ဗြိတိန်နိုင်ငံ၊ နိုင်ငံတော်စာရင်းအင်းရုံးမှ ထုတ်ပြန်သည့်အစီရင်ခံစာထွက်ပေါ်ပြီးနောက် ဗြိတိန် စတာလင်ပေါင်တန်ဖိုးမြင့်တက်ခဲ့မှု

ဗြိတိန်နိုင်ငံ၊ နိုင်ငံတော်စာရင်းအင်းရုံးမှ ထုတ်ပြန်သည့်အစီရင်ခံစာထွက်ပေါ်ပြီးနောက် ဗြိတိန် စတာလင်ပေါင်တန်ဖိုးမြင့်တက်ခဲ့မှု

၂၀၁၉ ခုနှစ်၊ မတ်လ(၁၉) ရက်(အင်္ဂါနေ့) တွင် ဗြိတိန်နိုင်ငံ၊ နိုင်ငံတော်စာရင်းအင်းရုံး (ONS) က ထုတ်ပြန်သည့် အစီရင်ခံစာထွက်ပေါ်ပြီးနောက် ဗြိတိန်စတာလင်ပေါင် တန်ဖိုးမြင့်တက်ခဲ့ကြောင်း၊ ONS ကထုတ်ပြန်သည့်အစီရင်ခံစာ၌ ၂၀၁၉ ခုနှစ်၊ ဇန်နဝါရီလအတွင်း ဗြိတိန်နိုင်ငံ၌ အလုပ်လက်မဲ့နှုန်းမှာ ၄% ခန့်ရှိခဲ့ရာမှ  ဖေဖော်ဝါရီလတွင်မူ ဗြိတိန်ုနိုင်ငံ၏ အလုပ်လက်မဲ့နှုန်းသည် ၃.၉% သို့ ကျဆင်းခဲ့ရာ အဆိုပါပမာဏသည် ၁၉၇၅ ခုနှစ်နောက်ပိုင်း(၄၄) နှစ်တာကာလ အတွင်း ဗြိတိန်နိုင်ငံ၌ အလုပ်လက်မဲ့နှုန်း အနည်းဆုံးအနေအထားပင်ဖြစ်ကြောင်း၊ အလားတူ အလုပ်လက်မဲ့နှုန်း ကျဆင်းခဲ့သည့်အတွက် ၂၀၁၈ ခုနှစ်၊ နိုဝင်ဘာလမှ ၂၀၁၉ ခုနှစ်၊ ဖေဖော်ဝါရီလ အထိကာလအတွင်း ဗြိတိန်နိုင်ငံ၏ အလုပ်အကိုင်ရရှိမှုပမာဏသည် ၇၆.၁%  ခန့်အထိရှိပြီး အလုပ်အကိုင်ရရှိနေသူ ဦးရေပမာဏမှာ (၃၂.၇) သန်းအထိသို့ စံချိန်တင်မြင့်တက်လာခဲ့သည်ဟု ဖော်ပြထားကြောင်း၊ ယင်းအစီရင်ခံစာထွက်ပေါ်ပြီးနောက် ဗြိတိန်နိုင်ငံသည် ဥရောပသမဂ္ဂမှ ဗြိတိန် ခွဲထွက်ရေး မသေချာမရေရာမှုများ ကြုံတွေ့နေရသည့်တိုင် စီးပွားရေးအခွင့်အလမ်းများ ပေါ်ပေါက်ကာ အလုပ်အကိုင်ရရှိမှုများ မြင့်တက်လျက်ရှိသည်ဟူသော  အကောင်းမြင်ယုံကြည်မှုများနှင့်အတူ ရင်းနှီးမြှုပ်နှံသူများသည် စတာလင်ပေါင်ဝယ်ယူစုဆောင်းမှုများ ပြုလုပ်လာကြသောကြောင့် စတာလင်ပေါင်တန်ဖိုး မြင့်တက်ခဲ့ကြောင်း သိရှိရပါသည်။

၂၀၁၉ ခုနှစ်၊မတ်လ(၂၀)ရက် (ဗုဒ္ဓဟူးနေ့) နံနက်ပိုင်းတွင်ကမ္ဘာ့ငွေကြေးဈေးကွက်အတွင်း စတာလင်ပေါင်တန်ဖိုးမှာ ၀.၁၄% မြင့်တက်ခဲ့ပြီး စတာလင်တစ်ပေါင်လျှင် အမေရိကန်ဒေါ်လာ (၁.၃၂၇၂)ဒေါ်လာလဲလှယ်မှုနှုန်းသို့ရောက်ရှိခဲ့ကြောင်း www.exchangerates.org.uk တွင်ဖော်ပြ ပါရှိပါသည်။

မှတ်ချက်။      ။ဥရောပသမဂ္ဂ(EU)မှ ဗြိတိန်နိုင်ငံခွဲထွက်မည့်အခြေအနေမှာမူ လွန်ခဲ့သည့် ရက်သတ္တပတ်အတွင်း၌ EU မှ ဗြိတိန်ခွဲထွက်မည့်ရက်သတ်မှတ်ချက် နောက်ဆုတ်ရွှေ့ဆိုင်းခြင်း ပြု/မပြုနှင့်ပတ်သက်၍ ဗြိတိန်ပါလီမန်၌ မဲခွဲဆုံးဖြတ်ခဲ့ရာ နောက်ဆုတ်ရွှေ့ဆိုင်းရန်အတွက် ထောက်ခံမဲ (၄၁၃)မဲ ရရှိခဲ့ပြီး ကန့်ကွက်မဲ ပမာဏမှာမူ(၂၀၂)မဲသာ ရရှိခဲ့ကြောင်း၊ ထို့ကြောင့် ဗြိတိန်ဝန်ကြီးချုပ် ထရီဇာမေသည် EU မှ ဗြိတိန်ခွဲထွက်မည့်ရက်သတ်မှတ်ချက်အား နောက်ဆုတ်ရွှေ့ဆိုင်းရန်အတွက် EU ခေါင်းဆောင်များထံ တောင်းဆိုမှုများ ပြုလုပ်ရမည်ဖြစ်ပြီး EU သည် ၂၀၁၉ ခုနှစ်၊ မတ်လ (၂၁)ရက်နှင့် (၂၂)ရက်နေ့တို့တွင်ပြုလုပ်မည့် EU ထိပ်သီးဆွေးနွေးပွဲ၌ ဗြိတိန်ခွဲထွက်ရက်အား နောက်ဆုတ်ရွှေ့ဆိုင်း​ပေးမည့်ကာလကို ဆွေးနွေးဆုံးဖြတ်သွားဖွယ်ရှိသည်ဟု သိရှိရပါသည်။

မလေးရှားနိုင်ငံသို့ထွက်ခွာမည့် မြန်မာနိုင်ငံသားမွတ်စလင်အမျိုးသမီးနှစ်ဦးအား အိန္ဒိယနိုင်ငံကူး လက်မှတ်အတု ကိုင်ဆောင်မှုဖြင့် ကာလကတ္တားလေဆိပ်တွင်အိန္ဒိယအာဏာပိုင်များကဖမ်းဆီးခဲ့မှု

မလေးရှားနိုင်ငံသို့ထွက်ခွာမည့် မြန်မာနိုင်ငံသားမွတ်စလင်အမျိုးသမီးနှစ်ဦးအား အိန္ဒိယနိုင်ငံကူး လက်မှတ်အတု ကိုင်ဆောင်မှုဖြင့် ကာလကတ္တားလေဆိပ်တွင်အိန္ဒိယအာဏာပိုင်များကဖမ်းဆီးခဲ့မှု

ဘင်္ဂလားဒေ့ရှ်နိုင်ငံရှိ မွတ်စလင်ဒုက္ခသည်စခန်းများတွင်နေထိုင်ခဲ့ပြီး အိန္ဒိယနိုင်ငံအတွင်းသို့ တရားမဝင်နေထိုင်လျက်ရှိသည့် မြန်မာနိုင်ငံသားမွတ်စလင်အမျိုးသမီး(၂) ဦးအား အိန္ဒိယနိုင်ငံကူး လက်မှတ်အတုကိုင်ဆောင်ကာ မလေးရှားနိုင်ငံသို့ တရားမဝင်သွားရောက်ရန်ကြံစည်မှုဖြင့် ကာလကတ္တားလေဆိပ်တွင် အိန္ဒိယလူဝင်မှုကြီးကြပ်ရေးအာဏာပိုင်များက ၂၀၁၉ ခုနှစ်၊ မတ်လ(၁၆)ရက် (စနေနေ့) ညပိုင်း၌ ဖမ်းဆီးရမိခဲ့သည်ဟု သိရှိရပါသည်။

