၂၀၁၉ ခုနှစ်အတွင်းကမ္ဘာတစ်ဝန်းရွှေဝယ်လိုအားမှာ(၄)နှစ်တာကာလအတွင်းအမြင့်ဆုံးသို့ ရောက်ရှိဖွယ်ရှိမှု

ကမ္ဘာပေါ်၌ ရွှေဝယ်လိုအားအများဆုံးဈေးကွက်နှစ်ခုဖြစ်သော အိန္ဒိယနိုင်ငံနှင့်တရုတ်နိုင်ငံတို့၏ ဝယ်လိုအားမှာထပ်မံမြင့်တက်လာဖွယ်ရှိသောကြောင့် ၂၀၁၉ ခုနှစ်၌ ကမ္ဘာတစ်ဝန်းရွှေဝယ်လိုအားမှာ (၄) နှစ်တာကာလအတွင်းအမြင့်ဆုံးသို့ရောက်ရှိလာလိမ့်မည်ဟု လန်ဒန်အခြေစိုက်သတ္တုဈေးကွက်လေ့လာရေးသုတေသနအဖွဲ့ဖြစ်သော Metals Focus က ၂၀၁၉ ခုနှစ်၊ ဧပြီလ (၁) ရက်နေ့တွင်ထုတ်ပြန်သည့် ရွှေဈေးကွက်သုံးသပ်ချက်အစီရင်ခံစာ၌ ဖော်ပြထားကြောင်းသိရှိရပါသည်။

Metals Focus က ထုတ်ပြန်သည့် Gold Focus 2019 အစီရင်ခံစာတွင် ဖော်ပြချက်အရ ကမ္ဘာတစ်ဝန်းရွှေဝယ်လိုအားသည် ၂၀၁၈ ခုနှစ်၌စုစုပေါင်းတန်ချိန် (၄၃၆၄) တန်ခန့်ရှိခဲ့ရာမှ၂၀၁၉ ခုနှစ်၌မူ (၄၃၇၀) တန်ဝန်းကျင်အထိရောက်ရှိဖွယ်ရှိကြောင်း၊ အဆိုပါပမာဏသည် (၄) နှစ်တာကာလအတွင်း ကမ္ဘာ့ရွှေဝယ်လိုအားအများဆုံးဖြစ်ကြောင်း၊ အမေရိကန်ဗဟိုဘဏ်၏ဘဏ်တိုးနှုန်းတိုးမြှင့်ရေးအစီအစဉ်ဆိုင်းငံ့နေမှုနှင့် ကမ္ဘာတစ်ဝန်းရှိနိုင်ငံရေး၊ စီးပွားရေးအခြေအနေမတည်ငြိမ်မှုများကြောင့် ရွှေဈေးနှုန်းအားကောင်းခြင်းနှင့်အတူရွှေဝယ်လိုအားပါ လိုက်ပါမြင့်တက်လာလိမ့်မည်ဖြစ်ကြောင်း၊အထူးသဖြင့် နိုင်ငံအသီးသီးရှိဗဟိုဘဏ်များ၏ရွှေဝယ်ယူမှုစုဆောင်းမှုထက်လူပုဂ္ဂိုလ်တစ်ဦးချင်းစီ၏ ရွှေထည်လက်ဝတ်ရတနာဝယ်ယူမှုပမာဏက ပိုမိုများပြားလာနိုင်ကြောင်း၊ အိန္ဒိယနိုင်ငံ၏ ရွှေဝယ်လိုအားသည် ယခင်နှစ်နှင့်နှိုင်းယှဉ်ပါက ၇% ၊ တရုတ်နိုင်ငံ၏ ရွှေဝယ်လိုအားသည် ယခင်နှစ်နှင့်နှိုင်းယှဉ်ပါက ၃% အသီးသီးမြင့်တက်လာဖွယ်ရှိကြောင်း၊ တစ်ကမ္ဘာလုံးအတိုင်းအတာနှင့်နှိုင်းယှဉ်ပါက ရွှေကိုလက်ဝတ်ရတနာအဖြစ် အသုံးပြုရန်ဝယ်ယူမှုမှာယခင်နှစ်နှင့်နှိုင်းယှဉ်ပါက ၃% ခန့်မြင့်တက်ပြီးအနည်းဆုံးစုစုပေါင်းတန်ချိန်(၂၃၅၁)တန်အထက်၌ရှိနိုင်ကြောင်း၊ ရင်းနှီးမြှုပ်နှံမှုရည်ရွယ်ချက်သက်သက်ဖြင့် ဝယ်ယူစုဆောင်းမှုမှာမူယခင်နှစ်နှင့်နှိုင်းယှဉ်ပါကအပြောင်းအလဲကြီးကြီးမားမားမရှိနိုင်ဘဲစုစုပေါင်းတန်ချိန် (၁၀၈၂) တန်ဝန်းကျင်၌သာရှိနိုင်ကြောင်း၊ နိုင်ငံအသီးသီးရှိဗဟိုဘဏ်များ၏ ရွှေဝယ်ယူစုဆောင်းမှုမှာမူ ယခင်နှစ်နှင့်နှိုင်းယှဉ်ပါက ၉% ခန့်ကျဆင်းဖွယ်ရှိပြီး စုစုပေါင်းတန်ချိန် (၆၀၀) ဝန်းကျင်၌သာရှိလိမ့်မည်ဟုသိရှိရပါသည်။

