အမေရိကန်သမ္မတ ဒေါ်နယ်ထရန့်မှ ယာယီအသုံးစရိတ်ဥပဒေမူကြမ်းကိုအတည်ပြု လက်ခံခဲ့ပြီး နောက် ကာလကြာရှည်စွာဖြစ်ပေါ်လျက်ရှိသော အစိုးရယန္တရားများတစ်စိတ်တစ်ပိုင်းရပ်တန့်မှုမှာ ယာယီအဆုံးသတ်သွားခဲ့မှု

အမေရိကန်ပြည်ထောင်စု၌ဖြစ်ပေါ်နေသော အစိုးရယန္တရားများတစ်စိတ်တစ်ပိုင်းရပ်တန့်မှု (partial government shutdown) သက်တမ်းမှာ စံချိန်တင်ကာလ ကြာရှည်စွာဖြစ်ပေါ်နေမှုများကို အဆုံးသတ်နိုင်ရေးအတွက် ရက်သတ္တပတ်(၃)ပတ်တာကာလအတွက် ယာယီအသုံးစရိတ် ဥပဒေမူကြမ်းကို အမေရိကန်အောက်လွှတ်တော်တွင် ကန့်ကွက်မဲမရှိအတည်ပြုခဲ့ပြီးနောက် အဆိုပါဥပဒေမူကြမ်းကို အမေရိကန်သမ္မတဒေါ်နယ်ထရန့်က သဘောတူလက်ခံခဲ့ကာ ရပ်နားထားသည့် အမေရိကန်အစိုးရယန္တရားများကို (၃)ပတ်ကြာ ပြန်လည် ဖွင့်လှစ်ပေးသွားမည်ဟု ဒေါ်နယ်ထရန့်က ၂၀၁၉ ခုနှစ်၊ ဇန်နဝါရီလ(၂၅)ရက်(သောကြာနေ့) တွင် ထုတ်ပြန်ကြေညာခဲ့ကြောင်း သိရှိရပါသည်။

၂၀၁၉ ခုနှစ်၊ ဇန်နဝါရီလ(၂၅)ရက် (သောကြာနေ့)တွင် အစိုးရယန္တရားများ တစ်စိတ်တစ်ပိုင်း ရပ်တန့်မှုသည် (၃၅) ရက်ကြာမြင့်ခဲ့ပြီဖြစ်ပြီး အစိုးရဝန်ထမ်း(၈)သိန်းကျော်တို့အတွက် လစာမဲ့ အလုပ်လုပ်ကိုင်နေရမှုများကို အဆုံးသတ်နိုင်ရေးအတွက် ရပ်နားထားသည့်      အမေရိကန်အစိုးရ ယန္တရားများကိုလာမည့် ဖေဖော်ဝါရီလ(၁၅) ရက်အထိ ရက်သတ္တပတ်(၃)ပတ်ကြာ ပြန်လည်ဖွင့်လှစ်ပေးသွားမည်ဖြစ်ကြောင်း၊ သမ္မတဒေါ်နယ်ထရန့်သည် အစိုးရယန္တရားများ ရပ်တန့်မှု(၃၅)ရက် ပြည့်မြောက်ခဲ့သည့် ဇန်နဝါရီလ(၂၅)ရက် (သောကြာနေ့) မွန်းလွဲပိုင်းတွင် သမ္မတအိမ်ဖြူတော်ရှိ Rose Garden ဥယျာဉ်၌ မိန့်ခွန်းပြောကြားခဲ့ပြီး ယင်းနေ့ညနေပိုင်းတွင် လွှတ်တော်မှတင်ပြသည့် ဘဏ္ဍာငွေသုံးစွဲရေး အစီအစဉ်အား သဘောတူလက်မှတ်ရေးထိုးပေးခဲ့ခြင်းဖြစ်ကြောင်း၊ ထို့ကြောင့် အမေရိကန်အစိုးရဝန်ထမ်းများအတွက် အလုပ်ရပ်နားရခြင်းကိုဖြစ်စေခဲ့ပြီး နိုင်ငံအတွက် စီးပွားရေး နှေးကွေးမှုကိုဖြစ်စေခဲ့သော  အမေရိကန်ပြည်ထောင်စု၏ သက်တမ်းအကြာရင့်ဆုံးအဖြစ် စံချိန်တင် ဖြစ်ပေါ်လျက်ရှိသည့် အစိုးရယန္တရားများရပ်တန့်မှုဖြစ်စဉ်မှာ ယာယီအဆုံးသတ်သွားခဲ့ကြောင်း၊ သို့ဖြစ်ရာ အစိုးရယန္တရားများရပ်တန့်မှုကြောင့် လည်ပတ်မှုရပ်ဆိုင်းခဲ့ရသည့်  အစိုးရဝန်ကြီးဌာန (၉)ခုသည် ၂၀၁၉ခုနှစ်၊ ဖေဖော်ဝါရီလ(၁၅)ရက်အထိ လုပ်ငန်းများပြန်လည် လုပ်ကိုင်သွားမည် ဖြစ်ပြီး အဆိုပါကာလအတွင်း၌ နယ်စပ်တံတိုင်းကိစ္စနှင့်ပတ်သက်၍ အမေရိကန်ကွန်ဂရက်လွှတ်တော်၌ ဆွေးနွေးညှိနှိုင်းမှုများ ပြန်လည်လုပ်ဆောင်သွားမည်ဖြစ်သည့်အပြင် လွှတ်တော်(၂)ရပ် ပါဝင်သောကော်မတီ တစ်ခုဖွဲ့စည်းကာ အမေရိကန်-မက္ကဆီကိုနယ်စပ်လုံခြုံရေးကိစ္စအား လေ့လာသုံးသပ်မှုများ လုပ်ဆောင် သွားမည်ဖြစ်သည်ဟုသိရှိရပါသည်။

အဆိုပါ ယာယီအသုံးစရိတ်ဥပဒေမူကြမ်းတွင် အမေရိကန်သမ္မတဒေါ်နယ်ထရန့် တောင်းခံထားသည့် နယ်စပ်တံတိုင်းတည်ဆောက်ရေးရန်ပုံငွေ အမေရိကန်ဒေါ်လာ (၅.၇) ဘီလီယံ ပေးအပ်ရေး ကိစ္စရပ်ပါဝင်ခြင်းမရှိကြောင်း၊ အကယ်၍သမ္မတဒေါ်နယ်ထရန့် တောင်းဆိုထားသည့် နယ်စပ်တံတိုင်းကိစ္စလိုက်လျောသဘောတူညီခြင်းမရှိပါက အစိုးရယန္တရားများပြန်လည် ဖွင့်လှစ်ခဲ့သည့် (၃) ပတ်ကြာ ကာလပြီးမြောက်သည့် ဖေဖော်ဝါရီလ (၁၅) ရက်တွင်  အမေရိကန်သမ္မတ ဒေါ်နယ်ထရန့် အနေဖြင့် အစိုးရယန္တရားများရပ်တန့်မှုများကို ပြန်လည်စတင်ခြင်း(သို့မဟုတ်) သမ္မတ၏ လုပ်ပိုင်ခွင့် အာဏာအရ အရေးပေါ်အခြေအနေကြေညာကာ အမေရိကန်တပ်မတော်အသုံးစရိတ်များမှတစ်ဆင့် တံတိုင်းတည်ဆောက်ရန် အမိန့်ပေးသွားမည်ဟု သမ္မတဒေါ်နယ်ထရန့်က သတိပေးပြောကြားထားကြောင်း၊ အစိုးရယန္တရားများ ယာယီပြန်ဖွင့်ရန်အတွက် သမ္မတဒေါ်နယ်ထရန့်က ယခုကဲ့သို့ ခွင့်ပြုလိုက်လျောခဲ့ခြင်းသည် အတိုက်အခံဒီမိုကရက်ပါတီအောက်လွှတ်တော်ဥက္ကဋ္ဌနန်စီပီလိုစီ၏ အောင်ပွဲတစ်ခုဖြစ်သည်ဟု လွှတ်တော်အမတ်များကသုံးသပ်လျက်ရှိကြကြောင်း သိရှိရပါသည်။

