ထိုင်းနိုင်ငံရှိ နိုင်ငံရေးပါတီငယ်(၁၀)ခုသည် တပ်မတော်လိုလားသော PPRP ပါတီနှင့် ပူးပေါင်းရန် စီစဉ်နေမှု

ထိုင်းနိုင်ငံ၌ ကျင်းပခဲ့သည့် ပါတီစုံအထွေထွေရွေးကောက်ပွဲတွင် လွှတ်တော်အမတ် (၁) နေရာသာအနိုင်ရရှိခဲ့သည့် နိုင်ငံရေးပါတီငယ် (၁၁) ခုရှိရာ ၎င်းပါတီများအနက် (၁၀) ခုသည် တပ်မတော်အစိုးရလိုလားသော ပါလန်ပရာချာရတ်ပါတီ (PPRP) နှင့် ပူးပေါင်း၍ လက်ရှိဝန်ကြီးချုပ်ပရာယုချန်အိုချာကို ဝန်ကြီးချုပ်အဖြစ် ပြန်လည်ရွေးချယ်ရန်စီစဉ်နေကြောင်း၊ ကျန်ပါတီငယ် (၁) ခုမှာမူ မည်သည့်ဘက်နှင့်ပူးပေါင်းရမည်ကို ရွေးချယ်ရခြင်းမရှိသေးဘဲ အစိုးရဖွဲ့နိုင်သည့် ဘက်နှင့်ပူးပေါင်းမည်ဟု ကြေညာထားကြောင်း သိရှိရပါသည်။

တပ်မတော်အစိုးရလိုလားသော PPRP ပါတီ၏ ဆွေးနွေးညှိနှိုင်းရေးတာဝန်ခံ ဆွန်ဆက်ခ် သက်ပ်ဆူသင်မ်က PPRP သည် အောက်လွှတ်တော်အမတ် ထက်ဝက်ကျော်ခန့်ပါဝင်သော ပါတီစုံအစိုးရအဖွဲ့ ဖွဲ့စည်းနိုင်လိမ့်မည်ဖြစ်ပြီး ပါတီငယ်များအတွက်လည်း အစိုးရအဖွဲ့အတွင်း၌ နေရာများ သတ်မှတ်ပေးသွားမည်ဟု ပြောကြားခဲ့ကြောင်း သိရှိရပါသည်။

သက်ဆင်လိုလားသော ပွေထိုင်းပါတီ၏အတွင်းရေးမှူးချုပ် ဖန်သန်ဝီချာရာချိုင်းကမူ PPRP၏ပြောကြားချက်ကိုပယ်ချခဲ့ပြီး လက်ရှိအချိန်အထိ နိုင်ငံရေးအခြေအနေမှာ ကြိုတင်ခန့်မှန်း၍မရသေးကြောင်း၊ အောက်လွှတ်တော်တွင် အမတ်နေရာအချိုးအစားတစ်ခုအထိ ပိုင်ဆိုင်ထားသော ဒီမိုကရက် ပါတီနှင့် ဘန်ဂျန်ထိုင်းပါတီတို့သည် ၎င်းတို့၏ဆုံးဖြတ်ချက်ကို ထုတ်ပြန်ကြေညာခြင်း မရှိသေးကြောင်း၊ လက်ရှိရွေးကောက်ပွဲတွင် ရွေးကောက်ပွဲကော်မရှင်၏ စီမံခန့်ခွဲမှုအမှားအယွင်းများကြောင့် ပါတီငယ်အများစုမှာမထင်မှတ်ဘဲအမတ်နေရာအချို့ကို လွယ်ကူစွာရရှိသွားကြသည်ဟု ပြောကြားခဲ့ကြောင်း www.bangkokpost.com အင်တာနက် website တွင် ဖော်ပြပါရှိပါသည်။

ဩစတြေးလျဒေါ်လာ (၅၀) တန်ငွေစက္ကူတွင် စာလုံးပေါင်းအမှားပါဝင်နေသည်ဟု  ဩစတြေးလျ ဗဟိုဘဏ်က ပြောကြားခဲ့မှု

ဩစတြေးလျဗဟိုဘဏ်က နောက်ဆုံးထုတ်ဝေခဲ့သည့် ဩစတြေးလျဒေါ်လာ (၅၀) တန်ငွေစက္ကူအသစ်များတွင် စာလုံးပေါင်းအမှားတစ်ခုပါဝင်နေသည်ဟု ဩစတြေးလျဗဟိုဘဏ်က ၂၀၁၉ ခုနှစ်၊ မေလ (၉) ရက်တွင် အတည်ပြုပြောကြားခဲ့ကြောင်း၊ အဆိုပါငွေစက္ကူအသစ်ကို၂၀၁၈ခုနှစ်၊ အောက်တိုဘာလ (၁၈) ရက်တွင် လုံခြုံရေးအစီအမံအသစ်များဖြင့် စတင်ထုတ်ဝေခဲ့ပြီး ဩစတြေးလျနိုင်ငံနှင့် ကမ္ဘာ တစ်ဝန်းရှိနိုင်ငံများတွင် ကျယ်ပြန့်စွာအသုံးပြုနေသည့် ငွေစက္ကူဖြစ်ကာ စုစုပေါင်းငွေစက္ကူရွက်ရေ (၄၆) သန်းခန့် (အမေရိကန်ဒေါ်လာ ၂.၃ ဘီလီယံတန်ဖိုးခန့်) ကို ကမ္ဘာတစ်ဝန်းသို့ ဖြန့်ဝေပြီးဖြစ်ကြောင်း သိရှိရပါသည်။