Gold Focus 2019 အစီရင်ခံစာ၌ ကမ္ဘာ့ရွှေဈေးသည် ၂၀၁၈ ခုနှစ်အတွင်း၌ တစ်အောင်စလျှင် ပျမ်းမျှအားဖြင့် အမေရိကန်ဒေါ်လာ (၁၂၆၈) ဝန်းကျင်ခန့်၌ ဖြစ်ပေါ်ခဲ့သော်လည်း ၂၀၁၉ ခုနှစ်၌မူတစ်အောင်စလျှင် ပျမ်းမျှအားဖြင့် အမေရိကန်ဒေါ်လာ (၁၃၁၀) ဝန်းကျင်ခန့်၌ ဖြစ်ပေါ်နိုင်သောကြောင့်ယခု ၂၀၁၉ ခုနှစ်သည် ၂၀၁၃ ခုနှစ်နောက်ပိုင်း (၆) နှစ်တာကာလအတွင်း ရွှေဈေးနှုန်းအမြင့်ဆုံးနှစ်တစ်နှစ်ဖြစ်နိုင်သည်ဟုခန့်မှန်းထားကြောင်းဖြင့် www.businesstimes.com တွင်ဖော်ပြပါရှိပါသည်။

ထိုင်းတရားရုံးချုပ်၏ ထောင်ဒဏ်ချမှတ်ခြင်းခံထားရ​သောနိုင်ငံအတွင်းမှ ထွက်ပြေးတိမ်းရှောင်လျက်ရှိသည့် ဝန်ကြီးချုပ်ဟောင်း သက်ဆင်အား တော်ဝင်အဆောင်အယောင်များ ပေးအပ်ချီးမြှင့်ထားမှုကို ပြန်လည်ရုတ်သိမ်းသည့် တော်ဝင်အမိန့်ပြန်တမ်းအား ထိုင်းဘုရင် မဟာဗာဂျီယာလောင်ကွန်က ထုတ်ပြန်ကြေညာခဲ့မှု

