မလေးရှားလုပ်ငန်းရှင်များအနေဖြင့် မြန်မာနိုင်ငံအတွင်း၌ ရင်းနှီးမြှပ်နှံမှုများ ပြုလုပ်ရန် မြန်မာနိုင်ငံဆိုင်ရာ မလေးရှားသံအမတ်ကြီးက တိုက်တွန်းခဲ့

မလေးရှားလုပ်ငန်းရှင်များအနေဖြင့် မြန်မာနိုင်ငံအတွင်း၌ ရင်းနှီးမြှပ်နှံမှုများ ပြုလုပ်ရန် မြန်မာနိုင်ငံဆိုင်ရာ မလေးရှားသံအမတ်ကြီးက တိုက်တွန်းခဲ့

          မြန်မာနိုင်ငံ၌ စီးပွားရေးတိုးတက်မှု အလာအလားကောင်းများ ဖြစ်ထွန်းနေသောကြောင့် မလေးရှားလုပ်ငန်းရှင်များအနေဖြင့် မြန်မာနိုင်ငံအတွင်း၌ ရင်းနှီးမြှပ်နှံမှုများပြုလုပ်ရန် မြန်မာနိုင်ငံဆိုင်ရာ မလေးရှားသံအမတ်ကြီး ဒါတွတ်ဇာဟာရီဘာဟာရမ်က ၂၀၁၉ ခုနှစ်၊ ဇူလိုင်လ (၂၉) ရက် (တနင်္လာနေ့) တွင်တိုက်တွန်းခဲ့ကြောင်း သိရှိရပါသည်။          
           မလေးရှားသံမတ်ကြီးကပြောကြားရာ၌ ရင်းနှီးမြှပ်နှံမှုများပြုလုပ်ရန်အတွက် အခြေခံအဆောက်အဦ၊ သယ်ယူပို့ဆောင်ရေး၊ သတင်းနှင့်နည်းပညာ၊ ကုန်သွယ်ရေး၊ ဝန်ဆောင်မှုလုပ်ငန်းများ၊ ကုန်ထုတ်လုပ်ငန်းနှင့် လယ်ယာစိုက်ပျိုးရေးကို အခြေခံသောစက်မှုလုပ်ငန်းများ အစရှိသဖြင့် လုပ်ငန်းပေါင်းစုံရှိရာ မလေးရှားလုပ်ငန်းရှင်များအတွက် ရင်းနှီးမြှပ်နှံမှုဆိုင်ရာ အခွင့်အလမ်းများစွာရှိသည်ဟု ပြောကြားခဲ့ကြောင်း သိရှိရပါသည်။          
           မြန်မာနိုင်ငံသည် လက်ရှိအချိန်၌ GDP တိုးတက်မှုနှုန်း ၆.၆ % ခန့်ရှိသောကြောင့် အာဆီယံနိုင်ငံများတွင် လတ်တလောစီးပွားရေးတိုးတက်မှုနှုန်း ကောင်းမွန်သည့် နိုင်ငံတစ်ခုအဖြစ် ရပ်တည်နေကြောင်း၊ မြန်မာနိုင်ငံ၌ မလေးရှားကုမ္ပဏီများ၏ ရင်းနှီးမြှပ်နှံမှုစုစုပေါင်းပမာဏမှာ မလေးရှားရင်းဂစ်ငွေ ၄.၅ ဘီလီယံခန့်ရှိပြီး အဆိုပါကုမ္ပဏီများတွင် Petronas , Maybank , Texchem , OCK Yangon , Nissan Tan Chong , Axiata , ENRA နှင့် Muhibbax Engineering ကဲ့သို့သော ကုမ္ပဏီကြီးများပါဝင်ကြောင်း၊ မလေးရှား- မြန်မာအကြား နှစ်နိုင်ငံအပြန်အလှန်ကုန်သွယ်မှုပမာဏသည်  ၂၀၁၇ ခုနှစ်၌ ရင်းဂစ်ငွေ၄.၈ ဘီလီယံ၊ ၂၀၁၈ခုနှစ်၌ ရင်းဂစ်ငွေ ၄.၄ ဘီလီယံခန့်ရှိကြောင်း သိရှိရပါသည်။          
           မြန်မာနိုင်ငံဆိုင်ရာမလေးရှားသံရုံးသည် မလေးရှား-မြန်မာလုပ်ငန်းရှင်များအသင်းနှင့် ပူးပေါင်း၍ ဩဂုတ်လ (၂၈) ရက်မှ (၃၁) ရက်နေ့ထိကာလအတွင်း ရန်ကုန်မြို့၌ ရင်းနှီးမြှပ်နှံမှုဆိုင်ရာ အခမ်းအနားတစ်ခုကို ကျင်းပရန်စီစဉ်ထားကြောင်း၊ အဆိုပါအခမ်းအနားသည် မြန်မာနိုင်ငံအတွင်းသို့ မလေးရှားလုပ်ငန်းရှင်များ လာရောက်လေ့လာနိုင်ရန်အတွက် ရည်ရွယ်ပြုလုပ်ခြင်းဖြစ်သည်ဟု သိရှိရကြောင်း www.malaymail.comအင်တာနက် website တွင်ဖော်ပြပါရှိပါသည်။

(မှတ်ချက်။ အမေရိကန်တစ်ဒေါ်လာလျှင် မလေးရှားရင်းဂစ်ငွေ (၄.၁၂ )လဲလှယ်မှုနှုန်းရှိပါသည်။)

ရွှေသွင်းကုန်ခွန် တိုးမြှင့်ကောက်ခံခြင်းကြောင့် ယခုနှစ်အတွင်း အိန္ဒိယရွှေဝယ်လိုအားမှာ ၂.၉% ခန့်ကျဆင်းဖွယ်ရှိ

ရွှေသွင်းကုန်ခွန် တိုးမြှင့်ကောက်ခံခြင်းကြောင့် ယခုနှစ်အတွင်း အိန္ဒိယရွှေဝယ်လိုအားမှာ၂.၉% ခန့် ကျဆင်းဖွယ်ရှိ

          လန်ဒန်အခြေစိုက် ကမ္ဘာ့ရွှေကောင်စီစာရင်းအချက်အလက်များအရ ကမ္ဘာပေါ်၌ ရွှေဝယ်လိုအားအများဆုံးမှာ တရုတ်နိုင်ငံဖြစ်ပြီး အိန္ဒိယနိုင်ငံမှာ ဒုတိယရွှေဝယ်လိုအားမှာ ဒုတိယအများဆုံးဖြစ်ကြောင်း၊ ၂၀၁၈ခုနှစ်အတွင်း တရုတ်နိုင်ငံ၏ ရွှေဝယ်လိုအားမှာ (၉၉၄.၃) တန်ရှိပြီးအိန္ဒိယနိုင်ငံ၏ ရွှေဝယ်လိုအားမှာ (၇၆၀.၄) တန်ရှိကြောင်း၊ ၂၀၁၉ခုနှစ်၊ ပထမ (၃) လတာကာလအတွင်း တရုတ်နိုင်ငံ၏ ရွှေဝယ်လိုအားမှာ (၂၅၅.၃) တန်ခန့်ရှိပြီးအိန္ဒိယနိုင်ငံ၏ ရွှေဝယ်လိုအားမှာ (၁၅၉) တန်ခန့်ရှိသည်ဟုသိရှိရပါသည်