အမေရိကန်ပြည်ထောင်စု၏ အစိုးရယန္တရားများတစ်စိတ်တစ်ပိုင်းရပ်တန့်ခဲ့မှုများကြောင့် အမေရိကန်ပြည်ထောင်စုတွင် စီးပွားရေးအရ ထိခိုက်နစ်နာဆုံးရှုံးမှုများဖြစ်ပေါ်ခဲ့ပြီး အမေရိကန် ပြည်ထောင်စု၏ အခြားသောစီးပွားရေးလုပ်ငန်းများအပြင် အလုပ်မှရပ်နားထားခဲ့ရသည့် ဝန်ထမ်းများမှတစ်ဆင့် ဆုံးရှုံးသွားသော ကုန်ထုတ်စွမ်းအားများကြောင့် အမေရိကန်ပြည်ထောင်စု၏ စီးပွားရေးကဏ္ဍတွင် အမေရိကန်ဒေါ်လာ(၆)ဘီလီယံဖိုးခန့် ဆုံးရှုံးနစ်နာခဲ့ရသည်ဟု အမေရိကန် ပြည်ထောင်စု ဘဏ္ဍာရေးဝန်ဆောင်မှုကုမ္ပဏီကြီးဖြစ် သည့် S&P Global Ratings ကထုတ်ပြန် ကြေညာခဲ့သည်ဟု သိရှိရပါသည်။

ရည်ညွှန်း www.channelnewsasia.com

အထူးစုံစမ်းစစ်ဆေးရေးဦးစီးဌာန ဝန်ထမ်းဟောင်းများအသင်း သက်ကြီးပူဇော်ပွဲနှင့် သင်းလုံးကျွတ်အစည်းအဝေးကျင်းပ

အထူးစုံစမ်းစစ်ဆေးရေးဦးစီးဌာန ဝန်ထမ်းဟောင်းများအသင်း(၁၉)ကြိမ်မြောက် သက်ကြီးပူဇော်ပွဲနှင့် နှစ်ပတ်လည်သင်းလုံးကျွတ်အစည်းအဝေးကို ဇန်နဝါရီလ(၂၀)ရက် နံနက် ၁၀ နာရီက ရန်ကုန်တိုင်းဒေသကြီး၊ ဗဟန်းမြို့နယ်ရှိ ဇီဝိတဒါနသံဃာ့ဆေးရုံကြီး အလှူတော်မင်္ဂလာခန်းမ၌ ကျင်းပခဲ့သည်၊ အဆိုပါအခမ်းအနားတွင် အသင်းဥက္ကဌ ဦးမောင်မောင်က အဖွင့်အမှာစကား ပြောကြားပြီး တာဝန်ရှိပုဂ္ဂိုလ်များက အသင်းရှေ့လုပ်ငန်းစဉ်၊ နှစ်ပတ်လည်သင်းလုံးကျွတ်အစီရင်ခံစာ နှင့် ဘဏ္ဍာရေးရှင်းတမ်းတို့ကို ရှင်းလင်းအတည်ပြုချက်ရယူခဲ့ကြသည်၊ ထို့နောက်အသက်(၇၅)နှစ် နှင့်အထက် ဝန်ထမ်းဟောင်း (၄၇)ဦးတို့အား ကန်တော့ခဲ့ကြပြီး လှူဒါန်းငွေများနှင့် လှူဖွယ်ပစ္စည်းများကို လက်ရောက်ပေးအပ်ခဲ့ကြပါသည်။

မြန်မာနိုင်ငံအတွင်းဖြစ်ပေါ်လျက်ရှိသော ပြည်တွင်းရေးအခြေအနေများကြောင့် မွတ်စလင်ဒုက္ခသည် ပြဿနာဖြေ ရှင်းရေးအတွက်ပိုမိုဆိုးရွားစေပြီး အမေရိကန်အစိုးရအနေဖြင့် ကူညီဖြေရှင်းပေးရန် ဘင်္ဂလားဒေ့ရှ် နိုင်ငံခြားရေးအတွင်းဝန်ကတောင်းဆိုခဲ့မှု

မြန်မာနိုင်ငံ၊ ရခိုင်ပြည်နယ်အတွင်းဖြစ်ပေါ်နေသည့် ပြည်တွင်းရေးအခြေအနေ ရှုပ်ထွေးနေမှုများ ကြောင့် မွတ်စလင်ဒုက္ခသည်ပြဿနာဖြေရှင်းနိုင်ရေးအပေါ်ပိုမိုဆိုးရွားစေပြီး အမေရိကန်အစိုးရအနေဖြင့် မွတ်စလင်ဒုက္ခသည်အရေးဖြေရှင်းနိုင်ရေးအတွက် ကူညီထောက်ပံ့မှုများ ပြုလုပ်ပေးရန် အမေရိကန်ပြည်ထောင်စု၊ ဝါရှင်တန်ဒီစီသို့ရောက်ရှိနေသည့် ဘင်္ဂလားဒေ့ရှ်နိုင်ငံခြားရေးအတွင်းဝန် ရှာဟီဒူဟိတ်က ပြောကြားခဲ့သည်ဟု သိရှိရပါသည်။

ဘင်္ဂလားဒေ့ရှ်နိုင်ငံခြားရေးအတွင်းဝန်သည် အမေရိကန်ပြည်ထောင်စု၊ ဝါရှင်တန်ဒီစီတွင် အမေရိ ကန်ပြည်ထောင်စုနိုင်ငံတကာဖွံ့ဖြိုးရေးအဖွဲ့ (USAID)အုပ်ချုပ်ရေးမှူး မက်ခ်ဂရင်းနှင့် အမေရိကန်နိုင်ငံ ခြားရေးဝန်ကြီးဌာန၊ မူဝါဒရေးရာသံအမတ်ကြီး ဒေးဗစ်ဟာလေတို့နှင့်တွေ့ဆုံခဲ့ပြီး ထိုသို့တွေ့ဆုံစဉ် ဘင်္ဂလား ဒေ့ရှ်နိုင်ငံရှိ မွတ်စလင်ဒုက္ခသည်များနေရပ်ပြန်ရေးကိစ္စနှင့်ပတ်သက်၍ မြန်မာနိုင်ငံအတွင်းရှိ ၎င်းတို့နေရပ် ဒေသများသို့ လုံခြုံစိတ်ချစွာပြန်နိုင်ရေးသည် မြန်မာအစိုးရထံ၌ သာတာဝန်ရှိပြီး ကောင်းမွန်သောပတ် ဝန်းကျင် အခြေအနေများဖန်တီးပေးနိုင်ရေးအတွက် မြန်မာအာဏာပိုင်များမှ တာဝန်ယူလုပ်ဆောင် ပေးရမည်ဖြစ်သည်ဟု ပြောကြားခဲ့ကြောင်း၊ သို့သော် ယခုအခါမြန်မာနိုင်ငံ၊ ရခိုင်ပြည်နယ်အတွင်း ဖြစ်ပေါ် လျက်ရှိသော အခြေအနေများကြောင့် မွတ်စလင် ဒုက္ခသည်ပြဿနာဖြေရှင်းရေးနှင့်ပတ်သက်၍ ပိုမိုဆိုးရွား လာသည့်အတွက် အမေရိကန်ပြည်ထောင်စုအနေဖြင့် ဝိုင်းဝန်းကူညီဖြေရှင်းပေးရန် တောင်းဆိုခဲ့သည်ဟုသိရှိ ရကြောင်း၊ ထို့နောက် ဘင်္ဂလားဒေ့ရှ် နိုင်ငံခြားရေးအတွင်းဝန်နှင့်အဖွဲ့သည် အမေရိကန်ထိပ်တန်းအရာရှိများ နှင့်တွေ့ဆုံခဲ့ပြီး နှစ်နိုင်ငံ အရေးကိစ္စများကိုဆွေးနွေးခဲ့ကြရာ အသစ်ဖွဲ့စည်းခဲ့သော ဘင်္ဂလားဒေ့ရှ်အစိုးရအဖွဲ့ နှင့်ပတ်သက်၍ ကောင်းမွန်သောအစိုးရအုပ်ချုပ်ရေးနှင့် အကျင့်ပျက်ခြစားမှုတိုက်ဖျက်ရေးကိုဦးစားပေးလုပ် ဆောင်နေသည့် ဝန်ကြီးချုပ်ရှိတ်ဟာဆီနာ၏မူဝါဒရေးရာရည်မှန်းချက်များကို ရှင်းလင်းပြောကြားခဲ့သည် ဟုသိရှိရပါသည်။

