလိုင်လ (၁) ရက်နေ့တွင်ပြောကြားရာ၌ ဟွာဝေးကုမ္ပဏီအား အရေးယူပိတ်ဆို့မှုများ‌ဖြေလျှော့ပေးရန် ဆုံးဖြတ်ခဲ့ခြင်းမှာ သမ္မတဒေါ်နယ်ထရန့်အနေဖြင့် ကြီးမားသောမှားယွင်းမှုကို ကျူးလွန်မိခြင်းပင်ဖြစ်ကြောင်း၊ ဟွာဝေးအား အရေးယူပိတ်ဆို့မှုများ ဆက်လက်ပြုလုပ်နိုင်ရန်အတွက် အမေရိကန်ကွန်ဂရက်လွှတ်တော်၌ အဆိုတင်သွင်း၍ မဲခွဲဆုံးဖြတ်နိုင်ရန် တွန်းအားပေးဆောင်ရွက်သွားမည်ဟု ပြောကြားခဲ့ကြောင်း၊ အတိုက်အခံ ဒီမိုကရက်တစ်ပါတီအထက်လွှတ်တော်အမတ် ချော့ရှုးမားကလည်း သမ္မတဒေါ်နယ်ထရန့်၏ ဆုံးဖြတ်ချက်ကိုဝေဖန်ခဲ့ပြီး ဟွာဝေးကုမ္ပဏီအား ဖြေလျှော့ပေးခြင်းသည် တရုတ်နိုင်ငံ၏မျှတမှုမရှိသော ကုန်သွယ်ရေးကျင့်သုံးမှုများအပေါ် ထိရောက်စွာတုံ့ပြန်နိုင်မည့်အခွင့်အရေးကို လက်လွတ်စေသည်ဟု ပြောကြားခဲ့ကြောင်း သိရှိရပါသည်။
အမေရိကန်သမ္မတ၏ စီးပွားရေးအကြံပေးပုဂ္ဂိုလ် လာရီကူဒလိုးက ပြောကြားရာ၌ လွှတ်တော်အမတ်များ၏ စိုးရိမ်ပူပန်မှုများကို နားလည်ပါကြောင်း၊ မည်သည့် စီးပွားရေးလုပ်ငန်းမဆို အမေရိကန်ပြည်ထောင်စု၏လုံခြုံရေးကို ထိခိုက်လာနိုင်သည်ဆိုပါက အမေရိကန်အစိုးရအနေဖြင့် လုပ်ငန်းလုပ်ကိုင်ခွင့် လိုင်စင်ထုတ်ပေးမည်မဟုတ်ကြောင်း၊ ဟွာဝေးကုမ္ပဏီနှင့်ပတ်သက်၍ အန္တရာယ်ကြီးကြီး မားမားရှိလာနိုင်သည်ကို နားလည်ပါကြောင်း၊ ကုန်သွယ်ရေးဆွေးနွေးပွဲမှာ မပြီးဆုံးသေးသည့်အတွက် ဟွာဝေးနှင့်ပတ်သက်၍ အပြည့်အဝပြောဆိုဆုံးဖြတ်ရခြင်း မရှိသေးကြောင်း၊ ဟွာဝေးသည် ဆက်သွယ်ရေး ကွန်ရက်လောက၌ 5G နည်းပညာကို ဦးဆောင်ဖန်တီးနေသည့်ကုမ္ပဏီတစ်ခုဖြစ်ပြီး တရုတ်အစိုးရ၏ ထိန်းချုပ်မှုနှင့်ကင်းရှင်းကြောင်းကို ကုမ္ပဏီတာဝန်ရှိသူများက ထပ်လောင်းရှင်းလင်းထားသည်ဟု ပြောကြားခဲ့ကြောင်း သိရှိရပါသည်။
ဟွာဝေးကုမ္ပဏီသည် အမေရိကန်သမ္မတဒေါ်နယ်ထရန့်ထံမှ ကြေညာချက် ထွက်ပေါပြီးနောက်တွင် ဟွာဝေးစမတ်ဖုန်းများ၌ Google Andriod System အပါအဝင် အမေရိကန်ကုမ္ပဏီများနှင့် ပတ်သက်သည့် Software များ၊ Application များ၊ ပြန်လည်အသုံးပြုခွင့်ရရေးအတွက် စောင့်ဆိုင်းလျက်ရှိကြောင်း၊ ဟွာဝေးကုမ္ပဏီက ၂၀၁၉ ခုနှစ်၊ ဇူလိုင်လ (၁) ရက် (တနင်္လာနေ့) တွင် ထုတ်ပြန်သည့် ကြေညာချက်၌ အသစ်ထုတ်ဝေမည့် ဟွာဝေးစမတ်ဖုန်းများတွင် Google နှင့်ဆက်စပ်နေသည့် Application များအား ပြန်လည်အသုံးပြုနိုင်ခွင့်ရှိ/ မရှိကို လမ်းညွှန်မှုပေးပါရန် အမေရိကန်ကူးသန်း ရောင်းဝယ်ရေးဝန်ကြီးဌာနထံသို့ မေတ္တာရပ်ခံထားကြောင်း www.dw.com အင်တာနက် website တွင် ဖော်ပြပါရှိပါသည်။

၎

င

၎

၎