          အိန္ဒိယအစိုးရသည် ၂၀၁၉ ခုနှစ်၊ ဇူလိုင်လ (၅) ရက်နေ့မှစတင်၍ ပြည်ပမှတင်သွင်းလာသည့် ရွှေများအပေါ်၌ သွင်းကုန်ခွန်ကို မူလသတ်မှတ်ထားသည့် ၁၀% မှ ၁၂.၅% သို့ တိုးမြှင့်ကောက်ခံခဲ့ရာ သွင်းကုန်ခွန်ဂယက်ကြောင့် နိုင်ငံအတွင်း၌ ရွှေစေျးနှုန်းများမြင့်တက်သွားပြီး ၂၀၁၉ခုနှစ် လက်ကျန်ကာလများ၌ အိန္ဒိယပြည်သူများ၏ ဝယ်ယူမှုအားပျော့သွားဖွယ်ရှိကြောင်း၊ ထို့ကြောင့် ၂၀၁၉ခုနှစ်တွင် အိန္ဒိယနိုင်ငံ၏ရွှေဝယ်လိုအားမှာ ၂၀၁၈ ခုနှစ်နှင့်နှိုင်းယှဉ်ပါက ၂.၉ % ခန့်ကျဆင်းသွားလိမ့်မည်ဟု လန်ဒန်အခြေစိုက် ကမ္ဘာ့ရွှေကောင်စီက ၂၀၁၉ ခုနှစ်၊ ဇူလိုင်လ (၂၈) ရက်နေ့တွင် ခန့်မှန်းခဲ့ကြောင်း သိရှိရပါသည်။

          တရုတ်ဗဟိုဘဏ်နှင့် အိန္ဒိယဗဟိုဘဏ်များသည် အမေရိကန်ဗဟိုဘဏ်၏ ငွေကြေးမူဝါဒအပြောင်းအလဲကိုစောင့်ကြည့်၍လာမည့် (၆)လမှ(၁၂)လတာကာလအတွင်းအရန်ရွှေသိုလှောင်မှုပမာဏကိုအလျှော့အတင်းပြုလုပ်ဖွယ်ရှိကြောင်းwww.economictimes.comအင်တာနက် website တွင်ဖော်ပြပါရှိပါသည်။

ကမ္ဘာ့စီးပွားရေးအပေါ် စိုးရိမ်ပူပန်နေမှုများနှင့်အီရန်-ကမ္ဘာ့အင်အားကြီးနိုင်ငံများအကြားတွေ့ဆုံဆွေးနွေးနေမှုများ၏ဂယက်ကြောင့် ကမ္ဘာ့ရေနံစေျးနှုန်းများကျဆင်းခဲ့

ကမ္ဘာ့စီးပွားရေးအပေါ် စိုးရိမ်ပူပန်နေမှုများနှင့်အီရန်-ကမ္ဘာ့အင်အားကြီးနိုင်ငံများအကြား တွေ့ဆုံဆွေးနွေးနေမှုများ၏ ဂယက်ကြောင့် ကမ္ဘာ့ရေနံစေျးနှုန်းများကျဆင်းခဲ့

ကမ္ဘာ့စီးပွားရေးအပေါ် စိုးရိမ်ပူပန်နေမှုနှင့်အီရန်-ကမ္ဘာ့အင်အားကြီးနိုင်ငံများအကြား တွေ့ဆုံ ဆွေးနွေးနေမှုများ၏ဂယက်ကြောင့် ကမ္ဘာ့ရေနံစေျးနှုန်းများကျဆင်းခဲ့ကြောင်းသိရှိရပါသည်။

အမေရိကန်ပြည်ထောင်စု၊ ကူးသန်းရောင်းဝယ်ရေးဝန်ကြီးဌာနက ၂၀၁၉ခုနှစ်၊ ဇူလိုင်လ (၂၆)ရက်(သောကြာနေ့)တွင် ထုတ်ပြန်သည့် အစီရင်ခံစာ၌ တရုတ်-အမေရိကန် ကုန်သွယ်ရေး စစ်ပွဲ၏ ဂယက်ကြောင့်အမေရိကန်ပြည်ထောင်စု၏ စီးပွားရေးတိုးတက်မှု နှုန်းသည် ၂၀၁၉ခုနှစ်၊ ပထမ(၃)လတာကာလအတွင်း၌ ၃.၁% ရှိခဲ့သော်လည်းဒုတိယ(၃)လပတ် ကာလအတွင်း၌မူ ၂.၁% သာရှိခဲ့သည်ဟုဖော်ပြထားကြောင်း၊ အဆိုပါအနေအထားသည် အမေရိကန်အစိုးရက မျှော်မှန်းထားသည့် ပမာဏလောက်ဆိုးရွားခြင်း မရှိသော်လည်း အမေရိကန်ပြည်ထောင်စုအနေဖြင့် စီးပွားရေးနှေးကွေးမှုကိုကြုံတွေ့နေရပြီဖြစ်သည့်အတွက် အမေရိကန်ပြည်ထောင်စု၏ ရေနံဝယ်လိုအားမှာလည်း ကျဆင်းဖွယ်ရှိသည်ဟူသော ခန့်မှန်းချက်များ ထွက်ပေါ်နေသောကြောင့် ကမ္ဘာ့စေျးကွက်အတွင်း ရေနံစေျးနှုန်းများ ကျဆင်း သွားခဲ့ကြောင်းသိရှိရပါသည်။

ထို့ပြင် အီရန်နှင့် ကမ္ဘာ့အင်အားကြီးနိုင်ငံများဖြစ်သောဂျာမနီ၊ ပြင်သစ်၊ ဗြိတိန်၊ တရုတ်နှင့် ဥရောပသမဂ္ဂတို့မှ ကိုယ်စားလှယ်များအကြား ဩစတြီးယားနိုင်ငံ၊ ဗီယင်နာမြို့၌ တွေ့ဆုံ ဆွေးနွေးပွဲပြုလုပ်ခဲ့ခြင်းသည်လည်း ရေနံစေျးနှုန်းများကိုကျဆင်းစေသည့် အခြားအချက် တစ်ခုဖြစ်ကြောင်း၊ အဆိုပါဆွေးနွေးပွဲတွင် အီရန်နိုင်ငံ၏ နျူကလီယားအစီအစဉ်နှင့်ပတ်သက်၍ အီရန်နှင့် အင်အားကြီးနိုင်ငံများအကြား ၂၀၁၅ ခုနှစ်ကရယူထားသော သဘောတူညီမှုများကို ဆက်လက်ထိန်းသိမ်းထားရန် ဆွေးနွေးခဲ့ကြောင်း၊ အင်အားကြီးနိုင်ငံတစ်ခုဖြစ်သော အမေရိကန်ပြည်ထောင်စုမှာ ယင်းဆွေးနွေးပွဲသို့ တက်ရောက်ခြင်းမရှိခဲ့သော်လည်း ဆွေးနွေးပွဲ၏ ကနဦးအဆင့်၌ အခြေအနေကောင်းများ ဖြစ်ပေါ်နေခြင်းကိုအကြောင်းပြု၍ အရှေ့အလယ်ပိုင်းဒေသ၏ ပထဝီနိုင်ငံရေးအခြေအနေအပေါ် စိုးရိမ်ပူပန်မှုများ လျော့နည်းသွားသည့် အတွက် ရေနံစေျးနှုန်းများကျဆင်းသွားခြင်းဖြစ်ကြောင်းသိရှိရပါသည်။

၂၀၁၉ခုနှစ်၊ ဇူလိုင်လ(၂၉)ရက်(တနင်္လာနေ့)နံနက်ပိုင်းတွင် နယူးယောက်စေျးကွက်၌ WTI ရေနံစိမ်းကြိုတင်ရောင်းဝယ်မှုစေျးနှုန်းမှာ ၀.၂%ကျဆင်းပြီး တစ်စည်လျှင် အမေရိကန် ဒေါ်လာ(၅၆.၁၁) သို့လည်းကောင်း၊ လန်ဒန်စေျးကွက်၌ ဘရန့်ရေနံစိမ်းကြိုတင်ရောင်းဝယ်မှု စေျးနှုန်းမှာ  ၀.၄% ကျဆင်းပြီးတစ်စည်လျှင် အမေရိကန်ဒေါ်လာ(၆၃.၂၃)သို့လည်းကောင်း အသီးသီး ရောက်ရှိခဲ့ကြောင်း www.reuters.com အင်တာနက် website တွင် ဖော်ပြပါရှိ ပါသည်။

