ရေနံဈေးနှုန်းများကိုကျဆင်းအောင်လုပ်ဆောင်ရမည်ဟုအမေရိကန်သမ္မတဒေါ်နယ်ထရန့်ကအိုပက်အဖွဲ့အားထပ်မံသတိပေးခဲ့ပြီးနောက် ကမ္ဘာ့ဈေးကွက်အတွင်း ရေနံဈေးနှုန်းများ ၃%ခန့်ကျဆင်းသွားခဲ့မှု

လက်ရှိအချိန်၌ ကမ္ဘာ့ဈေးကွက်အတွင်း ရေနံဈေးနှုန်းများ အလွန်အကျွံမြင့်တက်နေသောကြောင့် အိုပက်အဖွဲ့အနေဖြင့် ရေနံဈေးနှုန်းများကျဆင်းစေရန်အတွက် ထုတ်လုပ်မှုကိုတိုးမြှင့်ပေး ရန် အမေရိကန်သမ္မတဒေါ်နယ်ထရန့်က ၂၀၁၉ ခုနှစ်၊ ဧပြီလ (၂၆) ရက် (သောကြာနေ့) တွင် ဖိအားပေးခဲ့ပြီးနောက် ရေနံဈေးနှုန်းများမှာ ၃% ခန့်ကျဆင်းသွားခဲ့ကြောင်း သိရှိရပါသည်။

ဒေါ်နယ်ထရန့်သည် ဧပြီလ (၂၆) ရက်နေ့၌ သတင်းထောက်များနှင့် တွေ့ဆုံစဉ် အိုပက်အဖွဲ့ဝင်နိုင်ငံများအနေဖြင့် ရေနံဈေးကို မကျကျအောင်လုပ်ဆောင်ပေးရန် မိမိအနေဖြင့် တောင်းဆိုလိုက်သည်ဟု သတိပေးပြောကြားခဲ့ကြောင်း၊ ၎င်း၏သတိပေးချက်ထွက်ပေါ်ပြီးနောက်တွင် ၂၀၁၉ ခုနှစ်၊ ဧပြီလ (၂၇) ရက် (စနေနေ့) နံနက်ပိုင်း တွင် နယူးယောက်ဈေးကွက်တွင်  WTI ရေနံစိမ်းဈေးနှုန်းမှာ ၃.၇%ကျဆင်းပြီးတစ်စည်လျှင် အမေရိကန်ဒေါ်လာ (၆၂.၈၂) သို့လည်းကောင်း၊ လန်ဒန်ဈေးကွက်၌ ဘရန့်ရေနံဈေးနှုန်းမှာ ၃.၆% ကျဆင်းပြီး တစ်စည်လျှင် အမေရိကန်ဒေါ်လာ (၇၁.၇၁) သို့လည်းကောင်း အသီးသီးကျဆင်းခဲ့ကြောင်း၊ အဆိုပါဈေးနှုန်းများသည် ရက်သတ္တပတ်(၃) ပတ် အတွင်း အနိမ့်ဆုံးဈေးနှုန်းများဖြစ်ကြောင်း သိရှိရပါသည်။

အမေရိကန်သမ္မတဒေါ်နယ်ထရန့်သည် ၎င်းအာဏာရရှိခဲ့ပြီးနောက် ရေနံဈေးနှုန်းများနှင့်ပတ်သက်၍ အိုပက်အဖွဲ့အား အကြိမ်ကြိမ်သတိပေးပြောကြားခဲ့ဖူးကြောင်း၊ ၎င်းသတိပေးပြောကြားသည့်အချိန်တိုင်း ဈေးကွက်အတွင်း၌ ရေနံဈေးနှုန်းများခေတ္တကျဆင်းလေ့ရှိကြောင်းwww.channelnewsasia.com အင်တာနက် website တွင် ဖော်ပြပါရှိပါသည်။

ရခိုင်ပြည်နယ်မြောက်ပိုင်း၌တိုက်ပွဲများဖြစ်ပွားနေခြင်းကြောင့်ဘင်္ဂါလီကျေးရွာများအားကုလသမဂ္ဂကဝင်ရောက်လေ့လာမည့်အစီအစဉ်မှာ နှောင့်နှေးနေရသည်ဟု UNHCR အကြီးအကဲကပြောကြားခဲ့မှု

ကုလသမဂ္ဂသည် ရခိုင်ပြည်နယ်အတွင်းရှိ ဘင်္ဂါလီကျေးရွာ (၁၀၀၀) ဝန်းကျင်ခန့်အား ဝင်ရောက်လေ့လာရန် စီစဉ်ထားသော်လည်း ရခိုင်ပြည်နယ်အတွင်း ဖြစ်ပွားနေသည့် မြန်မာ့တပ်မတော်နှင့်  AA အဖွဲ့တို့၏ လက်နက်ကိုင် ပဋိပက္ခများကြောင့် ယင်းအစီအစဉ်မှာ နှောင့်နှေးလျက်ရှိပြီး လက်ရှိအချိန်ထိဘင်္ဂါလီကျေးရွာ (၁၀၀) ခန့်ကိုသာ ဝင်ရောက်လေ့လာနိုင်သေးသည်ဟု ကုလသမဂ္ဂဒုက္ခသည်များဆိုင်ရာမဟာမင်းကြီးရုံး (UNHCR) ၏အကြီးအကဲ ဖီလစ်ပိုဂရမ်ဒီက ၂၀၁၉ ခုနှစ်၊ ဧပြီလ (၂၆) ရက် (သောကြာနေ့) တွင် ပြောကြားခဲ့ကြောင်း၊ ဖီလစ်ပိုဂရမ်ဒီသည် ဘင်္ဂလားဒေ့ရှ်နိုင်ငံကော့ဘဇားရှိ ဘင်္ဂါလီဒုက္ခသည်စခန်းများသို့ သွားရောက်လေ့လာပြီး နောက်သတင်းထောက်များနှင့် တွေ့ဆုံစဉ် ယခုကဲ့သို့ ပြောကြားခဲ့ခြင်းဖြစ်ကြောင်း သိရှိရပါသည်။