စာလုံးပေါင်းအမှားတွေ့ရှိသည့် ဩစတြေးလျဒေါ်လာ (၅၀) တန် ငွေစက္ကူတွင် ဩစတြေးလျ ပါလီမန်၌ ၁၉၂၁ ခုနှစ် မှ ၁၉၂၄ ခုနှစ်အထိကာလအတွင်း ပထမဆုံးသော အမျိုးသမီးလွှတ်တော်အမတ်အဖြစ် တာဝန်ထမ်းဆောင်ခဲ့သူ အဲဒစ်ကိုဝင်၏မျက်နှာပုံနှင့် ယင်းမျက်နှာပုံ၏ ဦးခေါင်းနောက်ပိုင်းတွင် ဩစတြေးလျပါလီမန်၌ သူမပြောကြားခဲ့သည့်မိန့်ခွန်းကို အလွန်သေးငယ်သော စာလုံးများဖြင့် ရိုက်နှိပ်ဖော်ပြထားကြောင်း၊ ယင်းစာလုံးများအနက် “Responsibility” ဟူသော ဝေါဟာရတွင် “ i ” စာလုံးကျန်ရစ်ကာ “Responsibilty” ဟူ၍ နေရာသုံးခု၌ မှားယွင်းရိုက်နှိပ်မိခြင်း ဖြစ်ကြောင်း၊ ထိုသို့ မှားယွင်းမှုကို လူမှုမီဒီယာတစ်ခုဖြစ်သော Instagram၌ လူတစ်ဦးကပုံကြီးချဲ့ ရိုက်ကူးထားသော ဓာတ်ပုံနှင့်တကွ စတင်ဖော်ပြခဲ့ရာမှ  ဩစတြေးလျနိုင်ငံရှိ သတင်းဌာနများသို့ပျံ့နှံ့သွားခဲ့ခြင်းဖြစ်ကြောင်း သိရှိရပါသည်။

ဩစတြေးလျဗဟိုဘဏ်၏ ပြောရေးဆိုခွင့်ရှိသူက ငွေစက္ကူတွင် စာလုံးပေါင်းအမှားဖြစ်ပေါ်နေသည်ကို သိရှိရသည့်အတွက် ထပ်မံထုတ်လုပ်မည့် ဩစတြေးလျဒေါ်လာ (၅၀) တန်ငွေစက္ကူများတွင် အမှားပြင်ဆင်မှုပြုလုပ်ကာ ထုတ်ဝေသွားမည်ဟုပြောကြားခဲ့ကြောင်း၊  သို့သော် စာပေါင်းအမှား ပြင်ဆင်ထားသည့် ဩစတြေးလျဒေါ်လာ (၅၀) တန်ငွေစက္ကူရွက်ရေ မည်မျှထုတ်ဝေမည်ဆိုခြင်းနှင့်  စာလုံးပေါင်းအမှားပါဝင်နေသည့် ငွေစက္ကူများအား ပြန်လည်ရုတ်သိမ်းရန် အစီအစဉ်ရှိ/ မရှိတို့နှင့် ပတ်သက်၍ သတင်းထောက်များ၏မေးမြန်းချက်များကိုမူ ဖြေကြားခြင်းမရှိခဲ့ကြောင်း www.bangkokpost.com အင်တာနက် website တွင် ဖော်ပြပါရှိပါသည်။

ရန်ကုန်လေဆိပ်တွင်ဖြစ်ပွားခဲ့သောမတော်တဆမှုကိုBimanလေကြောင်းလိုင်းနှင့်ဘင်္ဂလားဒေ့ရှ် လေကြောင်းအာဏာပိုင်အဖွဲ့တို့ကစုံစမ်းစစ်ဆေးရန်ပြင်ဆင်နေမှု

ဘင်္ဂလားဒေ့ရှ်နိုင်ငံမှ Biman Bangladesh Airline သည် ရန်ကုန်အပြည်ပြည်ဆိုင်ရာလေဆိပ်တွင် ဖြစ်ပွားခဲ့သော ၎င်းတို့ခရီးသည်တင်လေယာဉ်မတော်တဆမှုကို စုံစမ်းစစ်ဆေးရန်အတွက် စုံစမ်းရေးကော်မတီဖွဲ့စည်းခဲ့ကြောင်း၊ အဆိုပါကော်မတီတွင် အဖွဲ့ဝင် (၆) ဦးပါဝင်မည်ဖြစ်ပြီး Biman၏ လေကြောင်းခရီးစဉ်လုံခြုံရေးဌာန အကြီးအကဲ ရှိုရက်ဘ်ချောင်ဒရီကဦးဆောင်မည်ဖြစ်ကြောင်း၊ ၎င်းသည် လေယာဉ်မတော်တဆမှု ဖြစ်ပွားပြီးလျှင်ပြီးချင်း အထူးလေယာဉ်ဖြင့် အခင်းဖြစ်ရပ်ကို သွားရောက်ကြည့်ရှုကာ ဘင်္ဂလားဒေ့ရှ်နိုင်ငံသို့ပြန်လာခဲ့ကြောင်း သိရှိရပါသည်။