မြန်မာနိုင်ငံ၏ ကမ္ဘာ့လှည့်ခရီးသွားကဏ္ဍတွင် တရုတ်ကမ္ဘာလှည့်ခရီးသွားများနှင့် စပ်ဆက်နေသော အကျိုးဖြစ်ထွန်းမှုနည်းပါးသည့် ကမ္ဘာလှည့်ခရီးသွားလုပ်ငန်း (Zero-Dollar Tourism) အများအပြားပေါ်ပေါက်လျက်ရှိ

မြန်မာနိုင်ငံ၏ ကမ္ဘာ့လှည့်ခရီးသွားကဏ္ဍတွင် တရုတ်ကမ္ဘာလှည့်ခရီးသွားများနှင့် စပ်ဆက်နေသော အကျိုးဖြစ်ထွန်းမှုနည်းပါးသည့် ကမ္ဘာလှည့်ခရီးသွားလုပ်ငန်း (Zero-Dollar Tourism) အများအပြားပေါ်ပေါက်လျက်ရှိ

၂၀၁၉ခုနှစ် ပထမ (၆) လတာကာလအတွင်း မြန်မာနိုင်ငံသို့ ကမ္ဘာလှည့်ခရီးသည် ဝင်ရောက်သည့်ဦးရေမှာ (၂.၁၄) သန်းခန့်ရှိသည့်အတွက် ယမန်နှစ်အလားတူကာလနှင့် နှိုင်းယှဉ်ပါက ၂၄% ခန့် မြင့်တက်လာခဲ့ကြောင်း၊ မြန်မာအစိုးရသည် ၂၀၁၉ခုနှစ် တစ်နှစ်တာကာလအတွင်း ကမ္ဘာလှည့်ခရီးသွား (၆) သန်းခန့်ဝင်ရောက်လိမ့်မည်ဟု မျှော်မှန်းထားကြောင်း သိရှိရပါသည်။     

မြန်မာနိုင်ငံဟိုတယ်နှင့်ခရီးသွားလာရေးဝန်ကြီးဌာန၏ ဒုတိယအမြဲတမ်းအတွင်းဝန် ဦးလှိုင်ဦးကပြောကြားရာ၌  ရခိုင်ပြည်နယ်ပြဿနာကြောင့် ၂၀၁၈ခုနှစ်တွင် အနောက်နိုင်ငံများမှ ကမ္ဘာလှည့်ခရီးသွားဝင်ရောက်မှုမှာ ၁၅% မှ ၂၀% အထိကျဆင်းသွားခဲ့ကြောင်း၊ ၂၀၁၉ နှစ်ဆန်းမှစတင်၍  အနောက်နိုင်ငံများမှ ကမ္ဘာလှည့်ခရီးသွားများဝင်ရောက်မှု ပြန်လည်မြင့်တက်လာသော်လည်း လက်ရှိအချိန်ထိ မြန်မာနိုင်ငံသို့ ဝင်ရောက်မှုအများဆုံးမှာ တရုတ်ကမ္ဘာလှည့်ခရီးသွားများဖြစ်ကြောင်း၊ အထူးသဖြင့် ၂၀၁၈ခုနှစ် စက်တင်ဘာလမှစ၍  ပြည်ဝင်ခွင့်ဗီဇာ စည်းမျဉ်းများဖြေလျော့ပေးခဲ့ခြင်းနှင့် တရုတ်-မြန်မာအကြား တိုက်ရိုက်လေကြောင်းခရီးစဉ်အများအပြား ပေါ်ပေါက်လာခြင်းတို့ကြောင့် မြန်မာနိုင်ငံသို့ တရုတ်ခရီးသွားဝင်ရောက်မှုမှာ (၂) ဆခန့်မြင့်တက်လာခဲ့ကြောင်း၊ မန္တလေးမြို့သည် တရုတ်ခရီးသွားများ အများဆုံးသွားရောက်လည်ပတ်သည့်မြို့ဖြစ်ပြီး ၂၀၁၉ခုနှစ် ပထမ (၆)လတာကာလအတွင်းမန္တလေးမြို့သို့ လာရောက်ခဲ့သည့် ကမ္ဘာလှည့်ခရီးသွား (၂၁၈,၉၀၁) ဦး ရှိသည့်အနက် (၉၀,၀၀၀) ဦးခန့်မှာတရုတ်ခရီးသွားများဖြစ်သည်ဟု ပြောကြားခဲ့ကြောင်း သိရှိရပါသည်။ ပုံမှန်အားဖြင့် ကမ္ဘာလှည့်ခရီးသွားလာရောက်မှုနည်းပါးလေ့ရှိိသည့် မိုးတွင်းကာလများ၌ပင် မြန်မာနိုင်ငံသို့ တရုတ်ခရီးသွားများလာရောက်မှုမှာ လျော့နည်းသွားခြင်းမရှိကြောင်း၊ သို့သော် တရုတ်ခရီးသွားများသည် တရုတ်နိုင်ငံအတွင်းရှိ စေျးနှုန်းချိုသာသော ကမ္ဘာလှည့်ခရီးသွားလုပ်ငန်းများနှင့် ချိတ်ဆက်ကာလာရောက်ကြခြင်းဖြစ်ပြီး မြန်မာနိုင်ငံအတွင်းအမေရိကန်ဒေါ်လာကို လုံးဝသုံးစွဲမှုမရှိသည့် ကမ္ဘာလှည့်ခရီးသွားလုပ်ငန်းများအသွင်ဖြင့်  ဝင်ရောက်ခြင်းဖြစ်သောကြောင့် ဒေသခံမြန်မာပြည်သူများအတွက် အကျိုးဖြစ်ထွန်းခြင်းမရှိကြောင်း၊ တရုတ်ခရီးသွားများအတွက် လေယာဉ်လက်မှတ်၊ ဟိုတယ်၊ မြန်မာပြည်တွင်း သယ်ယူပို့ဆောင်ရေး၊ စားသောက်ရေးနှင့် ဧည့်လမ်းညွှန်များကို တရုတ်ကုမ္ပဏီများက စီစဉ်ကြရုံသာမက ခရီးစဉ်အတွင်း ကျောက်မျက်ရတနာများနှင့် အမှတ်တရပစ္စည်းများကို ဝယ်ယူလိုပါကလည်း တရုတ်ကုမ္ပဏီများနှင့်ချိတ်ဆက်ထားသည့်ဆိုင်များတွင်သာ စေျးနှုန်းအမြင့်ပေး၍‌ ဝယ်ယူရကြောင်း၊ ထို့သို့ဝယ်ယူသည့်အခါ ငွေပေးချေရာ၌လည်း မြန်မာကျပ်ငွေအစားတရုတ်ယွမ်ငွေနှင့် WeChat Pay ကဲ့သို့သော online ငွေပေးချေမှုများကိုသာ အသုံးပြုရကြောင်း၊ တရုတ်ကုမ္ပဏီများသည် ဧည့်လမ်းညွှန်အသုံးပြုရာ၌ မြန်မာနိုင်ငံ၊ ဟိုတယ်နှင့်ခရီးသွားလုပ်ငန်းဝန်ကြီးဌာနမှ အသိအမှတ်ပြုလက်မှတ်များထုတ်ပေးထားသည့်  ပြည်တွင်းဧည့်လမ်းညွှန်များကို ငှားရမ်းအသုံးပြုခြင်းမရှိဘဲ မြန်မာစကားအနည်းငယ်ပြောတတ်ပြီး မြန်မာ့သမိုင်းကြောင်းနှင့် ကမ္ဘာလှည့်ခရီးသွားလုပ်ငန်းအကြောင်းတို့ကို အနည်းငယ်မျှသာသိသော တရုတ်နိုင်ငံသားဧည့်လမ်းညွှန်များကိုသာ အသုံးပြုကြကြောင်း၊ ထို့ကြောင့် တရုတ်ခရီးသွားများနှင့်စပ်ဆက်နေသော ကမ္ဘာလှည့်ခရီးသွားလုပ်ငန်းအများစုသည် မြန်မာနိုင်ငံအတွက် ရသင့်ရထိုက်သောငွေကြေးများကို ဆုံးရှုံးစေလျက်ရှိကြောင်း သိရှိရပါသည်။

