၂၀၁၈ ခုနှစ်တွင် ထိုင်းနိုင်ငံ၏ စီးပွားရေးသည် (၄)ရာခိုင်နှုန်းခန့်သာ တိုးတက်လာသည်ကိုတွေ့ရှိရပြီး ပြည်တွင်း/ပြည်ပစီးပွားရေးကျဆင်းခဲ့ကြောင်းကို ထိုင်းနိုင်ငံ၊ Nation သတင်းဌာနက သတင်းထုတ်လွှင့်ခဲ့မှု

၂၀၁၈ ခုနှစ်တွင် ထိုင်းနိုင်ငံ၏ စီးပွားရေးသည် (၄)ရာခိုင်နှုန်းခန့်သာ တိုးတက်လာသည်ကိုတွေ့ရှိရပြီး ပြည်တွင်း/ပြည်ပစီးပွားရေးကျဆင်းခဲ့ကြောင်းကို ထိုင်းနိုင်ငံ၊ Nation သတင်းဌာနက သတင်းထုတ်လွှင့်ခဲ့မှု

၂၀၁၈ ခုနှစ်တွင် ထိုင်းနိုင်ငံ၏ စီးပွားရေးသည် (၄)ရာခိုင်နှုန်းခန့်သာ တိုးတက်လာသည်ကို တွေ့ရှိရပြီး ပြည်တွင်း/ပြည်ပစီးပွားရေးကျဆင်းခဲ့ကြောင်း၊ ဒုတိယဝန်ကြီးချုပ်နှင့် စီးပွားရေးဝန်ကြီး နိုင်ခုမ်ခစ်ကျာတူစစ်ဖီးဆပ်က ၂၀၁၉ ခုနှစ်တွင် ယခင်နှစ်ကကဲ့သို့မဖြစ်စေရန်ပြောကြားခဲ့ကြောင်း၊ ယခင်နှစ်က ပြည်ပပို့ကုန်ပစ္စည်းများအနက် အမေရိကန်နှင့် ဥရောပနိုင်ငံများသို့ တင်ပို့ခြင်းသည်(၇၀)ရာခိုင်နှုန်းခန့်ရှိခဲ့ကြောင်း၊    အမေရိကန်နိုင်ငံ၏ စီးပွားရေး ကျဆင်းခြင်းကြောင့် ထိုင်းနိုင်ငံ၏စီးပွားရေးထိခိုက်ခဲ့ရကြောင်း၊ အလားတူ အမေရိကန်နှင့် တရုတ်နိုင်ငံတို့၏ စီးပွားရေးပြဿနာများ ဖြစ်ခဲ့ခြင်းကြောင့် ထိုင်းနိုင်ငံ၏ စီးပွားရေးကိုပါ ဂယက်ရိုက်မှုများဖြစ်ပေါ်ခဲ့ကြောင်း၊ ၂၀၁၈ ခုနှစ်အတွင်း ပြည်တွင်းဝင်ငွေသည် နိုင်ငံခြားသို့တင်ပို့သောဝင်ငွေထက် ပြည်တွင်းသို့လာရောက်လည်ပတ် သည့် နိုင်ငံခြားခရီးသွားလုပ်ငန်းများမှရရှိသောဝင်ငွေက ပိုမိုများပြားခဲ့ကြောင်း၊ ၂၀၁၉ ခုနှစ်တွင် ပြည်ပနိုင်ငံများ ဖြစ်သည့် တရုတ်၊ အိန္ဒိယ၊ ဟောင်ကောင်၊ ဂျပန်စသည့်နိုင်ငံများနှင့် စီးပွားရေးလုပ်ငန်းများ ပိုမိုတိုးချဲ့သွားမည်ဖြစ် ကြောင်း၊ ထိုင်းနိုင်ငံမှတင်ပို့သော ကုန်ပစ္စည်းများ၏ အရည်အသွေး ပိုမိုကောင်းမွန်အောင်လုပ်ဆောင်၍ တင်ပို့ သွားမည်ဖြစ်ကြောင်း၊ ထို့ပြင်နိုင်ငံတကာမှထိုင်းနိုင်ငံတွင် ရင်းနှီးမြှုပ်နှံမှုများပိုမိုဝင်ရောက်လာစေရန် ဖိတ်ခေါ် သွားမည်ဟု စီးပွားရေးဝန်ကြီးက ပြောကြားခဲ့ကြောင်းဖြင့် ထိုင်းနိုင်ငံ၊ Nation သတင်းဌာနက ၂၀၁၉ ခုနှစ်၊ ဇန်နဝါရီလ(၈)ရက် ထိုင်းစံတော်ချိန် ၁၂ ၀၀ အချိန်တွင် သတင်းထုတ်လွှင့်သွားကြောင်း သိရှိရပါသည်။

ရည်ညွှန်း။ ထိုင်းနိုင်ငံ၊ Nation သတင်းဌာန

အိုပက်အဖွဲ့၏ နေ့စဉ်ရေနံထုတ်လုပ်မှုလျှော့ချခြင်းနှင့် အမေရိကန်-တရုတ်ကုန်သွယ်ရေးဆွေးနွေးမှုအလားအလာကောင်းများကြောင့် ကမ္ဘာ့ရေနံဈေးနှုန်းမှာ ပြန်လည်မြင့်တက်လာခဲ့မှု

အိုပက်အဖွဲ့၏ နေ့စဉ်ရေနံထုတ်လုပ်မှုလျှော့ချခြင်းနှင့် အမေရိကန်-တရုတ်ကုန်သွယ်ရေးဆွေးနွေးမှုအလားအလာ ကောင်းများကြောင့် ကမ္ဘာ့ရေနံဈေးနှုန်းမှာ ပြန်လည်မြင့်တက်လာခဲ့မှု