ဖီလစ်ပိုဂရမ်ဒီက ဆက်လက်ပြောကြားရာ၌ ရခိုင်ပြည်နယ်အတွင်းရှိ ဘင်္ဂါလီမွတ်ဆလင်ကျေးရွာများသို့ ကုလသမဂ္ဂကဝင်ရောက်လေ့လာခွင့်ရရှိပြီး နေရပ်ပြန် ဘင်္ဂါလီဒုက္ခသည်များအတွက် ပြင်ဆင်မှုများပြုလုပ်ရန် မြန်မာအစိုးရနှင့် ကုလသမဂ္ဂတို့အကြား သဘောတူညီမှုကို ၂၀၁၈ ခုနှစ်ကတည်းက ရယူခဲ့ပြီးဖြစ်ကြောင်း၊ သို့သော် အဆိုပါသဘောတူညီချက်ကို အကောင်အထည်ဖော်ဆောင်ရာ၌မူ နှေးကွေးလျက်ရှိကြောင်း၊ ထိုသို့ နှောင့်နှေးရခြင်း၏အဓိကအကြောင်းရင်းမှာ လွန်ခဲ့သော (၄) လခန့်မှစတင်ခဲ့သည့်  AA သောင်းကျန်းသူအဖွဲ့၏ လှုပ်ရှားမှုများကြောင့် ဖြစ်သည်ဟု ပြောကြားခဲ့ကြောင်း သိရှိရပါသည်။

ကော့ဘဇားရှိ ဒုက္ခသည်စခန်းများသို့ လာရောက်လေ့လာခဲ့သည့် ကုလသမဂ္ဂတာဝန်ရှိသူများနှင့် နိုင်ငံခြား သံတမန်များသည် ဘင်္ဂါလီဒုက္ခသည်များ ရခိုင်ပြည်နယ်သို့ ပြန်လည်အခြေချရေးအစီအစဉ်မှာ လတ်​တလောဖြစ်လာနိုင်စရာ အကြောင်းမရှိဟု ပြောကြားခဲ့ပြီး UNHCR အကြီးအကဲ ဖီလစ်ပိုဂရမ်ဒီကိုယ်တိုင်ကလည်း ဘင်္ဂါလီများနေရပ်ပြန်ရေးအစီအစဉ်ကို ယခုနှစ်အတွင်းအကောင်အထည်ဖော်ဆောင်ရန် မျှော်လင့်ချက်နည်းပါးသွားပြီဟု ထုတ်ဖော်ပြောကြားခဲ့ကြောင်း www.nationmultimedia.com. အင်တာနက် website တွင်ဖော်ပြပါရှိပါသည်။

မဲခေါင်မြစ်ဝှမ်းတွင် စိုက်ပျိုးရေပြတ်လပ်သည့် ပြဿနာကြောင့် ဗီယက်နမ်ဆန်ဈေးနှုန်းမှာ မြင့်တက်ခဲ့ပြီး အိန္ဒိယဆန်နှင့် ထိုင်းဆန်များမှာမူ ဝယ်လိုအား ပျော့သည့်အတွက် ဆန်ဈေးနှုန်းများ ကျဆင်းလျက်ရှိမှု

ဗီယက်နမ်နိုင်ငံတွင် ရာသီဥတုပူပြင်းမှုကြောင့်ရေရှားပါးမှုများ ဖြစ်ပေါ်နေပြီး အထူးသဖြင့် ဆန်စပါးအဓိကစိုက်ပျိုးရာ မဲခေါင်မြစ်ဝှမ်းဒေသတွင် စပါးစတင်စိုက်ပျိုးရန်အတွက် စိုက်ပျိုးရေမလုံလောက်သည့် ပြဿနာများကို ကြုံတွေ့နေရကြောင်း၊ ထို့ကြောင့်စိုက်ပျိုးရေမလုံလောက်မှုများမှ တဆင့်ဆန် အကျပ်အတည်းပြဿနာများ ဖြစ်ပေါ်လာနိုင်သည့်အပေါ် စိုးရိမ်ပူပန်မှုများကြောင့် ဗီယက်နမ်ပြည်တွင်း၌ ဆန်အလုအယက် ဝယ်ယူစုဆောင်းမှုများပြားလာခဲ့ပြီး ဆန်ဈေးနှုန်းမှာ ရက်သတ္တပတ် (၆) ပတ်အတွင်း ပထမဆုံးအနေဖြင့် မြင့်တက်လာခဲ့ကြောင်း၊ ဗီယက်နမ် (၅) မှတ်ဆန်ဈေးနှုန်းသည် လွန်ခဲ့သည့် ရက်သတ္တပတ်အတွင်း၌ တစ်တန်လျှင် အမေရိကန်ဒေါ်လာ (၃၆၀) ဝန်းကျင်၌သာရှိခဲ့ရာမှ ယခုရက်သတ္တပတ်အတွင်း၌မူ တစ်တန်လှျင် အမေရိကန်ဒေါ်လာ (၃၇၀) ဝန်းကျင်အထိရောက်ရှိလာခဲ့ကြောင်း သိရှိရပါသည်။

ဗီယက်နမ်ဆန်ဈေးနှုန်း မြင့်တက်လာချိန်တွင် အိန္ဒိယဆန်မှာမူ အာဖရိကနိုင်ငံများထံမှ ဝယ်လိုအားလျော့နည်းသွားခြင်း၊ အိန္ဒိယဆန်ကို ပုံမှန်ဝယ်ယူနေသည့် ဘင်္ဂလားဒေ့ရှ်နိုင်ငံ၌ ပြည်ပမှ ဆန်ဝယ်ယူတင်သွင်းမှုများကို တားမြစ်ပိတ်ပင်ရန် စီစဉ်နေခြင်းတို့ကြောင့် အိန္ဒိယဆန်ဈေးနှုန်းမှာ ကျဆင်းလျက်ရှိကြောင်း၊ အိန္ဒိယ (၅) မှတ်ပေါင်းဆန်တစ်တန်၏ ဈေးနှုန်းသည်လွန်ခဲ့သည့် ရက်သတ္တပတ်အတွင်းဖြစ်ပေါ်ခဲ့သည့် ဈေးနှုန်းနှင့်နှိုင်းယှဉ်ပါက အမေရိကန်ဒေါ်လာ (၂) ဒေါ်လာခန့်ကျဆင်းခဲ့ပြီး တစ်တန်လျှင် အနိမ့်ဆုံးဈေး အမေရိကန်ဒေါ်လာ (၃၇၅) နှင့် အမြင့်ဆုံးဈေး အမေရိကန်ဒေါ်လာ (၃၇၈) ဒေါ်လာအကြားသို့ ရောက်ရှိခဲ့ကြောင်း သိရှိရပါသည်။

