ကမ္ဘာ့ထိပ်တန်းခရစ်ပ်တိုငွေကြေး အိတ်ချိန်းဖြစ်သည့် Binance ၏ အမှုဆောင်အရာရှိချုပ်အား အမေရိကန်အစိုးရက ငွေကြေးခဝါချမှုဖြင့် တရားစွဲဆိုခဲ့ပြီးနောက် ကမ္ဘာ့ရွှေဈေးနှုန်းမှာ တစ်အောင်စ လျှင် အမေရိကန်ဒေါ်လာ (၂,၀၀၀) အထက်သို့ မြင့်တက်ခဲ့

www.investopedia.com အင်တာနက် website တွင် ဖော်ပြထားသည့် သတင်းမှာ ကမ္ဘာပေါ်၌ အကြီးမားဆုံး ခရစ်ပ်တို ငွေကြေးအိတ်ချိန်း ဖြစ်သည့် Binance ကို တည်ထောင်ခဲ့သူဖြစ်ပြီး  အမှုဆောင် အရာရှိချုပ် တာဝန်ကိုပါ ရယူထားသော ကနေဒါနိုင်ငံသား  တရုတ်နွယ်ဖွား ဘီလျံနာ ချန်ပင်ကျိုကို အမေရိကန် တရားရေး ဝန်ကြီးဌာနက ငွေကြေးခဝါချမှုများတွင် ဆက်နွယ် ပတ်သက်ခဲ့မှုဖြင့် စွဲချက်တင်ခဲ့ရာ ချန်ပင်ကျိုက ၂၀၂၃ ခုနှစ်၊ နိုဝင်ဘာလ ၂၁ ရက်တွင် အပြစ်ရှိကြောင်း ဝန်ခံခဲ့ပြီး ငွေဒဏ်အဖြစ် အမေရိကန် ဒေါ်လာ (၄)ဘီလီယံ ပေးဆောင်ရန် သဘောတူညီခဲ့သည့်အပြင် အခြားထိုက်သင့်သည့် ပြစ်ဒဏ်များ ကိုလည်း ခံယူရန်နှင့် Binance ၏ အမှုဆောင် အရာရှိချုပ်တာဝန်မှ နုတ်ထွက်ပေးရန်ကိုပါ ဝန်ခံကတိပြုခဲ့ကြောင်း၊ အမေရိကန်အာဏာပိုင်များသည် Binance နှင့်ပတ်သက်၍ အချိန်ကာလ တစ်နှစ်ကျော်ခန့် စုံစမ်းစစ်ဆေးမှုများ ပြုလုပ်ခဲ့ရာ၌ Binance ကို ကြားခံအဖြစ် အသုံးပြု၍ ငွေကြေးခဝါချမှုများ ပြုလုပ်ခဲ့သူများတွင် ကလေးသူငယ်များအပေါ် လိင်ပိုင်းဆိုင်ရာ ပြစ်မှုကျူး လွန်ခဲ့သူများ နှင့် မူးယစ်ဆေးဝါးဂိုဏ်း များသာမက  အိုင်အက်စ်၊ အယ်လ်ကိုင်ဒါ၊ ဟားမတ်စ်ကဲ့သို့သော အကြမ်းဖက် အဖွဲ့အစည်းများ အထိပါဝင်ခဲ့ကြောင်း၊ ချန်ပင်ကျို၏ ပိုင်ဆိုင်မှုအရပ်ရပ်မှာ အမေရိကန်ဒေါ်လာ (၂၃)ဘီလီယံကျော် ရှိကြောင်း၊ ၎င်းသည် ပုံမှန်အနေအထား၌ ငွေကြေးခဝါချမှုဖြင့် ထောင်ဒဏ်(၁၀) နှစ်အထိ ပြစ်ဒဏ်ကိုပါ ကျခံရဖွယ် ရှိသော်လည်း အမေရိကန်တရားရုံးမှ ပြစ်ဒဏ်မချမှတ်မီ ၎င်းက အပြစ်ရှိကြောင်း ဝန်ခံခဲ့ပြီး အာဏာပိုင်များနှင့်အတူ ပူးပေါင်းဆောင်ရွက်မှုများ ပြုလုပ်ပေးမည်ဟု ကတိပြုခဲ့သည့်အတွက် ၎င်းအား အမေရိကန်တရားရုံးက ထောင်ဒဏ်(၁၈)လသာ ချမှတ်ဖွယ်ရှိကြောင်း၊

ခရစ်ပ်တိုငွေကြေး လောက၌ အရှိန်အဝါ အကြီးမားဆုံး အိတ်ချိန်းဖြစ်သည့် Binance ၏ အမှုဆောင်အရာရှိချုပ်အား အမေရိကန် အာဏာပိုင်များက ငွေကြေးခဝါချမှုဖြင့် အရေးယူသည့်ဖြစ်စဉ် ပေါ်ပေါက်ပြီးနောက်တွင် ခရစ်တိုငွေကြေး ဈေးကွက်အတွင်း၌ ထိတ်လန့် တုန်လှုပ်မှုများဖြစ်ပေါပြီး ရင်းနှီးမြှုပ်နှံမှုများ လျော့နည်းကာ ခရစ်ပ်တိုငွေကြေး တန်ဖိုးများ ဆက်တိုက်ကျဆင်း လျက်ရှိကြောင်း၊ ၂၀၂၃ ခုနှစ်၊ နိုဝင်ဘာလ ၂၂ ရက်တွင်  လူသုံးအများဆုံး ထိပ်တန်း ခရစ်ပ်တိုငွေကြေးဖြစ်သည့် Bitcoin ၏ တန်ဖိုးမှာ (၁.၅၃%) ကျဆင်းပြီး တစ်ယူနစ်လျှင် အမေရိကန်ဒေါ်လာ( ၃၆,၅၃၃ ) ဒေါ်လာ သို့လည်းကောင်း၊ ဒုတိယအသုံးပြုမှုအများခရစ်ပ်တိုငွေကြေးဖြစ်သည့် Ethereum ၏ တန်ဖိုးမှာ (၂.၁%) ကျဆင်းပြီး တစ်ယူနစ်လျှင် အမေရိကန်ဒေါ်လာ (၁,၉၉၂.၄၃)ဒေါ်လာ သို့လည်းကောင်း အသီးသီးရောက်ရှိခဲ့ကြောင်း၊ ခရစ်ပ်တိုငွေကြေး ဈေးကွက်အတွင်း ရင်းနှီးမြှုပ်နှံသူများသည် ၎င်းတို့လက်ဝယ်ရှိ ခရစ်ပ်တိုငွေကြေးများကို ရောင်းချ၍ ရွှေအများအပြားကို ပြောင်းလဲစုဆောင်း နေခြင်းကြောင့် ကမ္ဘာ့ရွှေဈေးနှုန်းမှာ မြင့်တက်လာခဲ့ကြောင်း၊ နိုဝင်ဘာလ ၂၂ ရက်တွင် ကမ္ဘာ့ရွှေဈေးနှုန်းမှာ (၀.၁၇%) မြင့်တက်ပြီး တစ်အောင်စလျှင် အမေရိကန်ဒေါ်လာ (၂၀၀၅) ဒေါ်လာ ဝန်းကျင်သို့ရောက်ရှိခဲ့ကြောင်းဖော်ပြပါရှိပါသည်။

