အင်ဒိုနီးရှားနိုင်ငံ၌ သမ္မတရွေးကောက်ပွဲရလဒ်အား ထုတ်ပြန်ပြီးနောက် ဆူပူအုံကြွမှုများ ဖြစ်ပေါ်လာပြီး အင်ဒိုနီးရှား ရူပီးယားငွေတန်ဖိုးကျဆင်းခဲ့မှု

အင်ဒိုနီးရှားနိုင်ငံ၌ ကျင်းပပြီးစီးခဲ့သည့် ရွေးကောက်ပွဲရလဒ်ကို ထုတ်ပြန်ခဲ့ရာ ဂျာကာတာမြို့ရှိ ရွေးကောက်ပွဲကြီးကြပ်ရေးအေဂျင်စီအဆောက်အဦရှေ့တွင် ဆူပူအုံကြွမှုများဖြစ်ပေါ်လာပြီး အင်ဒိုနီးရှားရူပီးယားငွေ တန်ဖိုးကျဆင်းခဲ့ကြောင်း သိရှိရပါသည်။

          အင်ဒိုနီးရှားနိုင်ငံ၌ ၂၀၁၉ခုနှစ်၊ဧပြီလ (၁၇) ရက်နေ့တွင် ကျင်းပခဲ့သည့် ရွေးကောက်ပွဲရလဒ်ကို အင်ဒိုနီးရှားနိုင်ငံရွေးကောက်ပွဲကော်မရှင်ကယခုမေလ (၂၁) ရက် (အင်္ဂါနေ့) တွင် ထုတ်ပြန်ခဲ့ရာ သမ္မတဂျိုကိုဝီဒိုဒိုသည် ထောက်ခံမဲ ၅၅.၅%  ဖြင့် ၎င်း၏ပြိုင်ဘက်ဖြစ်သူ ဗိုလ်ချုပ်ကြီးဟောင်းပရာဘိုဝိုဆူဗျန်တိုအား အနိုင်ရရှိခဲ့ကြောင်း၊ ဂျိုကိုဝီဒိုဒိုသည် ၂၀၁၄ ခုနှစ်တွင် သမ္မတအဖြစ် ရွေးချယ်တင်မြှောက်ခြင်းခံရပြီး ယခုအခါ သမ္မတဒုတိယသက်တမ်းအတွက် ဆက်လက်အနိုင်ရရှိခဲ့ခြင်းဖြစ်ကြောင်း၊ အင်ဒိုနီးရှားရွေးကောက်ပွဲကော်မရှင်သည် ရွေးကောက်ပွဲရလဒ်ကို မေလ (၂၁) ရက် (အင်္ဂါနေ့) နံနက်အစောပိုင်းတွင် ထုတ်ပြန်ကြေညာခဲ့ပြီး နောက်ယင်းနေ့မွန်းလွဲပိုင်းတွင်ရွေးကောက်ပွဲ၌ ရှုံးနိမ့်ခဲ့သည့် ဗိုလ်ချုပ်ကြီးဟောင်းပရာဘိုဝိုဆူဗျန်တိုအား ထောက်ခံသူ ထောင်ပေါင်းများစွာသည် ဂျာကာတာမြို့ရှိရွေးကောက်ပွဲကြီးကြပ်ရေးအေဂျင်စီ အဆောက်အဦရှေ့သို့ စုရုံးရောက်ရှိလာကာရွေးကောက်ပွဲ၌ မသမာမှုများရှိနေသောကြောင့် ရွေးကောက်ပွဲရလဒ်ကို ပယ်ဖျက်ပေးရန် တောင်းဆိုမှုများပြုလုပ်ခဲ့ကြကြောင်း၊ အဆိုပါ လူစုလူဝေးကြီးသည် မေလ (၂၁) ရက် (အင်္ဂါနေ့) ညပိုင်းတွင် ရွေးကောက်ပွဲကြီးကြပ်ရေးအေဂျင်စီအဆောက်အဦ၏ ရှေ့ဘက်ဝင်ပေါက်တံခါးမကြီးကို ချိုးဖျက်ကာအတွင်းသို့ ဝင်ရောက်ရန်အတင်းအဓမ္မကြိုးပမ်းခဲ့ရာမှ အင်ဒိုနီးရှားရဲတပ်ဖွဲ့နှင့် လူစုလူဝေးတို့အကြား အဓိကရုဏ်းဖြစ်ပွားခဲ့ပြီး အင်ဒိုနီးရှားရဲတပ်ဖွဲ့ကမျက်ရည်ယိုဗုံးများပစ်ခတ်၍ လူစုခွဲခဲ့ရကြောင်း၊ ပဋိပက္ခများအတွင်းလူ (၆) ဦးသေဆုံးခဲ့ပြီး လူပေါင်း (၂၀၀) ဦးခန့် ထိခိုက်ဒဏ်ရာရရှိခဲ့ကြောင်း သိရှိရပါသည်။