အဆိုပါဖမ်းဆီးရမိသည့် မွတ်စလင်အမျိုးသမီး(၂) ဦးမှာ ရာဖစ်ကာခါတွန်း(အသက်၂၂နှစ်) နှင့် နော်ကိုင်ဒါခါတွန်း (အသက် ၂၀ နှစ်) တို့ဖြစ်ကြပြီး ကာလကတ္တားမြို့ရှိ (NSCBI) အပြည်ပြည်ဆိုင်ရာလေဆိပ်တွင် အိန္ဒိယလူဝင်မှုကြီးကြပ်ရေးအဖွဲ့မှ ဖမ်းဆီးရမိခဲ့ခြင်းဖြစ်ပြီး မလေးရှားနိုင်ငံ၊ ကွာလာလမ်ပူ မြို့သို့ ထွက်ခွာမည့်လေယာဉ်ခရီးစဉ်အမှတ်(AK-62) ဖြင့် လေယာဉ်ပေါ်သို့မတက်ရောက်မီလူဝင်မှု ကြီးကြပ်ရေးအဖွဲ့ကမသင်္ကာ၍ နိုင်ငံကူးလက်မှတ်အားစစ်ဆေးကြည့်ရှုရာမှ တစ်ဆင့်နိုင်ငံကူးလက်မှတ် အတုဖြစ်သည်ကို စိစစ်တွေ့ရှိခဲ့ကြခြင်းဖြစ်ကြောင်း၊ အဆိုပါ မွတ်စလင်အမျိုးသမီး(၂) ဦးအား စစ်ဆေး ချက်များအရ ၎င်းတို့(၂) ဦးသည်မြန်မာနိုင်ငံသားများဖြစ်ပြီး ၎င်းတို့နှင့်အတူလိုက်ပါလာသည့် ကာလိုမစ်ဒရာဆိုသူမှ အိန္ဒိယနိုင်ငံကူးလက်မှတ်များရရှိအောင်လုပ်ဆောင်ပေးသူဖြစ်ကာ ၎င်းတို့အား ဦးဆောင်ခေါ်ဆောင်လာသူဖြစ်ကြောင်း၊ ၎င်းတို့နှစ်ဦးသည် မြန်မာနိုင်ငံ၊ ရခိုင်ပြည်နယ်မှဖြစ်ကြပြီး ဘင်္ဂလားဒေ့ရှ်နိုင်ငံရှိ ဒုက္ခသည်စခန်းများသို့ပြောင်းရွှေ့ခဲ့ကာ Tangail ဒုက္ခသည်စခန်းတွင် နေထိုင်ခဲ့သူများဖြစ်ကြကြောင်း၊ လွန်ခဲ့သည့် (၆) လခန့်မှစတင်၍ အိန္ဒိယနိုင်ငံ အတွင်းသို့ ကြားခံပွဲစားများမှ တစ်ဆင့် နယ်စပ်အားဖြတ်ကျော်ပြီး အိန္ဒိယနိုင်ငံအတွင်းသို့ခိုးဝင်ခဲ့ကြခြင်းဖြစ်ကာ တရားမဝင်နေထိုင် ခဲ့ကြခြင်းဖြစ်သည်ဟု သိရှိရပါသည်။

ထို့ပြင် အဆိုပါကိစ္စရပ်နှင့်ပတ်သက်၍ ၎င်းတို့အားဦးဆောင်ခေါ်ဆောင်လာသူ ကာလိုမစ်ဒရာအား ပဏာမစုံစမ်းစစ်ဆေးချက်အရ ၎င်းသည် အိန္ဒိယနိုင်ငံအတွင်းသို့ခိုးဝင်လာသည့် မွတ်စလင်များအတွက် နိုင်ငံကူးလက်မှတ်အတုများပြုလုပ်ပေးနေသည့် ကွန်ယက်အတွင်း ပါဝင်ပတ်သက်ဆက်နွယ်သူတစ်ဦးဖြစ်ကာ အခြားသောဘင်္ဂလားဒေ့ရှ်နိုင်ငံသားများ အပါအဝင် မွတ်စလင်များအား အိန္ဒိယနိုင်ငံ အတွင်းသို့ ရောက်ရှိအောင် ကူညီလုပ်ဆောင်ပေးနေသူတစ်ဦးဖြစ်သည်ဟု သိရှိရကြောင်း၊ ယခုအခါ အိန္ဒိယလူဝင်မှုကြီးကြပ်ရေးအဖွဲ့သည် အဆိုပါ မွတ်စလင်အမျိုးသမီး(၂) ဦးနှင့် ၎င်းတို့အားဦးဆောင် ခေါ်ဆောင်ခဲ့သူအပါအဝင်(၃) ဦးတို့အား NSCBI လေဆိပ်ရဲ တပ်ဖွဲ့သို့လွှဲပြောင်းကာ အဆိုပါ ရဲတပ်ဖွဲ့ စခန်းတွင်ဖမ်းဆီးထိန်းသိမ်းထားသည်ဟု သိရှိရကြောင်းဖြင့် www.wionews.com တွင်ဖော်ပြပါရှိ ပါသည်။

အိုပက်အဖွဲ့အနေဖြင့် ရေနံထုတ်လုပ်မှုလျှော့ချရေးအစီအစဉ်အတိုင်း တစိုက်မတ်မတ်ဆက်လက် လုပ်ဆောင်သွားမည်ဟုပြောကြားခဲ့ပြီးနောက် ကမ္ဘာ့ဈေးကွက်အတွင်း ရေနံဈေးနှုန်းများမှာ(၄)လ တာကာလအတွင်း အမြင့်ဆုံးသို့ရောက်ရှိခဲ့မှု

အိုပက်အဖွဲ့အနေဖြင့် ရေနံထုတ်လုပ်မှုလျှော့ချရေးအစီအစဉ်အတိုင်း တစိုက်မတ်မတ်ဆက်လက် လုပ်ဆောင်သွားမည်ဟုပြောကြားခဲ့ပြီးနောက် ကမ္ဘာ့ဈေးကွက်အတွင်း ရေနံဈေးနှုန်းများမှာ(၄)လ တာကာလအတွင်း အမြင့်ဆုံးသို့ရောက်ရှိခဲ့မှု