အလားတူဘင်္ဂလားဒေ့ရှ် နိုင်ငံလေကြောင်းပို့ဆောင်ရေးအာဏာပိုင်အဖွဲ့ (CAAB) သည်လည်း လေယာဉ်မတော်တဆဖြစ်စဉ်နှင့်ပတ်သက်၍ CAAB ၏ကျွမ်းကျင်သူများပါဝင်သော စုံစမ်းစစ်ဆေးရေးအဖွဲ့ကို မြန်မာနိုင်ငံသို့စေလွှတ်မည်ဖြစ်ရာ ယင်းကိစ္စနှင့်ပတ်သက်၍ မြန်မာအာဏာပိုင်များထံသို့ ၂၀၁၉ ခုနှစ်၊ မေလ (၉) ရက် (ကြာသပတေးနေ့) တွင် အကြောင်းကြားစာပေးပို့ခဲ့ကြောင်း၊ CAAB ၏ လေယာဉ်မတော်တဆမှုများ စုံစမ်းစစ်ဆေးရေးဌာန (AAIG) ၏တာဝန်ခံ ကပ္ပတိန် ဆာလာဟူဒင်အမ်ရာ  မာတူလာက မေလ(၉) ရက် (ကြာသပတေးနေ့) နေ့လည်ပိုင်းတွင်ပြောကြားရာ၌ မြန်မာအာဏာပိုင်များဘက်မှ တစ်စုံတစ်ရာ အကြောင်းပြန်ကြားမှုမရှိသေးကြောင်း၊သို့သော် နိုင်ငံတကာလေကြောင်းပျံသန်းရေးအဖွဲ့ (ICAO) ၏ ပြဌာန်းချက်များအရ လေယာဉ်မတော်တဆမှုများကို စုံစမ်းစစ်ဆေးသည့်ဖြစ်စဉ်တွင် အခင်းဖြစ်ရပ်တည်ရှိသည့်နိုင်ငံမှ ကိုယ်စားလှယ်တစ်ဦး ပါဝင်စစ်ဆေးရမည်ဖြစ်ရာ မြန်မာနိုင်ငံအနေဖြင့်၎င်းတို့နိုင်ငံရှိ လေကြောင်းလိုင်းများမှကိုယ်စားလှယ်တစ်ဦးဉီးကို မိမိတို့နှင့် အတူပူးပေါင်းပါဝင်ဆောင်ရွက်ရန် တာဝန်ပေးအပ်ရမည်ဖြစ်ကြောင်း၊ မိမိသည် မေလ (၁၁) ရက် (စနေနေ့) တွင်မြန်မာနိုင်ငံသို့ ကြိုတင်သွားရောက်မည်ဖြစ်ပြီး မိမိနှင့်အတူ ကျွမ်းကျင်ပညာရှင်(၄) ဦး သို့မဟုတ် (၅) ဦးခန့်လိုက်ပါကြလိမ့်မည်ဟု ပြောကြားခဲ့ကြောင်း သိရှိရပါသည်။

Bimanလေယာဉ်မတော်တဆမှုကိုစစ်ဆေးမည့် ကပ္ပတိန် ဆာလာဟူဒင်သည် ၂၀၁၈ခုနှစ်၊ မတ်လတွင် နီပေါနိုင်ငံ၊ခတ္တမန်ဒူလေဆိပ် US-Bangla လေကြောင်းလိုင်းမှ ခရီးသည်တင်လေယာဉ် တစ်စီးပြေးလမ်းချော်ကာ မီးလောင်ကျွမ်းခဲ့သည့်ဖြစ်စဉ်ကို ဦးဆောင်စစ်ဆေးခဲ့သူဖြစ်ကြောင်း၊ US-Bangla လေကြောင်းလိုင်း လေယာဉ်မတော်တဆမှုဖြစ်စဉ်တွင် လေယာဉ်တွင်ပါရှိသူ (၇၁) ဦး အနက်(၅၁) ဦး အသက်ဆုံးရှုံးကာ(၂၀) ဦးဒဏ်ရာရရှိခဲ့ပြီးမတော်တဆမှုဖြစ်ပွားရခြင်း၏အဓိက အကြောင်းရင်းမှာလေယာဉ်မှူး၏အမှားအယွင်းကြောင့်ဖြစ်သည်ဟု သိရှိရကြောင်းwww.dhakatribune.com အင်တာနက် website တွင် ဖော်ပြပါရှိပါသည်။

အမေရိကန် – တရုတ်ကုန်သွယ်ရေးတင်းမာမှု နောက်ဆက်တွဲဂယက်ကြောင့် အိန္ဒိယရူပီးငွေ တန်ဖိုးထပ်မံကျဆင်းသွားခဲ့မှု