အင်ဒိုနီးရှားအာဏာပိုင်များသည် လက်ရှိအချိန်၌ ဂျာကာတာမြို့ပေါ်တွင် ရဲတပ်ဖွဲ့ဝင်နှင့် တပ်မတော်သား (၄၀၀၀၀) ခန့်ကိုလုံခြုံရေးအတွက် နေရာချထားကြောင်း၊၂၀၁၉ ခုနှစ်၊ မေလ (၂၂) ရက် (ဗုဒ္ဓဟူးနေ့) ညနေပိုင်းအထိ ဂျာကာတာမြို့ပေါ်ရှိ အချို့နေရာများ၌ ဆန္ဒပြပွဲများ ကြိုကြားကြိုကြားဖြစ်ပေါ်နေပြီး ဆန္ဒပြသူများ၏ မီးရှို့ဖျက်ဆီးမှုများ၊ လုံခြုံရေးတပ်ဖွဲ့များ၏ သေနတ်ပစ်ခတ်မှုများကို မြင်တွေ့နေရကြောင်း၊ ဂျာကာတာမြို့လယ်ရှိရုံးများ၊ စီးပွားရေးလုပ်ငန်းများနှင့်သံရုံးများ အားလုံးပိတ်ထားရပြီး လမ်းဆုံလမ်းခွများတွင် အဓိကရုဏ်းနှိမ်နင်းရေးရဲများက ပိတ်ဆို့ထားကြောင်း၊ ပြည်တွင်းလုံခြုံရေးဝန်ကြီးဝီရန်တိုက အစိုးရသည် သတင်းမှားများပျံ့နှံ့မည်ကိုကြိုတင်ကာကွယ်သည့်အနေဖြင့် လူမှုရေးကွန်ရက်မီဒီယာများအားလုံးကိုခေတ္တပိတ်ဆို့ထားသည်ဟုပြောကြားခဲ့ကြောင်း၊ဩစတြေးလျ၊ အမေရိကန်ပြည်ထောင်စုနှင့်ဗြိတိန်နိုင်ငံတို့သည် အင်ဒိုနီးရှားနိုင်ငံတွင် ရောက်ရှိနေသော ၎င်းတို့၏နိုင်ငံသားများအား ဆန္ဒပြပွဲများကိုရှောင်ရှားကြရန်နှင့် အကြမ်းဖက်မှုများ ပိုမိုဖြစ်ပွားလာနိုင်သည်ဟု သတိပေးချက်ထုတ်ပြန်ခဲ့ကြောင်း သိရှိရပါသည်။

အင်ဒိုနီးရှားနိုင်ငံရေးပဋိပက္ခကြောင့် ၂၀၁၉ ခုနှစ်၊ မေလ (၂၂) ရက် (ဗုဒ္ဓဟူးနေ့) နံနက်ပိုင်းတွင် အင်ဒိုနီးရှားရူပီးယားငွေတန်ဖိုးသည်အမေရိကန်ဒေါ်လာနှင့်နှိုင်းယှဉ်ပါက ၀.၂၂% ကျဆင်းပြီး အမေရိကန်တစ်ဒေါ်လာလျှင် (၁၄,၅၁၂) ရူပီးယားလဲလှယ်မှုနှုန်းသို့ရောက်ရှိခဲ့ကြောင်း www.thestar.com.my အင်တာနက် website တွင် ဖော်ပြပါရှိပါသည်။

တရုတ်နိုင်ငံမှ CNPC ကုမ္ပဏီသည် မြန်မာနိုင်ငံ၌ စက်သုံးဆီလက်လီအရောင်းဆိုင်များ ဖွင့်လှစ်သွားရန်စီစဉ်

တရုတ်နိုင်ငံပိုင် ရေနံလုပ်ငန်းကြီးဖြစ်‌သော China National Petroleum Corp (CNPC) သည် မြန်မာနိုင်ငံ၌ စက်သုံးဆီလက်လီအရောင်းဆိုင် များစွာဖွင့်လှစ်ရန် စီစဉ်လျက်ရှိသည်ဟု ကုမ္ပဏီတာဝန်ရှိသူများက ၂၀၁၉ခုနှစ်၊ မေလ (၂၀) ရက် (တနင်္လာနေ့) ၌ ပြောကြားခဲ့ကြောင်းသိရှိရပါသည်။