အိုပက်အဖွဲ့ဝင်နိုင်ငံများနှင့် အဖွဲ့ဝင်မဟုတ်သောနိုင်ငံများ(OPEC +) တို့သည် ၂၀၁၉ ခုနှစ်၊ ဇန်နဝါရီလ (၁) ရက်နေ့မှစ၍ ဇွန်လအထိ(၆) လကာလသက်တမ်းဖြင့် တစ်နေ့လျှင်ရေနံစည်ပေါင်း (၁.၂) သန်းအား လျှော့ချထုတ်လုပ်လျက်ရှိပြီး လာမည့်ဧပြီလ (၁၇) ရက်နှင့် (၁၈)ရက်နေ့တို့တွင် ထပ်မံတွေ့ဆုံကာ၎င်းတို့၏ ရေနံလျှော့ချထုတ်လုပ်ရေးအစီအစဉ်ကြောင့် ဈေးကွက်အတွင်း ဖြစ်ပေါ်လာသည့်အခြေအနေများ အပေါ်သုံးသပ်ဆွေးနွေးသွားရန်နှင့် ရေနံထုတ်လုပ်မှုအားဆက်လက်လျှော့ချထားရန် သင့်/မသင့်နှင့်ပတ်သက်၍ ဆွေးနွေးညှိနှိုင်းမှုများပြုလုပ်သွားရန် စီစဉ်ထားကြောင်း၊ သို့သော် အိုပက်အဖွဲ့ဝင်နိုင်ငံများနှင့်အဖွဲ့ဝင်မဟုတ်သော နိုင်ငံများ (OPEC +) တို့သည်၂၀၁၉ ခုနှစ်၊ မတ်လ(၁၈)ရက်(တနင်္လာနေ့) တွင် အဇာဘိုင်ဂျန်နိုင်ငံမြို့တော်ဘာကူ၌ (၁၃) ကြိမ်မြောက် ဝန်ကြီးများ အဆင့်ပူးတွဲစောင့်ကြည့်ရေးကော်မတီ အစည်းအဝေးပြုလုပ်ခဲ့ကြကြောင်း၊ အဆိုပါအစည်းအဝေးသို့ အိုပက်အဖွဲ့နှင့် အဖွဲ့ဝင်မဟုတ်သော နိုင်ငံများ(OPEC +) မှ အဆင့်မြင့်ကိုယ်စားလှယ် (၁၄) ဦး တက်ရောက်ခဲ့ကြပြီး ၎င်းတို့အနေဖြင့် လာမည့်ကာလများတွင်လည်း နေ့စဉ်ရေနံထုတ်လုပ်မှုအား တစိုက်မတ်မတ် ဆက်လက်လုပ်ဆောင်သွားရန် ဆုံးဖြတ်ခဲ့ကြကြောင်း၊ ထို့ပြင်ကမ္ဘာ့ဈေးကွက်အတွင်း ရေနံပိုလျှံမှုများကြာရှည်ဖြစ်ပေါ်နေပါက(OPEC +) အနေဖြင့် ရေနံလျှော့ချထုတ်လုပ်ရေးအစီအစဉ်ကို ဆက်လက်လုပ်ဆောင်သွားမည်ဟု ဆော်ဒီအာရေဗျ စွမ်းအင်ဝန်ကြီးခါလစ်အယ်လ်ဖာလစ်က ယင်းအစည်းအဝေးတွင် ပြောကြားခဲ့ခြင်းတို့ကိုအကြောင်းပြု၍ ယခုမတ်လ (၁၈) ရက် (တနင်္လာနေ့) ၌ပင် WTI  နှင့် ဘရန့်ရေနံဈေးနှုန်းများမှာ ၁% နှင့်၀.၆% စီ အသီးသီးမြင့်တက်ခဲ့ကြောင်း သိရှိရပါသည်။

(OPEC + )အနေဖြင့် လက်ရှိလုပ်ဆောင်လျက်ရှိသော (၆) လသက်တမ်းဖြင့် နေ့စဉ်ရေနံ လျှော့ချထုတ် လုပ်ရေးအစီအစဉ်အား  ၂၀၁၉ ခုနှစ်၊ ဒုတိယ(၆)လတာကာလတွင်လည်း ဆက်လက် လုပ်ဆောင်ရဖွယ်ရှိသည်ဟု ဆော်ဒီအာရေဗျစွမ်းအင်ဝန်ကြီး ခါလစ်အယ်လ်ဖာလစ်က လွန်ခဲ့သော ရက်ပိုင်းက ပြောကြားခဲ့ဖူးကြောင်း၊ ထို့ပြင်အိုပက်အဖွဲ့၏ ရေနံလျှော့ချထုတ်လုပ်ရေးအစီအစဉ်သည် ကမ္ဘာ့ရေနံဈေးနှုန်းများကို မြင့်တက်စေသည့် အကျိုးရလဒ်များထွက်ပေါ်လျက်ရှိသည်ဟု ဈေးကွက် သုတေသီများက သုံးသပ်ထားကြကြောင်း သိရှိရပါသည်။

၂၀၁၉ ခုနှစ်၊ မတ်လ(၁၉)ရက်(အင်္ဂါနေ့)နံနက်ပိုင်းတွင် နယူးယောက်ဈေးကွက်၌ ဧပြီလ အတွက် WTI ရေနံစိမ်း ကြိုတင်ရောင်းဝယ်မှုဈေးနှုန်းမှာ အမေရိကန်ဒေါ်လာ(၅)ဆင့်မြင့်တက်ခဲ့ပြီး တစ်စည်လျှင် အမေရိကန် ဒေါ်လာ(၅၉.၁၄)ဒေါ်လာသို့လည်းကောင်း၊  လန်ဒန်ဈေးကွက်၌ ဘရန့် ရေနံစိမ်းကြိုတင်ရောင်း ဝယ်မှုဈေးနှုန်းမှာ အမေရိကန်ဒေါ်လာ(၂၀)ဆင့်မြင့်တက်ခဲ့ပြီး တစ်စည်လျှင်  အမေရိကန်ဒေါ်လာ(၆၇.၇၄)ဒေါ်လာသို့လည်းကောင်းအသီးသီးမြင့်တက်ခဲ့ကြောင်း၊အဆိုပါ ဈေးနှုန်း များသည် ၂၀၁၈ ခုနှစ်၊ နိုဝင်ဘာလနောက်ပိုင်း (၄)လတာကာလအတွင်း အမြင့်ဆုံးဈေးနှုန်းများဖြစ် သည်ဟုသိရှိရကြောင်း www.reuters.com တွင်ဖော်ပြပါရှိပါသည်။

ဖိလစ်ပိုင်နိုင်ငံသည် အပြည်ပြည်ဆိုင်ရာ ရာဇဝတ်တရားရုံး(ICC)မှ တရားဝင်နုတ်ထွက်ခဲ့ပြီး ယင်းသို့ နုတ်ထွက်ခဲ့ခြင်းသည် ICC မှ ဒုတိယမြောက်နုတ်ထွက်သည့်နိုင်ငံတစ်နိုင်ငံဖြစ်လာခဲ့မှု

ဖိလစ်ပိုင်နိုင်ငံသည် အပြည်ပြည်ဆိုင်ရာ ရာဇဝတ်တရားရုံး(ICC)မှ တရားဝင်နုတ်ထွက်ခဲ့ပြီး ယင်းသို့ နုတ်ထွက်ခဲ့ခြင်းသည် ICC မှ ဒုတိယမြောက်နုတ်ထွက်သည့်နိုင်ငံတစ်နိုင်ငံဖြစ်လာခဲ့မှု