ရိုက်တာသတင်းဌာနမှ ယခုရက်ပိုင်းအတွင်း စစ်တမ်းကောက်ယူ ထုတ်ပြန်ချက်အရ ၂၀၁၈ ခုနှစ်၊ ဒီဇင်ဘာလအတွင်း အိုပက်အဖွဲ့၏ နေ့စဉ်ရေနံထုတ်လုပ်မှုပမာဏသည် စည်ပေါင်း (၃၂.၆၈)သန်းခန့်သာရှိခဲ့ ရာ နိုဝင်ဘာလနှင့်နှိုင်းယှဉ်ပါကစည်ပေါင်း(၄.၆)သိန်းခန့် ကျဆင်းသွားခဲ့ရာ အဆိုပါပမာဏသည် ၂၀၁၇ ခုနှစ်၊ ဇန်နဝါရီလနောက်ပိုင်းအများဆုံးကျဆင်းမှုပမာဏဖြစ်သည်ဟုသိရှိရကြောင်း၊ထို့ပြင် လန်ဒန်အခြေစိုက်    S & P Global စွမ်းအင်ကုမ္ပဏီက ယခုရက်ပိုင်း အတွင်းထုတ်ပြန်သည့်အစီရင်ခံစာ၌ လွန်ခဲ့သည့် ဒီဇင်ဘာလအတွင်း ဆော်ဒီအာရေဗျနိုင်ငံ၏ ပြည်ပဈေးကွက်သို့နေ့စဉ်ရေနံတင်ပို့မှုပမာဏမှာလည်း စည်ပေါင်း(၇.၅၂၃)သန်းခန့်သာ ရှိခဲ့ရာ နိုဝင်ဘာလနှင့်နှိုင်းယှဉ်ပါက စည်ပေါင်း (၅)သိန်းခန့် လျော့နည်းသွားခဲ့သည်ဟုဖော်ပြထားသည့်အပြင် အိုပက် အဖွဲ့ဝင်နိုင်ငံများနှင့်အဖွဲ့ဝင်မဟုတ်သော နိုင်ငံများသည်နေ့စဉ်ရေနံထုတ်လုပ်မှုပမာဏအား စည်ပေါင်း (၁.၂)သန်းလျှော့ချထုတ်လုပ်မည့်အစီအစဉ်ကို ၂၀၁၉ ခုနှစ်၊ ဇန်နဝါရီလ(၁)ရက်နေ့မှစ၍ အကောင်အထည်ဖော် ဆောင်ရွက်လျက်ရှိခြင်းတို့ကြောင့် ဈေးကွက်အတွင်းရေနံပိုလျှံမှုများ လျော့နည်းကာ ရေနံလိုအပ်ချက်များ ဖြစ်ပေါ်လာနိုင်သည်ဟူသော ခန့်မှန်းချက်များနှင့်အတူကမ္ဘာ့ရေနံဈေးနှုန်းမှာ ပြန်လည်မြင့်တက်လာခဲ့ကြောင်း သိရှိရပါသည်။

ထို့ပြင် ၂၀၁၉ ခုနှစ်၊ ဇန်နဝါရီလ(၇)ရက်နှင့် (၈)ရက်နေ့တို့တွင် အမေရိကန်နှင့် တရုတ်တာဝန်ရှိသူ များအကြား နှစ်နိုင်ငံကုန်သွယ်ရေးနှင့်ပတ်သက်၍ တွေ့ဆုံဆွေးနွေးမှုများပြုလုပ်လျက်ရှိရာ နှစ်နိုင်ငံအကြား ကုန်သွယ်ရေးသဘောတူညီမှုရရှိနိုင်သည်ဟု အမေရိကန်ကူးသန်းရောင်းဝယ်ရေး ဝန်ကြီးဝီလ်ဘာရော့စ်ကပြောကြား ခဲ့ရာ အမေရိကန်-တရုတ်ကုန်သွယ်ရေးဆွေးနွေးမှုပြေလည်သွားပါက ကမ္ဘာ့စီးပွားရေးတိုးတက်မှုအားကောင်း လာမည်ဖြစ်ပြီး ကမ္ဘာတစ်ဝန်းရေနံဝယ်လိုအားပါ မြင့်တက်လာဖွယ်ရှိသည်ဟူသော ခန့်မှန်းချက်များထွက်ပေါ် လာခြင်းသည်လည်း ကမ္ဘာ့ရေနံဈေးနှုန်းများကို မြင့်တက်စေသည့်အခြားသော အချက်တစ်ခုဖြစ်ကြောင်း၊ ၂၀၁၉ ခုနှစ်၊ ဇန်နဝါရီလ(၈)ရက်(အင်္ဂါနေ့)နံနက်ပိုင်းတွင် နယူးယောက်​ဈေးကွက်၌ ဖေဖော်ဝါရီလအတွက် WTI ရေနံစိမ်း တစ်စည် ၏ကြိုတင်ရောင်းဝယ်မှုဈေးနှုန်းမှာ ၀.၇%မြင့်တက်ပြီးတစ်စည်လျှင် အမေရိကန်ဒေါ်လာ(၄၈.၈၅) သို့ရောက်ရှိခဲ့ကြောင်း၊ လန်ဒန်ဈေးကွက်၌ ဘရန့်ရေနံစိမ်းတစ်စည်၏ ကြိုတင်ရောင်းဝယ်မှုဈေးနှုန်း မှာ ၀.၈% မြင့်တက်ခဲ့ပြီး တစ်စည်လျှင် အမေရိကန်ဒေါ်လာ(၅၇.၇၇)သို့ရောက်ရှိခဲ့ကြောင်း ဖော်ပြပါရှိပါသည်။

ရည်ညွှန်း www.reuters.com

အပြန်အလှန်ကုန်သွယ်မှုပြုရာ၌ အမေရိကန်ဒေါ်လာအစား ယူရိုငွေကြေးအား ပြောင်းလဲသုံးစွဲမည့် ဥရောပသမဂ္ဂ၏ အဆိုကို ထောက်ခံပါသည်ဟု ရုရှားစီးပွားရေးဝန်ကြီးက ပြောကြားခဲ့မှု

