ဖေ‌ဖော်ဝါရီ 2019 – စာမျက်နှာ 3

ဂျာမနီ၊ ပြင်သစ်နှင့် ဗြိတိန်နိုင်ငံတို့သည် အီရန်နိုင်ငံနှင့်တရားဝင်ကုန်သွယ်မှုပြုနိုင်မည့် စနစ်တစ်ခုကို ဖန်တီးအကောင်အထည်ဖော်သွားမည်ဖြစ်ကြောင်းအင်တာနက် website တွင် ဖော်ပြထားမှု

အမေရိကန်အစိုးရအနေဖြင့် အီရန်နိုင်ငံအပေါ်ချမှတ်ထားသည့် အရေးယူပိတ်ဆို့မှုဆိုင်ရာကိစ္စရပ်များနှင့် ထိခိုက်ငြိစွန်းမှုမရှိစေဘဲ အီရန်နိုင်ငံနှင့် တရားဝင်ကုန်သွယ်မှုပြုလုပ်နိုင်မည့်စနစ်တစ်ခုကို အကောင်အထည်ဖော်ဖန်တီးသွားမည်ဟု ဂျာမနီ၊ ပြင်သစ်နှင့် ဗြိတိန်နိုင်ငံတို့က ပူးတွဲကြေညာချက်ထုတ်ပြန်ခဲ့ကြောင်း၊ လွန်ခဲ့သည့်ရက်ပိုင်းအတွင်း ထုတ်ပြန်သည့် အဆိုပါပူးတွဲ ကြေညာချက်အရ အမေရိကန်အစိုးရသည် အီရန်၏ဘဏ္ဍာရေးဆိုင်ရာကဏ္ဍများအပေါ်၌လည်း အရေးယူပိတ်ဆို့မှုများချမှတ်ထားရာ အီရန်နိုင်ငံနှင့် ကုန်သွယ်ဖက်နိုင်ငံများအတွက် ကုန်သွယ်ရေးနှင့် ပတ်သက်၍ ပေးချေမှုဆိုင်ရာကိစ္စများတွင် အခက်အခဲများနှင့် ကြုံတွေ့ရလျက်ရှိသည့်အတွက် ဂျာမနီ၊ ပြင်သစ်နှင့် ဗြိတိန်နိုင်ငံတို့သည် အမေရိကန်အစိုးရ၏ အရေးယူပိတ်ဆို့မှုများနှင့် ငြိစွန်းခြင်းမရှိစေဘဲ အီရန်နိုင်ငံနှင့် တရားဝင် ကုန်သွယ်ရေးပေးချေမှုများ ဆောင်ရွက်နိုင်ရန်အတွက် INSTEX ဟုအမည်ပေးထားသော ကုန်သွယ်ရေးစနစ်တစ်ခုကို ပူးတွဲအကောင်အထည်ဖော် ဖန်တီးသွား မည်ဖြစ်ကြောင်း၊ ဂျာမနီ၊ ပြင်သစ်နှင့် ဗြိတိန်နိုင်ငံတို့သည် ယင်း INSTEX စနစ်အားအောင်မြင်စွာ အကောင်အထည်ဖော်နိုင်မည့်နည်းလမ်းများကို စူးစမ်းရှာဖွေသွားမည်ဖြစ်ပြီး အီရန်ကုမ္ပဏီများ နှင့် ဂျာမနီ၊ ပြင်သစ်၊ ဗြိတိန် ကုမ္ပဏီများအကြား ကုန်သွယ်ရေး အဆင်ပြေချောမွေ့စေရန်ရည်ရွယ်၍ အဆိုပါ INSTEX စနစ်အား ဖော်ဆောင်မည်ဖြစ်သည့်အပြင် ဥရောပသမဂ္ဂနိုင်ငံများနှင့် အီရန် နိုင်ငံအနေဖြင့်လည်း ‘၂၀၁၅ အီရန်နျူကလီးယားလျှော့ချရေးသဘောတူစာချုပ်’အား မပျက် မကွက်လိုက်နာနိုင်စေရန်အတွက်လည်း ရည်ရွယ်လုပ်ဆောင်လိုခြင်းဖြစ်ကြောင်း၊ အနာဂါတ်ကာလတွင် အဆိုပါ INSTEX စနစ်အတွင်း ပါဝင်လိုသည့်မည်သည့်နိုင်ငံကိုမဆို ကြိုဆိုလက်ခံသွားမည်ဖြစ်ကြောင်း၊ အမေရိကန်အစိုးရက အီရန်နိုင်ငံအား အရေးယူပိတ်ဆို့မှုများချမှတ်ထား စဉ်တွင် အီရန်နိုင်ငံနှင့် စီးပွားဆက်ဆံမှုပြုလုပ်ခြင်းကြောင့် အမေရိကန်အစိုးရက အရေးယူပိတ်ဆို့ ခြင်းများ လုပ်ဆောင်လာမည်ကို စိုးရိမ်ပူပန်လျက်ရှိသည့်အတွက် များစွာသောစိုက်ပျိုးရေးနှင့် ဆေးဝါးကုမ္ပဏီများသည် အီရန်နှင့်ကုန်သွယ်ခြင်းကို ရပ်ဆိုင်းခဲ့ကြကြောင်း၊ သို့ရာတွင် လယ်ယာထွက်ကုန်များ၊ စားသောက်ကုန်များ၊ ဆေးဝါးများနှင့် ဆေးဘက်ဆိုင်ရာပစ္စည်းကိရိယာများမှာ အီရန်နိုင်ငံအပေါ်ချမှတ်သည့်အရေးယူပိတ်ဆို့မှုတွင် ပါဝင်ခြင်းမရှိကြောင်း၊ ထို့ကြောင့် ဂျာမနီ၊ ပြင်သစ်၊ ဗြိတိန်နိုင်ငံတို့သည် အဆိုပါ INSTEX စနစ်ဖြင့် အီရန်နိုင်ငံနှင့် ကုန်သွယ်ရာ၌ အီရန် နိုင်ငံသားများအတွက် အရေးပါသော အဆိုပါကုန်စည်များကို အဓိကထားကုန်သွယ်မှုပြုသွားမည် ဖြစ်ကြောင်း၊ ဂျာမနီ၊ပြင်သစ်၊ ဗြိတိန်နိုင်ငံတို့သည် အဆိုပါ INSTEX စနစ်အတွင်း ပါဝင်လိုသည့် စိတ်ပါဝင်စားသော ဥရောပနိုင်ငံများနှင့်တွဲဖက်၍ယင်း INSTEX စနစ်ရေရှည်ဖွံ့ဖြိုးတိုးတက်လာစေရန် ရှေ့တိုးလုပ်ဆောင်သွားရန် ဂျာမနီ၊ ပြင်သစ်နှင့် ဗြိတိန်နိုင်ငံတို့က ဆုံးဖြတ်ချက်ချထားသည်ဟုသိရှိရကြောင်း ဖော်ပြပါရှိပါသည်။

ရည်ညွှန်း www.rt.com

မွတ်စလင်ဒုက္ခသည်အရေး ရေရှည်စီမံကိန်းဖြင့် ကိုင်တွယ်ဖြေရှင်းနိုင်ရေးအတွက် ဘင်္ဂလားဒေ့ရှ်နိုင်ငံအနေဖြင့် မွတ်စလင်အရေးနှင့်ပတ်သက်၍ လုပ်ဆောင်လျက်ရှိသည့်အစီအမံများအား ပြောင်းလဲလုပ်ဆောင်ရန်လိုအပ်သည်ဟု ကနေဒါဝန်ကြီးချုပ်၏ မြန်မာနိုင်ငံဆိုင်ရာ အထူးသံတမန်ဘော့ရေးက ပြောကြားခဲ့မှု

မွတ်စလင်ဒုက္ခသည်အရေး ရေရှည်စီမံကိန်းဖြင့် ကိုင်တွယ်ဖြေရှင်းနိုင်ရေးအတွက် ဘင်္ဂလားဒေ့ရှ်နိုင်ငံ အနေဖြင့် မွတ်စလင်အရေးနှင့်ပတ်သက်၍ လုပ်ဆောင်လျက်ရှိသည့်အစီအမံများအား ပြောင်းလဲလုပ်ဆောင်ရန်လိုအပ်သည်ဟု ကနေဒါဝန်ကြီးချုပ်၏ မြန်မာနိုင်ငံဆိုင်ရာ အထူးသံတမန်ဘော့ရေးက ပြောကြားခဲ့မှု

ဘင်္ဂလားဒေ့ရှ်နိုင်ငံရှိ မွတ်စလင်ဒုက္ခသည်များသည် မြန်မာနိုင်ငံ၊ ရခိုင်ပြည်နယ်အတွင်း နယ်မြေဒေသအခြေအနေတည်ငြိမ်မှု မရှိခြင်းနှင့် လုံခြုံမှုမရှိခြင်းတို့ကိုအကြောင်းပြကာ နေရပ်ပြန်ရန်ငြင်းဆန်လျက်ရှိပြီး ဒုက္ခသည်များနေရပ်ပြန်ရေးအစီအစဉ် နှင့်ပတ်သက်၍ နှောင့်နှေးကြန့်ကြာမှု များဖြစ်ပေါ်လျက်ရှိသောကြောင့် မွတ်စလင်ဒုက္ခသည်အရေး ရေရှည်စီမံကိန်းဖြင့် ကိုင်တွယ်ဖြေရှင်းနိုင်ရေးအတွက် ဘင်္ဂလားဒေ့ရှ်နိုင်ငံအနေဖြင့် မွတ်စလင်အရေးနှင့်ပတ်သက်၍ လုပ်ဆောင်လျက်ရှိသည့် အစီအမံများအား ပြောင်းလဲလုပ်ဆောင်ရန်လိုအပ်သည်ဟု ကနေဒါဝန်ကြီးချုပ် ဂျပ်စတင်ထရူးဒိုး၏ မြန်မာနိုင်ငံဆိုင်ရာ အထူးသံတမန်ဘော့ရေး က ၂၀၁၉ ခုနှစ်၊ ဖေဖေါ်ဝါရီလ (၅)ရက်(အင်္ဂါနေ့) တွင် ပြောကြားခဲ့ကြောင်း သိရှိရပါသည်။