ထိုင်းနိုင်ငံ၌ မြေယာဝယ်ယူရေးကိစ္စနှင့်ပတ်သက်၍ ထိုင်းတရားရုံးချုပ်မှ အကျင့်ပျက်ခြစားမှုအက်ဥပဒေချိုးဖောက်မှုဖြင့် ထောင်ဒဏ်ချမှတ်ခံထားရသည့်အပြင် အခြားသောစွဲချက်များနှင့်လည်းရင်ဆိုင်ရလျက်ရှိပြီး ထိုင်းနိုင်ငံအတွင်းမှထွက်ပြေးတိမ်းရှောင်လျက်ရှိသည့် ဝန်ကြီးချုပ်ဟောင်း သက်ဆင်ရှင်နာဝပ်အား တော်ဝင်အဆောင်အယောင်များ ပေးအပ်ချီးမြှင့်ထားမှုအပေါ် ပြန်လည်ရုတ်သိမ်းသည့် တော်ဝင်အမိန့် ပြန်တမ်းတစ်စောင်အား ၂၀၁၉ခုနှစ်၊ မတ်လ (၃၀) ရက်(စနေနေ့) တွင် ထိုင်းဘုရင် မဟာဗာဂျီယာလောင်ကွန်က ထုတ်ပြန်ကြေညာခဲ့သည်ဟု သိရှိရပါသည်။

အဆိုပါတော်ဝင်အမိန့်ပြန်တမ်းအား ထိုင်းနိုင်ငံ၏ ၂၀၁၈ ခုနှစ်၊ ဖွဲ့စည်းပုံအခြေခံဥပဒေပုဒ်မ (၉) နှင့် ထိုင်းဘုရင့်တော်ဝင်လုပ်ပိုင်ခွင့်အာဏာများအရ ထုတ်ပြန်ကြေညာခဲ့ခြင်းဖြစ်ပြီး နိုင်ငံရေးရာထူးရာခံရှိသူများအပေါ် ထောင်ဒဏ်ချမှတ်နိုင်သည့် ထိုင်းတရားရုံးချုပ်၏ပြစ်မှုဆိုင်ရာဌာနမှ အပြီးသတ် စီရင်ချက်အမိန့်အား ချမှတ်ခံထားရကာ အခြားသောစွဲချက်များနှင့်လည်း ရင်ဆိုင်ရလျက် ရှိသည့် ဝန်ကြီးချုပ်ဟောင်း သက်ဆင်ရှင်နာဝပ်သည် တရားရင်ဆိုင်ခြင်းမရှိဘဲ နိုင်ငံအတွင်းမှထွက်ပြေးတိမ်းရှောင်လျက်ရှိသည့်အတွက် အဆိုပါလုပ်ရပ်မှာ လုံးဝမသင့်လျော်သည့် လုပ်ရပ်တစ်ခုဖြစ်သောကြောင့် ထိုင်းဘုရင်က ဝန်ကြီးချုပ်ဟောင်းသက်ဆင်ရှင်နာဝပ်အား ပေးအပ်ချီးမြှင့်ထားသည့်တော်ဝင် အဆောင်အယောင်များအား ယခုကဲ့သို့ ပြန်လည်ရုပ်သိမ်းခဲ့ခြင်းဖြစ်ကြောင်း၊ ၂၀၀၈ခုနှစ်၊အောက်တိုဘာလ (၂၁) ရက်တွင် ရက်ချာဒါဖီဆာ့မြေယာဝယ်ယူမှုကိစ္စနှင့် ပတ်သက်၍ အမျိုးသားအကျင့်ပျက်ခြစားမှု အက်ဥပဒေချိုးဖောက်မှုဖြင့် ထိုင်းတရားရုံးချုပ်က ဝန်ကြီးချုပ်ဟောင်း သက်ဆင်ရှင်နာဝပ်အား ထောင်ဒဏ်(၂) နှစ်ကျခံစေရန် အမိန့်ချမှတ်ခဲ့ခြင်းဖြစ်ကြောင်း၊ထို့ပြင် ဝန်ကြီးချုပ်ဟောင်း သက်ဆင်သည် မြန်မာအစိုးရအားငွေကြေးချေးငှားခဲ့ခြင်းအပါအဝင် ဆက်သွယ်ရေးကဏ္ဍမှရရှိသောငွေကြေးများအား အခွန်အဖြစ်ပြောင်းလဲခဲ့မှု၊ ခရမ်ထိုင်းဘဏ်၏ချေးငွေကိစ္စနှင့် အွန်လိုင်းထီလုပ်ငန်းလုပ်ဆောင်ရန် ကြိုးပမ်းမှုအစရှိသည့် စွဲချက် (၄) ချက်နှင့် လည်းရင်ဆိုင်ရလျက် ရှိကြောင်း၊ ထို့ပြင်လွန်ခဲ့သည့်ရက်ပိုင်းအတွင်း၌လည်း ထိုင်းတပ်မတော်အကယ်ဒမီကျောင်းသားဟောင်းများဘုတ်အဖွဲ့သည် သက်ဆင်အား ပေးအပ်ချီးမြှင့်ထားသည့် ထူးချွန်ကျောင်းသားဟောင်းဆုကိုလည်း ပြန်လည်ရုပ်သိမ်းခဲ့သည်ဟု သိရှိရပါသည်။

