သန့်ရှင်းမှုမရှိသောစက္ကူများကြောင့် ကိုရိုနာဗိုင်းရပ်စ်ပျံ့နှံ့မှု လျင်မြန်စွာ ဖြစ်ပေါ်နေဖွယ်ရှိသည်ဟု ကမ္ဘာ့ကျန်းမာရေးအဖွဲ့ (WHO) က ပြောကြားခဲ့
လက်ရှိအချိန်၌ကမ္ဘာတစ်ဝန်းသို့ကိုရိုနာဗိုင်းရပ်စ်ပျံ့နှံ့မှုမှာလျင်မြန်စွာဖြစ်ပေါ်လျက်ရှိရာထိုသို့လျင်မြန်စွာပျံ့နှံ့ခြင်း၏အကြောင်းအရင်းတစ်ခုတွင်ဟောင်းနွမ်းပြီးမသန့်ရှင်းသောငွေစက္ကူများအားအသုံးပြုခြင်းသည်လည်းအချက်တစ်ခုအဖြစ်ပါဝင်နိုင်သည်ဟုကမ္ဘာ့ကျန်းမာရေးအဖွဲ့(WHO)ကသတိပေးခဲ့ကြောင်း၊ကမ္ဘာ့ကျန်းမာရေးအဖွဲ့က၂၀၂၀ပြည့်နှစ်၊မတ်လ(၂)ရက်(တနင်္လာနေ့)တွင်ထုတ်ပြန်ကြေညာချက်တွင်ဟောင်းနွမ်းပြီးမသန့်ရှင်းသည့်ငွေစက္ကူများကိုကိုင်တွယ်သုံးစွဲခြင်းဖြင့်ကိုရိုနာဗိုင်းရပ်စ်ပျံ့နှံ့မှုပိုမိုဖြစ်ပေါ်စေနိုင်သည့်အတွက်ငွေစက္ကူကိုင်တွယ်ပြီးသည့်အချိန်တိုင်းလက်ကိုဂရုပြု၍ပုံမှန်ဆေးကြောသန့်စင်ရန်လိုအပ်ပြီးဖြစ်နိုင်ပါကငွေစက္ကူအသုံးပြုရန်မလိုသည့်ငွေပေးချေမှုစနစ်များကိုသုံးစွဲကြရန်ဖော်ပြထားကြောင်း၊ထို့ပြင်ငွေစက္ကူကိုင်တွယ်ပြီးနောက်မိမိမျက်နှာပေါ်ရှိအစိတ်အပိုင်းများအားလက်ဖြင့်ကိုင်တွယ်ထိတွေ့ခြင်းမပြုရန်နှင့်ငွေစက္ကူကိုကိုင်တွယ်မှုနည်းပါးပါကရောဂါကူးစက်ခံရမှုလည်းနည်းပါးနိုင်သည်ဟုကမ္ဘာ့ကျန်းမာရေးအဖွဲ့ကသတိပေးထားကြောင်းသိရှိရပါသည်။
အလားတူအင်္ဂလန်ဗဟိုဘဏ်ကမတ်လ(၂)ရက်နေ့တွင်ထုတ်ပြန်သည့်ကြေညာချက်၌လည်းငွေစက္ကူများသည်ဘက်တီးရီးယားများနှင့်ဗိုင်းရပ်စ်များကိုသယ်ဆောင်နိုင်သောကြောင့်ငွေစက္ကူအသုံးပြုသူများအားလုံးပုံမှန်လက်ဆေးကြောသန့်စင်ခြင်းကိုပြုလုပ်ရန်သတိပေးထားကြောင်း၊လက်ရှိအချိန်တွင်ကိုရိုနာဗိုင်းရပ်စ်အများဆုံးဖြစ်ပွားနေသည့်တရုတ်နိုင်ငံနှင့်တောင်ကိုရီးယားနိုင်ငံတို့တွင်ရောဂါပြန့်ပွားမှုကိုတားဆီးနိုင်ရန်အတွက်ငွေစက္ကူအဟောင်းများအားခရမ်းလွန်ရောင်ခြည် (သို့မဟုတ်)အပူချိန်မြင့်မားစွာအသုံးပြု၍ရောဂါပိုးသန့်စင်ခြင်းများကိုပြုလုပ်ပြီးမှသာဈေးကွက်အတွင်းသို့ပြန်လည်ဖြန့်ဝေလျက်ရှိကြောင်း၊သို့သော်အင်္ဂလန်ဗဟိုဘဏ်ကမူအင်္ဂလန်နိုင်ငံအနေဖြင့်တရုတ်နိုင်ငံနှင့်တောင်ကိုရီးယားနိုင်ငံကဲ့သို့ငွေစက္ကူများအားပိုးသတ်သန့်စင်ရန်အစီအစဉ်မရှိဟုကြေညာခဲ့ကြောင်းသိရှိရပါသည်။
အင်္ဂလန်နိုင်ငံအခြေစိုက်နာမည်ကြီးဆေးပညာဂျာနယ်တစ်ခုဖြစ်သည့် Journal of Hospital Infection ကယခုရက်ပိုင်းအတွင်းပြုလုပ်သည့်သုတေသနပြုချက်များအရယခုဖြစ်ပွားနေသောဝူဟန်ကိုရိုနာဗိုင်းရပ်စ်နှင့်မျိုးရိုးဗီဇချင်းတူညီသောပြင်းထန်အဆုတ်ရောင်ကူးစက်ရောဂါ(SARS) နှင့်အရှေ့အလယ်ပိုင်းဒေသအသက်ရှူလမ်းကြောင်းဆိုင်ရာအဆုတ်ရောင်ရောဂါ(MERS)တို့တွင်တွေ့ရှိရသောလူအချင်းချင်းကူးစက်နိုင်သည့်ကိုရိုနာဗိုင်းရပ်စ်များသည်ငွေစက္ကူများ၏မျက်နှာပြင်ပေါ်၌သာမန်အခန်းအပူချိန်တွင် (၉)ရက်တိုင်အောင်အသက်ရှင်နေထိုင်နိုင်ကြောင်းတွေ့ရှိရသည်ဖြစ်ရာဝူဟန်ကိုရိုနာဗိုင်းရပ်စ်မှာလည်းအလားတူအသက်ရှင်နေထိုင်နိုင်လိမ့်မည်ဟုဆေးပညာရှင်များကခန့်မှန်းခဲ့ကြကြောင်းwww.telegraph.co.uk အင်တာနက် website တွင်ဖော်ပြပါရှိပါသည်။
မှတ်ချက်။၂၀၂၀ပြည့်နှစ်၊မတ်လ(၃)ရက်နေ့အထိရရှိသောစာရင်းအချက်အလက်များအရကမ္ဘာပေါ်ရှိနိုင်ငံ/ဒေသကြီး(၇၇)ခုတို့တွင်ကိုရိုနာဗိုင်းရပ်စ်ကူးစက်ပျံ့နှံ့နေပြီးရောဂါကူးစက်ခံရသူ (၉၁,၃၆၂)ဦး၊သေဆုံးသူ(၃,၁၁၉)ဦးနှင့်ပြန်လည်သက်သာပျောက်ကင်းသူ(၄၈,၂၅၇)ဦးရှိကြောင်းသိရှိရပါသည်။