ဒါကာမြို့တွင်ကျင်းပပြုလုပ်ခဲ့သည့် မွတ်စလင်အရေးဖြေရှင်းရေးဆိုင်ရာဆွေးနွေးပွဲတွင် ကနေဒါနိုင်ငံ၏ မြန်မာနိုင်ငံဆိုင်ရာ အထူးသံတမန်ဘော့ရေးကပြောကြားရာ၌ မွတ်စလင်အရေး ရှေရှည်တွင် ကိုင်တွယ်ဖြေရှင်းနိုင်စေရေးအတွက် မိမိတို့အနေဖြင့် အစီအစဉ်အသစ်တစ်ခုအား ပြောင်းလဲလုပ်ဆောင်ရန်လိုအပ်နေပြီဖြစ်ရာ အဆိုပါ မွတ်စလင်ဒုက္ခသည်များအတွက် ပညာသင်ကြားရေးနှင့် ဝင်ငွေရပေါက်ရလမ်းရှိသည့်အခွင့်အလမ်းများကို ဖန်တီးပေးသွားရမည်ဖြစ်သည့်အပြင် မွတ်စလင်များအပေါ်အကြမ်းဖက်ခဲ့သည်ဟူသော စွပ်စွဲချက်နှင့်ပတ်သက်၍ တာဝန်ရှိသူများအပေါ် အရေးယူနိုင်ရေးနှင့်တရားမျှတရေးဆိုင်ရာ ကိစ္စရပ်များကို အချိန်ယူလုပ်ဆောင်သွားရမည်ဖြစ်ကြောင်း၊ အထူးသဖြင့် မွတ်စလင်ဒုက္ခသည်များအား ပညာသင်ကြားရေးနှင့် အလုပ်အကိုင်အခွင့်အလမ်းများပေးအပ်နိုင်ခြင်းမရှိပါက ရေရှည်တွင်မွတ်စလင်ဒုက္ခသည်များသည် ရာဇဝတ်မှုများနှင့် အစွန်းရောက်ဝါဒများဘက်သို့ ဦးတည်ပြောင်းလဲရောက်ရှိသွားနိုင်ကြောင်း၊ မွတ်စလင် ဒုက္ခသည်(၁) သန်းကျော်နေထိုင်လျက်ရှိသည့် ဘင်္ဂလားဒေ့ရှ်နိုင်ငံသည်၎င်းတို့အတွက် လူသားချင်းစာနာထောက်ထားမှုဆိုင်ရာ အထောက်အပံ့များ ပေးအပ်နေရလျက်ရှိရာ ဘင်္ဂလားဒေ့ရှ်နိုင်ငံအနေဖြင့် ကြီးမားသည့် ဝန်ထုတ်ဝန်ပိုးများနှင့်အတူ နိုင်ငံရေးဆိုင်ရာစိန်ခေါ်မှုများနှင့်ပါ ရင်ဆိုင်နေရသည့်အတွက် ကမ္ဘာ့နိုင်ငံများအနေဖြင့် အသိအမှတ်ပြုကြစေလိုကြောင်း၊ ဒုက္ခသည်စခန်းများတွင် နေထိုင်ရာအမိုးအကာများ၊ ကျန်းမာရေးစောင့်ရှောက်ပေးမှုများနှင့် မိလ္လာစနစ်အပါအဝင် သန့်ရှင်းရေးဆိုင်ရာဝန်ဆောင်မှုများမှာ ယခုအခါအထူးကောင်းမွန်လာသည့်နည်းတူ အခြားတစ်ဖက်တွင်လည်း ဒုက္ခသည်များ နေရပ်ပြန်ရေးနှင့်အကြမ်းဖက်ခံခဲ့ရမှုများနှင့်ပတ်သက်၍ တာဝန်ရှိသူများအပေါ် တာဝန်ယူမှု၊ တာဝန်ခံမှု ရှိစေရန် အားထုတ်ကြိုးပမ်းလျက်ရှိသည့် ဘင်္ဂလားဒေ့ရှ်နိုင်ငံနှင့် နိုင်ငံတကာအသိုက်ဝန်းတို့ အနေဖြင့်လည်း အချိန်ယူကာလုပ်ဆောင်သွားကြစေလိုကြောင်း၊ ထို့ကြောင့် မွတ်စလင်ဒုက္ခသည်များအပေါ် ပညာသင်ကြားရေးနှင့် အလုပ်အကိုင်အခွင့်အလမ်းများရရှိရန် အစီအမံများပြောင်းလဲလုပ်ဆောင်ဖန်တီးပေးခြင်းသည်သာလျှင် မွတ်စလင်ဒုက္ခသည်များကိုသာမက ဒေသခံ ဘင်္ဂလားဒေ့ရှ် နိုင်ငံသားများအတွက်ကိုပါ ရေရှည်တွင်တိုက်ရိုက် အကျိုးကျေးဇူးများရရှိခံစားကြရလိမ့်မည်ဖြစ်ကြောင်း၊ ထို့အတူ မွတ်စလင်များအကြမ်းဖက်ခံခဲ့ရမှုများအတွက် တာဝန်ခံနိုင်ရေးအတွက်ကိုသာ ရည်မှန်း၍ မြန်မာနိုင်ငံအားအရေးယူပိတ်ဆို့ရန် တွန်းအားပေးလုပ်ဆောင်ခြင်းသည် ကောင်းမွန်သည့်နည်းလမ်းတစ်ရပ်မဟုတ်ဘဲ တရုတ်နိုင်ငံထံသို့ပိုမိုတွန်းပို့ပေးနေသကဲ့သို့သာ ဖြစ်စေလိမ့်မည်ဟု ပြောကြားခဲ့ကြောင်း သိရှိရပါသည်။

ထို့နောက် ဘင်္ဂလားဒေ့ရှ်နှင့် မြန်မာနှစ်နိုင်ငံ အပြန်အလှန်ယုံကြည်မှု တည်ဆောက်နိုင်စေရေးအတွက် အရပ်ဘက်လူမှုအဖွဲ့အစည်းများ၊ ပညာရှင်များနှင့် အငြိမ်းစားစစ်ဘက်အရာရှိများ ပါဝင်သော မြန်မာအဖွဲ့ဝင်များနှင့် ပိုမိုအလေးပေးထိတွေ့ဆက်ဆံမှုများပြုလုပ်ရန်ဟူသော အငြိမ်းစား ဘင်္ဂလားဒေ့ရှ် တပ်မတော်အရာရှိကြီးတစ်ဦး၏ အကြုံပြုချက်နှင့်ပတ်သက်၍ ဘင်္ဂလားဒေ့ရှ် နိုင်ငံခြားရေးဝန်ကြီးဌာနအတွင်းဝန် ရှာဟီရာအလာမ်ကသဘောတူညီခဲ့ပြီး ဘင်္ဂလားဒေ့ရှ်အစိုးရအနေဖြင့် မြန်မာနိုင်ငံနှင့် ထိတွေ့ဆက်ဆံမှုများ ပိုမိုတိုးမြှင့်ပြုလုပ်သွားမည်ဖြစ်ကာ မွတ်စလင်အရေးဖြေရှင်းနိုင်ရေးအတွက် အာဆီယံအဖွဲ့နှင့်အတူ ပူးပေါင်းဆောင်ရွက်မှုများကို တိုးမြှင့်လုပ်ဆောင်သွားမည် ဖြစ်ကြောင်း၊ နိုင်ငံတကာအသိုက်အဝန်းများအနေဖြင့်လည်း မွတ်စလင်များ နေရပ်ပြန်နိုင်ရေးအတွက် မြန်မာနိုင်ငံ အပေါ်ဆက်လက်ဖိအားပေးကြစေလိုပြီး မိမိတို့ဘင်္ဂလားဒေ့ရှ်အစိုးရအနေဖြင့် မွတ်စလင်ကလေးငယ်ဦးရေ (၄) သိန်းတို့၏ လိုအပ်လျက်ရှိသောပညာသင်ကြားရေးဆိုင်ရာ ကိစ္စရပ်များကို ဆောင်ရွက်သွားမည်ဖြစ်ကာ ထိုသို့လုပ်ဆောင်နိုင်ရေးအတွက် မိမိတို့အနေဖြင့် အခြေအနေအခွင့်အလမ်းကောင်းများ ရရှိရန်လိုအပ်သည်ဟု ပြန်လည်ပြောကြားခဲ့ကြောင်း သိရှိရပါသည်။

အဆိုပါ မြန်မာနိုင်ငံဆိုင်ရာ အထူးသံတမန် ဘော့ရေး ၏အကြံပြုချက်သည် ကုလသမဂ္ဂ၏ ပူးတွဲဆောင် ရွက်မှုအစီအစဉ်တစ်ရပ်ဖြစ်ပြီး မွတ်စလင်ဒုက္ခသည်များနှင့်ပတ်သက်၍ ၂၀၁၉ ခုနှစ် အတွက် မျှော်မှန်းကူညီထောက်ပံ့ငွေအမေရိကန်ဒေါ်လာသန်း (၉၂၀) ရရှိရေးအစီစဉ်ဖြစ်သည့် အလှူငွေကောက်ခံမှုအသစ်မပြုလုပ်မီ ယခုကဲ့သို့ အကြံပြုပြောကြားခဲ့ခြင်းဖြစ်ကြောင်း၊ အဆိုပါမွတ်စလင် အရေးဆွေးနွေးပွဲသို့ ဘင်္ဂလားဒေ့ရှ်နိုင်ငံခြားရေးဝန်ကြီးဌာန အတွင်းဝန် ရှာဟီရာအလာမ်နှင့် ဘင်္ဂလားဒေ့ရှ်နိုင်ငံဆိုင်ရာ ကနေဒါသံအမတ်ကြီး ဘီနိုက်ပရီဖွန်တေး တို့တက်ရောက်ခဲ့ကြသည်ဟု သိရှိရကြောင်း ဖော်ပြပါရှိပါသည်။

ရည်ညွှန်း www.thedailystar.net

ဗြိတိန်နိုင်ငံ၏ ဝန်ဆောင်မှုလုပ်ငန်းကဏ္ဍ တိုးတက်မှုအနေအထားမှာ ၂၀၁၆ ခုနှစ်နောက်ပိုင်း အနိမ့်ဆုံးအနေအထားသို့ ရောက်ရှိခဲ့သည့်အတွက် ဗြိတိန်စတာလင်ပေါင်တန်ဖိုးကျဆင်းခဲ့မှု

၂၀၁၉ ခုနှစ်၊ ဇန်နဝါရီလအတွင်း ဗြိတိန်နိုင်ငံ၏ ဝန်ဆောင်မှုဆိုင်ရာလုပ်ငန်းကဏ္ဍများ တိုးတက်မှု အနေအထားမှာ (၂) နှစ်ကျော်ကာလအတွင်း အနိမ့်ဆုံးသို့ရောက်ရှိခဲ့သည်ဟု လန်ဒန်အခြေစိုက် သတင်းအချက်အလက်ထုတ်ပြန်ရေးဝန်ဆောင်မှုလုပ်ငန်း (IHS Markit) မှ အစီရင်ခံစာထုတ်ပြန်ခဲ့ရာ အဆိုပါအစီရင်ခံစာထွက်ပေါ်ခဲ့ခြင်းကို အကြောင်းပြု၍ ဗြိတိန်စတာလင်ပေါင် တန်ဖိုးမှာကျဆင်းခဲ့သည်ဟုသိရှိရပါသည်။