လွန်ခဲ့သည့်ရက်သတ္တပတ်အတွင်းကျင်းပခဲ့သည့်ထိုင်းရွေးကောက်ပွဲအတွင်း အဓိကအတိုက် အခံပါတီကြီးဖြစ်သော သက်ဆင်အားထောက်ခံသည့် ပွေထိုင်းပါတီ၏ အမတ်နေရာစာရင်းရလဒ် ထွက်ပေါ်ခဲ့ပြီးနောက် ယခုကဲ့သို့ ထိုင်းဘုရင်၏ တော်ဝင်အမိန့်ပြန်တမ်း ထုတ်ပြန်ခဲ့ခြင်း ဖြစ်ကြောင်း၊ ထိုင်းနိုင်ငံ၏ဓလေ့ထုံးတမ်းအစဉ်အလာအရ ထိုင်းပြည်သူများသည် စည်းမျဉ်းခံဘုရင်စနစ်အပေါ် အကြွင်းမဲ့ယုံကြည်လေးစားရသည်ဖြစ်ရာ ထိုသို့ သက်ဆင်၏ တော်ဝင်အဆောင်အယောင်များအား လူသိရှင်ကြား ပြန်လည်ရုပ်သိမ်းခံရခြင်းသည် သက်ဆင်အပေါ်၌သာမက ၎င်းအားထောက်ခံသည့် ပွေထိုင်းပါတီအပေါ်၌လည်း ထောက်ခံသူထိုင်းပြည်သူ၏ ယုံကြည်မှုကိုပါ လျော့နည်းကျဆင်းစေနိုင် ကြောင်း www.reuters.com တွင်ဖော်ပြပါရှိပါသည်။

၂၀၁၈ ခုနှစ်၊ စတုတ္ထ(၃)လပတ်ကာလအတွင်း ကမ္ဘာတစ်ဝန်း နိုင်ငံခြားအရန်ငွေကြေးပမာဏတွင် တရုတ်ယွမ်ငွေ ပါဝင်မှုပမာဏ မြင့်တက်ခဲ့မှု

၂၀၁၈ခုနှစ်၊ စတုတ္ထ(၃) လပတ်ကာလအတွင်း ကမ္ဘာတစ်ဝန်း၌တရုတ်ယွမ်ငွေအား နိုင်ငံခြားအရန်ငွေအဖြစ်ထားရှိမှုပမာဏမှာ မြင့်တက်ခဲ့သည်ဟု နိုင်ငံတကာငွေကြေးရန်ပုံငွေအဖွဲ့က အစီရင်ခံစာထုတ်ပြန်ခဲ့ကြောင်း သိရှိရပါသည်။