မှတ်ချက်။      နိုဝင်ဘာလ ၂၁ ရက်တွင် ကမ္ဘာ့ရွှေဈေးနှုန်းမှာ တစ်အောင်စလျှင် အမေရိကန်ဒေါ်လာ (၁,၉၉၂) ဒေါ်လာဝန်းကျင်၌ ဖြစ်ပေါ်ခဲ့ကြောင်း သိရှိရပါသည်။

 

Source : www.investopedia.com

အထူးစုံစမ်းစစ်ဆေးရေးဦးစီးဌာန၏ (၇၂)နှစ်မြောက် နှစ်ပတ်လည်နေ့ အထိမ်းအမှတ်အဖြစ် ပျော်ပွဲရွှင်ပွဲနှင့် အားကစားပြိုင်ပွဲများကျင်းပမှုမှတ်တမ်း

နေပြည်တော် ရုံးအမှတ်(၄၉)၊ အထူးစုံစမ်းစစ်ဆေးရေးဦးစီးဌာန၊ ဦးစီးဌာနချုပ်ရုံး၌ အထူးစုံစမ်းစစ်ဆေးရေးဦးစီးဌာန၏ (၇၂)နှစ်မြောက် နှစ်ပတ်လည်နေ့ အထိမ်းအမှတ်အဖြစ် ဆရာတော်၊ သံဃာတော်များအား ဆွမ်းဆက်ကပ်လှူဒါန်းခြင်း၊ ဝန်ထမ်းများအား တူညီဝတ်စုံများ၊ ဆန်၊ ဆီများ ထောက်ပံ့ပေးခြင်း၊ နေ့လည်စာကျွေးမွေးခြင်းနှင့် ပျော်ပွဲရွှင်ပွဲအားကစားပြိုင်ပွဲ ကျင်းပခြင်းများ ပြုလုပ်ခဲ့ပါသည်။

ပိုက်ကျော်ခြင်းအားကစားပြိုင်ပွဲကို ဦးစီးဌာနချုပ်နှင့် နေပြည်တော်အထူးစုံစမ်းစစ်ဆေးရေး ဦးစီးဌာနမှ ညွှန်ကြားရေးမှူး၊ ဒုတိယညွှန်ကြားရေးမှူးနှင့် လက်ထောက်ညွှန်ကြားရေးမှူးများ ပါဝင်သော (အကြီးတန်း)အသင်း (၆)သင်း၊ ဌာနအလိုက် (အငယ်တန်း)အသင်း (၇)သင်းတို့ ယှဉ်ပြိုင်ကစားကြခဲ့ရာ အကြီးတန်းအသင်းပြိုင်ပွဲတွင် လက်ထောက်ညွှန်ကြားရေးမှူး (၂)အသင်းက ပထမဆု၊ ညွှန်ကြားရေးမှူး(၁)အသင်းက ဒုတိယဆု၊ ညွှန်ကြားရေးမှူး(၂)အသင်းက တတိယဆုကိုလည်းကောင်း၊ (အငယ်တန်း)အသင်း ပြိုင်ပွဲတွင် စီမံခန့်ခွဲရေးနှင့်လေ့ကျင့်ရေးဌာန အသင်းက ပထမဆု၊ စုံစမ်းရေးနှင့်ငွေကြေးဆိုင်ရာဌာနအသင်းက ဒုတိယဆုနှင့် ဥပဒေနှင့် အကျိုးဆောင်ဌာနအသင်းက တတိယဆုကိုလည်းကောင်း အသီးသီးရရှိခဲ့ကြပါသည်။
အလားတူ ဦးစီးဌာနချုပ်၊ ဌာနအသီးသီးရှိ ဝန်ထမ်းများမှ စားပွဲတင်တင်းနစ် တစ်ဦးချင်း အားကစားပြိုင်ပွဲကို ဝင်ရောက်ယှဉ်ပြိုင်ကစားခဲ့ပြီး ပထမဆု၊ ဒုတိယဆုနှင့် တတိယဆု ရရှိသူများကို ဆုများချီးမြှင့်ခဲ့ပါသည်။

ထို့အပြင် အာလူးကောက်ပြိုင်ပွဲ၊ ဇကောရွက်ပြိုင်ပွဲ၊ အပ်နဖားထိုးပြိုင်ပွဲနှင့် ခေါင်းအုံးရိုက် ပြိုင်ပွဲများတွင် ဝန်ထမ်းများ ပျော်ရွှင်စွာယှဉ်ပြိုင်ကစားခဲ့ကြရာ ဆုရရှိသူများကို တာဝန်ရှိသူများမှ ဆုများ အသီးသီးပေးအပ်ချီးမြှင့်ခဲ့ပါသည်။

စံပယ်တို့ အစဉ်မွှေးပျံ့ဖို့ စုစည်းကြိုးစားစို့

 