IHS Markit မှ ၂၀၁၉ ခုနှစ်၊ ဖေဖော်ဝါရီလ(၄) ရက်(တနင်္လာနေ့) တွင် ထုတ်ပြန်သည့် အစီရင်ခံစာ၌ ၂၀၁၉ ခုနှစ်၊ ဇန်နဝါရီလတွင် ဗြိတိန်နိုင်ငံရှိ ဆောက်လုပ်ရေးလုပ်ငန်းကဏ္ဍ တိုးတက်မှုအခြေအနေမှာ ၂၀၁၈ ခုနှစ်၊ ဒီဇင်ဘာလတွင်ဖြစ်ပေါ်ခဲ့သည့် တိုးတက်မှုအညွှန်းကိန်းပမာဏနှင့် နှိုင်းယှဉ်ပါက (၅၂.၈) အောက်လျော့နည်းကာ (၅၀.၆) သာရှိခဲ့သည်ဟု ဖော်ပြထားကြောင်း၊ အလားတူ ဖေဖော်ဝါရီလ(၅) ရက် (အင်္ဂါနေ့) တွင် ထပ်မံထုတ်ပြန်သည့်အစီရင်ခံစာ၌လည်း လွန်ခဲ့သည့်ဇန်နဝါရီလ အတွင်း ဗြိတိန်နိုင်ငံ၏ဝန်ဆောင်မှုဆိုင်ရာလုပ်ငန်းကဏ္ဍများ၏ တိုးတက်မှုအညွှန်းကိန်းပမာဏမှာ ၂၀၁၈ ခုနှစ်၊ ဒီဇင်ဘာလတွင်ဖြစ်ပေါ်ခဲ့သည့် ပမာဏနှင့်နှိုင်းယှဉ်ပါက မျှော်မှန်းထားသည့်ပမာဏ အောက်သို့ကျဆင်းကာတိုးတက်မှုအညွှန်းကိန်းပမာဏ (၅၀.၁) သာ ရှိခဲ့သည်ဟု ဖော်ပြထားရာ အဆိုပါပမာဏသည် ၂၀၁၆ ခုနှစ်၊ ဇူလိုင်လနောက်ပိုင်း (၂) နှစ်ခွဲတာကာလအတွင်း ပထမဆုံးအကြိမ်အဖြစ် အနိမ့်ဆုံးအနေအထားပင်ဖြစ်ကြောင်း၊ အဆိုပါ IHS Markit ၏ အစီရင်ခံစာထွက်ပေါ်ပြီးနောက်တွင် ဗြိတိန်နိုင်ငံ၏ စီးပွားရေးအခြေအနေအပေါ် ရင်းနှီးမြှုပ်နှံသူများ၏ စိုးရိမ်ပူပန်မှုများ ထွက်ပေါ်လာခဲ့ပြီးနောက် စတာလင်ပေါင်တန်ဖိုးမှာ ကျဆင်းသွားခဲ့ခြင်းဖြစ်ကြောင်း သိရှိရပါသည်။

ထို့ပြင် ဗြိတိန်နိုင်ငံသည်လာမည့် ၂၀၁၉ ခုနှစ်၊ မတ်လ (၂၉) ရက်နေ့တွင် ဥရောပသမဂ္ဂမှအပြီးတိုင်နုတ်ထွက်ရန် သတ်မှတ်ထားပြီးဖြစ်ရာ မည်ကဲ့သို့သောအခြေအနေမျိုးဖြစ်ပေါ်စေကာမူ သတ်မှတ်ရက်အတိုင်း နုတ်ထွက်သွားမည်ဟု ဗြိတိန်ဝန်ကြီးချုပ်ထရီဇာမေက ထပ်လောင်း အတည်ပြုပြောကြားခဲ့ခြင်းသည်လည်း စတာလင်ပေါင်တန်ဖိုးကိုကျဆင်းစေသည့် အခြားသောအချက်တစ်ခုဖြစ်ကြောင်း၊ ၂၀၁၉ ခုနှစ်၊ ဖေဖော်ဝါရီလ (၆) ရက်(ဗုဒ္ဓဟူးနေ့) နံနက်ပိုင်းတွင်း ကမ္ဘာ့ငွေကြေးဈေးကွက်အတွင်း စတာလင်ပေါင်တန်ဖိုးမှာ ၀.၈% ကျဆင်းပြီးစတာလင်တစ်ပေါင်လျှင် အမေရိကန်ဒေါ်လာ (၁.၃၀၅၁) ဒေါ်လာလဲလှယ်မှုနှုန်းသို့ ရောက်ရှိခဲ့ကြောင်း၊အဆိုပါ လဲလှယ်မှုနှုန်းသည် ၂၀၁၉ ခုနှစ်၊ ဇန်နဝါရီလ (၂၃) ရက်နောက်ပိုင်း ရက်သတ္တပတ်(၂)ပတ်အတွင်း စတာလင်ပေါင်တန်ဖိုး အနိမ့်ဆုံးအနေအထားပင်ဖြစ်သည်ဟုသိရှိရကြောင်းဖြင့် reuters သတင်းဌာနက ထုတ်လွှင့်ခဲ့ပါသည်။

ဘင်္ဂလားဒေ့ရှ်နိုင်ငံရှိ မွတ်စလင်ဒုက္ခသည်များ အမြန်ဆုံးနေရပ်ပြန်နိုင်ရေးအတွက် အင်ဒိုနီးရှားနိုင်ငံ အနေဖြင့် အာဆီယံအဖွဲ့နှင့်အတူ ပိုမိုအလေးပေးလုပ်ဆောင်သွားမည်ဟု အင်ဒိုနီးရှားနိုင်ငံခြားရေး ဝန်ကြီးကပြောကြားခဲ့မှု

ဘင်္ဂလားဒေ့ရှ်နိုင်ငံရှိ မွတ်စလင်ဒုက္ခသည်များ အမြန်ဆုံးနေရပ်ပြန်နိုင်ရေးအတွက် အင်ဒိုနီးရှားနိုင်ငံအနေဖြင့် အာဆီယံအဖွဲ့နှင့်အတူ ပိုမိုအလေးပေးလုပ်ဆောင်သွားမည်ဟု အင်ဒိုနီးရှားနိုင်ငံခြားရေးဝန်ကြီးကပြောကြားခဲ့မှု

ဘင်္ဂလားဒေ့ရှ်နိုင်ငံရှိ မွတ်စလင်ဒုက္ခသည်များ မကြာမီကာလအတွင်း အမြန်ဆုံးနေရပ်ပြန်နိုင်ရေးအတွက် အင်ဒိုနီးရှားနိုင်ငံအနေဖြင့် အာဆီယံအဖွဲ့နှင့်အတူ ပိုမိုအလေးပေးလုပ်ဆောင်သွားမည်ဟု ဘင်္ဂလားဒေ့ရှ်နိုင်ငံသို့ အလည်အပတ်ရောက်ရှိနေသည့် အင်ဒိုနီးရှားနိုင်ငံခြားရေးဝန်ကြီး ရက်နိုအယ်လ်ပီမာဆူဒိုက ၂၀၁၉ ခုနှစ်၊ ဖေဖော်ဝါရီလ (၄) ရက် (တနင်္လာနေ့) တွင် ပြောကြားခဲ့သည်ဟု သိရှိရ ပါသည်။

ဘင်္ဂလားဒေ့ရှ်နိုင်ငံသို့အလည်အပတ်ရောက်ရှိနေသည့် အင်ဒိုနီးရှားနိုင်ငံခြားရေးဝန်ကြီး သည် ဘင်္ဂလားဒေ့ရှ်ဝန်ကြီးချုပ် ရှိတ်ဟာဆီနာနှင့် ဒါကာမြို့ရှိ ဝန်ကြီးချုပ်ရုံးတွင် တွေ့ဆုံခဲ့ပြီး မွတ်စလင်အရေးကိစ္စအပါအဝင် အမျိုးသမီးရေးရာ အခန်းကဏ္ဍများနှင့်ပတ်သက်၍ ဆွေးနွေးခဲ့ကြကြောင်း၊ ထိုသို့တွေ့ဆုံစဉ် အင်ဒိုနီးရှားနိုင်ငံခြားရေးဝန်ကြီးက ပြောကြားရာ၌ မွတ်စလင်များ နေရပ်ပြန်ရေးကိစ္စနှင့် ပတ်သက်၍ မြန်မာနိုင်ငံသို့ အမြန်ဆုံး ပြန်လာနိုင်ရေးအတွက် မြန်မာအစိုးရအနေဖြင့် ရခိုင်ပြည်နယ်အတွင်း ကောင်းမွန်သောပတ်ဝန်းကျင်အခြေအနေများ ဖန်တီးနိုင်စေရန် အထူးအလေးပေး တိုက်တွန်းလုပ်ဆောင်သွားမည်ဖြစ်ကြောင်း၊ ထို့ပြင် နေရပ်ပြန်လာကြမည့် မွတ်စလင် ဒုက္ခသည်များအတွက် မြန်မာနိုင်ငံ၊ ရခိုင်ပြည်နယ်အတွင်း အခြေခံအဆောက်အဦများ ဆောက်လုပ်ထားရှိမှုအခြေအနေများကိုကြည့်ရှုရန် အာဆီယံမှအဖွဲ့ဝင်များပါဝင်သော အာဆီယံအဖွဲ့(၂) ဖွဲ့သည် မကြာမီကာလအတွင်း မြန်မာနိုင်ငံသို့ အလည်အပတ် သွားရောက်လိမ့်မည်ဖြစ်ကြောင်း၊ ထို့ပြင် ဘင်္ဂလားဒေ့ရှ်နိုင်ငံ၏ ဖြစ်ပေါ်လျက်ရှိသော လူမှုစီးပွားဖွံ့ဖြိုးတိုးတက်မှုများနှင့် ရှိတ်ဟာဆီနာ၏ ခေါင်းဆောင်မှုအောက်တွင် အုပ်ချုပ်ရေး၊ တရားစီရင်ရေး၊ ပညာရေးနှင့် အားကစားကဲ့သို့သော အခန်းကဏ္ဍများတွင် အမျိုးသမီးများ၏ လုပ်ပိုင်ခွင့် မြှင့်တင်ခဲ့ခြင်းများနှင့် ပတ်သက်၍ ချီးကျူးပါသည်ဟု ပြောကြားခဲ့ကြောင်း သိရှိရပါသည်။