အမေရိကန် – တရုတ်ကုန်သွယ်ရေးတင်းမာမှု၏ နောက်ဆက်တွဲဂယက်ကြောင့် အာရှစတော့ရှယ်ယာတန်ဖိုးများနှင့်ငွေကြေးတန်ဖိုးများကျဆင်းနေသည့် နည်းတူအိန္ဒိယရူပီးငွေတန်ဖိုးမှာလည်း ဆက်တိုက်ကျဆင်းလျက်ရှိကြောင်း၊ အာရှစတော့ရှယ်ယာများတန်ဖိုးသည် လက်ရှိအချိန်၌ ရက်သတ္တပတ် (၆) ပတ်အတွင်း အနိမ့်ဆုံးသို့ကျဆင်းခဲ့ရာ စတော့ဈေးကွက်၏ မတည်ငြိမ်မှုများကြောင့် အိန္ဒိယနိုင်ငံအတွင်းမှ အမေရိကန်ဒေါ်လာနှင့်ဆက်စပ်နေသော အရင်းအနှီးများစွာ ပြည်ပသို့ ပြန်လည်စီးထွက်သွားသည့်အတွက် အိန္ဒိယနိုင်ငံအတွင်းအမေရိကန်ဒေါ်လာလိုအပ်ချက်နှင့်အတူ အိန္ဒိယရူပီးငွေတန်ဖိုးမှာ ဆက်တိုက်ကျဆင်းလျက်ရှိကြောင်း သိရှိရပါသည်။

၂၀၁၉ ခုနှစ်၊ မေလ (၉) ရက် (ကြာသပတေးနေ့) နံနက်ပိုင်းတွင် အိန္ဒိယရူပီးငွေတန်ဖိုးသည် ၀.၂၂%  ကျဆင်းခဲ့ပြီးအမေရိကန်တစ်ဒေါ်လာလျှင် (၆၉.၉၂) ရူပီးလဲလှယ်မှုနှုန်းသို့ ရောက်ရှိခဲ့ကြောင်း၊ ရူပီးငွေတန်ဖိုးသည် မကြာမီကာလအတွင်း၌ အမေရိကန်တစ်ဒေါ်လာလျှင် (၇၀.၂၀) ရူပီးလဲလှယ်မှုနှုန်းအထိ ကျဆင်းနိုင်သည်ဟု အိန္ဒိယနိုင်ငံရှိဘဏ်လုပ်ငန်းများက ခန့်မှန်းထားကြောင်း သိရှိရပါသည်။

၂၀၁၉ ခုနှစ်၊ မေလ(၉) ရက် (ကြာသပတေးနေ့) တွင် အိန္ဒိယရူပီးငွေနည်းတူ အခြားအာရှဒေသသုံးငွေကြေးများမှာလည်း အမေရိကန်ဒေါ်လာနှင့်နှိုင်းယှဉ်ရာ၌ တန်ဖိုးကျဆင်းခဲ့ရာ တောင်ကိုရီးယားဝမ်မှာ ၀.၅၇% ၊ တရုတ်ယွမ်မှာ ၀.၃၇% ၊ အင်ဒိုနီးရှားရူပီးယားမှာ ၀.၃၅% ၊ ဖိလစ်ပိုင်ပီဆိုမှာ ၀.၃၂% ၊ထိုင်းဘတ်မှာ ၀.၁၃% ၊ စင်ကာပူဒေါ်လာမှာ ၀.၀၈%၊ မလေးရှားရင်းဂစ်မှာ ၀.၀၈% အသီးသီးကျဆင်းခဲ့ကြောင်းwww.livemint.com အင်တာနက် website တွင်ဖော်ပြပါရှိပါသည်။

ထိုင်းနိုင်ငံ အထွေထွေရွေးကောက်ပွဲရလဒ်များ ထွက်ပေါ်ပြီးတွင် လက်ရှိဝန်ကြီးချုပ်ပရာယုချန်အိုချာကို လိုလားသူများနှင့် သက်ဆင်ကိုထောက်ခံသည့်နိုင်ငံရေးပါတီများအကြားအားပြိုင်မှုများဆက်လက်ဖြစ်ပေါ်လျက်ရှိမှု

ထိုင်းနိုင်ငံ ရွေးကောက်ပွဲကော်မရှင်သည် ၂၀၁၉ ခုနှစ်၊ မတ် (၂၄) ရက်နေ့တွင် ကျင်းပခဲ့သော ထိုင်းနိုင်ငံ အောက်လွှတ်တော်၏ ရွေးကောက်ပွဲရလဒ်အဖြေများကို မေလ (၇) ရက်နေ့နှင့် (၈) ရက်နေ့များတွင် အပြီးသတ် ထုတ်ပြန်ကြေညာပေးခဲ့ရာ အောက်လွှတ်တော်အမတ်နေရာ (၅၀၀) အနက် (၄၉၈) နေရာကိုသာ အတည်ပြုထုတ်ပြန်ပေးခဲ့ပြီး သက်ဆင်၏အမာခံနယ်မြေဖြစ်သော ချင်းမိုင်ရှိအမတ်နေရာ (၂) နေရာကို မူမဲမသမာမှုများနှင့်ပတ်သက်သည့် တိုင်တန်းမှုများကြောင့် ပြန်လည် စိစစ်နေသည်ဟူသော အကြောင်းပြချက်ဖြင့် ကြေညာခြင်းမရှိသေးကြောင်း၊ အဆိုပါမဲဆန္ဒနယ်တွင် မဲအများဆုံးရရှိထားသည်မှာ ပွေထိုင်းပါတီကိုယ်စားပြုအမတ်များ ဖြစ်ကြောင်းသိရှိရပါသည်။