အလားတူအမေရိကန်ပြည်ထောင်စုအနေဖြင့် ရရှိထားသောအစီရင်ခံစာများအရ မကြာသေးမီ ကာလအတွင်း၌ကျင်းပပြီးစီးခဲ့သော ဘင်္ဂလားဒေ့ရှ်နိုင်ငံ၏ အထွေထွေရွေးကောက်ပွဲကာလအတွင်းဖြစ်ပွား ခဲ့သည့် ရွေးကောက်ပွဲမသမာမှုများ၊ ရွေးကောက်ပွဲတွင်ဝင်ရောက်ယှဉ်ပြိုင်သည့် ကိုယ်စားလှယ်များအပေါ် နှောင့်ယှက်ခဲ့မှုများ၊ ခြိမ်းခြောက်ခဲ့မှုများအပါအဝင် အကြမ်းဖက်ခဲ့မှုများနှင့်ပတ်သက်၍ အမေရိကန်အစိုးရ ၏ စိုးရိမ်ပူပန်နေမှုများကိုထုတ်ဖော်ပြောကြားခဲ့ပြီး အဆိုပါ ကိစ္စရပ်များနှင့်ပတ်သက်၍လည်း ဆွေးနွေးခဲ့ကြ ကြောင်း၊ ထို့ပြင် လွန်ခဲ့သည့်(၃)နှစ်ခန့်ကဖြစ်ပွားခဲ့သော ဒါကာမြို့တွင် USAID ဝန်ထမ်းတစ်ဦးအသတ်ခံ ခဲ့ရသည့်ကိစ္စနှင့်ပတ်သက်၍ အဓိကတရားခံအားဖော်ထုတ်ပြီး တရားဥပဒေအရထိရောက်စွာ အပြစ်ပေးနိုင် ရေးအတွက်  မက်ခ်ဂရင်းက ဘင်္ဂလားဒေ့ရှ်ကိုယ်စားလှယ်အဖွဲ့အား ဖိအားပေးပြောကြားခဲ့သည်ဟုသိရှိ ရကြောင်း၊ ထို့နောက်  အမေရိကန်အစိုးရတာဝန်ရှိသူများသည် မွတ်စလင်ဒုက္ခသည်များအပေါ် ဘင်္ဂလားဒေ့ရှ် နိုင်ငံ၏ ကူညီဆောင်ရွက်ပေးမှုများနှင့်ပတ်သက်၍ ဘင်္ဂလားဒေ့ရှ်ဝန်ကြီးချုပ် ရှိတ်ဟာဆီနာအား ချီးကျူး ခဲ့ပြီးမွတ်စလင်ဒုက္ခသည်အရေးအဖြေရှင်းနိုင်ရေးအတွက် ဘင်္ဂလားဒေ့ရှ်နိုင်ငံနှင့်အတူ အပြည့်အဝပူးပေါင်း ဆောင်ရွက်သွားရန် သဘောတူညီမှုရရှိခဲ့သည်ဟုသိရှိရပါသည်။

ရည်ညွှန်း www.dailystar.net

ထိုင်းနိုင်ငံတွင် အထွေထွေရွေးကောက်ပွဲကျင်းပရန်သတ်မှတ်ရက်ကြန့်ကြာလျက်ရှိသောကြောင့် ထိုင်းဘုရင် သည် ရွေးကောက်ပွဲကော်မရှင်အား(၅)ရက်တာကာလအတွင်း ရွေးကောက်ပွဲကျင်းပ ရက်သတ်မှတ်ပေးရန် အမိန့်ထုတ်ပြန်ခဲ့မှု

ထိုင်းနိုင်ငံတွင် ၂၀၁၄ ခုနှစ်မှစ၍ ထိုင်းတပ်မတော်မှအာဏာသိမ်းယူခဲ့ပြီးနောက် ထိုင်း နိုင်ငံ၏ ပထမဆုံးအကြိမ် အထွေထွေရွေးကောက်ပွဲကျင်းပရန်ကာလသတ်မှတ်ရေးနှင့်ပတ်သက်၍ နှောင့်နှေးကြန့်ကြာ လျက်ရှိပြီး နိုင်ငံအတွင်းဆန္ဒပြမှုများဖြစ်ပေါ်လျက်ရှိသောကြောင့် ထိုင်းနိုင်ငံရွေးကောက်ပွဲကော်မရှင်အနေဖြင့် လာမည့်(၅) ရက်တာကာလအတွင်း ရွေးကောက်ပွဲကျင်းပမည့် ရက်အတိအကျအားသတ်မှတ်ပေးရန် ထိုင်း ဘုရင်မဟာဗာဂျီရာလောင်ကွန်က လက်မှတ်ရေးထိုးကာ ၂၀၁၉ ခုနှစ်၊ ဇန်နဝါရီလ(၂၃)ရက်(ဗုဒ္ဓဟူးနေ့)တွင် တော်ဝင်အမိန့်ကြေညာချက်တစ်စောင် ထုတ်ပြန်ကြေညာခဲ့သည်ဟု သိရှိရပါသည်။