စံပယ်ပန်းသည် မွှေးပျံ့၍ ဖြူစင်ဝင်းပကြည်လင်၏ ၊ စံပယ်ပန်းတို့၏ ဂုဏ်သတ္တိကို စံနမူထား၍ အထူးစုံစမ်းစစ်ဆေးရေးဦးစီးဌာန ဝန်ထမ်းများကို စံပယ်များဟု တင်စားသမုတ် ခဲ့ကြသည်၊ ၁၉၅၁ ခုနှစ်၊ စက်တင်ဘာလ ၁ ရက်နေ့မှ စတင်ပေါက်ဖွားခဲ့သည့် အထူးစုံစမ်း စစ်ဆေးရေးဦးစီးဌာနကြီးသည် ၂၀၂၃ ခုနှစ်၊ စက်တင်ဘာလ ၁ ရက်နေ့ဆိုလျှင် ၇၂ နှစ် မြောက် နှစ်ပတ်လည်နေ့သို့ပင် ရောက်ရှိလာပြီဖြစ်သည်။

အထူးစုံစမ်းစစ်ဆေးရေးဦးစီးဌာနသည် အထူးစုံစမ်းစစ်ဆေးမှု အုပ်ချုပ်ရေးအဖွဲ့နှင့် အထူးစုံစမ်းစစ်ဆေးရေးဦးစီးဌာနအက်ဥပဒေပါ လုပ်ပိုင်ခွင့်များအရ စီးပွားရေးဆိုင်ရာပြစ်မှုများ၊ ဝန်ထမ်းမသမာမှုများကို စုံစမ်းစစ်ဆေး အရေးယူလျက်ရှိပါသည်။ အထူးသဖြင့် နိုင်ငံတော်နှင့် အများပြည်သူကို ထိခိုက်နစ်နာစေသည့်အမှုများ၊ ငွေကြေးခဝါချမှုများ၊ ငွေကြေးဆိုင်ရာဥပဒေ များကို ဖောက်ဖျက်ကျူးလွန်သည့် အမှုများကို စုံစမ်းစစ်ဆေးလျက်ရှိပါသည်။ အထူးစုံစမ်း စစ်ဆေးရေးဦးစီးဌာနသည် နိုင်ငံတော်အတွက် ဝင်ငွေရရှိအောင် ဆောင်ရွက်ပေးနိုင်သည့် လုပ်ငန်းဌာန မဟုတ်သော်လည်း ဦးစီးဌာနသို့ တာဝန်ပေးအပ်လာသည့် အမှုများကို စုံစမ်း စစ်ဆေးရင်း ဆုံးရှုံးနေသည့်၊ ကွယ်ပျောက်နေသည့် ဘဏ္ဍာငွေများ၊ အခွန်ငွေများ ပြန်လည် ရရှိစေရေး ခေတ်အဆက်ဆက် အားသွန်ခွန်စိုက် ဆောင်ရွက်ပေးလျက်ရှိပါသည်။

နိုင်ငံတော် စီမံအုပ်ချုပ်ရေးကောင်စီလက်ထက် ၂၀၂၁ ခုနှစ်၊ ဖေဖော်ဝါရီလ ၁ ရက် နေ့မှ ၂၀၂၃ ခုနှစ် ဇူလိုင်လ ၃၁ ရက်နေ့အထိ (၂)နှစ်ကျော်ကာလအတွင်း အဓိကစုံစမ်းမှု (၆၄)မှု၊ ငွေကြေးခဝါချမှု(၃၀၈)မှုတို့ကို စုံစမ်းစစ်ဆေးခဲ့ပြီး သက်သေခံပစ္စည်းသိမ်းဆည်းရမိမှု တန်ဖိုးမှာ မြန်မာ ငွေကျပ်(၆၀.၂၆၈)ဘီလီယံနှင့် အမေရိကန်ဒေါ်လာအပါအဝင် နိုင်ငံခြားငွေ (၁၅)မျိုး ဖြစ်ပါသည်။ စုံစမ်းစစ်ဆေး ပေါ်ပေါက်ချက်များအပေါ် လိုအပ်သည့် ဥပဒေအကြံပြုချက်များ ရယူ၍ သက်ဆိုင်ရာတရားရုံးများသို့ တရားစွဲတင်ပို့ခဲ့ရာတွင် တရားရုံးများက ပြည်သူ့ဘဏ္ဍာ အဖြစ်သိမ်းဆည်းရန် အမိန့်ချမှတ်ခဲ့သည့်တန်ဖိုးမှာ မြန်မာကျပ်ငွေ(၁၄.၀၂၀) ဘီလီယံနှင့် နိုင်ငံခြားငွေများ ပါဝင်ပါသည်။

ထို့အပြင် အထူးစုံစမ်းစစ်ဆေးရေးဦးစီးဌာနက စစ်ဆေးခဲ့သည့် အမှုများအနက် အခွန်ပေးဆောင်ရန်ရှိနေကြောင်း စစ်ဆေးတွေ့ရှိရ၍ စီမံကိန်းနှင့်ဘဏ္ဍာရေးဝန်ကြီးဌာနသို့ အခွန်စည်းကြပ်နိုင်ရန် အကြောင်းကြားခဲ့သဖြင့် အခွန်စည်းကြပ်နိုင်မှုမှာ မြန်မာငွေကျပ် (၁၈.၄၂၄)ဘီလီယံနှင့် ထိုင်းဘတ်ငွေ (၁.၅)သိန်း ဖြစ်ပါသည်။ နိုင်ငံတော်စီမံအုပ်ချုပ်ရေး ကောင်စီလက်ထက်တွင် အထူးစုံစမ်းစစ်ဆေးရေးဦးစီးဌာနက စုံစမ်းစစ်ဆေးခဲ့သည့် အမှုများ မှ သက်သေခံပစ္စည်းအဖြစ် သိမ်းဆည်းနိုင်မှု၊ တရားရုံးများက ပြည်သူ့ဘဏ္ဍာသိမ်းဆည်းမှုနှင့် စီမံကိန်းနှင့် ဘဏ္ဍာရေးဝန်ကြီးဌာနမှတစ်ဆင့် အခွန်စည်းကြပ်နိုင်မှု စုစုပေါင်းတန်ဖိုးမှာ မြန်မာငွေကျပ် (၉၂.၇) ဘီလီယံကျော် ၊ ထိုင်းဘတ်ငွေ (၁.၅)သိန်းနှင့် နိုင်ငံခြားငွေ (၁၅)မျိုး ဖြစ်ပါသည်။