အဆိုပါတွေ့ဆုံဆွေးနွေးမှုအတွင်း ဝန်ကြီးချုပ်ရှိတ်ဟာဆီနာက ပြန်လည်ပြောကြားရာ၌ မြန်မာနိုင်ငံ၊ ရခိုင်ပြည်နယ်အတွင်း နေရပ်ပြန်လာကြမည့် မွတ်စလင်ဒုက္ခသည်များ နေထိုင်နိုင်စေရေးအတွက် နေအိမ်အဆောက်အဦအချို့ကို တရုတ်၊ အိန္ဒိယနှင့် ဂျပန်နိုင်ငံများက စီစဉ်ဆောက်လုပ်ထားခဲ့ပြီး ဖြစ်သော်လည်း မြန်မာနိုင်ငံတွင် နေထိုင်လျက်ရှိသည့် အချို့သောမွတ်စလင်များသည် လက်ရှိအချိန်ထိ ဘင်္ဂလားဒေ့ရှ်နိုင်ငံအတွင်းသို့ဝင် ရောက်ရန်ကြိုးပမ်းလျက်ရှိသည်ဟု ပြန်လည်ပြောကြားခဲ့ကြောင်း၊ ထို့နောက် ဘင်္ဂလားဒေ့ရှ်ဝန်ကြီးချုပ်နှင့် အင်ဒိုနီးရှားနိုင်ငံခြားရေးဝန်ကြီးတို့သည် နှစ်နိုင်ငံဆက်ဆံရေးဆိုင်ရာကိစ္စများနှင့် စီးပွားရေးဆိုင်ရာ ကိစ္စရပ်များကိုဆွေးနွှေးခဲ့ကြပြီး အဆိုပါအစည်းအဝေးသို့ ဘင်္ဂလားဒေ့ရှ်နိုင်ငံခြားရေးဝန်ကြီး အေကေအဗ္ဗဒူလ်မိုမန်၊ ဝန်ကြီးချုပ်ရုံး အတွင်းရေးမှူးဆက်ဂျာဒူဟာဆန်နှင့် ဘင်္ဂလားဒေ့ရှ်နိုင်ငံဆိုင်ရာ အင်ဒိုနီးရှားသံအမတ်ကြီး ရီနာပရီတာရှိမာဆီဆိုမာနိုတို့လည်း တက်ရောက်ခဲ့ကြသည်ဟု သိရှိရပါသည်။

အလားတူ ကုလသမဂ္ဂဒုက္ခသည်များဆိုင်ရာ မဟာမင်းကြီးရုံး(UNHCR)၏ အထူးသံတမန် ဖြစ်ပြီး ကမ္ဘာကျော် ရုပ်ရှင်သရုပ်ဆောင်ဖြစ်သူ အိန်ဂျလီနာဂျိုလီသည် ၂၀၁၉ ခုနှစ်၊ ဖေဖော်ဝါရီလ (၅)ရက် (အင်္ဂါနေ့) နံနက်ပိုင်းတွင် ဘင်္ဂလားဒေ့ရှ်နိုင်ငံရှိ မွတ်စလင်ဒုက္ခသည် စခန်းများသို့ ရောက်ရှိလာခဲ့ကြောင်း၊ ရှေးဦးစွာ သူမသည် ကော့ဘဇားဒေသရှိ ဒုက္ခသည်အများစုနေထိုင်ရာ ကူတူပါလောင် ဒုက္ခသည်စခန်းများသို့ ဦးစွာသွားရောက်ခဲ့ကြောင်း ထို့နောက် ကူတူပါလောင်ဒုက္ခသည်စခန်းများရှိရာ ဒုက္ခသည်စခန်း(၄) ခုရှိ ကျန်းမာရေးစောင့်ရှောက်မှု စင်တာများအား လေ့လာကြည့်ရှုခဲ့ပြီးနောက် ဒုက္ခသည်အမျိုးသမီးများနှင့်တွေ့ဆုံခဲ့ကြောင်း၊ အိန်ဂျလီနာဂျိုလီသည် ကုလသမဂ္ဂ၏ ၂၀၁၉ ခုနှစ်အတွက် ငွေကြေးအကူအညီ ရရှိရေးအစီအစဉ်သစ် တစ်ရပ်ဖြစ်သည့် အမေရိကန်ဒေါ်လာ(၁) ဘီလီယံခန့် အကူအညီရရှိနိုင်ရေးအတွက် မျှော်မှန်းကာ ဘင်္ဂလားဒေ့ရှ်နိုင်ငံသို့ လာရောက်ခဲ့ခြင်းဖြစ်ပြီး ကုလသမဂ္ဂအနေဖြင့် အိန်ဂျလီနာဂျိုလီ၏ အဆိုပါခရီးစဉ်ကြောင့် ငွေကြေးအကူအညီ အမေရိကန်ဒေါ်လာသန်း (၉၂၀) ခန့်ရရှိရန် မျှော်မှန်းထားသည်ဟု သိရှိရပါသည်။

ရည်ညွှန်း www.newagebd.net

၂၀၁၈ ခုနှစ်အတွင်း ကမ္ဘာတစ်ဝန်း ဗဟိုဘဏ်များ၏ ရွှေဝယ်ယူမှုပမာဏမှာ ၁၉၆၇ ခုနှစ်နောက်ပိုင်း အများဆုံးအနေအထားသို့ရောက်ရှိခဲ့မှု

၂၀၁၈ ခုနှစ်အတွင်း ကမ္ဘာတစ်ဝန်းဗဟိုဘဏ်များ၏ ရွှေဝယ်ယူမှုပမာဏမှာ ၁၉၆၇ ခုနှစ်နောက်ပိုင်း အများဆုံးအနေအထားသို့ရောက်ရှိခဲ့မှု

လွန်ခဲ့သည့်ရက်ပိုင်းအတွင်း ကမ္ဘာ့ရွှေကောင်စီမှထုတ်ပြန်သည့် အစီရင်ခံစာအရ ကမ္ဘာ တစ်ဝန်းဗဟိုဘဏ်များ၏ ရွှေဝယ်ယူမှု ပမာဏမှာ ၁၉၆၇ ခုနှစ်နောက်ပိုင်း အများဆုံးအနေအထားသို့ ရောက်ရှိခဲ့ခြင်းနှင့်အတူ ကမ္ဘာတစ်ဝန်းစုစုပေါင်း ရွှေဝယ်လိုအားပမာဏမှာလည်း ၄% ခန့် မြင့်တက် ခဲ့သည်ဟု သိရှိရပါသည်။

ကမ္ဘာ့ရွှေကောင်စီမှ ထုတ်ပြန်သည့်အစီရင်ခံစာအရ ၂၀၁၈ခုနှစ်အတွင်း ကမ္ဘာတစ်ဝန်း ဗဟိုဘဏ်များ၏ရွှေဝယ်ယူမှုစုစုပေါင်းပမာဏမှာ ၂၀၁၇ ခုနှစ်နှင့် နှိုင်းယှဉ်ပါက ၇၄% မြင့်တက်ခဲ့ပြီး တန်ချိန် (၆၅၁.၅)တန်ခန့် ရှိခဲ့ကာ အဆိုပါရွှေများကို အဓိကအားဖြင့် ရုရှား၊ တရုတ်၊ တူရကီ၊ ပိုလန်၊ ကာဇက်စတန်နှင့်မွန်ဂိုလီးယားနိုင်ငံဗဟိုဘဏ်များက ဝယ်ယူခဲ့ကြခြင်းဖြစ်ကြောင်း၊ ရုရှားဗဟိုဘဏ်သည် အမေရိကန်ဒေါ်လာ အသုံးပြုမှုလျှော့ချရေး ဆောင်ရွက်ချက်အနေဖြင့် အမေရိကန်ဒေါ်လာ အခြေခံသော ငွေတိုက်စာချုပ်များကို ထုတ်ရောင်းကာ ရွှေဝယ်ယူစုဆောင်းမှုကို တိုးမြှင့်လုပ်ဆောင် ခဲ့ခြင်းဖြစ်ပြီး ယခုအခါ ကမ္ဘာပေါ်၌ ရွှေဝယ်ယူစုဆောင်းမှု ပဉ္စမမြောက် အများဆုံးနိုင်ငံအဖြစ် ရပ်တည် လျက်ရှိကြောင်း၊ ၂၀၁၈ခုနှစ်အတွင်း အမေရိကန်-တရုတ် ကုန်သွယ်ရေးတင်းမာမှုများ ဖြစ်ပေါ်ခဲ့ခြင်း၊ အရှေ့အလယ်ပိုင်းဒေသ မတည်ငြိမ်ခြင်း၊ အမေရိကန်အစိုးရက ရုရှား၊ အီရန်နှင့် ဗင်နီဇွဲလား နိုင်ငံများအား အရေးယူပိတ်ဆို့မှုများ ချမှတ်ထားခြင်း၊ ဥရောပသမဂ္ဂမှ ဗြိတိန်နိုင်ငံ နုတ်ထွက်ရေးနှင့်ပတ်သက်၍ မသေချာမရေရာမှုများ ဖြစ်ပေါ်နေခြင်း အစရှိသည့်အခြေအနေများနှင့်ဆက်နွယ်ကာ ကမ္ဘာ့စီးပွားရေးနှေးကွေးမှုများ ဖြစ်ပေါ်လာမည့်အပေါ် စိုးရိမ်ပူပန်မှုများကြောင့် ကမ္ဘာတစ်ဝန်းဗဟိုဘဏ်များသည် ရွှေဝယ်ယူစုဆောင်းမှုများ လုပ်ဆောင်ခဲ့ကြခြင်းဖြစ်သည်ဟု သိရှိရပါသည်။

အလားတူ ၂၀၁၈ ခုနှစ်အတွင်း ကမ္ဘာတစ်ဝန်း စုစုပေါင်းရွှေဝယ်လိုအားပမာဏမှာ တန်ချိန် (၄၃၄၅.၁) တန်ခန့်ရှိခဲ့ရာ ၂၀၁၇ ခုနှစ်အတွင်းဖြစ်ပေါ်ခဲ့သည့် ကမ္ဘာတစ်ဝန်း ရွှေဝယ်လိုအား ပမာဏ (၄၁၅၉.၉) တန်နှင့် နှိုင်းယှဉ်ပါက ၄% ဝန်းကျင်ခန့် မြင့်တက်ခဲ့ခြင်းဖြစ်သည်ဟု ကမ္ဘာ့ရွှေကောင်စီ၏ အစီရင်ခံစာအရ သိရှိရကြောင်း ruters သတင်းဌာနက ထုတ်လွှင့်ခဲ့ပါသည်။