အိန္ဒိယဆန်ဈေးနှုန်း ကျဆင်းနေချိန်တွင် ထိုင်းဆန်ဈေးနှုန်းမှာလည်း ဘတ်ငွေတန်ဖိုးကျဆင်းခြင်းနှင့်အတူ လိုက်ပါကျဆင်းခဲ့ကြောင်း၊ ထိုင်းဘတ်ငွေတန်ဖိုးသည် လက်ရှိအချိန်၌ (၃) လတာကာလအတွင်း အနိမ့်ဆုံးအနေအထားသို့ ရောက်ရှိနေသည့်အတွက်ဘတ်ငွေနှင့် ချိတ်ဆက်အရောင်းအဝယ်ပြုသည့် ထိုင်းဆန်ဈေးနှုန်းမှာ ကျဆင်းသွားခြင်းဖြစ်ကြောင်း၊ ထိုင်း (၅) မှတ်ဆန်ဖြူ တစ်တန်၏ဈေးနှုန်းသည် အမေရိကန်ဒေါ်လာ (၈) ဒေါ်လာခန့်ကျဆင်းခဲ့ပြီး တစ်တန်လျှင်အနိမ့်ဆုံးဈေး အမေရိကန်ဒေါ်လာ(၃၈၅) ဒေါ်လာနှင့် အမြင့်ဆုံးဈေးအမေရိကန်ဒေါ်လာ (၃၈၈) အကြား၌ ဖြစ်ပေါ်လျက်ရှိကြောင်း၊ သို့သော်ယခုနှစ်တွင် ထိုင်းနိုင်ငံ၌ မိုးခေါင်ရေရှားဖြစ်မည့် အလားအလာရှိသောကြောင့် ဆန်ထွက်ရှိမှုကျဆင်းမည့် အန္တရာယ်နှင့်ကြုံတွေ့လာနိုင်သည်ဟု ထိုင်းဆန်ကုန်သည်များက ခန့်မှန်းထားကြကြောင်းreuters.com အင်တာနက် website တွင်ဖော်ပြပါရှိပါသည်။

ပိုးလမ်းမကြီးစီမံကိန်း(BRI)ဆွေးနွေးပွဲတွင် တရုတ်သမ္မတပြောကြားခဲ့သည့်မိန့်ခွန်းကြောင့် ယွမ်ငွေတန်ဖိုးမှာ ရက်သတ္တပတ်(၁)ပတ်အတွင်းအမြင့်ဆုံးသို့ ပြန်လည်ရောက်ရှိခဲ့မှု

တရုတ်ယွမ်ငွေတန်ဖိုးကျဆင်းနေခြင်းသည် အခြားနိုင်ငံများကိုပါ ထိခိုက်စေနိုင်သောကြောင့် တရုတ်အစိုးရအနေဖြင့် ယွမ်ငွေတန်ဖိုးကျဆင်းနေမှုကို တားဆီးကာကွယ်ပြီး ယွမ်ငွေတန်ဖိုးအား ရှိသင့်ရှိထိုက်သည့်အနေအထား၌ တည်ငြိမ်စွာ တည်ရှိနိုင်ရေးအတွက် ကြိုးပမ်းဆောင်ရွက်သွားမည်ဟု တရုတ်သမ္မတရှီကျင့်ပင်က ၂၀၁၉ ခုနှစ်၊ ဧပြီလ (၂၆) ရက် (သောကြာနေ့) တွင်ဘေကျင်းမြို့၌ ပြုလုပ်သည့် ပိုးလမ်းမကြီးစီမံကိန်းဆွေးနွေးပွဲ၌ အတိအလင်းပြောကြားခဲ့ကြောင်း သိရှိရပါသည်။

ယွမ်ငွေတန်ဖိုးသည် သမ္မတရှီကျင့်ပင်၏ မိန့်ခွန်းမတိုင်မီ ၂၀၁၉ ခုနှစ်၊ ဧပြီလ (၂၅) ရက် (ကြာသပတေးနေ့) ၌ နှစ်လတာကာလအတွင်း အနိမ့်ဆုံးအနေအထားတွင်ရှိနေရာမှ သမ္မတ ရှီကျင့်ပင်၏ မိန့်ခွန်းပြောကြားပြီးနောက် ဧပြီလ (၂၆) ရက် နေ့လည်ပိုင်းတွင်မူ ၀.၂% မြင့်တက်ကာ အမေရိကန်တစ်ဒေါ်လာလျှင် (၆.၇၃၁၁) ယွမ်လဲလှယ်မှုနှုန်းသို့ ရောက်ရှိခဲ့ကြောင်း၊ သမ္မတရှီကျင့်ပင်၏မိန့်ခွန်းကြောင့် တရုတ်ဗဟိုဘဏ်သည် မူလရည်မှန်းထားသည့် ငွေကြေးမူဝါဒများအား ဖြေလျှော့ထားမည့်အစီအစဉ်ကို စွန့်လွှတ်ကာ ယွမ်ငွေတန်ဖိုးအားကောင်းလာစေရန်အတွက် ပြောင်းလဲလုပ်ဆောင်ရဖွယ် ရှိသောကြောင့် ယွမ်ငွေတန်ဖိုးမှာ လာမည့်တစ်လ၊ နှစ်လအတွင်း၌ အမေရိကန်တစ်ဒေါ်လာလျှင် (၆.၆၈) ယွမ်လဲလှယ်မှုနှုန်းသို့ မြင့်တက်ရောက်ရှိလိမ့်မည်ဟု ငွေကြေး​ဈေးကွက်လေ့လာသူများက ခန့်မှန်းထားကြကြောင်း သိရှိရပါသည်။