အပြန်အလှန်ကုန်သွယ်မှုပြုရာ၌ အမေရိကန်ဒေါ်လာအစား ယူရိုငွေကြေးအား ပြောင်းလဲသုံးစွဲမည့် ဥရောပသမဂ္ဂ၏ အဆိုကို ထောက်ခံပါသည်ဟု ရုရှားစီးပွားရေးဝန်ကြီးက ပြောကြားခဲ့မှု

ရုရှားနှင့် ဥရောပသမဂ္ဂ (EU)တို့အကြားကုန်သွယ်ရေးကိစ္စများတွင် အမေရိကန်ဒေါ်လာ ကို ရှောင်ဖယ်၍ ယူရိုငွေကြေးအား ပြောင်းလဲသုံးစွဲရန် ဥရောသမဂ္ဂက အဆိုပြုခဲ့ခြင်းအပေါ် ထောက်ခံပါသည်ဟု ရုရှားစီးပွားရေးဝန်ကြီးက ပြောကြားခဲ့ကြောင်း သိရှိရပါသည်။

ရုရှားနိုင်ငံပိုင်ရုပ်/သံသတင်းဌာန(EU)နှင့်တွေ့ဆုံမေးမြန်းခန်းတွင် ရုရှားနိုင်ငံ စီးပွားရေး ဝန်ကြီး မက်ဇင်မ်အော်ရက်ရှ်ကင်က ယခုရက်ပိုင်းအတွင်း ပြောကြားရာ၌ ကုန်သွယ်ရေးကဏ္ဍ၌ အမေရိကန်ဒေါ်လာ ကြီးစိုးမှုကို တွန်းလှန်နိုင်ရန်အတွက် ကမ္ဘာတစ်ဝန်း ကုန်သွယ်မှုငွေပေးချေရေး ကိစ္စများတွင် ယူရိုငွေကြေးကို ပိုမိုသုံးစွဲရန် လွန်ခဲ့သည့် ဒီဇင်ဘာလဆန်းပိုင်းတွင် ဥရောပသမဂ္ဂက အဆိုပြုခဲ့ကြောင်း၊ လက်ရှိအချိန်၌ ရုရှားနိုင်ငံသည် အမေရိကန်ဒေါ်လာအသုံးပြုခြင်းကို လျှော့ချမှု များ ပြုလုပ်လျက်ရှိသည့်အတွက် ရုရှားနှင့် EU နိုင်ငံများအကြား အမေရိကန်ဒေါ်လာအသုံးပြု၍ ကုန်သွယ်မှုပြုရာတွင် အဆင်မပြေမှုများ ဖြစ်ပေါ် လာခဲ့ကြောင်း၊ ထို့ကြောင့် ရုရှားနှင့် ဥရောပသမဂ္ဂ တို့အကြား ကုန်သွယ်ရေးကိစ္စများ၌ အမေရိကန်ဒေါ်လာ အား အသုံးပြုရန် မလိုအပ်တော့သည့် အခြေအနေသို့ ဆိုက်ရောက်စေခဲ့ကြောင်း၊ ထို့ကြောင့် ရုရှားနှင့် EU နိုင်ငံများအနေဖြင့် အမေရိကန်ဒေါ်လာအစား ယူရိုငွေကြေးကို ဘုံငွေကြေးတစ်ရပ်အဖြစ် ပြောင်းလဲသုံးစွဲရန် စဉ်းစားခြင်းမှာ သင့်တော် ပါကြောင်း၊ ရုရှားနိုင်ငံအနေဖြင့်လည်း ယူရိုငွေကြေးအားတွင်တွင်ကျယ်ကျယ်ပိုမို အသုံးပြုနိုင်ရေးအတွက် ထောက်ခံကူညီကာပူးပေါင်းဆောင်ရွက်မှုများပြုလုပ်သွားမည်ဖြစ်ကြောင်း၊ လက်ရှိ အချိန်တွင် စွမ်းအင်ဆိုင်ရာကုန်သွယ်ရေးကိစ္စများ၌ ရှောင်လွှဲ၍မရသည့်အခြေအနေမျိုးတွင် အမေရိကန် ဒေါ်လာအား အသုံးပြုနေရဆဲဖြစ်သော်လည်း ရုရှားနှင့် EU နိုင်ငံများသည် အမေရိကန်ဒေါ်လာအသုံးပြုမှု ကို လျှော့ချလိုသည့် ဆန္ဒရှိခြင်း၊ လျှော့ချလျက်ရှိခြင်းတို့ကြောင့် စွမ်းအင်ကုန်သွယ်ရေးကဏ္ဍများတွင်ပါ ယူရိုငွေကြေးကို အသုံးပြုနိုင်မည်ဆိုပါက ရုရှားနှင့် EU နိုင်ငံများအတွက် ကောင်းကျိုးဖြစ်ထွန်းမှုများ ပိုမိုရရှိခံစားနိုင်လိမ့်မည်ဟု ပြောကြားခဲ့ကြောင်း သိရှိရပါသည်။

၂၀၁၈ ခုနှစ်အတွင်း ရုရှားနှင့် ဥရောပသမဂ္ဂတို့၏ အပြန်အလှန်ကုန်သွယ်မှုပမာဏမှာ ၂၀၁၇ ခုနှစ်နှင့်နှိုင်းယှဉ်ပါက ၂၁.၅% ခန့် မြင့်တက်လာခဲ့ပြီး ဟန်ဂေရီနှင့် ဖင်လန်နိုင်ငံတို့တွင် နျူကလီးယား ဓာတ်ပေါင်းဖိုတည်ဆောက်ခြင်း၊ ရုရှားမှ ဥရောပသို့ဓာတ်ငွေ့ပိုက်လိုင်းသွယ်တန်းခြင်းအစရှိသည့် စီမံကိန်း များတွင် ရုရှားနှင့် EU နိုင်ငံများက အပြန်အလှန်ပူးပေါင်းဆောင်ရွက်မှုများ ပြုလုပ်လျက်ရှိကြောင်း ဖော်ပြ ပါရှိပါသည်။