ယခုကျင်းပမည့်ထိုင်းနိုင်ငံ၏အထွေထွေရွေးကောက်ပွဲသည် ထိုင်းနိုင်ငံတွင် လွန်ခဲ့သည့် (၅)နှစ် နီးပါးခန့်မှစ၍ ယင်လပ်ခ်ရှင်နာဝပ်အစိုးရအားဖြုတ်ချကာ ထိုင်းတပ်မတော်မှ အာဏာသိမ်းယူခဲ့ပြီးနောက် ပိုင်း ဖွဲ့စည်းပုံအခြေခံဥပဒေပြန်ပြောင်းရေးဆွဲကာ အစိုးရအဖွဲ့အတွင်း တပ်မတော်မှ အရေးပါသောအရာရှိကြီးများ အားခန့်အပ်ခဲ့ပြီးနောက် ပထမဦးဆုံးအကြိမ်ကျင်းပမည့် အထွေထွေ ရွေးကောက်ပွဲကြီးပင်ဖြစ်ကြောင်း၊ ထိုင်းတပ်မတော်အစိုးရအနေဖြင့် အထွေထွေရွေးကောက်ပွဲအား ၂၀၁၉ ခုနှစ်၊ ဖေဖော်ဝါရီလထက်နောက် မကျစေဘဲကျင်းပပေးမည်ဟု ပြောကြားလျက်ရှိသော်လည်း မသေချာမရေရာမှုများဖြစ်ပေါ်ကာ အချိန်ကာလ ကြန့်ကြာမှုများဖြစ်ပေါ်နေခြင်းကြောင့် ယခုကဲ့သို့ထိုင်းဘုရင်အနေဖြင့် လက်မှတ်ရေးထိုးကာအမိန့်ထုတ်ပြန် ခဲ့ခြင်းဖြစ်ကြောင်း၊ ယခုကဲ့သို့ထိုင်းဘုရင်၏တော်ဝင်အမိန့်ထုတ်ပြန်ကြေညာခဲ့ခြင်းကြောင့် ထိုင်းနိုင်ငံ အတွင်းရှိ အချို့သောတပ်မတော်သားများပါဝင်သည့် နိုင်ငံရေးပါတီအခင်းအကျင်းအသစ်များအပါအဝင် အင်အား ကြီး ရှင်နာဝပ်မျိုးဆက်ပါတီတို့အနေဖြင့် ရွေးကောက်ပွဲအတွက် မဲဆွယ်စည်းရုံးမှုများကို တရားဝင်စတင် ပြုလုပ်လာနိုင်မည်ဖြစ်ကြောင်း၊ အဆိုပါရွေးကောက်ပွဲအတွင်း ဝန်ကြီးချုပ်ပရာရွတ်ချန်အိုချာ အနေဖြင့် တပ်မတော်ကိုယ်စားပြုပါတီတစ်ရပ်ဖြင့် ဝင်ရောက်ရွေးကောက်ခံမည်ဖြစ်ကာ ရွေးကောက်ပွဲပြီးပါက အရပ်သား အစိုးရခေါင်းဆောင်အဖြစ် ဆက်လက်လုပ်ဆောင်သွားဖွယ်ရှိကြောင်း၊ ထိုင်းတပ်မတော်သားများနှင့် အစိုးရ အဖွဲ့ဝင်အများစုပါဝင်သည့် ဖယ်လန်းပရာချာရက်ပါတီအနေဖြင့် ယင်လပ်ခ်နှင့်သက်ဆင်တို့ အစဉ်အဆက် အခြေစိုက်ရာ သြဇာသက်ရောက်သည့်ဒေသများတွင် မဲဆွယ်စည်းရုံးရေးလုပ်ငန်းများ ကိုဦးစားပေးလုပ် ဆောင်သွားဖွယ်ရှိသည်ဟု နိုင်ငံရေးလေ့လာသူ များကသုံးသပ်လျက်ရှိကြောင်း၊ ယခုအခါ ယင်လတ်ခ်နှင့် သက်ဆင်တို့နှစ်ဦးသည် ပြည်ပနိုင်ငံများတွင် နေထိုင်ရလျက်ရှိသောကြောင့် ၎င်းတို့မောင်နှမ(၂)ဦး၏ သြဇာ အာဏာသက်ရောက်ရာ ထိုင်းနိုင်ငံမြောက်ပိုင်းနှင့်အရှေ့မြောက်ပိုင်းကျေးလက်ဒေသများတွင် ရှင်နာဝပ် မိသားစု၏ အဓိကပါတီကြီးဖြစ်သော ပွေထိုင်းပါတီအနေဖြင့်  ၎င်းတို့မောင်နှမ(၂)ဦးမပါဝင်ဘဲ မဲဆွယ်စည်း ရုံးရန် အခက်အခဲများနှင့်ရင်ဆိုင်​တွေ့နိုင်ပြီး ထောက်ခံမဲရရှိနိုင်ခြေအလွန်နည်းပါးလျက်ရှိသည်ဟု သိရှိရ ပါသည်။

ထိုင်းနိုင်ငံဥပဒေအရ ရွေးကောက်ပွဲကျင်းပရန်ကာလသတ်မှတ်နိုင်ရေးအတွက် အခွင့်အာဏာသည် ထိုင်းနိုင်ငံ ရွေးကောက်ပွဲကော်မရှင်ထံ၌သာရှိသောကြောင့် လာမည့်(၅)ရက်တာကာလအတွင်း ရွေးကောက်ပွဲကျင်းပရန် သတ်မှတ်ရက်ထုတ်ပြန်နိုင်ရေးအတွက် ထိုင်းနိုင်ငံရွေးကောက်ပွဲကော်မရှင် ဥက္ကဌအနေဖြင့် လိုအပ်သည်များ ဆက်လက်အကောင်အထည်ဖော်ဆောင်ရွက်နိုင်စေရန် ထိုင်းဘုရင်၏အမိန့်ပေးချက်အား ထိုင်းဝန်ကြီးချုပ် ပရာရွတ်ချန်အိုချာက ဖြည့်စွက်လက်မှတ်ရေးထိုးကာ  ဇန်နဝါရီလ(၂၃)ရက်(ဗုဒ္ဓဟူးနေ့)တွင်ပင်တော်ဝင် အမိန့်ပြန်တမ်းအဖြစ် ထုတ်ပြန်ကြေညာခဲ့ခြင်းဖြစ်ကြောင်း၊ ထိုင်းနိုင်ငံတွင် အထွေထွေရွေးကောက်ပွဲကျင်းပ ရန် သတ်မှတ်ရက်မသေချာမရေရာမှုများကြောင့် ထိုင်းနိုင်ငံ၊ ဘန်ကောက်မြို့တွင် ယခုလအတွင်းဆန္ဒပြပွဲ များဖြစ်ပေါ်လျက်ရှိပြီး ဆန္ဒပြသူများအားအကြမ်းဖက်ဖြိုခွင်းမှုများ အဆောတလျင်ပြုလုပ်လိမ့်မည်မဟုတ် ဟုနိုင်ငံရေးလေ့လာသူများကသုံးသပ်ထားကြကြောင်း၊ ထိုင်းနိုင်ငံ၏အထွေထွေရွေးကောက်ပွဲအား ထိုင်း ဘုရင်မဟာဗာဂျီရာလောင်ကွန်၏ ရာဇဘိသိတ်ခံပွဲမတိုင်မီလာမည့် ၂၀၁၉ ခုနှစ်၊ မေလ အစောပိုင်းကာလ တွင်ကျင်းပဖွယ်ရှိသည်ဟု သိရှိရပါသည်။

ရည်ညွှန်း www.channelnewsasia.com

မလေးရှားနိုင်ငံ၏ပြည်ပသို့စားအုန်းဆီတင်ပို့မှု မြင့်တက်လာမှုနှင့်ပဲပိစပ်ဆီဈေးနှုန်းများမြင့်တက်လာမှု တို့ကြောင့် မလေးရှားစားအုန်းဆီဈေးနှုန်းမှာ (၄)လတာကာလအတွင်း အမြင့်ဆုံးသို့ ရောက်ရှိခဲ့မှု

၂၀၁၉ ခုနှစ်၊ ဇန်နဝါရီလ(၁)ရက်မှ (၂၀)ရက်အထိကာလအတွင်း မလေးရှားနိုင်ငံ၏ ပြည်ပသို့ စားအုန်းဆီတင်ပို့မှု ပမာဏမှာတန်ချိန်(၉၁၂,၀၆၁) တန်ရှိခဲ့ရာ လွန်ခဲ့သည့် ဒီဇင်ဘာလ အလားတူကာလအတွင်း ဖြစ်ပေါ်ခဲ့သည့်တန်ချိန်ပမာဏ (၈၀၈,၀၆၁) တန်နှင့် နှိုင်းယှဉ်ပါက ၁၂.၉% မြင့်တက်ခဲ့သည်ဟု ဗြိတိန်နိုင်ငံ၊ လန်ဒန်အခြေစိုက် Intertek Testing Services ကုမ္ပဏီက ယခုရက်ပိုင်းအတွင်း ကောက်ယူထုတ်ပြန်သည့် စစ်တမ်းအရဖော်ပြခဲ့ရာ ပြည်ပသို့တင်ပို့မှု မြင့်တက်လာသောကြောင့် မလေးရှားစားအုန်းဆီအား ပြည်ပနိုင်ငံ များ၏ဝယ်လိုအား ဆက်လက်မြင့်တက်လာဖွယ်ရှိသည်ဟူသော ခန့်မှန်းချက်များနှင့်အတူ မလေးရှားစား အုန်းဆီဈေးနှုန်းမှာ ၂% နီးပါး မြင့်တက်ခဲ့ကြောင်း သိရှိရပါသည်။