          ရွေးကောက်ပွဲ ကော်မရှင်ကထုတ်ပြန်ခဲ့သည့် အောက်လွှတ်တော်အမတ်နေရာ (၄၉၈) နေရာတွင်  လက်ရှိဝန်ကြီးချုပ် ပရာယုချန်အိုချာကိုထောက်ခံသည့် ပါလန်ပရာချာရတ်ပါတီ (PalangPracharath Party – PPRP ) က အမတ်နေရာ (၁၁၅) နေရာအနိုင်ရရှိပြီးသက်ဆင်ကိုထောက်ခံသည့် ပွေထိုင်းပါတီ (Pheu Thai Party)နှင့် အခြားပါတီငါးခုတို့ ပေါင်းစည်းထားသော (၆) ပါတီညွန့်ပေါင်းအဖွဲ့ကအမတ်နေရာ (၂၅၅) နေရာအနိုင်ရရှိခဲ့ကြောင်း၊ ကျန်အောက်လွှတ်တော်အမတ် (၁၂၈) နေရာတွင် ဝန်ကြီးချုပ်ဟောင်းအဘီဆစ်၏ ဒီမိုကရက်ပါတီက (၅၂) နေရာ၊ ဘန်ဂျန်ထိုင်းပါတီက (၅၁) နေရာနှင့် အခြားပါတီငယ်များက (၂၅) နေရာအသီးသီးအနိုင်ရရှိခဲ့ကြောင်းသိရှိရပါသည်။

          လက်ရှိတပ်မတော်အစိုးရက ထောက်ခံထားသော PPRP ပါတီသည် ယခုမေလကုန်ပိုင်းတွင် ကျင်းပမည့် လွှတ်တော်အစည်းအဝေး၌ ဝန်ကြီးချုပ်ပရာယုချန်အိုချာကို ဝန်ကြီးချုပ်အဖြစ် တင်မြှောက်ထားရန် စီစဉ်ထားရာ အထက်လွှတ်တော်နှင့်အောက်လွှတ်တော်နှစ်ရပ်ပေါင်း အမတ်အရေအတွက် (၃၇၆) ဦး၏ထောက်ခံမဲကို ရရှိရန်လိုအပ်ကြောင်း၊ PPRP ပါတီသည် အထက်လွှတ်တော်အမတ် (၂၅၀) ၏ထောက်ခံမှုကို ရရှိပြီးဖြစ်သော်လည်း အောက်လွှတ်တော်တွင် PPRP ပါတီမှရရှိသောအမတ်အရေအတွက်မှာ (၁၁၅) နေရာသာရှိသောကြောင့် ပရာယုချန်အိုချာအား ဝန်ကြီးချုပ်အဖြစ် တင်မြှောက်နိုင်ရန်အတွက် အမတ်နေရာ(၁၁) နေရာခန့် လိုအပ်လျက်ရှိကြောင်း၊ ထို့ကြောင့် PPRP ပါတီသည် သက်ဆင်နှင့်မသက်ဆိုင်သော နိုင်ငံရေးပါတီကြီးနှစ်ခုဖြစ်သည့် ဘန်ဂျန်ထိုင်းပါတီနှင့်ဒီမိုကရက်ပါတီတို့အား ၎င်းတို့နှင့်ပူးပေါင်းရန်အတွက် စည်းရုံးလျက်ရှိကြောင်း သိရှိရပါသည်။

          အလားတူ သက်ဆင်ကိုထောက်ခံသော ပွေထိုင်းပါတီဦးဆောင်သည့် (၆) ပါတီညွန့်ပေါင်းအဖွဲ့သည် အောက်လွှတ်တော်အမတ်နေရာ (၂၅၅) နေရာရရှိထားပြီး သက်ဆင်ထောက်ခံသည့် အမျိုးသမီးနိုင်ငံရေးသမား ဆူဒါရတ်ကီယူရာဖန်ကို ဝန်ကြီးချုပ်အဖြစ်တင်မြှောက်နိုင်ရန်အတွက် သတ်မှတ်ထားသည့် အမတ်နေရာ (၃၇၆) နေရာကိုပြည့်မီရန် (၁၂၁) နေရာလိုအပ်လျက်ရှိကြောင်း၊ ထို့ကြောင့် လိုအပ်သည့် ထောက်ခံမဲအရေအတွက် ရရှိနိုင်ရန် ဘန်ဂျန်ထိုင်းပါတီနှင့် ဒီမိုကရက်ပါတီတို့အား စည်းရုံးလျက်ရှိကြောင်း သိရှိရပါသည်။