ရည်ညွှန်း www.rt.com

အမေရိကန်ဗဟိုဘဏ်ဥက္ကဋ္ဌ၏ ပြောကြားချက်ထွက်ပေါ်ပြီးနောက် အမေရိကန်ဒေါ်လာတန်ဖိုး ကျဆင်းသွားခဲ့မှု

အမေရိကန်ဗဟိုဘဏ်ဥက္ကဋ္ဌ၏ ပြောကြားချက်ထွက်ပေါ်ပြီးနောက် အမေရိကန်ဒေါ်လာတန်ဖိုး ကျဆင်းသွားခဲ့မှု

၂၀၁၈ ခုနှစ်၊ ဒီဇင်ဘာလအတွင်း ယူရိုဇုန်နိုင်ငံတစ်နိုင်ငံဖြစ်သည့် ဂျာမနီနိုင်ငံ၏ ကုန်ထုတ်လုပ်မှု ကဏ္ဍနှင့်ဝန်ဆောင်မှုကဏ္ဍတိုးတက်မှု အညွှန်းကိန်းမှာ (၃၃)လတာကာလအတွင်း အနိမ့်ဆုံးအနေအထား သို့လည်းကောင်း၊ တရုတ်နိုင်ငံ၏လွန်ခဲ့သည့် ဒီဇင်ဘာလအတွင်း ကုန်ထုတ်လုပ်မှုနှင့် ဝန်ဆောင်မှုကဏ္ဍ တိုးတက်မှုအညွှန်းကိန်းမှာလည်း (၁၉)လတာကာလအတွင်း အနိမ့်ဆုံးအနေအထား သို့လည်းကောင်းအသီးသီး ရောက်ရှိခဲ့ရာ ကမ္ဘာ့စီးပွားရေးတိုးတက်မှု နှေးကွေးနေသည်ဟုယူဆရပြီး ယင်းအခြေအနေသည် အမေရိကန် ပြည်ထောင်စု၏ စီးပွားရေးအခြေအနေအတွက် အမေရိကန်ဗဟိုဘဏ်အနေဖြင့် သတိထားရမည့် အနေ အထားသို့ ရောက်ရှိလာပြီဖြစ်ကြောင်း၊ မိမိတို့ဗဟိုဘဏ် အနေဖြင့် ကမ္ဘာတစ်ဝန်းစီးပွားရေး အခြေအနေ ပြောင်းလဲဖြစ်ပေါ်လာမှုများကို စိတ်ရှည်ရှည်ထား ကာစောင့်ကြည့်သွားရမည်ဖြစ်ကြောင်း၊ ဗဟိုဘဏ်သည် ဘဏ်တိုးနှုန်းတိုးမြှင့်ခြင်းအား မည်သည့်ကာလတွင်မည်မျှတိုးမြှင့်မည်ဟူ၍ ကြိုတင်စီစဉ်ချမှတ်ထားခြင်း မျိုး မရှိသည့်အပြင် ၂၀၁၉ ခုနှစ် အတွင်း ဘဏ်တိုးနှုန်းတိုးမြှင့်ခြင်းအား ရပ်တန့်ကောင်းရပ်တန့်ထားဖွယ်ရှိ သည်ဟု အမေရိကန် ဗဟိုဘဏ်ဥက္ကဋ္ဌ ဂျရွန်မီပေါင်ဝယ်လ်က ၂၀၁၉ ခုနှစ်၊ ဇန်နဝါရီလ(၄)ရက်တွင် ပြောကြား ခဲ့ကြောင်း၊၎င်း၏ပြောကြားချက်ထွက်ပေါ်ပြီးနောက်အခြေအနေအကြောင်းကြောင်းကြောင့် အမေရိကန် ဗဟိုဘဏ် က ဘဏ်တိုးနှုန်းတိုးမြှင့်ခြင်းအား ရပ်တန့်ထားပါက အမေရိကန်ဒေါ်လာတန်ဖိုးမှာ ၂၀၁၉ ခုနှစ် အတွင်း၌ များစွာအားကောင်းလာဖွယ် မရှိဟူသောခန့်မှန်းချက်များနှင့်အတူ အမေရိကန်ဒေါ်လာ တန်ဖိုးကျဆင်းသွား ခဲ့ကြောင်း သိရှိရပါသည်။

ထို့ပြင်လွန်ခဲ့သည့်ရက်ပိုင်းအတွင်း လန်ဒန်အခြေစိုက်စီးပွားရေးဆိုင်ရာ သတင်းအချက်အလက် များ ထုတ်ပြန်ဝန်ဆောင်ပေးသည့် IHS Markit ကုမ္ပဏီမှ ထုတ်ပြန်သည့်အစီရင်ခံစာ၌ လွန်ခဲ့သည့် ဒီဇင်ဘာလအတွင်း အမေရိကန်ပြည်ထောင်စု၏ ကုန်ထုတ်လုပ်မှုကဏ္ဍနှင့် ဝန်ဆောင်မှု ကဏ္ဍအညွှန်းကိန်း အဆင့်သည် ၂၀၁၈ ခုနှစ်၊ နိုဝင်ဘာလတွင် ဖြစ်ပေါ်ခဲ့သည့် အညွှန်းကိန်းအဆင့် သတ်မှတ်ချက်(၅၅.၈)နှင့် နှိုင်းယှဉ်ပါကသတ်မှတ်ချက်အဆင့် (၁.၅)လျော့နည်းသွားသည်ဟု ဖော်ပြ ခဲ့ခြင်းသည်လည်း အမေရိကန် ဒေါ်လာတန်ဖိုးကို ကျဆင်းစေသည့် အခြားအချက်တစ်ခုဖြစ်ကြောင်း သိရှိရပါသည်။