မှတ်ချက်။ ၂၀၁၈ခုနှစ်၊ ဒီဇင်ဘာလတွင် ကမ္ဘာပေါ်၌ ရွှေပိုင်ဆိုင်မှု အများဆုံးနိုင်ငံ(၁၀)နိုင်ငံမှာ အမေရိကန်(၈၄၀၇.၃၉တန်)၊ ဂျာမနီ(၃၄၈၃.၂၁တန်)၊ အီတလီ(၂၅၃၄.၄၁တန်)၊ ပြင်သစ် (၂၅၁၈.၀၈တန်)၊ ရုရှား(၂၁၈၄.၁၉တန်)၊ တရုတ်(၁၉၀၄.၆၁တန်)၊ ဆွစ်ဇာလန်(၁၀၇၅.၀၂တန်)၊ ဂျပန်(၇၉၀.၉၉တန်)၊ နယ်သာလန်(၆၃၃.၀၈)နှင့် အိန္ဒိယ(၆၁၈.၇၄တန်)တို့ဖြစ်ကြောင်း သိရှိရပါသည်။

အိုပက်အဖွဲ့၏ ရေနံထုတ်လုပ်မှုလျှော့ချခြင်းနှင့် ဗင်နီဇွဲလားနိုင်ငံပိုင် ရေနံလုပ်ငန်းအရေးယူပိတ်ဆို့ခံရခြင်း စသည့်အခြေအနေများကြောင့် ၂၀၁၉ ခုနှစ်၊ ဇန်နဝါရီလတွင် ကမ္ဘာ့ရေနံဈေးနှုန်းများမှာ ၁၈% ခန့် မြင့်တက်ခဲ့မှု

အိုပက်အဖွဲ့၏ ရေနံထုတ်လုပ်မှုလျှော့ချခြင်းနှင့် ဗင်နီဇွဲလားနိုင်ငံပိုင် ရေနံလုပ်ငန်းအရေးယူပိတ်ဆို့ခံရခြင်း စသည့်အခြေအနေများကြောင့် ၂၀၁၉ ခုနှစ်၊ ဇန်နဝါရီလတွင် ကမ္ဘာ့ရေနံဈေးနှုန်းများမှာ ၁၈% ခန့် မြင့်တက်ခဲ့မှု

အိုပက်အဖွဲ့၏ရေနံထုတ်လုပ်မှုလျှော့ချခြင်းနှင့် ဗင်နီဇွဲလားနိုင်ငံပိုင်ရေနံလုပ်ငန်းအား အမေရိကန်အစိုးရက အရေးယူပိတ်ဆို့မှုချမှတ်ခဲ့ခြင်းအပါအဝင် အခြားသောအခြေအနေများကြောင့် ရေနံဈေးနှုန်းများမှာ ၂၀၁၉ ခုနှစ်၊ ဇန်နဝါရီလအတွင်း ၁၈% ဝန်းကျင်ခန့်မြင့်တက်ခဲ့သည်ဟု သိရှိရကြောင်း၊ အိုပက်အဖွဲ့ဝင်နိုင်ငံများနှင့်အဖွဲ့ဝင်မဟုတ်သောနိုင်ငံများသည် တစ်နေ့လျှင်ရေနံစည်ပေါင်း (၁.၂) သန်း လျှော့ချထုတ်လုပ်ရေးသဘောတူညီချက်ကို ၂၀၁၉ ခုနှစ်၊ ဇန်နဝါရီလ (၁) နေ့မှ စ၍ အကောင်အထည်ဖော်ဆောင်ရွက်လျက်ရှိရာ အဆိုပါသဘောတူညီချက်အရ အိုပက်အဖွဲ့အနေဖြင့် တစ်နေ့လျှင်ရေနံစည်ပေါင်း (၈) သိန်းလျှော့ချထုတ်လုပ်ရမည်ဖြစ်ပြီး လွန်ခဲ့သည့်ဇန်နဝါရီလအတွင်း၌ အိုပက်အဖွဲ့၏နေ့စဉ်ရေနံလျှော့ချထုတ်လုပ်မှုပမာဏမှာ စည်ပေါင်း (၈.၉) သိန်းခန့်အထိရှိခဲ့ကြောင်း၊ အလားတူ ဆော်ဒီအာရေဗျနိုင်ငံသည်လည်း အမေရိကန်ပြည်ထောင်စုသို့ နေ့စဉ်ရေနံတင်ပို့မှုပမာဏကိုလျှော့ချကာ တစ်နေ့လျှင်စည်ပေါင်း (၄၄၂,၀၀၀) ခန့်သာတင်ပို့ခဲ့ ကြောင်း၊ ထို့ပြင်အမေရိကန်ဗဟိုဘဏ်သည် ဘဏ်တိုးနှုန်းအား လက်ရှိနှုန်းထား၌သာ ဆက်လက်ထားရှိရန်ဆုံးဖြတ်ခဲ့ခြင်းကြောင့် အမေရိကန်ဒေါ်လာတန်ဖိုးကျဆင်းသွားခဲ့ရာ အမေရိကန်ဒေါ်လာဖြင့် ပေးချေရသောရေနံဈေးနှုန်းများမှာ ဈေးသက်သာသည့် အနေအထားသို့ ရောက်ရှိခဲ့သည့်အတွက် ဝယ်လိုအားမြင့်တက်ခဲ့မှုနှင့်အတူ ရေနံဈေးနှုန်းများပါ လိုက်ပါမြင့်တက်ခဲ့ခြင်းဖြစ်ကြောင်း၊ ထိုသို့အမေရိကန်အစိုးရ၏ ဗင်နီဇွဲလားနိုင်ငံပိုင် ရေနံလုပ်ငန်းအား အရေးယူပိတ်ဆို့မှုများချမှတ်ခဲ့ခြင်းကြောင့် အမေရိကန်ပြည်ထောင်စုသို့ ဗင်နီဇွဲလားရေနံဝင် ရောက်မှုမှာ တစ်နေ့လျှင်စည်ပေါင်း(၅) သိန်းခန့် လျော့ကျသွားဖွယ်ရှိသည့် အခြေအနေများကြောင့် ၂၀၁၉ ခုနှစ်၊ ဇန်နဝါရီလအတွင်း ကမ္ဘာ့ရေနံဈေးနှုန်းများမှာ ၁၈% ဝန်းကျင်ခန့် မြင့်တက်ခဲ့ခြင်း ဖြစ်သည်ဟုသိရှိရပါသည်။

ထို့ပြင် လွန်ခဲ့သည့်ရက်ပိုင်းအတွင်း အမေရိကန်နိုင်ငံတစ်ဝန်း ရေနံတူးဖော်ရေးဝန်ဆောင်မှုများကို ဆောင်ရွက်ပေးလျက်ရှိသည့် Baker Hughes ကုမ္ပဏီကထုတ်ပြန်သည့်အစီရင်ခံစာ၌ လွန်ခဲ့သည့်ရက်သတ္တပတ်အတွင်း နိုင်ငံတစ်ဝန်း ရေနံတူးစင်အရေအတွက်မှာ တူးစင် (၁၅) စင်ပိတ်သိမ်းသွားပြီး စုစုပေါင်းတူးစင်အရေအတွက်မှာ (၈၄၇) စင်သာကျန်ရှိတော့သည်ဟု ဖော်ပြထားခြင်းသည်လည်း ရေနံဈေးနှုန်းများကိုမြင့်တက်စေသည့် အခြားသောအချက်တစ်ခုဖြစ်ကြောင်း၊ အဆိုပါ တူးစင်အရေအတွက်မှာ ၂၀၁၈ ခုနှစ်၊ မေလနောက် ပိုင်း(၈) လတာကာလအတွင်း တူးစင်အရေအတွက် အနည်းဆုံးပင်ဖြစ်ကြောင်း၊၂၀၁၉ ခုနှစ်၊ ဖေဖော်ဝါရီလ(၄)ရက် (တနင်္လာနေ့) တွင် နယူး ယောက်ဈေးကွက်၌ မတ်လအတွက် WTI ရေနံစိမ်းကြိုတင်ရောင်းဝယ်မှုဈေးနှုန်းမှာ တစ်စည်လျှင် အမေရိကန်ဒေါ်လာ (၅၅.၆၃) ဒေါ်လာ၌လည်းကောင်း၊ လန်ဒန်ဈေးကွက်၌ ဘရန့်ရေနံစိမ်း ကြိုတင်ရောင်းဝယ်မှုဈေးနှုန်းမှာ တစ်စည်လျှင် အမေရိကန်ဒေါ်လာ (၆၃.၃၇) ဒေါ်လာ၌လည်း ကောင်းအသီးသီးဖြစ်ပေါ်လျက်ရှိကြောင်း၊ ထို့ပြင်အမေရိကန်ဘဏ္ဍာရေးဝန်ကြီးဌာနသည် အမေရိကန်ဘဏ္ဍာရေးစနစ်နှင့် ချိတ်ဆက်ကာ ဗင်နီဇွဲလားရေနံများကို ဝယ်ယူလျက်ရှိသည့် အခြားသောရေနံလုပ်ငန်းများအား ၂၀၁၉ ခုနှစ်၊ ဧပြီလ(၂၈) ရက် နောက်ဆုံးထားကာ ဗင်နီဇွဲလားရေနံဝယ်ယူမှုကို လျှော့ချပစ်ရမည်ဟု ကြေညာချက်ထုတ်ပြန်ထားသည်ဟုသိရှိရကြောင်း ဖော်ပြပါရှိပါသည်။

ရည်ညွှန်း www.oilprice.com

ပါကစ္စတန်ထောက်လှမ်းရေးအဖွဲ့(ISI)၏ ကျောထောက်နောက်ခံပြုမှုဖြင့် ဘဏ္ဍာငွေများရရှိရန် ဘင်္ဂါလီသောင်းကျန်းသူအဖွဲ့(ARSA)၏ အိန္ဒိယနိုင်ငံအတွင်းသို့ စိတ်ကြွမူးယစ်ဆေးပြားများ မှောင်ခိုတင်သွင်းနေမှုများအပေါ် အိန္ဒိယအစိုးရကစိုးရိမ်ပူပန်လျက်ရှိမှု

ပါကစ္စတန်ထောက်လှမ်းရေးအဖွဲ့(ISI) ၏ ကျောထောက်နောက်ခံပြုမှုဖြင့် ဘဏ္ဍာငွေများရရှိရန် ဘင်္ဂါလီသောင်းကျန်းသူအဖွဲ့(ARSA) ၏ အိန္ဒိယနိုင်ငံအတွင်းသို့ စိတ်ကြွမူးယစ်ဆေးပြားများ မှောင်ခိုတင်သွင်းနေမှုများအပေါ် အိန္ဒိယအစိုးရကစိုးရိမ်ပူပန်လျက်ရှိမှု