မြန်မာနိုင်ငံသည် စက်သုံးဆီအရောင်းဈေးကွက်အတွက် ဝယ်လိုအားကောင်းသည့် နိုင်ငံတစ်ခုအဖြစ် ရပ်တည်နေပြီး စက်သုံးဆီဝယ်လိုအားမှာ တစ်နှစ်လှှျင် ၁၀% ခန့် ပုံမှန်မြင့်တက်လျက်ရှိကြောင်း ၊မြန်မာနိုင်ငံ၌ မော်တော်ယာဉ်အသုံးပြုမှု တစ်နေ့ထက်တစ်နေ့ ပိုမိုများပြားလာချိန်တွင် ပြည်တွင်း၌ ရေနံချက်စက်ရုံလိုအပ်ချက်များ ဖြစ်ပေါ်နေခြင်းနှင့် ပြည်ပမှစက်သုံးဆီအရောင်းလုပ်ငန်းများ ဝင်ရောက်မှုနည်းပါးနေခြင်းတို့ကြောင့် CNPC အတွက် စက်သုံးဆီလက်လီအရောင်းဆိုင်များ ဖွင့်လှစ်ရန် အကောင်းဆုံးအခြေအနေဖြစ်သည်ဟု CNPC ကခန့်မှန်းထားကြောင်း၊ CNPC သည်နေပြည်တော်၊ ရန်ကုန်နှင့် မန္တလေးမြို့များ၌ စက်သုံးဆီအရောင်းဆိုင် အများအပြားကိုပြိုင်တူစတင်ဖွင့်လှစ်သွားရန် စီစဉ်ထားပြီးနောက်ပိုင်းတွင် မြန်မာနိုင်ငံရှိ မြို့အများအပြား၌ စက်သုံးဆီအရောင်းဆိုင်ရာပေါင်းများစွာ ဖွင့်လှစ်နိုင်ရန်စီစဉ်ထားကြောင်း၊ သို့သော် CNPC ၏စီမံချက်တွင် ပါဝင်သော အချိန်ကာလသတ်မှတ်ချက်အတိအကျကိုမူ ကုမ္ပဏီတာဝန်ရှိသူများက ထုတ်ဖော်ပြောကြားခြင်း မရှိသေးကြောင်း၊ CNPC သည်လက်ရှိအချိန်၌ စင်ကာပူကုမ္ပဏီဖြစ်သော SPC ၊ မြန်မာလုပ်ငန်းရှင်ပိုင်ရွှေတောင်ကုမ္ပဏီတို့နှင့် ပူးပေါင်း၍ SPC ဟူသောအမည်ဖြင့် စက်သုံးဆီအရောင်းဆိုင်တစ်ဆိုင်ကို ၂၀၁၉ခုနှစ်၊ မတ်လ၌ ရန်ကုန်မြို့တွင် ဖွင့်လှစ်ထားပြီးဖြစ်ကြောင်း၊ စင်ကာပူကုမ္ပဏီ SPC သည် CNPC ၏လုပ်ငန်းခွဲတစ်ခုဖြစ်ပြီး SPC သည် မြန်မာနိုင်ငံသို့တစ်နှစ်လျှင်ဓာတ်ဆီနှင့် ဒီဇယ်စုစုပေါင်းတန်ချိန် (၁) သန်းခန့်ပုံမှန် တင်ပို့လျက်ရှိကြောင်း သိရှိရပါသည်။

မြန်မာနိုင်ငံတွင်၂၀၀၇ခုနှစ်၌ အစိုးရကစက်သုံးဆီရောင်းချသည့် လုပ်ငန်းများအပေါ်၌ ထောက်ပံ့နေသည့်အစီအစဉ်များကို ရပ်ဆိုင်းပြီးပုဂ္ဂလိကလုပ်ငန်းရှင်များအား လုပ်ကိုင်ခွင့်ပေးခဲ့ရာ စက်သုံးဆီ အရောင်းဆိုင်အရေအတွက်သည် (၁၂) နှစ်တာကာလအတွင်း (၁၀) ဆခန့်မြင့်တက်လာခဲ့ပြီး လက်ရှိအချိန်၌ မြန်မာတစ်နိုင်ငံလုံးတွင် စက်သုံးဆီအရောင်းဆိုင်အရေအတွက် (၂၀၀၀) ကျော်ခန့်ရှိနေသည်ဟု  CNPC တာဝန်ရှိသူများက ပြောကြားခဲ့ကြောင်း သိရှိရပါသည်။

