အာဖရိကနိုင်ငံများ၏ ဝယ်လိုအားလျော့နည်းမှုကြောင့် အိန္ဒိယဆန်ဈေးနှုန်းမှာ (၇) လတာကာလအတွင်း အနိမ့်ဆုံးသို့ရောက်ရှိခဲ့ပြီးဗီယက်နမ်နှင့် ထိုင်းဆန်ဈေးနှုန်းများမှာလည်း လိုက်ပါကျဆင်းလျက်ရှိမှု

အိန္ဒိယဆန်ကို အများဆုံးဝယ်ယူနေသော အနောက်အာဖရိကနိုင်ငံများထံသို့ တရုတ်နိုင်ငံက လက်ကျန်သိုလှောင်ဆန်ဟောင်းများကိုလျှော့ဈေးဖြင့်ရောင်းချနေသည့်အတွက် အဆိုပါနိုင်ငံများ၏ အိန္ဒိယဆန်ဝယ်ယူမှု လျော့နည်းလာခြင်းနှင့်  အိန္ဒိယရူပီးငွေတန်ဖိုဆက်တိုက်ကျဆင်းနေခြင်း အစရှိသည့်ဂယက်များကြောင့် ယခုရက်သတ္တပတ်အတွင်း အိန္ဒိယ (၅) မှတ်ပေါင်းဆန် တစ်တန်၏ ဈေးနှုန်းမှာအမေရိကန်ဒေါ်လာ (၉) ဒေါ်လာခန့်ကျဆင်းခဲ့ပြီး တစ်တန်လျှင် အနိမ့်ဆုံးအမေရိကန် ဒေါ်လာ (၃၆၂) ဒေါ်လာနှင့် အမြင့်ဆုံးဈေးအမေရိကန်ဒေါ်လာ (၃၆၅) ဒေါ်လာအကြားသို့ရောက်ရှိခဲ့ကြောင်း၊ အိန္ဒိယဆန်ဈေးနှုန်းသည် ရက်သတ္တပတ် (၆) ပတ် ဆက်တိုက်ကျဆင်းခဲ့ပြီး ယခုအခါ (၇) လတာကာလအတွင်း အနိမ့်ဆုံးသို့ ရောက်ရှိနေကြောင်း သိရှိရပါသည်။

အိန္ဒိယဆန်ဈေးနှုန်း ကျဆင်းနေချိန်တွင် ဗီယက်နမ်နိုင်ငံ၌လည်း နွေစပါးရိတ်သိမ်းချိန်ကာလသို့ ရောက်ရှိနေပြီဖြစ်သောကြောင့် ပြည်တွင်းဆန်ပိုလျှံမှုများနှင့်အတူ ယခုရက်သတ္တပတ်အတွင်း ဗီယက်နမ် (၅) မှတ်ဆန်ဖြူတစ်တန်၏ဈေးနှုန်းမှာ အမေရိကန်ဒေါ်လာ(၁၀) ဒေါ်လာခန့် ကျဆင်းခဲ့ပြီးတစ်တန်လျှင် အမေရိကန်ဒေါ်လာ (၃၅၅) သို့ရောက်ရှိခဲ့ကြောင်း၊ တရုတ်နိုင်ငံသည် ဗီယက်နမ်ဆန်များကိုအများအပြားဝယ်ယူရန် စီစဉ်နေသော်လည်း ဗီယက်နမ်ဆန်လုပ်ငန်းရှင်များကမူ တရုတ်နိုင်ငံသို့ဆန်တင်ပို့ရာ၌ လုပ်ထုံးလုပ်နည်းများနှင့်ပတ်သက်သော အတားအဆီးများရှိနေသောကြောင့် အများအပြားမတင်ပို့နိုင်သေးဟု ပြောကြားခဲ့ကြောင်း သိရှိရပါသည်။ အိန္ဒိယဆန်နှင့် ဗီယက်နမ်ဆန်ဈေးနှုန်းများ ကျဆင်းနေချိန်တွင် ထိုင်း (၅) မှတ်ဆန်ဖြူတစ်တန်၏ဈေးနှုန်းမှာမူ အပြောင်းအလဲမရှိဘဲ ယခင်ရက်သတ္တပတ်အတွင်းဖြစ်ပေါ်ခဲ့သည့် ဈေးနှုန်းအတိုင်း တစ်တန်လျှင် အနိမ့်ဆုံးဈေးအမေရိကန်ဒေါ်လာ (၃၈၅) နှင့်အမြင့်ဆုံးဈေးအမေရိကန်ဒေါ်လာ(၄၀၀) အကြား၌ ဖြစ်ပေါ်လျက်ရှိကြောင်း၊ ထိုင်းဆန်ဈေးနှုန်းသည် လက်ရှိအချိန်၌ အိန္ဒိယဆန်နှင့် ဗီယက်နမ်ဆန်တို့ထက် ဈေးနှုန်းပိုမိုများပြားနေသောကြောင့် ကမ္ဘာ့ဆန်ဈေးကွက်အတွင်း ယှဉ်ပြိုင်ရောင်းချရာ၌ ထိုင်းဆန်ရောင်းအား ကျဆင်းသွားမည့်အရေးကို ထိုင်းဆန်ကုန်သည်များက စိုးရိမ်ပူပန်လျက်ရှိကြောင်း၊ ထိုင်းနိုင်ငံသည် ၂၀၁၈ ခုနှစ်အတွင်း၌ ပြည်ပသို့ ဆန်တန်ချိန် (၁၁) သန်းခန့်တင်ပို့နိုင်ခဲ့သော်လည်းယခု ၂၀၁၉ ခုနှစ်၌မူဘတ်ငွေတန်ဖိုးအလွန်အမင်းအားကောင်းနေသည့်အတွက် ဘတ်ငွေနှင့်ချိတ်ဆက်အရောင်းအဝယ်ပြုသည့် ထိုင်းဆန်ဈေးနှုန်းမြင့်မားနေမှုကြောင့် ပြည်ပသို့ဆန်တန်ချိန် (၉.၅) သန်းခန့်သာ တင်ပို့နိုင်ဖွယ်ရှိကြောင်း www.reuters.com အင်တာနက် website တွင် ဖော်ပြပါရှိပါသည်။