၂၀၁၉ ခုနှစ်၊ ဇန်နဝါရီလ(၅)ရက်တွင် ကမ္ဘာ့ငွေကြေးဈေးကွက်အတွင်း အမေရိကန်ဒေါ်လာ တန်ဖိုးမှာ ၀.၁၃% ကျဆင်းခဲ့ပြီး စတာလင်တစ်ပေါင်လျှင် အမေရိကန်ဒေါ်လာ (၁.၂၇၄၀) ဒေါ်လာ လဲလှယ်မှုနှုန်း၊ တစ်ယူရိုလျှင် အမေရိကန်ဒေါ်လာ(၁.၁၃၉၈)ဒေါ်လာလဲလှယ်မှုနှုန်း၊ အမေရိကန် တစ်ဒေါ်လာ လျှင် ဂျပန်ယန်းငွေ(၁၀၈.၅၂)ယန်း လဲလှယ်မှုနှုန်းနှင့် တရုတ်ယွမ်ငွေ(၆.၈၅၈၆)ယွမ် လဲလှယ်မှုနှုန်းများဖြင့် အသီးသီး ဈေးပိတ်သွားခဲ့ကြောင်း၊ ကမ္ဘာ့ရွှေဈေးနှုန်းမှာမူ တစ်အောင်စလျှင် အမေရိကန်ဒေါ်လာ(၁၂၈၅.၈၀)ဖြင့် ဈေးပိတ်သွားခဲ့ကြောင်း ဖော်ပြပါရှိပါသည်။

ရည်ညွှန်း www.xinhuanet.com

အမေရိကန်ပြည်ထောင်စုနှင့် ဥရောပသမဂ္ဂ(EU)တို့သည် ဘင်္ဂလားဒေ့ရှ်နိုင်ငံ၏ အထွေထွေရွေးကောက်ပွဲကာလအတွင်း မသမာမှုများပြုလုပ်ခဲ့ခြင်းအပေါ်ပြစ်တင်ရှုံ့ချခဲ့ပြီး စုံစမ်းစစ်ဆေးမှုပြုလုပ်ပေးရန်တောင်းဆိုခဲ့မှု

အမေရိကန်ပြည်ထောင်စုနှင့် ဥရောပသမဂ္ဂ(EU)တို့သည် ဘင်္ဂလားဒေ့ရှ်နိုင်ငံ၏ အထွေထွေရွေးကောက်ပွဲကာလ အတွင်း မသမာမှုများပြုလုပ်ခဲ့ခြင်းအပေါ်ပြစ်တင်ရှုံ့ချခဲ့ပြီး စုံစမ်းစစ်ဆေးမှုပြုလုပ်ပေးရန်တောင်းဆိုခဲ့မှု

လွန်ခဲ့သည့်ရက်ပိုင်းအတွင်းပြုလုပ်ခဲ့သည့် ဘင်္ဂလားဒေ့ရှ်နိုင်ငံ၏ အထွေထွေရွေးကောက်ပွဲတွင် လက်ရှိ ဝန်ကြီးချုပ် ရှိတ်ဟာဆီနာ၏ အဝါမီလိပါတီက ပါလီမန်အမတ်နေရာ ရာခိုင်နှုန်း(၉၀)ကျော်ဖြင့် ဆက်လက် အနိုင်ရရှိခဲ့ပြီး အဆိုပါအထွေထွေရွေးကောက်ပွဲကာလအတွင်း အတိုက်အခံပါတီများအပေါ် အကြမ်းဖက်ဖိနှိပ် ခဲ့မှုများနှင့် ရွေးကောက်ပွဲမသမာမှုများ ပြုလုပ်ခဲ့မှုများအား ပြစ်တင်ရှုံ့ချခဲ့ပြီး စုံစမ်းစစ်ဆေးပေးရန် အင်အားကြီး အနောက်နိုင်ငံများဖြစ်သည့် အမေရိကန်ပြည်ထောင်စုနှင့် ဥရောပသမဂ္ဂ(EU)အဖွဲ့ဝင်နိုင်ငံများက ၂၀၁၉ ခုနှစ်၊ ဇန်နဝါရီလ(၁)ရက် (အင်္ဂါနေ့)တွင်တောင်းဆိုချက်များပါဝင်သည့် ကြေညာချက်တစ်စောင်ထုတ်ပြန်ကြေညာခဲ့ ကြောင်း သိရှိရပါသည်။

အဆိုပါထုတ်ပြန်ကြေညာချက်တွင် ဘင်္ဂလားဒေ့ရှ်နိုင်ငံ၏ အထွေထွေရွေးကောက်ပွဲ ကျင်းပသည့်နေ့တွင် ဘင်္ဂလားဒေ့ရှ်နိုင်ငံနေရာအနှံ့အပြားတွင် အကြမ်းဖက်မှုများဖြစ်ပွားခဲ့ကာ အရေးကြီးသော ရွေးကောက်ပွဲကျင်းပရာ နေရာများ၌ သိသာထင်ရှားသော အနှောင့်အယှက်များဖြစ်ပေါ်ခဲ့သည့်အတွက် ဘင်္ဂလားဒေ့ရှ်နိုင်ငံ၏ ရွေးကောက်ပွဲ အပေါ် အစွန်းအထင်းဖြစ်စေခဲ့ကြောင်း၊ ထို့ကြောင့် အဆိုပါဖြစ်စဉ်များနှင့်ပတ်သက်၍ သင့်တင့်မျှတသော စုံစမ်း စစ်ဆေးမှုတစ်ရပ်ပြုလုပ်ပေးရန် EU အဖွဲ့အနေဖြင့် တောင်းဆိုပါကြောင်း၊ ထို့ပြင် ဘင်္ဂလားဒေ့ရှ်နိုင်ငံ၏ ရွေးကောက်ပွဲကာလအတွင်းနှောင့်ယှက်ဖျက်ဆီးမှုများ၊ ခြိမ်းခြောက်မှုများအပါအဝင် အတိုက်အခံကိုယ်စားလှယ်လောင်း များအား အခက်အခဲများဖြစ်ပေါ်စေပြီး လွတ်လပ်စွာမဲဆွယ်စည်းရုံးမှုများနှင့် ၎င်းတို့အားထောက်ခံသူများ နှင့်တွေ့ဆုံမစုဝေးနိုင်ရန် အကြမ်းဖက်မှုများပြုလုပ်ခဲ့ကြသည်ကို ယုံကြည်စိတ်ချလောက်သော အစီရင်ခံစာ အထောက်အထားများ ရရှိထားသည့်အတွက် ဘင်္ဂလားဒေ့ရှ်နိုင်ငံအတွင်း နိုင်ငံခြားရင်းနှီးမြှုပ်နှံမှုအများဆုံး ပြုလုပ်လျက်ရှိသည့် အမေရိကန်အစိုးရအနေဖြင့် အထူးစိုးရိမ်ပူပန်လျက်ရှိသည့်အပြင် မဲဆန္ဒရှင်ပြည်သူအချို့ ၏မဲပေးမှုများကိုတားဆီးပိတ်ပင်ခဲ့သည့်အတွက် ဘင်္ဂလားဒေ့ရှ်နိုင်ငံ၏ ရွေးကောက်ပွဲဆိုင်ရာလုပ်ငန်းစဉ်များ အပေါ် ယုံကြည်ချက်ပျက်ပြားစေခဲ့သည်ဟု ဖော်ပြထားကြောင်း သိရှိရပါသည်။