အရှေ့တောင်အာရှဒေသအတွင်း၌ စီးပွားရေးအကြံပေးလုပ်ငန်းများ ဆောင်ရွက်နေသည့် Virens and Partners ကုမ္ပဏီ၏ မြန်မာနိုင်ငံဌာနခွဲ ဒါရိုက်တာဂျဲရယ်မီမူလင်ကပြောကြားရာ၌ မြန်မာနိုင်ငံတွင် စက်သုံးဆီလက်လီအရောင်းဆိုင်များ ဖွင့်လှစ်လိုသောနိုင်ငံခြားသားလုပ်ငန်းရှင်များအတွက် အဓိကရင်ဆိုင်ရမည့်ပြဿနာများမှာ ဆိုင်ဖွင့်လှစ်မည့်မြေနေရာပိုင်ဆိုင်မှု အခက်အခဲနှင့်စက်သုံးဆီများကိုဖြန့်ဖြူးရာ၌ လုံခြုံမှုရှိသည့် ဖြန့်ဖြူးမှုစနစ်တည်ထောင်နိုင်ရေးဆိုင်ရာ အခက်အခဲများပင်ဖြစ်ကြောင်း၊ သို့သော်အဆိုပါအခက်အခဲများကိုကျော်လွှားနိုင်ပါက မြန်မာနိုင်ငံသည် စက်သုံးဆီလက်လီအရောင်းဆိုင်များ ဖွင့်လှစ်လိုသူများအတွက် အလားအလာကောင်းသောဈေးကွက်တစ်ခုဖြစ်သည်ဟု ပြောကြားခဲ့ကြောင်း သိရှိရပါသည်။

စင်ကာပူနိုင်ငံမှ Hin Leong Trading သည် မြန်မာနိုင်ငံအတွင်းသို့ ကာလရှည်ကြာစွာကတည်းက စက်သုံးဆီများ တင်သွင်းခဲ့သည့် အဓိက ကုမ္ပဏီကြီးတစ်ခုဖြစ်ကြောင်း၊ အဆိုပါကုမ္ပဏီသည် ယခုအခါမြန်မာနိုင်ငံအတွင်း၌ စက်သုံးဆီ လက်လီအရောင်းဆိုင်ဖွင့်လှစ်နိုင်ရန်အတွက် အကျိုးတူပူးပေါင်းဆောင်ရွက်နိုင်မည့် မြန်မာကုမ္ပဏီတစ်ခုအား ရှာဖွေလျက်ရှိသည်ဟု ကုမ္ပဏီပြောရေးဆိုခွင့်ရှိသူက ပြောကြားခဲ့ကြောင်း၊ အလားတူ နယ်သာလန်ကုမ္ပဏီကြီးဖြစ်သော Royal Dutch Shell နှင့်စင်ကာပူကုမ္ပဏီကြီးဖြစ်သော Puma Energy တို့သည်လည်း မြန်မာနိုင်ငံအတွင်း၌ စက်သုံးဆီအရောင်းဆိုင်များ ဖွင့်လှစ်ရန်စီစဉ်နေကြောင်း၊ Royal Dutch Shell သည် မြန်မာကုမ္ပဏီ Max Energy နှင့် အကျိုးတူပူးပေါင်းဆောင်ရွက်ရန် သုံးသပ်လျက်ရှိကြောင်း၊ Puma Energy သည် ၂၀၁၇ခုနှစ်၊ မေလကတည်းက စက်သုံးဆီ သိုလှောင်သည့်နေရာများကို တည်ဆောက်ပြီးဖြစ်ကြောင်း www.businesstimes.com  အင်တာနက် website တွင်ဖော်ပြပါရှိပါသည်။

Google နှင့် Huawei ထိပ်တိုက်ရင်ဆိုင်မှုကြောင့် ကမ္ဘာတစ်ဝန်းရှိ စမတ်ဖုန်းအသုံးပြုသူ သန်းပေါင်းများစွာမှာ အခက်အခဲများနှင့်ကြုံတွေ့နေရပြီး စတော့ရှယ်ယာတန်ဖိုးများမှာလည်း ဆက်လက်ကျဆင်းလျက်ရှိမှု

အမေရိကန်အစိုးရက တရုတ်နည်းပညာကုမ္ပဏီ Huawei အားအမည်ပျက်စာရင်း၌ ထည့်သွင်းခဲ့ပြီးနောက်တွင် အမေရိကန်ပြည်ထောင်စု၊ကယ်လီဖိုးနီးယားပြည်နယ်အခြေစိုက် ကမ္ဘာကျော်Googleသည် Huawei ဖုန်းများ၌ Googleနှင့်ဆက်စပ်နေသည့် Gmail ၊ Gmap အပါအဝင် လူသုံးများသောဝန်ဆောင်မှုများကို ရပ်ဆိုင်းခဲ့ရာ ကမ္ဘာတစ်ဝန်းရှိ စမတ်ဖုန်းသုံးစွဲသူသန်းပေါင်းများစွာမှာ အခက်အခဲများနှင့်စတင်ကြုံတွေ့နေရကြောင်း သိရှိရပါသည်။