          ရွေးကောက်ပွဲ၌ အမတ်နေရာအများဆုံးရရှိထားသော နိုင်ငံရေးပါတီကြီးနှစ်ခုက အပြိုင်အဆိုင် စည်းရုံးမှုများကြောင့် ဒီမိုကရက်ပါတီနှင့် ဘန်ဂျန်ထိုင်းပါတီတို့အတွင်း၌လည်း သဘောထားကွဲလွဲမှုများ ဖြစ်ပေါ်နေပြီး မည်သည့်ပါတီနှင့်ပူးပေါင်းရမည် ဆိုခြင်းကိုဆုံးဖြတ်ချက်ချရန် ခဲယဉ်းနေသည်ဟု ဒီမိုကရက်ပါတီ၏ တာဝန်ရှိသူတစ်ဦးက သတင်းဌာနများသို့ တရားဝင်ထုတ်ဖော် ပြောကြားခဲ့ကြောင်း၊ ဒီမိုကရက်ပါတီနှင့် ဘန်ဂျန်ထိုင်းပါတီတို့သည် ယခင်ကသက်ဆင်ကို ဆန့်ကျင်ခဲ့သူများဖြစ်သော်လည်း ယခုအခါ နိုင်ငံရေးတွင် တပ်မတော်ကျောထောက်နောက်ခံပြုသော အဖွဲ့အစည်းက ကာလရှည်ကြာစွာ ပါဝင်ထိန်းချုပ်သွားမည်ကို မလိုလားကြသောကြောင့် မည်သည့်ပါတီနှင့်ပူးပေါင်းရမည်ဆိုခြင်းကို ဆုံးဖြတ်ရခက်နေခြင်းဖြစ်ကြောင်း သိရှိရပါသည်။

          ထိုင်းရွေးကောက်ပွဲ၌ အနိုင်ရရှိသောအမတ်များသည် (၁၅) ရက်အတွင်း လွှတ်တော်သို့ တက်ရောက်ပြီးအစည်းအဝေးကျင်းပကာဝန်ကြီးချုပ်နေရာအတွက် ရွေးချယ်မှုများ ပြုလုပ်ကြမည်ဖြစ်ကြောင်း၊ ရွေးကောက်ပွဲတွင် အမတ်နေရာရွေးချယ်ခံရသည့် နိုင်ငံရေးပါတီ (၂၇) ခုရှိပြီးပါတီတစ်ခုချင်းအလိုက် အမတ်နေရာအများဆုံးရရှိသည့် ပါတီမှာပွေထိုင်းပါတီဖြစ်ပြီး အမတ်နေရာ (၁၃၆) နေရာရွေးချယ်ခံထားရကြောင်း၊ PPRP ပါတီသည်  အမတ်အနေရာ (၁၁၅) နေရာဖြင့် ဒုတိယနေရာ၌လည်းကောင်း၊ သက်ဆင်အားလိုလားပြီး လူငယ်ပညာတတ်များဖြင့် ဖွဲ့စည်းထားသော နိုင်ငံရေးပါတီအသစ်ဖြစ်သည့်  Furture  Forward ပါတီက အမတ်နေရာ (၈၀) ရရှိပြီးတတိယနေရာ၌လည်းကောင်း အသီးသီးရပ်တည်လျက်ရှိကြောင်းwww.channelnewsasia.com အင်တာနက် website တွင်ဖော်ပြပါရှိပါသည်။

တောင်ကိုရီးယားနိုင်ငံ၏ ပို့ကုန်ကဏ္ဍကျဆင်းမှုကြောင့် တောင်ကိုရီးယားဝမ်ငွေတန်ဖိုးမှာ ဆက်တိုက်ကျဆင်းလျက်ရှိမှု

၂၀၁၉ ခုနှစ်၊ ဧပြီလအတွင်း၌ တောင်ကိုရီးယားနိုင်ငံ၏ပြည်ပသို့ ကုန်ပစ္စည်းတင်ပို့မှုမှာ ယမန်နှစ်အလားတူကာလနှင့် နှိုင်းယှဉ်ပါက ၂% ခန့်ကျဆင်းခဲ့ပြီး တောင်ကိုရီးယားနိုင်ငံအတွက် ဝင်ငွေရရှိမှုကို အဓိကပံ့ပိုးပေးနေသော မော်တော်ကား ထုတ်လုပ်သည့်ကဏ္ဍ၊ သင်္ဘောတည် ဆောက်သည့်ကဏ္ဍနှင့် အီလက်ထရောနစ်ပစ္စည်းများ ထုတ်လုပ်သည့်ကဏ္ဍာများတွင်လည်း ကျဆင်းမှုများ ကြုံတွေ့နေရကြောင်း၊ တောင်ကိုရီးယားအစိုးရသည် ဘဏ္ဍာရေးအကျပ်အတည်း ကြုံတွေ့နေရသောကြောင့် တောင်ကိုရီးယားဝမ်ငွေ ၆.၇ ထရီလီယံ (အမေရိကန်ဒေါ်လာ ၅.၈ ဘီလီယံ) ခန့်ကိုအပိုဆောင်းအသုံးစရိတ်အဖြစ် သုံးစွဲခွင့်ပြုပါရန် လွန်ခဲ့သည့်ရက်သတ္တပတ်အတွင်း၌ တောင်ကိုရီးယားလွှတ်တော်ထံမှ အတည်ပြုချက်တောင်းခံထားသော်လည်း လွှတ်တော်၌ ဆွေးနွေးနေဆဲဖြစ်သောကြောင့် ကြန့်ကြာလျက်ရှိကြောင်း၊ တောင်ကိုရီးယားနိုင်ငံ၏ စီးပွားရေးအခြေအနေနှင့် ဘဏ္ဍာရေးလိုငွေပြမှုများကြောင့် တောင်ကိုရီးယားဝမ်ငွေတန်ဖိုးမှာ ဆက်တိုက် ကျဆင်းလျက်ရှိကြောင်းသိရှိရပါသည်။