ဖိလစ်ပိုင်နိုင်ငံသည် နယ်သာလန်နိုင်ငံ၊ ဟိတ်ဂ်မြို့အခြေစိုက် အပြည်ပြည်ဆိုင်ရာ ရာဇဝတ်တရားရုံး(ICC) အဖွဲ့ဝင်နိုင်ငံအဖြစ်မှ ၂၀၁၉ ခုနှစ်၊ မတ်လ(၁၇) ရက်(တနင်္ဂနွေနေ့) တွင် တရားဝင် နုတ်ထွက်ခဲ့ပြီး ထိုသို့နုတ်ထွက်ခဲ့ခြင်းဖြင့် ICC အဖွဲ့ဝင်နိုင်ငံမှ ဒုတိယမြောက်နှုတ်ထွက်သည့် နိုင်ငံတစ်နိုင်ငံဖြစ်လာခဲ့သည်ဟု သိရှိရကြောင်း၊ ဖိလစ်ပိုင်အစိုးရသည် ၂၀၁၆ ခုနှစ် နှစ်လယ်ပိုင်းကာလများအတွင်း၌ နိုင်ငံအတွင်း မူးယစ်ဆေးဝါးနှိမ်နှင်းမှုများနှင့်ပတ်သက်၍ လူ့အခွင့်အရေးဆိုင်ရာ ရာဇဝတ်မှုများ ချိုးဖောက်ခဲ့သည်ဟူသော စွပ်စွဲချက်များနှင့်ပတ်သက်၍ ICC မှ ကနဦးလေ့လာစုံစမ်းမှုများပြုလုပ်ခဲ့ပြီးနောက် ယခုကဲ့သို့ ICC အဖွဲ့ဝင်နိုင်ငံအဖြစ်မှ နုတ်ထွက်ရန်ဆုံးဖြတ်ခဲ့ခြင်း ဖြစ်ပြီး  လွန်ခဲ့သည့် ၂၀၁၈ ခုနှစ်အတွင်းကပင် ကုလသမဂ္ဂမှတစ်ဆင့် ICC အဖွဲ့ဝင်နိုင်ငံအဖြစ်မှ နုတ်ထွက်သွားမည်ဟု ကြေညာခဲ့ခြင်းဖြစ်ကြောင်း၊ ၂၀၁၈ ခုနှစ်၊ မတ်လ(၁၆)ရက်နေ့ကပင် ICC ထူထောင်ရေးတွင် အခြေခံကျသော ဥပဒေတစ်ရပ်ဖြစ်သည့် ရောမသဘောတူညီမှုစာချုပ်မှ နုတ်ထွက် ကြောင်းစာတစ်စောင်အား တရားဝင်တင်သွင်းခဲ့ခြင်းဖြစ်သည်ဟုသိရှိရကြောင်း၊ ထို့ပြင် ၂၀၁၆ ခုနှစ် အတွင်း၌လည်း အာဖရိကနိုင်ငံများဖြစ်သည့် ဂမ်ဘီယာနိုင်ငံနှင့် တောင်အာဖရိကနိုင်ငံများသည် ICC မှနုတ်ထွက်ရန် ကြေညာခဲ့သော်လည်း ၎င်းတို့၏ဆုံးဖြတ်ချက်အားပြင်ဆင်ပြီး ICC နှင့်အတူ ပြန်လည်ပူးပေါင်းခဲ့ကြကာ ဘူရွန်ဒီနိုင်ငံသည် ၂၀၁၇ ခုနှစ်၊ အောက်တိုဘာလအတွင်း၌ ICC အဖွဲ့ဝင်နိုင်ငံအဖြစ်မှ နှုတ်ထွက်ခဲ့ ပြီးနောက် ယခုဖိလစ်ပိုင်နိုင်ငံ၏နုတ်ထွက်မှုသည် ဒုတိယမြောက် နုတ်ထွက်သည့်နိုင်ငံတစ်ခုဖြစ်လာ ခဲ့ခြင်းဖြစ်ကြောင်း၊ သို့သော်ဖိလစ်ပိုင်နိုင်ငံသည် ICC အဖွဲ့ဝင် နိုင်ငံအဖြစ်မှ တရားဝင်မှ နုတ်ထွက်ခဲ့သော်လည်း အိမ်နီးချင်း အာဆီယံနိုင်ငံဖြစ်သည့် မလေးရှား နိုင်ငံသည် ၂၀၁၉ ခုနှစ်၊ ဇွန်လ(၁)ရက်နေ့တွင် ICC ၏(၁၂၃)နိုင်ငံမြောက် အဖွဲ့ဝင်နိုင်ငံတရားဝင် ဖြစ်လာစေရေးအတွက် လုပ်ဆောင်လျက် ရှိသည်ဟု သိရှိရပါသည်။

ဖိလစ်ပိုင်အစိုးရ၏ စာရင်းအချက်အလက်ထုတ်ပြန်ချက်အရ အစိုးရ၏ မူးယစ်ဆေးဝါး နှိမ်နှင်းမှုစစ်ဆင်ရေးအတွင်း သေဆုံးခဲ့သူဦးရေ(၅,၁၀၀)ကျော်ခန့်ရှိခဲ့သည်ဟု ဖော်ပြထားသော်လည်း လူ့အခွင့်အရေးအဖွဲ့များကမူ သေဆုံးသူဦးရေ(၂၀,၀၀၀)ကျော်ခန့်အထိရှိခဲ့သည်ဟု ထုတ်ပြန်ခဲ့ကာ ဖိလစ်ပိုင်နိုင်ငံမှ ယခုကဲ့သို့ ICC မှနုတ်ထွက်ခဲ့သော်လည်း ICC အနေဖြင့် ၎င်းတို့၏လုပ်ငန်းစဉ်များ အတိုင်း ဆက်လက်လုပ်ဆောင်သွားရန် စီစဉ်ထားသည်ဟုသိရှိရကြောင်းဖြင့် www.philstar.com တွင်ဖော်ပြပါရှိပါသည်။

အိန္ဒိယအစိုးရသည် ဗင်နီဇွဲလားနိုင်ငံထံမှတင်သွင်းသည့် ရေနံများအတွက်ငွေပေးချေရာတွင် အိန္ဒိယရူပီးငွေဖြင့် ပြောင်းလဲပေးချေရန် စဉ်းစားလျက်ရှိမှု

အိန္ဒိယအစိုးရသည် ဗင်နီဇွဲလားနိုင်ငံထံမှတင်သွင်းသည့် ရေနံများအတွက် ငွေပေးချေရာတွင် အိန္ဒိယရူပီးငွေဖြင့် ပြောင်းလဲပေးချေရန် စဉ်းစားလျက်ရှိမှု

ဗင်နီဇွဲလားနိုင်ငံမှ အိန္ဒိယနိုင်ငံသို့တင်ပို့သော ဗင်နီဇွဲလားရေနံများအတွက် ငွေပေးချေရာတွင် အိန္ဒိယရူပီးငွေဖြင့်ပေးချေရန် ဗင်နီဇွဲလားနိုင်ငံ၏ အဆိုပြုချက်အပေါ် အိန္ဒိယအစိုးရက စဉ်းစားလျက်ရှိသည်ဟု သိရှိရကြောင်း၊ အမေရိကန်အစိုးရသည် ဗင်နီဇွဲလားသမ္မတ နီကိုလပ်မာဒူရို အစိုးရပြုတ်ကျစေရန်အတွက် မာဒူရို၏ အတိုက်အခံခေါင်းဆောင် ဂျူအန်ကွိုက်ဒိုအား ကြားဖြတ်သမ္မတအဖြစ် လွန်ခဲ့သည့် ဇန်နဝါရီလကကြေညာခဲ့ပြီးနောက် ဗင်နီဇွဲလားနိုင်ငံပိုင်ရေနံလုပ်ငန်း (PDVSA) အား အရေးယူပိတ်ဆို့မှုများချမှတ်ခဲ့ကြောင်း၊ အဆိုပါအရေးယူပိတ်ဆို့မှုများတွင် အမေရိကန်ရေနံလုပ်ငန်းများကိုသာ ဗင်နီဇွဲလား PDVSA  နှင့်စီးပွားရေးအရ ဆက်ဆံခြင်းမပြုလုပ်ရန် တားမြစ်ထားခြင်းဖြစ်ကြောင်း၊ သို့သော်ယခုအခါ အမေရိကန်အစိုးရသည် အိန္ဒိယနိုင်ငံအား ဗင်နီဇွဲလားရေနံ တင်သွင်းမှုကိုလျှော့ချရန် သံတမန်ရေးအရ ဖိအားပေးမှုများပြုလုပ်လာသကဲ့သို့ ဗင်နီဇွဲလားနိုင်ငံ၏ ဘဏ္ဍာရေးကဏ္ဍအပေါ်၌ပါ အရေးယူပိတ်ဆို့မှုအသစ်များထပ်မံချမှတ်ရန်နှင့် နိုင်ငံတကာဘဏ္ဍာရေး စနစ်မှ ဖယ်ထွက်သွားရန်အတွက်ပါ စီစဉ်လျက်ရှိကြောင်း၊ ဗင်နီဇွဲလားနိုင်ငံအား နိုင်ငံတကာဘဏ္ဍာရေးစနစ်မှ ဖယ်ထုတ်လိုက်မည်ဆိုပါက အိန္ဒိယနိုင်ငံအတွက် လောင်စာဆီလိုအပ်ချက်ပြဿနာများ ဖြစ်ပေါ်လာနိုင်သကဲ့သို့ ဗင်နီဇွဲလားနိုင်ငံအတွက်လည်း နိုင်ငံ့ဝင်ငွေကျဆင်းသွားမည့် အခြေအနေမျိုးအား ကြုံတွေ့ရနိုင်ကြောင်း၊ ထို့ကြောင့် ဗင်နီဇွဲလားနိုင်ငံသည် အိန္ဒိယနိုင်ငံသို့ ရေနံဆက်လက်တင်ပို့ကာ ရောင်းရငွေရရှိနိုင်စေရေးအတွက် အိန္ဒိယနိုင်ငံအနေဖြင့် ဗင်နီဇွဲလားနိုင်ငံမှရေနံတင်သွင်းမှုများအား အိန္ဒိယရူပီးငွေဖြင့် ပေးချေရန် ဗင်နီဇွဲလားနိုင်ငံကအဆိုပြုခဲ့ခြင်းဖြစ်ကြောင်း သိရှိရပါသည်။