အမေရိကန်အစိုးရ၏ ကုန်သွယ်ရေးဆိုင်ရာအကြီးအကဲ ရောဘတ်လိုင်သီဇာနှင့် ဘဏ္ဍာရေးဝန်ကြီး စတီဗင်မြူချင်တို့သည် လာမည့်ရက်သတ္တပတ်အတွင်း၌ တရုတ်နိုင်ငံသို့ လာရောက်၍ ကုန်သွယ်ရေးကိစ္စများနှင့်ပတ်သက်ပြီး ဆွေးနွေးမှုများပြုလုပ်မည်ဖြစ်ရာ အဆိုပါဆွေးနွေးပွဲတွင် တရုတ်အစိုးရအနေဖြင့် ယွမ်ငွေတန်ဖိုးကို အလွန်အမင်းနှိမ့်ချထားခြင်းမရှိဘဲ ဖြစ်သင့်ဖြစ်ထိုက်သည့်အနေအထား၌ ထိန်းသိမ်းထားရှိပေးရန်ကိစ္စသည်လည်း အကြောင်းအရာတစ်ခုအဖြစ်ပါဝင်နေကြောင်း www.thestar.com.my အင်တာနက် website တွင် ဖော်ပြပါရှိပါသည်။

ထိုင်းနိုင်ငံ၌ ရွေးကောက်ပွဲအပြီးတွင် နိုင်ငံရေးမတည်ငြိမ်မှုများ ပိုမိုဖြစ်ပေါ်နေသည့်အတွက် ဘတ်ငွေတန်ဖိုးမှာ (၃)လတာကာလအတွင်း အနိမ့်ဆုံးသို့ကျဆင်းသွားခဲ့မှု

ထိုင်းနိုင်ငံ၌ ပါတီစုံအထွေထွေရွေးကောက်ပွဲ ကျင်းပပြီးစီးခဲ့သည်မှာ(၁)လခန့် ကြာမြင့်ခဲ့ပြီဖြစ်သော်လည်း လက်ရှိ အချိန်အထိ တိကျသောရွေးကောက်ပွဲရလဒ်များကို မကြေညာနိုင်သေးခြင်း၊ ကိုယ်စားလှယ်လောင်းများနှင့် နိုင်ငံရေးပါတီများအချင်းချင်း အပြန်အလှန်တိုင်တန်းမှုများဖြစ်ပေါ်နေခြင်းနှင့် ရွေးကောက်ပွဲကော်မရှင်အပေါ်၌ပါ တိုင်ကြားမှုများ၊ ကန့်ကွက်မှုများဖြစ်ပေါ်နေသောကြောင့် ထိုင်းနိုင်ငံရေးအခြေအနေမှာ ရွေးကောက်ပွဲအလွန် ကာလတွင် ပိုမိုရှုပ်ထွေးလာခဲ့ကြောင်း၊ ၂၀၁၉ခုနှစ်၊ ဧပြီလ(၂၃)ရက်(အင်္ဂါနေ့)တွင် ထိုင်းနိုင်ငံ၌ သြဇာကြီးမားသော ခုံရုံးတစ်ခုဖြစ်သည့်အစိုးရဌာနများအပေါ် မကျေနပ်ချက်များကို စုံစမ်းစစ်ဆေးရသည့် ပဋိပက္ခအငြင်းပွားမှုများ ဖြေရှင်းရေးဆိုင်ရာရုံး (Ombudsman)သည် မသမာမှုများသည့်ရွေးကောက်ပွဲအား ပယ်ဖျက်ပေးရန်အတွက် တောင်းဆိုထားသည့်တိုင်တန်းချက်များအား လက်ခံခဲ့ပြီးသုံးသပ်မှုများစတင်ပြုလုပ်နေပြီဖြစ်သောကြောင့် ယင်းသတင်းထွက်ပေါ်ပြီးနောက်တွင် ထိုင်းနိုင်ငံရေးအခြေအနေအပေါ် စိုးရိမ်ပူပန်မှုများနှင့်အတူ ထိုင်းဘတ်ငွေ တန်ဖိုးမှာ အဆမတန်ကျဆင်းသွားခဲ့ကြောင်း သိရှိရပါသည်။

၂၀၁၉ ခုနှစ်၊ဧပြီလ(၂၄)ရက်(ဗုဒ္ဓဟူးနေ့)တွင် ဘတ်ငွေတန်ဖိုးမှာ ၀.၂%ကျဆင်းခဲ့ပြီး အမေရိကန် တစ်ဒေါ်လာလျှင်(၃၂.၀၄၉)ဘတ်လဲလှယ်မှုနှုန်းသို့ရောက်ရှိခဲ့ရာ ၂၀၁၉ခုနှစ်၊ ဇန်နဝါရီလ(၉)ရက်နေ့နောက်ပိုင်း ဘတ်ငွေတန်ဖိုးအနိမ့်ဆုံးအနေအထားပင်ဖြစ်ကြောင်း၊ ထိုင်းဘတ်ငွေတန်ဖိုးသည် ၂၀၁၉ခုနှစ်၊ ပထမ(၃)လပတ် ကာလအတွင်း၌ ၂.၅%မြင့်တက်ခဲ့သော်လည်း ရွေးကောက်ပွဲအပြီးနောက် လက်ရှိဒုတိယ(၃)လပတ်ကာလအတွင်း၌ ၀.၉%ကျဆင်းခဲ့ကြောင်း၊ ယခုဒုတိယ(၃)လပတ်ကာလသည် ပုံမှန်အားဖြင့် ကမ္ဘာလှည့်ခရီးသည် ဝင်ရောက်မှု နည်းပါးလေ့ရှိသည့်ကာလဖြစ်သည့်အပြင် လက်ရှိဖြစ်ပေါ်နေသော နိုင်ငံရေးမတည်ငြိမ်မှုများကြောင့် နိုင်ငံခြားမှ ငွေအရင်းအနှီးဝင်ရောက်မှုများပါ နည်းပါးသွားသည့်အတွက် ဘတ်ငွေတန်ဖိုးမှာ ဆက်တိုက်ကျဆင်းနေခြင်း ဖြစ်ကြောင်း သိရှိရပါသည်။