ကမ္ဘာ့နိုင်ငံအသီးသီး၌ Huawei စမတ်ဖုန်းရောင်းချရမှု အရေအတွက်သည် ၂၀၁၇ခုနှစ်၌ (၁၅၀) သန်းခန့်ရှိခဲ့ရာမှ ၂၀၁၈ခုနှစ်၌မူ (၂၀၃) သန်းခန့်သို့မြင့်တက်ခဲ့ပြီး အမေရိကန်အစိုးရ၏ အရေးယူမှုများမတိုင်မီကာလ၂၀၁၉ခုနှစ်၊ ပထမ(၃)လတာကာလ၌ Huawei စမတ်ဖုန်းရောင်းချရမှုအရေအတွက်မှာ (၅၉) သန်းခန့်ရှိသောကြောင့် Huawei သည်အမေရိကန်ကုမ္ပဏီ Apple ကိုကျော်ဖြတ်၍ ကမ္ဘာပေါ်၌စမတ်ဖုန်း ဒုတိယအများဆုံးရောင်းချရသည့်ကုမ္ပဏီအဖြစ် ရပ်တည်နေကြောင်း၊ ကမ္ဘာပေါ်၌ စမတ်ဖုန်းအများဆုံးရောင်းချရသည့် ကုမ္ပဏီမှာ Samsung ကုမ္ပဏီဖြစ်ကြောင်းသိရှိရပါသည်။

ယခုအခါ Google နှင့် Huawei ထိပ်တိုက်ကြုံတွေ့နေမှုကြောင့်သန်းပေါင်းများစွာသော Huawei စမတ်ဖုန်းသုံးစွဲသူများမှာအခက်အခဲများကြုံတွေ့နေရကြောင်း၊ Huawei သည် iPhone အတွက် Apple ကုမ္ပဏီမှသီးခြား Operating System ထူထောင်ထားသည့်ပုံစံကို အတုယူကာကိုယ်ပိုင် Operating System ကိုထူထောင်မည်ဟု ကြေညာထားသော်လည်း အချိန်အနည်းငယ်လိုအပ်နေသေးကြောင်း၊ အလားတူကမ္ဘာတစ်ဝန်း၌ သန်းပေါင်းရာနှင့်ချီသည့် Huawei သုံးစွဲသူများသည် Google နှင့်ဆက်စပ်နေသည့် ဝန်ဆောင်မှုများကို သုံးစွဲနိုင်ကြခြင်းမရှိသောကြောင့် Google ၏ဝန်ဆောင်မှုများမှတစ်ဆင့် သတင်းအချက်အလက်များ ရယူနေသော အမေရိကန်ကုမ္ပဏီများနှင့် သတင်းအချက်အလက်ဝန်ဆောင်မှုများ ဖန်တီးပေးနေသည့် Google ကိုယ်တိုင်သည်လည်းဆုံးရှုံးမှုများနှင့်စတင်ကြုံတွေ့နေရကြောင်း၊ ထို့ပြင်Huawei ၏ ဖြစ်စဉ်ကိုနမူနာယူ၍ အခြားသောတရုတ်ကုမ္ပဏီများဖြစ်သည့် Xiaomi၊ Oppoနှင့် One Plus တို့သည် Google ကိုစွန့်ခွာ၍ ၎င်းတို့ကုမ္ပဏီတစ်ခုချင်းအလိုက် သီးခြား Operating System များထူထောင်ရန် သို့မဟုတ် Huawei နှင့်ပေါင်းစပ်၍ တရုတ်ကုမ္ပဏီများအတွက် သီးခြား Operating System ထူထောင်ရန်ကိစ္စများကို စတင်စဉ်းစားလာကြပြီဖြစ်ကြောင်း၊ Huawei ထူထောင်သူရှန်ဇန်ဖိုင်က အမေရိကန်ပြည်ထောင်စုသည် Huawei ကုမ္ပဏီ၏အင်အားကို လျှော့တွက်ခဲ့သည်ဟု ၂၀၁၉ခုနှစ်၊မေလ(၂၁) ရက်(အင်္ဂါနေ့) တွင်ပြောကြားခဲ့ကြောင်း သိရှိရပါသည်။