မြန်မာနိုင်ငံဟိုတယ်နှင့် ကမာ္ဘလှည့်ခရီးသွားလာရေးဝန်ကြီးဌာန၏ အဆင့်မြင့်အရာရှိကြီးတစ်ဦးကပြောကြားရာ၌ Zero-Dollar Tourism သည် ကိုင်တွယ်ဖြေရှင်းရန် မလွယ်သည့် ပြဿနာတစ်ရပ်တစ်ခု ဖြစ်နေကြောင်း၊ ဒေသခံများက ယင်းကိစ္စကိုနှိမ်နှင်းရန် တောင်းဆိုနေသော်လည်း ဟိုတယ်နှင့်ခရီးသွားလာရေးဝန်ကြီးဌာန တာဝန်ရှိသူများက မူမွတ်စလင်ပြဿနာကြောင့် အနောက်နိုင်ငံများမှ ကမ္ဘာလှည့်ခရီးသွားများဝင်ရောက်မှု နည်းပါးနေချိန်တွင်  Zero – Dollar Tourism ကိစ္စကို အရေးယူဆောင်ရွက်လိုက်မည်ဆိုပါက တရုတ်ခရီးသွားဝင်ရောက်မှုပါ ကျဆင်းသွားမည့်အရေးကို စိုးရိမ်ပူပန်လျက်ရှိကြောင်း၊ ထိုင်းနိုင်ငံအပါအဝင် အိမ်နီးချင်းနိုင်ငံများ၌လည်း အလားတူပြဿနာမျိုးများ ရင်ဆိုင်ကြုံတွေခဲ့ရပြီးဖြစ်သည်ကိုလည်း သိရှိထားပါကြောင်း၊ ကမ္ဘာလှည့်ခရီးသွားကဏ္ဍစဉ်ဆက်မပြတ် တိုးတက်ရန်အတွက် Zero-Dollar Tourism ကဲ့သို့သော ခရီးသွားလုပ်ငန်းများကို သင့်တင့်လျောက်ပတ်သည့် စည်းမျဉ်းဥပဒေများဖြင့် မဖြစ်မနေထိန်းချုပ်ကိုင်တွယ်ရမည်ကို နားလည်ပါကြောင်း၊ သို့သော် လက်ရှိအနေအထားအရ ထိရောက်သောအရေးယူမှုများ ပြုလုပ်နိုင်ခြင်းမရှိသေးဟု ပြောကြားခဲ့ကြောင်း www.aa.com. အင်တာနက် website တွင်ဖော်ပြပါရှိပါသည်။

ငွေကြေးစေျးကွက်နှင့်ပတ်သက်၍ ကြားဝင်စွက်ဖက်ခြင်းမပြုရန် အမေရိကန်သမ္မတအား အစိုးရအဖွဲ့ဝန်ကြီးများက စည်းရုံးပြောကြားခဲ့ပြီးနောက် အမေရိကန်ဒေါ်လာတန်ဖိုးမှာ အနည်းငယ်မြင့် တက်ခဲ့

ငွေကြေးစေျးကွက်နှင့်ပတ်သက်၍ ကြားဝင်စွက်ဖက်ခြင်းမပြုရန် အမေရိကန်သမ္မတအား အစိုးရအဖွဲ့ဝန်ကြီးများက စည်းရုံးပြောကြားခဲ့ပြီးနောက် အမေရိကန်ဒေါ်လာတန်ဖိုးမှာ အနည်းငယ်မြင့် တက်ခဲ့

အမေရိကန်သမ္မတဒေါ်နယ်ထရန့်သည် ငွေကြေးစေျးကွက်အတွင်း ဝင်ရောက်စွက်ဖက်၍ အမေရိကန်ဒေါ်လာတန်ဖိုး ဆက်လက်ကျဆင်းအောင် လုပ်ဆောင်လိုသော်လည်း အစိုးရအဖွဲ့ဝန်ကြီးများနှင့် စီးပွားရေးအကြံပေးများ၏ ရှင်းလင်းပြောကြားမှုများကြောင့် ၎င်း၏အစီအစဉ်ကို စွန့်လွှတ်ခဲ့သည်ဟု သိရှိရပါသည်။

အမေရိကန်သမ္မတ အိမ်ဖြူတော်၏ စီးပွားရေးအကြံပေးပုဂ္ဂိုလ်လာရီကူဒလိုက ဇူလိုင်လ (၂၆) ရက် (သောကြာ) နေ့တွင် သတင်းထောက်များအားပြောကြားရာ၌ ငွေကြေးစေျးကွက်နှင့်ပတ်သက်၍ အမေရိကန်သမ္မတ၊ အစိုးရအဖွဲ့ဝန်ကြီးများနှင့် သမ္မတ၏စီးပွားရေးအကြံပေးပုဂ္ဂိုလ်များပါဝင်သည့် အစည်းအဝေးများကို ယခုရက်သတ္တပတ်အတွင်း ဆက်တိုက်ပြုလုပ်ခဲ့ကြောင်း၊ သမ္မတသည်  ကုန်သွယ်ဖက်နိုင်ငံများက ငွေကြေးတန်ဖိုးများ တမင်လျှော့ချ၍  ကုန်သွယ်ရေးအသာစီးရယူမည်ကို စိုးရိမ်ပူပန်လျက်ရှိကြောင်း၊ သို့သော် သမ္မတနှင့်ဝန်ကြီးများ၊ စီးပွားရေးအကြံပေးပုဂ္ဂိုလ်များအကြား ရက်အတန်ကြာ အပြန်အလှန်ဆွေးနွေးခဲ့ပြီးနောက်တွင် သမ္မတသည် အမေရိကန်ဒေါ်လာတန်ဖိုး ကျဆင်းစေရန်အတွက် ဝင်ရောက်စွက်ဖက် လုပ်ဆောင်မည့်အစီအစဉ်များကို စွန့်လွှတ်၍ ဖြစ်သင့်ဖြစ်ထိုက်သော တန်ဖိုးအတိုင်းသာရှိနေစေရန် ဆုံးဖြတ်ခဲ့သည်ဟု ပြောကြားခဲ့ကြောင်း သိရှိရပါသည်။

လာရီကူဒလို၏ ပြောကြားချက်ထွက်ပေါ်ပြီးနောက်တွင် ရက်သတ္တပတ်အနည်းငယ်ကြာအားပျော့ နေသော အမေရိကန်ဒေါ်လာတန်ဖိုးမှာ ပြန်လည်ဦးမော့လာခဲ့ကြောင်း၊ ၂၀၁၉ခုနှစ်၊ ဇူလိုင်လ (၂၇) ရက် (စနေနေ့)နံနက်ပိုင်းတွင် အမေရိကန်ဒေါ်လာအညွှန်းကိန်းတန်ဖိုးသည် အခြားနိုင်ငံတကာသုံး ငွေကြေးများနှင့်နှိုင်းယှဉ်ရာ၌ ၀.၂% မြင့်တက်ပြီးအညွှန်းကိန်း (၉၈.၀၄၄) သို့ရောက်ရှိခဲ့ကြောင်း၊ အမေရိကန်ဒေါ်လာသည် ယူရိုငွေနှင့်နှိုင်းယှဉ်ရာ၌ တစ်ယူရိုလျှင် အမေရိကန်ဒေါ်လာ (၁.၁၁၂) ဒေါ်လာလဲလှယ်မှုနှုန်းသို့လည်းကောင်း၊ ဂျပန်ယန်းငွေနှင့်နှိုင်းယှဉ်ရာ၌ အမေရိကန်တစ်ဒေါ်လာလှျင် ဂျပန်ငွေ (၁၀၈.၇၂) ယန်းသို့လည်းကောင်း၊ တရုတ်ယွမ်ငွေေနှင့်နှိုင်းယှဉ်ရာ၌ အမေရိကန်တစ်ဒေါ်လာလျှင် (၆.၈၈၀၄) ယွမ်လဲလှယ်မှုနှုန်းများသို့လည်းကောင်း အသီးသီးမြင့်တက်ရောက်ရှိခဲ့ကြောင်း www.marketwatch.com အင်တာနက် website တွင်ဖော်ပြပါရှိပါသည်။