ထိုင်းနိုင်ငံ ဘန်ကောက်မြို့အခြေစိုက် အယုဒ္ဓယဘဏ်လုပ်ငန်းမှ ငွေကြေးဈေးကွက်ပညာရှင် တစ်ဦးကမူ ပြည်တွင်းရေးအခြေအနေမတည်ငြိမ်မှုများကြောင့် ဘတ်ငွေတန်ဖိုး ခဏတာကျဆင်းခြင်းသာဖြစ်ပြီး ၂၀၁၉ခုနှစ်၊ ဇွန်လကုန်ပိုင်းတွင်မူ ဘတ်ငွေတန်ဖိုးမှာ အမေရိကန်တစ်ဒေါ်လာလျှင် (၃၁.၇၅)ဘတ်လဲလှယ်မှုနှုန်းသို့ ပြန်လည်မြင့်တက်လာလိမ့်မည်ဟု ပြောကြားခဲ့ကြောင်း www.bloomberg.com အင်တာနက် website တွင်ဖော်ပြပါရှိပါသည်။

ဝန်ကြီးချုပ်အဖြစ် တာဝန်ထမ်းဆောင်ခဲ့သည့်ကာလအတွင်း မြန်မာနိုင်ငံသို့ ချေးငွေဘတ်(၄)ဘီလီယံ ခွင့်ပြုခဲ့သည့် ကိစ္စနှင့်ပတ်သက်၍ ဝန်ကြီးချုပ်ဟောင်းသက်ဆင်အား ထိုင်းတရားရုံးချုပ်က ထောင်ဒဏ် (၃)နှစ်ပြစ်ဒဏ်ချမှတ်ခဲ့မှု

ဝန်ကြီးချုပ်အဖြစ် တာဝန်ထမ်းဆောင်ခဲ့သည့် ကာလအတွင်း မြန်မာနိုင်ငံသို့ ချေးငွေဘတ်(၄)ဘီလီယံ ခွင့်ပြုခဲ့သည့်ကိစ္စနှင့်ပတ်သက်၍ ဝန်ကြီးချုပ်ဟောင်းသက်ဆင်အား ထိုင်းတရားရုံးချုပ်က ၂၀၁၉ခုနှစ်၊ ဧပြီလ (၂၃)ရက်(အင်္ဂါနေ့)တွင် ထောင်ဒဏ်(၃)နှစ်ပြစ်ဒဏ်ချမှတ်ခဲ့ကြောင်း သိရှိရပါသည်။

ထိုင်းဝန်ကြီးချုပ်ဟောင်းသက်ဆင်သည် ၎င်းအာဏာရရှိခဲ့သည့်ကာလအတွင်း ၂၀၀၄ခုနှစ်၌ မြန်မာအစိုးရထံသို့ ဘတ်ငွေ(၄)ဘီလီယံခန့်အား သတ်မှတ်ထားသည့် ဘဏ်တိုးနှုန်းအောက်လျှော့ချ၍ သက်သာသောအတိုးနှုန်းဖြင့် ချေးငွေထုတ်ပေးရန် ထိုင်းနိုင်ငံ ပို့ကုန်သွင်းကုန်ဘဏ်(Exim Bank)သို့ အမိန့်ပေးခဲ့ပြီး အဆိုပါချေးငွေများဖြင့် သက်ဆင်မိသားစုပိုင်ဆိုင်သည့် Shin Satellite Plc မှ ဆက်သွယ်ရေးပစ္စည်းများကို ဝယ်ယူရန် မြန်မာအစိုးရထံကမ်းလှမ်းခဲ့သဖြင့် မြန်မာအစိုးရက ဘတ်ငွေ သန်း(၄၀၀)ဖိုးခန့်တန်ဖိုးရှိ ဆက်သွယ်ရေး ပစ္စည်းများကို ဝယ်ယူခဲ့ရသည်ဟု သိရှိရပါသည်။

၂၀၀၆ ခုနှစ်တွင် ဝန်ကြီးချုပ်သက်ဆင်ထံမှ ဗိုလ်ချုပ်ကြီး ဆွန်သီ ဦးဆောင်သည့် တပ်မတော်အစိုးရက အာဏာသိမ်းယူခဲ့ပြီးနောက် ၂၀၀၈ခုနှစ်တွင် ထိုင်းအာဏာပိုင်များသည် ချေးငွေဘတ်ငွေ (၄)ဘီလီယံကိစ္စနှင့် ပတ်သက်၍ ဝန်ကြီးချုပ်ဟောင်းသက်ဆင်အား တရားစွဲဆိုခဲ့ကြောင်း၊ အဆိုပါ အမှုကို ထိုင်းနိုင်ငံရှိ ပိုင်ဆိုင်မှုများ စိစစ်ရေးကော်မတီ(ASC)က စတင်စုံစမ်းစစ်ဆေးခဲ့ခြင်းဖြစ်ပြီး နောက်ပိုင်းတွင် ရှေ့နေချုပ်ရုံးနှင့် အဂတိလိုက်စားမှုကော်မရှင်တို့ထံ လွှဲပြောင်းပေးခဲ့ကြောင်း၊ စစ်ဆေးချက်များအရ ဝန်ကြီးချုပ်ဟောင်း သက်ဆင်သည် ထိုင်းနိုင်ငံ၏ ပြစ်မှုဆိုင်ရာဥပဒေပုဒ်မ(၁၅၂)ပါ ပြဌာန်းချက်ဖြစ်သည့် အစိုးရပိုင်ပစ္စည်းများအား မိမိ၏ကိုယ်ကျိုး စီးပွားအတွက် အလွဲသုံးစားပြုလုပ်ခဲ့သည်ဟူ၍ စစ်ဆေးပေါ်ပေါက်ခဲ့ကြောင်း၊ အဆိုပါပြစ်မှုအတွက် ပြစ်ဒဏ် ပြဌာန်းချက်မှာ ထောင်ဒဏ်(၁)နှစ်မှ (၁၀)နှစ်အထိ ကျခံရမည့်အပြင် ငွေဒဏ်အဖြစ် ဘတ်ငွေ(၂)သောင်းမှ (၂)သိန်းအထိ ပေးဆောင်ရမည်ဖြစ်သော်လည်း ထိုင်းတရားရုံးချုပ်သည် ၂၀၁၉ ခုနှစ်၊ ဧပြီလ(၂၃)ရက်နေ့တွင် သက်ဆင်၏ ပြစ်မှုနှင့်ပတ်သက်၍ ပြစ်ဒဏ်ချမှတ်ရာ၌ ထောင်ဒဏ်(၃)နှစ်သာချမှတ်ခဲ့ကြောင်း၊ တရားရုံးအမိန့် ချမှတ်သည့်နေရာသို့ ဝန်ကြီးချုပ်ဟောင်းသက်ဆင် လာရောက်ခြင်းမရှိသောကြောင့်မျက်ကွယ် ပြစ်ဒဏ်သာ ချမှတ်ခဲ့ရသည်ဟု www.bangkokpost.com အင်တာနက် website တွင်ဖော်ပြပါရှိပါသည်။