ဘင်္ဂလားဒေ့ရှ်နိုင်ငံ၏ အထွေထွေရွေးကောက်ပွဲကျင်းပသည့်နေ့တွင် ရှိတ်ဟာဆီနာ၏ အဝါမီလိပါတီကို ထောက်ခံသူများနှင့် အတိုက်အခံပါတီမှ တက်ကြွလှုပ်ရှားသူများအကြား ဖြစ်ပွားခဲ့သည့် ပဋိပက္ခအတွင်း လူပေါင်း(၁၇)ဦးသေဆုံးခဲ့ရသည့်အတွက် ဘင်္ဂလားဒေ့ရှ်ဝန်ကြီးချုပ် ရှိတ်ဟာဆီနာ၏ ပုံရိပ်ကိုထိခိုက်စေနိုင် သည်ဟု ရွေးကောက်ပွဲအားတစ်ဖက်တစ်လမ်းမှကူညီလျက်ရှိပြီး အနီးကပ်အကဲဖြတ်စောင့်ကြည့်လျက်ရှိသည့် ဗြိတိန်၊ အမေရိကန်ပြည်ထောင်စုနှင့် ဥရောပသမဂ္ဂ(EU)တို့က ယခုကဲ့သို့ တောင်းဆိုခဲ့ကြခြင်းဖြစ်ကြောင်း၊ အဓိကအတိုက်အခံပါတီကြီးဖြစ်သည့် ဘင်္ဂလားဒေ့ရှ်အမျိုးသားရေးပါတီ(BNP) ကိုယ်စားလှယ်များသည် နိုင်ငံတစ်ဝန်းရှိ နေရာအတော်များများတွင် အာဏာရအဝါမီလိခ်ပါတီတက်ကြွလှုပ်ရှားသူများ၏ တိုက်ခိုက်မှု များကိုခံခဲ့ရကြောင်း၊ ထို့ကြောင့် BNP ပါတီအနေဖြင့် ရွေးကောက်ပွဲမသမာမှုပြုလုပ်ခဲ့သည့် အထောက်အထားများ စုဆောင်းဖော်ပြထားသည့်အစီရင်ခံစာကို ဘင်္ဂလားဒေ့ရှ်ရွေးကောက်ပွဲကော်မရှင်ထံသို့ တင်ပြကာ ရွေးကောက်ပွဲ အသစ်တစ်ရပ်ထပ်မံကျင်းပပြုလုပ်ပေးရန် တောင်းဆိုခဲ့သော်လည်း ရွေးကောက်ပွဲကော်မရှင်ကပယ်ချခဲ့သည် ဟု BNP ပါတီ၏အထွေထွေအတွင်းရေးမှူး မန်ဇာဖာရူအစ္စလာမ်က ပြောကြားခဲ့ကြောင်း သိရှိရပါသည်၊ ထို့ပြင် ရှိတ်ဟာဆီနာ၏ အတိုက်အခံပြိုင်ဖက်ပါတီများမှလည်း ရွေးကောက်ပွဲရလဒ်များနှင့်ပတ်သက်၍ ပယ်ချ ခဲ့ပြီး ရွေးကောက်ပွဲမသမာမှုများကို ကျယ်ပြန့်စွာပြုလုပ်ခဲ့ကြကာ မဲဆန္ဒရှင်များအပေါ် ခြိမ်းခြောက်ခဲ့သည်ဟု အာဏာရအဝါမီလိခ်ပါတီအားစွပ်စွဲထားသော်လည်း အဝါမီလိခ်ပါတီကမူ ငြင်းဆိုထားသည်ဟုသိရှိရကြောင်း ဖော်ပြပါရှိပါသည်။

ရည်ညွှန်း www.reuters.com

၂၀၁၉ ခုနှစ်အတွင်း ဂျပန်ယန်းငွေတန်ဖိုးမှာ ဆက်လက်အားကောင်းဖွယ်ရှိသည်ဟု ငွေကြေးဈေးကွက် လေ့လာသူများကခန့်မှန်းထားမှု

၂၀၁၉ ခုနှစ်အတွင်း ဂျပန်ယန်းငွေတန်ဖိုးမှာ ဆက်လက်အားကောင်းဖွယ်ရှိသည်ဟု ငွေကြေးဈေးကွက် လေ့လာသူများကခန့်မှန်းထားမှု

၂၀၁၈ ခုနှစ် အတွင်း ဂျပန်ယန်းငွေတန်ဖိုးသည် အမေရိကန်ဒေါ်လာနှင့်နှိုင်းယှဉ်ပါက ၂% ကျော် မြင့်တက်ခဲ့ပြီး ၂၀၁၉ ခုနှစ်တွင်လည်း ဆက်လက်အားကောင်းဖွယ်ရှိသည်ဟု ငွေကြေး ဈေးကွက်လေ့လာသူများက ခန့်မှန်းထားကြကြောင်း သိရှိရပါသည်။