အထူးစုံစမ်းစစ်ဆေးရေးဦးစီးဌာနသည် သမိုင်းအစဉ်အလာ ကောင်းမွန်သည့်ဌာန ကြီး ဖြစ်သည်နှင့်အညီ ဌာနဝင်မျိုးဆက်သစ် ဝန်ထမ်းများကလည်း ဌာနကြီး၏ အစဉ်အလာ ကောင်းများကို ဆက်လက်ထိန်းသိမ်းရန် တာဝန်ရှိလာပေသည်။ မိခင် ပြည်ထဲရေးဝန်ကြီး ဌာန၊ ပြည်ထောင်စုဝန်ကြီး၊ ဒုတိယဝန်ကြီးများနှင့် ဦးစီးဌာနအကြီးအကဲများ၏ လမ်းညွှန်မှု များနှင့်အညီ လုပ်ငန်းများအောင်မြင်အောင် ဆောင်ရွက်လျက်ရှိရာ ဝန်ထမ်းများကလည်း ဇွဲ၊ လုံ့လ၊ဝီရိယစိုက်ထုတ်၍ စေတနာပါပါဖြင့် စည်းလုံးညီညွှတ်စွာ ဆောင်ရွက်ကြရန်လိုပါသည်။ တာဝန်ကျေပွန်အောင် ထမ်းဆောင်ပြီး၍ အငြိမ်းစားယူသွားကြသည့် ဝန်ထမ်းဟောင်းများ၏ ဆောင်ရွက်ချက်များအပေါ် အတုယူစံနမူနာထား၍ သာလွန်ထက်မြက်အောင် တီထွင်ကြံဆ ဆောင်ရွက်တတ်ကြရန်လိုပါသည်။ ပြောင်းလဲလာသည့် ခေတ်စနစ်အရ စစ်ဆေးရသည့် အမှုများ၊ လုပ်ငန်းများမှာ ဆန်းသစ်လာရာ နိုင်ငံတကာနှင့်ပြည်တွင်း၌ ဖြစ်ပေါ်ပြောင်းလဲ နေသည့်အခြေအနေများကို လေ့လာနေပြီး လိုအပ်သည့် နည်းပညာများကို မျက်ခြည်မပြတ် ဆည်းပူးနေကြရန်လည်း လိုအပ်မည်ဖြစ်ပါသည်။

အထူးစုံစမ်းစစ်ဆေးရေးဦးစီးဌာန ဝန်ထမ်းများသည် လုပ်ငန်းသဘောအရ အများ ပြည်သူနှင့်ထိတွေ့ဆက်ဆံရာတွင် စိတ်ထားနူးညံ့သူများ၊ ကူညီရိုင်းပင်းတတ်သူများ၊ ဆင်ခြင် တုံတရား ပြည့်ဝစွာဖြင့် ထောက်ထားညှာတာတတ်သူများဟု အသိအမှတ်ပြုမှုရရှိနိုင်ရန် ကြိုးစား ကြရပါမည်။ ဝန်ထမ်းတစ်ဦးချင်းစီ၏ ဆောင်ရွက်ချက်သည် မိမိဦးစီးဌာနအတွက် လွန်စွာ အရေးပါသည်ကို သတိမူရပေမည်။ မိမိတို့၏ ဆောင်ရွက်ချက်များအပေါ်မူတည်၍ ဦးစီးဌာနကြီး၏ ပုံရိပ်သည်လည်း ပြောင်းလဲမည်ဖြစ်ပါသည်။ စုံစမ်းစစ်ဆေးရသည့် အမှု များတွင် ပါဝင်ပတ်သက်သူများမှာ အလိုလောဘကြီးပြီး မိမိကိုယ်ကျိုးအတွက် ရယူလိုမှု ပြင်းပြသဖြင့် ပြစ်မှုကျူးလွန်သူများပါဝင်သကဲ့သို့ အချို့မှာလည်း သက်ဆိုင်မှုမရှိဘဲ ပုဂ္ဂိုလ်ရေး အာဃာတဖြင့် မလိုမုန်းထား စွပ်စွဲခံရသူများလည်း ပါဝင်လာမည်ဖြစ်ပါသည်။ အမှား/အမှန်၊ အတိမ်/အနက် ကိုကွဲလွဲအောင် ခွဲခြားသိရှိရန်မှာ ဝန်ထမ်းတစ်ဦးချင်းအလိုက် ရှိထားသင့်သည့် အရည်အချင်း ဖြစ်ပါသည်။ စုံစမ်းမှုများကို စစ်ဆေးရသည့် အမှုစစ်ဝန်ထမ်းများအနေဖြင့် ဦးစီးဌာနအကြီး အကဲများထံ ပြန်လည်တင်ပြရာတွင် အပြစ်လုပ်သူကို အပြစ်ရှိကြောင်း အထောက်အထား ပြည့်ပြည့်စုံစုံဖြင့် တင်ပြနိုင်ရမည်ဖြစ်ပြီး အပြစ်ကျူးလွန်မှုမရှိသူကို အပြစ်ရှိကြောင်း မှားယွင်းမတင်ပြမိစေရန် အထူးသတိထားရမည် ဖြစ်ပါသည်။

ဦးစီးဌာနကြီးကို လူရိုသေရှင်ရိုသေဌာနကြီး၊ အများပြည်သူက လေးစားအားထား ယုံကြည်ရသည့်ဌာနကြီး ဖြစ်စေရန်မှာ လက်ရှိတာဝန်ထမ်းဆောင်နေသည့် မျိုးဆက်သစ် ဝန်ထမ်းများပေါ်တွင်သာ မူတည်နေပါသည်၊ ဌာနဝင်ဝန်ထမ်းတစ်ဦးချင်းစီက စုစည်းညီညွှတ် စွာဖြင့် မိမိတို့ဦးစီးဌာနကြီးအပေါ် စေတနာထား လုပ်ဆောင်ကြရမည်ဖြစ်သည့်အပြင် ဦးစီး ဌာန၏ လုပ်ငန်းများအပေါ်နှင့် ဝန်ထမ်းအချင်းချင်းအပေါ်တွင် သစ္စာရှိရန်လည်း လိုအပ်ပါ သည်၊ ဝန်ထမ်းများအနေဖြင့် “သု-စိ-ပု-ဘာ-ဝိ-လိ-သိ-ဓာ အက္ခရာစွဲသုံး ဤရှစ်လုံးကို သီကုံး ပန်းသွင် နေ့တိုင်းဆင်လော့”ဟူသည့်  အင်းဝခေတ်စာဆိုတော် ရှင်မဟာရဌသာရ၏ “ သု-စိ-ပု-ဘာ” ဧကပိုဒ်လင်္ကာပါအတိုင်း  အမြဲမပြတ် ကျင့်ကြံပွားများ နေကြစေချင်ပါသည်။