ထို့ပြင် ကမ္ဘာပေါ်၌စားအုန်းဆီအများဆုံးထုတ်လုပ်လျက်ရှိသည့် အင်ဒိုနီးရှားနိုင်ငံ၏ စားအုန်းဆီထုတ် လုပ်မှုပမာဏမှာ တန်ချိန်(၁.၂)သန်း မှ တန်ချိန်(၂)သန်းခန့်အထိ လျော့ကျသွားဖွယ်ရှိခြင်း၊ စိုက်ပျိုးရေး သဘောသဘာဝအရလက်ရှိအချိန်အခါတွင် စားအုန်းဆီထုတ်လုပ်မှုကျဆင်းလေ့ရှိခြင်း နှင့်စားသောက်ကုန် လုပ်ငန်းနှင့် စွမ်းအင်လုပ်ငန်းများ၏ သုံးစွဲမှုမြင့်တက်လာဖွယ်ရှိခြင်းတို့ကြောင့် အင်ဒိုနီးရှားစားအုန်းဆီ ဈေးနှုန်းမှာ ယခု ၂၀၁၉ ခုနှစ်အတွင်း၌ တစ်တန်လျှင်အမေရိကန်ဒေါ်လာ (၆၀၀)ခန့်အထိသို့ မြင့်တက် လာနိုင်သည်ဟု ပါကစ္စတန်နိုင်ငံ၊ ကရာချိမြို့၌ လွန်ခဲ့သော ရက်ပိုင်းအတွင်းပြုလုပ်ခဲ့သည့် ပါကစ္စတန် စားသုံးဆီညီလာခံ၌ ဂျာမနီအခြေစိုက်ဆီနှင့် ဆီထွက်သီးနှံဈေးကွက် လေ့လာဆန်းစစ်ရေးလုပ်ငန်းများ ဆောင်ရွက်လျက်ရှိသည့် Oil World ကုမ္ပဏီ၏ အမှုဆောင်အရာရှိချုပ် သွန်မ်မက်စ်မီလ်ကီက ပြောကြားချက်များ ထွက်ပေါ်ခဲ့ခြင်းသည်လည်း မလေးရှား စားအုန်းဆီဈေးနှုန်းကို မြင့်တက်စေခဲ့ကြောင်း၊ အလားတူ အမေရိကန် – တရုတ် ကုန်သွယ်ရေးဆွေးနွေးမှုများမှ ရလဒ်ကောင်းများထွက်ပေါ်လာဖွယ်ရှိခြင်းနှင့်အတူ တရုတ်နိုင်ငံ၏ အမေရိကန် ပဲပိစပ်ဝယ်ယူမှုမှာ ပိုမိုများပြားလာဖွယ်ရှိသည်ဟူသော ခန့်မှန်းချက်များထွက်ပေါ်လျက်ရှိပြီး အမေရိကန်ချီကာဂိုဈေးကွက်နှင့် တရုတ်ဒါလျန်းဈေးကွက်တို့၌ ပဲပိစပ်ဆီကြိုတင်ရောင်းဝယ်မှုဈေးနှုန်းမှာ ၀.၅% နှင့် ၀.၈% စီအသီးသီးမြင့်တက်ခဲ့ခြင်းသည်လည်း မလေးရှားစားအုန်းဆီဈေးနှုန်းကို မြင့်တက်စေသည့် အခြားသောအချက်တစ်ခုဖြစ်ကြောင်း သိရှိရပါသည်။

၂၀၁၉ ခုနှစ်၊ ဇန်နဝါရီလ(၂၃)ရက် (ဗုဒ္ဓဟူးနေ့) နံနက်ပိုင်းတွင် မလေးရှားစားအုန်းဆီ ဈေးကွက်၌ ဧပြီလအတွက် စားအုန်းဆီကြိုတင်ရောင်းဝယ်မှုဈေးနှုန်းမှာ ၁.၉% မြင့်တက်ခဲ့ပြီး တစ်တန်လျှင် မလေးရှားငွေ ၂၂၆၉ ရင်းဂစ် (အမေရိကန်ဒေါ်လာ ၅၄၉.၃၉ ဒေါ်လာ) ၌ဖြစ်ပေါ်ခဲ့ကြောင်း၊ အဆိုပါဈေးနှုန်းသည် ၂၀၁၈ ခုနှစ် စက်တင်ဘာလနောက်ပိုင်း(၄)လတာကာလအတွင်း အမြင့်ဆုံးဈေးနှုန်းဖြစ်ကြောင်း သိရှိရပါသည်။

ရည်ညွှန်း www.thestar.com.my

အိန္ဒိယမူးယစ်တရားခံပြေး ရာဇဝတ်ဂိုဏ်းခေါင်းဆောင် ဒါဝတ်အီဘရာဟင်သည် အိန္ဒိယနှင့် မြန်မာနိုင်ငံတို့တွင် အဖျက်အမှောင့်လုပ်ငန်းများလုပ်ကိုင်နိုင်ရန် AA နှင့် ARSA အပါအဝင် အခြားအကြမ်းဖက်အဖွဲ့များအား အမေရိကန်ဒေါ်လာ(၁)ဘီလီယံထောက်ပံ့ပေးအပ်ရန်ကတိပြုခဲ့မှု

ဒူဘိုင်းနိုင်ငံတွင်နေထိုင်လျက်ရှိသော အိန္ဒိယမူးယစ်တရားခံပြေး ရာဇဝတ်ဂိုဏ်းခေါင်းဆောင် ဒါဝတ် အီဘရာဟင်သည် ၎င်း၏မူးယစ်ဆေးဝါးကုန်သွယ်ရာမှ ရရှိသည့်ငွေများအနက်မှ အမေရိကန်ဒေါ်လာ(၁) ဘီလီယံခန့်ကို အိန္ဒိယနှင့် မြန်မာနိုင်ငံတို့တွင် အကြမ်းဖက်အဖျက်အမှောင့်လုပ်ငန်းများ လုပ်ကိုင်နိုင်ရန် AA နှင့် ARSA အဖွဲ့အပါအဝင် အိန္ဒိယနှင့်မြန်မာဆန့်ကျင်ရေး သောင်းကျန်းသူအဖွဲ့အစည်းများနှင့် အကြမ်းဖက်အဖွဲ့များအား အမေရိကန်ဒေါ်လာ(၁)ဘီလီယံ ထောက်ပံ့ပေးအပ်ရန် ကတိပြုခဲ့သည်ဟု သိရှိရပါသည်။