၂၀၁၉ ခုနှစ်၊ မတ်လ (၂၉) ရက်(သောကြာနေ့) တွင် နိုင်ငံတကာငွေကြေးရန်ပုံငွေအဖွဲ့ (IMF) က ထုတ်ပြန်သည့် အစီရင်ခံစာ၌ ၂၀၁၈ ခုနှစ်၊ စတုတ္ထ (၃) လပတ်ကာလအတွင်း ကမ္ဘာတစ်ဝန်း၌ တရုတ် ယွမ်ငွေအား နိုင်ငံခြားအရန်ငွေအဖြစ်ထားရှိမှုပမာဏမှာ ၁.၈၉% ခန့်အထိ မြင့်တက်ခဲ့ပြီး တရုတ်ယွမ်ငွေအား နိုင်ငံခြားအရန်ငွေကြေးအဖြစ်ထားရှိမှုမှာ တန်ဖိုးပမာဏအားဖြင့် အမေရိကန်ဒေါ်လာ (၂၀၂.၇၉) ဘီလီယံခန့်သို့ ရောက်ရှိလာခဲ့ရာ ကမ္ဘာပေါ်၌ နိုင်ငံခြားအရန်ငွေကြေးအဆင့် (၅) နေရာ၌ ရပ်တည်လျက်ရှိသည်ဟု ဖော်ပြထားကြောင်း သိရှိရပါသည်။

တရုတ်ယွမ်ငွေအား နိုင်ငံခြားအရန်ငွေကြေးအဖြစ်ထားရှိမှု ယခုကဲ့သို့ မြင့်တက်လာရခြင်းမှာ ၂၀၁၆ ခုနှစ်တွင် တရုတ်ယွမ်ငွေအား နိုင်ငံတကာသုံးငွေကြေးအဖြစ် IMF က အသိအမှတ် ပြုခဲ့ပြီးနောက်ပိုင်း၌ ကမ္ဘာတစ်ဝန်းဗဟိုဘဏ်များသည် တရုတ်ယွမ်ငွေအား နိုင်ငံခြားအရန်ငွေကြေးအဖြစ် စုဆောင်းလာခြင်း၊  အမေရိကန်ဒေါ်လာအပေါ် မှီခိုအားထားမှုလျှော့ချကြခြင်းနှင့် အမေရိကန်ဒေါ်လာအသုံးပြုမှုလျှော့ချခြင်းတို့ကြောင့်ဖြစ်သည်ဟု စီးပွားရေးပညာရှင်များက သုံးသပ်ထားကြသည်ဟု သိရှိရပါသည်။

၂၀၁၈ ခုနှစ်၊ စတုတ္ထ(၃) လပတ်ကာလအတွင်း ကမ္ဘာတစ်ဝန်း နိုင်ငံခြားအရန်ငွေကြေး စုဆောင်းထားရှိမှု ပမာဏမှာ စုစုပေါင်းတန်ဖိုးအားဖြင့် အမေရိကန်ဒေါ်လာ (၁၀.၇၃) ထရီလီယံခန့် ရှိပြီး အဆိုပါပမာဏ၌ အမေရိကန်ဒေါ်လာပါဝင်မှုပမာဏမှာ ၆၁.၆၉%(ပထမ)၊ ယူရိုငွေပါဝင်မှုမှာ ၂၀.၆၉% (ဒုတိယ)၊ ဂျပန်ယန်းငွေပါဝင်မှု မှာ ၅.၂၀% (တတိယ)၊ ဗြိတိန်စတာလင်ပေါင်ပါဝင်မှုမှာ ၄.၄၃%(စတုတ္ထ) နှင့် တရုတ်ယွမ်ငွေပါဝင်မှုမှာ ၁.၈၉% (ပဉ္စမ) စသည်ဖြင့် အသီးသီးပါဝင်လျက်ရှိ သည်ဟု သိရှိရကြောင်း www.xinhuanet.com တွင်ဖော်ပြပါရှိပါသည်။