အိန္ဒိယအစိုးရသည် နိုင်ငံအတွင်းသို့ မူးယစ်ဆေးဝါးတင်သွင်းမှုပြဿနာများနှင့် ရင်ဆိုင်ကြုံတွေ့ရလျက်ရှိပြီး ဘင်္ဂါလီသောင်းကျန်းသူအဖွဲ့ (ARSA) ၏ဘဏ္ဍာငွေစုဆောင်းရရှိနိုင်ရေးအတွက် ပါကစ္စတန်ထောက်လှမ်းရေးအဖွဲ့ Inter-Services Intelligence (ISI) ၏ ကျောထောက်နောက်ခံပေးမှုဖြင့် ဘင်္ဂလားဒေ့ရှ်နိုင်ငံရှိ အစ္စလာမ်မစ်အကြမ်းဖက်အဖွဲ့ Jamaat-ul-Mujahideen Bangladesh (JMB) အဖွဲ့သည် အဆိုပါဘင်္ဂါလီမွတ်စလင်များအားအသုံးချကာ အိန္ဒိယနိုင်ငံအတွင်းသို့ စိတ်ကြွ မူးယစ်ဆေးပြားတင်သွင်းမှုများပြုလုပ်လျက်ရှိသည်ဟု သိရှိရပါသည်။

မကြာသေးမီကာလများအတွင်းမှစတင်၍အိန္ဒိယနိုင်ငံအတွင်းသို့ စိတ်ကြွမူးယစ်ဆေးပြား မှောင်ခိုတင်သွင်းမှုများ အဆမတန်မြင့်တက်လာခဲ့ပြီး အဆိုပါအခြေအနေများနှင့်ပတ်သက်၍ အိန္ဒိယအာဏာပိုင်များသည် ပြည်ထဲရေးဝန်ကြီးဌာနထံသို့အသိပေးအကြောင်းကြားခဲ့ပြီးဖြစ်ကြောင်း၊ အဆိုပါ စိတ်ကြွဆေးပြားများသည်ဘင်္ဂလားဒေ့ရှ်-အိန္ဒိယနယ်စပ်တစ်လျှောက်ရှိ နေရာအနှံ့အပြားမှတစ်ဆင့် အိန္ဒိယနိုင်ငံအတွင်းသို့ ဝင်ရောက်နေကြခြင်းဖြစ်ပြီး ဘင်္ဂါလီများမှတစ်ဆင့်သယ်ဆောင်ကာ ဈေးကွက်အတွင်းသို့ ဖြန့်ဝေနေကြခြင်းဖြစ်ကြောင်း၊ အိန္ဒိယထောက်လှမ်းရေးအဖွဲ့အစည်းများ၏ စုံစမ်းစစ်ဆေးမှုများအရနိုင်ငံအတွင်းသို့ မူးယစ်ဆေးဝါးမှောင်ခိုတင်သွင်းမှုများနှင့်ပတ်သက်၍ ပါကစ္စတန်နိုင်ငံ၏ ပါဝင်မှုအခန်းကဏ္ဍကိုပါ အထင်အရှားတွေ့ရှိခဲ့ပြီး ဘင်္ဂါလီသောင်းကျန်းသူအဖွဲ့(ARSA) ၏ လက်နက် ဝယ်ယူရေးအတွက် လိုအပ်သောငွေကြေးများရရှိစေရန် ISI နှင့် JMB တို့က ကျောထောက်နောက်ခံပြုကာ လုပ်ဆောင်နေကြခြင်းဖြစ်သည်ကိုသိရှိခဲ့ကြောင်း၊ ARSA အဖွဲ့၏ ရန်ပုံငွေတိုးမြှင့် စုဆောင်းနိုင်ရေးအတွက် ယခင်ကအိန္ဒိယနိုင်ငံသုံးငွေစက္ကူအတုများကို ပြုလုပ်ခဲ့ရာမှ ယခုအခါ စိတ်ကြွဆေးပြားမှောင်ခိုတင်သွင်းမှုများပြုလုပ်လာကြသောကြောင့် အိန္ဒိယနိုင်ငံအနေဖြင့် ကြီးမား သည့်ပြဿနာနှင့် ရင်ဆိုင်ကြုံတွေ့ရလျက်ရှိသည်ဟုသိရှိရကြောင်း၊ အဆိုပါကိစ္စရပ်များနှင့်ပတ်သက်၍ ကုလသမဂ္ဂမူးယစ်ဆေးဝါးနှင့် ရာဇဝတ်ရုံ း(UNODC) ကလည်း ISI နှင့် JMB တို့၏ အကူအညီ ဖြင့် ဘင်္ဂါလီများသည်စိတ်ကြွဆေးပြားများအား မြန်မာနိုင်ငံအတွင်းမှ သယ်ဆောင်ခဲ့ခြင်းဖြစ်ပြီး ၎င်းတို့မှတစ်ဆင့် ဘင်္ဂလားဒေ့ရှ်နှင့် အိန္ဒိယနိုင်ငံများသို့ ရောက်ရှိစေခဲ့ခြင်းဖြစ်ကြောင်း၊ မူးယစ် ဆေးဝါးမှောင်ခိုတင်သွင်းမှုများသည် ၂၀၁၇ ခုနှစ်နှင့် ၂၀၁၈ ခုနှစ် ကြားကာလအတွင်းမှစတင်များပြားလာခဲ့ခြင်းဖြစ်ကာ လက်ရှိအချိန်ထိပျံ့နှံ့စွာဖြစ်ပေါ်လျက်ရှိပြီး အိန္ဒိယမူးယစ်ဆေးဝါးနှိမ်နင်းရေး အဖွဲ့မှစိတ်ကြွဆေးဝါးအများအပြားသိမ်းဆည်းရမိသည့်ဖြစ်စဉ် အများအပြားရှိခဲ့ကြောင်း၊ အလားတူ ဘင်္ဂလားဒေ့ရှ်နိုင်ငံတွင်လည်း အဆိုပါစိတ်ကြွဆေးပြားမှောင်ခိုတင်သွင်းမှုဖြစ်စဉ်များနှင့်ပတ်သက်၍ ဘင်္ဂလားဒေ့ရှ်နိုင်ငံတွင်နေထိုင်လျက်ရှိကြသည့် ဘင်္ဂါလီမွတ်စလင်များအပေါ် အထူးစိုးရိမ်လျက်ရှိပြီး ဘင်္ဂလားဒေ့ရှ်နိုင်ငံအတွင်းသို့စိတ်ကြွဆေးပြားမှောင်ခိုတင်သွင်းမှုများဖြင့် ဘင်္ဂါလီဦးရေ(၇၀) နီးပါးခန့်အားလည်း ဖမ်းဆီးရမိခဲ့ပြီးဖြစ်သည်ဟု သိရှိရပါသည်။

အိန္ဒိယနိုင်ငံအတွင်းသို့ရောက်ရှိလာသည့်မူးယစ်ဆေးဝါးများသည် အိန္ဒိယနိုင်ငံ၏မြို့ကြီး များဖြစ်သည့် မွန်ဘိုင်း၊ ကာလက္ကတ္တားနှင့် ဘန်ဂါလူရူသို့အဓိကရောက်ရှိလျက်ရှိကြောင်း၊ အိန္ဒိယ နိုင်ငံအတွင်းသို့ နှစ်စဉ်မူးယစ်ဆေးဝါးမှောင်ခိုတင်သွင်းရာမှရရှိသည့်ပျမ်းမျှဝင်ငွေသည် ရူပီး(၆၀) ကုဋေ (အမေရိကန်ဒေါ်လာ ၈.၄ သိန်းခန့်) မှ ရူပီး(၇၀) ကုဋေ (အမေရိကန်ဒေါ်လာ ၉.၈ သိန်းခန့်) အကြားရရှိလျက်ရှိပြီးရရှိသည့် ငွေကြေးများအနက်မှအများစုမှာ ARSA အဖွဲ့ထံသို့ ရောက်ရှိ လျက်ရှိရာ ARSA အဖွဲ့အနေဖြင့်အဆိုပါငွေကြေးများအားအသုံးပြုကာလက်နက်ခဲယမ်းဝယ်ယူမှုများနှင့် အဖွဲ့ဝင်အင်အားသစ်စုဆောင်းခြင်းများအတွက် အသုံးပြုနေကြခြင်းဖြစ်သည်ဟု သိရှိရပါသည်။

ထို့ပြင်အိန္ဒိယအာဏာပိုင်များသည် အိန္ဒိယနိုင်ငံအတွင်း ဒုက္ခသည်များအဖြစ် ခိုလှုံနေထိုင်လျက်ရှိသည့် ဘင်္ဂါလီများနှင့်ပတ်သက်၍ ၎င်းတို့ကာလကြာရှည်စွာ နေထိုင်ဖွယ်ရှိသည့် အနေအထားကြောင့် အိန္ဒိယနိုင်ငံ၏ လုံခြုံရေးနှင့်ပတ်သက်၍ အထူးစိုးရိမ်ပူပန်လျက်ရှိကြကြောင်း၊ အဆိုပါ ဘင်္ဂါလီမွတ်စလင်များအား အကြမ်းဖက်အဖွဲ့အစည်းများမှ အချိန်မရွေးလူသူစုဆောင်းလာနိုင်ကြသည့်အတွက် အိန္ဒိယနိုင်ငံ၏ လုံခြုံရေးရှုထောင့်အရ၎င်းတို့အနေဖြင့်အမြဲသတိထားစောင့်ကြည့်ရမည့် ခြိမ်းခြောက်မှုတစ်ခုကဲ့သို့ ဖြစ်လာလျက်ရှိကြောင်း၊ ၎င်းတို့အား ဘင်္ဂလားဒေ့ရှ်နိုင်ငံရှိ အစ္စလာမ်မစ် အကြမ်းဖက်အဖွဲ့ Jamaat-ul-Mujahideen Bangladesh (JMB) နှင့် ၂၀၀၈ ခုနှစ်၊ မွန်ဘိုင်းတိုက်ခိုက်မှုဖြစ်စဉ်အားလုပ်ဆောင်ခဲ့သူ ပါကစ္စတန်နိုင်ငံအခြေစိုက် အစ္စလာမ်မစ်အကြမ်းဖက်အဖွဲ့ Lashkar-e-Taiba တို့နှင့်ပူးပေါင်းကာ အိန္ဒိယနိုင်ငံအတွင်း အကြမ်းဖက်လုပ်ငန်းများပြုလုပ်လာမည်ကို စိုးရိမ်ပူပန်လျက်ရှိခြင်းဖြစ်ကြောင်း၊ အထူးသဖြင့် ၂၀၁၈ ခုနှစ်အတွင်းဖြစ်ပွားခဲ့သည့် ဗုဒ္ဓဂါယာ ဗုံးပေါက်ကွဲမှုဖြစ်စဉ်တွင် အဆိုပါဘင်္ဂါလီမွတ်စလင်များအား JMB အကြမ်းဖက်အဖွဲ့၏ ညွှန်ကြားချက်ဖြင့်ပြုလုပ်ခဲ့ခြင်းဖြစ်သည်ကို အိန္ဒိယနိုင်ငံအမျိုးသားစုံစမ်းစစ်ဆေးရေးအဖွဲ့ (NIA) က အတိအလင်း ထုတ်ပြန်ကြေညာထားသည်ဟုသိရှိရပါသည်။