ထိုင်းနှင့် မြန်မာနိုင်ငံတောင်ပိုင်းရှိ ရှေးဟောင်းသမိုင်းဝင်မြို့များအကြား ကမ္ဘာလှည့်ခရီးသွားကဏ္ဍ မြှင့်တင်ရေးအတွက် ထိုင်းနိုင်ငံမှလုပ်ဆောင်လျက်ရှိမှု

ထိုင်းနှင့် မြန်မာနှစ်နိုင်ငံရှိ ရှေးဟောင်းသမိုင်းဝင်မြို့များအကြားကမ္ဘာလှည့်ခရီးသွားကဏ္ဍ မြှင့်တင်နိုင်ရေးအတွက်နှစ်နိုင်ငံရှေးဟောင်းမြို့များဖြစ်သည့် ထိုင်းနိုင်ငံ၊ အူတောင်းမြို့နှင့် မြန်မာနိုင်ငံ၊ တနင်္သာရီမြို့တို့အကြား ကမ္ဘာလှည့်ခရီးသည်များအပြန်အလှန်သွားရောက်နိုင်သည့် ခရီးစဉ် လမ်းကြောင်းများ လုပ်ဆောင်ရန် ထိုင်းနိုင်ငံမှစီစဉ်လျက်ရှိသည်ဟု သိရှိရကြောင်း၊ ထိုင်းနှင့်မြန်မာ နှစ်နိုင်ငံအတွင်း ရှေးဟောင်းသမိုင်းဝင်မြို့များအကြား ယဉ်ကျေးမှုဖလှယ်ရေးနှင့် ခရီးစဉ် အပြန်အလှန် သွားရောက်လည်ပတ်နိုင်ရေးအတွက် ထိုင်းနိုင်ငံကမ္ဘာလှည့်ခရီးသွားအုပ်ချုပ်ရေးဌာန(Dasta)နှင့် မြန်မာအာဏာပိုင်များအကြား ယခုဧပြီလအစောပိုင်းတွင် နားလည်မှုစာချွန်လွှာ လက်မှတ် ရေးထိုးခဲ့ပြီးဖြစ်ကြောင်း၊ အဆိုပါနားလည်မှုစာချွန်လွှာအရ အေဒီ(၆)ရာစုနှင့် (၁၁)ရာစုများအတွင်း ထိုင်း-မြန်မာတောင်ပိုင်းနယ်စပ်ဒေသတဝိုက်တွင်တည်ရှိခဲ့သည့် မွန်မြို့ပြနိုင်ငံတစ်ခုဖြစ်သော ဒွါရဝတီခေတ်သမိုင်းဝင်မြို့များသို့ ကမ္ဘာလှည့်ခရီးသွားများပိုမိုလာရောက်လာစေရေးနှင့် အဆိုပါ လမ်းကြောင်းမှတစ်ဆင့် မြိတ်မြို့သို့ ကမ္ဘာလှည့်ခရီးသွားများ ဆက်လက်ဝင်ရောက်နိုင်စေရေးတို့ကို ထိုင်းအစိုးရက လုပ်ဆောင်သွားမည်ဖြစ်ကြောင်း၊ စီမံကိန်း၏ပထမအဆင့်အနေဖြင့် ထိုင်းနိုင်ငံ၊ ဘန်ကောက်မြို့မြောက်ပိုင်းရှိ ဒွါရဝတီခေတ်အူတောင်းရှေးဟောင်းမြို့မှတစ်ဆင့် ထိုင်းနိုင်ငံ အနောက်ပိုင်းအားဖြတ်သန်းကာ မြန်မာနိုင်ငံ၏ ရှေးဟောင်းမြို့တစ်မြို့ဖြစ်သည့် တနင်္သာရီမြို့သို့ ခရီးစဉ်လမ်းကြောင်း(၅)ကြောင်းဖြင့်ဆက်သွယ်သွားမည်ဖြစ်ကြောင်း၊ အဆိုပါလမ်းကြောင်း(၅)ခုမှာ အူတောင်း-ဆူဖန်ဘူရီလမ်းကြောင်း၊ အူတောင်း-ကန်ချနာဘူရီလမ်းကြောင်း၊ အူတောင်း-နာခွန်ပက်သွန်လမ်းကြောင်း၊ အူတောင်း-ပရာကျွတ်ကရီခန်လမ်းကြောင်းနှင့် အူတောင်း-မြိတ် လမ်းကြောင်းတို့ဖြစ်သည်ဟုသိရှိရကြောင်း၊ အဆိုပါခရီးစဉ်လမ်းကြောင်းများသည် အာဆီယံ ကမ္ဘာလှည့် ခရီးသွားကဏ္ဍပိုမိုကျယ်ပြန့်လာစေရေးနှင့် ယဉ်ကျေးမှုအမွေအနှစ်များ ဖလှယ်နိုင်ရေး အတွက်လည်းထောက်ကူပေးသွားနိုင်မည်ဖြစ်ကြောင်း၊ ထို့ပြင် ထိုင်းနှင့်မြန်မာနိုင်ငံအကြားရှိ ဒေသခံ ပြည်သူများ၏လူနေမှုဘဝပုံစံများ၊ ဓလေ့ထုံးတမ်းအစဉ်အလာများနှင့် ယဉ်ကျေးမှုအမွေအနှစ်များအား ထိန်းသိမ်းစောင့်ရှောက်သွားနိုင်မည်ဖြစ်ပြီး ထိုသို့နှစ်နိုင်ငံအကြားပူးပေါင်းဆောင်ရွက်မှုဖြင့် ကမ္ဘာလှည့် ခရီးသွားများဝင်ရောက်မှုအား တိုးမြှင့်သွားနိုင်မည်ဖြစ်ကြောင်း၊ ထိုင်းနိုင်ငံ၊ ပရာကျွတ်ကရီခန် လမ်းကြောင်းရှိ ထိုင်း-မြန်မာနယ်စပ်မှဆင်ခွန်းနယ်စပ်ဝင်ထွက်ပေါက်အား မကြာမီကာလအတွင်း အဆင့်မြင့်တင်ပြီးသွားပါက အဆိုပါနယ်စပ်ဝင်ထွက် ပေါက်သည် အနာဂါတ်တွင်ထိုင်းနှင့် မြန်မာနိုင်ငံတောင်ပိုင်းဒေသများအကြား အဓိကဝင်ထွက်ရာ ဂိတ်ပေါက်တစ်ခု ဖြစ်လာမည် ဖြစ်သည်ဟုသိရှိရကြောင်း www.bangkokpost.com အင်တာနက် websiteတွင်ဖော်ပြပါရှိပါသည်။