သု _   သုဏေယျ    _    နာကြားရာ၏

စိ    _   စိန္တေယျ        _    ကြံစည်ရာ၏

ပု    _   ပုစ္ဆေယျ        _    မေးမြန်းရာ၏

ဘာ _ ဘာသေယျ   _     ပြောဆိုရာ၏

ဝိ    _   ဝိစာရေယျ    _     စူးစမ်းဆင်ခြင်ရာ၏

လိ _   လိက္ခေယျ     _     ရေးသားရာ၏

သိ _   သိက္ခေယျ     _      သင်ယူရာ၏

ဓာ _   ဓာရေယျ      _      နှုတ်တတ်ဆောင်ရာ၏

 

သန်းထွဋ်ဝင်း

ထိုင်းနိုင်ငံ၌ ဒုတိယအကြီးဆုံး ဘဏ်လုပ်ငန်းကြီးဖြစ်သော ကာဆီကွန်းဘဏ် (K Bank) သည် ၎င်း၏ ငွေကြေးလွှဲပြောင်းမှု စနစ်ဖြစ်သော K PLUS တွင် မြန်မာကျပ်ငွေကို ထည့်သွင်း၍ မြန်မာနိုင်ငံသို့ ကျပ်ငွေဖြင့် ငွေကြေးလွှဲပြောင်း ပေးပို့နိုင်ရန်စီစဉ်ခဲ့ကြောင်း

 

www.nationthailand.com အင်တာနက် website တွင် ဖော်ပြထားသည့် သတင်းမှာ ထိုင်း နိုင်ငံ၌ ဒုတိယအကြီးဆုံး ဘဏ်လုပ်ငန်းကြီးဖြစ်သော ကာဆီကွန်းဘဏ် (K Bank) သည် ထိုင်းနိုင်ငံရောက် မြန်မာနိုင်ငံသားများက မိခင်မြန်မာနိုင်ငံသို့ ငွေကြေးလွှဲပြောင်း ပေးပို့ရာတွင် အဆင်ပြေချောမွေ့ စေရေးအတွက် ၎င်း၏ နိုင်ငံတကာ ငွေကြေးလွှဲပြောင်းပေးပို့သည့် စနစ်ဖြစ်သော K PLUS တွင် ကျပ်ငွေဖြင့် လွှဲပြောင်းပေးပို့သည့် စနစ်ကို စတင်ထည့်သွင်းခဲ့ကြောင်း၊ K Bank သည် အဆိုပါစနစ်အား မြန်မာနိုင်ငံအခြေစိုက် ကမ္ဘောဇဘဏ် (KBZ Bank) ဘဏ်နှင့် ချိတ်ဆက် လုပ်ကိုင်ခဲ့ခြင်းဖြစ်ပြီး ထိုင်းနိုင်ငံရောက် မြန်မာနိုင်ငံသားများအနေဖြင့် K PLUS အသုံးပြုကာ မြန်မာနိုင်ငံရှိ မိသားစုဝင်များ၏ KBZPay များထံသို့ ကျပ်ငွေများအား အလွယ်တကူ လွှဲပြောင်းပေးပို့ သွားနိုင်မည်ဖြစ်ကြောင်း၊ K Bank သည် အထူးအစီအစဉ် တစ်ရပ်အနေဖြင့် ၂၀၂၃ ခုနှစ်၊ ဩဂုတ်လ(၂၂)ရက်မှ အောက်တိုဘာလ (၃၁)ရက်အထိ ကာလအတွင်း K PLUS အသုံးပြုကာ မြန်မာနိုင်ငံသို့ ကျပ်ငွေဖြင့် လွှဲပြောင်းပေးမှုများအတွက် ငွေလွှဲခကောက်ခံခြင်းကို ကင်းလွှတ်ခွင့်ပေး ထားသည်ဟု သိရှိရကြောင်း၊