ရည်ညွှန်း www.oneindia.com

အီရန်နှင့်ဆွစ်ဇာလန်နိုင်ငံတို့သည် အမေရိကန်အစိုးရ၏ အရေးယူပိတ်ဆို့မှုများကို ရှောင်လွှဲ၍ ငွေပေးချေမှုစနစ်တစ်ခုကို ဖန်တီးအကောင်အထည်ဖော်သွားရန် စီစဉ်ထားမှု

အီရန်နှင့်ဆွစ်ဇာလန်နိုင်ငံတို့သည် နှစ်နိုင်ငံအကြား ကုန်သွယ်ရေးအခြေအနေအား ထိန်းသိမ်းနိုင်ရန်ရည်ရွယ်၍ ကုန်သွယ်ရေးငွေပေးချေမှု၌ ဘဏ္ဍာရေးဆိုင်ရာအထူးလုပ်ထုံးလုပ်နည်းတစ်ရပ် ကိုဖန်တီးအကောင်အထည်ဖော်သွားရန်အသင့်အနေအထားရှိသည်ဟု နှစ်နိုင်ငံပူးတွဲကုန်သည်ကြီးများအသင်းဥက္ကဋ္ဌက ပြောကြားခဲ့ကြောင်း သိရှိရပါသည်။

အီရန်နိုင်ငံပိုင်မီဒီယာလုပ်ငန်း IRNA သတင်းဌာနနှင့် တွေ့ဆုံမေးမြန်းခန်းတွင် ဆွစ်ဇာလန်- အီရန် ပူးတွဲကုန်သည်ကြီးများအသင်းဥက္ကဋ္ဌ ရှာရစ်ဖ်နီဇမ်မာဖီက ယခုရက်ပိုင်း အတွင်းပြောကြားရာ၌လက်ရှိအချိန်တွင် အီရန်နိုင်ငံသည် အာရှနိုင်ငံများဖြစ်သည့် အိန္ဒိယ၊ တရုတ်နှင့် တောင်ကိုရီးယားနိုင်ငံများသို့ ရေနံတင်ပို့လျက်ရှိသည့်အတွက် ရေနံကုန်သွယ်မှုဆိုင်ရာ ငွေပေးချေလွှဲပြောင်းမှုများ အဆင်ပြေချောမွေ့စေရန်အတွက် ဘဏ်များအချင်းချင်း ငွေစာရင်းရှင်းလင်းမှုများ ဆောင်ရွက်မည့်စာရင်းရှင်းရုံး(clearing house) တစ်ခုကိုထားရှိဆောင်ရွက်လျက်ရှိကြောင်း၊ အီရန်နိုင်ငံအနေဖြင့် အာရှသို့သာမက ဥရောပနိုင်ငံများသို့ ရေနံတင်ပို့မှုများပြုလုပ်မည်ဆိုပါက ဆွစ်ဇာလန်နိုင်ငံအနေဖြင့် ငွေပေးချေမှုဆိုင်ရာ ဘဏ္ဍာရေးစနစ်တစ်ခုကို စတင်အသုံးပြုသွားမည်ဖြစ်ကြောင်း၊ ထိုဘဏ္ဍာရေးစနစ်ကို အသုံးပြုသွားရန်အတွက်ဆွစ်ဇာလန်အစိုးရအနေဖြင့် clearing house ဆိုင်ရာလုပ်ငန်းလုပ်ဆောင်မည့်ဘဏ်တစ်ခုကို ရွေးချယ်သတ်မှတ်ထားပြီးဖြစ်သည်ဟု သိရှိရပါသည်။

အမေရိကန်အစိုးရသည် လွန်ခဲ့သည့် ၂၀၁၈ ခုနှစ်အတွင်း အီရန်နိုင်ငံ၏ ဘဏ္ဍာရေးနှင့် ရေနံတင်ပို့မှုများအပေါ် အရေးယူပိတ်ဆို့မှုများချမှတ်ခဲ့ပြီး အခြားသောနိုင်ငံများအနေဖြင့်လည်း အီရန်နိုင်ငံနှင့် စီးပွားဆက်ဆံရေးများလျှော့ချရပ်ဆိုင်းကြရန် ခြိမ်းခြောက်တောင်းဆိုမှုများပြုလုပ်ထားသည့်အတွက် အီရန်နိုင်ငံနှင့်ကုန်သွယ်ရေးငွေပေးချေမှုများတွင် အခက်အခဲများဖြစ်ပေါ်လာခဲ့ရာ ဆွစ်ဇာလန်နိုင်ငံသည် အမေရိကန်အစိုးရ၏ အရေးယူပိတ်ဆို့မှုများကိုရှောင်လွှဲနိုင်ရန် ရည်ရွယ်၍ ငွေပေးချေမှုစနစ်တစ်ခုကိုတစိုက်မတ်မတ်အကောင်အထည်ဖော်ဆောင်ရွက်လျက်ရှိကြောင်း သိရှိရပါသည်။

ရည်ညွှန်း www.rt.com

အမေရိကန်ပြည်ထောင်စု၌ အလုပ်အကိုင်ရရှိမှုမြင့်တက်ခဲ့ခြင်းနှင့် ကုန်ထုတ်လုပ်မှုပမာဏမြင့်တက်ခဲ့ ခြင်းတို့ကြောင့် အမေရိကန်ဒေါ်လာတန်ဖိုး ပြန်လည်မြင့်တက်ကာ ကမ္ဘာ့ရွှေဈေးနှုန်းမှာလည်း အနည်းငယ်ကျဆင်းခဲ့မှု

၂၀၁၉ခုနှစ်၊ ဖေဖော်ဝါရီလ(၁)ရက် (သောကြာနေ့) တွင် အမေရိကန်ပြည်ထောင်စု၊ အလုပ်သမားဝန်ကြီးဌာနနှင့် နိုင်ငံတစ်ဝန်းစီးပွားရေးလုပ်ငန်းများနှင့်ပတ်သက်၍ စာရင်းအချက်အလက်ထုတ်ပြန်ပေးသော ပုဂ္ဂလိကလုပ်ငန်းကြီးတစ်ခုဖြစ်သည့် Institute of Supply Management (ISM) ဌာနကထုတ်ပြန်သည့်အစီရင်ခံစာများထွက်ပေါ်ပြီးနောက် အမေရိကန်ဒေါ်လာတန်ဖိုး ပြန်လည်မြင့်တက်ခဲ့ပြီး ကမ္ဘာ့ရွှေဈေးနှုန်းမှာ အနည်းငယ်ကျဆင်းခဲ့ကြောင်း သိရှိရပါသည်။

အမေရိကန်ပြည်ထောင်စု၊ အလုပ်သမားဝန်ကြီးဌာနမှထုတ်ပြန်သည့် အစီရင်ခံစာ၌ ၂၀၁၉ ခုနှစ်၊ ဇန်နဝါရီလအတွင်း အမေရိကန်နိုင်ငံတစ်ဝန်းအလုပ်အကိုင်ရရှိမှုပမာဏမှာ (၃၀၄၀၀၀) ဦးခန့်ရှိခဲ့ရာ မျှော်မှန်းထားသည့်ပမာဏထက်များစွာ ကျော်လွန်ကာ (၁၁) လတာကာလအတွင်း အမြင့်ဆုံးအနေအထားသို့ရောက်ရှိခဲ့သည်ဟု ဖော်ပြထားကြောင်း၊ အလားတူ ISMကထုတ်ပြန်သည့်အစီရင်ခံစာ၌ ၂၀၁၉ ခုနှစ်၊ ဇန်နဝါရီလအတွင်း နိုင်ငံတစ်ဝန်းကုန်ထုတ်လုပ်ရေးကဏ္ဍတိုးတက်မှုအညွှန်းကိန်းမှာ ၂၀၁၈ ခုနှစ်၊ ဒီဇင်ဘာလတွင်ဖြစ်ပေါ်ခဲ့သည့် ထုတ်လုပ်မှုအညွှန်းကိန်းနှင့်နှိုင်းယှဉ်ပါက (၂.၃) မှတ်မြင့်တက်ကာ တိုးတက်မှုအညွှန်းကိန်းအဆင့် (၅၆.၆) မှတ်သို့ရောက်ရှိခဲ့သည်ဟု ဖော်ပြထားကြောင်း၊ ယင်းအစီရင်ခံစာများထွက်ပေါ်ပြီးနောက် အမေရိကန်ပြည်ထောင်စု၏ စီးပွားရေးအခြေအနေမှာစံချိန်တင် government shutdown ကို ကြုံတွေ့ခံစားခဲ့ရသည့်တိုင် အလွန်အမင်းဆုတ်ယုတ်မှုများမရှိဘဲ ဖွံ့ဖြိုးတိုးတက်မှုများဖြစ်ပေါ်လျက်ရှိသည်ဟူသော အကောင်းမြင်သုံးသပ်ချက်များနှင့်အတူရင်းနှီးမြှုပ်နှံသူများသည် အမေရိကန်ဒေါ်လာဝယ်ယူစုဆောင်းမှုများကိုလည်း ပြုလုပ် လာကြသောကြောင့် အမေရိကန်ဒေါ်လာတန်ဖိုးမှာ ၀.၆% ခန့်ပြန်လည်မြင့်တက်ခဲ့ပြီး ကမ္ဘာ့ရွှေ ဈေးနှုန်းမှာအနည်းငယ်ကျဆင်းခဲ့ကြောင်း သိရှိရပါသည်။