ဗင်နီဇွဲလားနိုင်ငံ၏ အဆိုပြုချက်အရ အိန္ဒိယနိုင်ငံ၊ စွမ်းအင်ဝန်ကြီးဌာနသည် အိန္ဒိယရူပီး ငွေဖြင့် ပေးချေနိုင်မည့်စနစ်တစ်ခုကို အကောင်အထည်ဖော်ရေးနှင့်စပ်လျဉ်းသည့် အဆိုပြုချက်တစ်ခုကို အိန္ဒိယနိုင်ငံခြားရေးဝန်ကြီးဌာနထံသို့တင်ပြထားကြောင်း၊ ယင်းငွေပေးချေမှုစနစ်အရ ဗင်နီဇွဲလားနိုင်ငံထံမှ ဝယ်ယူတင်သွင်းမည့် အလုံးစုံသောရေနံတင်သွင်းမှုများအတွက် အိန္ဒိယရူပီးငွေဖြင့် ပေးချေသွားမည်ဖြစ်သည့်အပြင် အိန္ဒိယအစိုးရသည် အီရန်နိုင်ငံထံမှတင်သွင်းသည့် ရေနံများကိုလည်း အိန္ဒိယရူပီးငွေဖြင့်ပင်ပေးချေသွားရန် ရည်ရွယ်ထားသည်ဟု သိရှိရပါသည်။

အိန္ဒိယနှင့် ဗင်နီဇွဲလားနှစ်နိုင်ငံအကြားအဓိကကုန်သွယ်ရေးပစ္စည်းမှာ ရေနံဖြစ်သည့်အတွက် အိန္ဒိယအစိုးရသည် ဗင်နီဇွဲလားနိုင်ငံထံမှ ရေနံများတင်သွင်းလျက်ရှိသော ပြည်တွင်းရှိရေနံချက် လုပ်ငန်းများအနေဖြင့် အမေရိကန်အစိုးရနှင့် ဆက်နွယ်ပတ်သက်သော ငွေပေးချေမှုစနစ်များအား ရှောင်ကျဉ်ကြရန် မူလကတည်းက သတိပေးညွှန်ကြားထားပြီးဖြစ်ကြောင်း၊ လက်ရှိအချိန်တွင် အိန္ဒိယနိုင်ငံမှပုဂ္ဂလိက ရေနံချက်လုပ်ငန်း(၂) ခုသည် ဗင်နီဇွဲလားရေနံများအား တစ်နေ့လျှင် စည်ပေါင်း (၃) သိန်းခန့် နေ့စဉ်တင်သွင်းလျက်ရှိသည်ဟု သိရှိရကြောင်းဖြင့် www.economictimes.com တွင် ဖော်ပြပါရှိပါသည်။

အိန္ဒိယပြည်တွင်းရှယ်ယာဈေးကွက်၌ ပြည်ပရင်းနှီးမြှုပ်နှံမှုများမြင့်တက်လာခဲ့ခြင်းနှင့်အတူ အိန္ဒိယ ရူပီးငွေတန်ဖိုးမှာ (၂)လတာကာလအတွင်း အမြင့်ဆုံးသို့ရောက်ရှိခဲ့မှု

အိန္ဒိယပြည်တွင်းရှယ်ယာဈေးကွက်၌ ပြည်ပရင်းနှီးမြှုပ်နှံမှုများမြင့်တက်လာခဲ့ခြင်းနှင့်အတူ အိန္ဒိယ ရူပီးငွေတန်ဖိုးမှာ (၂)လတာကာလအတွင်း အမြင့်ဆုံးသို့ရောက်ရှိခဲ့မှု

အိန္ဒိယပြည်တွင်းရှယ်ယာဈေးကွက်အတွင်းသို့ ပြည်ပရင်းနှီးမြှုပ်နှံမှုများ မြင့်တက်လာခဲ့ခြင်းနှင့်အတူ အိန္ဒိယရူပီးငွေတန်ဖိုးသည်လည်း (၂)လတာကာလအတွင်း အမြင့်ဆုံးအနေအထားသို့ ရောက်ရှိခဲ့ပြီး အမေရိကန်တစ်ဒေါ်လာလျှင် (၇၀) ရူပီးအောက်သို့ ပထမဆုံးအကြိမ်အဖြစ်ရောက်ရှိခဲ့သည်ဟု သိရှိရပါသည်။

အိန္ဒိယနိုင်ငံ၊ နိုင်ငံခြားငွေလဲလှယ်ရေးနှင့် ငွေကြေးဆိုင်ရာစာချုပ်စာတမ်းများဘုတ်အဖွဲ့ (SEBI) က ၂၀၁၉ ခုနှစ်၊ မတ်လ (၆) ရက် (ဗုဒ္ဓဟူးနေ့) တွင် ထုတ်ပြန်သည့်အစီရင်ခံစာ၌ လွန်ခဲ့သည့် ဖေဖော်ဝါရီလအတွင်း အိန္ဒိယရူပီးငွေကိုအခြေခံသော အိန္ဒိယပြည်တွင်းရှယ်ယာများအား ပြည်ပရင်းနှီးမြှုပ်နှံသူများ၏ဝယ်ယူမှုပမာဏမှာတန်ဖိုးပမာဏအားဖြင့် အမေရိကန်ဒေါ်လာ(၂.၃၇) ဘီလီယံခန့်ရှိခဲ့ကြောင်း၊အဆိုပါပမာဏသည် ၂၀၁၇ ခုနှစ်၊ နိုဝင်ဘာလနောက်ပိုင်း (၁၅) လတာကာလအတွင်း အိန္ဒိယရှယ်ယာများအား ပြည်ပရင်းနှီးမြှုပ်နှံသူများ၏ ဝယ်ယူမှုအများဆုံးပင်ဖြစ်သည်ဟု ဖော်ပြထားခြင်းကို အကြောင်းပြု၍ အိန္ဒိယရူပီးငွေတန်ဖိုးမှာလည်း လိုက်ပါမြင့်တက်ခဲ့ခြင်းဖြစ်ကြောင်း၊ ထို့ပြင် အိန္ဒိယ-ပါကစ္စတန်ပဋိပက္ခစတင်ဖြစ်ပေါ်ခဲ့ပြီးနောက် ရုတ်သိမ်းခဲ့သည့် အိန္ဒိယနိုင်ငံဆိုင်ရာ ပါကစ္စတန်သံအမတ်အား အိန္ဒိယနိုင်ငံသို့ ပြန်လည်စေလွှတ်သွားရန် စီစဉ်လျက်ရှိသည်ဟု ၂၀၁၉ ခုနှစ်၊ မတ်လ (၆) ရက် (ဗုဒ္ဓဟူးနေ့) တွင် ပါကစ္စတန်နိုင်ငံ နိုင်ငံခြားရေးဝန်ကြီး ရှာမီမွတ်ကူရီရှီက ပြောကြားခဲ့ရာ အိန္ဒိယနှင့် ပါကစ္စတန်နှစ်နိုင်ငံအကြားတင်းမာမှုများ ပြေလျော့သွားနိုင်မည့်အနေ အထားရှိခြင်းသည်လည်း အိန္ဒိယရူပီးငွေတန်ဖိုးကို မြင့်တက်စေသည့်အခြားသော အချက်တစ်ခုဖြစ်ကြောင်း သိရှိရပါသည်။