နိုင်ငံတကာအစိုးရများ၏ ကန့်ကွက်မှုများရှိနေသော်လည်း Libra ဒီဂျစ်တယ်ငွေကြေးကို ထုတ်ဝေသွားမည်ဟု Facebook တည်ထောင်သူ မာ့ခ်ဇူကာဘတ်က အတည်ပြုပြောကြားခဲ့

နိုင်ငံတကာအစိုးရများ၏ ကန့်ကွက်မှုများရှိနေသော်လည်း Libra ဒီဂျစ်တယ်ငွေကြေးကို ထုတ်ဝေသွားမည်ဟု Facebook တည်ထောင်သူမာ့ခ်ဇူကာဘတ်က အတည်ပြုပြောကြားခဲ့

နိုင်ငံတကာအစိုးရများ၏ ကန့်ကွက်မှုများရှိနေသော်လည်း Libra ဒီဂျစ်တယ်ငွေကြေးကို ထုတ်ဝေသွားမည်ဟု Facebook တည်ထောင်သူမာ့ခ်ဇူကာဘတ်က ၂၀၁၉ခုနှစ်၊ ဇူလိုင်လ(၂၄) ရက် (ဗုဒ္ဓဟူးနေ့) တွင် အတည်ပြုပြောကြားခဲ့ကြောင်း သိရှိရပါသည်။

          လွန်ခဲ့သည့် ရက်သတ္တပတ်အတွင်း ပြင်သစ်နိုင်ငံ၌ ကျင်းပခဲ့သည့် စက်မှုထိပ်သီး (၇) နိုင်ငံမှ ဝန်ကြီးများအစည်းအဝေးတွင် အစည်းအဝေးတက်ရောက်ခဲ့သည့် ဘဏ္ဍာရေးဝန်ကြီးများနှင့် ဗဟိုဘဏ်အကြီးအကဲများက Libra ငွေကြေးအစီအစဉ်အပေါ် ပြစ်တင်ဝေဖန်ခဲ့ပြီးယင်းငွေကြေးကြောင့် လက်ရှိကျင့်သုံးနေသော နိုင်ငံတကာ ငွေကြေးစနစ်တစ်ခုလုံး ပျက်စီးသွားလိမ့်မည်ဟု သတိပေးချက်ထုတ်ပြန်ခဲ့ကြောင်း၊ ဆွစ်ဇာလန်နိုင်ငံမှ ငွေကြေးအာဏာပိုင်အဖွဲ့တစ်ခုဖြစ်သည့် ဆွစ်ဇာလန်ငွေကြေးစေျးကွက် ကြီးကြပ်ရေးအာဏာပိုင်အဖွဲ့(FINMA) သည် Libra ငွေကြေးအပေါ် စောင့်ကြည့်ထိန်းချုပ်မှုများပြုလုပ်သွားရန် စီစဉ်နေကြောင်းသိရှိရပါသည်။ Libra ငွေကြေးအပေါ် ဝေဖန်မှုများနှင့်ပတ်သက်၍ Facebook တည်ထောင်သူ မာ့ခ်ဇူကာဘတ်တုံ့ပြန်ပြောကြားရာ၌ Facebook သည် လွန်ခဲ့သည့်နှစ်အနည်းခန့်မှစ၍ ကိုယ်ပိုင်အမှတ်အသားသင်္ကေတရှိသည့် ကုန်ပစ္စည်းတစ်ခုကို ထုတ်လုပ်ရန် စိတ်ကူးခဲ့ကြောင်း၊ Libra ငွေကြေးသည် Facebook ကထုတ်လုပ်သည့်အရာဝတ္ထုတစ်ခုဖြစ်ပြီး အသေးစိတ်အချက်အလက်များကို လူသိရှင်ကြားထုတ်ပြန် ကြေညာခဲ့ပြီးဖြစ်ကြောင်း၊ အလားတူ Libra နှင့်ပတ်သက်၍ ဆွေးနွေးမှု၊ မေးမြန်းမှုများ ပြုလုပ်ရန်အတွက် အမြဲဖိတ်ခေါ်ထားပါကြောင်း၊  Facebook သည် Libraငေွကြေးကိုဖန်တီးရာ၌ လုံခြုံမှု၊ တည်ငြိမ်မှုနှင့်ဥပဒေစည်းမျဉ်းစည်းကမ်းများနှင့် ညီညွတ်မှုရှိအောင် လုပ်ဆောင်သွားမည်ဖြစ်ပြီး လုပ်ငန်းအောင်မြင်စေရေးအတွက် ညိှနှိုင်းမှုများ ဆက်လက်ပြုလုပ်သွားမည်ဟု ပြောကြားခဲ့ကြောင်း သိရှိရပါသည်။

          Facebookသည် Libra ဒီဂျစ်တယ်ငွေကြေးကို  ၂၀၂၀ ပြည့်နှစ် ပထမ (၆) လတာကာလအတွင်း၌ စတင်ထုတ်လုပ်မည်ဖြစ်ပြီး Libra ငွေကြေးနှင့်ဆက်စပ်သည့် ငွေကြေးလဲလှယ်မှုစနစ်ကို တည်ထောင်ရာတွင် လူသုံးများသည့် Bitcoinအပါအဝင် အခြားဒီဂျစ်တယ်ငွေကြေးများကို ထည့်သွင်းချိတ်ဆက်မည်မဟုတ်ဟု ကြေညာထားကြောင်း www.bangkokpost.com အင်တာနက် website တွင်ဖော်ပြပါရှိပါသည်။

မိုးခေါင်ရေရှားပြဿနာကို ဖြေရှင်းနိုင်ရန်အတွက် ထိုင်းနိုင်ငံ၏အထက်ပိုင်းတွင်ရှိသော တရုတ်၊ မြန်မာနှင့်လာအိုနိုင်ငံများရှိ ဆည်များကို ဖွင့်ချပေးရန် ထိုင်းဝန်ကြီးချုပ်က အကူအညီတောင်းခံခဲ့

မိုးခေါင်ရေရှားပြဿနာကိုဖြေရှင်းနိုင်ရန်အတွက် ထိုင်းနိုင်ငံ၏အထက်ပိုင်းတွင်ရှိသော တရုတ်၊မြန်မာနှင့်လာအိုနိုင်ငံများရှိဆည်များကိုဖွင့်ချပေးရန် ထိုင်းဝန်ကြီးချုပ်ကအကူအညီတောင်းခံခဲ့

ထိုင်းနိုင်ငံသည်ယခုအခါ နှစ်ပေါင်း (၅၀) ကာလအတွင်း အဆိုးရွားဆုံး မိုးခေါင်ရေရှားပြဿနာကို ကြုံတွေ့လျက်ရှိကြောင်း၊ ထိုင်းနိုင်ငံမြောက်ပိုင်း၊ အရှေ့မြောက်ပိုင်းနှင့် အလယ်ပိုင်းဒေသများရှိပြည်နယ် (၂၀) ခုတွင် ရေပြတ်လတ်ပြီး မိုးရွာသွန်းနိုင်သည့် အနေအထားလည်းမရှိသေးကြောင်း၊ မိုးရွာသွန်းမှုမရှိသေးသည့်အတွက် နိုင်ငံအတွင်းရှိဆည်များအနက် အဓိကဆည်ကြီး (၁၇) ခုမှာ ရေများခန်းခြောက်လုနီးပါးဖြစ်နေကြောင်း၊ ထို့ကြောင့် ထိုင်းအစိုးရသည် အိမ်နီးချင်းနိုင်ငံများဖြစ်သောမြန်မာ၊ တရုတ်နှင့် လာအိုနိုင်ငံများအား ၎င်းတို့နိုင်ငံအတွင်းမှ ထိုင်းနိုင်ငံဘက်သို့ စီးဆင်းနေသော မြစ်ချောင်းများ၏အထက်ပိုင်း၌ တာတမံများ၊ ဆည်များပြုလုပ်၍ သိုလှောင်ထားသောရေများကိုဖွင့်ချပေးပါရန် မေတ္တာရပ်ခံခဲ့ကြောင်းသိရှိရပါသည်။