၂၀၁၉ ခုနှစ်၊ ဇန်နဝါရီလ(၂၉) ရက်နှင့် (၃၀) ရက်နေ့တို့တွင် ကျင်းပခဲ့သည့် အမေရိကန်ဗဟိုဘဏ်အစည်းအဝေးတွင် ဘဏ်တိုးနှုန်းအား လက်ရှိသတ်မှတ်ထားသည့် ၂.၅၀% ၌သာ ဆက်လက်ထားရှိရန် ဆုံးဖြတ်ခဲ့ခြင်းကြောင့် အမေရိကန်ဒေါ်လာတန်ဖိုးကျဆင်းမှုများ ဖြစ်ပေါ်ခဲ့ပြီး ကမ္ဘာ့ရွှေဈေးနှုန်းမှာ ဇန်နဝါရီလ (၃၁) ရက်(ကြာသပတေးနေ့) ၌ (၉) လတာကာလအတွင်း အမြင့်ဆုံးအနေအထား (တစ်အောင်စလျှင် အမေရိကန်ဒေါ်လာ ၁၃၂၆.၃၀) သို့ရောက်ရှိခဲ့ရာမှ ဇန်နဝါရီလ (၂) ရက်(စနေနေ့) တွင်မူ နယူးယောက်ဈေးကွက်၌ ဧပြီလအတွက်ရွှေကြိုတင်ရောင်းဝယ်မှုဈေးနှုန်း မှာ ၀.၂% ကျဆင်းကာ တစ်အောင်စလျှင် အမေရိကန်ဒေါ်လာ (၁၃၂၂.၁၀) ဒေါ်လာဖြင့် ဈေးပိတ်သွားခဲ့ကြောင်းဖြင့် reuters သတင်းဌာနမှထုတ်လွှင့်သွားကြောင်း သိရှိရပါသည်။

အမေရိကန်အစိုးရ၏ ဗင်နီဇွဲလားရေနံလုပ်ငန်းအပေါ် အရေးယူပိတ်ဆို့မှုများကြောင့် ဗင်နီဇွဲလားနိုင်ငံတွင် ရင်းနှီးမြှုပ်နှံမှုအများအပြားပြုလုပ်ထားသည့် တရုတ်နိုင်ငံအတွက်ထိခိုက်မှုများနှင့် ကြုံတွေ့ရလျက်ရှိမှု

အမေရိကန်အစိုးရ၏ ဗင်နီဇွဲလားရေနံလုပ်ငန်းအပေါ် အရေးယူပိတ်ဆို့မှုများကြောင့် ဗင်နီဇွဲလားနိုင်ငံတွင် ရင်းနှီးမြှုပ်နှံမှုအများအပြားပြုလုပ်ထားသည့် တရုတ်နိုင်ငံအတွက် ထိခိုက်မှုများနှင့် ကြုံတွေ့ရလျက်ရှိမှု

အမေရိကန်သမ္မတဒေါ်နယ်ထရန့်အစိုးရသည် ဗင်နီဇွဲလားနိုင်ငံပိုင်ရေနံလုပ်ငန်း PDVSA အပေါ်လွန်ခဲ့သောရက်ပိုင်းအတွင်းက အရေးယူပိတ်ဆို့မှုများစတင်ချမှတ်ခဲ့သောကြောင့် ဗင်နီဇွဲလားနိုင်ငံအတွင်း ရင်းနှီးမြှုပ်နှံမှုအများအပြားပြုလုပ်ထားသည့် တရုတ်နိုင်ငံအတွက် ထိခိုက်ဆုံးရှုံးမှုများနှင့် ကြုံတွေ့ရလျက်ရှိကြောင်း သိရှိရပါသည်။

ဗင်နီဇွဲလားနိုင်ငံပိုင် PDVSA ရေနံလုပ်ငန်းအား အမေရိကန်အစိုးရ၏အရေးယူပိတ်ဆို့မှုများကြောင့် ဗင်နီဇွဲလားနိုင်ငံသည် ယခု ၂၀၁၉ ခုနှစ်အတွင်း ဝင်ငွေအမေရိကန်ဒေါ်လာ (၇) ဘီလီယံခန့် ဆုံးရှုံးနစ်နာသွားနိုင်ပြီးလာမည့် ၂၀၂၀ ခုနှစ်တွင် အမေရိကန်ဒေါ်လာ (၁၁) ဘီလီယံ အထိဝင်ငွေရရှိမှုပိုမိုဆုံးရှုံးသွားနိုင်ကြောင်း၊ ဗင်နီဇွဲလားနိုင်ငံ၏ ရေနံရောင်းချမှုများမှရရှိသည့် ဝင်ငွေလျော့နည်းဆုံးရှုံးသွားသည်နှင့်အမျှ ဗင်နီဇွဲလားနိုင်ငံ၏ အကြီးဆုံးကုန်သွယ်ဖက်မြီရှင်နိုင်ငံတစ်ခုဖြစ်သည့် တရုတ်နိုင်ငံ၏ ဗင်နီဇွဲလားနိုင်ငံအတွင်းရှိ ရင်းနှီးမြှုပ်နှံမှုများမှာ ဆုံးရှုံးရမည့်စိန်ခေါ်မှုများနှင့် ရင်ဆိုင်ကြုံတွေ့ရတော့မည့်အခြေအနေသို့ ရောက်ရှိစေခဲ့ကြောင်း၊ တရုတ်နိုင်ငံသည် လွန်ခဲ့သည့်ဆယ်စုနှစ်မှ လက်ရှိအချိန်အထိ ဗင်နီဇွဲလားနိုင်ငံအား အမေရိကန်ဒေါ်လာ (၅၀) ဘီလီယံခန့်ချေးငွေထောက်ပံ့မှုများ ပေးအပ်ထားသည့်အပြင်အခြားသော ရင်းနှီးမြှုပ်နှံမှုအများအပြားလည်း ဗင်နီဇွဲလားနိုင်ငံ၌ ပြုလုပ်ထားကြောင်း၊ အမေရိကန်အစိုးရ၏ အရေးယူပိတ်ဆို့မှုများနှင့် ထိပ်တိုက်ကြုံတွေ့ရမည့် အခြေအနေကိုရှောင်ရှားလိုသည့် အခြားနိုင်ငံများသည် ၎င်းတို့၏စီးပွားရေးရင်းနှီးမြှုပ်နှံမှုများကို ဗင်နီဇွဲလား နိုင်ငံအတွင်းမှထုတ်ဖယ်လျက်ရှိချိန်တွင် တရုတ်နိုင်ငံသည် ၎င်း၏ရင်းနှီးမြှုနှံမှုများကို ဗင်နီဇွဲလားနိုင်ငံ၌ ပိုမိုပြုလုပ်လာခဲ့ခြင်းဖြစ်ကြောင်း၊ ဗင်နီဇွဲလားနိုင်ငံသည် တရုတ်နိုင်ငံသို့ရေနံတင်ပို့မှုဖြင့် ကြွေးမြီများကိုတစ်ဖြည်းဖြည်းဖြင့် ပြန်လည်ပေးဆပ်မှုများပြုလုပ်လျက်ရှိကြောင်း၊ သို့သော်ဗင်နီဇွဲလားနိုင်ငံ၏ ရေနံထုတ်လုပ်မှုပမာဏမှာ ၂၀၁၈ ခုနှစ်၊ ဇန်နဝါရီလတွင် တစ်နေ့လျှင်စည်ပေါင်း (၁.၇၆၉) သန်းခန့် ရှိခဲ့ရာမှ ၂၀၁၈ နှစ်ကုန် ဒီဇင်ဘာလတွင် စည်ပေါင်း (၁.၅၁၁) သန်းခန့်သာရှိခဲ့ပြီး ထုတ်လုပ်မှု လျော့နည်းကျဆင်းလျက်ရှိရာ ဗင်နီဇွဲလားနိုင်ငံအနေဖြင့် တရုတ်နိုင်ငံသို့ကြွေးမြီပေးဆပ်နိုင်ရေးအတွက် အားထုတ်ရုန်းကန်နေရသည့် အနေအထားသို့ ရောက်ရှိလျက်ရှိကြောင်း၊ လက်ရှိအချိန်တွင် ဗင်နီဇွဲလားနိုင်ငံသည် တရုတ်နိုင်ငံသို့ ပြန်လည်ပေးဆပ်ရန်ကျန်ရှိနေသေးသည့် ကြွေးမြီပမာဏမှာ အမေရိကန်ဒေါ်လာ (၂၀) ဘီလီယံခန့်ရှိကြောင်း၊ သို့ဖြစ်ရာ တရုတ်နိုင်ငံသည် ဗင်နီဇွဲလားနိုင်ငံရေး၌ ပြည်ပဝင်ရောက်စွက်ဖက်မှုများကို ဆန့်ကျင်ပြောကြားမှုများပြုလုပ်ခဲ့ပြီး အမေရိကန်အစိုးရ၏ဗင်နီဇွဲလားနိုင်ငံအပေါ် အရေးယူပိတ်ဆို့မှုများနှင့်ပတ်သက်၍ အမေရိကန်အစိုးရအနေဖြင့် တာဝန်ခံမှု/ တာဝန်ယူမှုရှိရမည်ဟူ၍ ထုတ်ဖော်ပြောကြားထားသည်ဟု သိရှိရပါသည်။

ဗင်နီဇွဲလားနိုင်ငံပိုင်ရေနံလုပ်ငန်းအပေါ် ချမှတ်ခဲ့သည့်အရေးယူပိတ်ဆို့မှုများကြောင့် ဆုံးရှုံးရမည့်စိန်ခေါ်မှုများနှင့် ရင်ဆိုင်ကြုံတွေ့နိုင်ခြေရှိသည့်နိုင်ငံများတွင် တရုတ်နိုင်ငံသာမက ရုရှားနှင့်အိန္ဒိယနိုင်ငံတို့လည်း ပါဝင်လျက်ရှိကြောင်း၊ ရုရှားနိုင်ငံသည် ဗင်နီဇွဲလားနိုင်ငံ၌ ကာကွယ်ရေး၊ စိုက်ပျိုးရေးနှင့် စွမ်းအင်ကဏ္ဍများတွင် အမေရိကန်ဒေါ်လာ (၄.၁) ဘီလီယံထက်မနည်းသော ရင်းနှီးမြှုပ်နှံမှုများ ပြုလုပ်ထားကြောင်း၊ အလားတူ အိန္ဒိယနိုင်ငံသည်လည်း ဗင်နီဇွဲလားနိုင်ငံထံမှ နေ့စဉ်ရေနံစည်ပေါင်း (၄) သိန်းခန့်တင်သွင်းရလျက်ရှိသည့်နိုင်ငံတစ်နိုင်ငံဖြစ်သည်ဟု သိရှိရပါသည်။

ရည်ညွှန်း www.rt.com

အထူးစုံစမ်းစစ်ဆေးရေးဦးစီးဌာန

Bureau of Special Investigation

Loading...

BSI :: Bureau of Special Investigation

Monthly Archives: ဖေ‌ဖော်ဝါရီ 2019