၂၀၁၉ ခုနှစ်၊ မတ်လ(၇)ရက် (ကြာသပတေးနေ့)  နံနက်ပိုင်းတွင် အိန္ဒိယငွေကြေးဈေးကွက်၌ ရူပီးငွေတန်ဖိုးမှာ ၀.၄၇% မြင့်တက်ခဲ့ပြီး အမေရိကန်တစ်ဒေါ်လာ (၆၉.၉၅) ရူပီး လဲလှယ်မှုနှုန်းသို့ ရောက်ရှိခဲ့ကြောင်း၊ အိန္ဒိယရူပီးငွေတန်ဖိုးသည် (၃) ရက်ဆက်တိုက်မြင့်တက်ခဲ့ခြင်းဖြစ်ပြီး အဆိုပါ လဲလှယ်မှုနှုန်းသည် ၂၀၁၉ ခုနှစ်၊ ဇန်နဝါရီလ (၈) ရက်နေ့နောက်ပိုင်း (၂) လတာကာလအတွင်း အိန္ဒိယရူပီးငွေတန်ဖိုးအမြင့်ဆုံးဖြစ်ပြီး ပထမဆုံးအကြိမ်အဖြစ် အမေရိကန်တစ်ဒေါ်လာလျှင်(၇၀) ရူပီးအောက်သို့ ရောက်ရှိခဲ့ခြင်းပင်ဖြစ်သည်ဟု သိရှိရကြောင်း www.livemint.com တွင်ဖော်ပြပါရှိပါသည်။

လွန်ခဲ့သည့်ဖေဖော်ဝါရီလအတွင်း အမေရိကန်ပြည်ထောင်စု၏ဝန်ဆောင်မှုလုပ်ငန်းကဏ္ဍတိုးတက် မှုနှုန်းမြင့်တက်ခဲ့သည်ဟူသောအစီရင်ခံစာထွက်ပေါ်ပြီးနောက် အမေရိကန်ဒေါ်လာတန်ဖိုးမှာဆက်လက် အားကောင်းလာခဲ့မှု

လွန်ခဲ့သည့်ဖေဖော်ဝါရီလအတွင်း အမေရိကန်ပြည်ထောင်စု၏ဝန်ဆောင်မှုလုပ်ငန်းကဏ္ဍတိုးတက်မှုနှုန်း မြင့်တက်ခဲ့သည်ဟူသောအစီရင်ခံစာထွက်ပေါ်ပြီးနောက် အမေရိကန်ဒေါ်လာတန်ဖိုးမှာ ဆက်လက်အားကောင်းလာခဲ့မှု

အမေရိကန်ပြည်ထောင်စု၏ ဝန်ဆောင်မှုလုပ်ငန်းကဏ္ဍ တိုးတက်မှုနှုန်းသည် လွန်ခဲ့သည့် ဖေဖော်ဝါရီလအတွင်း၌ မြင့်တက်ခဲ့သည်ဟူသော အမေရိကန်ပြည်ထောင်စု၊ အရီဇိုးနားပြည်နယ်၊ တမ်ပီမြို့အခြေစိုက် Institute of Supply Management (ISM) ဌာနကထုတ်ပြန်သည့် အစီရင်ခံစာ ထွက်ပေါ်ပြီးနောက် အမေရိကန်ဒေါ်လာတန်ဖိုးမှာ ဆက်လက်အားကောင်းလာခဲ့သည်ဟု သိရှိရပါသည်။

၂၀၁၉ ခုနှစ်၊ မတ်လ (၅) ရက် (အင်္ဂါနေ့) တွင် နိုင်ငံတစ်ဝန်းစီးပွားရေးလုပ်ငန်းများနှင့် ပတ်သက်၍ စီမံခန့်ခွဲမှုဆိုင်ရာ စာရင်းအချက်အလက်များထုတ်ပြန်ပေးသော Institute of Supply Management (ISM) ဌာနက ထုတ်ပြန်သည့်အစီရင်ခံစာ၌ ၂၀၁၉ ခုနှစ်၊ ဖေဖော်ဝါရီလအတွင်း နိုင်ငံတစ်ဝန်းရှိ ဝန်ဆောင်မှုလုပ်ငန်းကဏ္ဍတိုးတက်မှုအခြေအနေမှာ ဇန်နဝါရီလတွင် ဖြစ်ပေါ်ခဲ့သည့်နှုန်းထက်ပိုမိုခဲ့ပြီး တိုးတက်မှုအညွှန်းကိန်းအမှတ် (၅၉.၇) မှတ်သို့ရောက်ရှိခဲ့သည်ဟု ဖော်ပြထားရာအမေရိကန်ပြည်ထောင်စု၏ စီးပွားရေးတိုးတက်မှုအခြေအနေအပေါ်အကောင်းမြင်ယုံကြည်မှု များနှင့်အတူ ရင်းနှီးမြှုပ်နှံသူများသည် အမေရိကန်ဒေါ်လာဝယ်ယူစုဆောင်းမှုများပိုမိုပြုလုပ်လာကြသောကြောင့် အမေရိကန်ဒေါ်လာတန်ဖိုးမှာ ဆက်လက်အားကောင်းလာခဲ့ခြင်းဖြစ်ကြောင်း၊ ထို့ပြင် တရုတ်နိုင်ငံ၏ စီးပွားရေးတိုးတက်မှုနှုန်းမှာ ၂၀၁၈ ခုနှစ်တွင် ၆.၆% ခန့် ရှိခဲ့သော်လည်း ၂၀၁၉ ခုနှစ်တွင်မူ စီးပွားရေးတိုးတက်မှုနှုန်းမှာ အနည်းဆုံးအနေဖြင့် ၆%  ခန့်သာရှိနိုင်သည်ဟု ၂၀၁၉ ခုနှစ်၊ မတ်လ(၅) ရက်(အင်္ဂါနေ့) တွင် တရုတ်အစိုးရက အစီရင်ခံစာထုတ်ပြန်ခဲ့ခြင်းကြောင့် တရုတ်ယွမ်ငွေ တန်ဖိုးအားပျော့ခဲ့ခြင်းသည်လည်း အမေရိကန်ဒေါ်လာတန်ဖိုးကို မြင့်တက်စေသည့်အခြားသော အချက်တစ်ခုဖြစ်ကြောင်း သိရှိရပါသည်။

၂၀၁၉ ခုနှစ်၊ မတ်လ(၆)ရက်(ဗုဒ္ဓဟူးနေ့)တွင် ကမ္ဘာ့ငွေကြေးဈေးကွက်အတွင်း အမေရိကန်ဒေါ်လာတန်ဖိုးမှာ ၀.၁၉% မြင့်တက်ခဲ့ပြီး ရက်သတ္တပတ် (၂) ပတ်အတွင်းအမြင့်ဆုံးသို့ရောက်ရှိခဲ့ကာ ဗြိတိန်စတာလင်တစ်ပေါင်လျှင် အမေရိကန်ဒေါ်လာ (၁.၃၁၇၀) ဒေါ်လာ လဲလှယ်မှုနှုန်းသို့လည်းကောင်း၊ တစ်ယူရိုလျှင် အမေရိကန်ဒေါ်လာ (၁.၁၃၀၂) ဒေါ်လာ လဲလှယ်မှုနှုန်းသို့လည်းကောင်း၊ အမေရိကန် တစ်ဒေါ်လာလျှင် ဂျပန်ယန်းငွေ (၁၁၁.၈၉) ယန်းနှင့် တရုတ်ယွမ်ငွေ (၆.၇၀၅၃) ယွမ် လဲလှယ်မှုနှုန်းသို့လည်းကောင်း အသီးသီးဖြစ်ပေါ်ခဲ့သည်ဟုသိရှိရကြောင်းဖြင့် www.xinhuanet.com တွင်ဖော်ပြပါရှိပါသည်။

အမေရိကန်- တရုတ် နှစ်နိုင်ငံသမ္မတ(၂)ဦးအကြား ကုန်သွယ်ရေးသဘောတူညီမှု ရရှိဖွယ်ရှိသည်ဟူသော သတင်းများထွက်ပေါ်လာပြီးနောက် ကမ္ဘာ့ရေနံဈေးနှုန်းမှာ အနည်းငယ်မြင့်တက်ခဲ့မှု

အမေရိကန်- တရုတ် နှစ်နိုင်ငံသမ္မတ(၂) ဦးအကြား ကုန်သွယ်ရေးသဘောတူညီမှု ရရှိဖွယ်ရှိသည်ဟူသော သတင်းများထွက်ပေါ်လာပြီးနောက် ကမ္ဘာ့ရေနံဈေးနှုန်းမှာ အနည်းငယ်မြင့်တက်ခဲ့မှု