          ထိုင်းဝန်ကြီးချုပ်ပရာယုချန်အိုချာက၂၀၁၉ခုနှစ်၊ဇူလိုင်လ (၂၅) ရက် (ကြာသပတေးနေ့) တွင် ပြောကြားရာ၌ ထိုင်းနိုင်ငံစိုက်ပျိုးမြေဧရိယာစုစုပေါင်းပမာဏ၏ ၄၀% မှာရေသွင်းစိုက်ပျိုးသည့် မြေနေရာများဖြစ်ကြောင်း၊ ယခုအခါ စိုက်ပျိုးရေးပြတ်လပ်မှုများ ကြုံတွေ့နေရသည့်အတွက် လယ်သမားများမှာအခက်အခဲများကြုံတွေ့နေရကြောင်း၊ စိုက်ပျိုးရေပြတ်လတ်မှုနှင့်မိုးခေါင်မှုတို့ကြောင့် မြောက်ပိုင်း၊ အနောက်မြောက်ပိုင်းနှင့် အလယ်ပိုင်းဒေသရှိပြည်နယ် (၂၀) အတွင်းရှိ စပါးစိုက်မြေဧက ၃.၉၅ သန်းခန့်တွင် စပါးစိုက်ပျိုး၍ မရနိုင်သေးကြောင်း၊ ထိုင်းအစိုးရသည် တရုတ်၊ မြန်မာနှင့် လာအိုအစိုးရများထံသို့ အကူအညီတောင်းခံထားကြောင်း၊ အဆိုပါ အိမ်နီးချင်းနိုင်ငံများအနေဖြင့် ၎င်းတို့နိုင်ငံအတွင်းမှတစ်ဆင့် ထိုင်းနိုင်ငံသို့ စီးဆင်းသည့်မြစ်ကြောင်းများတစ်လျှောက်တွင် တာတမံများ၊ ဆည်မြောင်းများပြုလုပ်၍ သိုလှောင်ထားသည့်ရေများအား မြစ်အတွင်းသို့ ပြန်လည်ပေးပို့ခြင်းဖြင့် ထိုင်းနိုင်ငံ၏အခက်အခဲကိုကူညီဖြေရှင်းပေးပါရန် ထိုင်းအစိုးရကမေတ္တာရပ်ခံပါကြောင်း၊ ထိုင်းနိုင်ငံခြားရေးဝန်ကြီးဌာနနှင့် အမျိုးသားရေအရင်းအမြစ်ရုံးတို့သည် ရေရရှိရေးကိစ္စနှင့်ပတ်သက်၍ အိမ်နီးချင်းနိုင်ငံများနှင့် ညှိနှိုင်းလျက်ရှိသည်ဟု ပြောကြားခဲ့ကြောင်းသိရှိရပါသည်။

          အတိုက်အခံနိုင်ငံရေးပါတီဖြစ်သော ပွေထိုင်းပါတီဦးဆောင်သည့် နိုင်ငံရေးပါတီများသည် မိုးခေါင်ရေရှားပြဿနာကြုံတွေ့နေသော ဒေသများသို့သွားရောက်၍ တောင်သူလယ်သမားများ၊ ဆည်မြောင်းဌာနတာဝန်ရှိသူများနှင့် တွေ့ဆုံလျက်ရှိကြောင်း၊ ပွေထိုင်းပါတီ၏ ကြေညာချက်၌ အစိုးရအနေဖြင့် မိုးခေါင်ရေရှားပြဿနာကို အရေးကြီးလုပ်ငန်းစဉ်တစ်ခုအဖြစ်သတ်မှတ်၍ ဦးစားပေးဖြေရှင်းရန် ပြဿနာကြုံတွေ့နေသည့်ဒေသခံများအား အကူအညီများ၊ နစ်နာကြေးများထုတ်ပေးရန်နှင့် ကာလရှည်ရေရရှိရေးဆိုင်ရာစီမံချက်ကို ရေးဆွဲရန် တောင်းဆိုထားကြောင်းwww.bangkokpost.comအင်တာနက် website တွင်ဖော်ပြပါရှိပါသည်။

ဥရောပသမဂ္ဂဗဟိုဘဏ်အစည်းအဝေးဂယက်ကြောင့် ယူရိုငွေတန်ဖိုးမှာ နှစ်လအတွင်း အနိမ့်ဆုံးကျဆင်းသွားပြီးဗြိတိန်ဝန်ကြီးချုပ်အဖြစ် ဘောရစ်ဂျွန်ဆင်တာဝန်ယူမည့်ဂယက်ကြောင့် စတာလင်ပေါင်တန်ဖိုးမှာ နှစ်နှစ်တာအတွင်းအနိမ့်ဆုံးကျဆင်းခဲ့မှု

ဥရောပသမဂ္ဂဗဟိုဘဏ်အစည်းအဝေးဂယက်ကြောင့်ယူရိုငွေတန်ဖိုးမှာနှစ်လအတွင်းအနိမ့်ဆုံးကျဆင်းသွားပြီးဗြိတိန်ဝန်ကြီးချုပ်အဖြစ် ဘောရစ်ဂျွန်ဆင်တာဝန်ယူမည့်ဂယက်ကြောင့်စတာလင်ပေါင်တန်ဖိုးမှာနှစ်နှစ်တာအတွင်းအနိမ့်ဆုံးကျဆင်းခဲ့မှု

ဥရောပသမဂ္ဂဗဟိုဘဏ် (ECB) ၏ငွေကြေးမူဝါဒအစည်းအဝေးကို ၂၀၁၉ခုနှစ်၊ ဇူလိုင်လ (၂၅) ရက်နေ့တွင် ကျင်းပရန်စီစဉ်ထားရာအဆိုပါအစည်းအဝေးတွင် ကမ္ဘာ့စီးပွားရေးနှေးကွေးနေမှုနှင့် ဥရောပနိုင်ငံများ၏ စီးပွားရေးကျဆင်းနေမှုများကိုဖြေရှင်းနိုင်ရန်အတွက် ဘဏ်တိုးနှုန်းကို ၀.၁၀% လျှော့ချလိမ့်မည်ဟု သတင်းများထွက်ပေါ်လျက်ရှိသောကြောင့် ၂၀၁၉ခုနှစ်၊ ဇူလိုင်လ(၂၄) ရက် (ဗုဒ္ဓဟူးနေ့) တွင် ကမ္ဘာ့ငွေကြေးစေျးကွက်အတွင်း၌ယူရိုတန်ဖိုးမှာ ၀.၀၅% ကျဆင်းခဲ့ပြီး တစ်ယူရိုလျှင် အမေရိကန်ဒေါ်လာ(၁.၁၁၄၃) ဒေါ်လာလဲလှယ်မှုနှုန်းသို့ရောက်ရှိခဲ့ရာမေလ (၃၁) ရက်နေ့နောက်ပိုင်းနှစ်လတာကာလအတွင်းယူရိုငွေတန်ဖိုးအနိမ့်ဆုံးအနေအထားပင်ဖြစ်ကြောင်းသိရှိရပါသည်။