မှတ်ချက်။ ။ရှေးဟောင်း ဒွါရဝတီခေတ်မွန်နိုင်ငံသည် အေဒီ(၆)ရာစုမှ(၁၁)ရာစုအတွင်း ထိုင်းနိုင်ငံမြောက်ပိုင်းဒေသများတွင် စတင်ထွန်းကားခဲ့ခြင်းဖြစ်ပြီး ထိုင်းနိုင်ငံ၊ အယုဒ္ဓခေတ်ထက် နှစ်ပေါင်း(၇၀၀)ခန့်စောကာ မြန်မာနိုင်ငံ၊ ပုဂံခေတ်ထက် နှစ်ပေါင်း(၅၀၀)ခန့် စောလျင်စွာ ပေါ်ထွန်းခဲ့သည့်မြို့ပြနိုင်ငံတစ်ခုဖြစ်သည်ဟုသိရှိရပါသည်။

စီးပွားရေးအင်အားကြီးနိုင်ငံအချို့အား ချွင်းချက်ဖြင့် အီရန်ရေနံဝယ်ယူခွင့်ပြုထားခြင်းအား အဆုံးသတ်ရန် အမေရိကန်အစိုးရကစီစဉ်နေသည့်သတင်းကြောင့် ကမ္ဘာ့ရေနံဈေးနှုန်းများမှာ ၃% ခန့် မြင့်တက်လာခဲ့မှု

စီးပွားရေးအင်အားကြီးနိုင်ငံအချို့အား ချွင်းချက်ဖြင့် အီရန်ရေနံဝယ်ယူခွင့်ပြုထားခြင်းအား အဆုံးသတ်ရန် အမေရိကန်အစိုးရက စီစဉ်နေသည့်သတင်းကြောင့် ကမ္ဘာ့ရေနံဈေးနှုန်းများမှာ ၃% ခန့် မြင့်တက်လာခဲ့ကြောင်း၊ အမေရိကန်အစိုးရသည်အီရန်ရေနံများအပေါ် ၂၀၁၈ ခု နှစ်၊ နိုဝင်ဘာလ (၄)ရက်နေ့မှစ၍ အရေးယူပိတ်ဆို့မှုများ ချမှတ်ခဲ့သော်လည်း အီရန်ရေနံများကို အဓိကဝယ်ယူ လျက်ရှိသော စီးပွားရေးအင်အားကြီးနိုင်ငံအချို့ဖြစ်သည့် တရုတ်၊ အိန္ဒိယ၊ တောင်ကိုရီးယား၊ ထိုင်ဝမ်၊ တူရကီ၊ အီတလီနှင့် ဂရိစသည့် နိုင်ငံပေါင်း(၈)နိုင်ငံအား အီရန်ရေနံများကို ဆက်လက် ဝယ်ယူရန် ရက်ပေါင်း(၁၈၀)ယာယီခွင့်ပြုပေးခဲ့ကြောင်း၊ ယခုအခါ အဆိုပါ ယာယီခွင့်ပြုပေးထားသော ကာလမှာ ၂၀၁၉ ခုနှစ်၊ မေလ လဆန်းပိုင်းတွင် သက်တမ်းကုန်ဆုံးတော့မည်ဖြစ်သည့်အတွက် အမေရိကန်အစိုးရသည်အီရန်ရေနံများနှင့်ပတ်သက်၍မည်သည့်နိုင်ငံကိုမျှ ကင်းလွတ်ခွင့်ပြုတော့မည် မဟုတ်ဟူသော သတင်းထွက်ပေါ်ပြီးနောက်တွင် ကမ္ဘာ့ရေနံဈေးနှုန်းများမှာ ၃% ခန့် မြင့်တက် လာခဲ့ကြောင်း၊ ၂၀၁၉ ခုနှစ်၊ဧပြီလ(၂၂)ရက်(တနင်္လာနေ့) နံနက်ပိုင်းတွင် နယူးယောက်ဈေးကွက်၌ မေလအတွက် WTI ရေနံစိမ်းကြိုတင်ရောင်းဝယ်မှုဈေးနှုန်းမှာ ၂.၉% မြင်တက်ခဲ့ပြီး တစ်စည်လျှင် အမေရိကန်ဒေါ်လာ(၆၅.၈၇)သို့ ရောက်ရှိခဲ့ကြောင်း၊ လန်ဒန်ဈေးကွက်၌ ဘရန့်ရေနံစိမ်း ကြိုတင်ရောင်းဝယ်မှုဈေးနှုန်းမှာလည်း ၃.၃% မြင့်တက်ခဲ့ပြီး တစ်စည်လျှင် အမေရိကန်ဒေါ်လာ (၇၄.၃၁)သို့ ရောက်ရှိခဲ့ကြောင်း၊ အဆိုပါရေနံဈေးနှုန်းများသည် ၂၀၁၈ ခုနှစ်၊ အောက်တိုဘာလနောက်ပိုင်း အမြင့်ဆုံးနှုန်းထားများဖြစ်ကြောင်း www.reuters.com အင်တာနက် website တွင်ဖော်ပြပါရှိပါသည်။