အမေရိကန်-တရုတ်ကုန်သွယ်ရေးဆွေးနွေးမှုများမှ တိုးတက်မှုရလဒ်ကောင်းများရရှိလျက်ရှိခြင်းကြောင့် တရုတ်နိုင်ငံအပေါ် သွင်းကုန်ခွန်တိုးမြှင့်ကောက်ခံမည့်အစီအစဉ်အား သမ္မတ ဒေါ်နယ်ထရန့်က နောက်ဆုတ်ရွှေ့ဆိုင်းခဲ့ပြီး အမေရိကန်နိုင်ငံ၏ စိုက်ပျိုးရေးထုတ်ကုန်ပစ္စည်းများအပေါ် သွင်းကုန်ခွန်တိုးမြှင့်ချမှတ်ထားမှုများအားပြန်လည်ရုတ်သိမ်းပေးရန် သမ္မတဒေါ်နယ်ထရန့်က တရုတ်အစိုးရထံတောင်းဆိုထားသည်ဟူသောသတင်းများထွက်ပေါ်နေခြင်းနှင့်အတူ အမေရိကန်နှင့်  တရုတ်သမ္မတတို့သည် ယခုနှစ်မတ်လကုန်ပိုင်းတွင် ထိပ်သီးဆွေးနွေးပွဲပြုလုပ်ကာနှစ်နိုင်ငံ  ကုန်သွယ်ရေးဆိုင်ရာတရားဝင်သဘောတူညီမှုရယူနိုင်ဖွယ်ရှိသည်ဟု နယူးယောက်အခြေစိုက် Wall Street Journal ၏ထုတ်ပြန်ရေးသားမှုများကြောင့် ကမ္ဘာပေါ်တွင် စီးပွားရေးအင်အားကြီးနိုင်ငံ နှစ်နိုင်ငံတို့၏ ကုန်သွယ်ရေးပြေလည်မှုရရှိခြင်းဂယက်ကြောင့် ကမ္ဘာတစ်ဝန်းစီးပွားရေးတိုးတက်မှုများ ဖြစ်ပေါ်လာဖွယ်ရှိခြင်းနှင့်အတူ ကုန်ထုတ်လုပ်မှုကဏ္ဍအားကောင်းကာ ကမ္ဘာတစ်ဝန်း ရေနံဝယ်လိုအားပါမြင့်တက်လာဖွယ်ရှိသည်ဟူသော ခန့်မှန်းချက်များကြောင့် ကမ္ဘာ့ရေနံဈေးနှုန်းများမှာ မြင့်တက်လာခဲ့ခြင်းဖြစ်ကြောင်း သိရှိရပါသည်။

ထို့ပြင် လွန်ခဲ့သည့် ဖေဖော်ဝါရီလအတွင်း အိုပက်အဖွဲ့၏ရေနံထုတ်လုပ်မှုပမာဏမှာ ၂၀၁၅ ခုနှစ်နောက်ပိုင်း အနည်းဆုံးပမာဏဖြစ်သည့် တစ်နေ့လျှင်စည်ပေါင်း(၃၀.၆၈) သန်းခန့်သို့ လျော့ကျ သွားခဲ့ခြင်းနှင့် လွန်ခဲ့သည့်ရက်သတ္တပတ်အတွင်း အမေရိကန်နိုင်ငံတစ်ဝန်း ရေနံတူးစင် အရေအတွက် မှာ တူးစင်(၁၀) စင်ပိတ်သိမ်းခဲ့ပြီး စုစုပေါင်းရေနံတူးစင်အရေအတွက် (၈၄၅) စင်သာကျန်ရှိတော့သည်ဟု Baker Hughes ကုမ္ပဏီက အစီရင်ခံစာထုတ်ပြန်ခဲ့ခြင်းတို့သည်လည်း ရေနံဈေးနှုန်းများကို မြင့်တက်စေသည့် အခြားသောအချက်များဖြစ်ကြောင်း သိရှိရပါသည်။

၂၀၁၉ ခုနှစ်၊ မတ်လ(၅)ရက်(အင်္ဂါနေ့)နံနက်ပိုင်းတွင် နယူးယောက်ဈေးကွက်၌ ဧပြီလ အတွက် WTI ရေနံစိမ်းကြိုတင်ရောင်းဝယ်မှုဈေးနှုန်းမှာ ၁.၄% မြင့်တက်ခဲ့ပြီးတစ်စည်လျှင် အမေရိကန် ဒေါ်လာ (၅၆.၅၉) ဒေါ်လာသို့လည်းကောင်း၊ လန်ဒန်​ဈေးကွက်၌ ဘရန့်ရေနံစိမ်းတစ်စည်၏ဈေးနှုန်းမှာ ၀.၉% မြင့်တက်ခဲ့ပြီး တစ်စည်လျှင် အမေရိကန်ဒေါ်လာ (၆၅.၆၇) ဒေါ်လာသို့လည်းကောင်း အသီးသီး မြင့်တက်ခဲ့သည်ဟု www.reuters.com တွင် ဖော်ပြပါရှိပါသည်။

အမေရိကန်အစိုးရ၏ အရေးယူပိတ်ဆို့မှုများကြောင့် ဗင်နီဇွဲလားနိုင်ငံ၏ပြည်ပသို့ရေနံတင်ပို့မှုပမာဏမှာ ၄၀%ခန့်ကျဆင်းခဲ့မှု

အမေရိကန်အစိုးရ၏ အရေးယူပိတ်ဆို့မှုများကြောင့် ဗင်နီဇွဲလားနိုင်ငံ၏ပြည်ပသို့ရေနံတင်ပို့မှုပမာဏမှာ ၄၀%ခန့်ကျဆင်းခဲ့မှု

ဗင်နီဇွဲလားနိုင်ငံ၌ အစိုးရအပြောင်းအလဲဖြစ်ပေါ်ရန်လိုလားလျက်ရှိသော အမေရိကန်အစိုးရသည် ၂၀၁၉ ခုနှစ်၊ ဇန်နဝါရီလကုန်ပိုင်းတွင် ဗင်နီဇွဲလားနိုင်ငံပိုင်ရေနံလုပ်ငန်း Petroleos de Venezuela SA (PDVSA) အားအရေးယူပိတ်ဆို့မှုများ ချမှတ်ခဲ့ခြင်းကြောင့် ၂၀၁၉ ခုနှစ်၊ ဖေဖော်ဝါရီလအတွင်း ဗင်နီဇွဲလားနိုင်ငံ၏ ပြည်ပသို့ရေနံတင်ပို့မှုပမာဏမှာ ၄၀% ခန့်ကျဆင်းခဲ့သည်ဟု သိရှိရပါသည်။

PDVSA မှ ယခုရက်ပိုင်းအတွင်းထုတ်ပြန်သည့် အစီရင်ခံစာအရ ဗင်နီဇွဲလားနိုင်ငံသည် လွန်ခဲ့သည့် (၃) လတာကာလအတွင်း တစ်နေ့လျှင် ရေနံစည်ပေါင်း အနည်းဆုံး(၁.၄၇) သန်းမှ အများဆုံး(၁.၆၆) သန်းအထိ နေ့စဉ် ပြည်ပသို့တင်ပို့လျက်ရှိရာ အမေရိကန်အစိုးရက ၂၀၁၉ ခုနှစ်၊ ဇန်နဝါရီလ(၂၈) ရက်မှစ၍ အရေးယူပိတ်ဆို့မှုများ ချမှတ်ခဲ့ခြင်းကြောင့် ၂၀၁၉ ခုနှစ်၊ ဖေဖော်ဝါရီလတွင်မူ တစ်နေ့လျှင်ရေနံစည်ပေါင်း(၉.၂) သိန်းခန့်သာ ပြည်ပသို့တင်ပို့နိုင်တော့ရာနိုင်ငံ၏ပြည်ပသို့ ရေနံတင်ပို့မှုပမာဏမှာ ၄၀% ခန့်ကျဆင်းသွားခဲ့ခြင်းဖြစ်ပြီး အာရှနိုင်ငံများဖြစ်သည့် အိန္ဒိယ၊ တရုတ်နှင့်စင်ကာပူနိုင်ငံများသို့တင်ပို့ခဲ့ခြင်းဖြစ်ကြောင်း၊ ဗင်နီဇွဲလားနိုင်ငံသည်ပြည်တွင်း၌ ရေနံစိမ်း တူးဖော်ထုတ်လုပ်ကာ ပြည်ပသို့တင်ပို့နေသည့်နိုင်ငံဖြစ်သော်လည်း ပြည်တွင်း၌အသုံးပြုရန်အတွက် ပြည်ပမှသန့်စင်ပြီးလောင်စာများကို ပြန်လည်တင်သွင်းနေရသည်ဖြစ်ရာ အမေရိကန်အစိုးရက ဗင်နီဇွဲလားနိုင်ငံပိုင်ရေနံလုပ်ငန်း PDVSA နှင့် ဘဏ္ဍာရေးကဏ္ဍအပေါ် အရေးယူပိတ်ဆို့မှုများ ချမှတ်ခဲ့ခြင်းကြောင့် အခက်အခဲများကြုံတွေ့လာခဲ့ရာ PDVSA သည် ရေနံစိမ်းနှင့် သန့်စင်ပြီး လောင်စာဆီများအား ဖလှယ်မှုပြုကာ ရေနံကုန်သွယ်လျက်ရှိပြီး ပြည်ပသို့ရေနံများ ဆက်လက်တင်ပို့နိုင်ရန် ကြိုးပမ်းလျက်ရှိသည်ဟု သိရှိရပါသည်။

