အမေရိကန်အစိုးရသည် အမေရိကန်စတော့အိတ်ချိန်းများရှိ တရုတ်ကုမ္ပဏီများအားဖယ်ရှားရန် စီစဉ်နေသည့်သတင်းကြောင့် နာမည်ကျော်အလီဘာဘာကုမ္ပဏီအပါအဝင် တရုတ်စတော့ ရှယ်ယာတန်ဖိုးများနှင့် တရုတ်ယွမ်ငွေတန်ဖိုးကျဆင်းခဲ့

          အမေရိကန်အစိုးရသည် အမေရိကန်ပြည်ထောင်စုရှိ စတော့အိတ်ချိန်းများစာရင်းတွင်ပါဝင်နေသည့် တရုတ်ကုမ္ပဏီများအား ဖယ်ရှားရန်စီစဉ်နေပြီး တရုတ်နိုင်ငံအတွင်း၌ အမေရိကန်ကုမ္ပဏီများရင်းနှီးမြှုပ်နှံမှု သွားရောက်ပြုလုပ်မည့်ကိစ္စများ အပေါ်၌လည်း ကန့်သတ်ထိန်းချုပ်မှုများပြုလုပ်ရန် စီစဉ်လျက်ရှိသည်ဟူသော သတင်းများထွက်ပေါ်လျက်ရှိသည့်အတွက် နာမည်ကျော်တရုတ်ကုမ္ပဏီ အလီဘာဘာအပါအဝင် တရုတ်စတော့ရှယ်ယာများတန်ဖိုးနှင့် တရုတ်ယွမ်ငွေတန်ဖိုးများမှာ ကျဆင်းခဲ့ကြောင်း သိရှိရပါသည်။

          အမေရိကန်အစိုးရ၏ စာရင်းအချက်အလက်များအရ အမေရိကန်စတော့ဈေးကွက်တွင် စာရင်းသွင်းထားသည့် တရုတ်ကုမ္ပဏီ (၁၅၆) ခုရှိကြောင်း၊ တရုတ်နိုင်ငံနှင့် စပ်ဆက်နေသည့် ရင်းနှီးမြှုပ်နှံမှုအပေါ် အမေရိကန်ပြည်ထောင်စုက ကန့်သတ်ထိန်းချုပ်မှုများ ပြုလုပ်သည့်သတင်းကြောင့် ၂၀၁၉ ခုနှစ်၊ စက်တင်ဘာလ (၂၇) ရက် (သောကြာနေ့) မှစတင်၍လက်ရှိအချိန်ထိ ကာလအတွင်း အလီဘာဘာကုမ္ပဏီ၏ စတော့ရှယ်ယာများတန်ဖိုးမှာ ၅% ကျော်နှင့် အခြားတရုတ်ကုမ္ပဏီများ၏ စတော့ရှယ်ယာတန်ဖိုးများမှာ အနည်းဆုံး ၁.၂ % မှ အများဆုံး ၆% အထိ ကျဆင်းခဲ့ကြောင်း၊ တရုတ်စတော့ရှယ်ယာများ တန်ဖိုးကျဆင်းသည့်နည်းတူ တရုတ်ယွမ်ငွေတန်ဖိုးမှာလည်း ၀.၁၄% ကျဆင်းပြီး ရက်သတ္တပတ် (၃) ပတ်အတွင်း အနိမ့်ဆုံးဖြစ်သည့် အမေရိကန်တစ်ဒေါ်လာလျှင် တရုတ်ယွမ်ငွေ ၇.၁၅ ယွမ်လှဲလယ်မှုနှုန်းသို့ ရောက်ရှိခဲ့ကြောင်း www.cnbc.com အင်တာနက် website တွင် ဖော်ပြပါရှိပါသည်။

မလေးရှားအစိုးရသည် ပြည်ပသို့ စားအုန်းဆီတင်ပို့မှုအပေါ် ပို့ကုန်ခွန်ကင်းလွတ်ခွင့်ပေးခဲ့ခြင်းနှင့် စားအုန်းဆီနှင့်ပြိုင်ဘက်ဖြစ်သော ပဲပိစပ်ဆီဈေးနှုန်းအား ပျော့နေခြင်းတို့ကြောင့် မလေးရှားစားအုန်းဆီဈေးနှုန်းမှာ ၁% နီးပါးကျဆင်းခဲ့

မလေးရှားအစိုးရသည် ၂၀၁၈ ခုနှစ်၊ စက်တင်ဘာလမှစ၍ စားအုန်းဆီပို့ကုန်ခွန်အား ၀% ၌ သတ်မှတ်ထားခဲ့သည့်အပြင် လာမည့်အောက်တိုဘာလတွင်လည်း စားအုန်းဆီပို့ကုန်ခွန်အားပြောင်းလဲခြင်းမရှိဘဲ ၀% ၌သာဆက်လက်ထားရှိသွားမည်ဟု ယခုရက်ပိုင်းအတွင်း ကြေညာခဲ့သည့်အတွက် မလေးရှားဈေးကွက်တွင် စားအုန်းဆီဈေးနှုန်းကျဆင်းလျက်ရှိကြောင်း သိရှိရပါသည်။

ထို့ပြင် တရုတ်နိုင်ငံဒါလျန်းဈေးကွက်၌ စားအုန်းဆီနှင့်ပြိုင်ဘက်ဖြစ်သော ပဲပိစပ်ဆီဈေးနှုန်းကျဆင်းနေခြင်းနှင့် ကမ္ဘာ့ဈေးကွက်အတွင်း ရေနံဈေးနှုန်းများကျဆင်းနေသည့်အတွက် လုပ်ငန်းရှင်များအနေဖြင့် ဇီဝလောင်စာဆီအဖြစ် စားအုန်းဆီကို အသုံးပြုမည့်အစားရေနံကိုပြောင်းလဲသုံးစွဲနေခြင်းအစရှိသည့် အချက်များသည်လည်း စားအုန်ဆီဈေးနှုန်းကို ကျဆင်းစေသည့် အခြားအချက်များဖြစ်ကြောင်းသိရှိရပါသည်။          

၂၀၁၉ ခုနှစ်၊ စက်တင်ဘာလ (၂၇) ရက် (သောကြာနေ့) နံနက်ပိုင်းတွင် မလေးရှားစားအုန်းဆီဈေးကွက်၌ စားအုန်းဆီကြိုတင်ရောင်းဝယ်မှုဈေးနှုန်းမှာ ၀.၈% ကျဆင်းပြီးတစ်တန်လျှင် မလေးရှားရင်းဂစ်ငွေ ၂၁၅၁ (အမေရိကန်ဒေါ်လာ ၅၁၄ ခန့်) သို့ ရောက်ရှိခဲ့ကြောင်း၊ မလေးရှားစားအုန်းဆီဈေးနှုန်းသည် ယခုရက်သတ္တပတ်အတွင်း ၃.၃% ခန့် ကျဆင်းခဲ့ကြောင်း www.sg.news.yahoo.comအင်တာနက် website တွင် ဖော်ပြပါရှိပါသည်။