K Bank ဥက္ကဌ ပီပက်ပေါင်ဖို့ရှန်နွန်ဒါ ကပြောကြားရာ၌ ယခုအခါ ထိုင်းနိုင်ငံတွင် အလုပ်လုပ် ကိုင်ပြီး နေထိုင်လျက်ရှိသည့် မြန်မာနိုင်ငံသား အရေအတွက် (၂)သန်းဝန်းကျင်ခန့်ရှိပြီး ၎င်းတို့အနေဖြင့် ရရှိသည့်လုပ်ခ လစာများအား မြန်မာနိုင်ငံသို့ ပေးပို့လျက်ရှိရာ ပျမ်းမျှအားဖြင့် မြန်မာနိုင်ငံသား(၁)ဦးသည် တစ်လလျှင် မြန်မာကျပ်ငွေ ၁၀၀,၀၀၀ ကျပ်မှ ၂၀၀,၀၀၀ ကျပ်အကြား (ထိုင်းနိုင်ငံသုံးဘတ်ငွေ ၁,၂၅၀ မှ ၂,၅၀၀ အကြား)ကို မြန်မာနိုင်ငံသို့ ပေးပို့လျက်ရှိကြောင်း၊ ထို့ကြောင့် မိမိတို့အနေဖြင့် အဆိုပါအချက်အား ထည့်သွင်းစဉ်းစားကာ မြန်မာနိုင်ငံသားများ အနေဖြင့် မြန်မာနိုင်ငံသို့ ကျပ်ငွေဖြင့် အလွယ်တကူ လွှဲပြောင်းပေးပို့ နိုင်စေရေးအတွက် မြန်မာနိုင်ငံမှ KBZ Bank နှင့် ပူးပေါင်းလုပ်ကိုင်ရန် ဆုံးဖြတ်ခဲ့ခြင်း ဖြစ်ကြောင်း၊ KBZ Bank သည် မြန်မာနိုင်ငံအတွင်း ဘဏ်အသုံးပြုသူ ဦးရေ(၁၀)သန်းဝန်းကျင်ကို ပိုင်ဆိုင်ထားသည့် ပုဂ္ဂလိကထိပ်တန်း ဘဏ်ကြီး တစ်ခုဖြစ်သည့်အပြင် မြန်မာနိုင်ငံအတွင်း ဘဏ်ခွဲပေါင်းများစွာနှင့် ATM ကွန်ရက် အများအပြားကို ပိုင်ဆိုင်ထားရုံသာမက ၎င်း၏ KBZPay စနစ်မှာ လူသုံးအများဆုံး ငွေပေးပို့သည့်စနစ် ဖြစ်သောကြောင့် KBZ Bank ဘဏ်နှင့်ပူးပေါင်း လုပ်ကိုင်ရန် ဆုံးဖြတ်ခဲ့ခြင်းဖြစ်ကြောင်း၊ K PLUS တွင် မြန်မာနိုင်ငံသားများ အသုံးပြုရ အဆင်ပြေစေရေးအတွက် မြန်မာဘာသာ စကားစနစ်ကို ထည့်သွင်းထားပြီး ဆန်းသစ်သည့် နည်းပညာများဖြင့် အသုံးပြုရ လွယ်ကူအောင် ဖန်တီးထားကြောင်း၊ K PLUS ကိုသုံးစွဲခြင်းဖြင့် ရရှိနိုင်မည့် အားသာချက်များမှာ ပေးပို့ငွေအပေါ် ကောက်ခံသည့် ငွေလွဲခသက်သာခြင်း၊ K Bank ဘဏ်ခွဲများနှင့် ကိုယ်စားလှယ် အရောင်းဆိုင် နေရာများသို့ သွားရောက်ရန်မလိုဘဲ မိမိလက်ကိုင်ဖုန်းအတွင်းရှိ K PLUS အက်ပလီကေးရှင်းမှတစ်ဆင့် အလွယ်တကူ ငွေလွှဲပေးပို့နိုင်ခြင်း၊ ပွင့်လင်းမြင်သာပြီး စံချိန်စံညွှန်း တိကျသည့် နိုင်ငံခြားငွေလဲလှယ်မှု နှုန်းထားအတိုင်း လွှဲပြောင်းနိုင်ခြင်းနှင့် အသုံးပြုသူများအနေဖြင့် ငွေလက်ခံမည့်သူအပါအဝင် ငွေပေးငွေယူပြုလုပ်ထားသည့် ငွေကြေးလွှဲပြောင်းမှုဆိုင်ရာ အသေးစိတ် အချက်အလက်များကို စစ်ဆေးနိုင်ခြင်း တို့ဖြစ်ကြောင်း၊ ထို့ပြင် မြန်မာနိုင်ငံမှ ငွေလက်ခံရယူမည့် သူများသည် K PLUS မှတစ်ဆင့်ပေးပို့လာသည့် ငွေကြေးများအား နီးစပ်ရာ KBZ Bank ဘဏ်ခွဲများ၊ ATM စက်များနှင့် KBZPay ဝန်ဆောင်မှုများအပါအဝင် မြန်မာနိုင်ငံတစ်ဝန်းရှိ KBZ Bank နှင့်ချိတ်ဆက်ထားသည့် နေရာပေါင်း (၄၀,၀၀၀)ကျော်မှနေ၍ ပေးပို့ငွေများကို ထုတ်ယူနိုင်လိမ့်မည်ဟု ပြောကြားခဲ့ကြောင်း၊

K Bank သည် K PLUS မှတစ်ဆင့် နိုင်ငံတကာ ငွေကြေးလွှဲပြောင်းပေးပို့မှု များအတွက် ဝန် ဆောင်မှု ပေးနေမှုများကို ၂၀၁၄ ခုနှစ်ကပင် စတင်လုပ်ကိုင်လာခဲ့ပြီး လက်ရှိအချိန်၌ K Bank သည် နိုင်ငံတကာငွေကြေး (၁၅)မျိုးအတွက် ဝန်ဆောင်မှုများ ပေးလျက်ရှိကာ နိုင်ငံပေါင်း(၆၂)နိုင်ငံသို့ ငွေကြေးလွှဲပြောင်း ပေးပို့မှုများပြုလုပ် လျက်ရှိကြောင်း၊ ထိုင်းနိုင်ငံသားများ အများဆုံး ပေးပို့သည့် ငွေကြေးအမျိုးအစားများမှာ အမေရိကန်ဒေါ်လာ၊ စတာလင်ပေါင်၊ ယူရို၊ စင်ကာပူဒေါ်လာ၊ ဩစတြေးလျဒေါ်လာ၊ ဟောင်ကောင်ဒေါ်လာ၊ တရုတ်နိုင်ငံသုံးယွမ်ငွေ၊ ဂျပန်နိုင်ငံသုံးယန်းငွေနှင့် တောင်ကိုရီးယားနိုင်ငံသုံး ဝမ်ငွေကြေးများဖြစ်ကြောင်း၊ K PLUS မှတစ်ဆင့်  ၂၀၂၂ ခုနှစ်အတွင်း ထိုင်းနိုင်ငံသုံး ဘတ်ငွေ(၁၄)ဘီလီယံ ပမာဏရှိ ငွေများလွဲပြောင်းပေးပို့ခဲ့ရာ အဆိုပါပမာဏသည် ၂၀၂၁ ခုနှစ်နှင့် နှိုင်းယှဉ်ပါက ၁၄၀% မြင့်တက်ခဲ့ခြင်းဖြစ်ကြောင်း၊ K Bank သည် ၂၀၂၃ ခုနှစ်အတွင်း၌လည်း K PLUS မှတစ်ဆင့် ထိုင်းနိုင်ငံသုံး ဘတ်ငွေ(၂၀)ဘီလီယံ ပမာဏရှိ ငွေများအား လွဲပြောင်း ပေးပို့နိုင်ရန် ရည်မှန်းထားပြီး ၂၀၂၄ ခုနှစ်တွင် ကမ္ဘာတစ်ဝန်းရှိ မည်သည့်နေရာသို့မဆို K PLUS ဖြင့်ငွေလွဲပြောင်းပေးပို့နိုင်ရန် ရည်မှန်းထားသည်ဟု သိရှိရကြောင်း၊