ဝန်ကြီးချုပ်ဟောင်း သက်ဆင်အားထောက်ခံသော ပွေထိုင်းပါတီသည် Future Forward ပါတီ ခေါင်းဆောင်သာနက်သွန်အား ဝန်ကြီးချုပ်လောင်းအဖြစ် အမည်စာရင်းတင်သွင်းရန်စီစဉ်လျက်ရှိမှု

ထိုင်းဝန်ကြီးချုပ်ဟောင်း သက်ဆင်ရှင်နာဝပ်အားထောက်ခံသော ပွေထိုင်းပါတီအနေဖြင့် ရွေးကောက်ပွဲအတွင်း အနိုင်ရရှိခဲ့မည်ဆိုပါက ဝန်ကြီးချုပ်အဖြစ်ခန့်အပ်နိုင်ရေးအတွက် ဝန်ကြီးချုပ်လောင်း အမည်စာရင်းတင်သွင်းရန် ကမ်းလှမ်းခဲ့သည်ဟု Future Forward ပါတီခေါင်းဆောင်လူငယ် နိုင်ငံရေး သမားဖြစ်သူ သာနက်သွန်ဂျန်ရွန်ရန်ကစ်က ယခုရက်ပိုင်းအတွင်းပြောကြားခဲ့ကြောင်း သိရှိရပါသည်။

သာနက်သွန်ဂျန်ရွန်ရန်ကစ် (အသက်၄၁နှစ်) က ယခုရက်ပိုင်း ထုတ်လွှင့်ပြသခဲ့သည့် ထိုင်းသတင်းဌာနတစ်ခုဖြစ်သည့် Thai Rath TV အစီအစဉ်မှတစ်ဆင့် ပြောကြားခဲ့ခြင်းဖြစ်ပြီး လွှတ်တော်အမတ်အဖြစ်သာ တာဝန်ထမ်းဆောင်လိုသည့် ပွေထိုင်းပါတီဥက္ကဌဖြစ်သူ ခွန်ရင်းဆူဒါ ရက်ကီရာဖန်မှ ကမ်းလှမ်းခဲ့ခြင်းဖြစ်ကာ သာနက်သွန်ဂျန်ရွန်ရန်ကစ်အနေဖြင့် ဝန်ကြီးချုပ်နေရာအားရယူလို၍ ပွေထိုင်းပါတီနှင့် ယခုကဲ့သို့ညွန့်ပေါင်းအစိုးရဖွဲ့စည်းရန် ပူးပေါင်းခဲ့ခြင်းမဟုတ်သည့်အတွက် ကမ်းလှမ်းလာမှုအပေါ် လတ်တလော၌ စဉ်းစားလျက်ရှိကြောင်း၊ အဆိုပါကမ်းလှမ်းမှုသည် ပွေထိုင်းပါတီ၏ မဲဆန္ဒနယ်အမတ်နေရာအများအပြားရရှိထားသောပဏာမရလဒ် ထွက်ပေါ်အပြီးတွင် ပွေထိုင်းပါတီမှ ယခုကဲ့သို့ကမ်းလှမ်းခဲ့ခြင်းဖြစ်ကြောင်း၊ ပွေထိုင်းပါတီသည် ဝန်ကြီးချုပ်နေရာအတွက် အရန်အဖြစ်အမည်စာရင်း (၃) ခုအားတင်သွင်းခဲ့ပြီး ထိုင်းနိုင်ငံရွေးကောက်ပွဲကော်မရှင်ထံသို့ ပေးပို့ထားသည့် ဝန်ကြီးချုပ်နေရာအတွက် အမည်စာရင်းတွင် ဒုတိယမြောက်အမည်စာရင်း၌ ပွေထိုင်းပါတီဥက္ကဌ ခွန်ရင်းဆူဒါရက်ကီရာဖန်နှင့် တတိယမြောက်အမည်စာရင်း၌ ပွေထိုင်းပါတီဝင်ချိုင်ကာဆမ်နစ်တီဆီရီတို့ဖြစ်ပြီး အခြားတစ်ဦးမှာ ပွေထိုင်းပါတီမှ ချာချတ်ဆစ်တီပွန့်အားအရန်အဖြစ် တင်သွင်းထားသည်ဟု သိရှိရပါသည်။