အဆိုပါ အိန္ဒိယမူးယစ်တရားခံပြေး ဒါဝတ်အီဘရာဟင်(၆၄နှစ်)သည် အိန္ဒိယနိုင်ငံ၊ မွန်ဘိုင်းမြို့ဇာတိဖြစ်ပြီး ၎င်း၏ကြွယ်ဝချမ်းသာမှုမှာ ၂၀၁၅ ခုနှစ်အတွင်း အမေရိကန်ဒေါ်လာ (၆.၇) ဘီလီယံ ခန့်ရှိပြီး မူးယစ်ဆေးဝါးကုန်သွယ်ရာမှ ရရှိသည့်ဝင်ငွေများအနက်မှ ၁၅% ကို အဖျက်အမှောင့်လုပ်ငန်းများ အတွက် အသုံးပြုရန်ဆုံးဖြတ်ထားခြင်းဖြစ်ကြောင်း၊ ၁၉၇၀ ခုနှစ်ကာလများအတွင်းတွင် ဒါဝတ်အီဘရာဟင် သည် ၎င်း၏အစ်ကိုဖြစ်သူနှင့်အတူ D-Company(Dawood Company)ကို ပူးတွဲတည်ထောင်ခဲ့ပြီး မူးယစ်ဆေးဝါးကုန်သွယ်မှုလုပ်ငန်းများကို စတင် လုပ်ဆောင်ခဲ့ကြောင်း၊ ၎င်းသည် ၁၉၉၃ ခုနှစ်တွင် လူ(၂၅၇)ဦး သေဆုံးကာ(၁,၄၀၀) ဦးဒဏ်ရာရရှိစေခဲ့သည့် မွန်ဘိုင်းမြို့ဗုံးခွဲတိုက်ခိုက်မှုအတွင်း ညွှန်ကြားစေခိုင်းခဲ့သူတစ်ဦး ဖြစ်ပြီး အမေရိကန်ပြည်ထောင်စု၊ FBI ၏အလိုရှိဆုံးထိပ်တန်းဝရမ်းပြေး(၁၀)ဦးအနက် နံပါတ်(၃)အဆင့်၌ ရပ်တည်လျက်ရှိကြောင်း၊ ၎င်းသည် တာလီဘန်၊ အယ်လ်ကေဒါနှင့် Lashkar-e-Taiba(L-e-T)စသည့် အကြမ်းဖက်အဖွဲ့တို့နှင့် ဆက်နွယ်ပတ်သက်လျက်ရှိပြီး အိန္ဒိယ၊ အာဖဂန်နစ္စတန်၊ ပါကစ္စတန်နှင့် အာရပ်စော်ဘွားများ     ပြည်ထောင်စုတို့ရှိ အစ္စလာမ်အဖွဲ့အစည်းများနှင့်လည်း အဆက်အသွယ်ရှိသူတစ်ဦးဖြစ်ကြောင်း၊  ၎င်းသည် D-Company အမည်ဖြင့် ၁၉၈၀ ခုနှစ်နှင့် ၁၉၉၀ ခုနှစ်ကာလများအတွင်း အိန္ဒိယရုပ်ရှင် ရိုက်ကူရေးနှင့် ဘောလီးဝုဒ်စတူဒီယိုအပါအဝင် ကမ္ဘာတစ်ဝန်း၌ စီးပွားရေးလုပ်ငန်းများလုပ်ကိုင်ကာ ၎င်း၏တရားမဝင်ရရှိ ခဲ့သော ငွေကြေးများအားငွေကြေးခဝါချခဲ့ပြီး ၂၀၁၅ ခုနှစ်တွင် ပါကစ္စတန်နိုင်ငံ၊ ကရာချိမြို့၌ နောက်ဆုံးပုန်းအောင်းလုပ်ကိုင်ခဲ့သည်ဟုသိရှိရကြောင်း၊ ၎င်းသည် ပါကစ္စတန်နိုင်ငံရှိ အကြမ်းဖက်အဖွဲ့ကြီး တစ်ခုဖြစ်သည့် L-e-T အကြမ်းဖက်အဖွဲ့အား ငွေကြေးထောက်ပံ့ပေးနေသူတစ်ဦးဖြစ်ပြီး ၂၀၀၈ ခုနှစ်တွင် L-e-T အဖွဲ့က လုပ်ဆောင်ခဲ့သည့် လူ(၁၇၄)ဦးသေဆုံးကာ (၃၀၀)ဦးကျော်ထိခိုက်ဒဏ်ရာရရှိစေခဲ့သည့် မွန်ဘိုင်း အကြမ်းဖက်တိုက်ခိုက်မှုအတွက် ငွေကြေးထောက်ပံ့ပေးအပ်ခဲ့သူလည်းဖြစ်ကြောင်း၊ ၎င်းအား အိန္ဒိယနှင့် အမေရိကန်အစိုးရတို့က ၂၀၀၃ ခုနှစ် တွင်ကမ္ဘာလုံးဆိုင်ရာ အကြမ်းဖက်သမားတစ်ဦးအဖြစ် ကြေညာခဲ့ခြင်း ဖြစ်သည်ဟုသိရှိရပါသည်။

၂၀၁၈ခုနှစ်၊ နိုဝင်ဘာလအတွင်း ဒါဝတ်အီဘရာဟင်၏ ယုံကြည်စိတ်ချရသောလက်ထောက်တစ်ဦးဖြစ်သူအစ္စမေးလ်သည် ဒူဘိုင်းမြို့တွင် ဘင်္ဂလားဒေ့ရှ်နိုင်ငံသား(၄)ဦးနှင့်တွေ့ဆုံခဲ့ကြောင်း၊ ထိုသို့တွေ့ဆုံစဉ် အစ္စမေးလ်သည် မူဆလင်များအပေါ် လူမျိုးတုံးသတ်ဖြတ်ခဲ့မှုများအတွက် လက်တုံ့ပြန်သည့်အနေဖြင့် အိန္ဒိယနှင့် မြန်မာနိုင်ငံတို့တွင် အဖျက်အမှောင့်လုပ်ငန်းများ လုပ်ကိုင်နိုင်ရေးကို ရည်စူးကာ ဒါဝတ်အီဘရာဟင်အနေဖြင့် အမေရိကန်ဒေါ်လာ(၁)ဘီလီယံခန့် အားပေးအပ်သွားမည်ဟု အဆိုပါဘင်္ဂလားဒေ့ရှ်နိုင်ငံသားများအားအသိပေးခဲ့ကြောင်း၊ ထို့နောက် ဒါဝတ်အီဘရာဟင်က ပေးအပ်မည့်ငွေများအနက် ဘင်္ဂလားဒေ့ရှ်နိုင်ငံအတွင်း အိန္ဒိယလိုလားသူများအား ဖြိုခွင်းနိုင်ရေးအတွက် Jamaat-e-Islami နှင့် Hefazat-e-Islam အပါအဝင် အကြမ်းဖက်အဖွဲ့များအား ငွေကြေးခွဲဝေချပေးရန် ဘင်္ဂလားဒေ့ရှ်နိုင်ငံသားတစ်ဦးမှ အစ္စမေးလ်အားအကြံပြု ပြောကြားခဲ့ကြောင်း၊ အဆိုပါအကြံပြုချက်အတိုင်း နောက်ပိုင်းတွင် အစ္စမေးလ်သည် မလေးရှားနိုင်ငံတွင် နေထိုင်သည့် ဘင်္ဂလားဒေ့ရှ်နိုင်ငံသား သတင်းစာအယ်ဒီတာတစ်ဦးနှင့်ချိတ်ဆက်မိခဲ့ပြီး ၂၀၁၉ ခုနှစ်၊ ဇန်နဝါရီလ(၂)ရက် နေ့တွင် အဖျက်အမှောင့်လုပ်ငန်းများအတွက် လိုအပ်သောရန်ပုံငွေများကို ခွင့်ပြုပေးအပ်ခဲ့ကြောင်းကို အဆိုပါ ဘင်္ဂလားဒေ့ရှ်အယ်ဒီတာအား ဒုတိယအကြိမ်မြောက် ဖုန်းအဆက်အသွယ်ပြုလုပ်ကာ အသိပေးအကြောင်းကြား ခဲ့ကြောင်း၊ ထို့ပြင် ဒါဝတ်အီဘရာဟင်၏ ကိုယ်စားလှယ် များသည် ၂၀၁၈ ခုနှစ်၊ ဒီဇင်ဘာလကတည်းမှ ပင်စတင်၍ အီရန်နိုင်ငံသားတစ်ဦးနှင့်အတူ အကြမ်းဖက်မှုလုပ်ငန်းများအတွက် လိုအပ်သော လက်နက်နှင့် ဖောက်ခွဲရေးဆိုင်ရာပစ္စည်းများကို ဝယ်ယူခဲ့ကြခြင်းဖြစ်ကြောင်း၊ ထို့နောက် အဆိုပါလက်နက်များနှင့်ဖောက်ခွဲ ရေးပစ္စည်းများကို အိန္ဒိယနိုင်ငံ၊ ကက်ရှ်မီးယားဒေသအတွင်းရှိ အကြမ်းဖက်အဖွဲ့များအပါအဝင် မြန်မာနိုင်ငံရှိ AA နှင့် ARSA အကြမ်းဖက်အဖွဲ့အစည်းများထံသို့ပေးအပ်ခဲ့သည်ဟု သိရှိရကြောင်း ဖော်ပြပါရှိပါသည်။

ရည်ညွှန်း www.weeklyblitz.net

တရုတ်နိုင်ငံ၏ ပို့ကုန်/သွင်းကုန်ကဏ္ဍကျဆင်းခဲ့မှုနှင့်အတူ ကမ္ဘာ့စီးပွားရေးနှေးကွေးဖွယ်ရှိသည် ဟူသောစိုးရိမ် ပူပန်မှုများကြောင့် အမေရိကန်ဒေါ်လာတန်ဖိုး ကျဆင်းကာ ကမ္ဘာ့ရွှေဈေးနှုန်းမှာ မြင့်တက်လာခဲ့မှု