တောင်ကိုရီးယားဝမ်ငွေတန်ဖိုးသည် ၂၀၁၉ ခုနှစ်၊ ဧပြီလအတွင်း၌ ၂.၈% အထိ ကျဆင်းခဲ့ရာကမ္ဘာ့ငွေကြေးများအနက် အမေရိကန်ဒေါ်လာနှင့်နှိုင်းယှဉ်ရာတွင် တန်ဖိုးအကျဆုံးငွေကြေးအဖြစ် သို့ရောက်ရှိခဲ့ကြောင်း၊ ၂၀၁၉ ခုနှစ်၊ မေလ(၂) ရက်(ကြာသပတေးနေ့) နံနက်ပိုင်းဈေးကွက်ဖွင့်ချိန်တွင် နိုင်ငံတကာငွေကြေးဈေးကွက်၌ အမေရိကန်တစ်ဒေါ်လာလျှင် (၁၁၆၅.၇၀) ဝမ်လဲလှယ်မှုနှုန်းခန့် ဖြစ်ပေါ်ခဲ့ကြောင်း၊ ဈေးကွက်သုတေသီများ၏ ခန့်မှန်းချက်အရတောင်ကိုရီးယားဗဟိုဘဏ်သည် စီးပွားရေးကျဆင်းမှုကို ကုစားနိုင်ရန်အတွက် ဘဏ်တိုးနှုန်းကိုလာမည့် ဇူလိုင်လအတွင်း၌ လျှော့ချ ဖွယ်ရှိရာဘဏ်တိုးနှုန်းလျှော့ချမည်ဆိုပါက ဝမ်ငွေတန်ဖိုးမှာ ဆက်လက်ကျဆင်းဖွယ်ရှိပြီး အမေရိကန်တစ်ဒေါ်လာလျှင် ဝမ်ငွေ (၁၂၀၀) ဝန်းကျင်ခန့်အထိ ရောက်ရှိသွားလိမ့်မည်ဟုသိရှိရကြောင်း www. bloomberg.com အင်တာနက် websiteတွင် ဖော်ပြပါရှိပါသည်။

တရုတ်-မြန်မာရေနံနှင့်သဘာဝဓာတ်ငွေ့ပိုက်လိုင်းစီမံကိန်းသည် မြန်မာနိုင်ငံအတွက် လျှပ်စစ် ဓာတ်အားကို(၂၄)နာရီအပြည့် ထောက်ပံ့နိုင်လိမ့်မည်ဟု တရုတ်ကွန်မြူနစ်ပါတီ၏အာဘော် Global Times သတင်းစာကဖော်ပြခဲ့မှု

တရုတ်-မြန်မာ ရေနံနှင့်သဘာဝဓာတ်ငွေ့ပိုက်လိုင်းစီမံကိန်းသည် မြန်မာနိုင်ငံအတွက် လျှပ်စစ်ဓာတ်အားကို ၂၄နာရီအပြည့်ထောက်ပံ့နိုင်လိမ့်မည်ဟု တရုတ်ကွန်မြူနစ်ပါတီ၏အာဘော် Global Times သတင်းစာက ယခုရက်ပိုင်း အတွင်းဖော်ပြခဲ့ကြောင်း သိရှိရပါသည်။

Global Times သတင်းစာ၏ဖော်ပြချက်၌ တရုတ်-မြန်မာ ရေနံနှင့်သဘာဝဓာတ်ငွေ့ ပိုက်လိုင်းသည် ကျောက်ဖြူမြို့မှစတင်ပြီး ယူနန်ပြည်နယ်အတွင်း၌ အဆုံးသတ်ကာ တရုတ် အစိုးရမှ အကောင်အထည်ဖော်ဆောင်နေသည့် ၂၁ ရာစု ပိုးလမ်းမကြီးစီမံကိန်း(BRI)၏ ရှေ့ပြေး စီမံကိန်းတစ်ခုပင်ဖြစ်ကြောင်း၊ အဆိုပါပိုက်လိုင်းစီမံကိန်း သည် တရုတ်-အာရှအလယ်ပိုင်းဒေသ ရေနံပိုက်လိုင်းစီမံကိန်း၊ တရုတ်-ရုရှား ရေနံပိုက်လိုင်းစီမံကိန်းနှင့်တရုတ်-အရှေ့အလယ်ပိုင်းဒေသ ရေနံပိုက်လိုင်းစီမံကိန်းတို့၏နောက်မှနေ၍ တရုတ်နိုင်ငံအတွင်းသို့ စွမ်းအင်အများအပြား တင်သွင်း နေသည့် စတုတ္ထမြောက်လမ်းကြောင်းအဖြစ်ရပ်တည်နေပြီး တရုတ်နိုင်ငံအတွက် စွမ်းအင် လုံလောက်စွာရရှိရေးနှင့် လုံခြုံမှုတို့အတွက် မဟာဗျူဟာကျသောအခြေအနေတစ်ရပ်၌ ရပ်တည်နေသည်ဟု ရေးသားထားကြောင်း သိရှိရပါသည်။