အလားတူပွေထိုင်းပါတီသည် ညွန့်ပေါင်းအစိုးရဖွဲ့နိုင်ရေးအတွက် Future Forward အပါအဝင် နိုင်ငံရေးပါတီ (၇) ခုတို့နှင့်ပူးပေါင်းသွားမည်ဟု ယခုရက်ပိုင်းအတွင်း ထုတ်ပြန်ကြေညာထားကြောင်း၊ လတ်တလောအခြေအနေ၌ ထိုင်းရွေးကောက်ပွဲကော်မရှင်သည် ပါတီအားအစွဲပြုသည့် ပဏာမ အမတ်ဦးရေစာရင်းအား ထုတ်ပြန်ကြေညာခြင်းမရှိသေးသော်လည်း မဲဆန္ဒနယ်အားအစွဲပြုသည့် ပဏာမအမတ်ဦးရေစာရင်း၌ ပွေထိုင်းပါတီမှ အမတ်နေရာ (၁၃၇) နေရာဖြင့် ဦးဆောင်လျက်ရှိသည်ဟု သိရှိရပါသည်။

သို့သော် ထိုင်းရွေးကောက်ပွဲကော်မရှင်သည် ဆန္ဒမဲအရေအတွက် ၁၀၀% အား ရေတွက် ပြီးစီးခဲ့ပြီး ၂၀၁၉ ခုနှစ်၊ မတ်လ (၂၈) ရက်တွင် မဲအရေအတွက်ပဏာမရလဒ်စာရင်းအား ထုတ်ပြန်ကြေညာခဲ့ရာ ပယ်လန်းပရာချာရက်ပါတီ (PPRP) မှ ဆန္ဒမဲအရေအတွက် (၈.၄) သန်းဖြင့်ဦးဆောင်ခဲ့ပြီး ပွေထိုင်းပါတီမှ (၇.၉) သန်းရရှိခဲ့ကြောင်း၊ အဆိုပါပမာဏအရ မူလဆန္ဒမဲအရေအတွက်၏ ၉၄%  အားရေတွက်ထားသည့် ရလဒ်ထက် PPRP ပါတီ၏မဲအရေအတွက်မှာ ပိုမိုများပြားခဲ့ခြင်းဖြစ်ပြီး ဆန္ဒမဲပေးသည့် မဲဆန္ဒရှင်အရေအတွက်မှာ (၃၈.၃) သန်းရှိကာ ရွေးကောက်ပွဲကော်မရှင်ထံသို့ တိုင်ကြားမှု (၁၈၆) မှုအထိရှိခဲ့ကြောင်း၊ အဆိုပါ ထိုင်းရွေးကောက်ပွဲကော်မရှင်၏ ကြေညာချက်ထွက်ပေါ်ပြီး နောက်တွင် မဲအရေအတွက်အသာစီးရရှိထားသည့် PPRP ပါတီသည် တိုင်ကြားချက်များနှင့် ပတ်သက်၍ ကြားနာမှုအခြေအနေအား စောင့်ကြည့်သွားမည်ဖြစ်ကာ အဆိုပါထုတ်ပြန်ထားသည့် အမတ်အရေအတွက်နှင့်ပတ်သက်၍ အချိန်မရွေးပြောင်းလဲသွားနိုင်သည့်အတွက် ညွန့်ပေါင်းအစိုးရ ဖွဲ့စည်းရာ၌ ပွေထိုင်းပါတီနှင့်အပြိုင် အဆောတလျင်လုပ်ဆောင်သွားမည်မဟုတ်ဟု ထုတ်ပြန်ကြေညာခဲ့ကြောင်းဖြင့် www.bangkokpost.com တွင်ဖော်ပြပါရှိပါသည်။