၂၀၁၉ ခုနှစ်၊  ဇန်နဝါရီလ(၁၄)ရက် (တနင်္လာနေ့)တွင် တရုတ်အစိုးရကထုတ်ပြန်သည့် အစီရင်ခံစာ၌ လွန်ခဲ့သည့် ဒီဇင်ဘာလအတွင်း တရုတ်နိုင်ငံ၏ ပြည်ပသို့တင်ပို့သည့် ပို့ကုန်ပမာဏမှာ စုစုပေါင်း အမေရိကန် ဒေါ်လာ (၂၂၁.၂၅)ဘီလီယံခန့်သာရှိခဲ့ရာ ယမန်နှစ်အလားတူကာလနှင့် နှိုင်းယှဉ်ပါက ၄.၄% ကျဆင်းခဲ့ကြောင်း၊ အလားတူ နိုင်ငံအတွင်းသို့ တင်သွင်းသည့် ပြည်ပသွင်းကုန်ပမာဏမှာလည်း စုစုပေါင်းအမေရိကန်ဒေါ်လာ (၁၆၄.၁၉)ဘီလီယံခန့်သာရှိခဲ့ပြီး ယမန်နှစ်အလားတူ ကာလနှင့်နှိုင်းယှဉ်ပါက ၇.၆% ကျဆင်းသွားခဲ့ကြောင်း၊ အဆိုပါ ကျဆင်းမှုပမာဏများသည် ၂၀၁၆ ခုနှစ်နောက်ပိုင်း အများဆုံးကျဆင်းသည့်ပမာဏများပင်ဖြစ်သည်ဟု ဖော်ပြထားကြောင်း၊ လက်ရှိအချိန်တွင် အမေရိကန်-တရုတ် သွင်းကုန်ခွန်အပြန်အလှန်တိုးမြှင့်ကောက်ခံခြင်း ထိုးစစ်အား ယာယီရပ်ဆိုင်းထားသော်လည်း အဆိုပါအမေရိကန်-တရုတ်ကုန်သွယ်ရေးတင်းမာမှုများ၏ ဂယက် အရှိန်ကြောင့် ကမ္ဘာပေါ်၌ ဒုတိယစီးပွားရေးအင်အားကြီးနိုင်ငံဖြစ်သော တရုတ်နိုင်ငံ၏ ပို့ကုန်/သွင်းကုန်ကျဆင်း ခဲ့ရခြင်းနှင့်အတူ ကမ္ဘာတစ်ဝန်းစီးပွားရေးနှေးကွေးမှုများဖြစ်ပေါ်နေသည်ဟူသော စိုးရိမ်ပူပန်မှုများထွက်ပေါ် လာပြီး ရင်းနှီးမြှုပ်နှံသူများသည် အမေရိကန်ဒေါ်လာအစား ရွှေကိုဝယ်ယူ စုဆောင်းမှုများပြုလုပ်လာကြသောကြောင့် အမေရိကန်ဒေါ်လာတန်ဖိုးကျဆင်းကာ ကမ္ဘာ့ရွှေဈေး နှုန်းမှာ မြင့်တက်လာခဲ့ကြောင်း သိရှိရပါသည်။

ထို့ပြင် လွန်ခဲ့သည့်ရက်များအတွင်း ကမ္ဘာ့ဘဏ်က ထုတ်ပြန်သည့်အစီရင်ခံစာ၌ ၂၀၁၉ ခုနှစ်အတွင်း  ကမ္ဘာ့စီးပွားရေးတိုးတက်မှုနှုန်းမှာ အနည်းငယ်ကျဆင်းကာ ယမန်နှစ်တွင် ဖြစ်ပေါ်ခဲ့သည့် စီးပွားရေးတိုးတက်မှုနှုန်း ၃% ကို ပြည့်မီနိုင်ခြင်းမရှိဘဲ ၂.၉% ခန့်သာရှိနိုင်ကြောင်း၊ တရုတ်နိုင်ငံ၏စီးပွားရေးတိုးတက်မှုနှုန်းမှာလည်း ယမန်နှစ်တွင် ၆.၅% ခန့်ရှိခဲ့ရာမှ ယခု ၂၀၁၉ ခုနှစ်တွင်မူ ၆.၂% သို့ လျော့နည်းကျဆင်း သွားနိုင်သည်ဟု ဖော်ပြထားကြောင်း၊ ၎င်းအပြင် လွန်ခဲ့သည့် ဒီဇင်ဘာလ(၁၈)ရက်နှင့် (၁၉)ရက်နေ့ တို့တွင်ကျင်းပခဲ့သည့် အမေရိကန်ဗဟိုဘဏ် အစည်းအဝေး မှတ်တမ်း၌လည်း အမေရိကန်ဗဟိုဘဏ်ကော်မတီ ဝင်များသည် ဘဏ်တိုးနှုန်းတိုးမြှင့်ခြင်းအား အလျင်စလိုပြုလုပ်လိုခြင်းမရှိဘဲ အမေရိကန်ပြည်ထောင်စုနှင့် ကမ္ဘာ့စီးပွားရေးအခြေအနေအပေါ် အချိန်ယူကာစောင့်ကြည့်ဆန်းစစ်သွားမည်ဟု ဖော်ပြထားရာ ကမ္ဘာ့စီးပွားရေး နှေးကွေးဖွယ်ရှိခြင်းနှင့် အမေရိကန်ဗဟိုဘဏ်က ဘဏ်တိုးနှုန်းတိုးမြှင့်မှုကို ရပ်ဆိုင်းထားဖွယ်ရှိသည်ဟူသော ခန့်မှန်းချက်များထွက်ပေါ်နေခြင်းတို့သည်လည်း ရင်းနှီးမြှုပ်နှံသူများအား ရွှေကိုပိုမိုဝယ်ယူစုဆောင်းရန်တွန်း အားပေးလျက်ရှိပြီး ကမ္ဘာ့ရွှေဈေးနှုန်းကိုမြင့်တက်စေသည့် အခြားသောအချက်များဖြစ်ကြောင်း သိရှိရပါသည်။

၂၀၁၉ ခုနှစ်၊ ဇန်နဝါရီလ(၁၅)ရက်(အင်္ဂါနေ့)နံနက်ပိုင်းတွင် နယူးယောက်ဈေးကွက်၌ ဖေဖော်ဝါရီလ အတွက် ရွှေကြိုတင်ရောင်းဝယ်မှုဈေးနှုန်းမှာ ၀.၂% မြင့်တက်ပြီး တစ်အောင်စလျှင် အမေရိကန်ဒေါ်လာ (၁၂၉၁.၇၀) သို့ ရောက်ရှိခဲ့ကြောင်း၊ အမေရိကန်ဒေါ်လာတန်ဖိုးမှာမူ ၀.၁%  ကျဆင်းခဲ့ကြောင်း၊ အမေရိကန် ဒေါ်လာနှင့်အတူ အမေရိကန်စတော့ရှယ်ယာများဖြစ်သည့် S & P 500 စတော့ရှယ်ယာတန်ဖိုး မှာ ၀.၅% ၊ Nasdaq  စတော့ရှယ်ယာတန်ဖိုးမှာ ၀.၉%  စီ အသီးသီးကျဆင်းခဲ့ကြောင်း ဖော်ပြပါရှိပါသည်။

ရည်ညွှန်းwww.bloomberg.com

မြန်မာနိုင်ငံမှရွှေများ အိန္ဒိယနိုင်ငံ၊ ဟိုက်ဒရာဘက်မြို့အတွင်းသို့ မှောင်ခိုတင်သွင်းခဲ့မှုနှင့်ပတ်သက်၍ အဓိကကြိုးကိုင်စေခိုင်းသူ အိန္ဒိယရတနာကုန်သည်နှစ်ဦးကို အိန္ဒိယအာဏာပိုင်များက ဖမ်းဆီးရမိခဲ့မှု

