ထိုင်း အထက်လွှတ်တော်အမတ်များကို တပ်မတော်အစိုးရ၏ ဒုတိယဝန်ကြီးချုပ် ဦးဆောင်သောစိစစ်ရေးကော်မတီက ရွေးချယ်ခြင်းဖြစ်သောကြောင့် ဖွဲ့စည်းပုံအခြေခံဥပဒေနှင့် ညီညွတ်မှုရှိ/ မရှိိကို စဉ်းစားသင့်သည်ဟု ပွေထိုင်းပါတီကကြေညာခဲ့မှု
ထိုင်းနိုင်ငံ၌ အထက်လွှတ်တော်အမတ်အဖြစ် ရွေးချယ်ခံရသူများတွင် လက်ရှိတပ်မတော် အစိုးရအဖွဲ့ဝန်ကြီး (၁၅) ဦးနှင့် အငြိမ်းစားတပ်မတော်အရာရှိကြီးများ ပါဝင်လျက်ရှိပြီး အထက်လွှတ်တော်အမတ်များ စိစစ်ရွေးချယ်ရေးကော်မတီမှာလည်း လက်ရှိဒုတိယဝန်ကြီးချုပ် ပရာဝတ်ဝေါင်ဆူဝမ် ဦးဆောင်သည့် အဖွဲ့ဖြစ်သောကြောင့် ဖွဲ့စည်းပုံအခြေခံဥပဒေပါပြဌာန်းချက်နှင့် ကိုက်ညီမှုရှိ/မရှိကို သက်ဆင်ထောက်ခံသည့် ပွေထိုင်းပါတီက ၂၀၁၉ ခုနှစ်၊ မေလ (၇) ရက် (အင်္ဂါနေ့) တွင် မေးခွန်းထုတ်ခဲ့ကြောင်းသိရှိရပါသည်။
ပွေထိုင်းပါတီ၏ ဥပဒေအကြံပေးအဖွဲ့ခေါင်းဆောင် ချူဆက်စရီနေးက ပြောကြားရာ၌ ဖွဲ့စည်းပုံအခြေခံဥပဒေ၌ အထက်လွှတ်တော်အမတ်များ စိစစ်ရွေးချယ်ရေးအဖွဲ့သည် နိုင်ငံရေးအသိုက်အဝန်းနှင့် ကင်းရှင်းမှုရှိပြီး ဘက်လိုက်မှုမရှိသောသူများ ဖြစ်ရမည်ဟူ၍ ပြဌာန်းထားကြောင်း၊ သို့သော် ယခုအထက်လွှတ်တော်အမတ်များ စိစစ်ရွေးချယ်ရေးအဖွဲ့ ဥက္ကဋ္ဌမှာ တပ်မတော်အစိုးရအဖွဲ့၏ ဒုတိယဝန်ကြီးချုပ်ဖြစ်သောကြောင့် ရွေးချယ်မှုများဘက်လိုက်မှုရှိခြင်း /မရှိခြင်းနှင့် ပတ်သက်၍ မေးခွန်းထုတ်စရာဖြစ်နေကြောင်း၊ တပ်မတော်အစိုးရသည် အာဏာကို ဆက်လက် ထိန်းချုပ်နိုင်ရန်အတွက် လှုပ်ရှားနေခြင်းဖြစ်ကြောင်း၊ ၎င်းတို့ ရွေးချယ်ထားသည့် အထက်လွှတ်တော် အမတ် (၂၅၀) သည် ရွေးကောက်ပွဲများမှ အနိုင်ရရှိလာသည့် အောက်လွှတ်တော်အမတ် (၅၀၀) နှင့်အတူဝန်ကြီးချုပ် တင်မြှောက်မည့်သူကိုရွေးချယ်ကြမည်ဖြစ်ရာ အထက်လွှတ်တော် အမတ်များအနေဖြင့် ဝန်ကြီးချုပ်အဖြစ် မည်သူကိုရွေးချယ်မည်ဆိုခြင်းမှာ အလွန်ရှင်းလင်းသောအဖြေဖြစ်ကြောင်း၊ ပွေထိုင်းပါတီအနေဖြင့် အဆိုပါ ကိစ္စနှင့်ပတ်သက်၍ ရွေးကောက်ပွဲကော်မရှင်အဖွဲ့ဝင်များထံ တစ်ဦးချင်းစီသို့ စာရေးသားပေးပို့ထားသည်ဟု ပြောကြားခဲ့ကြောင်း သိရှိရပါသည်။
အထက်လွှတ်တော်အမတ်အဖြစ် ရွေးချယ်ခြင်းခံရသည့် တပ်မတော် အစိုးရအဖွဲ့ဝင်ဝန်ကြီး (၁၅) ဦးသည် ၂၀၁၉ ခုနှစ်၊ မေလ (၇) ရက် (အင်္ဂါနေ့) တွင် ကျင်းပသော အစိုးရအဖွဲ့အစည်းအဝေးအပြီးတွင် ဝန်ကြီးချုပ် ပရာယုချန်အိုချာနှင့် အမှတ်တရဓါတ်ပုံရိုက်ပြီးနောက် ရာထူးမှ နုတ်ထွက်ခဲ့ ကြကြောင်း၊ အဆိုပါ ပုဂ္ဂိုလ်များတွင် ဒုတိယဝန်ကြီးချုပ် (၂)ဦး၊ ဝန်ကြီးချုပ်ရုံးဝန်ကြီးအပါအဝင် ဝန်ကြီး(၆)ဦး၊ ဒုတိယဝန်ကြီး (၇) ဦးတို့ပါဝင်ကြောင်း၊ ထို့ပြင် တပ်မတော်အစိုးရမှ ဦးဆောင်ကျင်းပခဲ့သော အမျိုးသားညီလာခံတွင် ပါဝင်ခဲ့သည့် အဖွဲ့ဝင် (၆၀) ဦးသည်လည်း အထက်လွှတ်တော်အမတ်များအဖြစ် ရွေးချယ်ခံရကြောင်းwww.bangkokpost.com အင်တာနက် website တွင်ဖော်ပြပါရှိပါသည်။