         ယူရိုငွေတန်ဖိုးကျဆင်းနေချိန်တွင် ဗြိတိန်နိုင်ငံ၌လည်းနိုင်ငံခြားရေးဝန်ကြီးဟောင်း ဘောရစ်ဂျွန်ဆင်ကဝန်ကြီးချုပ်အဖြစ် စတင်တာဝန်ထမ်းဆောင်တော့မည့်ဂယက်ကြောင့် ဗြိတိန်စတာလင်ပေါင်တန်ဖိုးမှာနှစ်နှစ်အတွင်းအနိမ့်ဆုံးသို့ ကျဆင်းသွားခဲ့ကြောင်း၊ ဘောရစ်ဂျွန်ဆင်သည်  ဥရောပသမဂ္ဂမှ ဗြိတိန်နိုင်ငံခွဲထွက်ရေးနှင့်ပတ်သက်၍ ဖြစ်ပေါ်နေသောပြဿနာများကို ဖြေရှင်းနိုင်စွမ်းမရှိသောကြောင့်ဗြိတိန်နိုင်ငံအနေဖြင့် အကျပ်အတည်းများစွာကြုံတွေ့ရဖွယ်ရှိသည်ဟူသော ခန့်မှန်းချက်များ ထွက်ပေါ်နေသည့်အတွက် စတာလင်ပေါင်တန်ဖိုးမှာ ဆက်တိုက်ကျဆင်းခဲ့ကြောင်း၊ စတာလင်ပေါင်တန်ဖိုးသည် ၂၀၁၉ခုနှစ်၊ ဇူလိုင်လ(၂၄)ရက် (ဗုဒ္ဓဟူးနေ့) တွင် မူနှစ်နှစ်တာကာလအတွင်း အနိမ့်ဆုံးဖြစ်သည့် စတာလင်ပေါင်တစ်ပေါင်လျှင် အမေရိကန်ဒေါ်လာ (၁.၂၃၈၂) ဒေါ်လာလဲလှယ်မှုနှုန်းထိကျဆင်း သွားခဲ့ကြောင်းwww.cnbc.com အင်တာနက် website တွင်ဖော်ပြပါရှိပါသည်။

မှတ်ချက်။ ဥရောပသမဂ္ဂဗဟိုဘဏ်၏လက်ရှိဘဏ်တိုးနှုန်းမှာ (၀.၀၀%)ဖြစ်ပြီးလာမည့်အစည်းအဝေးတွင်ဘဏ်တိုးနှုန်းများကို (၀.၁၀%)လျော့ချမည်ဆိုပါကဖြစ်ပေါ်လာမည့်ဘဏ်တိုးနှုန်းမှာအနှုတ်(၀.၁၀%)ဖြစ်ပါသည်။

ပါရှန်ပင်လယ်ကွေ့၌ ဥရောပနိုင်ငံစုံပါဝင်သော ညွန့်ပေါင်းရေတပ်ဖွဲ့ထားရှိကာ ရေနံတင်သင်္ဘောများအားအကာအကွယ်ပေးရန်အတွက် ဗြိတိန်နိုင်ငံကစီစဉ်နေမှု

ပါရှန်ပင်လယ်ကွေ့၌ ဥရောပနိုင်ငံစုံပါဝင်သော ညွန့်ပေါင်းရေတပ်ဖွဲ့ထားရှိကာ ရေနံတင်သင်္ဘောများအားအကာအကွယ်ပေးရန်အတွက် ဗြိတိန်နိုင်ငံကစီစဉ်နေမှု

ပါရှန်ပင်လယ်ကွေ့အတွင်းရှိဟော်မို့စ်ရေလက်ကြား၌ ဗြိတိန်ရေနံတင်သင်္ဘောတစ်စီးအား အီရန်ရေတပ်ကဖမ်းဆီးခဲ့ပြီးနောက်တွင် ဗြိတိန်နိုင်ငံသည် ပါရှန်ပင်လယ်ကွေ့၌ ဥရောပနိုင်ငံများမှ ရေတပ်သင်္ဘောများပါဝင်သည့် ညွန့်ပေါင်းရေတပ်ဖွဲ့တစ်ခုထားရှိကာ ရေနံတင်သင်္ဘောများကိုအကာအကွယ်ပေးရန်စီစဉ်နေကြောင်း၊ ဥရောပသမဂ္ဂကလည်း ဗြိတိန်ရေနံတင်သင်္ဘောဖမ်းဆီးခံရသည့် ကိစ္စနှင့်ပတ်သက်၍ အလွန်အမင်းစိုးရိမ်ပူပန်မိသည်ဟု ထုတ်ပြန်ကြေညာခဲ့ကြောင်း၊ အလားတူအမေရိကန်ပြည်ထောင်စုသည် ပါရှန်ပင်လယ်ကွေ့အတွင်း၌ လုံခြုံရေးအစီအမံများတိုးမြှင့်ပြုလုပ်သွားရန် စီစဉ်နေကြောင်းသိရှိရပါသည်။

          ဗြိတိန်နိုင်ငံခြားရေးဝန်ကြီးဂျရမီဟန့်သည် ၂၀၁၉ခုနှစ် ၊ ဇူလိုင်လ (၂၂) ရက် (တနင်္လာနေ့) တွင် ကျင်းပခဲ့သည့်  ဗြိတိန်အစိုးရအဖွဲ့အရေးပေါ်အစည်းအဝေးအပြီး၌ ပါရှန်ပင်လယ်ကွေ့အတွင်းအီရန် တပ်ဖွဲ့များ၏လုပ်ရပ်အပေါ် ပြင်းထန်စွာပြစ်တင်ရှုံ့ချခဲ့ပြီး ဥရောပနိုင်ငံပေါင်းစုံရေတပ်ဖွဲ့ထားရှိမည့် ကိစ္စကို အမြန်ဆုံးလုပ်ဆောင်သွားမည်ဟု ကြေညာခဲ့ကြောင်း၊ လက်ရှိအချိန်၌ ပါရှန်ပင်လယ်ကွေ့တွင် ဗြိတိန်ရေတပ်စစ်သင်္ဘောတစ်စီး နေရာယူထားပြီးဖြစ်ကြောင်း၊ ဗြိတိန်နိုင်ငံသည် ယခုအခါ ပါရှန် ပင်လယ်ကွေ့အတွင်းသို့ ဒုတိယမြောက်စစ်သင်္ဘောတစ်စီးကိုစေလွှတ်ခဲ့ရာယင်းစစ်သင်္ဘောသည် ဇူလိုင်လ (၂၉) ရက်တွင် ပါရှန်ပင်လယ်ကွေ့အတွင်းသို့ ရောက်ရှိမည်ဖြစ်ကြောင်းသိရှိရပါသည်။

          ဗြိတိန်နိုင်ငံခြားရေးဝန်ကြီးသည် ဥရောပညွန့်ပေါင်းရေတပ်ဖွဲ့စည်းရေးနှင့်ပတ်သက်၍ ပြင်သစ်နှင့် ဂျာမနီနိုင်ငံတို့မှနိုင်ငံခြားရေးဝန်ကြီးများနှင့် တွေ့ဆုံဆွေးနွေးခဲ့ပြီးဖြစ်ကြောင်း၊ ဗြိတိန်နိုင်ငံတွင် လက်ရှိဝန်ကြီးချုပ်ထရီဇာမေမှာဇူလိုင်လ (၂၄) ရက်တွင် ရာထူးမှနုတ်ထွက်မည်ဖြစ်ပြီး နိုင်ငံခြားရေးဝန်ကြီးဟောင်းဘောရစ်ဂျွန်ဆင်က ဝန်ကြီးချုပ်အဖြစ်တာဝန်ရယူမည့် အလွှဲအပြောင်းကာလဖြစ်သောကြောင့် အီရန်နိုင်ငံအပေါ်အရေးယူမည့်ကိစ္စကို ယခုရက်ပိုင်းအတွင်းမဆုံးဖြတ်နိုင်သေးကြောင်း သိရှိရပါသည်။

          လက်ရှိအချိန်၌ ရေနံတင်သင်္ဘောကုမ္ပဏီများသည် ဟော်မို့စ်ရေလက်ကြားကို ဖြတ်သန်းမည့် ရေနံတင်သင်္ဘောများ၌ ပုဂ္ဂလိကလုံခြုံရေးအစောင့်များထည့်သွင်းသွားရန် စီစဉ်လျက်ရှိပြီး နိုင်ငံတကာကုန်သွယ်ရေကြောင်းအဖွဲ့အစည်းများကလည်း ရေနံတင် သင်္ဘောများအနေဖြင့် ပါရှန်ပင်လယ်ကွေ့ အတွင်းသို့မဝင်မီပင်လယ်ကွေ့အတွင်းရှိ ဗြိတိန်ရေတပ်စစ်သင်္ဘောထံသို့ သတင်းပို့ရန်နှင့် ဗြိတိန် ရေတပ်ကစီစဉ်ပေးထားသောခရီး တစ်ထောက်ရပ်နားရမည့်အစီအစဉ်အတိုင်းပင်လယ်ကွေ့အဝင်ဝ၌ (၂၄) နာရီမှ (၄၈) နာရီအထိခေတ္တရပ်နားပြီးပင်လယ်ကွေ့အတွင်းဘေးအန္တရယ်ကင်းရှင်းကြောင်းအကြောင်းကြားချက်ရရှိမှသာ ပါရှန်ပင်လယ်ကွေ့ကို ဖြတ်သန်းရန်ညွှန်ကြားထားကြောင်း www.channelnewsasia.com အင်တာနက် website တွင် ဖော်ပြပါရှိပါသည်။