Huawei ကုမ္ပဏီသို့ လိုအပ်သည့် နည်းပညာသုံးပစ္စည်းအစိတ်အပိုင်းများ ရောင်းချနေသည့် အမေရိကန်ကုမ္ပဏီများမှာလည်းအရေးယူမှုဂယက်ကြောင့် အမေရိကန်ဒေါ်လာ ဘီလီယံပေါင်းများစွာ ဆုံးရှုံးနစ်နာလျက်ရှိကြောင်း၊ Huawei သို့အမေရိကန်ကုမ္ပဏီများမှထုတ်လုပ်ထားသော နည်းပညာသုံးပစ္စည်း အစိတ်အပိုင်းငယ်များ ရောင်းချရမှုပမာဏသည် ၂၀၁၈ခုနှစ်အတွင်း၌ အမေရိကန်ဒေါ်လာ(၁၁) ဘီလီယံအထိရှိခဲ့ကြောင်း၊ ထို့ကြောင့် အမေရိကန်အစိုးရသည် ၂၀၁၉ခုနှစ်၊ မေလ (၂၀) ရက် (တနင်္လာနေ့) ၌အမိန့်ကြေညာချက်ချက်ချင်းထုတ်ပြန်၍ Huawei ထံသို့ နည်းပညာသုံးပစ္စည်များ တင်သွင်းနေသည့် အမေရိကန်ကုမ္ပဏီများအနေဖြင့် ၂၀၁၉ခုနှစ်၊ဩဂုတ်လ (၁၉) ရက်နေ့အထိရက်ပေါင်း (၉၀) ခန့်နည်းပညာသုံးပစ္စည်းများ ရောင်းချနိုင်သည့် ယာယီခွင့်ပြုမိန့်ကို ထုတ်ပြန်ပေးခဲ့ကြောင်း သိရှိရပါသည်။

Huawei ပြဿနာကိုအကြောင်းပြု၍ ကမ္ဘာတစ်ဝန်း၌ စတော့ရှယ်ယာဈေးနှုန်းများမှာ ဆက်တိုက်ကျဆင်းလျက်ရှိရာ ဂျပန်၊ တောင်ကိုရီးယားအပါအဝင် အာရှ-ပစိဖိတ်ဒေသ၌ စတော့ရှယ်ယာတန်ဖိုးများမှာ ၀.၆%  အထိကျဆင်းခဲ့ပြီး (၄) လတာကာလအတွင်း အနိမ့်ဆုံးအနေအထားများသို့ ရောက်ရှိခဲ့ကြောင်း၊ အာရှစတော့ရှယ်ယာများနည်းတူ အမေရိကန်ပြည်ထောင်စု၌လည်း စတော့ရှယ်ယာတန်ဖိုးကျဆင်းမှုများကို ကြုံတွေ့နေရကြောင်း၊ အမေရိကန်အခြေစိုက် စတော့ရှယ်ယာများ၏တန်ဖိုးမှာ ၀.၆၇%  မှ၁.၄၆%  အထိကျဆင်းခဲ့ကြောင်း၊အထူးသဖြင့် IT နည်းပညာသုံးပစ္စည်းများနှင့်ပတ်သက်သည့် စတော့ရှယ်ယာများတန်ဖိုးမှာ ၄% အထိကျဆင်းပြီး (၂) လအတွင်းအနိမ့်ဆုံးအနေအထားသို့ရောက်ရှိနေကြောင်း၊ Apple ကုမ္ပဏီ၏ စတော့ရှယ်ယာများတန်ဖိုးမှာ ၃.၁% အထိကျဆင်းခဲ့ကြောင်း၊ Apple ကုမ္ပဏီမှထုတ်လုပ်သော iPhone ဈေးကွက်၏ ၁၇%  မှာတရုတ်နိုင်ငံမှဖြစ်သောကြောင့် တရုတ်အစိုးရက လက်တုံ့ပြန်အနေဖြင့် iPhone များကိုတရုတ်နိုင်ငံအတွင်း ရောင်းချခွင့်ပိတ်ပင်မည့်အပေါ် စိုးရိမ်ပူပန်မှုများကြောင့် Apple စတော့ရှယ်ယာတန်ဖိုးများ ကျဆင်းသွားခြင်းဖြစ်သည်ဟု www.nationmultimedia.com အင်တာနက် website တွင်ဖော်ပြပါရှိပါသည်။

ရေနံထုတ်လုပ်မှုကို ဆက်လက်လျှော့ချသွားရန် အိုပက်အဖွဲ့က စီစဉ်နေခြင်းနှင့် အီရန်နိုင်ငံအား အပြီးအပြတ်ချေမှုန်းရန် အမေရိကန်သမ္မတက ခြိမ်းခြောက်ခဲ့ခြင်းတို့ကြောင့် ကမ္ဘာ့ရေနံ​ဈေးနှုန်းများ ဆက်လက်မြင့်တက်ခဲ့မှု