Global Times သတင်းစာက ဆက်လက်ဖော်ပြရာ၌ တရုတ်-မြန်မာရေနံပိုက်လိုင်း စီမံကိန်းတွင် အရှည်(၇၇၁)ကီလိုမီတာခန့်ရှိသော တရုတ်-မြန်မာ ရေနံပိုက်လိုင်းနှင့် အရှည်(၇၉၃) ကီလိုမီတာခန့်ရှိသော သဘာဝဓာတ်ငွေ့ပိုက်လိုင်းတို့ပါဝင်ကြောင်း၊ သဘာဝဓာတ်ငွေ့ပိုက်လိုင်းသည် တစ်နှစ်လျှင် သဘာဝဓာတ်ငွေ့ကုဗမီတာ(၁၂)ဘီလီယံခန့်ကို တရုတ်နိုင်ငံအတွင်းသို့ ပို့ဆောင် ပေးလျက်ရှိကြောင်း၊ လက်ရှိအချိန်တွင် ကျောက်ဖြူမြို့၏လျှပ်စစ်ဓာတ်အား ကဏ္ဍအတွက် တရုတ်-မြန်မာ သဘာဝဓာတ်ငွေ့ပိုက်လိုင်းမှ တစ်နေ့လျှင် သဘာဝဓာတ်ငွေ့ကုဗမီတာပေါင်း (၆၀၂,၇၀၀)ခန့်ထောက်ပံ့လျက်ရှိသည့်အတွက် ကျောက်ဖြူမြို့သည် ယခင်က တစ်နေ့လျှင် (၃)နာရီခန့်သာရရှိနေရာမှ ယခုအခါ(၂၄)နာရီအပြည့် ဓာတ်အားရရှိနေပြီဖြစ်ပြီး ရခိုင်ပြည်နယ်တွင် (၂၄)နာရီဓာတ်အားအပြည့်ရရှိသည့် ပထမဆုံးသောမြို့အဖြစ်ရပ်တည်နေကြောင်း၊ မြန်မာနိုင်ငံသည် စီးပွားရေးတိုးတက်မှုရရှိရေးနှင့် ပြည်သူများ၏ လူမှုဘဝနေထိုင်မှုအဆင့်အတန်းမီရေးတို့အတွက် လျှပ်စစ်ဓာတ်အားများထုတ်လုပ်ရန် တစ်နှစ်လျှင် အနည်းဆုံး ရေနံတန်ချိန်(၂)သန်း သို့မဟုတ် သဘာဝဓာတ်ငွေ့ကုဗမီတာ(၂)ဘီလီယံခန့်လိုအပ်လျက်ရှိရာ အဆိုပါပမာဏသည် တရုတ်နိုင်ငံသို့ နှစ်စဉ်ပေးပို့နေသည့် သဘာဝဓာတ်ငွေ့ကုဗမီတာ(၁၂) ဘီလီယံနှင့်နှိုင်းယှဉ်ပါက ၂၀% မျှသာ ရှိသောကြောင့် မြန်မာနိုင်ငံအတွက်လိုအပ်နေသည့်စွမ်းအင်ကို  တရုတ်-မြန်မာ သဘာဝဓာတ်ငွေ့ ပိုက်လိုင်းက ကောင်းစွာထောက်ပံ့နိုင်စွမ်းရှိသည်ဟု ဖော်ပြထားကြောင်း သိရှိရပါသည်။

Global Times သတင်းစာ၏နိဂုံးပိုင်း၌ အာရှဖွံ့ဖြိုးရေးဘဏ်(ADB)၏ အစီရင်ခံစာ၌လည်း မြန်မာနိုင်ငံကို စီးပွားရေးတိုးတက်မှုအမြန်ဆုံးရရှိနိုင်သည့် နိုင်ငံတစ်ခုအဖြစ် သတ်မှတ်ထားကြောင်း၊ တရုတ်-မြန်မာရေနံနှင့် သဘာဝဓာတ်ငွေ့စီမံကိန်းသည် လက်ရှိအချိန်၌ မြန်မာနိုင်ငံကြုံတွေ့ နေရသော စီးပွားရေးကျဆင်းမှုပြဿနာများကို ဖြေရှင်းပေးနိုင်ပြီး နိုင်ငံခြားငွေ အမြောက်အများ ဝင်ရောက်ကာ ADB က ခန့်မှန်းထားသကဲ့သို့ စီးပွားရေးတိုးတက်မှုအမြန်ဆုံးရရှိသော နိုင်ငံဖြစ်လာစေရေးအတွက် အထောက်အကူပေးနိုင်လိမ့်မည်ဟု ရေးသားထားကြောင်း www.globaltimes.com အင်တာနက် website ဖော်ပြပါရှိပါသည်။