၂၀၁၉ခုနှစ်၊ပထမ (၆) လတာကာလအတွင်းမြန်မာ-တရုတ်ရေနံနှင့်သဘာဝဓာတ်ငွေ့ပိုက်လိုင်းမှတစ်ဆင့်တရုတ်နိုင်ငံအတွင်းသို့ ရေနံစိမ်းတန်ချိန်(၅) သန်းနှင့်သဘာဝဓာတ်ငွေ့တန်ချိန်(၁.၆၈) သန်းတင်သွင်းနိုင်ခဲ့သည်ဟုတရုတ်အာဏာပိုင်များကကြေညာခဲ့မှု

၂၀၁၉ခုနှစ်၊ပထမ (၆) လတာကာလအတွင်းမြန်မာ – တရုတ်ရေနံနှင့်သဘာဝဓာတ်ငွေ့ပိုက်လိုင်းမှတစ်ဆင့် တရုတ်နိုင်ငံအတွင်းသို့ရေနံစိမ်းတန်ချိန် (၅) သန်းနှင့်သဘာဝဓာတ်ငွေ့တန်ချိန် (၁.၆၈) သန်းတင်သွင်းနိုင်ခဲ့သည်ဟု တရုတ်အာဏာပိုင်များကကြေညာခဲ့မှု

ယူနန်ပြည်နယ်၊ ကူမင်းအကောက်ခွန်ဌာနက၂၀၁၉ခုနှစ်၊ဇူလိုင်လ (၂၁) ရက် (တနင်္ဂနွေနေ့) တွင်ထုတ်ပြန်သည့်စာရင်းအချက်အလက်များ၌ ၂၀၁၉ခုနှစ်၊ပထမ (၆) လတာကာလအတွင်း မြန်မာ-တရုတ်ရေနံနှင့်သဘာဝဓာတ်ငွေ့ပိုက်လိုင်းမှတစ်ဆင့် တရုတ်နိုင်ငံအတွင်းသို့ရေနံစိမ်းတန်ချိန်(၅) သန်းခန့်တင်သွင်းနိုင်ခဲ့ရာ ယမန်နှစ်အလားတူကာလနှင့် နှိုင်းယှဉ်ပါက၂.၇% မြင့်တက်လာခဲ့ကြောင်း၊ ရေနံများ၏တန်ဖိုးပမာဏမှာတရုတ်ယွမ်ငွေ ၁၇.၂၇ ဘီလီယံ (အမေရိကန်ဒေါ်လာ၂.၅၁ဘီလီယံ)ခန့်ဖြစ်သောကြောင့်ယမန်နှစ်အလားတူကာလနှင့်နှိုင်းယှဉ်ပါက၉.၂% ခန့်မြင့်တက်လာခဲ့ကြောင်း၊ရေနံစိမ်းတစ်တန်လျှင်ပျမ်းမျှအားဖြင့် (၃၄၄၃.၈) ယွမ်ခန့်စေျးနှုန်းကျသင့်သည့်အတွက် ယမန်နှစ်အလားတူကာလအတွင်း ကျသင့်ခဲ့သည့်စေျးနှုန်းနှင့်နှိုင်းယှဉ်ပါက ၆.၄% ခန့်မြင့်တက်လာသည်ဟု ဖော်ပြထားကြောင်းသိရှိရပါသည်။

ကူမင်းအကောက်ခွန်ဌာန၏စာရင်းအချက်အလက်များတွင် ဆက်လက်ဖော်ပြထားရာ၌ ၂၀၁၉ခုနှစ်၊ပထမ (၆) လတာကာလအတွင်း မြန်မာ – တရုတ်ရေနံနှင့်သဘာဝဓာတ်ငွေ့ပိုက်လိုင်းမှတစ်ဆင့်တရုတ်နိုင်ငံအတွင်းသို့ တင်သွင်းခဲ့သည့် သဘာဝဓာတ်ငွေ့ပမာဏမှာတန်ချိန်၁.၆၈ သန်းခန့်ရှိသည့်အတွက် ယမန်နှစ်အလားတူကာလနှင့်နှိုင်းယှဉ်ပါက၂.၃ % ကျဆင်းသွားခဲ့ကြောင်း၊အဆိုပါသဘာဝဓာတ်ငွေ့များ၏တန်ဖိုးပမာဏမှာ ယွမ်ငွေ၅.၈၉ ဘီလီယံ (အမေရိကန်ဒေါ်လာ၈၀၀သန်းကျော်) ဖြစ်သည့်အတွက် ယမန်နှစ်အလားတူကာလနှင့်နှိုင်းယှဉ်ပါက တန်ဖိုးပမာဏမှာ ၁၁.၇% မြင့်တက်လာခဲ့ကြောင်း၊ သဘာဝဓာတ်ငွေ့တစ်တန်ချင်းစီ၏ပျမ်းမျှစေျးနှုန်းမှာ (၃၄၉၉.၂) ယွမ်ဖြစ်သည့်အတွက်ယမန်နှစ်စေျးနှုန်းနှင့်နှိုင်းယှဉ်ပါက ၁၄.၄% မြင့်တက်လာခဲ့သည်ဟု ဖော်ပြထားကြောင်း သိရှိရပါသည်။

          မြန်မာ-တရုတ်ရေနံနှင့်သဘာဝဓာတ်ငွေ့ပိုက်လိုင်းမှာ (၁၄၂၀) ကီလိုမီတာခန့်ရှည်လျားပြီးအဆိုပါပိုက်လိုင်းမှတစ်ဆင့် တရုတ်နိုင်ငံသို့သဘာဝဓာတ်ငွေ့ပေးပို့မှုများကို၂၀၁၃ခုနှစ်၊ဇူလိုင်လတွင်စတင်ပြုလုပ်ခဲ့ပြီး ရေနံပေးပို့မှုများကို၂၀၁၇ခုနှစ်၌ စတင်ပြုလုပ်ခဲ့ကြောင်း၊ပိုက်လိုင်းစတင်ဖွင့်လှစ်သည့်အချိန်မှစ၍ လက်ရှိအချိန်ထိကာလအတွင်း တရုတ်နိုင်ငံအတွင်းသို့ရေနံစိမ်းတန်ချိန် (၁၉) သန်းနှင့်သဘာဝဓာတ်ငွေ့တန်ချိန် (၁၃.၄၄) သန်းပေးပို့ခဲ့ကြောင်းwww.xinhuanet.com အင်တာနက် website တွင်ဖော်ပြပါရှိပါသည်။

(မှတ်ချက်။လက်ရှိအချိန်၌တရုတ်နိုင်ငံ၏ရေနံသုံးစွဲမှုမှာတစ်နှစ်လျှင်ပျမ်းမျှအားဖြင့်တန်ချိန်(၆၄၁.၂) သန်းခန့်ရှိပြီးသဘာဝဓာတ်ငွေ့သုံးစွဲမှုမှာတစ်နှစ်လျှင်တန်ချိန်(၁၉၀)သန်းခန့်ရှိကြောင်း၊တရုတ်နိုင်ငံ၏ပြည်ပမှရေနံတင်သွင်းမှုမှာတစ်နှစ်လျှင်တန်ချိန်(၄၆၀)သန်းခန့်ရှိပြီးသဘာဝဓာတ်ငွေ့တင်သွင်းမှုမှာတစ်နှစ်လျှင်တန်ချိန် (၉၀.၃၉)သန်းခန့်ရှိကြောင်း)