အမေရိကန်အလုပ်သမားဝန်ကြီးဌာနနှင့် ဗဟိုစာရင်းအင်းဌာနတို့၏ အစီရင်ခံစာများထွက်ပေါ်ပြီးနောက် အမေရိကန်ဒေါ်လာတန်ဖိုးမှာရက်သတ္တပတ် (၂) ပတ်အတွင်း အမြင့်ဆုံးသို့ရောက်ရှိခဲ့မှု

၂၀၁၉ ခုနှစ်၊ မေလ (၁၆) ရက် (ကြာသပတေးနေ့) တွင် အမေရိကန်ပြည်ထောင်စုအလုပ်သမားဝန်ကြီးဌာနမှ ထုတ်ပြန်သည့်အစီရင်ခံစာ၌ လွန်ခဲ့သည့်ရက်သတ္တပတ်အတွင်း နိုင်ငံတစ်ဝန်း အလုပ်လက်မဲ့ထောက်ပံ့ကြေး တောင်းခံသူပမာဏမှာ (၂၁၂၀၀၀) ဦးခန့်သို့ ကျဆင်းခဲ့သည့်အတွက် ယခုနှစ်ပိုင်းအတွင်းအလုပ်လက်မဲ့ ထောက်ပံ့ကြေးတောင်းခံမှု အနည်းဆုံးအနေအထားပင်ဖြစ်ကြောင်း၊ ထောက်ပံ့ကြေးတောင်းခံမှုနည်းခြင်းသည်  နိုင်ငံအတွင်း၌ စီးပွားရေးကောင်းမွန်ခြင်းကြောင့် အလုပ်အကိုင်ရရှိမှုများပြားလာကြောင်းကိုပြသရာရောက်သည့်အတွက် အလုပ်သမားဝန်ကြီးဌာန၏ အစီရင်ခံစာထွက်ပေါ်ပြီးနောက်တွင် ဈေးကွက်အတွင်း အမေရိကန်ဒေါ်လာတန်ဖိုးမြင့်တက်သွားခဲ့ကြောင်း သိရှိရပါသည်။

ထို့ပြင် အမေရိကန်အစိုးရ၏ ဗဟိုစာရင်းအင်းဌာနက ၂၀၁၉ ခုနှစ်၊ မေလ(၁၆) ရက် (ကြာသပတေးနေ့) တွင်ထုတ်ပြန်သည့်အစီရင်ခံစာ၌ နိုင်ငံတစ်ဝန်း အမေရိကန်ပြည်သူများ၏ အိမ်ရာဝယ်ယူမှုပမာဏမှာ ၂၀၁၉ ခုနှစ်၊ ဧပြီလအတွင်း၌ ၅.၇% မြင့်တက်ခဲ့သည့် စာရင်းအချက်အလက်များ ဖော်ပြထားခြင်းသည်လည်း အမေရိကန်ဒေါ်လာတန်ဖိုးကို မြင့်တက်စေသည့် အခြားအချက်တစ်ခုဖြစ်ကြောင်းသိရှိရပါသည်။

၂၀၁၉ ခုနှစ်၊ မေလ (၁၉) ရက်(သောကြာနေ့) နံနက်ပိုင်းတွင် နိုင်ငံတကာငွေကြေးဈေးကွက်၌ အမေရိကန်ဒေါ်လာတန်ဖိုးမှာ ၀.၁% မြင့်တက်ကြောင်း၊ အမေရိကန်ဒေါ်လာတန်ဖိုးသည် ယူရိုငွေနှင့် လဲလှယ်ရာ၌တစ်ယူရိုလျှင် အမေရိကန်ဒေါ်လာ (၁.၁၂၀၃) ဒေါ်လာလဲလှယ်မှုနှုန်းမှ (၁.၁၁၇၁) ဒေါ်လာလဲလှယ်မှုနှုန်းသို့လည်းကောင်း၊  စတာလင်ပေါင်နှင့်လဲလှယ်ရာ၌ စတာလင်တစ်ပေါင်လျှင် အမေရိကန်ဒေါ်လာ (၁.၂၈၄၃) ဒေါ်လာလဲလှယ်မှုနှုန်းမှာ (၁.၂၇၉၁) ဒေါ်လာလဲလှယ်မှုနှုန်းသို့လည်းကောင်း၊ ဂျပန်ယန်းနှင့် လဲလှယ်ရာ၌ အမေရိကန်တစ်ဒေါ်လာလျှင် (၁၀၉.၅၅) ယန်းလဲလှယ်မှုနှုန်းမှ (၁၀၉.၈၄) ယန်းလဲလှယ်မှုနှုန်းသို့လည်းကောင်း အသီးသီးမြင့်တက်ခဲ့ကြောင်း၊ အဆိုပါလဲလှယ်မှုနှုန်းများသည် အမေရိကန်ဒေါ်လာတန်ဖိုးမှာ ရက်သတ္တပတ် (၂) ပတ်အတွင်း အမြင့်ဆုံးအနေအထားပင်ဖြစ်ကြောင်း www.xinhuanet.com အင်တာနက် website တွင် ဖော်ပြပါရှိပါသည်။