ဆော်ဒီအာရေဗျနိုင်ငံအပါအဝင် အိုပက်အဖွဲ့ဝင်နိုင်ငံများသည် ၂၀၁၉ ခုနှစ်၊ မေလ (၁၉) ရက် (တနင်္ဂနွေနေ့) တွင် ဆော်ဒီအာရေဗျနိုင်ငံ၊ ဂျီဒတ်မြို့တွင် တွေ့ဆုံ၍ အမေရိကန် – အီရန် တင်းမာမှုပြဿနာကြောင့် ရေနံဈေးကွက်အတွင်း ဖြစ်ပေါ်လာနိုင်သည့် အခြေအနေများကိုဆွေးနွေးခဲ့ကြကြောင်း၊ အဆိုပါ အစည်းအဝေးသို့ အီရန်နိုင်ငံမှအပ အခြားရေနံထုတ်လုပ်သည့်နိုင်ငံများအားလုံး တက်ရောက်ခဲ့ကြကြောင်း၊ အစည်းအဝေးတွင် အီရန်ရေနံများအပေါ် အရေးယူပိတ်ဆို့မှုကြောင့် ဈေးကွက်အတွင်း၌ ရေနံလိုအပ်ချက်များ ဖြစ်ပေါ်လာနိုင်သော်လည်း အိုပက်အဖွဲ့ဝင်နိုင်ငံများအနေဖြင့် ရေနံထုတ်လုပ်မှုကို ၂၀၁၉ ခုနှစ် နှစ်ကုန်ပိုင်းအထိ ဆက်လက်လျှော့ချထားရန် ဆန္ဒရှိသည့်အရိပ်အယောင်များ ပြသခဲ့သည့်အတွက် အဆိုပါအစည်းအဝေးအပြီးတွင် ကမ္ဘာ့ရေနံဈေးနှုန်းများ ဆက်လက်မြင့်တက်သွားခဲ့ကြောင်းသိရှိရပါသည်။

ထို့ပြင် အမေရိကန်သမ္မတဒေါ်နယ်ထရန့်သည် ၂၀၁၉ ခုနှစ်၊ မေလ (၁၉) ရက် (တနင်္ဂနွေနေ့) ၌ပင် ၎င်း၏တွစ်တာစာမျက်နှာပေါ်၌ အီရန်နိုင်ငံအနေဖြင့် အမေရိကန်ပြည်ထောင်စု၏ အကျိုးစီးပွားကို ပျက်စီးအောင်တိုက်ခိုက်လာပါက အီရန်နိုင်ငံအား အပြီးသတ်ပျောက်ကွယ်သွားအောင် ချေမှုန်းပစ်မည်ဟု ရေးသားထားသည့်အတွက် အရှေ့အလယ်ပိုင်းဒေသ၌ စစ်ပွဲများဖြစ်ပွားလာမည့်အရေးကို ကမ္ဘာ့နိုင်ငံများက စိုးရိမ်ပူပန်နေခြင်းသည်လည်း ရေနံဈေးနှုန်းများကို မြင့်တက်စေသည့် အခြားအချက်တစ်ခုဖြစ်ကြောင်း သိရှိရပါသည်။

၂၀၁၉ ခုနှစ်၊ မေလ (၂၀) ရက် (တနင်္လာနေ့) နံနက်ပိုင်းတွင် နယူးယောက်ဈေးကွက်အတွင်း WTI  ရေနံစိမ်းကြိုတင်ရောင်းဝယ်မှုဈေးနှုန်းများမှာ ၁.၇% မြင့်တက်ပြီး တစ်စည်လျှင် အမေရိကန်ဒေါ်လာ (၆၃.၈၁) သို့ရောက်ရှိခဲ့ကြောင်း၊ လန်ဒန်ဈေးကွက်၌ ဘရန့်ရေနံစိမ်းဈေးနှုန်းမှာလည်း ၁.၇% မြင့်တက်ပြီး တစ်စည်လျှင် အမေရိကန်ဒေါ်လာ (၇၃.၁၆) သို့ ရောက်ရှိခဲ့ကြောင်း၊ လွန်ခဲ့သည့်           ရက်သတ္တပတ်အတွင်း၌ WTI ရေနံဈေးနှုန်းမှာ ၁.၈% မြင့်တက်ခဲ့ပြီး ဘရန့်ရေနံဈေးနှုန်းမှာ ၂.၃% မြင့်တက်ခဲ့ကြောင်း www.bloomberg.com အင်တာနက် website တွင် ဖော်ပြပါရှိပါသည်။