၂၀၁၈ ခုနှစ်၊ ဒီဇင်ဘာလ (၃၁)ရက်တွင် လန်ဒန်ဈေးကွက်၌ ဂျပန်ယန်းငွေတန်ဖိုးမှာ အမေရိကန်တစ်ဒေါ်လာလျှင်(၁၁၀.၀၄)ယန်း၌ ဖြစ်ပေါ်ခဲ့ပြီး ၂၀၁၈ ခုနှစ်အတွင်း အမေရိကန် ဒေါ်လာနှင့် နှိုင်းယှဉ်ပါက ၂% ကျော်မြင့်တက်ခဲ့ကြောင်း၊  ၂၀၁၈ ခုနှစ်အတွင်း ဥရောပသမဂ္ဂမှ ဗြိတိန်နုတ်ထွက်ရေးနှင့် ၂၀၁၉ အီတလီဘတ်ဂျက်သတ်မှတ်ချက်အပေါ် ဥရောပသမဂ္ဂနှင့် အီတလီ နိုင်ငံတို့အကြား သဘောထားကွဲလွဲမှုများဖြစ်ပေါ်ခဲ့ခြင်းတို့၏ဂယက်ကြောင့် စတာလင်ပေါင်တန်ဖိုး နှင့် ယူရိုငွေကြေးတန်ဖိုးများမှာ ယိမ်းယိုင်အားပျော့မှုများဖြစ်ပေါ်ခဲ့ခြင်း၊ အမေရိကန်- တရုတ် ကုန်သွယ်ရေးတင်းမာမှုများဖြစ်ပေါ်ခဲ့ခြင်းနှင့် ကမ္ဘာ့ရေနံဈေးနှုန်းများ ကမောက်ကမဖြစ်ပေါ်ခဲ့ခြင်း တို့ကိုအကြောင်းပြု၍ ဂျပန်ယန်းငွေတန်ဖိုး မြင့်တက်လာခဲ့ခြင်းဖြစ်ကြောင်း၊ လက်ရှိအချိန်တွင် အမေရိကန်ပြည်ထောင်စု၌ လေးပုံတစ်ပုံခန့်ရှိသော အစိုးရလုပ်ငန်းများ ရပ်တန့်နေခြင်းအပါအဝင် နိုင်ငံရေးနှင့် စီးပွားရေး မတည်ငြိမ်မှုများဖြစ်ပေါ်နေခြင်း၊ ဥရောပသမဂ္ဂမှ ဗြိတိန်နုတ်ထွက်ရေးနှင့် ပတ်သက်၍ ရေရာသေချာမှုများ မရှိသေးခြင်းနှင့် လက်ရှိကမ္ဘာ့ရေနံဈေးနှုန်းများ အားပျော့နေခြင်း အစရှိသည့် အခြေအနေများနှင့်ဆက်နွယ်ကာ ကမ္ဘာ့စီးပွားရေးတိုးတက်မှု မသေချာမရေရာမှုများ ကြောင့် ရင်းနှီးမြှုပ်နှံသူများသည် အမေရိကန်ဒေါ်လာကို အများအပြားစုဆောင်းခြင်းမပြုဘဲ ဂျပန် ယန်းငွေအား ဝယ်ယူစုဆောင်းမှုများ ပြုလုပ်လာဖွယ်ရှိသည့်အတွက် ဂျပန်ယန်းငွေတန်ဖိုးမှာ ၂၀၁၉ ခုနှစ်တွင် ဆက်လက်အားကောင်းနေဖွယ်ရှိသည်ဟု ငွေကြေးဈေးကွက်လေ့လာသူများက ခန့်မှန်း ထားကြကြောင်း သိရှိရပါသည်။

ငွေကြေးဈေးကွက်လေ့လာသူများ၏ ခန့်မှန်းချက်များအရ ၂၀၁၉ ခုနှစ်၊ နှစ်ကုန်ပိုင်းတွင် ဂျပန်ယန်းငွေတန်ဖိုးမှာ အမေရိကန်တစ်ဒေါ်လာလျှင် (၁၀၉)ယန်းနှင့် (၁၀၇)ယန်း လဲလှယ်မှုနှုန်း ဝန်းကျင်တို့၌ ဖြစ်ပေါ်လာဖွယ်ရှိသည်ဟု သိရှိရပါသည်။

ရည်ညွှန်း www.bloomberg.com

အမေရိကန်ပြည်ထောင်စု၌ လေးပုံတစ်ပုံခန့်ရှိသောအစိုးရလုပ်ငန်းများ ရပ်တန့်နေစဉ်ကာလအတွင်း ကမ္ဘာ့ရွှေဈေးနှုန်းမှာ(၆)လတာကာလအတွင်း အမြင့်ဆုံးအနေအထားသို့ ရောက်ရှိလျက်ရှိမှု

အမေရိကန်ပြည်ထောင်စု၌ လေးပုံတစ်ပုံခန့်ရှိသောအစိုးရလုပ်ငန်းများ ရပ်တန့်နေစဉ်ကာလအတွင်း ကမ္ဘာ့ရွှေဈေးနှုန်းမှာ(၆)လတာကာလအတွင်း အမြင့်ဆုံးအနေအထားသို့ ရောက်ရှိလျက်ရှိမှု