မှတ်ချက်။ ။အိုပက်အဖွဲ့တွင် စတုတ္ထမြောက်ရေနံထုတ်လုပ်မှု အများဆုံးဖြစ်သော အီရန်နိုင်ငံ၏ နေ့စဉ်ရေနံထုတ်လုပ်မှုပမာဏမှာ တစ်နေ့လျှင် စည်ပေါင်း(၂.၇၅)သန်းခန့် ရှိပြီး ၂၀၁၈ ခုနှစ်၊ နိုဝင်ဘာလတွင် အမေရိကန်အစိုးရ၏ အရေးယူပိတ်ဆို့မှုကြောင့် အီရန်ရေနံများ ဈေးကွက်သို့ တင်ပို့နိုင်မှု ပမာဏမှာ တစ်နေ့လှျင်စည်ပေါင်း(၁)သန်းခန့်သာ တင်ပို့နိုင်တော့သည်ဟု သိရှိရပါသည်။

ဘင်္ဂလားဒေ့ရှ်-မြန်မာနယ်စပ်၌ စိတ်ကြွဆေးပြားသယ်ဆောင်သူများသည် စစ်ဆေးသူများကို လှည့်စားနိုင်ရန်အတွက် စိတ်ကြွဆေးပြားများကို အရောင်ပြောင်းလဲသယ်ဆောင်သည့် နည်းလမ်းများကို စတင်အသုံးပြုလာမှု

မြန်မာနယ်စပ်အနီးရှိ ကော့ဘဇားဒေသ၌ စိတ်ကြွဆေးပြား(ရာဘ)မှောင်ခိုသယ်ဆောင်သူများသည် ရဲတပ်ဖွဲ့၏ရှာဖွေစစ်ဆေးဖမ်းဆီးမှုများကို ရှောင်လွှဲနိုင်ရန်အတွက် စိတ်ကြွဆေးပြားများအား အရောင်ပြောင်းလဲကာ သယ်ဆောင်သည့်နည်းလမ်းကို စတင်ကျင့်သုံးလာကြကြောင်း၊ ၂၀၁၉ ခုနှစ်၊ ဧပြီလ(၁၂)ရက်နေ့တွင် ကော့ဘဇားရဲတပ်ဖွဲ့သည် ကော့ဘဇားရှိ ကိုလာတိုလီအရပ်၌ မိုဟာမက်ရာဂျူး အစ္စလာမ်ရာနာ(၂၆ နှစ်)ဆိုသူထံမှ စိတ်ကြွဆေးပြား(၈၀၀)ခန့်အား သိမ်းဆည်းရမိခဲ့ကြောင်း၊ အဆိုပါ ဆေးပြားများသည် ပုံမှန်မြင်တွေ့နေကြဖြစ်သော ပန်းရောင်တောက်တောက်မဟုတ်ဘဲ အရောင်ပြောင်းလဲထားသော စိတ်ကြွဆေးပြားများဖြစ်သည်ကို စတင်စစ်ဆေးတွေ့ရှိခဲ့သည့်အချိန်မှစ၍ စိတ်ကြွဆေးပြားသယ်ဆောင်သူများသည် ယခုအခါ စိတ်ကြွဆေးပြားများအား အရောင်ပြောင်းလဲကာ သယ်ဆောင်သည့်နည်းလမ်းကို စတင်ကျင့်သုံးလျက်ရှိသည်ဟု သိရှိရပါသည်။ စိတ်ကြွဆေးပြားများအား အရောင်ပြောင်းလဲရာတွင် ပုံမှန်အရောင်ဖြစ်သော ပန်းရောင်တောက်တောက်အစား အဖြူရောင်၊ အနက်ရောင်နှင့် အဝါရောင်များအဖြစ်သို့ ပြောင်းလဲထားကြပြီး အရောင်ပြောင်းထားသော စိတ်ကြွဆေးပြားများသည် မူလအရောင်ရှိသည့် ပန်းရောင်ဆေးပြားများထက် တန်ဖိုးပိုမိုကြီးမြင့်သည်ဟု သိရှိရပါသည်။ယခုအခါ ကော့ဘဇားဒေသရှိ ရဲတပ်ဖွဲ့ဝင်အချို့အပါအဝင် ဒေသခံလူအများအပြားမှာ စိတ်ကြွဆေးပြားရောင်းဝယ်ဖောက်ကားမှု၌ ပါဝင်ပတ်သက်နေသည်ဟူသော သတင်းများထွက်ပေါ်လျက်ရှိကြောင်း၊ ဘင်္ဂလားဒေ့ရှ်နယ်ခြားစောင့်တပ် တာဝန်ရှိသူများကမူ မူးယစ်မှောင်ခိုမှု၌ လုံခြုံရေးတပ်ဖွဲ့ဝင်များ ပါဝင်ပတ်သက်နေသည်ဆိုပါကလည်း ပြင်းပြင်းထန်ထန်အပြစ်ပေးအရေးယူသွားမည်ဟု ကြေညာထားကြောင်းဖော်ပြပါရှိပါသည်။