မှတ်ချက်။   ။ အီရန်နိုင်ငံ၏ ပြည်ပသို့ရေနံတင်ပို့မှုပမာဏသည် အမေရိကန်ပြည်ထောင်စု၏ အရေးယူပိတ်ဆို့မှုများ မစတင်မီက တစ်နေ့လျှင် စည်ပေါင်း (၂.၅) သန်းခန့်ရှိခဲ့သော်လည်း အရေးယူပိတ်ဆို့မှုများပြုလုပ်မည်ဟု အမေရိကန်ပြည်ထောင်စုကကြေညာခဲ့ပြီးနောက် ၂၀၁၉ ခုနှစ်၊ ဧပြီလအတွင်း၌ တစ်နေ့လျှင်စည်ပေါင်း (၁.၄) သန်းသို့လည်းကောင်း၊ အရေးယူပိတ်ဆို့မှုများ စတင်ပြုလုပ်သည့် ၂၀၁၉ ခုနှစ်၊ မေလလဆန်းပိုင်းမှစ၍ တစ်နေ့လျှင်စည်ပေါင်း (၅) သိန်းခန့်သို့လည်းကောင်း အသီးသီးကျဆင်းခဲ့ကြောင်း သိရှိရပါသည်။

ဥရောပသမဂ္ဂရွေးကောက်ပွဲဂယက်ကြောင့် အမေရိကန်ဒေါ်လာတန်ဖိုး ဆက်တိုက်မြင့်တက်လာသည့်အတွက်  ကမ္ဘာ့ရွှေဈေးနှုန်းမှာရက်သတ္တပတ် (၂) ပတ်အတွင်း အနိမ့်ဆုံးသို့ ကျဆင်းခဲ့မှု

ဥရောပသမဂ္ဂပါလီမန်ရွေးကောက်ပွဲကို ၂၀၁၉ ခုနှစ်၊ မေလ (၂၃) ရက်နေ့မှ (၂၆) ရက်နေ့အထိ ကျင်းပမည်ဖြစ်ရာ အဆိုပါရွေးကောက်ပွဲအပြီးတွင် ဥရောပသမဂ္ဂဗဟိုဘဏ်ဥက္ကဋ္ဌနေရာကို ပြောင်းလဲခန့်အပ်ခြင်း၊ ယူရိုငွေနှင့်ပတ်သက်သည့် ငွေကြေးမူဝါဒများကို ဖြေလျှော့ဖွယ်ရှိခြင်းတို့ကြောင့် ငွေကြေးဈေးကွက်အတွင်း၌ ယူရိုငွေတန်ဖိုးကျဆင်းပြီး ယူရိုအစားအမေရိကန်ဒေါ်လာကို စုဆောင်းသူများပြားလာသည့်အတွက် အမေရိကန်ဒေါ်လာတန်ဖိုး ဆက်တိုက်မြင့်တက်လျက်ရှိကြောင်း သိရှိရပါသည်။

ထို့ပြင် အမေရိကန်ပြည်ထောင်စုရှိ ဩဇာကြီးမားသော မီချီဂန်တက္ကသိုလ်က ၂၀၁၉ ခုနှစ်၊ မေလ (၁၇) ရက် (သောကြာနေ့) တွင် ထုတ်ပြန်သည့် အမေရိကန်ပြည်ထောင်စု၏ စီးပွားရေးစာရင်းအချက်အလက်များ အသေးစိတ်အစီရင်ခံစာ၌ အမေရိကန်၏စီးပွားရေးအခြေအနေမှာ လက်ရှိအချိန်၌ အားကောင်းနေကြောင်း ဖော်ပြထားခြင်းသည်လည်း အမေရိကန်ဒေါ်လာတန်ဖိုးကို မြင့်တက်စေသည့် အခြားအချက်အလက်တစ်ခုဖြစ်ကြောင်း သိရှိရပါသည်။

၂၀၁၉ ခုနှစ်၊ မေလ(၁၈) ရက် (စနေနေ့) တွင် အမေရိကန်ဒေါ်လာတန်ဖိုးမှာ ၀.၁၂% မြင့်တက်ခဲ့ပြီးရက်သတ္တပတ် (၂) ပတ်အတွင်းအမြင့်ဆုံးအနေအထားသို့ ရောက်ရှိခဲ့ကြောင်း၊ အမေရိကန်ဒေါ်လာတန်ဖိုး ဆက်တိုက်မြင့်တက်နေသည့်အတွက် ရွှေအစားအမေရိကန်ဒေါ်လာဈေးကွက်သို့ ပြောင်းလဲရင်းနှီးမြှုပ်နှံမှု များပြားလာသောကြောင့် ကမ္ဘာ့ရွှေဈေးနှုန်းမှာ ၀.၈၂% ကျဆင်းပြီးတစ်အောင်စလျှင် အမေရိကန်ဒေါ်လာ (၁၂၇၅.၇၀) သို့ရောက်ရှိခဲ့ကြောင်း၊ အဆိုပါဈေးနှုန်းသည် ရက်သတ္တပတ် (၂) ပတ်အတွင်း အနိမ့်ဆုံးဈေးနှုန်းဖြစ်ကြောင်း www.reuters.com အင်တာနက် website တွင်ဖော်ပြပါရှိပါသည်။