PDVSA သည် လွန်ခဲ့သည့် ဖေဖော်ဝါရီလအတွင်း တစ်နေ့လျှင် လောင်စာဆီစည်ပေါင်း (၁.၆၅) သိန်းခန့်တင်သွင်းခဲ့ပြီး အမေရိကန်ပြည်ထောင်စုနှင့် ဥရောပနိုင်ငံများထံမှ တင်သွင်းခဲ့ခြင်း ဖြစ်ကြောင်း၊အမေရိကန်အစိုးရ၏အရေးယူပိတ်ဆို့မှုများသည်နိုင်ငံပိုင်ရေနံလုပ်ငန်း၏ဘဏ္ဍာရေးနှင့် လုပ်ငန်းလည်ပတ်မှုများကိုထိခိုက်စေခဲ့သည်ဟု ဗင်နီဇွဲလားနိုင်ငံရေနံဝန်ကြီး မန်နျူရယ်ကီဗီဒိုက ယခုရက်ပိုင်းအတွင်းပြောကြားခဲ့ကြောင်း၊ ဗင်နီဇွဲလားနိုင်ငံသည် ယခုမတ်လအတွင်း ပြည်ပသို့ တစ်နေ့လျှင်ရေနံစည်ပေါင်း(၁) သန်းခန့် နေ့စဉ်တင်ပို့နိုင်ရန်ရည်မှန်းထားသည်ဟု www.reuters.com တွင်ဖော်ပြပါရှိပါသည်။

အမေရိကန်ပြည်ထောင်စုအတွက် အကျိုးပြုမည့် ဒေါ်လာတန်ဖိုးအားကောင်းမှုကို လိုလားသည်ဟု အမေရိကန်သမ္မတဒေါ်နယ်ထရန့်ကပြောကြားခဲ့မှု

အမေရိကန်ပြည်ထောင်စုအတွက် အကျိုးပြုမည့် ဒေါ်လာတန်ဖိုးအားကောင်းမှုကို လိုလားသည်ဟု အမေရိကန်သမ္မတဒေါ်နယ်ထရန့်ကပြောကြားခဲ့မှု

အမေရိကန်သမ္မတ ဒေါ်နယ်ထရန့်သည် အမေရိကန်ဗဟိုဘဏ် ဝေဖန်ပြောကြားမှုများ ပြုလုပ်ခဲ့ပြီး အမေရိကန်ပြည်ထောင်စုအတွက် အကျိုးပြုမည့် ဒေါ်လာတန်ဖိုးအားကောင်းမှုကို လိုလားသည်ဟု ပြောကြားခဲ့ကြောင်း၊ ၂၀၁၉ ခုနှစ်၊ မတ်လ(၂)ရက်(စနေနေ့)တွင် အမေရိကန် ပြည်ထောင်စု၊ မေရီလန်းပြည်နယ်၌ပြုလုပ်သည့် နိုင်ငံရေးလှုပ်ရှားမှုဆိုင်ရာ ပုံမှန်ညီလာခံ (Conservative Political Action Conference) တွင် သမ္မတဒေါ်နယ်ထရန့်က ပြောကြားရာ၌ လက်ရှိအချိန်တွင် အမေရိကန်ပြည်ထောင်စု၏ စီးပွားရေး အခြေအနေမှာ အရှိန်အဟုန်မပြတ် တိုးတက်လျက်ရှိရာ တွင် အမေရိကန်ဗဟိုဘဏ်ကကြားဝင်ဆောင်ရွက်မှုများပြုလုပ်ပေးလျက်ရှိပြီး အမေရိကန်ဒေါ်လာ တန်ဖိုးမှာလွန်စွာအားကောင်းလျက်ရှိကြောင်း၊ အမေရိကန်ပြည်ထောင်စု၏စီးပွားရေး အခြေအနေ မှာအတိတ်ကာလများနှင့်မတူ ဖွံ့ဖြိုးတိုးတက်လျက်ရှိစဉ်တွင် အခြားသောနိုင်ငံများသည် ကျားကုတ် ကျားခဲရုန်းကန်နေကြရသည်ဖြစ်ရာ ယင်းသို့သောအခြေအနေသည် အမေရိကန်နိုင်ငံအတွက် အောင်မြင်ရန် ပိုမိုခက်ခဲစေကြောင်း၊ မိမိအနေဖြင့် တန်ဖိုးအားကောင်းသည့် အမေရိကန်ဒေါ်လာကို လိုလားပါသော်လည်း မိမိလိုချင်သည့် အမေရိကန်ဒေါ်လာမှာ တိုင်းပြည်အတွက်စီးပွားဖြစ်ထွန်း စေမည့်တန်ဖိုးအားကောင်းသော ဒေါ်လာသာဖြစ်ကြောင်း၊ တန်ဖိုးအားကောင်းလွန်းသည့်အတွက် အခြားသောနိုင်ငံများနှင့် စီးပွားရေးယှဉ်တွဲလုပ်ဆောင်ရန် အတားအဆီးဖြစ်စေနိုင်သော၊ အမေရိကန် ပြည်ထောင်စု၌ ရင်းနှီးမြှုပ်နှံမှုများ လာရောက်လုပ်ကိုင်ခြင်းကို အဟန့်အတားဖြစ်စေနိုင်သော ဒေါ်လာတန်ဖိုးအားကောင်းမှုကို လိုလား ခြင်းမရှိဟုပြောကြားခဲ့ကြောင်း သိရှိရပါသည်။

သမ္မတဒေါ်နယ်ထရန့်သည် အမေရိကန်ဗဟိုဘဏ်အား ဝေဖန်ပြောကြားမှုများ ပြုလုပ်ရာတွင် အမေရိကန်ဗဟိုဘဏ်တွင် လူကြီးလူကောင်းတစ်ဦးရှိနေကြောင်း၊ အဆိုပါပုဂ္ဂိုလ်ကြီးသည် ကိန်းဂဏန်း အရေအတွက်တင်းကြပ်ခြင်းကို သဘောကျလျက်ရှိပြီး အမေရိကန်ဒေါ်လာတန်ဖိုး လွန်စွာအားကောင်း ခြင်းကိုနှစ်ခြိုက်လျက်ရှိသည်ဟုဝေဖန်ပြောကြားခဲ့ကြောင်း၊ သမ္မတဒေါ်နယ်ထရန့်က ထိုသို့ပြောကြားခြင်းသည်အမည်တပ်၍ပြောကြားခြင်းမဟုတ်သော်လည်း အမေရိကန်ဗဟိုဘဏ်ဥက္ကဋ္ဌ ဂျရွန်မီပေါင်ဝယ် အားရည်ရွယ်ခြင်းဖြစ်သည်ဟု လေ့လာသူများက သုံးသပ်ထားကြောင်း www.bloomberg.com ဖော်ပြပါရှိပါသည်။