K PLUS အသုံးပြုမည့် ထိုင်းနိုင်ငံရောက် မြန်မာနိုင်ငံသားများသည် နိုင်ငံကူးလက်မှတ်(သို့) အလုပ်လုပ်ကိုင်ခွင့်ပါမစ် (သို့) မည်သူမည်ဝါ ဖြစ်ကြောင်းပြသနိုင်သည့် အထောက်အထား တစ်ခုခုတို့ ကို ပြသ၍ ထိုင်းနိုင်ငံတစ်ဝန်းရှိ K Bank ဘဏ်ခွဲများတွင် ဘဏ်စာရင်း တစ်ခုဖွင့်လှစ်ပြီးနောက်တွင် K PLUS ကိုအသုံးပြုနိုင်မည်ဖြစ်ကြောင်း ဖော်ပြပါရှိပါသည်။

 

Ref: www.nationthailand.com

တရုတ်ဗဟိုဘဏ်က ဘဏ်တိုးနှုန်းကို မမျှော်လင့်ဘဲ ရုတ်တရက် လျှော့ချခဲ့သည့်အတွက် တရုတ်နိုင်ငံသုံး ယွမ်ငွေတန်ဖိုး ကျဆင်းကာ အမေရိကန်ဒေါ်လာ တန်ဖိုးပိုမို အားကောင်း လာခဲ့ကြောင်း

www.cnbc.com အင်တာနက် website တွင် ဖော်ပြထားသည့် သတင်းမှာ လွန်ခဲ့သည့်ရက် သတ္တပတ်အတွင်း တရုတ်အစိုးရမှ ထုတ်ပြန်ခဲ့သည့် စီးပွားရေးဆိုင်ရာ စာရင်းအချက်အလက်များ၌ ၂၀၂၃ ခုနှစ်၊ ဇူလိုင်လအတွင်း တရုတ်နိုင်ငံ၏ ကုန်သွယ်မှုကဏ္ဍ၊ စက်မှုကုန်ထုတ်လုပ်မှု ကဏ္ဍ၊ ပြည်တွင်းကုန် စည်ရောင်းချမှုကဏ္ဍနှင့် အိမ်ခြံမြေကဏ္ဍတို့ အပါအဝင် စီးပွားရေးကဏ္ဍ အများစုတို့၌ တိုးတက်မှုနှုန်း ကျဆင်းသွားသည့် အခြေအနေများကို ပြသခဲ့ပြီးနောက်တွင် တရုတ်ဗဟိုဘဏ်သည် နိုင်ငံ၏စီးပွားရေး ပိုမိုအားကောင်း လာစေရန်အတွက် ဘဏ်တိုးနှုန်းအား ၂၀၂၃ ခုနှစ်၊ ဩဂုတ်လ (၁၅)ရက်တွင် ရုတ်တရက် လျှော့ချခဲ့ကြောင်း၊ တရုတ်ဗဟိုဘဏ်က ထုတ်ပြန်သည့် ကြေညာချက်၌ ဗဟိုဘဏ်အနေဖြင့် အခြားဘဏ်များနှင့် ငွေကြေးဆိုင်ရာ အဖွဲ့အစည်းများအား ထုတ်ချေးနေသည့် ကာလသက်တမ်း တစ်နှစ်ရှိ ချေးငွေများအပေါ်၌ သတ်မှတ်ထားသည့် ဘဏ်တိုးနှုန်းကို မူလသတ်မှတ်ထားသည့် ၂.၆၅% မှ ၂.၅၀% သို့ပြောင်းလဲ သတ်မှတ်ရန် ဆုံးဖြတ်ခဲ့သည်ဟု ဖော်ပြထားကြောင်း၊ တရုတ်ဗဟိုဘဏ်၏ ယခုဘဏ်တိုးနှုန်း လျှော့ချမှုသည် (၃)လတာ ကာလအတွင်း ဒုတိယအကြိမ်မြောက် လျှော့ချခြင်းဖြစ်ပြီး လာမည့် ရက်သတ္တပတ် အတွင်း၌လည်း အခြားကာလ သက်တမ်းရှိ ချေးငွေများအပေါ်၌ သတ်မှတ်ထားသည့် ဘဏ်တိုးနှုန်းများ ကိုလည်း ဆက်လက် လျှော့ချပေးဖွယ် ရှိသည်ဟူသော ခန့်မှန်းချက်များ ထွက်ပေါ်လျက်ရှိကြောင်း၊

တရုတ်ယွမ်ငွေတန်ဖိုးသည် အမေရိကန်ဒေါ်လာနှင့် နှိုင်းယှဉ်ရာ၌ တရုတ်ဗဟိုဘဏ်က ဘဏ် တိုးနှုန်း မလျှော့ချမီ ဩဂုတ်လ(၁၄)ရက်၌ အမေရိကန်(၁)ဒေါ်လာလျှင် ၇.၂၅၈၀ ယွမ် လဲလှယ်မှုနှုန်း၌ ဖြစ်ပေါ်ခဲ့သော် လည်း ဗဟိုဘဏ်က ဘဏ်တိုးနှုန်း လျှော့ချခဲ့ပြီးနောက်တွင် ဩဂုတ်လ(၁၅)ရက် တွင်မူ အမေရိကန် (၁)ဒေါ်လာလျှင် ၇.၂၈၄၂ ယွမ် လဲလှယ်မှုနှုန်းသို့ ကျဆင်းသွားခဲ့ကြောင်း၊ ယွမ်ငွေတန်ဖိုးသည် အမေရိကန်ဒေါ်လာနှင့် နှိုင်းယှဉ်ရာ၌ ၂၀၂၃ ခုနှစ်၊ နှစ်ဆန်းမှ လက်ရှိအချိန်ထိ (၈)လကျော် ကာလအတွင်း ၅% ကျဆင်းခဲ့ရာ အာရှဒေသသုံး အထင်ကရ ငွေကြေးများအနက် တန်ဖိုးအကျဆင်းဆုံး ငွေကြေးများစာရင်းတွင် ပါဝင်ခဲ့ကြောင်း၊ ယွမ်ငွေ တန်ဖိုးကျဆင်း နေချိန်တွင် အာရှဒေသအတွင်း၌ ယွမ်ငွေအစား အမေရိကန်ဒေါ်လာကို ဝယ်လိုအားများ ပြားနေသည့်အတွက် အမေရိကန် ဒေါ်လာတန်ဖိုးမှာ ပိုမိုအားကောင်း လျက်ရှိကြောင်း ဖော်ပြပါရှိပါသည်။