အမေရိကန် – မက္ကဆီကို နယ်စပ်တံတိုင်းဆောက်လုပ်ရေးအတွက် သမ္မတဒေါ်နယ်ထရန့် တောင်းဆိုသော အမေရိကန်ဒေါ်လာ(၅)ဘီလီယံနှင့်ပတ်သက်၍  အမေရိကန်ကွန်ကရက်လွှတ်တော် က ဆုံးဖြတ်ခွင့်ပြုပေးနိုင်ခြင်းမရှိခဲ့သည့်အတွက် ၂၀၁၈ ခုနှစ်၊ ဒီဇင်ဘာလ(၂၂)ရက်မှစ၍ (Partial US Government Shutdown) အမေရိကန်ပြည်ထောင်စု၏ လေးပုံတစ်ပုံခန့်ရှိသော အစိုးရလုပ်ငန်း များရပ်ဆိုင်းသွားခဲ့ပြီးနောက် ယခု ၂၀၁၉ ခုနှစ်၊ ဇန်နဝါရီလ(၁)ရက်တွင် Government Shutdown ကာလမှာ ရက်ပေါင်း(၁၁)ရက်ကြာမြင့်ခဲ့ပြီဖြစ်ပြီး အဆိုပါကာလအတွင်း ကမ္ဘာ့ရွှေဈေးနှုန်းမှာ (၆)လတာကာလအတွင်း အမြင့်ဆုံးသို့ရောက်ရှိခဲ့ကြောင်း သိရှိရပါသည်။

Government Shutdown  ဖြစ်ပေါ်နေသည့်အတွက် အစိုးရဝန်ထမ်းများ၏ လုပ်ငန်း တာဝန်များရပ်တန့်နေခြင်း၊ ၎င်းတို့အား လုပ်ခလစာထုတ်ပေးမှုများ ရပ်တန့်လျက်ရှိခြင်း၊ နိုင်ငံပိုင် အမျိုးသားပန်းခြံများပိတ်ထားရခြင်း၊ အစိုးရချေးငွေထုတ်ပေးမှုများ ရပ်ထားရခြင်း၊ အခွန်ပြန်အမ်း ငွေ(Tax Refunds) ထုတ်ပေးမှုများ နှောင့်နှေးသွားခြင်း အစရှိသည်တို့အပါအဝင် အခြားဆိုးကျိုး သက်ရောက်မှုများလည်း ဖြစ်ပေါ်လျက်ရှိကြောင်း၊ သို့သော် Government Shutdown ဖြစ်ပေါ်ခဲ့ သည့် မက္ကဆီကိုတံတိုင်းကိစ္စအား ယခုရက်သတ္တပတ်အတွင်း ဖြေရှင်းနိုင်မည်ဆိုပါက အမေရိကန် ပြည်ထောင်စု၏ စီးပွားရေးအခြေအနေအပေါ် ဆိုးကျိုးသက်ရောက်မှု ကြီးကြီးမားမားဖြစ်ပေါ်လာ ဖွယ်မရှိသော်လည်း ယခု ဇန်နဝါရီလကျော်လွန်သည်အထိ နယ်စပ်တံတိုင်းကိစ္စပြေလည်မှုမရှိပါက သိသာထင်ရှားသော ဆုံးရှုံးမှုများကြုံတွေ့လာရဖွယ်ရှိကြောင်း၊ အစိုးရဝန်ထမ်းများက လုပ်ခလစာ မရရှိသည့်အတွက် ငွေကြေးသုံးစွဲမှုများကိုလျှော့ချခြင်းကြောင့် စီးပွားရေးလုပ်ငန်းများ၏ တိုးတက်မှုနှုန်း ကို ထိခိုက်လာဖွယ်ရှိခြင်း၊ အမျိုးသားပန်းခြံများပိတ်ထားရသည့်အတွက် ယင်းပန်းခြံများအနီး ဖွင့်လှစ်ထားသည့် စတိုးဆိုင်များ၊ စားသောက်ဆိုင်များ၏ရောင်းအားကျဆင်းဖွယ်ရှိခြင်း၊  အသေးစား စီးပွားရေးလုပ်ငန်းများနှင့် အိမ်ရာဝယ်ယူလိုသူများ၏ အစိုးရထံချေးငွေလျှောက်ထားမှုများမှာ လည်း ကြန့်ကြာဦးမည့်အနေအထားတွင်ရှိခြင်း အစရှိသည့်အခြေအနေများသည် Government Shutdown ကာလကြာရှည်လာသည်နှင့်အမျှ တိုး၍တိုး၍ဖြစ်ပေါ်လာမည်ဖြစ်ပြီး နိုင်ငံ၏ စီးပွားရေး တိုးတက်မှုကို နှောင့်နှေးစေနိုင်ကြောင်း၊ ယခုဇန်နဝါရီလကုန်ပိုင်းအထိ Government Shutdown ဆက်လက် ဖြစ်ပေါ်နေမည်ဆိုပါက အမေရိကန်ဒေါ်လာ(၈.၇)ဘီလီယံဖိုးခန့်ရှိသည့် တိုင်းပြည်၏ GDP ပမာဏကို ဆုံးရှုံးသွားရဖွယ်ရှိသည်ဟူသော စီးပွားရေးပညာရှင်များ၏ ခန့်မှန်းချက်များနှင့် အတူ ရင်းနှီးမြှုပ်နှံသူများသည် ရွှေကိုပိုမိုဝယ်ယူစုဆောင်းမှုများ ပြုလုပ်လာကြသည့်အတွက် ကမ္ဘာ့ ရွှေဈေးနှုန်းမှာ မြင့်တက်ခဲ့ခြင်းဖြစ်ကြောင်း သိရှိရပါသည်။

၂၀၁၈ ခုနှစ်၊ ဒီဇင်ဘာလ(၃၁)ရက်တွင် နယူးယောက်ဈေးကွက်၌ ဖေဖော်ဝါရီလအတွက် ရွှေကြိုတင်ရောင်းဝယ်မှုဈေးနှုန်းမှာ တစ်အောင်စလျှင် အမေရိကန်ဒေါ်လာ (၁၂၈၁.၃၀)ဖြင့် ဈေးပိတ် သွားခဲ့ကြောင်း၊ အဆိုပါဈေးနှုန်းသည် (၆)လတာကာလအတွင်း အမြင့်ဆုံးဈေးနှုန်းဖြစ်ကြောင်း သိရှိရပါသည်။

ရည်ညွှန်း www.reuters.com