အိန္ဒိယ နိုင်ငံတောင်ပိုင်း တီလန်ဂါနာပြည်နယ်၊ ဟိုက်ဒရာဘက်မြို့အတွင်းသို့ အိန္ဒိယ-မြန်မာနယ်စပ်အား ဖြတ်ကျော်၍ အာသံပြည်နယ်၊ ဂူဝါဟေတီမြို့မှတစ်ဆင့် မြန်မာနိုင်ငံအတွင်းမှ ရွှေများကို မှောင်ခို တင်သွင်းခဲ့မှုနှင့်ပတ်သက်၍ အဓိက ကြိုးကိုင်စေခိုင်းသူ အိန္ဒိယနိုင်ငံသား ရတနာကုန်သည်(၂)ဦးကို အိန္ဒိယနိုင်ငံဘဏ္ဍာအခွန်ဆိုင်ရာ ထောက်လှမ်းရေးအဖွဲ့(Directorate of Revenue Intelligence-DRI)က ယခုရက်ပိုင်းအတွင်း ဖော်ထုတ် ဖမ်းဆီးနိုင်ခဲ့သည်ဟု ထုတ်ပြန်ကြေညာခဲ့ကြောင်း သိရှိရပါသည်။

အဆိုပါဖမ်းဆီးရမိသူ အိန္ဒိယရတနာကုန်သည်(၂)ဦးမှာ ဟိုက်ဒရာဘက်မြို့အနီးရှိ ဟက်ဘ်ဆီဂူတာမြို့ သီရိဂနေ့စ်ရတနာဆိုင်ပိုင်ရှင် ပူဟာဂျိန်းဆိုသူနှင့် ဟိုက်ဒရာဘက်မြို့နှင့်ထိစပ် နေသည့် ဆီကန်ဒါရာဘက်မြို့မှ ဂူသန်ရာဝယ်ဆိုသူတို့ဖြစ်ကြပြီး ၎င်းတို့၏ အလုပ်သမားဝန်ထမ်း များကိုအသုံးပြုကာ အာသံပြည်နယ်၊ ဂူဝါဟေတီမြို့နှင့် အန်ဒရာပရာဒေ့ရှ်ပြည်နယ်၊ ဗီဆက်ဟပ်နမ် ဆိပ်ကမ်းမြို့များမှတစ်ဆင့် မြန်မာနိုင်ငံမှရွှေများကို မှောင်ခိုသယ်ဆောင်စေခဲ့ခြင်းဖြစ်ကြောင်း၊ ၂၀၁၉ခုနှစ်၊ ဇန်နဝါရီလ(၄)ရက်နေ့တွင် အိန္ဒိယနိုင်ငံ ဘဏ္ဍာအခွန်ဆိုင်ရာ ထောက်လှမ်းရေးအဖွဲ့(DRI) သည် ဗီဆက်ဟပ်နမ်မြို့ရှိ ဂူဝါဟေတီနှင့် ဆီကန်ဒါရာဘက်မြို့သို့ သွားရောက်ရာ ဘူတာရုံတွင် အိန္ဒိယရူပီး(၁)ကုဋေ(အမေရိကန်ဒေါ်လာ၁၄၀,၀၀၀)တန်ဖိုးရှိသော အလေးချိန်(၃.၃)ကီလိုဂရမ်ရှိ ရွှေများကို တရားမဝင်မှောင်ခိုသယ်ဆောင်လာသူ(၂)ဦးကို ဖမ်းဆီးရမိခဲ့ရာမှတစ်ဆင့် အဆိုပါရတနာ ကုန်သည် နှစ်ဦးကို ဖော်ထုတ်ဖမ်းဆီးနိုင်ခဲ့ခြင်းဖြစ်ကြောင်း၊ ထို့ကြောင့် အိန္ဒိယနိုင်ငံ ဘဏ္ဍာအခွန် ဆိုင်ရာထောက်လှမ်းရေး အဖွဲ့(DRI)သည် ယခုအခါ ဟိုက်ဒရာဘက်မြို့နှင့်ထိစပ်နေသည့် ဆီကန်ဒါရာဘက်မြို့ရှိ ဆိပ်ကမ်းဈေးအား ပစ်မှတ်ထား၍ တရားမဝင်ရွှေမှောင်ခိုတင်သွင်းမှုများအပေါ်၌ ပိုမိုအာရုံစိုက် လုပ်ဆောင်လျက်ရှိကြောင်း၊ DRI အဖွဲ့သည် ၂၀၁၈ခုနှစ်မှစတင်၍ ဟိုက်ဒရာဘက်၊ ဗီဆက်ဟပ်နမ်နှင့် ဘူဘန်ဆွာမြို့တို့တွင် မြန်မာနိုင်ငံမှ ရွှေများကိုတရားမဝင်မှောင်ခိုတင်သွင်းမှုများမှ အနည်းဆုံရွှေ(၂၅)ကီလိုဂရမ်ကို သိမ်းဆည်းရမိခဲ့ကြောင်း၊ အလားတူလွန်ခဲ့သည့်တစ်နှစ်ကျော်၊ တစ်နှစ်ခွဲခန့်မှစတင်၍ အိန္ဒိယ-မြန်မာနယ်စပ်ရှိ မဏိပူရနှင့် မီဇိုရမ် ပြည်နယ်များ၌ မြန်မာနိုင်ငံမှ မှောင်ခိုတင်သွင်းလာသည့် ရွှေ(၂၅)ကီလိုဂရမ်ဝန်းကျင်ခန့်ကို သိမ်းဆည်းရမိခဲ့ကြောင်း သိရှိရပါသည်။

အိန္ဒိယနိုင်ငံတွင် တရားမဝင်ရွှေမှောင်ခိုတင်သွင်းမှုများကို ယခင်က အိန္ဒိယ-နီပေါနယ်စပ် လမ်းကြောင်းကို အများဆုံးအသုံးပြုခဲ့သော်လည်း ယခုအခါ အိန္ဒိယ-မြန်မာနယ်စပ်ဒေသသည် ရွှေမှောင်ခိုတင်သွင်းမှုများအတွက် အများဆုံးပြုလုပ်ရာလမ်းကြောင်းအဖြစ်သို့ ရောက်ရှိခဲ့ကြောင်း၊ အိန္ဒိယ-မြန်မာနယ်စပ်သည် ဗီဇာမလိုဘဲ နှစ်နိုင်ငံပြည်သူများ လွတ်လပ်စွာ လှုပ်ရှားသွားလာခွင့်ပြုထားသည့်အတွက် ယခုကဲ့သို့ မှောင်ခိုသမားများ အနေဖြင့် အခွင့်ကောင်းယူကာ တရားမဝင်လုပ်ငန်း များကို လုပ်ဆောင်နေခြင်းဖြစ်ကြောင်း၊ ရွှေမှောင်ခို သမားများသည် မြန်မာနိုင်ငံမှရွှေများကို အဓိကအားဖြင့် အိန္ဒိယ-မြန်မာနယ်စပ်မှတစ်ဆင့် အာသံပြည်နယ်၊ ဂူဝါဟေတီမြို့သို့ မော်တော်ယာဉ် လမ်းကြောင်းဖြင့်သယ်ဆောင်လာပြီး ဟိုက်ဒရာဘက်မြို့နှင့် ချန်နိုင်းမြို့များ အပါအဝင် အခြားဒေသများသို့ မီးရထားလမ်းကြောင်းဖြင့် သယ်ဆောင်နေကြခြင်းဖြစ်ပြီး ဂူဝါဟေတီနှင့် ဆီကန်ဒါရာဘက်မြို့အား ဆက်သွယ်ထားသည့်မီးရထားလမ်းကြောင်းသည် မှောင်ခိုသမားများ အများဆုံး အသုံးပြုရာ လမ်းကြောင်းဖြစ်သည်ဟု သိရှိရပါသည်။

ရည်ညွှန်း www.indiatimes.com