 

Ref: www.cnbc.com

အင်အားပြင်းထန်သော အယ်နီညို ရာသီဥတုဖြစ်စဉ် စတင်နေပြီဖြစ်သောကြောင့်
ရာသီဥတုဖောက်ပြန်မှုနှင့် စားနပ်ရိက္ခာ အကျပ်အတည်များအတွက် ပြင်ဆင်ထားကြရန်
ကုလသမဂ္ဂက သတိပေးခဲ့မှု

အယ်နီညို ရာသီဥတုဖြစ်စဉ်သည် ကမ္ဘာတစ်ဝန်း၌ စတင်ဖြစ်ပွားနေပြီ ဖြစ်သောကြောင့် ကမ္ဘာ့နိုင်ငံများ အနေဖြင့် ၂၀၂၃ ခုနှစ်၊ ဇွန်လမှ စတင်၍ ၂၀၂၄ ခုနှစ် ကုန်ပိုင်းအထိ အပူချိန် မြင့်မားသည့်ဒဏ်၊ ရာသီဥတု ဖောက်ပြန်မှုနှင့် စားနပ်ရိက္ခာ အကျပ်အတည်းများကို ကြုံတွေ့ နိုင်သည့်အတွက် ကြိုတင် ပြင်ဆင်ထားကြရန် ကုလသမဂ္ဂ လက်အောက်ခံ အဖွဲ့ဖြစ်သည့် ကမ္ဘာ့မိုးလေဝသအဖွဲ့ (WMO)က ၂၀၂၃ ခုနှစ်၊ ဇူလိုင်လ ၄ ရက်တွင် သတိပေးခဲ့ကြောင်း၊ အယ်နီညို ဖြစ်စဉ်သည် ပျှမ်းမျှအားဖြင့် (၂)နှစ်မှ (၇)နှစ် တာကာလအတွင်း တစ်ကြိမ်ဖြစ်ပွားလေ့ရှိပြီး တစ်ကြိမ်ဖြစ်ပွားပါက အနည်းဆုံး(၉)လမှ (၁၂)လ အထိ ကြာမြင့်လေ့ရှိကြောင်း၊ ကမ္ဘာပေါ်၌ အယ်နီညိုကြောင့် အပူချိန်မြင့်တက်မှု အများဆုံးဖြစ်ပွားခဲ့သည့် နှစ်မှာ ၂၀၁၆ ခုနှစ်ဖြစ်ပြီး အဆိုပါနှစ်တွင် ကမ္ဘာ့နိုင်ငံများ၌ ပုံမှန်ဖြစ်ပွားလေ့ရှိသည့် အပူချိန်ထက် (၁.၁)ဒီဂရီစင်တီဂရိတ် ပိုမိုမြင့်တက်ခဲ့ကြောင်း၊ ယခုနှစ်တွင် ဖြစ်ပွားမည့် အယ်နီညိုဖြစ်စဉ်ကြောင့် ကမ္ဘာ့နိုင်ငံများ၌ အပူချိန်မှာ ပုံမှန်အနေအထားထက် (၁.၅)ဒီဂရီစင်တီဂရိတ် မြင့်တက်ဖွယ်ရှိကြောင်း၊ အပူချိန် အမြင့်ဆုံးကာလမှာ ၂၀၂၃ ခုနှစ် ဒီဇင်ဘာလ၌ စတင်ဖွယ်ရှိပြီး ၂၀၂၄ ခုနှစ်၊ နှစ်ကုန်ပိုင်းအထိ အပူချိန် မြင့်တက်မှုဒဏ်ကို ကြုံတွေ့ရဖွယ်ရှိကြောင်း၊ ကမ္ဘာ့ကျန်းမာရေးအဖွဲ့ (WHO)ကလည်း အယ်နီညို ဖြစ်ပွားသည့် ကာလအတွင်း သွေးလွန်တုပ်ကွေးရောဂါ၊ ဇီကာရောဂါနှင့် အာဖရိက တုပ်ကွေးရောဂါများ ပြန့်နှံ့မှုနှုန်းမှာ အလွန်အမင်း မြင့်မားလေ့ရှိသောကြောင့် ရောဂါအန္တရာယ်ကို ကာကွယ်နိုင်ရန်အတွက် ပြင်ဆင်ထားကြရန် သတိပေးထားကြောင်း၊ အယ်နီညိုဖြစ်စဉ်ကြောင့် ကမ္ဘာတစ်ဝန်း၌ လယ်ယာ ထွက်ကုန်များ အထွက်နှုန်းကျဆင်းပြီး ဆန်နှင့် စားအုန်းဆီအပါအဝင် အခြေခံ စားသောက်ကုန်ဈေးနှုန်း  မြင့်တက်မှုများ ဖြစ်ပေါ်လာနိုင်သည်သာမက စက်သုံးဆီ ကဲ့သို့သော စွမ်းအင်ဈေးနှုန်းများပါ အများအပြား မြင့်တက်လာလိမ့်မည်ဟု ကုလသမဂ္ဂက သတိပေးထားကြောင်း www.bangkokpost.com တွင်ဖော်ပြ ပါရှိပါသည်။

မှတ်ချက် ။     အမေရိကန် Journal Science ၏ သုတေသနပြုချက်များအရ အယ်နီညိုကြောင့် ကမ္ဘာ့စီးပွားရေး ထိခိုက်မှုအများဆုံး နှစ်များမှာ ၁၉၈၂-၁၉၈၃ ခုနှစ်တွင် အမေရိကန်ဒေါ်လာ (၄.၁) ထရီလီယံခန့် ဆုံးရှုံးမှုနှင့် ၁၉၉၇-၁၉၉၈ ခုနှစ်တွင် အမေရိကန်ဒေါ်လာ (၅.၇) ထရီလီယံခန့် ဆုံးရှုံးမှု တို့ဖြစ်ပြီး ၂၀၂၃ ခုနှစ်တွင် ဖြစ်ပွားမည့် အယ်နီညိုဖြစ်စဉ်ကြောင့် ကမ္ဘာ့စီးပွားရေး ဆုံးရှုံးမှုပမာဏမှာ အမေရိကန်ဒေါ်လာ(၃)ထရီလီယံခန့် ရှိနိုင်သည်ဟု သိရှိရပါသည်။